Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "buraa.ii"

Nazm MATCHES FOR "buraa.ii"

Nazm

bachche ki dua

zindagii ho mirii parvaane kii suurat yaa-rab
ilm kii sham.a se ho mujh ko mohabbat yaa-rab
ho miraa kaam Gariibo.n kii himaayat karnaa
dard-mando.n se za.iifo.n se mohabbat karnaa
mire allaah! buraa.ii se bachaanaa mujh ko
nek jo raah ho us rah pe chalaanaa mujh ko

Allama Iqbal
Nazm

chand nasihaten

kaaT lenaa har kaThin manzil kaa kuchh mushkil nahii.n
ik zaraa insaan me.n chalne kii himmat chaahiye
mil nahii.n saktii nikammo.n ko zamaane me.n muraad
kaamyaabii kii jo KHvaahish ho to mehnat chaahiye
KHaak mehnat ho sakegii ho na jab haatho.n me.n zor
tandurustii ke liye varzish kii aadat chaahiye
KHush-mizaajii saa zamaane me.n ko.ii jaaduu nahii.n
har ko.ii tahsii.n kahe aisii tabii.at chaahiye
ha.ns ke milnaa raam kar lenaa har har insaan ko
sab se miiThaa bolne kii tum ko aadat chaahiye
ek hii allaah ke bande hai.n sab chhoTe ba.De
apne ham-jinso.n se duniyaa me.n mohabbat chaahiye
hai buraa.ii hii buraa.ii kaam kal par chho.Dnaa
aaj sab kuchh kar ke uTho gar faraaGat chaahiye
jo buro.n ke paas baiThegaa buraa ho jaa.egaa
nek hone ke liye neko.n kii sohbat chaahiye
saath vaale dekhnaa tum se na ba.Dh jaa.e.n kahii.n
josh aisaa chaahiye aisii hamiyyat chaahiye
hukmaraa.n ho ko.ii apnaa ho yaa begaana
dii KHudaa ne jis ko izzat us kii izzat chaahiye
dekh kar chalnaa kuchal jaa.e na chyuu.nTii raah me.n
aadmii ko be-zabaano.n se bhii ulfat chaahiye
hai isii me.n bhed izzat kaa agar samjhe ko.ii
chhoTe bachcho.n ko buzurgo.n kii itaa.at chaahiye
ilm kahte hai.n jise sab se ba.Dii daulat hai ye
Dhuu.nD lo is ko agar duniyaa me.n izzat chaahiye
sab buraa kahte hai.n la.Dne ko burii aadat hai ye
saath ke la.Dke jo ho.n un se rifaaqat chaahiye
ho.n jamaa.at me.n sharaarat karne vaale bhii agar
duur kii un se faqat saahab salaamat chaahiye
dekhnaa aapas me.n phir nafrat na ho jaa.e kahii.n
is qadar had se ziyaada bhii na millat chaahiye
baap-daadaa kii ba.Daa.ii pe na itraanaa kabhii
aadmii ko apne kaamo.n kii sharaafat chaahiye
gar kitaabe.n ho ga.ii.n mailii to kyaa pa.Dhne kaa lutf
kaam kii chiize.n hai.n jo un kii hifaazat chaahiye

Allama Iqbal
Nazm

ek gae aur bakri

kaT rahii hai burii-bhalii apnii
hai musiibat me.n zindagii apnii

Allama Iqbal
Nazm

school-teacher

school ke hamaare
ustaad pyaare pyaare
ham ko pa.Dhaa rahe hai.n
insaa.n banaa rahe hai.n
kyaa kyaa nahii sikhaayaa
yuu.n hausla ba.Dhaayaa
baat an-sunii bataa.ii
duniyaa na.ii dikhaa.ii
kii duur har buraa.ii
tahziib bhii sikhaa.ii
karnaa nahii la.Daa.ii
hotii hai jag-ha.nsaa.ii
hote hai.n baap saaya
un se ye dars paayaa
ta.aliim kaa asar hai
uu.nchaa hamaaraa sar hai
un kaa jo ye amal hai
ehsaan-e-be-badal hai
un kii kare.nge izzat
paate rahe.nge shafqat
KHuubii 'faraaG' ne bhii
ustaad kii bayaa.n kii

