Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gudgudaatii"

Nazm MATCHES FOR "gudgudaatii"

Nazm

ghaalib

ballii-maaraa.n ke mohalle kii vo pechiida daliilo.n kii sii galiyaa.n
saamne Taal kii nukka.D pe baTero.n ke qasiide
gu.Dgu.Daatii hu.ii paan kii piiko.n me.n vo daad vo vaah vaa
chand darvaazo.n pe laTke hu.e bosiida se kuchh TaaT ke parde
ek bakrii ke mimyaane kii aavaaz
aur dhundlaa.ii hu.ii shaam ke be-nuur a.ndhere saa.e
aise diivaaro.n se mu.nh jo.D ke chalte hai.n yahaa.n
chuu.Dii-vaalaan kai kaTre kii ba.Dii-bii jaise
apnii bujhtii hu.ii aa.nkho.n se darvaaze TaTole

Gulzar
Nazm

sirf ek laDki

apne sard kamre me.n
mai.n udaas baiThii huu.n
niim-vaa dariicho.n se
nam havaa.e.n aatii hai.n
mere jism ko chhuu kar
aag sii lagaatii hai.n
teraa naam le le kar
mujh ko gudgudaatii hai.n
kaash mere par hote
tere paas u.D aatii
kaash mai.n havaa hotii
tujh ko chhuu ke lauT aatii
mai.n nahii.n magar kuchh bhii
sa.ng dil rivaajo.n ke
aahanii hisaaro.n me.n
umr-qaid kii mulzim
sirf ek la.Dkii huu.n!

Parveen Shakir
Nazm

holi

havaa har ek ko chal phir ke gudgudaatii hai
nahii.n jo ha.nste unhe.n chhe.D kar ha.nsaatii hai
hayaa gulo.n ko to kaliyo.n ko sharm aatii hai
ba.Dhaa.o ba.Dh ke chaman kaa vaqaar holii me.n

Nazeer Banarasi
Nazm

ek nazm roz aati hai

vo aatii hai
roz mere bahut qariib
mujhe sahlaatii hai
gudgudaatii hai
uTho... uTho...
mai.n hairat aur KHushii se
use dekhtii huu.n
tum kab aa.ii.n?
abhii... abhii to aa.ii huu.n...
vo mere siine par apnaa sar rakh detii hai
mere pistaano.n se kheltii hai
mere ho.nTo.n ko chuustii hai
merii naaf ke niiche
bahut niiche...
merii saa.ns uupar kii uupar rah jaatii hai
mai.n kuu.nvaariyo.n kii tarah
tilmilaatii huu.n
bal khaatii huu.n
vo mujhe uThaatii hai
mere kap.De ek ek kar ke utaartii hai
vo merii aa.nkho.n me.n aa.nkhe.n Daal kar
ha.nstii hai
uTTho...
mai.n ba.Dba.Daatii rahtii huu.n
aisii hii be-sudh
hairat se aur KHushii se
uTTho...
vo merii gardan me.n baa.nhe.n Daal kar
kahtii hai
vo mujhe duur se dekhtii hai
aur canvas par mirii maadar-zaad
tasviir banaatii hai
mai.n be-sudh pa.Dii rahtii huu.n
is Dar se ki kahii.n vo chalii na jaa.e
mai.n use Dubonaa chaahtii huu.n
ek hii vaar par us par cha.Dh dau.Dnaa
us par bilbilaa kar hamla karnaa
mai.n bhii chaahtii huu.n... use aise hii
apnii giraft me.n le aa.uu.n
lekin is se pahle ki
mai.n harakat karuu.n
vo chham-chham kartii
khi.Dkii yaa darvaaze se baahar
bhaag jaatii hai
mai.n be-sudh
hairat aur KHauf se
aur malaamat se
aa.nkhe.n phaa.De use dekhtii
rahtii huu.n
vo chalii jaatii hai
roz aisaa hii hotaa hai

