Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "banda"

Nazm MATCHES FOR "banda"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

banjara-nama

gar to hai lakkhii banjaaraa aur khep bhii terii bhaarii hai
ai Gaafil tujh se bhii cha.Dhtaa ik aur ba.Daa byopaarii hai
kyaa shakkar misrii qand garii kyaa saa.nbhar miiThaa khaarii hai
kyaa daakh munaqqaa so.nTh mirach kyaa kesar lau.ng supaarii hai
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

KHizr-e-rah

banda-e-mazduur ko jaa kar miraa paiGaam de
KHizr kaa paiGaam kyaa hai ye payaam-e-kaa.enaat
ai ki tujh ko khaa gayaa sarmaaya-daar-e-hiila-gar
shaaKH-e-aahuu par rahii sadiyo.n talak terii baraat
dast-e-daulat-aafrii.n ko muzd yuu.n miltii rahii
ahl-e-sarvat jaise dete hai.n Gariibo.n ko zakaat
saahir-al-muut ne tujh ko diyaa barg-e-hashiish
aur tuu ai be-KHabar samjhaa use shaaKH-e-nabaat
nasl qaumiyat kaliisaa saltanat tahziib rang
KHvaajgii ne KHuub chun chun ke banaa.e muskiraat
kaT maraa naadaa.n KHayaalii devtaa.o.n ke liye
sukr kii lazzat me.n tuu luTvaa gayaa naqd-e-hayaat
makr kii chaalo.n se baazii le gayaa sarmaaya-daar
intihaa-e-saadgii se khaa gayaa mazduur maat
uTh ki ab bazm-e-jahaa.n kaa aur hii andaaz hai
mashriq-o-maGrib me.n tere daur kaa aaGaaz hai
himmat-e-aalii to dariyaa bhii nahii.n kartii qubuul
Guncha saa.n Gaafil tire daaman me.n shabnam kab talak
naGma-e-bedaarii-e-jamhuur hai saamaan-e-'aish
qissa-e-KHvaab-aavar askandar-o-jam kab talak
aaftaab-e-taaza paidaa batn-e-giitii se hu.aa
aasmaan Duube hu.e taaro.n kaa maatam kab talak
to.D Daalii.n fitrat-e-insaa.n ne zanjiire.n tamaam
duurii-e-jannat se rotii chashm-e-aadam kab talak
baaGbaan-e-chaara-farmaa se ye kahtii hai bahaar
zaKHm-e-gul ke vaaste tadbiir-e-marham kab talak
kirmak-e-naadaa.n tavaaf-e-sham.a se aazaad ho
apnii fitrat ke tajallii-zaar me.n aabaad ho
duniyaa-e-islaam

