Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "dupattaa"

Nazm MATCHES FOR "dupattaa"

Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

barsat ki bahaaren

ko.ii apne aashnaa se kar naaz kaa jhapaTTaa
kahtii hai ha.ns ke kaafir chuTkii le yaa nihaTTaa
tum se to dil hamaaraa ab ho gayaa hai khaTTaa
tum aaj bhii na laa.e ra.nvaa miraa dupaTTaa
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

ek thi aurat

ko.ii sard chashma ubaltaa hu.aa aur machaltaa hu.aa yaad aa.e
jo ho dekhne me.n Tapaktii hu.ii chand buu.nde.n
magar apnii had se ba.Dhe to bane ek naddii bane ek dariyaa bane ek saagar
ye jii chaahtaa hai ki ham aise saagar kii lahro.n pe aisii havaa se bahaa.e.n vo kashtii jo bahtii nahii.n hai
musaafir ko lekin bahaatii chalii jaatii hai aur palaT kar nahii.n aatii hai ek gahre sakuu.n se milaatii chalii jaatii hai
ye jii chaahtaa hai ki ham bhii yuu.nhii chiiKHe.n chillaa.e.n ha.ns de.n yuu.nhii haath uThaa.e.n
havaa me.n hilaa.e.n hilaa kar giraa de.n
kabhii aise jaise ko.ii baat kahne lage hai.n
magar tum hame.n god me.n le ke apnii biThaa lo
machalne lage.n to sambhaalo
kabhii muskuraate hu.e shor karte hu.e phir gale se lipaT kar kare.n aisii baate.n
tumhe.n sarsaraatii havaa yaad aa.e
vahii sarsaraatii havaa jis ke miiThe fusuu.n se dupaTTa phisal jaataa hai
vahii sarsaraatii havaa jo har anjaan aurat ke bikhre hu.e gesu.o.n ko
kisii so.e jangal pe ganghor kaalii ghaTaa kaa nayaa bhes de kar
jagaa detii hai

Meeraji
Nazm

hawa jam-e-sehat tajwiz karti hai

mujhe maaluum thaa
ye din bhii dukh kii kokh se phuuTaa hai
merii maatamii chaadar
nahii.n tabdiil hogii aaj ke din bhii
jo raakh u.Dtii thii KHvaabo.n kii badan me.n
yuu.nhii aashufta rahegii
aur udaasii kii yahii suurat rahegii
mai.n apne sog me.n maatam-kunaa.n
yuu.n sar-ba-zaanuu raat tak baiThii rahuu.ngii
aur mire KHvaabo.n kaa pursa aaj bhii ko.ii nahii.n degaa
magar ye kaun hai
jo yuu.n mujhe baahar bulaataa hai
ba.Dii narmii se kahtaa hai
ki apne hujra-e-Gam se nikal kar baaG me.n aa.o
zaraa baahar to dekho
duur tak sabza bichhaa hai
aur harii shaaKHo.n pe naaranjii shaguufe muskuraate hai.n
mulaa.em sabz patto.n par pa.Dii shabnam
sunahrii dhuup me.n hiire kii suurat jagmagaatii hai
daraKHto.n me.n chhupii naddii
bahut dhiime suro.n me.n gungunaatii hai
chamakte zard phuulo.n se ladii nannhii pahaa.Dii ke aqab me.n
nuqra.ii chashma KHushii se khilkhilaataa hai
parind-e-KHush-guluu
shaaKH-e-shagufta par chahaktaa hai
ghane jangal me.n baarish kaa Gubaar-e-sabz
sat.h-e-shiisha-e-dil par
mulaa.em u.ngliyo.n se marhabaa ke lafz likhtaa hai
ko.ii aataa hai
aa kar chaadar-e-Gam ko ba.Dii aahistagii se
mere shaano.n se haTaa kar
saat rango.n kaa dupaTTa khol kar mujh ko u.Daataa hai
mai.n khul kar saa.ns letii huu.n
mire andar
ko.ii pairo.n me.n ghu.nghruu baa.ndhtaa hai
raqs kaa aaGaaz kartaa hai
mire kaano.n ke aavezo.n ko ye kis ne chhu.aa
jis se lave.n phir se gulaabii ho ga.ii hai.n
ko.ii sargoshiyo.n me.n phir se meraa naam letaa hai
fazaa kii naGmagii aavaaz detii hai
havaa jaam-e-sehat tajviiz kartii hai

