Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "baseraa"

Nazm MATCHES FOR "baseraa"

Nazm

is waqt to yun lagta hai

is vaqt to yuu.n lagtaa hai ab kuchh bhii nahii.n hai
mahtaab na suuraj, na a.ndheraa na saveraa
aa.nkho.n ke dariicho.n pe kisii husn kii chilman
aur dil kii panaaho.n me.n kisii dard kaa Deraa
mumkin hai ko.ii vahm thaa, mumkin hai sunaa ho
galiyo.n me.n kisii chaap kaa ik aaKHirii pheraa
shaaKHo.n me.n KHayaalo.n ke ghane pe.D kii shaayad
ab aa ke karegaa na ko.ii KHvaab baseraa
ik bair na ik mehr na ik rabt na rishta
teraa ko.ii apnaa, na paraayaa ko.ii meraa

Faiz Ahmad Faiz
Nazm

ek nau-jawan ke nam

tire sofe hai.n afra.ngii tire qaalii.n hai.n iiraanii
lahuu mujh ko rulaatii hai javaano.n kii tan-aasaanii
imaarat kiyaa shikva-e-KHusravii bhii ho to kyaa haasil
na zor-e-haidarii tujh me.n na istiGnaa-e-salmaanii
na Dhuu.nD us chiiz ko tahziib-e-haazir kii tajallii me.n
ki paayaa mai.n ne istiGnaa me.n meraaj-e-musalmaanii
uqaabii ruuh jab bedaar hotii hai javaano.n me.n
nazar aatii hai un ko apnii manzil aasmaano.n me.n
na ho naumiid naumiidii zavaal-e-ilm-o-irfaa.n hai
umiid-e-mard-e-momin hai KHudaa ke raaz-daano.n me.n
nahii.n teraa nasheman qasr-e-sultaanii ke gumbad par
tuu shaahii.n hai baseraa kar pahaa.Do.n kii chaTaano.n me.n

Allama Iqbal
Nazm

o des se aane wale bata

o des se aane vaale bataa
kyaa shaam pa.De galiyo.n me.n vahii
dilchasp a.ndheraa hotaa hai
aur sa.Dko.n kii dhundlii sham.o.n par
saayo.n kaa baseraa hotaa hai
baaGo.n kii ghanerii shaaKHo.n me.n
jis tarah saveraa hotaa hai
o des se aane vaale bataa

Akhtar Shirani
Nazm

barsat ki bahaaren

gaatii hai giit ko.ii jhuule pe kar ke pheraa
maaro jii aaj kiijiye yaa.n rain kaa baseraa
hai KHush kisii ko aa kar hai dard-o-Gam ne gheraa
mu.nh zard baal bikhre aur aa.nkho.n me.n a.ndheraa
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

guman ka mumkin- jo tu hai main hun

ye jhiil vo hai ki jis ke uupar
hazaaro.n insaa.n
ufuq ke mutavaazii chal rahe hai.n
ufuq ke mutavaazii chalne vaalo.n ko paar laatii hai.n
vaqt lahre.n
jinhe.n tamannaa, magar, samaavii KHiraam kii ho
inhii ko paataal zamzamo.n kii sadaa sunaatii hai.n
vaqt lahre.n
unhe.n Dubotii hai.n vaqt lahre.n!
tamaam mallaah us sadaa se sadaa hiraasaa.n, sadaa gurezaa.n
ki jhiil me.n ik umuud kaa chor chhup ke baiThaa hai
us ke gesuu ufuq kii chhat se laTak rahe hai.n
pukaartaa hai: ''ab aa.o, aa.o!
azal se mai.n muntazir tumhaaraa
mai.n gumbado.n ke tamaam raazo.n ko jaantaa huu.n
daraKHt miinaar burj ziine mire hii saathii
mire hii mutavaazii chal rahe hai.n
mai.n har havaa.ii-jahaaz kaa aaKHirii baseraa
samundaro.n par jahaaz-raano.n kaa mai.n kinaaraa
ab aa.o, aa.o!
tumhaare jaise ka.ii fasaano.n ko mai.n ne un ke
abad ke aaGosh me.n utaaraa''
tamaam mallaah is kii aavaaz se gurezaa.n
ufuq kii shaah-raah-e-mubtazil par tamaam sahme hu.e KHiraamaa.n
magar samaavii KHiraam vaale
jo past o baalaa ke aastaa.n par jame hu.e hai.n
umuud ke is tanaab hii se utar rahe hai.n
isii ko thaame hu.e bulandii pe cha.Dh rahe hai.n!