Allama Iqbal
Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal
Nazm

march 1907

zamaana aayaa hai be-hijaabii kaa aam diidaar-e-yaar hogaa
sukuut thaa parda-daar jis kaa vo raaz ab aashkaar hogaa
guzar gayaa ab vo daur-e-saaqii ki chhup ke piite the piine vaale
banegaa saaraa jahaan mai-KHaana har ko.ii baada-KHvaar hogaa
kabhii jo aavaara-e-junuu.n the vo bastiyo.n me.n phir aa base.nge
barahna-paa.ii vahii rahegii magar nayaa KHaarzaar hogaa
sunaa diyaa gosh-e-muntazir ko hijaaz kii KHaamushii ne aaKHir
jo ahd sahraa.iyo.n se baa.ndhaa gayaa thaa phir ustuvaar hogaa
nikal ke sahraa se jis ne ruumaa kii saltanat ko ulaT diyaa thaa
sunaa hai ye qudsiyo.n se mai.n ne vo sher phir hoshiyaar hogaa
kiyaa miraa tazkira jo saaqii ne baada-KHvaaro.n kii anjuman me.n
to piir-e-mai-KHaana sun ke kahne lagaa ki mu.nh-phaT hai KHvaar hogaa
dayaar-e-maGrib ke rahne vaalo KHudaa kii bastii dukaa.n nahii.n hai
kharaa jise tum samajh rahe ho vo ab zar-e-kam-ayaar hogaa
tumhaarii tahziib apne KHanjar se aap hii KHud-kushii karegii
jo shaaKH-e-naazuk pe aashiyaana banegaa naa-paa.edaar hogaa
safiina-e-barg-e-gul banaa legaa qaafila mor-e-naa-tavaa.n kaa
hazaar maujo.n kii ho kashaakash magar ye dariyaa se paar hogaa
chaman me.n laala dikhaataa phirtaa hai daaG apnaa kalii kalii ko
ye jaantaa hai ki is dikhaave se dil-jalo.n me.n shumaar hogaa
jo ek thaa ai nigaah tuu ne hazaar kar ke hame.n dikhaayaa
yahii agar kaifiyat hai terii to phir kise e'tibaar hogaa
kahaa jo qumrii se mai.n ne ik din yahaa.n ke aazaad paa-ba-gil hai.n
tuu Gunche kahne lage hamaare chaman kaa ye raazdaar hogaa
KHudaa ke aashiq to hai.n hazaaro.n bano.n me.n phirte hai.n maare maare
mai.n us kaa banda banuu.ngaa jis ko KHudaa ke bando.n se pyaar hogaa
ye rasm-e-bazm-e-fanaa hai ai dil gunaah hai jumbish-e-nazar bhii
rahegii kyaa aabruu hamaarii jo tuu yahaa.n be-qaraar hogaa
mai.n zulmat-e-shab me.n le ke nikluu.ngaa apne dar-maa.nda kaarvaa.n ko
sharar-fishaa.n hogii aah merii nafas miraa shola-baar hogaa
nahii.n hai Gair-az-numuud kuchh bhii jo mudda.aa terii zindagii kaa
tuu ik nafas me.n jahaa.n se miTnaa tujhe misaal-e-sharaar hogaa
na puuchh 'iqbaal' kaa Thikaanaa abhii vahii kaifiyat hai us kii
kahii.n sar-e-raah-guzaar baiThaa sitam-kash-e-intizaar hogaa

Allama Iqbal
Nazm

ek makDa aur makkhi

mak.De ne kahaa dil me.n sunii baat jo us kii
phaa.nsuu.n ise kis tarah ye kam-baKHt hai daanaa
sau kaam KHushaamad se nikalte hai.n jahaa.n me.n
dekho jise duniyaa me.n KHushaamad kaa hai bandaa
ye soch ke makkhii se kahaa us ne ba.Dii b
allaah ne baKHshaa hai ba.Daa aap ko rutba
hotii hai use aap kii suurat se mohabbat
ho jis ne kabhii ek nazar aap ko dekhaa
aa.nkhe.n hai.n ki hiire kii chamaktii hu.ii kaniyaa.n
sar aap kaa allaah ne kalGii se sajaayaa
ye husn ye poshaak ye KHuubii ye safaa.ii
phir us pe qayaamat hai ye u.Dte hu.e gaanaa
makkhii ne sunii jab ye KHushaamad to pasiijii
bolii ki nahii.n aap se mujh ko ko.ii khaTkaa
inkaar kii aadat ko samajhtii huu.n buraa mai.n
sach ye hai ki dil to.Dnaa achchhaa nahii.n hotaa
ye baat kahii aur u.Dii apnii jagah se
paas aa.ii to mak.De ne uchhal kar use pak.Daa
bhuukaa thaa ka.ii roz se ab haath jo aa.ii
aaraam se ghar baiTh ke makkhii ko u.Daayaa