Parveen Shakir
Nazm

paisa

naqsh yaa.n jis ke miyaa.n haath lagaa paise kaa
us ne tayyaar har ik ThaaTh kiyaa paise kaa
ghar bhii paakiiza imaarat se banaa paise kaa
khaanaa aaraam se khaane ko milaa paise kaa
kap.Daa tan kaa bhii milaa zeb-fazaa paise kaa
jab hu.aa paise kaa ai dosto aa kar sanjog
ishrate.n paas hu.ii.n duur hu.e man ke rog
khaa.e jab maal-puu.e duudh dahii mohan-bhog
dil ko aanand hu.e bhaag ga.e rog aur dhog
aisii KHuubii hai jahaa.n aanaa hu.aa paise kaa
saath ik dost ke ik din jo mai.n gulshan me.n gayaa
vaa.n ke sarv-o-suman-o-laala-o-gul ko dekhaa
puuchhaa us se ki ye hai baaG bataa.o kis kaa
us ne tab gul kii tarah ha.ns diyaa aur mujh se kahaa
mehrbaa.n mujh se ye tum puuchhaa ho kyaa paise kaa
ye to kyaa aur jo hai.n is se ba.De baaG-o-chaman
hai.n khile kiyaariyo.n me.n nargis-o-nasriin-o-suman
hauz favvaare hai.n ba.nglo.n me.n bhii parde chalvan
jaa-ba-jaa qumrii-o-bulbul kii sadaa shor-afgan
vaa.n bhii dekhaa to faqat gul hai khilaa paise kaa
vaa.n ko.ii aayaa liye ek murassaa pi.nj.Daa
laal dastaar-o-dupaTTaa bhii haraa juu.n-totaa
is me.n ik baiThii vo mainaa ki ho bulbul bhii fidaa
mai.n ne puuchhaa ye tumhaaraa hai rahaa vo chupkaa
niklii minqaar se mainaa ke sadaa paise kaa
vaa.n se niklaa to makaa.n ik nazar aayaa aisaa
dar-o-diivaar se chamke thaa pa.Daa aab-e-talaa
siim chuune kii jagah us kii thaa ii.nTo.n me.n lagaa
vaah-vaa kar ke kahaa mai.n ne ye hogaa kis kaa
aql ne jab mujhe chupke se kahaa paise kaa
ruuThaa aashiq se jo maashuuq ko.ii haT kaa bharaa
aur vo minnat se kisii taur nahii.n hai mantaa
KHuubiyaa.n paise kii ai yaaro kahuu.n mai.n kyaa kyaa
dil agar sang se bhii us kaa ziyaada thaa ka.Daa
mom-saa ho gayaa jab naam sunaa paise kaa
jis gha.Dii hotii hai ai dosto paise kii numuud
har tarah hotii hai KHush-vaqti-o-KHuubii bahbuud
KHush-dilii taazgii aur KHurmii kartii hai duruud
jo KHushii chaahiye hotii hai vahii.n aa maujuud
dekhaa yaaro to ye hai aish-o-mazaa paise kaa
paise vaale ne agar baiTh ke logo.n me.n kahaa
jaisaa chaahuu.n to makaa.n vaisaa hii Daaluu.n banvaa
harf-e-takraar kisii kii jo zabaa.n par aayaa
us ne banvaa ke diyaa jaldii se vaisaa hii dikhaa
us kaa ye kaam hai ai dosto yaa paise kaa
naach aur raag kii bhii KHuub-sii tayyaarii hai
husn hai naaz hai KHuubii hai tarah-daarii hai
rabt hai pyaar hai aur dostii hai yaarii hai
Gaur se dekhaa to sab aish kii bisyaarii hai
ruup jis vaqt hu.aa jalva-numaa paise kaa
daam me.n daam ke yaaro jo miraa dil hai asiir
is liye hotii hai ye merii zabaa.n se taqriir
jii me.n KHush rahtaa hai aur dil bhii bahut aish-paziir
jis qadar ho sakaa mai.n ne kiyaa tahriir 'naziir'
vasf aage mai.n likhuu.n taa-ba-kujaa paise kaa