Faragh Rohvi
Nazm

holi

buraa.ii aaj na aise rahe na vaise rahe
safaa.ii dil me.n rahe aaj chaahe jaise rahe
Gubaar dil me.n kisii ke rahe to kaise rahe
abiir u.Dtii hai ban kar Gubaar holii me.n

Nazeer Banarasi
Nazm

yagangat

zamaane me.n ko.ii buraa.ii nahii.n hai
faqat ik tasalsul kaa jhuulaa ravaa.n hai
ye mai.n kah rahaa huu.n
mai.n ko.ii buraa.ii nahii.n huu.n zamaana nahii.n huu.n tasalsul kaa jhuulaa nahii.n huu.n
mujhe kyaa KHabar kyaa buraa.ii me.n hai kyaa zamaane me.n hai aur phir mai.n to ye bhii kahuu.ngaa
ki jo shai akelii rahe us kii manzil fanaa hii fanaa hai
buraa.ii bhalaa.ii zamaana tasalsul ye baate.n baqaa ke gharaane se aa.ii hu.ii hai.n
mujhe to kisii bhii gharaane se ko.ii ta'alluq nahii.n hai
mai.n huu.n ek aur mai.n akelaa huu.n ek ajnabii huu.n
ye bastii ye jangal ye bahte hu.e raste aur dariyaa
ye parbat achaanak nigaaho.n me.n aatii hu.ii ko.ii uu.nchii imaarat
ye uj.De hu.e maqbare aur marg-e-musalsal kii suurat mujaavir
ye ha.nste hu.e nanhe bachche ye gaa.Dii se Takraa ke martaa hu.aa ek andhaa musaafir
havaa.e.n nabaataat aur aasmaa.n par udhar se udhar aate jaate hu.e chand baadal
ye kyaa hai.n
yahii to zamaana hai ye ek tasalsul kaa jhuulaa ravaa.n hai
ye mai.n kah rahaa huu.n
ye bastii ye jangal ye raste ye dariyaa ye parbat imaarat mujaavir musaafir
havaa.e.n nabaataat aur aasmaa.n par udhar se udhar aate jaate hu.e chand baadal
ye sab kuchh ye har shai mire hii gharaane se aa.ii hu.ii hai
zamaana huu.n mai.n mere hii dam se an-miT tasalsul kaa jhuulaa ravaa.n hai
magar mujh me.n ko.ii buraa.ii nahii.n hai
ye kaise kahuu.n mai.n
ki mujh me.n fanaa aur baqaa dono.n aa kar mile hai.n

Meeraji
Nazm

ilm ka maqam

aa.o bachcho tum ko bataa.e.n
aa.nkho.n dekhaa haal sunaa.e.n
ham ne is duniyaa me.n rah kar
kaisaa kaisaa dekhaa manzar
garmii dekhii sardii dekhii
tezii dekhii narmii dekhii
baadal dekhaa paanii dekhaa
dariyaa kii tuGyaanii dekhaa
kelaa dekhaa aam bhii dekhaa
pista aur baadaam bhii dekhaa
ra.ng bira.nge phuul bhii dekhe
hare gulaabii niile piile
umr kii sub.h shaam bhii dekhaa
takliif-o-aaraam bhii dekhaa
mazduuro.n kii mehnat dekhii
un kii qadr-o-qiimat dekhii
be-kaaro.n kaa ronaa dekhaa
vaqt ko apne khonaa dekhaa
aur na puuchho kyaa kyaa dekhaa
chaltaa phirtaa paisa dekhaa
paisa hai ik aisii taaqat
jis me.n hai duniyaa kii azmat
jaahil ko bhii aaqil ko bhii
naaqis ko bhii kaamil ko bhii
paise kaa dam bharte dekhaa
jhuuT ko bhii sach karte dekhaa
lekin daulat se bhii ba.Dh kar
ham ne dekhaa hai vo gauhar
paise par bhii raaj hai jis kaa
paisa bhii muhtaaj hai jis kaa
jis kii hai duniyaa bhii saa.il
jis kaa hai paisa bhii qaa.il
jis ne sab ko shaad kiyaa hai
paise ko iijaad kiyaa hai
jis kii badaulat aage ba.Dh kar
aadmii pahu.nchaa chaa.nd ke uupar
us gauhar kaa naam hai pyaaraa
us kaa saaraa kaam hai pyaaraa
ilm use kahte hai.n jahaa.n me.n
azmat jis kii kaun-o-makaa.n me.n
ilm hai duniyaa kii sachchaa.ii
duur hu.ii hai is se buraa.ii