Allama Iqbal
Nazm

hubb-e-watan

ai dil ai banda-e-vatan hoshiyaar
KHvaab-e-Gaflat se ho zaraa bedaar
o sharaab-e-KHudii ke matvaale
ghar kii chaukhaT ke chuumne vaale
naam hai kyaa isii kaa hubb-e-vatan
jis kii tujh ko lagii hu.ii hai lagan
kabhii bachcho.n kaa dhyaan aataa hai
kabhii yaaro.n kaa Gam sataataa hai
yaad aataa hai apnaa shahr kabhii
lau kabhii ahl-e-shahr kii hai lagii
naqsh hai.n dil pe kuucha-o-baazaar
phirte aa.nkho.n me.n hai.n dar-o-diivaar
kyaa vatan kyaa yahii mohabbat hai
ye bhii ulfat me.n ko.ii ulfat hai
is me.n insaa.n se kam nahii.n hai.n darind
is se KHaalii nahii.n chairnd o parind
Tuk.De hote hai.n sang Gurbat me.n
suukh jaate hai.n ruukh furqat me.n
jaa ke kaabul me.n aam kaa paudaa
kabhii parvaan cha.Dh nahii.n saktaa
aa ke kaabul se yaa.n bihii-o-anaar
ho nahii.n sakte baarvar zinhaar
machhlii jab chhuuTtii hai paanii se
haath dhotii hai zindagaanii se
aag se jab hu.aa samundar duur
us ko jiine kaa phir nahii.n maqduur
gho.De jab khet se bichha.Dte hai.n
jaan ke laale un ke pa.Dte hai.n
gaa.e, bhai.ns uu.nT ho yaa bakrii
apne apne Thikaane KHush hai.n sabhii
kahiye hubb-e-vatan isii ko agar
ham se haivaa.n nahii.n hai.n kuchh kam-tar
hai ko.ii apnii qaum kaa hamdard
nau-e-insaa.n kaa samjhe.n jis ko fard
jis pe itlaaq-e-aadmii ho sahiih
jis ko haivaa.n pe de sake.n tarjiih
qaum par ko.ii zad na dekh sake
qaum kaa haal-e-bad na dekh sake
qaum se jaan tak aziiz na ho
qaum se ba.Dh ke ko.ii chiiz na ho
samjhe un kii KHushii ko raahat-e-jaa.n
vaa.n jo nau-roz ho to iid ho yaa.n
ra.nj ko un ke samjhe maaya-e-Gam
vaa.n agar sog ho to yaa.n maatam
bhuul jaa.e sab apnii qadr-e-jaliil
dekh kar bhaa.iyo.n ko KHvaar-o-zaliil
jab pa.De un pe gardish-e-aflaak
apnii aasaa.isho.n pe Daal de KHaak

Altaf Hussain Hali
Nazm

chadar aur chaar-diwari

na sog me.n huu.n ki us ko o.Dhuu.n
Gam-o-alam KHalq ko dikhaa.uu.n
na rog huu.n mai.n ki is kii taariikiyo.n me.n KHiffat se Duub jaa.uu.n
na mai.n gunaahgaar huu.n na mujrim
ki is syaahii kii mehr apnii jabii.n pe har haal me.n lagaa.uu.n
agar na gustaaKH mujh ko samjhe.n
agar mai.n jaa.n kii amaan paa.uu.n
to dast-basta karuu.n guzaarish
ki banda-parvar
huzuur ke hujra-e-ma.attar me.n ek laasha pa.Daa hu.aa hai
na jaane kab kaa galaa sa.Daa hai
ye aap se rahm chaahtaa hai
huzuur itnaa karam to kiije
siyaah chaadar mujhe na diijiye
siyaah chaadar se apne hujre kii be-kafan laash Dhaa.np diijiye
ki us se phuuTii hai jo ufuunat
vo kuuche kuuche me.n haa.nptii hai
vo sar paTaktii hai chaukhaTo.n par
barahnagii tan kii Dhaa.nptii hai
sune.n zaraa dil-KHaraash chiiKHe.n
banaa rahii hai.n ajab hayuule
jo chaadaro.n me.n bhii hai.n barahna

Fahmida Riaz
Nazm

kaun si uljhan ko suljhate hain ham?