Nazeer Akbarabadi
Nazm

ras ki anokhi lahren

masarrat kaa gheraa simaTtaa chalaa jaa rahaa hai
khulaa khet gandum kaa phailaa hu.aa hai
bahut duur aakaash kaa shaamiyaana anokhii masahrii banaa.e rasiile ishaaro.n se bahkaa rahaa hai
thape.Do.n se paanii kii aavaaz panchhii ke giito.n me.n ghul kar phisalte hu.e ab nigaaho.n se ojhal hu.ii jaa rahii hai
mai.n baiThii hu.ii huu.n
dupaTTaa mere sar se Dhalkaa hu.aa hai
mujhe dhyaan aataa nahii.n hai mire gesu.o.n ko ko.ii dekh legaa
masarrat kaa gheraa simaTtaa chalaa jaa rahaa hai
bas ab aur ko.ii na.ii chiiz mere masarrat ke ghere me.n aane na paa.e

Meeraji
Nazm

sharir bachche

baajii kaa har dupaTTa apnaa bane amaama
joker bane.n pahan kar bhayyaa kaa paa.ejaama

Zafar Kamali
Nazm

KHwatin ka bank

sunte hai.n shahr me.n jo KHvaatiin kaa hai bank
parvez kaa nahii.n hai ye parviin kaa hai bank
rakkhii hai.n is liye yahaa.n KHaatuun manager
is mohkme ko chaahiye baatuun manager
ladies ittihaad jo begaanagii se hai
kyaa jaane KHauf kyaa unhe.n mardaangii se hai
nok-e-zabaa.n bhii chalne lagii hai zabaa.n ke saath
beTii bhii hai shariik la.Daa.ii me.n maa.n ke saath
har naaznii.n ke saamne ik beauty-box hai
baaqii rakhaa hai ghar me.n ye tho.Daa saa aks hai
baiThii hai.n apne saamne gesuu sa.nvaar ke
locker me.n rakh diyaa hai dupaTTa utaar ke
chaTKHaare hai.n zabaa.n pe nazar me.n ishaare hai.n
har maah-vash ke pars me.n imlii kaTaare hai.n
jo baat kar rahii hai.n kamaa.ii ke shobe kii
vo head hai.n lagaa.ii-bujhaa.ii ke shobe kii
kal saas se zabaan ke bal par la.Dii hai.n ye
ilm-e-lissniyaat me.n p.hd hai.n ye
khaate kii in ko fikr na ledger kii fikr hai
nando.n kii Giibate.n hai.n to devar kaa zikr hai
shaadii ke baa'd nuqta banii.n dash ho ga.ii.n
pahle jo check-book thii.n vo ab cash ho ga.ii.n
har naaznii.n kii umr bhii KHufiya account hai
kyaa jaane in kii umr me.n kitnaa amount hai
ye husn kaa KHazaana ko.ii kyaa dabochegaa
Daaku bhii Daaka Daalne se pahle sochegaa
naakaara shauharo.n ko bhii debit karaa.ii.e
nisvaaniyat yahaa.n se credit karaa.ii.e

Khalid Irfan
Nazm

Dar

ye Dar jo saath chaltaa hai
mirii maa.n kii amaanat hai
mai.n jab chhoTii sii bachchii thii
to merii maa.n ne
is Dar ko mire dil ke
kisii sunsaan goshe me.n
ba.Dii mushkil se Daalaa thaa
vo kahtii thii
ki mai.n tanhaa kahii.n baahar na jaa.uu.n
kyuu.n na jaa.uu.n
bahs kartii mai.n
vahaa.n par bhe.Diye phirte hai.n
insaano.n kii suurat me.n
mai.n us kii baat sun kar
dil me.n hans pa.Dtii
vo kahtii thii
dupaTTa sar pe luu.n
apnii nigaahe.n niichii rakkhuu.n
aur
har ik hukm par sar ko jhukaa.uu.n
aur mai.n kahtii
saraasar buzdilii hai ye
vo kahtii
haa.n to buzdil la.Dkiyaa.n hii shaad rahtii hai.n
sadaa aabaad rahtii hai.n
hamesha shaad rahnaa thaa
sadaa aabaad rahnaa thaa
so mai.n ne apnii maa.n kii is amaanat ko
sadaa aa.nchal se apne baa.ndh kar rakkhaa