Azra Abbas
Nazm

nai subh

ye sehhat-baKHsh ta.Dkaa ye sahar kii jalva-saamaanii
ufuq saaraa banaa jaataa hai daamaan-e-chaman jaise
chhalaktii raushnii taariikiyo.n pe chhaa.ii jaatii hai
u.Daa.e naaziyat kii laash par ko.ii kafan jaise
ubaltii surKHiyo.n kii zad pe hai.n halqe siyaahii ke
pa.Dii ho aag me.n bikhrii Gulaamii kii rasan jaise
shafaq kii chaadare.n ra.ngii.n fazaa me.n thartharaatii hai.n
u.Daa.e laal jhanDaa ishtiraakii anjuman jaise
chalii aatii hai sharmaa.ii lajaa.ii huur-e-bedaarii
bhare ghar me.n qadam tham tham ke rakhtii hai dulhan jaise
fazaa guu.njii hu.ii hai sub.h ke taaza taraano.n se
suruud-e-fat.h par hai.n surKH fauje.n naGma-zan jaise
havaa kii narm lahre.n gudgudaatii hai.n uma.ngo.n ko
javaa.n jazbaat se kartaa ho chuhle.n baa.nkpan jaise
ye saada saada garduu.n pe tabassum-aafrii.n suuraj
pai-dar-pai kaamyaabii se ho stalin magan jaise
sahar ke aa.ine me.n dekhtaa huu.n husn-e-mustaqbil
utar aa.ii hai chashm-e-shauq me.n 'kaifii' kiran jaise

Kaifi Azmi
Nazm

tum hanste kyun ho

kyaa ab raat aise hii
guzar jaa.egii
ye raat hii to hai
jo tahliil ho jaatii hai ek nuqte me.n
aur ghuumtii hai
mere gird kaale bhinbhinaate hu.e
bha.nvre kii tarah
vo mere kaano.n mirii aa.nkho.n
merii gardan aur mere ro.e.n ro.e.n me.n
bhinbhinaatii hai
merii baGlo.n ke baalo.n se ulajhtii hu.ii
mere jism ke kone khudro.n me.n
gudgudaatii hu.ii
ye raat mere uupar phail jaatii hai
achaanak
o.Dh letii hai mujhe
mere jism kii por por me.n
ek jal-tara.ng chhe.D detii hai
mai.n nii.nd me.n uThtii huu.n
miraa halq KHushk ho rahaa hai
paanii kaa ek gilaas ThanDaa yaKH
mere ho.nTo.n mere halq mere siine
ko tar kartaa hu.aa
mere jism kii jal-tara.ng me.n mil jaataa hai
mai.n darvaaze par dastak detii huu.n
tum sun rahe ho
raat kii jal-tara.ng mere jism se
phuuT rahii hai
darvaaza khultaa hai
mai.n tumhaare aadhe na.nge badan ko
daboch letii huu.n
tumhaarii naaf ke ga.Dhe me.n
naak kii nok ghuse.Dtii huu.n
tum muskuraa rahe ho
raat kii sharaarat mere jism par
phaile hu.e dekh kar
tum ha.nste
raat kono.n khudro.n me.n phail rahii hai
mai.n tumhaare kap.De utaar detii huu.n
aur vo khel kheltii huu.n
jo raat mere saath khel rahii thii
mai.n tumhaare jism ke gird
apnii zabaan apne daa.nto.n aur naaKHuno.n ke saath
bhinbhinaane lagtii huu.n
tum muskuraa rahe ho
tumhaarii muskuraahaT
mere jism kii poro.n ko aur khol rahii hai
mai.n zaKHmii kar detii huu.n tumhe.n
tum ha.ns rahe ho
raat ke paro.n pe savaar bha.nvre kii tarah
mujhe bhinbhinaate dekh kar
tumhaarii kushaada aa.nkho.n ke kone
phailne lagte hai.n
tumhaaraa jism aka.D jaataa hai
nahii.n aaj tum
tum khilkhilaate ho
mai.n tumhaare ak.De hu.e jism par
apnii khulii hu.ii poro.n ko rakh detii huu.n
tumhaaraa jism raat ke jhaag se bhar jaataa hai
tum ha.nste ho
ha.nste hii rahte ho

Azra Abbas
Nazm

ek nazm

tuu ne ik baar kahaa thaa mujhe tanhaa.ii me.n
pyaar daulat kaa parastaar nahii.n ho saktaa
zindagii hirs ke pahluu me.n nahii.n so saktii
jism rusvaa sar-e-baazaar nahii.n ho saktaa
valvale ruuh ke niilaam nahii.n ho sakte
husn zillat kaa parastaar nahii.n ho saktaa
maslahat aaj magar jiit chukii hai tujh ko
ko.ii kis mu.nh se kahe muunis-o-Gam-KHvaar tujhe
ko.ii kis dil se kahe pyaar kii raanii tujh ko
ko.ii kis tarah kahe paikar-e-iisaar tujhe
tuu ne bechii hai sar-e-aam javaanii apnii
gudgudaatii hai zar-o-siim kii jhankaar tujhe