Shaukat Pardesi
Nazm

mujhe kahna hai

nahii.n mai.n yuu.n nahii.n kahtaa
ki ye duniyaa jahannam aur ham sab is kaa ii.ndhan hai.n
nahii.n yuu.n bhii nahii.n kahtaa
ki ham jannat ke baasii hai.n
saro.n par laa-javrdii shaamiyaane aur pairo.n me.n
niraale zaa.eqo.n vaale phalo.n ke pe.D shiir o shahad kii nahre.n machaltii hai.n
mujhe to bas yahii kuchh aam sii kuchh chhoTii chhoTii baate.n kahnii hai.n
mujhe kahnaa hai
is dhartii pe gulshan bhii hai.n sahraa bhii
mahaktii narm miTTii bhii
aur us kii kokh me.n KHvaabo.n kaa jaaduu aane vaalii nit na.ii faslo.n kii KHushbuu bhii
chaTaKHtii aur taptii saKHt be-his KHuun kii pyaasii chaTaane.n bhii
mujhe kahnaa hai
ham sab apnii dhartii kii
buraa.ii aur bhalaa.ii saKHtiyo.n aur narmiyo.n achchhaa.iyo.n kotaahiyo.n har ra.ng
har pahluu ke maz.har hai.n
hame.n insaan kii maanind
KHair o shar mohabbat aur nafrat dushmanii aur dostii ke saath jiinaa hai
isii dhartii kaa shahad o sam
isii dhartii ke khaT-miTh jaane pahchaane maze kaa jaam piinaa hai
mujhe bas itnaa kahnaa hai
ki ham ko aasmaano.n yaa KHalaa.o.n kii ko.ii maKHluuq mat samjho

Bashar Nawaz
Nazm

karachi ka mawasalati mushaira

kahne lage buraa.ii ko dozaKH me.n jho.nk de
maik se duur hai to receiver me.n bhuu.nk de

Khalid Irfan
Nazm

guru-nanak

vo rahbar jis ne gumraaho.n kii aksar peshvaa.ii kii
bhalaa.ii kii hamesha jis ne bhii us se buraa.ii kii

