Search result for "be-iKHtiyaar" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "be-iKhtiyaar"

Nazm MATCHES FOR "be-iKHtiyaar"

Nazm

hindu musalmanon ka ittihad

baahe.n gale me.n Daalo be-iKHtiyaar dono.n
haa.n chho.D do ye ranjish ban jaa.o yaar dono.n

Chandar Bhan Kaifi Dehelvi

Nazm

naqqad

dil me.n jab ash.aar kii hotii hai baarish be-shumaar
nutq par buu.nde.n Tapak pa.Dtii hai.n kuchh be-iKHtiyaar

Josh Malihabadi

Nazm

yaum-e-azadi

sadaa apne chaman me.n daur-daura ho bahaaro.n kaa
'habiib' apnii zabaa.n par ye du.aa be-iKHtiyaar aa.ii

JaiKrishn Chaudhry Habeeb

Nazm

aurat

mahv hai zikr-e-KHafii me.n zaahid-e-shab zinda-daar
baiThe baiThe chau.nk pa.Dtaa hai magar be-iKHtiyaar

Shatir Hakeemi

Nazm

anar-kali

nuqra.ii aavaaz me.n lafzo.n kaa nuur
apne hamraahii ke dil par naGma-baar
jaise shabnam daaman-e-gul par gire be-iKHtiyaar

Yusuf Zafar

Nazm

ai nigar-e-watan

tujhe kuchh us kii KHabar bhii hai ai nigaar-e-vatan
tire liye ko.ii siina-figaar hai ab bhii
uThaa chukaa huu.n fareb-e-vafaa ke daaG magar
shikasta dil ko tiraa e'tibaar hai ab bhii
hazaaro.n kaahkashaa.n ne bichhaa.e jaal magar
mirii nazar me.n tirii rahguzaar hai ab bhii
vo ek qatra jo Tapkaa thaa tere daaman par
vo ek naqsh miraa shaahkaar hai ab bhii
vo ek lamha tire Gam me.n jo guzaaraa thaa
sukuun-e-KHaatir-e-be-iKHtiyaar hai ab bhii
vo kisht-e-dil ki jise aa.nsu.o.n ne sii.nchaa thaa
hariif-e-chashmak-o-barq-o-sharar hai ab bhii
KHizaa.n ne yuu.n to ka.ii sabz-baaG dikhlaa.e
bahaar muntazir-e-nau-bahaar hai ab bhii
ravish ravish pe hai.n charche KHizaa.n-nasiibii ke
kalii kalii kii nazar sogvaar hai ab bhii
lahuu Tapaktaa hai gulchii.n kii aastiino.n se
qabaa-e-laala-o-gul daaGdaar hai ab bhii
bahut qariib hai.n ab bhii qafas kii diivaare.n
bahut buland sar-e-shaaKH-saar hai ab bhii

Akhtar Payami

Nazm

bachchon ke isma’il meraThi

kam kisii suurat na hogii un kii nazmo.n kii bahaar
hai hamaare dil me.n pinhaa.n aaj bhii un kaa vaqaar
kaash ham bachcho.n kii mahfil me.n vo aa jaate kabhii
chuum hii lete qalam ko un ke ham be-iKHtiyaar

Amaan Zakhirvi

Nazm

matam-e-nim-shab

jab mai.n aur tuu niDhaal ho jaate hai.n
saa.nse.n phuultii hai.n
o rahm pahle Dhiile aur phir sard pa.D jaate hai.n
aur hamaare chehre apnii aslii haalat par aa jaate hai.n
to be-iKHtiyaar sochtaa huu.n
hamaaraa kyaa hogaa agar saath chhuuT gayaa

Farooq Nazki

Nazm

holi

ye sair holii kii ham ne to biruj me.n dekhii
kahii.n na hovegii is lutf kii miyaa.n holii
ko.ii to Duubaa hai daaman se le ke taa cholii
ko.ii to murlii bajaataa hai kah kanhaiyaa jii
hai dhuum-dhaam pe be-iKHtiyaar holii me.n

