Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "jahaalat"

Nazm MATCHES FOR "jahaalat"

Nazm

hamare ustad

kitnii mehnat se pa.Dhaate hai.n hamaare ustaad
ham ko har ilm sikhaate hai.n hamaare ustaad
to.D dete hai.n jahaalat ke a.ndhero.n kaa tilism
ilm kii sham.a jalaate hai.n hamaare ustaad
manzil-e-ilm ke ham log musaafir hai.n magar
raasta ham ko dikhaate hai.n hamaare ustaad
zindagii naam hai kaa.nTo.n ke safar kaa lekin
raah me.n phuul bichhaate hai.n hamaare ustaad
dil me.n har lamha taraqqii kii du.aa karte hai.n
ham ko aage hii ba.Dhaate hai.n hamaare ustaad
sab ko tahziib-o-tamaddun kaa sabaq dete hai.n
ham ko insaan banaate hai.n hamaare ustaad
ham ko dete hai.n ba-har-lamha payaam-e-ta.aliim
achchhii baate.n hii bataate hai.n hamaare ustaad
KHud to rahte hai.n bahut ta.ng-o-pareshaan magar
daulat-e-ilm luTaate hai.n hamaare ustaad
ham pe laazim hai ki ham log kare.n un kaa adab
kis mohabbat se ba.Dhaate hai.n hamaare ustaad

Kaif Ahmed Siddiqui
Nazm

zabta

kamaal-e-husn kahuu.n aib ko jahaalat ko
kabhii jagaa.uu.n na so.ii hu.ii adaalat ko

Habib Jalib
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

ustad

nek bachche dil se karte hai.n adab ustaad kaa
baap kii ulfat se behtar hai Gazab ustaad kaa
aam logo.n kii jahaalat duur karne ke liye
haq-ta.aalaa ne banaayaa hai sabab ustaad kaa
us kii barakat se jahaa.n me.n phailtii hai.n nekiyaa.n
kyo.n na phir ustaad se raazii ho rab ustaad kaa
kuchh na kuchh umda sabaq detii hai us kii zindagii
KHulq se KHaalii nahii.n hai ko.ii Dhab ustaad kaa
jis gha.Dii naadaan bachcho.n ko sikhaataa hai vo ilm
chuum lete hai.n farishte aa ke lab ustaad kaa
bas use pa.Dhne-pa.Dhaane se hamesha kaam hai
kitnaa achchhaa mashGala hai roz-o-shab ustaad kaa
KHvaah saarii umr us ke paa.nv dho dho kar piye
aadmii se haq adaa hotaa hai kab ustaad kaa
imtihaa.n me.n hal na ho jis dam ko.ii mushkil savaal
KHud pasando.n ko pataa chaltaa hai tab ustaad kaa
shukr ke jazbaat se gardan jhukaa letaa huu.n mai.n
yaad aataa hai mujhe ehsaan jab ustaad kaa
kal zamaane kii nigaaho.n me.n vo izzat paa.egaa
martaba pahchaan jaa.egaa jo ab ustaad kaa
us kii aalamgiir haisiyyat hai shaaho.n kii tarah
kul ajam ustaad kaa hai kul arab ustaad kaa
chal rahe hai.n aaj duniyaa me.n hazaaro.n mahkame
sach agar puuchho to hai ye 'faiz' sab ustaad kaa

Faiz Ludhianvi
Nazm

pir-e-tasma-e-pa

mere kaa.ndhe pe baiThaa ko.ii
pa.Dhtaa rahtaa hai injiil o qur.aan o ved
makkhiyaa.n kaan me.n bhinbhinaatii hai.n
zaKHmii hai.n kaan
apnii aavaaz kaise sunuu.n
raanaa hinduu thaa akbar musalmaan thaa
sanjai vo pahlaa insaan thaa
hastinaapur me.n jis ne qabl-e-masiih
television banaayaa
aur ghar baiThe ik andhe raaja ko
yudh kaa tamaasha dikhaayaa
aadmii chaa.nd par aaj utraa to kyaa
ye taraqqii nahii.n
ab se pahle, bahut pahle
jab zarra TuuTaa na thaa
chashma jauhar kaa phuuTaa na thaa
farsh se arsh tak jaa chukaa hai ko.ii
ye aur aisii bahut sii jahaalat kii baate.n
mere kaa.ndhe pe hotii hai.n