Qateel Shifai
Nazm

chand

vo niile aasmaan par safed halqa
jise sab chaa.nd kahte hai.n
jise hind-o-paak ke bachche maamaa samajhte hai.n salaam karte hai.n
jise sho.araa
hasiin chehro.n se ta.abiir karte hai.n
vo niile aasmaan par safed halqa
chamaktaa hai jo ghaTtaa ba.Dhtaa bhii hai
KHalaa kii mu.nDero.n pe chaltaa bhii hai
KHayaal-e-mahbuub se
shab-e-tanhaa.ii ko jagmagaataa bhii hai aa.nsuu.o.n me.n jhilmilaataa bhii hai
vo niile aasmaan par safed halqa
ziyaa jis kii yaado.n kaa darpan dikhaatii rahii
javaa.n dil kii dha.Dkan jagaatii rahii
KHayaalo.n me.n
kisii ko bulaatii rahii jazbaat gudgudaatii rahii
vo niile aasmaan par safed halqa
talaash me.n jis kii ghire
buto.n kii tarah be-kahe be-sune
hayaat-o-maut se be-KHabar
hazaaro.n sciencedaa.n us pe jaane ko koshaa.n rahe
vo niile aasmaan par safed halqa
dikhaa.ii dene ke baavajuud bhii jo sab kaa
bas ik KHayaal thaa tasavvur thaa
achaanak ek din
usii insaa.n ke qadmo.n ke niiche aa gayaa
vo niile aasmaan par safed halqa
na jis par ko.ii zindagii hai
na husn-e-fitrat kii ridaa yaa o.Dhnii hai
jahaa.n sirf KHaamushii hai
vo niile aasmaan par safed halqa
haqiiqat jis kii sab samajh me.n aa ga.ii phir bhii
kisii shaa.ir ne kyo.n apne mahbuub kii us se misaal dii
nazar me.n us kii vo hasii.n bhii kyaa chaa.nd jaisaa hai jahaa.n kuchh bhii nahii.n
jahaa.n hai bas chand lamho.n kii chaa.ndnii

Javed Rasheed Amir
Nazm

shauq

shaam jab Dhaltii hai mai.n apne KHaraabe kii taraf
loTtaa huu.n sar-niguu.n, bojhal qadam
baara ghanTo.n kii mashaqqat aur thakan
ba.Dh ke le letii hai mujh ko god me.n
aur sail-e-tiirgii me.n Duub jaatii hai ummiid o shauq kii ik ik kiran
rahguzaar-e-aarzuu par chaar-suu u.Dtii hai dhuul
aur ik aavaaz aatii hai kahii.n se
jo ki an-jaanii bhii pahchaanii bhii hai
zindagii kuchh bhii nahii.n, kuchh bhii nahii.n, kuchh bhii nahii.n
ik musalsal marg, ik sail-e-balaa, nezo.n ke ban
aaho.n, karaaho.n ke sivaa
phir isii taariik lamhe, phir isii naazuk gha.Dii
aarzuu kii rahguzar par chand naqsh-e-paa ubharte hai.n sitaaro.n kii tarah
lahlahaataa hai ko.ii aa.nchal bahaaro.n kii tarah
phail jaatii hai kisii gesuu kii nik.hat chaar-suu
ek firdausii tabassum kii sunahrii chaa.ndnii
dhiime dhiime, ziina ziina
gungunaatii, raqs farmaatii hu.ii
baam-e-Gam se KHaana-e-dil me.n utar kar
thapthapaatii hai mujhe
giit gaatii hai, kabhii lorii sunaatii hai mujhe
aur phir jab sub.h ko KHurshiid-e-aalam-taab kii pahlii kiran
gudgudaatii hai mujhe
kaar-gaah-e-dahr me.n vaapas bulaatii hai mujhe
aarzuu o justujuu dil me.n javaa.n paataa huu.n mai.n
shauq kii mai ke nashe me.n chuur ho jaataa huu.n mai.n!!