Nazeer Akbarabadi

Nazm

aalamin

KHvaab hai yaa ko.ii tasavvur hai
ye tavaazun ye fikr kaa miizaan
itnaa gahraa KHamosh aavaaza
har taharruk ba-qadr-e-andaaza
be-hisaarii kaa ye ma.aduum hisaar
kaa.enaato.n kaa be-shumaar shumaar
qulzum-e-be-kanaar kaa aalam
aalamo.n ke Gubaar kaa aalam
kahkashaa.o.n ke haar laa-mahduud
mehr-e-be-iKHtiyaar laa-mahduud
behad-o-be-hisaab sayyaare
daaG be-daaG be-panah taare
aisaa be-ant hai KHalaa kyuu.nkar
ye KHudaa gar hai ye KHudaa hai gar
is haqiiqat kii kyaa haqiiqat hai
juz tasavvur kahaa.n ye vus.at hai

Faisal Azeem

Nazm

majruh sultanpuri ke nam

hai fazaa maGmuum afsurda sabhii hai.n barg-o-baar
sahn-e-gulshan se ga.ii ho ruuTh kar jaise bahaar
muztarib hai aaj kuchh kaifiyyat-e-lail-o-nahaar
kyaa kare ko.ii yahaa.n har shaKHs hai be-iKHtiyaar
sab isii manzil se guzre.nge yaqii.n mohkam hai ye
is fanaa-anjaam duniyaa kaa 'amal paiham hai ye

Bismil Aazmi

Nazm

phir na dekhe bahaar ki surat

ghar ke naqsh-o-nigaar kii suurat
naqsh hai dil pe yaar kii suurat
uf ye dam to.Dtii hu.ii sham.e.n
a.nkh.Diyo.n me.n KHumaar kii suurat
har dariiche me.n hai charaaG kaa gul
ab hai ye intizaar kii suurat
ab dha.Daktaa hai baar baar dimaaG
dil-e-be-iKHtiyaar kii suurat
bas yuu.nhii aate jaate milte hai.n
ham bhii lail-o-nahaar kii suurat
us kaa aanaa bhii ik qayaamat thaa
mahshar-e-intizaar kii suurat
gard kii tarah baiTh jaa.e.nge
jo uThe hai.n Gubaar kii suurat
apnii mahruumiyo.n kaa jashn manaa.e.n
aa.o jashn-e-bahaar kii suurat
ye sadii bhii guzar hii jaa.egii
shutar-e-be-mahaar kii suurat
vaa.n bhii sahtii hai dhuup kii yalGaar
shajar-e-saaya-daar kii suurat
sar-e-tuufaa.n guzaar lo 'naqvii'
ik yahii hai qaraar kii suurat

Syed Mohammad Ahmad Naqvi

Nazm

tere baghair

aa ki dil kii chaa.ndnii ruu-posh hai tere baGair
aa ki saaz-e-zindagii KHaamosh hai tere baGair
iid ho tum ko mubaarak haa.n magar mere liye
zindagii kyaa hai vabaal-e-dosh hai tere baGair
aa ki zahar ab baada-e-sar-josh hai tere baGair
hai KHizaa.n-aaluuda sub.h-e-gulsitaa.n tere baGair
KHanda-e-gul hai tabii.at par garaa.n tere baGair
jalva-e-sarv-o-saman me.n ab kahaa.n vo dilkashii
Garq hasrat hai dil-e-naa-shaadmaa.n tere baGair
aa ki mahruum-e-tarab huu.n jaan-e-jaa.n tere baGair
ro rahe hai.n Guncha-o-barg-o-shajar tere baGair
baaG kii saarii fazaa hai nauhagar tere baGair
ik basiit ehsaas-e-mahruumii mirii har saa.ns me.n
kar rahaa hai zindagii ko muKHtasar tere baGair
aa ki ab taariik hai saaraa jahaa.n tere baGair
dil ko aa.e kyaa mohabbat me.n sukuu.n tere baGair
ho ga.e aql-o-KHirad nazr-e-junuu.n tere baGair
dil hai aur aaTho.n-pahar ik vahshat-e-be-iKHtiyaar
aa.nkh hai aur baarish-e-sailaab-e-KHuu.n tere baGair
aa ki rusvaa hai miraa haal-e-zabuu.n tere baGair