Humaira Rahat
Nazm

sati

ai satii ai jalva-gaah-e-shola-e-tanviir-e-husn
paak-daamaanii kaa naqsha hai tirii tasviir-e-husn
ye tan-e-naazuk tiraa ye shola-haa-e-aatshii.n
ye chitaa kii aatish-e-sozaa.n ye jism-e-naaznii.n
saa.iqa hai barq kaa tere dil-e-muztar kii aag
phuu.nk detii hai tujhe soz-e-Gam-e-shauhar kii aag
KHaak ho kar bhii tire daaG-e-jigar bujhte nahii.n
aah terii raakh ke barso.n sharar bujhte nahii.n
hind ko hai naaz terii himmat-e-mardaana par
tuu charaaG-e-kushta hai KHaakistar-e-parvaana par
aag me.n hai tuu sapind-e-shauq jalne ke liye
sham-e-maatam hai shab-e-Gam me.n pighalne ke liye
garmi-e-ha.ngaama-e-mahshar tirii mahfil me.n hai
sard jo hotii nahii.n vo aag tere dil me.n hai
kab gavaaraa aah hai soz-e-Gam-e-shauhar tujhe
hai har ik taar-e-nafas ik shola-e-muztar tujhe
uf rii shauhar kii chitaa par shola-afrozii tirii
jiite-jii soz-e-mohabbat me.n jigar-sozii tirii
jaa.n-gudaazii kii adaa ye sham-e-mahfil me.n kahaa.n
garmi-e-soz-e-vafaa ye sham-e-mahfil me.n kahaa.n
vo chitaa kii aatish-e-jaa.n-soz vo duud-e-siyaah
shauhar-e-murda kaa sar vo zaanuu-e-naazuk pe aah
aag ke vo haa.e shole aur vo mukh.Daa chaa.nd saa
lab pe kam kam shoKHi-e-barq-e-tabassum kii adaa
halkaa phulkaa jism-e-naazuk par dupaTTa surKH surKH
vasl-e-ruuhaanii kii shaadii se vo chehra surKH surKH
aalam-e-duud-e-siyah vo zulf-e-ambar-faam me.n
dau.Dne vaale vo shole halqa-haa-e-daam me.n
aatish-e-sozaa.n me.n bhii vo aah shauhar kaa KHayaal
aur vo dil me.n garmi-e-ha.ngaama-e-shauq-e-visaal
jal ke soz-e-iztiraab-e-shauq me.n parvaana-vaar
KHuld me.n shauhar se honaa uf vo KHush KHush ham-kanaar
Daal denaa vo gale me.n ha.ns ke baa.nhe.n pyaar se
dil lubhaa lenaa adaa-e-sheva-e-guftaar se
halkii halkii chaandnii kaifiyat-e-gul-gasht-e-baaG
vo lab-e-juu aah husn o ishq ke do shab charaaG
tujh pe ai naaz-aafrii.n shauhar-parastii KHatm hai
ik sharaar-e-aarzuu me.n terii hastii KHatm hai

Suroor Jahanabadi
Nazm

hathini dulhan bani hai

taaza KHabar milii hai
hathinii dulhan banii hai
sau gaz kaa hai Garaara
das gaz kaa hai dupaTTaa
kurtaa hai tambuu jaisaa
aa.e kahaa.n se juutaa
hai Dhol jaisii nthunii
pahne hai jis ko hathinii
kaano.n me.n hai jo bunde
jaise Truck ke pahiye
suntaa hai jo bhii banda
sun kar yahii hai kahtaa
aisii kahaa.n hai Dolii
baiThegii jis me.n hathinii

Kaifi Sanbhali
Nazm

nowember se december tak part 2

december aa gayaa jaanaa.n
vahii kaaGaz kaa Tuk.Daa
ab bhii mere haath me.n hii hai
jo pal pal mujh ko
us viiraan sannaaTe kii jaanib khii.nch letaa hai
abhii bhii dhuup me.n baahar nikalne
par ajab sii koft hotii hai
mai.n apne naam ke a se
bhii aage aa chukaa huu.n ab
aur ab ye sochtaa huu.n
kyaa karuu.ngaa in kitaabo.n kaa
jo tum ne chho.D dii thii.n
biich me.n hii mujh ko pa.Dhne ko
ba.Daa maayuus hai nietzsche
ba.Daa hairaan hai kaamuu
tumhaare lauT jaane se
bahut viiraan apnaa campus hai
yaar dekho tum
vahaa.n ke phuul kyaa ab bhii
khile aur khil rahe ho.nge
vahaa.n kii shaam kyaa ab bhii
tumhaarii muntazir hogii
chalo ye sab yahii.n chho.Do
mujhe ab ye bataa.o tum
ki coffee ab bhii vaise hii
binaa shakkar ke piitii ho
ki ab bhii bhuul jaatii ho
dupaTTa saath lenaa tum
ki ab bhii muskuraatii ho
'faraaz' aur 'faiz' ko pa.Dh kar
ki ab bhii apne kamre me.n
pa.De us aaKHirii KHat ko
udaasii se bharii aa.nkho.n se
ab bhii pa.Dh rahii ho.ngii
ki ab bhii
KHair chho.Do jaane do bas ho gayaa jaanaa.n