lab bayaabaa.n, bose be-jaa.n
kaun sii uljhan ko suljhaate hai.n ham?
jism kii ye kaar-gaahe.n
jin kaa haizam aap ban jaate hai.n ham!
niim-shab aur shahr-e-KHvaab-aaluudaa, ham-saa.e
ki jaise duzd-e-shab-gardaa.n ko.ii!
shaam se the hasrato.n ke banda-e-be-daam ham
pii rahe the jaam par har jaam ham
ye samajh kar jur.a-e-pinhaa.n ko.ii
shaayad aaKHir ibtidaa-e-raaz kaa iimaa bane!
matlab aasaa.n harf be-ma.anii
tabassum ke hisaabii zaaviye
matn ke sab haashiye
jin se aish-KHaam ke naqsh-e-riyaa bante rahe!
aur aaKHir bu.ad jismo.n me.n sar-e-muu bhii na thaa
jab dilo.n ke darmiyaa.n haa.il the sa.ngii.n faasle
qurb-e-chashm-o-gosh se ham kaun sii uljhan ko suljhaate rahe!
kaun sii uljhan ko suljhaate hai.n ham?
shaam ko jab apnii Gam-gaaho.n se duzdaanaa nikal aate hai.n ham?
yaa zavaal-e-umr kaa dev-e-subuk-paa ruu-ba-ruu
yaa anaa ke dast o paa ko vus.ato.n kii aarzuu
kaun sii uljhan ko suljhaate hai.n ham?

Noon Meem Rashid
Nazm

sayyad ki lauh-e-turbat

ai ki teraa murG-e-jaa.n taar-e-nafas me.n hai asiir
ai ki terii ruuh kaa taa.ir qafas me.n hai asiir
is chaman ke naGma-pairaao.n kii aazaadii to dekh
shahr jo uj.Daa hu.aa thaa us kii aabaadii to dekh
fikr rahtii thii mujhe jis kii vo mahfil hai yahii
sabr-o-istiqlaal kii khetii kaa haasil hai yahii
sa.ng-e-turbat hai miraa girviida-e-taqriir dekh
chashm-e-baatin se zaraa is lauh kii tahriir dekh
mudda.aa teraa agar duniyaa me.n hai ta.aliim-e-dii.n
tark-e-duniyaa qaum ko apnii na sikhlaanaa kahii.n
vaa na karnaa firqa-bandii ke liye apnii zabaa.n
chhup ke hai baiThaa hu.aa ha.ngaama-e-mahshar yahaa.n
vasl ke asbaab paidaa ho.n tirii tahriir se
dekh ko.ii dil na dukh jaa.e tirii taqriir se
mahfil-e-nau me.n puraanii daastaano.n ko na chhe.D
ra.ng par jo ab na aa.e.n un fasaano.n ko na chhe.D
tuu agar ko.ii mudabbir hai to sun merii sadaa
hai dilerii dast-e-arbaab-e-siyaasat kaa asaa
arz-e-matlab se jhijak jaanaa nahii.n zebaa tujhe
nek hai niyyat agar terii to kyaa parvaa tujhe
banda-e-momin kaa dil biim-o-riyaa se paak hai
quvvat-e-farmaa.n-ravaa ke saamne bebaak hai
ho agar haatho.n me.n tere KHaam-e-mojiz raqam
shiisha-e-dil ho agar teraa misaal-e-jaam-e-jam
paak rakh apnii zabaa.n tilmiiz-e-rahmaanii hai tuu
ho na jaa.e dekhnaa terii sadaa be-aabruu
sone vaalo.n ko jagaa de sher ke e.ajaaz se
KHirman-e-baatil jalaa de sho.ala-e-aavaaz se

Allama Iqbal
Nazm

qaumon ke liye maut hai markaz se judai

qaumo.n ke liye maut hai markaz se judaa.ii
ho saahib-e-markaz to KHudii kyaa hai KHudaa.ii
jo faqr hu.aa talKHii-e-dauraa.n kaa gila-mand
is faqr me.n baaqii hai abhii buu-e-gadaa.ii
is daur me.n bhii mard-e-KHudaa ko hai mayassar
jo mo'jiza parbat ko banaa saktaa hai raa.ii
dar-maa'raka be-soz-e-tuu zauqe na-tavaa.n yaaft
ai banda-e-momin tuu kujaa.ii tuu kujaa.ii
KHurshiid siraa parda-e-mashriq se nikal kar
pahnaa mire kohsaar ko malbuus-e-hinaa.ii