Jauhar Nizami

Nazm

agar

agar kabhii use merii yaad aa.e
merii tarah apnii
har anaa
dafn kar aa.e
merii KHaatir jahaa.n se la.D jaa.e
Dhuu.nDe mujhe
diivaana-vaar nazro.n se
mahfil me.n to
kabhii tanhaa.ii me.n
qarya qarya phire
sahraa sahraa jaa.e
phire jangalo.n me.n
duniyaa ke
maaraa-maaraa
rakhe dil pe haath
shaam-o-sahar
bhare sard aah
kabhii jo Dhuu.nDne mujh ko samundaro.n ke safar pe nikle
chaa.nd kaa 'aks jab paanii me.n dekhe
be-iKHtiyaar chau.nke
kabhii KHud se lipaTtii havaa se pata meraa vo puuchhe
na miluu.n jab is jahaa.n me.n use
musalle pe jaa ke dard apnaa sunaa.e
aur hichkiyaa.n baa.ndh kar gi.Dgi.Daa.e
phir use apnii har be-ruKHii yaad aa.e
ta.Dap ta.Dap ke vo naam meraa dohraa.e
shaayad
kabhii aisaa ho jaa.e

Muazzama Naqwi

Nazm

lab-bastagi

suno gurez karo aaj kuchh bhii kahne se
'ajiib vaqt ke dhaare badal rahe hai.n abhii
ye gardisho.n ke tamaashe hatheliyo.n ke fareb
shikasta zaat ke hairat gaziida gosho.n ko
bataa rahe hai.n sitaare badal rahe hai.n abhii
abhii to sabr ke KHemo.n kii in tanaabo.n ko
buriidagii liye haatho.n se thaamnaa hogaa
abhii to baad-e-muKHaalif ke in thape.Do.n ko
bikhartii KHaak ke zarro.n se roknaa hogaa
suno gurez karo aaj kuchh bhii kahne se
ye lamha saa'at-e-be-iKHtiyaar hai jaanaa.n
yahaa.n gumaa.n ke qabiile yaqii.n ko Dhaate hai.n
yahii hai maqtal-e-be-aab reg-e-dasht-e-balaa
jahaa.n pe tishna-labaa.n e.Diyaa.n raga.Dte hu.e
kisii ke 'ishq me.n duniyaa se haare jaate hai.n
suno gurez karo aaj kuchh bhii kahne se
ki aaj dhuup kaa lahja bhii intiqaamii hai
chhupaa lo haath se chehre kii vahshato.n ke nuquush
ki ab hadaf hii ujaale kaa be-naqaabii hai
sapedii-e-saharii se gurez-paa naachaar
siyaahii-e-shab-e-viiraa.n me.n Dhalte jaate hai.n
du'aa du'aa kii sadaa.o.n se dam ulajhtaa hai
ki ab to haath bhii kashkol hote jaate hai.n
suno gurez karo aaj kuchh bhii kahne se
suno ki zahr ke pyaale chhalak rahe hai.n abhii
uThaanaa jin ko vafaa.o.n kaa farz hotaa hai
ye ham jo palko.n pe aa.nsuu sajaa.e phirte hai.n
ye zindagii kii bahaaro.n kaa qarz hotaa hai
suno sukuut ke pahluu talaashtii hai hayaat
abhii saro.n se guzarne do in Gubaaro.n ko
Thaharne do abhii be-rabt aabshaaro.n ko
jahaan-e-saut-o-sadaa KHaamushii kaa taalib hai
'safar' zabaa.n pe kisii harf ko jagah na mile
yahaa.n kalaam nahii.n bas sukuut vaajib hai