Noon Meem Rashid
Nazm

man tere jaane ke baad

phone par kis ko sunaa.uu.ngii mai.n apnaa haal-e-zaar
kis kii baate.n sun ke aa.egaa mire dil ko qaraar
kaun po.nchhegaa mire bahte hu.e ashko.n kii dhaar
kaun paanii pa.Dh ke degaa hogaa jab mujh ko buKHaar
dil me.n vahshat kaa baseraa maa.n tire jaane ke baa'd
dam ghuTaa jaataa hai meraa maa.n tire jaane ke baa'd

Shahnaz Parveen Shazi
Nazm

andesha

sandalii.n jism kii KHushbuu se mahaktii hu.ii raat
mujh se kahtii hai yahii.n aaj baseraa kar le
gar tirii nii.nd ujaalo.n kii parastaar nahii.n
apne ehsaas pe zulfo.n kaa a.ndheraa kar le

Qateel Shifai
Nazm

meri shaeri

mirii shaa.erii KHaaksaaro.n kii duniyaa
baseraa KHas-o-KHaar-o-KHaashaak par hai
magar haath har KHosha-e-taak par hai
agarche sar-e-be-KHudii KHaak par hai
dimaaG-e-KHudii auj-e-aflaak par hai
mire sher kii aa.nkh idraak par hai
mirii shaa.erii KHaaksaaro.n kii duniyaa

Hafeez Jalandhari
Nazm

ye basti meri basti hai

mujhe jab yaad aatii hai
to diivaana saa kar detii hai vo KHushbuu ravaasan kii
vahii maaler ke kheto.n kii albelii havaa
amruud aur shahtuut ke pe.Do.n kii vo shaaKHe.n
ki jin par mere bachpan kaa baseraa thaa

Ishrat Afreen
Nazm

ek adhuri dastan

vo ik la.Dkii
jo KHaamoshii me.n bhii aksar chahaktii thii
sub.h se shaam tak aur raat me.n bhii baate.n kartii thii
sabho.n ko shaad rakhtii thii bahut masruur rahtii thii
kabhii baadal kabhii KHushbuu kabhii gul-ra.ng kii suurat
barastii thii bikhartii thii badaltii thii
magar mahsuus hotaa thaa hamesha paas rahtii hai
jo vo anjaan bantii thii
aziiz az jaan lagtii thii
kabhii chanchal havaa panchhii ke pa.nkho.n aur nadii ke lams kii maanind
utar aatii thii dil me.n ruuh ko pur-kaif rakhtii thii
kabhii ho.nTo.n ke ras aa.nkho.n kii shabnam gaalo.n ke KHush-ra.ng mausam se
nashe ko jhiil ko gulbun ko bhii vo maat detii thii
mai.n us ke lams se ruKHsaaro.n kii dhiimii tamaazat garm saa.nso.n se
bahut qurbat bahut apnaa.iyat mahsuus kartaa thaa
zehn ke paas paataa thaa use apnaa samajhtaa thaa
magar phir kyaa hu.aa ik din ki ik bad-baKHt Daa.in ne
KHudaa jaane kahaa.n bhejaa ki sab laa-ilm hai.n us se
magar pahu.nche hu.e darvesh ne ye bhed kholaa hai
baseraa us kaa ab hai chaa.ndnii ke kunj
sitaaro.n ke baGiicho.n me.n
vo un kii sair kartii hai magar Gamgiin rahtii hai
use sab vahm kahte hai.n KHilaaf-e-aql kahte hai.n
magar pakkaa yaqii.n hai jab ko.ii TuuTaa hu.aa taaraa
zamii.n ko chuumne aa.egaa vo bhii saath aa.egii
phir apne saath vo KHushiyo.n ke sad.haa gul bhii laa.egii
so har shab jaagtaa huu.n
raah me.n aakaash kii aa.nkhe.n bichhaataa huu.n
magar jo taaraa aataa hai zamii.n tak aa nahii.n paataa

