Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ant"

Nazm MATCHES FOR "ant"

Nazm

intisab

aaj ke naam
aur
aaj ke Gam ke naam
aaj kaa Gam ki hai zindagii ke bhare gulsitaa.n se KHafaa
zard patto.n kaa ban
zard patto.n kaa ban jo miraa des hai
dard kii anjuman jo miraa des hai
clerko.n kii afsurda jaano.n ke naam
kirm-KHurda dilo.n aur zabaano.n ke naam
post-mano.n ke naam
taa.nge vaalo.n kaa naam
rail-baano.n ke naam
kaar-KHaano.n ke bhuuke jiyaalo.n ke naam
baadshaah-e-jahaa.n vaalii-e-maa-sivaa, naa.eb-ul-allaah fil-arz
dahqaa.n ke naam
jis ke Dhoro.n ko zaalim ha.nkaa le ga.e
jis kii beTii ko Daaku uThaa le ga.e
haath bhar khet se ek a.ngusht paTvaar ne kaaT lii hai
duusrii maaliye ke bahaane se sarkaar ne kaaT lii hai
jis kii pag zor vaalo.n ke paa.nv-tale
dhajjiyaa.n ho ga.ii hai
un dukhii maa.o.n ke naam
raat me.n jin ke bachche bilakte hai.n aur
nii.nd kii maar khaa.e hu.e baazu.o.n me.n sambhalte nahii.n
dukh bataate nahii.n
minnato.n zaariyo.n se bahalte nahii.n

Faiz Ahmad Faiz
Nazm

ye pichhle ishq ki baaten hain

apne be-ant KHayaalo.n me.n
har ahd nibhaane kii qasme.n

Mohsin Naqvi
Nazm

shishon ka masiha koi nahin

ye ra.ngii.n reze hai.n shaayad
un shoKH bilorii.n sapno.n ke
tum mast javaanii me.n jin se
KHalvat ko sajaayaa karte the

Faiz Ahmad Faiz
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

hubb-e-watan

ai sip.har-e-barii.n ke sayyaaro
ai fazaa-e-zamii.n ke gul-zaaro
ai pahaa.Do.n kii dil-fareb fazaa
ai lab-e-juu kii ThanDii ThanDii havaa
ai anaadil ke naGma-e-saharii
ai shab-e-maahtaab taaro.n bharii
ai nasiim-e-bahaar ke jho.nko
dahr-e-naa-paa.edaar ke dhoko
tum har ik haal me.n ho yuu.n to aziiz
the vatan me.n magar kuchh aur hii chiiz
jab vatan me.n hamaaraa thaa ramnaa
tum se dil baaG baaG thaa apnaa
tum mirii dil-lagii ke saamaa.n the
tum mire dard-e-dil ke darmaa.n the
tum se kaTtaa thaa ra.nj-e-tanhaa.ii
tum se paataa thaa dil shakebaa.ii
aan ik ik tumhaarii bhaatii thii
jo adaa thii vo jii lubhaatii thii
karte the jab tum apnii Gam-KHvaarii
dho.ii jaatii thii.n kulfate.n saarii
jab havaa khaane baaG jaate the
ho ke KHush-haal ghar me.n aate the
baiTh jaate the jab kabhii lab-e-aab
dho ke uThte the dil ke daaG shitaab
koh o sahraa o aasmaan o zamii.n
sab mirii dil-lagii kii shakle.n thii.n
par chhuTaa jis se apnaa mulk o dayaar
jii hu.aa tum se KHud-ba-KHud bezaar
na gulo.n kii adaa KHush aatii hai
na sadaa bulbulo.n kii bhaatii hai
sair-e-gulshan hai jii kaa ik janjaal
shab-e-mahtaab jaan ko hai vabaal
koh o sahraa se taa lab-e-dariyaa
jis taraf jaa.e.n jii nahii.n lagtaa
kyaa hu.e vo din aur vo raate.n
tum me.n aglii sii ab nahii.n baate.n
ham hii Gurbat me.n ho ga.e kuchh aur
yaa tumhaare badal ga.e kuchh taur
go vahii ham hai.n aur vahii duniyaa
par nahii.n ham ko lutf duniyaa kaa
ai vatan ai mire bahisht-e-barii.n
kyaa hu.e tere aasmaan o zamii.n
raat aur din kaa vo samaa.n na rahaa
vo zamii.n aur vo aasmaa.n na rahaa
terii duurii hai morid-e-aalaam
tere chhuTne se chhuT gayaa aaraam
kaaTe khaataa hai baaG bin tere
gul hai.n nazro.n me.n daaG bin tere
miT gayaa naqsh kaamraanii kaa
tujh se thaa lutf zindagaanii kaa
jo ki rahte hai.n tujh se duur sadaa
in ko kyaa hogaa zindagii kaa mazaa
ho gayaa yaa.n to do hii din me.n ye haal
tujh bin ek ek pal hai ik ik saal
sach bataa to sabhii ko bhaataa hai
yaa ki mujh se hii teraa naataa hai
mai.n hii kartaa huu.n tujh pe jaan nisaar
yaa ki duniyaa hai terii aashiq-e-zaar
kyaa zamaane ko tuu aziiz nahii.n
ai vatan tuu to aisii chiiz nahii.n
jin o insaan kii hayaat hai tuu
murG o maahii kii kaa.enaat hai tuu
hai nabaataat kaa numuu tujh se
ruukh tujh bin hare nahii.n hote
sab ko hotaa hai tujh se nashv-o-numaa
sab ko bhaatii hai terii aab-o-havaa
terii ik musht-e-KHaak ke badle
luu.n na hargiz agar bahisht mile
jaan jab tak na ho badan se judaa
ko.ii dushman na ho vatan se havaa