Kaifi Azmi
Nazm

gandhi

ek faqiir
ek insaa.n paikar-e-iKHlaas ruuh-e-raastii
ik faqiir-e-be-navaa iisaar jis kii zindagii
jis ke har qaul-o-amal me.n amn kaa paiGaam thaa
jis kaa har iqdaam goyaa aafiyat-anjaam thaa
jis kii duniyaa bandagii bhagTii suruur-e-jaavedaa.n
jis kii duniyaa kaif-o-sarmastii kii haasil be-gumaa.n
aashtii thii jis kii fitrat jis kaa maz.hab pyaar thaa
KHidmat-e-insaaniyat kaa jo alam-bardaar thaa
azm ne jis ke har ik mushkil ko aasaa.n kar diyaa
jazba-e-ehsaas-e-KHuddaarii bashar me.n bhar diyaa
naaz uThaa.e hind ke vo hind kaa Gam-KHvaar thaa
kaarvaan-e-hurriyat kaa rahbar-o-saalaar thaa
ye bhii hai mojiz-bayaanii us kii har tahriir kii
naqsh-e-farsuuda se paidaa ik na.ii tasviir kii
KHaak se sho.ale uThe aur aasmaa.n par chhaa ga.e
maah-o-anjum ban ga.e kaun-o-makaa.n par chhaa ga.e
tiirgii bhaagii jahaalat kii fazaa chhuTne lagii
haule haule tiira-o-taariik shab kaTne lagii
har taraf kaif-o-masarrat har taraf nuur-o-suruur
Gunche Gunche par tabassum chashm-e-nargis par Guruur
ye fusuu.n-kaarii hu.ii jis ke sabab vo kaun thaa
ye junuu.n-kaarii hu.ii jis ke sabab vo kaun thaa
naam thaa gaa.ndhii magar us ke hazaaro.n naam hai.n
ek mai-KHaana hai jis me.n har tarah ke jaam hai.n

Sahir Hoshiyarpuri
Nazm

hamein school jaana hai

ye mausam hai uma.ngo.n kaa tara.ngo.n kaa zamaana hai
chaman ke phuul hai.n ham kaam apnaa muskuraanaa hai
qadam jo bhii uThaanaa hai taraqqii kaa uThaanaa hai
sitaaro.n kii tarah ik din falak par jagmagaanaa hai
gale me.n Daal kar baa.nhe.n KHushii ke giit gaanaa hai
hame.n school jaanaa hai hame.n school jaanaa hai
mile aadhii agar roTii to ham utnii hii khaa.e.nge
musiibat jo pa.De sar par KHushii se jhel jaa.e.nge
jo pa.Dhnaa siikh jaa.e.nge to auro.n ko pa.Dhaa.e.nge
jo raste me.n bhaTakte hai.n unhe.n manzil dikhaa.e.nge
mohabbat kaa diyaa har mo.D par ham ko jalaanaa hai
hame.n school jaanaa hai hame.n school jaanaa hai
nahii.n hai ilm se ba.Dh kar jahaa.n me.n ko.ii bhii daulat
yahii hai nuur aa.nkho.n kaa dilo.n kii hai yahii raahat
ye vo shai hai lagaa saktaa nahii.n jis kii ko.ii qiimat
baGair is ke na mil paa.egii duniyaa me.n ko.ii izzat
uTho jaldii agar ta.aliim kaa dariyaa bahaanaa hai
hame.n school jaanaa hai hame.n school jaanaa hai
jahaalat kaa a.ndheraa aql se ma.azuur kartaa hai
jo dil kii aa.nkh hai us ko yahii be-nuur kartaa hai
banaa detaa hai ye shaitaa.n KHudaa se duur kartaa hai
hame.n dar dar bhaTakne ke liye majbuur kartaa hai
jise ta.aliim kahte hai.n ki vo hikmat kaa KHazaana hai
hame.n school jaanaa hai hame.n school jaanaa hai