Shatir Hakeemi
Nazm

munafiq shair

mai.n munaafiq huu.n har ik kaa dost ban jaataa huu.n mai.n
dost ban kar dosto.n me.n phuuT Dalvaataa huu.n mai.n
intihaa kii chi.D hai mujh ko do dilo.n ke qurb se
dekhtaa huu.n jab ye fauran jaal phailaataa huu.n mai.n
mai.n buraa.ii raam kii kartaa huu.n jaa kar shaam se
shaam ne jo kuchh kahaa vo raam tak laataa huu.n mai.n
piiTh piichhe sab ko detaa huu.n muGallaz gaaliyaa.n
saamne lekin adab se sar ke bal jaataa huu.n mai.n
halqa-e-ahl-e-suKHan me.n jo mirii tauqiir hai
chhin na jaa.e har na.e shaa.ir se ghabraataa huu.n mai.n
mujh ko apnii shaa.erii par kis tarah ho e'timaad
KHud to kam kahtaa huu.n auro.n se kahalvaataa huu.n mai.n
daad dene ke liye rakhtaa huu.n kuchh ahbaab saath
sher un ke vaaste bhii maa.ng kar laataa huu.n mai.n
bazm me.n pa.Dhtaa huu.n mai.n nathune phulaa kar chiiKH kar
aur is se peshtar taqriir farmaataa huu.n mai.n
ye samajhtaa huu.n ki ko.ii sher KHud kahtaa nahii.n
ye KHabar har ek ke baare me.n phailaataa huu.n mai.n
aur ko.ii sher kah letaa hai achchhaa bhii agar
kal kaa lau.nDaa kah ke KHaatir me.n nahii.n laataa huu.n mai.n
KHud to naa-mauzuu.n bhii kah letaa huu.n mauzuu.n bhii magar
duusre ke sher par tanqiid farmaataa huu.n mai.n
shaa.erii se vaasta mujh ko na urdu se Garaz
sirf shohrat ke liye un se ulajh jaataa huu.n mai.n
kuchh buzurgo.n se mujhe bhii qurb haasil thaa kabhii
naam ho un se miraa yuu.n un ke gun gaataa huu.n mai.n
zikr kartaa huu.n puraanii sohbato.n kaa baar baar
aur daur-e-haal ko maazii se Thukraataa huu.n mai.n
baavajuud is ke agar hotii nahii.n shohrat nasiib
gaaliyaa.n detaa huu.n sab ko baukhlaa jaataa huu.n mai.n
jis se mai.n vaaqif huu.n vo shohrat me.n aage ba.Dh gayaa
dekh kar us ko bahut ku.Dhtaa huu.n bal khaataa huu.n mai.n
jaantaa hii kaun thaa mash.huur mai.n ne kar diyaa
bas yahii kah kah ke apne dil ko samajhtaa huu.n mai.n
ilm-o-fan kii chand baate.n jo mujhe ma.aluum hai.n
daad paane ke liye har baar dohraataa huu.n mai.n
daad denii ho to yuu.n detaa huu.n ik ik lafz par
lafz puuraa bhii nahii.n hotaa pha.Dak jaataa huu.n mai.n
kuchh na the ash.aar mu.nh dekhe kii dii thii mai.n ne daad
vaqt-e-Giibat daad kii tardiid farmaataa huu.n mai.n
jab kisii bazm-e-suKHan me.n sher pa.Dhtaa hai ko.ii
ik taraf baiThaa hu.aa tashiih farmaataa huu.n mai.n
saath vaalo.n par yuu.n kartaa huu.n faziilat aashkaar
ho na ho har sher me.n kuchh aib ginvaataa huu.n mai.n
yaa kabhii phir daad detaa huu.n ba-aavaaz-e-duhal
saath vaalo.n kii taraf phir aa.nkh michkaataa huu.n mai.n
saamne jab tak rahuu.n mai.n huu.n Gulaamo.n kaa Gulaam
aasmaa.n se varna taare to.D kar laataa huu.n mai.n
jo nahii.n laate hai.n KHaatir me.n KHushaamad ko mirii
vo jhi.Dak dete hai.n mujh ko un se ghabraataa huu.n mai.n
yaa samajh jaate hai.n jo in mere hathkando.n kaa raaz
saamne aate hu.e un ke bhii katraataa huu.n mai.n
kamtarii kaa hai 'shifaa' ehsaas in sab kaa sabab
dushmanii auro.n ke dil me.n to nahii.n paataa huu.n mai.n

Prem Lal Shifa Dehlvi
Nazm

aarzu

KHudaayaa aarzuu merii yahii hai
ye hasrat dil me.n karvaT le rahii hai
banuu.n kamzor logo.n kaa sahaaraa
dukhii logo.n ko duu.n har dam dilaasaa
za.iifo.n be-kaso.n ke kaam aa.uu.n
Gariibo.n mufliso.n ke kaam aa.uu.n
mai.n apne dosto.n kaa dukh uThaa.uu.n
jo ruuThe ho.n unhe.n hans kar manaa.uu.n
buraa.ii se sadaa la.Dtaa rahuu.n mai.n
bhalaa har kaam hii kartaa rahuu.n mai.n
hamesha alam se rakhkhuu.n me.n ulfat
kitaabo.n se sadaa rakhkhuu.n mohabbat
jo bhaTke ho.n unhe.n manzil dikhaa.uu.n
jo aandhe ho.n unhe.n rasta bataa.uu.n
karuu.n maa.n baap kii dil se mai.n KHidmat
rakhuu.n ustaad se apne mohabbat
buzurgo.n kii nasiihat par karuu.n mai.n
mai.n nafrat ke charaaGo.n ko bujhaa.uu.n
diyaa amn o mohabbat kaa jalaa.uu.n
karuu.n apne vatan kii paasbaanii
ataa karnaa mujhe vo naujavaanii
KHudaayaa aarzuu kar de ye puurii
yahii bas iltijaa hai tujh se merii