Mohammad Anas
Nazm

nai paud

bas me.n ik teacher kaa TaKHnaa mu.D gayaa
ek la.Dkii kaa dupaTTa u.D gayaa

Aale Ahmad Suroor
Nazm

pichhle bis barson mein

ye kathaa mirii biivii
sun ke khilkhilaa uThii
aur apnii din biitii
KHud hii phir shuruu.a kar dii
aaj merii maasii ne
phir gilaas shiishe kaa
chaknaa-chuur kar Daalaa
sirf ye nahii.n balki
kap.De dhone vaalii ne
silk kaa vo dupaTTa
kal hii jo KHariidaa thaa
bor bor kar Daalaa
mai.n ne bhii lagii-lipTii
kuchh bachaa nahii.n rakkhii
jis qadar thii.n salvaate.n
be-nuqat sunaa Daalii.n
apnii apnii din-biitii
dono.n jab bhii kah chukte
qahqahe lagaate the
yuu.n ham apnii Gurbat kii
KHud ha.nsii u.Daate the
vo sukuu.n jo Gurbat ke
un dino.n me.n haasil thaa
vo sukuu.n nahii.n miltaa
vo jo ghar kabhii jis me.n
dil hamaaraa lagtaa thaa
us me.n dil nahii.n lagtaa

Firoz Natiq Khusro
Nazm

shafaq

ho ga.ii shaam aur suuraj Duubaa
pachchhim me.n hai aag kaa golaa
rang shafaq se aisaa barsaa
surKH hu.e jangal aur dariyaa
rang tiraa hai shaam kaa daaman
phuul banaa hai shaam kaa daaman
vaah shafaq kyaa rang bharii hai
surKH parii hai surKH parii hai
shaam kii godii me.n baiThii hai
laal cha.ndariyaa o.Dh rahii hai
is ko apne paas bulaa luu.n
apnii sahelii us ko banaa luu.n
aa merii rangiin shafaq aa
aa jaa merii god me.n aa jaa
rang tiraa hai kitnaa pyaaraa
jaise ho ammaa.n kaa dupaTTa
ai malika ai shaam kii beTii
rango.n kii tuu hai shahzaadii
tub me.n paanii KHuub bharaa hai
abbaa ne ye bharvaayaa hai
is me.n teraa rath utraa hai
chaa.nd tiraa rath khii.nch rahaa hai
rok le rath ko aur utar aa
aaj sahelii merii ban jaa

Saghar Nizami
Nazm

dafnane mein pahle hi bahut der ho gai hai

mere saamne tumhaaraa janaaza rakhaa hai
log kah rahe hai.n tum mar ga.e ho
kisii ne mere sar pe dupaTTa Daalaa hai
safed burraaq be-daaG
merii saarii chuu.Diyaa.n kisii ne kach kach kar ke to.D dii hai.n
pataa nahii.n kaun hai jo baar baar kah rahaa hai
ro lo tho.Daa saa ro lo dil kaa bojh halkaa ho jaa.egaa
mujhe rone ke bajaa.e ha.nsii aa.e chalii jaa rahii hai
jii chaah rahaa hai KHuub zor zor se qahqahe lagaa.uu.n
kyaa rone se saare bojh halke ho jaate hai.n
mere saamne muddato.n se tumhaaraa janaaza rakhaa hai
aur
mai.n pahlii raat se us ke paa.e.ntii baiThii huu.n
na bahne vaale aa.nsu.o.n kaa bojh uThaa.e
aaj kyaa anhonii hu.ii hai
ta.affun se dimaaG phaTe jaa rahaa hai
are ko.ii suntaa hai
janaaza uThaa.o dafnaane me.n pahle hii bahut der ho ga.ii hai