Safar Naqvi

Nazm

id ke din

riyaaz-e-shauq me.n aa.ii bahaar iid ke din
nazar-faroz hu.aa ruu-e-yaar iid ke din
adaa adaa me.n inaayat nazar nazar me.n karam
mirii KHizaa.n bhii hai ab tak bahaar iid ke din
hai.n un ke jalvo.n kii arzaaniyaa.n payaam-e-nashaat
nahii.n hai dil me.n Gam-e-rozgaar iid ke din
dil-e-fasurda me.n phir KHuun-e-sarKHushii dau.Daa
vo aa ke mujh se hu.e ham-kanaar iid ke din
nigaah-e-shauq pe parvaana-vaar girtii hai.n
tajalliyaa.n bhii hai.n be-iKHtiyaar iid ke din
na un kii aa.nkho.n me.n Gussa na kuchh jabii.n pe shikan
baras rahaa hai nigaaho.n se pyaar iid ke din
nigaah-e-mehr kii garmii hai raushnii dil kii
hai bazm-e-shauq mirii kaamgaar iid ke din
vo fart-e-shauq me.n ha.ns ha.ns ke mil rahe hai.n gale
hai shaad 'jauhar'-e-siina-figaar iid ke din

Jauhar Nizami

Nazm

kaif-e-mausiqi

u.ngliyo.n ne chhuu diyaa barbat kii dhun bahne lagii
abr-e-mausiiqii se vo chhan chhan ke ye kahne lagii
thaam lo dil ko jahaa.n mad.hosh ho jaane ko hai
god me.n merii abhii KHaamosh ho jaane ko hai
naGma kii pahlii kiran me.n kho gayaa taar-e-rabaab
nii.nd sii aane lagii sone lagaa meraa shabaab
yak-ba-yak dhaaraa saa ik bahne lagaa be-iKHtiyaar
bah chalaa maanind-e-dariyaa chhaa gayaa misl-e-bahaar
raagnii kii dhaar ne phir chhuu liyaa dil ko mire
sail-e-mausiiqii ne paanii kar diyaa dil ko mire
kaif-e-mausiiqii ne paanii kar diyaa dil ko mire
kho ga.ii.n ublii.n bahii.n bah kar thamii.n tham kar bahii.n
ek duniyaa murta.ish thii mauja-e-naGmaat par
ik ajab KHvaabiidgii taarii thii kaa.enaat par
daur-e-mausiiqii me.n din thaa aur na thii taKHsiis-e-shab
ek vaqt-e-jaavedaa.n ik arsa-e-mauj-e-tarab

Sahba lakhnavi

Nazm

nawishta-e-pas-e-diwar

ye ra.ng-o-buu ye nazaare ye bazm-aaraa.ii
niyaaz-o-naaz-o-adaa husn ishq ra.anaa.ii
shabaab-e-nazm-o-Gazal dar pai-e-shakebaa.ii
mujhe ye saa.at-guzraa.n kahaa.n pe le aa.ii
qaraar dekh liyaa iztiraar dekh liyaa
Gam-e-habiib Gam-e-rozgaar dekh liyaa
udaas chehro.n pe u.Dtaa Gubaar dekh liyaa
navaa-e-shauq ko be-iKHtiyaar dekh liyaa
KHizaa.n-gaziida saa ra.ng-e-bahaar dekh liyaa
gumaa.n-dariida yaqiin taar taar dekh liyaa
tamaam ishva-e-husn-e-nigaar dekh liyaa
junuu.n kaa sajda sar-e-kuu-e-yaar dekh liyaa
savaad-e-aql-o-KHirad be-vaqaar dekh liyaa
rahaa na KHud kaa bhii phir e'tibaar dekh liyaa
kabhii jo dekhaa na thaa baar baar dekh liyaa
na ibtidaa kii KHabar hai na intihaa ma.aluum
navishta-e-pas-e-diivar kyaa hai kyaa ma.aluum