Allama Iqbal
Nazm

sayyad se aaj hazrat-e-waiz ne ye kaha

sayyad se aaj hazrat-e-vaa.iz ne ye kahaa
charchaa hai jaa-ba-jaa tire haal-e-tabaah kaa
samjhaa hai tuu ne nature o tadbiir ko KHudaa
dil me.n zaraa asar na rahaa laa-ilaah kaa
ho tujh se tark-e-saum-o-salaat-o-zakaat-o-haj
kuchh Dar nahii.n janaab-e-risaalat-panaah kaa
shaitaan ne dikhaa ke jamaal-e-uruus-e-dahr
banda banaa diyaa hai tujhe hubb-e-jaah kaa
us ne diyaa javaab ki maz.hab ho yaa rivaaj
raahat me.n jo muKHil ho vo kaa.nTaa hai raah kaa
afsos hai ki aap hai.n duniyaa se be-KHabar
kyaa jaaniye jo rang hai shaam-o-pagaah kaa
europe kaa pesh aa.e agar aap ko safar
guzre nazar se haal re.aayaa-o-shaah kaa
vo aab-o-taab-o-shaukat-e-aivaan-e-khusravii
vo mahakmo.n kii shaan vo jalva sipaah kaa
aa.e nazar uluum-e-jadiidah kii raushnii
jis se KHajil ho nuur ruKH-e-mehr-o-maah kaa
daavat kisii amiir ke ghar me.n ho aap kii
kam-sin miso.n se zikr ho ulfat kaa chaah kaa
nau-KHez dil-fareb gul-andaam naaznii.n
aariz pe jin ke baar ho daaman nigaah kaa
rukiye agar to ha.ns ke kahe ik but-e-hasii.n
sun maulvii ye baat nahii.n hai gunaah kaa
us vaqt qibla jhuk ke karuu.n aap ko salaam
phir naam bhii huzuur jo le.n KHaanqaah kaa
patluun-o-koT-o-ba.ngla-o-biscuit kii dhun ba.ndhe
saudaa janaab ko bhii ho turkii kulaah kaa
mimbar pe yuu.n to baiTh ke goshe me.n ai janaab
sab jaante hai.n va.az savaab-o-gunaah kaa

Akbar Allahabadi
Nazm

yakum may

ye may kii pahlii, din hai banda-e-mazduur kaa
muddato.n ke baa'd dekhaa is ne jalva huur kaa
ye jo rishta-daar thaa ham sab kaa lekin duur kaa
mill ke maalik ne ise rutba diyaa mansuur kaa
jab lagaayaa haq kaa na.ara daar par khii.nchaa gayaa
naKHl-e-san.at is ke KHuu.n kii dhaar par sii.nchaa gayaa

Syed Mohammad Jafri
Nazm

iqbaal se ham-kalami

kal azaan-e-sub.h se pahle fazaa-e-quds me.n
mai.n ne dekhaa kuchh shanaasaa suurate.n hai.n ham-nashii.n
the hakiim-e-sharq se shaiKH-e-mujaddid ham-kalaam
gosh-bar-aavaaz sab daanish-varaan-e-ilm-o-dii.n
bul-kalaam-'aazaad' se 'Gaalib' the masruuf-e-suKHan
'miir' o 'momin' daur-e-haazir kii Gazal pe nukta-chii.n
is se kuchh haT kar gulaabii shaaKH-cho.n kii chhaa.nv me.n
the valiiullaah ke farzand nukta-aafrii.n
iistaada sarv ke saa.e me.n the maulaa-e-ruum
jin ke farmuudaat me.n muzmar hai.n aayaat-e-mubii.n
soch me.n Duube hu.e the 'haalii'-e-darvesh-KHuu
baa.ndh kar baiThe halqa shiblii-e-ahd-aafrii.n
mai.n ne ba.Dh kar murshid-e-iqbaal se ye arz kii
aap ko ham tiira-baKHto.n kii KHabar hai yaa nahii.n
dil-shikasta ho ke farmaayaa mujhe ma.aluum hai
be-yad-e-baizaa hai piiraan-e-haram kii aastii.n
saltanat le kar KHudaa o mustafaa ke naam par
ab KHudaa o mustafaa kii raah par ko.ii nahii.n
hai abhii shahbaaz kii Gairat par kargas KHanda-zan
''hai vahii sarmaaya-daarii banda-e-momin kaa dii.n''
is se ba.Dh kar aur kyaa fikr o amal kaa inqalaab
''paadshaaho.n kii nahii.n allaah kii hai ye zamii.n''
kaun samjhaa.e a.ndherii raat ko aa.iin-e-mahr
vaa.e bad-baKHtii ki KHud momin hai mahruum-e-yaqii.n
KHuun de kar KHaana-e-sayyaad ko raushan karo
jaa.o mashriq ke KHaraab-aabaad ko raushan karo