Iftikhar Aazmi
Nazm

anguThi

chhupaa.uu.n kyuu.n na dil me.n KHaatim-e-gauhar-nigaar us kii
yahii le de ke mere paas hai ik yaadgaar us kii
ye tanhaa.ii me.n mere lab tak aa kar muskuraatii hai
aur apnii maalika kii tarah dil ko gudgudaatii hai
qalam ke saath mere haath me.n har vaqt rahtii hai
aur us ke dast-e-ra.ngii.n ke fasaane mujh se kahtii hai
talaa.ii u.ngliyo.n kaa jab mujhe qissa sunaatii hai
tasavvur me.n sitaaro.n ke se paikar khii.nch laatii hai
mirii 'salmaa' ko is ne shaad aur naashaad dekhaa hai
gahe masruur gaahe maa.il-e-fariyaad dekhaa hai
ise ma.aluum hai.n achchhii tarah betaabiyaa.n us kii
nahii.n poshiida is kii aa.nkh se be-KHvaabiyaa.n us kii
shab-e-tanhaa.ii me.n is ne use bedaar paayaa hai
aur akasr diida-e-sarshaar ko KHuu.n-baar paayaa hai
ise ma.aluum hai vo kis tarah maGmuum rahtii thii
kisii ke Gam me.n lutf-e-ziist se mahruum rahtii thii
miraa KHat pa.Dh ke vo kis kis naaz se masruur hotii thii
phir apnii bebasii par kis tarah ranjuur hotii thii
ye shaahid hai ki us kii shaam-e-Gam kyuu.nkar guzartii thii
ye shaahid hai ki vo ro ro ke kyuu.nkar sub.h kartii thii
vo jab dil thaam letii thii hujuum-e-Gam se ghabraa kar
to ye kartii thii us kii Gam-gusaarii dil ke paas aa kar
ise ma.aluum hai jo dard thaa us paak siine me.n
basii hai.n us ke dil kii dha.Dkane.n is ke nagiine me.n
pahu.nchtii hai.n shu.aa.e.n is kii jis dam chashm-e-hairaa.n tak
tasavvur mujh ko le u.Dtaa hai 'salmaa' ke shabistaa.n tak
jahaa.n 'salmaa' ke aur mere sivaa hotaa nahii.n ko.ii
a.nguuThii kho.ii jaatii hai magar khotaa nahii.n ko.ii

Akhtar Shirani
Nazm

dagh

tire jazbaat me.n ab tak sadaaqat jagmagaatii hai
tirii guftaar kii shoKHii dilo.n ko gudgudaatii hai

Maikash Akbarabadi
Nazm

ummid ke karishme

aas jab dil ko gudgudaatii hai
ruuh ko nii.nd se jagaatii hai
jho.npa.Do.n ko mahal banaatii hai
jangalo.n me.n bahaar laatii hai

Naseem Amrohvi
Nazm

intizar

zulmat-e-shab hai
aur dil tanhaa
mai.n bhii tanhaa KHayaal bhii tanhaa
har taraf hai
sukuut-e-KHaamoshii
aise maahaul me.n
tirii yaade.n
sarsaraatii hu.ii sabaa kii tarah
gudgudaatii hai.n dil ko aa aa kar
aur
phir dil machal saa uThtaa hai
tujh ko paane kii aarzuu phir se
mujh me.n a.ng.Daa.iyaa.n sii letii hai
aur kaano.n me.n yak-ba-yak jaise
nuqra.ii ghanTiyaa.n sii bajtii hai.n
tab kahii.n tujh pe giit likhtaa huu.n
teraa milnaa to ab nahii.n mumkin
phir bhii hai teraa intizaar mujhe