Altaf Hussain Hali
Nazm

barsat ki bahaaren

kyaa kyaa rakhe hai.n yaarab saamaan terii qudrat
badle hai rang kyaa kyaa har aan terii qudrat
sab mast ho rahe pahchaan terii qudrat
tiitar pukaarte hai.n sub.haan terii qudrat
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

kaun dekhega

ye ek saa.ns jhamelo.n-bharii jugo.n me.n rachii
is apnii saa.ns me.n kaun apnaa ant dekhegaa

Majeed Amjad
Nazm

aaKHiri bosa

vo us kaa aaKHirii bosa
jo in martii hu.ii sadiyo.n me.n
ik be-ant lamha thaa
talaatum me.n kisii saahil kii pahlii diid saa
anmol aur be-ant lamha
me.n jise ashko.n kii is diivaar me.n
raKHne banaataa dekh saktaa huu.n
mire ho.nTo.n pe us ke aaKHirii bose kii lazzat sabt hai
vo us kaa aaKHirii bosa jo mai.n apne badan me.n
saa.ns-suurat aataa jaataa dekh saktaa huu.n
lahuu kii KHaamushii me.n sarsaraataa dekh saktaa huu.n

Amjad Islam Amjad
Nazm

aamadgi

ek ik ii.nT girii pa.Dii hai
sab diivaare.n kaa.np rahii hai.n

Akhtarul Iman
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

ab jidhar bhi jate hain

pahle aisaa hotaa thaa
bhaa.nt bhaa.nt ke bandar
shahr kii fasiilo.n par
mahfile.n jamaate the
ghar me.n kuud aate the
haath me.n se bachcho.n ke
roTii noch jaate the
ab to vo madaarii bhii
KHaalii haath aataa hai
bhiik maa.ng kar ghar ghar
ghar ko lauT jaataa hai
ab gharo.n me.n chi.Diyo.n kaa
shor kyuu.n nahii.n hotaa
raat ko ko.ii ulluu
pe.D par nahii.n rotaa
pe.D par nahii.n rotaa
la.Dte la.Dte chi.Diyaa.n kyuu.n
farsh par nahii.n girtii.n
billiyaa.n chhato.n par kyuu.n
ghuumtii nahii.n phirtii.n
ab na ko.ii bulbul hai
aur na ko.ii mainaa hai
ab na ko.ii tiitar hai
aur na ko.ii totaa hai
kis se puuchhne jaa.e.n
mor kaisaa hotaa hai
Toliyaa.n kabuutar kii
kho ga.ii.n fazaa.o.n me.n
titliyo.n ke ra.ngii.n par
bah ga.e havaa.o.n me.n
mu.nh-a.ndhere ab murGaa
baa.ng kyuu.n nahii.n detaa
ghar me.n ko.ii bakrii kaa
naam kyuu.n nahii.n letaa
kyaa hu.e daraKHto.n par
gho.nsle parindo.n ke