Shorish kashmiri
Nazm

gurunanak

ai rahbar-e-manzil tirii raftaar ke sadqe
ai mehr-e-munavvar tire anvaar ke sadqe
ai band-e-haq-go tirii guftaar ke sadqe
ai saahab-e-iimaa.n tire kirdaar ke sadqe
to banda-o-saahab bhii thaa muhtaaj-o-Ganii bhii
jalvo.n kaa amii.n bhii tire lab pe arinii bhii
har chehra-e-mardum ke KHad-o-KHaal bure the
dekho jise us shaKHs ke a.amaal bure the
mullaa ke bhii panDit ke bhii a.amaal bure the
jo jhuuT ne phailaa.e the vo jaal bure the
sachchaa tiraa din aur tirii raat bhii sachchii
sachchaa tiraa saudaa terii har baat bhii sachchii
is dar kaa pujaarii ko.ii us dar kaa pujaarii
maGrib kaa pujaarii ko.ii KHaavar kaa pujaarii
miinaa kaa pujaarii ko.ii saaGar kaa pujaarii
qabro.n kaa pujaarii ko.ii banjar kaa pujaarii
kasrat thii yahaa.n shirk kii tauhiid nahii.n thii
rozo.n kaa bhulaavaa thaa magar iid nahii.n thii
tuu hinduu-o-muslim ke gunaaho.n se thaa vaaqif
maz.hab kii sisaktii hu.ii aaho.n se thaa vaaqif
to sho.abada-baazo.n kii nigaaho.n se thaa vaaqif
to manzil-e-tauhiid kii raaho.n se thaa vaaqif
dar haq ke kabhii banda-e-haajii pe khule hai.n
ga.ngaa me.n nahaa kar bhii kabhii paap dhule hai.n
tuu ne ye kahaa sab se ba.Daa hukm-e-razaa.ii
tuu ne ye kahaa saa.nch kii qiimat nahii.n paa.ii
tuu ne ye kahaa so ke ye sab umr ga.nvaa.ii
tuu ne ye kahaa jhuuT hai sab zuhd-e-riyaa.ii
pur-maanii-o-pur-maGz hai.n nekii ke ishaare
har haal me.n har rang me.n rahbar hai.n hamaare
mai.n mast-e-mai-e-ishq huu.n tan riish-e-qalandar
tiirath hai agar ko.ii to is man ke hai andar
jaa.uu.n mai.n kahaa.n sajde ko man meraa hai mandir
hai azm miraa faateh-e-daaraa-o-sikandar
gaate hai.n jise devtaa bhii chaudah ratan bhii
raqsaa.n hai usii dar pe merii jaan bhii tan bhii
jo dars diyaa tuu ne vo azmat kaa amii.n hai
vo prem kii aKHlaaq kii KHaatam kaa nagii.n hai
kundan jo na ho jaa.e vo sonaa hii nahii.n hai
haq-go hai jo duniyaa hii me.n jannat kaa makii.n hai
sar jhukte hai.n sab ke tirii sarkaar me.n aa kar
ham sajda-kunaa.n hai.n tire darbaar me.n aa kar