Dr. Rahi
Nazm

insha

kabhii khul ke jab khilkhilaatii hai inshaa
fazaa.o.n me.n sargam bajaatii hai inshaa
har ik lab pe titlii biThaatii hai inshaa
jha.Dii qahqaho.n kii lagaatii hai inshaa
masarrat kii duniyaa basaatii hai inshaa
mire ghar ko jannat banaatii hai inshaa
kabhii maaysha ko ha.nsaatii hai inshaa
kabhii maaysha ko rulaatii hai inshaa
kabhii paas us ko bulaatii hai inshaa
kabhii duur us ko bhagaatii hai inshaa
bahan se to kasrat karaatii hai inshaa
mire ghar ko jannat banaatii hai inshaa
kahaanii sunaatii hai naanii ko inshaa
adaa.e.n dikhaatii hai naanii ko inshaa
masarrat dilaatii hai naanii ko inshaa
divaana banaatii hai naanii ko inshaa
javaanii bu.Dhaape me.n laatii hai inshaa
mire ghar ko jannat banaatii hai inshaa
kabhii Dhuu.nD laatii hai naanuu kaa chashma
kabhii phe.nk aatii hai naanuu kaa chashma
kabhii KHud lagaatii hai naanuu kaa chashma
kahii.n se bhii paatii hai naanuu kaa chashma
to aavaaz fauran lagaatii hai inshaa
mire ghar ko jannat banaatii hai inshaa
mobile par is tarah u.nglii ghumaa.e
ki jaise ko.ii shaKHs jaaduu chalaa.e
mobile ke parde pe hairat ugaa.e
hazaaro.n tarah ke karishme dikhaa.e
dikhaa kar karishme rijhaatii hai inshaa
mire ghar ko jannat banaatii hai inshaa
kabhii ko.ii khaane kaa manzar dikhaa.e
kabhii apnii u.nglii se pizza banaa.e
kabhii to mazedaar murGaa pakaa.e
salaado.n se khaane kii thaalii sajaa.e
kabhii chaa.e kaafii pilaatii hai inshaa
mire ghar ko jannat banaatii hai inshaa
falak paas jaa kar kabhii muskuraatii
kabhii chhe.Dtii to kabhii gudgudaatii
mahak ko kabhii apnaa kartab dikhaatii
kabhii baby nannaa ko poem sunaatii
har ik aadmii ko lubhaatii hai inshaa
mire ghar ko jannat banaatii hai inshaa
malaahat me.n is kii chamak hai Gazab kii
saraape me.n is ke lachak hai Gazab kii
sadaa.o.n me.n is kii khanak hai Gazab kii
adaa.o.n me.n is kii chahak hai Gazab kii
Gazab kaa nazaaraa dikhaatii hai inshaa
mire ghar ko jannat banaatii hai inshaa
chahetii kisii kii kisii kii dulaarii
kisii ko lage saare duniyaa se nyaarii
kisii ko ho mahsuus phuulo.n se bhaarii
sunny ko to hai jaan-o-dil se bhii pyaarii
bahut aamna ko bhii bhaatii hai inshaa
mire ghar ko jannat banaatii hai inshaa
mobile pe abbaa ko dekhe to Dole
chahak kar lapak kar zabaa.n apnii khole
masarrat se labrez alfaaz bole
shahd kaan me.n apne abbaa ke ghole
qatar tak mohabbat luTaatii hai inshaa
mire ghar ko jannat banaatii hai inshaa
mobile pe farhaan KHaa.n kii zabaanii
har ik raat suntii hai vo ik kahaanii
kahaanii me.n aatii hai jab ko.ii raanii
to bachchii se ban jaatii hai vo siyaanii
bahut daad abbaa se paatii hai inshaa
mire ghar ko jannat banaatii hai inshaa
kabhii apne gho.De se bhau.n bhau.n karaa.e
kabhii sher chiite ko bakrii banaa.e
kabhii sar pe billii ke haathii biThaa.e
kabhii doremon ko bhii paTTii pa.Dhaaye
anokhe tamaashe dikhaatii hai inshaa
mire ghar ko jannat banaatii hai inshaa
magar khaane piine se jii hai churaatii
zaraa der me.n mu.nh me.n luqma giraatii
bahut apnii ammaa.n se kasrat karaatii
kabhii naach tig.Dii kaa bhii vo nachaatii
khilaane me.n paagal banaatii hai inshaa
mire ghar ko jannat banaatii hai inshaa

Ghazanfar
Nazm

zindagi to nahin

aur aisii hii rut me.n
kabhii man-chalii
narm-o-naazuk havaa
gudgudaatii to hogii
tumhe.n merii jaa.n
aur ik be-adab
sar-phiraa naujavaa.n
yaad aataa to hogaa tumhe.n naa-gahaa.n