ko.ii bhii nahii.n kahtaa
qisse ab darindo.n ke
nanhe nanhe chuuzo.n par
chiil kaa jhapaTnaa ab
dekhne kahaa.n jaa.e.n
raaste me.n saa.nDo.n kaa
pahro.n la.Dte rahnaa ab
dekhne kahaa.n jaa.e.n
chhipkilii kii jiitii dum
ab thiraktii kyaa paa.e.n
ra.ng badalte girgiT ko
maarte kahaa.n jaa.e.n
gaa.e bhai.ns kaa reva.D
ab idhar nahii.n aataa
uu.nT Te.Dhaa-me.Dhaa saa
ab nazar nahii.n aataa
ab na gho.De haathii hai.n
aur na vo baraatii hai.n
ab galii me.n kutto.n kaa
bhau.nknaa nahii.n hotaa
raat chhat pe sote hai.n
bhuut dekh kar ko.ii
chau.nknaa nahii.n hotaa
ab jidhar bhii jaate hai.n
aadmii ko paate hai.n

Mohammad Alvi
Nazm

aligarh

KHudaa ke fazl se ahl-e-hunar hai.n ahl-e-fan sab hai.n
magar De.Dh ii.nT kii masjid banaane me.n magan sab hai.n

Syeda Farhat
Nazm

chhoTi si shopping

chhoTii sii!
ye shopping thii
yaa!
ko.ii jaaduu-Tonaa
lambaa chau.Daa shahr achaanak
ban kar
ek khilaunaa
itihaaso.n kaa jaal to.D ke
daa.Dhii
pag.Dii
uu.nT chho.D ke

Nida Fazli
Nazm

pagal-pan

ik parda kaalii maKHmal kaa aa.nkho.n par chhaane lagtaa hai
ik bha.nvar hazaaro.n shaklo.n kaa dil ko dahlaane lagtaa hai
ik tez hinaa.ii KHushbuu se har saa.ns chamakne lagtaa hai
ik phuul tilismii ra.ngo.n kaa galiyo.n me.n damakne lagtaa hai
saa.npo.n se bhare ik jangal kii aavaaz sunaa.ii detii hai
har ii.nT makaano.n ke chhajjo.n kii KHuun dikhaa.ii detii hai

Muneer Niyazi
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

aise nahin hota

bas ik apne tahaffuz ke liye
duniyaa ko kitnaa be-tahaffuz kar diyaa tum ne
ye duniyaa vo nahii.n
jo aaj se pahle thii
ye farmaan jaarii kar diyaa tum ne
magar tum kaun sii duniyaa me.n rahte ho
ye duniyaa to vahii hai
jis me.n jab chaaho
tum apne hukm manvaate ho
taaqat kii zabaa.n me.n baat karte ho
tumhaare hukm ko jo maan.ne me.n der karte hai.n
tum un ko apnii dahshat se Daraate ho
shikasta haDDiyo.n ko aatishii.n tannuur kaa ii.ndhan banaate ho
jo muflis hai.n unhe.n tum aur bhii muflis banaate ho