Sarwar Alam Raz

Nazm

soKHta jism ka libas

libaas jal kar mire badan par chipak gayaa hai
badan musalsal sulag rahaa hai
kahii.n kahii.n bhuule bhaTke sho.ale
uThaa ke lau sar kii ab bhii
baahar ko jhuulte hai.n
jinhe.n mai.n apnii
jalii hathelii kii pusht se KHud dabaa rahaa huu.n
alaav se baahar aa ke
dahshat-zada nigaaho.n se dekhtaa huu.n
kahii.n se ab ambulance aa.egii merii jaanib
ko.ii masiihaa-nafas sambhaalegaa aage ba.Dh kar
magar yahaa.n to
ko.ii masiihaa-nafas nahii.n hai
mai.n chiiKHtaa huu.n ko.ii to hogaa
ko.ii to be-iKHtiyaar merii taraf bhii aa.e
badan se chimTii qabaa ko KHud hii
bachii khuchii u.ngliyo.n kii poro.n
se chhuu ke mahsuus kar rahaa huu.n
ki jism hai yaa jalaa hu.aa pairahan hai meraa
jo merii miTTii me.n dha.ns rahaa hai
aziyyato.n kii gavaahii detaa hai KHaliya KHaliya
jaka.D chukaa huu.n mai.n is kii parto.n me.n chaahtaa huu.n
ki khii.nch Daaluu.n
utaar phe.nkuu.n ise magar ab
ise utaaruu.n
to khaal merii hii khii.nch legaa
aur in sulagtii
bachii khuchii u.ngliyo.n kii poro.n se naaKHuno.n se
kurednaa bhii nahii.n hai bas me.n
jo pairahan thaa
vo pairahan ab miraa qafas hai
jo pairahan thaa
vo pairahan ab miraa badan hai

Faisal Azeem

Nazm

yaad

is ek kamre me.n jaane kitnii tumhaarii yaade.n basii hu.ii hai.n
lipaT ke mujh se ye rone lagtii hai.n yaar be-iKHtiyaar ho kar
ke mai.n bhii un ke kisii ishaare pe ro hii duu.n zaar-zaar ho kar
ye sab tumhaarii hii saazishe.n hai.n
ye sab tumhaaraa kiyaa hu.aa hai
ki phuul shabnam giraa rahaa hai
vo ro rahaa hai kyaariyo.n me.n
vo ek kamra jahaa.n pe tum ho
ye ek kamra jo khul rahaa hai
phisal rahaa hai ye vaqt haatho.n se ret jaise phisal rahii ho
har ek din hai baras ke jaisaa baras bhii jis me.n hazaar din ho.n
guzar rahii hai ye zindagii yuu.n ye zindagii ke KHaraab din ho.n
na yaad karne kii intihaa hai jo yaad aane lagii ho ab tum
rukii thii kab tum
haqiiqatan is daf'a jo tum ne lagaayaa siine se ro na duu.n mai.n
ye vasvasa hai ki tum ko mai.n ne jo dil se chaahaa to kho na duu.n mai.n
ye kis ne anjaam likh diyaa hai dil-o-mohabbat kaa yaar aisaa ki KHaar jaisaa
vo kaun thaa jo lagaa ke baiThaa thaa dil kisii se
vo kaun thaa jis kaa dil hu.aa zaar-zaar aisaa
tumhe.n bhulaane kii koshisho.n me.n ye aaKHirii din hai jaan yaa'nii
ye aaKHirii din hai jaan yaa'nii

Piyush Sharma

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now