Najma Naseem
Nazm

KHwaja-sara

chhail chhabiilaa
Thumak Thumak kar beach sa.Dak me.n
aatii jaatii har gaa.Dii se
bhiik kii puu.njii uchak rahaa hai
fiqre kaste collage ke nau-KHez javaano.n se hans hans kar
baate.n kartaa maTak rahaa hai
chauraahe kaa ishaara be-sharmii se ghuur rahaa hai
laal praanda lapak lapak kar
naqlii kuulho.n ko mas kartaa laTak rahaa hai
ja.alii Dhalvaano.n se vo ra.ngiin dupaTTa
ek taraf ko Dhalak rahaa hai
kaalii gaa.Dii vaalaa kitnii be-zaarii se
haath ko us ke jhaTak rahaa hai
pairo.n me.n ghu.ngruu chhankaataa
mardaana chehre par mal kar jhuuT kaa Gaaza
nisvaanii ra.ngo.n me.n luth.Daa ek hayuulaa
jism aur jins ke ghanchakkar me.n bhaTak rahaa hai

Mohammad Owais Malik
Nazm

aaj ki aurat

are
sindh ke saadhuu suufii
are
hind ke mard-e-momin
kyaa tum ab bhii soch rahe ho
hindii naarii kahlaa.e vo
jo ho apne pii kii daasii
pii kii daasii
pii kii daasii vaalii baataa.n
ho ga.ii.n ab to baasii muurakh
aaj kii naarii aurat ho ga.ii
freedom jhanDaa chait mahiina
kaun DupaTTa kis ne chhiinaa
jhumkaa kaajal gajraa-vajraa
tyaag ke aurat baaGii ho ga.ii
aaj kii aurat baaGii hai re
kyaa tum ab bhii soch rahe ho
baaGii aurat kahlaa.e vo
jo ho pii ke 'ishq me.n baaGii
pii ke 'ishq me.n baaGii muurakh
haa-haa saade shaa'ir muurakh
aaj kii aurat baby ho ga.ii
suTTaa daaruu kamra chaabii
nain sharaabii ho.nT gulaabii
haath me.n Tharraa mu.nh pe gaalii
KHud ke 'ishq me.n baaGii baby
karmaa.n vaalii karmaa.n vaalii
kyaa tum ab bhii soch rahe ho
karmaa.n vaalii kahlaa.e vo
jo ho pii ke man kii saaqii
pii ke man kii saaqii muurakh
haahaa haahaa pii ke haahaa
aaj kii aurat left kii rind hai
aaj kii aurat right kii king hai
KHud-sar 'aaqil baaliG sarkash
huur haraamii zahr kii tarkash
khaa jaa.egii kachchaa chabaa kar
aaj kii hindii hinda ho ga.ii
havvaa kii beTii zinda ho ga.ii
are
sindh ke saadhuu suufii
are
hind ke mard-e-momin
kyaa tum ab ye soch rahe ho
havvaa kii beTii mar ga.ii yaa phir zinda ho ga.ii

Komal Raja
Nazm

dopaTTa

mai.n dupaTTa nahii.n o.Dhtii
is ke piichhe
ek talKH haqiiqat hai
merii zindagii
merii anmol dost
is me.n ghirii
aur jhulas kar mar ga.ii

Ghazal Jafari
Nazm

kallan

mai.n byaah rachaa.uu.ngii
kuchh ruupa.e ho jaa.e.n
mai.n kachraa achchhii tarah saaf kar saktii huu.n
bartan maa.nj letii huu.n
jhaa.Dan bhii chalaa letii huu.n
mujhe khaanaa bahut achchhaa pakaanaa aataa hai
mai.n koThiyo.n me.n kaam karuu.ngii
kuchh ruupa.e ho jaa.e.n to apnaa byaah rachaa.uu.ngii
2
kllan pochhaa lagaatii hai to pi.nDliyaa.n na.ngii ho jaatii hai.n
kabhii chaak sambhaaltii hai to dupaTTaa gir jaataa hai
sii.Dhiyaa.n utarne me.n KHuub ehtiyaat kartii hai magar chhaatiyaa.n to chhalaktii hai.n
pochhaa lagaane me.n KHuub zor lagtaa hai lekin kuulhe hai.n ki bhaarii hote jaate hai.n

Tabassum Zia
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now