Ashfaq Husain
Nazm

machhli ki bu

bistar me.n leTe leTe
us ne sochaa
''mai.n moTaa hotaa jaataa huu.n
kal mai.n apne niile suiT ko
alter karne
darzii ke haa.n de aa.uu.ngaa
nayaa suiT do-chaar mahiine baa'd sahii!
darzii kii duukaan se lag kar
jo hotel hai
us hotel kii
machhlii testy hotii hai
kal khaa.uu.ngaa
lekin machhlii kii buu saalii
haatho.n me.n bas jaatii hai
kal saabun bhii laanaa hai
ghar aate
letaa aa.uu.ngaa
ab ke ''yardley'' laa.uu.ngaa
office me.n kal kaam bahut hai
boss agar naaraaz hu.aa to
do din kii chhuTTii le luu.ngaa
aur agar mood hu.aa to
chhe ke show me.n
''raam-aur-shyaam'' bhii dekh aa.uu.n gaa
picture achchhii hai saalii
nau se baara
club ramii
do din se luck achchhaa hai
kal bhii saaTh ruupe jiitaa thaa
aaj bhii tiis ruupe jiitaa huu.n
aur ummiid hai
kal bhii jiit ke aa.uu.ngaa
bas ab nii.nd aa.e to achchhaa
kal bhii
jiit ke
nii.nd aa.e to
ikkaa-dukkii nahla-dahla
ii.nT kii begam
machhlii kii buu
taash ke patte
joker joker
suiT pahan kar
moTaa-tag.Daa joker....
itnaa bahut saa soch ke vo
soyaa thaa magar
phir na uThaa!!
duusre din jab
us kaa janaaza
darzii kii duukaan ke paas se guzraa to
hotel se machhlii kii buu
duur duur tak aa.ii thii!!!

Mohammad Alvi
Nazm

mazdur

june kii garmii ka.Daktii dhuup luu chaltii hu.ii
har gha.Dii mazduur ke sar se qazaa Taltii hu.ii
sar pe gaare kii ka.Dhaa.ii aur diivaar-e-buland
haa.nptaa vo cha.Dh rahaa hai le ke himmat kii kamand
paa.D par pahu.nchaa to ik gaalii sunii me.amaar se
jii me.n aayaa sar ko Takraa de usii diivaar se
haa.e us mazluum kii majbuuriyaa.n naa-chaariyaa.n
jaan kaa aazaar hai.n iflaas kii biimaariyaa.n
dil me.n kahtaa hai ki ye me.amaar bhii mazduur hai
phir yahii jaan-e-hazii.n kyuu.n is qadar maqhuur hai
us kii ujrat mujh se dugunii hai magar kam hai shu.uur
tamkanat kis baat par kis chiiz par itnaa Guruur
mai.n agar naadaar huu.n ye bhii nahii.n sarmaaya-daar
bhuut vo hai kis ba.Daa.ii kaa jo us par hai savaar
ii.nT gaaraa mai.n na duu.n us ko to ye kis kaam kaa
asl me.n me.amaar mai.n huu.n ye faqat hai naam kaa
merii himmat kah rahii.n hai.n kaaKH-e-diivaan-e-buland
aah is par bhii mai.n duniyaa me.n huu.n itnaa mustamand
lag gayaa phir kaam me.n ye soch kar vo bad-nasiib
ai KHudaa duniyaa me.n itnaa bhii na ho ko.ii Gariib
din Dhalaa jis vaqt maalik bhii makaa.n kaa aa gayaa
ik sukuut-e-marg saa diivaar-o-dar par chhaa gayaa
kaa.nptaa rahtaa hai har mazduur jis ke naam se
sab usii dhun me.n the vo KHush ho hamaare kaam se
us kii peshaanii pe lekin bal zaraa aane lage
phan uThaa kar tamkanat ke saa.np lahraane lage
sab se pahle us ne gaalii dii usii me.amaar ko
apnii milkiyyat jo samjhaa thaa har ik diivaar ko
josh-e-naKHvat se kahaa us ne ki ai paajii la.ii.n
kal jahaa.n tak thii ga.ii diivaar ab bhii hai vahii.n
kyaa kiyaa hai tuu ne din-bhar me.n zaraa mujh ko bataa
yuu.n takabbur me.n vo aa kar jaa.eza lene lagaa
dil me.n vo mazduur phir kahne lagaa uf re Gazab
jo bhii is duniyaa me.n hai.n fir.aun hai.n vo sab ke sab
jis kaa jis par bas chale paamaal kartaa hai use
KHud agar KHush-haal hai bad-haal kartaa hai use
kyaa kahuu.n sarmaaya-daaro.n ke sitam kii daastaa.n
diida-e-mazduur hai mazduur se bhii KHuu.nfishaa.n
jis kii laaThii us kii bhai.ns is misl ko saadiq samajh
ye samajh kar is KHudaa-e-paak ko raaziq samajh