Arsh Malsiyani
Nazm

kahan hai aa ja

raahat-e-banda-e-be-daam kahaa.n hai aa jaa
paikar-e-husn sar-e-baam kahaa.n hai aa jaa
raunaq-e-bazm hai o jaam kahaa.n hai aa jaa
ziinat-e-jalva-gah-e-aam kahaa.n hai aa jaa
ai umiid-e-dil-e-naa-kaam kahaa.n hai aa jaa
terii furqat KHalal-andaaz-e-sukuun-e-paiham
terii furqat dil-e-maayuus pe ik turfa sitam
terii furqat sabab-e-kaavish-o-bedaarii-e-Gam
tuu nahii.n hai to phir aaraam kahaa.n hai aa jaa
shaahid-e-aur-e-siyah-baKHt o shab-e-taar huu.n mai.n
KHuugar-e-naala-e-lazzat-kash-e-aavaaz huu.n mai.n
daam-e-tuufaan-e-havaadis me.n giraftaar huu.n mai.n
roz-o-shab muntazir-e-diid-e-ruKH-e-yaar huu.n mai.n
dil hai vaqf-e-Gam-e-aalaam kahaa.n hai aa jaa
sho.ala-e-bar-kaf-e-gul daaG-e-jigar tere baGair
KHaar-bardosh hai daamaan-e-nazar tere baGair
KHuu.n-fishaa.n hai shab-e-Gam diida-e-tar tere baGair
chalan aataa hii nahii.n shaam-o-sahar tere baGair
muntazir huu.n sahar-o-shaam kahaa.n hai aa jaa
daur-e-taariikii-e-Gam se shab-e-tanhaa.ii se
dam-ba-dam josh-e-junuu.n kii sitam-aaraa.ii se
ka.aba-o-dair-o-kaliisaa kii jabii.n-saa.ii se
KHauf-e-majbuurii-o-naakaamii-o-rusvaa.ii se
ishq hai larza-bar-andaam kahaa.n hai aa jaa
muntashir hone lagii anjuman-e-naaz-e-hayaat
ban gayaa KHvaab har ik manzar-e-aaGaaz-e-hayaat
dam-shikasta saa nazar aane lagaa saaz-e-hayaat
ab ko.ii dam me.n hu.aa jaataa hai vaa raaz-e-hayaat
aa gayaa naza.a kaa ha.ngaam kahaa.n hai aa jaa

Shakeel Badayuni
Nazm

kaun le gaya

ai yaar-e-dil-nashii.n vo adaa kaun le gayaa
tere nagii.n se naqsh-e-vafaa kaun le gayaa
hal kar diyaa thaa jis ne mu.amma shabaab kaa
tujh se vo fikr-e-uqda-kushaa kaun le gayaa
thaa lutf pahle qahr me.n ab sirf qahr hai
zulmat se mauj-e-aab-e-baqaa kaun le gayaa
kyuu.n daf.atan labo.n pe KHamoshii sii chhaa ga.ii
is saaz-e-dil-nashii.n kii sadaa kaun le gayaa
aa.nkho.n se shaan-e-bazl-o-saKHaa kis ne chhiin lii
siine se zauq-e-lutf-o-ataa kaun le gayaa
thii.n jis kii rau se KHuun-e-tamannaa me.n surKHiyaa.n
ruKHsaar se vo ra.ng-e-vafaa kaun le gayaa
raato.n ko maa.ngnaa thaa du.aa merii diid kii
vo minnate.n vo zauq-e-du.aa kaun le gayaa
ai shaah banda-parvar-e-sultaan-e-narm-dil
dil se tire KHayaal-e-gadaa kaun le gayaa
pahlii sii vo kalaam me.n narmii nahii.n rahii
guftaar se mizaaj-e-sabaa kaun le gayaa
ab 'josh' ke liye hai.n na aa.nsuu na aah-e-sard
is gulsitaa.n kii aab-o-havaa kaun le gayaa