Abu Bakr Abbad
Nazm

luDhakta patthar

jis ne aa.ankho.n me.n sitaare se kabhii ghole the
aaj ehsaas pe kaajal saa bikheraa us ne
jis ne KHud aa ke TaTolaa thaa mire siine ko
le liyaa Gair ke pahluu me.n baseraa us ne

Qateel Shifai
Nazm

nind se chaunko

gahrii nii.nd se sone vaalo
vaqt ko apne khone vaalo
raat kaTii kuchh tum ko KHabar hai
chau.nko chau.nko vaqt-e-sahar hai
chaa.nd kii rangat ho ga.ii mailii
dekho chamak suuraj kii phailii
chalte hai.n jho.nke sard havaa ke
jhuum rahe hai.n phuul itraa ke
koyale.n kuuke.n kuu kuu kuu kuu
yaahuu bole yaahuu yaahuu
nii.nd se chau.nke.n pankh pakheruu
bol rahe hai.n shaaKHo.n pe har suu
bhuule hu.e hai.n is dam sab dhun
laal pukaare summun bukmun
khil ga.ii.n kaliyaa.n baaG kii saarii
chaar taraf hai.n nahre.n jaarii
go ki abhii tak kuchh hai a.ndheraa
chi.Diyaa.n lene aa.ii.n baseraa
gaa.e.n duub ko charne aa.ii.n
bhai.nso.n ne apnii shakle.n dikhaa.ii.n
ruk gayaa is dam bahtaa dariyaa
duur talak shaffaaf hai sahraa
uTTho uTTho ahmad uTTho
mu.nh ko dho kar kap.De pahan lo
sair karo maidaa.n kii nikal kar
phuul ko dekho baaG me.n chal kar
vaqt ko khonaa zulm hai pyaare
sun ye nasiihat dost hamaare

Shad Azimabadi
Nazm

bulbul

hazaar rang KHizaa.n ne bahaar ne badle
hazaar ruup yahaa.n rozgaar ne badle
tirii qadiim ravish dekhtaa huu.n bachpan se
hai sub.h-o-shaam tujhe kaam apne shevan se
asar-paziir havaadis tiraa taraana nahii.n?
dayaar-e-ishq me.n yaa gardish-e-zamaana nahii.n?
na aashiyaana kahii.n hai na hai vatan teraa
rahegaa yuu.nhii baseraa chaman chaman teraa

Majnoon Gorakhpuri
Nazm

34

KHudaa gar hame.n ik parinda banaataa
jahaa.n me.n ham ik aashiyaana banaate
kisii sabz vaadii me.n apnaa nasheman
yaa sehn-e-chaman ko Thikaana banaate
kabhii u.Dte baadal me.n hotaa baseraa
kabhii Daalte kunj-e-vahshat me.n Deraa
kabhii daaman-e-koh hotaa hamaaraa
kabhii bantaa ghar ik nadii kaa kinaaraa
kabhii giit gaate ghaTaa.o.n ke niiche
kabhii hote paagal havaa.o.n ke piichhe
fazaa.o.n me.n ham sub.h se shaam karte
a.ndhere se pahle zamii.n par utarte
ko.ii gulistaa.n mulk hotaa hamaaraa
ham is ke liye ik taraana banaate
KHudaa gar hame.n ik parinda banaataa
use ham parinde KHudaa na banaate