Arsh Malsiyani
Nazm

ba-nam-e-ibn-e-adam

mai.n tum se kahne aayaa huu.n
insaa.n laa-faanii hai amar hai
maut taGayyur kaa ik pul hai
jiivan jal hai
jis kaa ko.ii ant nahii.n hai
rah jaa.e to ye saagar hai
aur mar jaa.e to baadal hai

Aziz Qaisi
Nazm

election

saaqii sharaab de ki election hai aaj-kal
barse.nge vote jis me.n vo saavan hai aaj-kal
jamhuuriyat ke paa.nv me.n jhaa.njan hai aaj-kal
ye mulk us ke naach kaa aa.ngan hai aaj-kal
saudaa hai leaderii kaa jo dil ko sataa.e hai
''dil phir tavaaf-e-kuu-e-malaamat ko jaa.e hai''
lo ho gayaa hai uu.nT election kaa be-nakel
ab laTh chale.nge jalso.n me.n aabaad ho.nge jail
phir leadero.n kii hogii akhaa.Do.n me.n rel-pel
voto.n kii har dukaan pe hogii grand sale
voto.n se ba.Dh ke ab ko.ii hathiyaar bhii nahii.n
''la.Dte hai.n aur haath me.n talvaar bhii nahii.n''
zinda hai vo ki jis kaa register me.n naam hai
aur zindagii shariifo.n ke uupar haraam hai
hai.n jis ke paas vote madaar-ul-mahaam hai
lailaa-e-leaderii kii vo thaame lagaam hai
leader ke mu.nh pe shahar ke kuucho.n kii gard hai
''ishq-e-nabard-pesha talabgaar-e-mard hai''
vaqt aa gayaa zamiir kii bai-o-KHariid kaa
import ke licence ke va.ade-va.iid kaa
din hai biraadrii o qabaa.il kii iid kaa
aapas me.n gallabaano.n kii guft-o-shuniid kaa
muslim ko be-shak aisii musaavaat chaahiye
''aarif hamesha mast-e-mai-e-zaat chaahiye''
da.nggal kii kashtiyo.n me.n har ik chiiz hai ravaa
ya.anii milegii millat-e-aasii ko har davaa
naGme kaa daur, daur-e-mai-o-raqs kaa mazaa
jis ko zabaan kah na sake us se bhii sivaa
likkhaa hu.aa hai qismat-e-ummiid-vaar me.n
''u.Dtii phiregii KHaak tirii kuu-e-yaar me.n''
ahl-e-basiirat ab nahii.n dekhe.nge khoT ko
haasil kare.nge laakh tariiqo.n se vote ko
paanii hii kii tarah se bahaa.enge note ko
roke.ngi zar kii Dhaal pe dushman kii choT ko
voter ko baKHshaa jaa.egaa bhaarii mushaahra
phir jiit kii KHushii me.n kare.nge mushaa.era
aa.e.nge vote dene ko jab jaahilaan-e-qaum
un ko dikhaa.e jaa.e.nge pahle nishaan-e-qaum
gai.nDaa nishaan rakkhegaa ik pahlavaan-e-qaum
hai uu.nT ko.ii ko.ii yake-az-KHaraan-e-qaum
insaaniyat kii qaid se sab ho ga.e barii
un kaa mua.aalijaa ho to hogaa veterinary

Syed Mohammad Jafri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now