Mohammad Sharfuddin Sahil
Nazm

bachchon ka KHat chacha KHarru shechof aur mamun candy

tiir ulfat ke chale.n golii chale ehsaan kii
KHatm kar diije ra.uunat is tarah insaan kii
chappe chappe par jahaa.n me.n aise atom-bomb phaTe.n
is jahaalat ke a.ndhere me.n ujaalaa jo kare.n
rockito.n me.n ho madad laakho.n Gariibo.n ke liye
aur agan buuTo.n me.n KHushiyaa.n bad-nasiibo.n ke liye
bhuuke bachcho.n par falak se roTiyaa.n barsaa.iye
moze juute kuchh qamiize.n nekare.n phikvaa.iye
ja.ng kii baaruud me.n zaa.e.a na kiije maal-o-zar
muskuraa kar Daaliye laakho.n Gariibo.n par nazar
jo Gariibii kii thakan se ho rahe hai.n chuur-chuur
un kii jebe.n faaltuu noTo.n se bhar diije huzuur
pyaar kaa ulfat kaa har zaKHmii ko marham diijiye
apnii KHushiyaa.n de ke dukh vaalo.n ke dukh le liijiye
jo bhalaa.ii me.n maza hai vo buraa.ii me.n nahii.n
bandagii me.n jo maza hai vo KHudaa.ii me.n nahii.n
ye jahaa.n pyaaraa jahaa.n kyuu.n ja.ng me.n barbaad ho
is zamii.n par kyo.n na jannat pyaar kii aabaad ho
jo.D kar ham haath nanhe KHat ko karte hai.n tamaam
aap ke bachcho.n ko sab duniyaa ke bachcho.n ko salaam

Raja Mehdi Ali Khan
Nazm

paDh-likh kar hum nam karenge

sab ke liye soche.nge bhalaa.ii
kabhii na hogii ham se buraa.ii
sadaa ham achchhe kaam kare.nge
pa.Dh-likh kar ham naam kare.nge

Ata Abidi
Nazm

ghar

pyaare beTe tuu ne ii.nT gaare cement aur sariye vaalaa makaan to banaa liyaa hai
merii du.aa hai ki ye mohabbat amn KHushii aur KHush-haal se bharaa ghar ban jaa.e
is ke darvaaze se ko.ii badii aur buraa.ii daaKHil hii na hone paa.e
khi.Dkiyo.n se zindagii-baKHsh havaa to zaruur andar aa.e lekin har tuufaan baahar hii rah jaa.e
teraa ye ghar vo kashtii ban jaa.e jo tujhe har bha.nvar se ba-KHair nikaal le jaa.e
garmiyaa.n aa.e.n to ghar qurbato.n kii garmii se damak uTThe
KHizaa.n aa.e to diivaaro.n par saje fan-paaro.n se bahaar sharmaa jaa.e
bahaar aa.e to mahsuus ho ki teraa ghar hii is kaa mamba.a hai
baahar kitnaa hii shor-o-GauGaa ho tere ghar me.n sukuun-o-raahat ho
baahar kitnaa hii a.ndheraa ho tere ghar me.n na.e hauslo.n ke charaaG raushan ho.n
tere ghar kii chaar-diivaarii is qile kii fasiil ban jaa.e
jis me.n nafrat naqb na lagaa sake
mohabbat jis ke andar mahfuuz ho
ek duusre kii mohabbat
insaan kii mohabbat
KHudaa kii mohabbat
ghar kar jaa.e
ghar