Zeeshan Sahil
Nazm

chizon ke andar jhankne ki koshish

mai.n ne ek suukhte pe.D par
nazm likhnaa shuruu.a kii
mere andar piile patto.n ke Dher lag ga.e
mai.n ne havaa par nazm likhii
mere andar shaaKHe.n phuuTne lagii.n
phuul merii hatheliyo.n se
baahar nikal aa.e
mai.n ne baarish par nazm likhii
merii chaadar ke palluu bhiig ga.e
jin ko sukhaane ke liye
mai.n ne
dhuup par nazm likhii
suuraj savaa neze par aa gayaa
pe.D jalne lage
aur parind marne lage
mai.n ne baadalo.n ke liye haath uThaa.e
phir kashtiyaa.n kam pa.D ga.ii.n
log Duubne lage
mai.n ne Duubne vaalo.n par nazm likhnaa chaahii
laashe.n hii laashe.n merii chaaro.n jaanib tairne lagii.n
har ek laash kahne lagii
pahle mujh par likho
pahle mujh par
mai.n ne is shor me.n
apnii bhii chiiKHe.n sunii.n
phir mere andar
ek gahre aur pur-asraar sukuut ne baseraa kar liyaa
ab mai.n is sukuut kii mezbaanii kartii huu.n
isii ke saath baate.n kartii huu.n
sotii aur jaagtii huu.n
diivaare.n mere liye
libaas bantii rahtii hai.n
khi.Dkiyaa.n aur raushan-daan mere vajuud ke ghaav hai.n
jin par
har aatii hu.ii sub.h aur Dhaltii hu.ii shaam
apnaa apnaa marham rakhtii hai.n
aur mujh se kahtii hai.n ham par bhii nazm likhnaa jab ye ghaav bhar jaa.e.n
galii me.n khelte bachche
kabhii kabhii
khi.Dkii ke shiishe se aa.nkhe.n chipkaa kar
andar jhaa.nkne kii koshish karte hai.n
unhe.n kaun ye samjhaa.e
chiizo.n ke andar jhaa.nkne kii koshish
shaa.ir banaa detii hai

Janan Malik
Nazm

karachi

ra.iis apnii jhuggii me.n tho.Dii jagah de.n
to ham bhii yahaa.n kar sake.nge baseraa

Abul Fitrat Meer Zaidi
Nazm

mujhe malum hai

ye
aa.nsu.o.n kii jhiil hai
yahaa.n har baras
bahut duur se
parinde u.D kar aate hai.n
aur ek puuraa mausam
baseraa karte hai.n
kisii bhii shikaarii ko
yahaa.n aane kii ijaazat nahii.n hai
mausam ke iKHtitaam par
vaapsii kaa safar shuruu.a hotaa hai
mai.n
gintii kartaa huu.n
vo itne hii hote hai.n
jitne aa.e the
mai.n us jhiil ko
kabhii KHushk hone nahii.n duu.ngaa
aur har baras
parindo.n ko
KHush-aamdiid kahuu.ngaa
aur kabhii un se ye nahii.n puuchhuu.ngaa
vo duusraa mausam
kis jhiil me.n guzaarte hai.n

Mustafa Arbab
Nazm

ja maine tujhe aazad kiya

ab par tere kamzor nahii.n
mujh me.n sun.ne kaa zor nahii.n
ki qaid kiyaa mai.n ne tujh ko
ye sun kar dil bezaar hu.aa
ehsaas hu.aa hai shiddat se
Galatii thii mirii jo pyaar hu.aa
jo chaahe jahaa.n chaahe jaa kar
tuu apnaa baseraa ab kar le
be-kaar hii apne aap ko yuu.n
chaahat me.n terii barbaad kiyaa
jaa mai.n ne tujhe aazaad kiyaa
jaa mai.n ne tujhe aazaad kiyaa

Mumtaz Malik
Nazm

raqs

naach haa.n naach ki har shorish-o-ha.ngaama par
phail jaa.e tirii jhan-jhan kaa hasii.n pairaahan
naach haa.n naach ki siine me.n tire
ek motii kii tarah raaz zamaane kaa simaT kar rah jaa.e
baazu.o.n ko kabhii hone de daraaz
jam.a karne de KHad-o-KHaal kabhii apnii hasii.n aa.nkho.n ko
farsh-e-aavaaz pe rakh apne pur-asraar qadam
aur chamakte hu.e sa.ngiit kaa jaaduu pii jaa
naach sad-nashsha-o-shaadaabii se
naachtii jaa isii mastii me.n ki tuu ek ka.nval ban jaa.e
aur tujh ko kisii taalaab ke siine me.n utaar aa.e.n ham
bhuut aa kar tirii ra.ngat me.n baseraa kar le.n
aur ham
buu.Dhe daraKHto.n kii kuhan-saal laTaktii hu.ii shaaKHo.n
se lipaT kar ro.e.n
saal-haa-saal lipaT kar ro.e.n

Rajinder Manchanda Bani
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now