Rana Sahri
Nazm

aaj phir se mausam badla hai

aaj phir se vo yaad aayaa hai
un lamho.n kaa lams haatho.n me.n baaqii hai
KHizaa.n sard mausam kii ridaa o.Dhe
bhaTakne lagii hai phir se
yaad hai vo sab mujh ko ab bhii
isii tarah milte-julte mausam me.n
samundar kinaare lahre.n jab uchhaltii kuudtii
pairo.n pe dam to.Dtii thii.n
mere zehn ke ik ik goshe me.n
yaade.n abhii bhii raqs kartii hai.n
be-KHudii me.n ab bhii muskuraahaT
ho.nTo.n pe machalne lagtii hai
falak par sitaaro.n ke jhurmuT me.n
duur ufaq par chaa.nd jab chamaktaa thaa
tab jaltii bujhtii raushnii me.n ham
ik duusre kaa chehra takte rahte the
havaa.e.n aa kar yuu.n gudgudaatii thii.n
ha.nste ha.nste ka.ii baar saa.nse.n
rukne lagtii thii.n
aaj phir se is mausam me.n
vo jhiil sii do aa.nkhe.n
phir se yaad aa.ii hai.n
jin me.n ajab sii ik KHaamoshii
tairtii rahtii thii suno aa kar bhii
phir se zard patte shor karte hai.n
phuulo.n ke bain sune hai.n mai.n ne
kahte hai.n sab mujh se
bad-gumaanii ho jis dil me.n
mohabbat ho hii nahii.n saktii
mai.n kha.Dii huu.n jahaa.n
vahaa.n KHaamoshiyaa.n aaj bhii baate.n kartii hai.n
aaj phir se mausam badlaa hai
aaj phir se vo yaad aayaa hai

Farkhanda Razvi
Nazm

eden garden

ye eden garden hamdam nigaah-o-dil kii jannat hai
yahaa.n havvaa kii ra.ngii.n beTiyaa.n har shaam aatii hai.n
javaa.n mardo.n ko apnii jaazbiyyat se lubhaatii hai.n
dilo.n ko sharmgii.n nazro.n se paiham gudgudaatii hai.n

Owais Ahmad Dauran
Nazm

diwali ki raat

rang me.n Duub ke nikhrii hai fazaa aaj kii raat
daaman-e-farsh me.n hai nuur-e-KHudaa aaj kii raat
gudgudaatii hu.ii ehsaas kaa har taar-e-latiif
gungunaatii hu.ii phirtii hai havaa aaj kii raat
baas kaa lams masiihaa hai sabaa aab-e-hayaat
dard ko Dhuu.nDhtii phirtii hai davaa aaj kii raat
o.Dh lii raunaq-e-baazaar-o-dar-o-baam ne bhii
ramish-o-ra.ng kii mahfil kii qabaa aaj kii raat
shauq-e-taz.iin se be-saaKHta mahkii hai hayaa
lakshmii-ruup suhaagan ne bharaa aaj kii raat
diip hii diip hai.n har samt jidhar bhii dekho
jalva-e-husn-e-tanaasub hai sivaa aaj kii raat
jagmagaate hai.n lab-e-baam sitaaro.n kii tarah
kar ga.ii naql-e-KHudaa KHalq-e-KHudaa aaj kii raat
shor aur gul me.n numaayaa.n hai tasalsul tartiib
thaap table kii hai aahaT kii sadaa aaj kii raat
bachpanaa bandish-e-parvaa se baraabar mafruur
khel aur kuud me.n hai mast havaa aaj kii raat
naar se chhe.D rahe nuur ke diivaano.n kii
kyaa hu.aa haath jalaa pair jalaa aaj kii raat
baazii-e-jaa.n ke khilaa.Dii hai.n yahii khelne vaale
dekhiye ye bhii panapne kii adaa aaj kii raat
ziist ik mashGala-e-aish nazar aatii hai
suurat-e-zinda-dilii kyaa na hu.aa aaj kii raat

Ram Parkash Rahi
Nazm

raat ke jadu sahar ke aaine se

al-hazar
raat ke jaaduu
sahar ke aa.ine se
naKHl-e-hairat par chahaktii bulbulo.n se
uu.nghtii galiyo.n me.n bahtii tiirgii se
sabz saa.e ke jilau me.n
narm qadmo.n se zamii.n ko gudgudaatii naddiyo.n se al-hazar

Ghulam Husain Sajid
Nazm

pani pani

sun ke ye abr kii aql jaatii rahii
yuu.n hii is ko havaa gudgudaatii rahii
aur KHud man hii man muskuraatii rahii

Ataur Rahman Tariq
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now