Mohammad Haneef Rame
Nazm

watan

mirii jaan ho ki miraa badan
tiraa jalva-gaah hai ai vatan
tirii KHaak un kaa KHamiir hai
mire KHuun me.n ye jhalak tirii
mirii nabz me.n ye chipak tirii
mirii saa.ns tirii safiir hai
tirii KHaak jag kaa KHulaasa hai
teraa husn ek tamaashaa hai
tirii phailii god ki baaG hai
tirii KHaak-e-paak zaliil hai
to Gulaamiyo.n kii daliil hai
tirii paud sharm kaa daaG hai
tujhe maa-sivaa se giraa diyaa
hame.n maa-sivaa ne miTaa diyaa
hu.e tafraqo.n se tamaam ham
tujhe jab talak ki bhulaa rakhaa
hame.n vaqt ne bhii miTaa rakhaa
bane ghar me.n apne Gulaam ham
tire KHuun hai.n ye phaTe phaTe
tire puut hai.n ye baTe baTe
tire dil jigar hai.n ye be-vafaa
tiraa kuchh lahuu hii safed hai
ki ajab tarah kaa ye bhed hai
nahii.n bhaa.ii bhaa.ii se aashnaa
nahii.n Gair kaa hame.n kuchh gilaa
ki Gulaamiyo.n kaa ye phal milaa
hame.n tafarqe ke junuun se
tire duudh me.n mirii pyaarii maa.n
nahii.n dard kii ko.ii bijliyaa.n
ki milaa de KHuun ko KHuun se
hame.n bhaa.iyo.n se Guruur hai.n
tire jahl-o-vahm me.n chuur hai.n
ki jo kaam hai.n so KHataa ke hai.n
kahii.n zaat-paat kii laag hai
kahii.n diin-dharm kii aag hai
kahii.n bair muft KHudaa ke hai.n
jinhe.n piit hai unhe.n jiit hai
yahii jag me.n jiit kii riit hai
tire puut apno.n se Gair hai.n
hame.n Gairiyat ye miTaanii hai
hame.n jiit aap pe paanii hai
usii ghar ke Gair se Gair hai.n
tire puut bhaa.ii hai.n bhaa.ii huu.n
tire dil se sab hii fidaa.ii rahuu.n
ki tuu aap apnii misaal ho
tire zor kii yahii dhaak ho
ki jahaa.n buraa.ii se paak ho
tiraa ilm haq kaa kamaal ho

Azmatullah Khan
Nazm

ghar ki jhalak

jhalak to dekho hamaare ghar kii yahaa.n hai.n naanii yahaa.n hai.n taa.ii
hamaare maa.n baap aur chachaa hai.n yahaa.n hai.n bahne.n yahaa.n hai.n bhaa.ii
hamaaraa ghar hai hasiin gulshan KHushii kii kaliyaa.n khilii hu.ii hai.n
vafaa kii KHushbuu basii hu.ii hai hu.ii na hogii yahaa.n la.Daa.ii
hamaare abbuu kii dekho azmat har ek kurtaa hai in kii izzat
nazar me.n in kii hai.n sab baraabar inhii.n se miltii hai rahnumaa.ii
kamaa rahe hai.n halaal rozii banaa diyaa hai hame.n namaazii
inhii.n se ghar me.n hai KHair-o-barkat kisii kii karte nahii.n buraa.ii
hamaarii ammii hai.n nek siirat hame.n milii hai inhii.n se raahat
sadaa kitchen me.n hai kaam un kaa pakaa rahii hai.n chikan fry
labo.n pe un ke sadaa tabassum zabaan un kii hai KHuub shiirii.n
nahii.n hai kaamo.n se un ko fursat kabhii safaa.ii kabhii silaa.ii
hame.n hai un se dilii mohabbat unhii.n ke qadmo.n tale hai jannat
ba.Dii mohabbat se parvarish kii hai un kii fitrat me.n paarsaa.ii
ajiib shai hai.n chachaa hamaare nahii.n kisii kii samajh me.n aa.e
liye hai.n pyaale me.n murG chhole usii me.n Daalii hai ras-malaa.ii
jo muuD ho to sunaa.e.n naama Thumak Thumak kar bajaa.e.n tabla
ga.e vo ik roz chhat ke uupar vahaa.n chachaa ne pata.ng u.Daa.ii
madad vo ammii kii kar rahe hai.n tave pe chamcha chalaa rahe hai.n
savere uTh kar chachaa hamaare galii kii karte hai.n KHud safaa.ii
vo sair karne ga.e hai.n baahar pahan ke banyaan aur la.ngoTii
ba.Dii sii pag.Dii hai sar ke uupar laTak rahii hai gale se tie
ba.Dii hai.n sab se hamaarii naanii sunaatii hai.n vo hame.n kahaanii
zabaa.n pe zikr-e-KHudaa hai jaarii Thikaanaa un kaa hai chaarpaa.ii
Dakaartii hai.n hamaarii taa.ii hamesha piitii hai.n vo davaa.ii
ba.Daa saa takiya hai sar ke niiche badan ke uupar hai ik razaa.ii
ba.Dii bahan kaa hai naam raziya vo novelo.n kii bahut hai rasiyaa
kashiidakaarii me.n hai mahaarat maze se khaatii hai vo miThaa.ii
bahan surayyaa ne laayaa guDDaa bahan ruqayya ne laa.ii gu.Diyaa
saheliyo.n ko bulaa ke shaadii KHushii se daalaan me.n rachaa.ii
hamaaraa anvar hai das baras kaa musavvirii se use hai raGbat
banaa ke tasviir jab dikhaa.ii to bhaa.ii bahno.n se daad paa.ii
hai sab se chhoTaa miyaa.n munavvar magar hai ta.aliim se mohabbat
davaat le kar vo likh rahaa thaa giraa dii kap.Do.n pe raushnaa.ii
zaraa saa apnaa bhii haal kah duu.n mai.n ek collage me.n pa.Dh rahaa huu.n
kitaab se merii dostii hai kabhii na chho.Duu.ngaa mai.n pa.Dhaa.ii