Josh Malihabadi
Nazm

kachhwa aur KHargosh

ek kachhve ke aa ga.ii jii me.n
kiijiye sair o gasht KHushkii kii
jaa rahaa thaa chalaa hu.aa KHaamosh
us se naahaq ulajh pa.Daa KHargosh
miyaa.n kachhve! tumhaarii chaal hai ye
yaa ko.ii shaamat aur vabaal hai ye
yuu.n qadam phuu.nk phuu.nk dharte ho
goyaa uttuu zamii.n pe dharte ho
kyuu.n hu.e chal ke muft me.n bad-naam
be-chale kyaa aTak rahaa thaa kaam
tum ko ye hausla na karnaa thaa
chulluu paanii me.n Duub marnaa thaa
ye tan-o-tosh aur ye raftaar
aisii raftaar par KHudaa kii maar
bolaa kachhvaa ki ho.n KHafaa na huzuur
mai.n to huu.n aap mo'tarif ba-qusuur
agar aahistagii hai jurm-o-gunaah
to mai.n KHud apne jurm kaa huu.n gavaah
mujh ko jo saKHt sust farmaayaa
aap ne sab durust farmaayaa
mujh ko Gaafil magar na jaaniyegaa
banda-parvar buraa na maaniyegaa
yuu.n zabaanii javaab to kyaa duu.n
shart bad kar chalo to dikhlaa duu.n
tum to ho aaftaab me.n zarra
par miTaa duu.ngaa aap kaa Gurra
sun ke KHargosh ne ye talKH javaab
kahaa kachhve se yuu.n zi-ruu-e-itaab
tuu kare merii ham-sarii kaa KHayaal
terii ye taab ye sakat ye majaal
chyuu.nTii ke jo par nikal aa.e
to yaqii.n hai ki ab ajal aa.e
are bebaak! bad-zabaa.n mu.nh-phaT
tuu ne dekhii kahaa.n hai dau.D jhapaT
jab mai.n tezii se jast kartaa huu.n
shahsavaaro.n ko past kartaa huu.n
gard ko merii baad-e-paa na lage
laakh dau.De miraa pata na lage
rail huu.n barq huu.n chhalaavaa huu.n
mai.n chhalaave kaa balki baavaa huu.n
terii merii nibhegii sohbat kyaa
aasmaa.n ko zamii.n se nisbat kyaa
jis ne bhugte ho.n turkii o taazii
aaise mariyal se kyaa bade baazii
baat ko ab ziyaada kyaa duu.n tuul
KHair kartaa huu.n terii shart qubuul
hai munaasib ki imtihaa.n ho jaa.e
taaki aib o hunar ayaa.n ho jaa.e
al-Garaz ik maqaam Thahraa kar
hu.e dono.n hariif garm-e-safar
bas-ki zoro.n pe thaa cha.Dhaa KHargosh
tezii phurtii se yuu.n ba.Dhaa KHargosh
jis tarah jaa.e top kaa golaa
yaa gire aasamaan se olaa
ek do khet chauk.Dii bhar ke
apnii chustii pe aafrii.n kar ke
kisii goshe me.n so gayaa jaa kar
fikr ''kyaa hai chale.nge sustaa kar''
aur kachhvaa Gariib aahista
chalaa siine ko KHaak par ghistaa
suu.ii ghanTe kii jaise chaltii hai
yaa ba-tadriij chhaa.nv Dhaltii hai
yuu.nhii chaltaa rahaa ba-istiqlaal
na kiyaa kuchh idhar udhar kaa KHayaal
kaam kartaa rahaa jo pai-dar-pai
kar gayaa rafta rafta manzil tai
haif KHargosh rah gayaa sotaa
samra Gaflat kaa aur kyaa hotaa
jab khulii aa.nkh to saveraa thaa
saKHt sharmindagii ne gheraa thaa
sabr o mohabbat me.n hai sar-afraazii
sust kachhve ne jiit lii baazii
nahii.n qissa ye dil-lagii ke liye
balki ibrat hai aadmii ke liye
hai suKHan is hijaab me.n ruu-posh
varna kachhvaa kahaa.n kahaa.n KHargosh

Ismail Merathi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now