Abdul Qadir
Nazm

allah ke nam se

KHudaa raam hai aur KHudaa iishvar
vo bhagvaan hai kul jahaa.n us kaa ghar
usii kaa karam aur usii kii dayaa
ye maktab ye ta.aliim kaa hausla
kitaabo.n me.n vo kaar-KHaano.n me.n vo
zamii.n hii nahii.n aasmaano.n me.n vo
usii kii navaazish kaa iz.haar hai.n
jo sar-sabz-o-shaadaab ashjaar hai.n
usii kii inaayat chaman rang-o-buu
mohabbat masarrat KHushii justujuu
buraa.ii se ham ko bachaa.e vahii
a.ndhere me.n rasta dikhaa.e vahii
vo rahmaan hai aur vahii hai rahiim
gunahgaar ke haq me.n rabb-e-kariim

Vaqar Khaleel
Nazm

aadmi hun

ko.ii Dhuu.nDe kyuu.n buraa.ii mujh me.n
aadmii huu.n mai.n farishta to nahii.n

Vinod Kumar Tripathi Bashar
Nazm

hae bapu teri duhai hai

KHuu-e-aazaad jis ne paa.ii hai
us ke qabze me.n kul KHudaa.ii hai
un se mai.n bhii ye baat kahtaa huu.n
jin kii taqdiir me.n buraa.ii hai
apne maazii pe Daal lo nazre.n
kis qadar kis ne kii bhalaa.ii hai
baat aa.ii zabaa.n pe kahtaa huu.n
ye to bando.n hii kii KHudaa.ii hai
rok kar galaa kar rahe hai.n black
qaht kii har taraf dahaa.ii hai
kitne Theke me.n ab kii baar bache
kitnii rishvat kii daulat aa.ii hai
apne apno.n ko puuchhtaa hai har ik
ahl-e-taaqat hii kii ban aa.ii hai
gar minister hai aap kaa saalaa
to collector banaa jamaa.ii hai
hai jo engineer sifaarish se
phir to Theke me.n is kaa bhaa.ii hai
KHauf hai kis kaa raaj hai apnaa
apnaa hii saaraa aana-paa.ii hai
rozii aur rozgaar hai.n un ke
ham Gariibo.n kaa haq gadaa.ii hai
in kaa zariiya hai ye kamaane kaa
dekhne hii kii paarsaa.ii hai
kis se jaa kar 'ka.nval' kare fariyaad
haa.e baapuu tirii duhaa.ii hai
aaj phir se august aayaa hai
sab ke ghar me.n KHushii hii chhaa.ii hai
saal-e-aa.inda ke kamaane ko
tum ne scheme kyaa banaa.ii hai

kanval Dibaivi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now