Zafar Kamali
Nazm

mera watan

dil-rubaa laala ho fazaa terii
mujh ko bhaa.ii na ik adaa terii
lutf se ba.Dh ke hai jafaa terii
vaah-re hindostaa.n vafaa terii
mai.n na maanuu.n kabhii tiraa kahnaa
mai.n na baKHshuu.n kabhii KHataa terii
bar-tar-az-KHaar hai tiraa gulshan
zahr se kam nahii.n havaa terii
KHaalii-az-kaifiyat tirii har chiiz
baat har ek be mazaa terii
dard-e-dil me.n ta.Dap ke mar jaa.uu.n
mai.n na Dhuu.nDuu.n kabhii shifaa terii
kaun sii baat terii lutf-aamez
kaun sii chiiz dil-kushaa terii
tujh ko jannat-nishaan kahte hai.n
ham jahannam kii jaan kahte hai.n
tujh ko kas baat par hai naaz bataa
kyaa nahii.n aur mulk tere sivaa
terii aab o havaa latiif sahii
tujh se ba.Dh kar spain kaa KHitta
tujh ko apnii zamiin kaa hai ghamanD
tujh se afzal kahii.n hai america
hasan par apne naaz hai tujh ko
hasan tujh se sivaa etaaliyaa kaa
tujh ko ga.ngaa kaa apnii dhokaa hai
tuu ne dekhaa nahii.n hai siin ko jaa
mausiiqii par tujhe hai naaz bahut
is me.n juz dard-o-Gam dharaa hai kyaa
falsafa teraa agle vaqto.n kaa
falsafa dekh jaa ke europe kaa
tujh me.n phir aan kyaa rahii baaqii
terii mahfil na kuchh na kuchh saaqii
haa.n muravvat kaa tujh me.n naam nahii.n
haa.n uKHuvvat kaa tujh me.n naam nahii.n
tujh se bad-naam ishq saa ustaad
aur mohabbat kaa tujh me.n naam nahii.n
aashtii siikhe tujh se aa ke ko.ii
haa.n KHusuumat kaa tujh me.n naam nahii.n
terii har baat me.n safaa.ii hai
aur kuduurat kaa tujh me.n naam nahii.n
tujh ko aur hurriyat se kyaa nisbat
is zaruurat kaa tujh me.n naam nahii.n
shaad hai.n taire apne begaane
aur shikaayat kaa tujh me.n naam nahii.n
terii tahziib tujh ko maujib-e-faKHr
haa.n jahaalat kaa tujh me.n naam nahii.n
baat duniyaa se hai judaa terii
vaah ai hindostaa.n adaa terii
tere rasm-o-rivaaj ne maaraa
is maraz ke ilaaj ne maaraa
terii Gairat nai kar diyaa barbaad
KHaandaano.n ke laaj ne maaraa
kyaa kare.n har gha.Dii yahii hai fikr
roz kii ehtiyaaj ne maaraa
aa.e din call kaa hai zikr-azkaar
ik zaraa se anaaj ne maaraa
aur sab par vabaa kaa ik turra
is anokhe KHiraaj ne maaraa
baKHt bargashta aarzu.e.n bahut
havas-e-siim-o-aaj nai maaraa
na kare.n kaam kuchh to khaa.e.n kyaa
roz ke kaam-kaaj ne maaraa
tuu to rahne kaa kuchh maqaam nahii.n
tujh me.n insaaniyat kaa naam nahii.n
qaid tuu ne kiyaa hasiino.n ko
mah-jabiino.n ko naazniino.n ko
zevar-e-ilm se rakhaa aarii
tuu ne qudrat ke in nagiino.n ko
iKHtiyaar o pasand kii ai hind
kyaa zaruurat na thii hasiino.n ko
KHuub pahchaanii tuu ne qadr in kii
KHuub samjhaa tuu in KHaziino.n ko
ku.e.n jha.nkvaa.e naazniino.n se
zahr khilvaayaa mah-jabiino.n ko
Duube jaate hai.n kaun aa ke bachaa.e
bahr-e-hastii ke in safiino.n ko
tuu makaa.n thaa makaan ho ke diyaa
KHauf-e-aaraam in makiino.n ko
tujh pe tahziib ta.an kartii hai
tujh pe ilzaam KHalq dhartii hai
aarzuu hai tujhe hukuumat kii
jaah-o-sarvat kii shaan-o-shaukat kii
kyuu.n na ho tujh me.n himmat-e-aalii
dhuum har suu hai terii jur.at kii
to ne kasb-e-funuun-e-ja.ng kiyaa
sab me.n shohrat hai terii quvvat kii
qasme.n khaate hai.n log duniyaa me.n
terii millat tirii uKHuvvat kii
mulk-daarii me.n mulk-giirii me.n
vaah kyaa paidaa qaabiliyyat kii
tuu to ustaad se bhii ba.Dh niklaa
hairat-a.ngez tuu ne mehnat kii
aap aalam me.n tuu hai apnii misaal
aadamiyyat kii aur shujaa.at kii
ham-sarii kii kasii ko taab nahii.n
tiraa aafaaq me.n javaab nahii.n
daaG dil ke kise dikhaa.e.n ham
aisaa mushfiq kahaa.n se laa.e.n ham
dil me.n hai apne ham-nashii.n ik roz
aap ro kar tujhe rulaa.e.n ham
is tabii.at ko kas tarah bahlaa.e.n
dil ko kis chiiz se lagaa.e.n ham
kab talak roz ke kahe.n sadme
kab talak aafate.n uThaa.e.n ham
zahr kyuu.n ai falak na ham khaa le.n
jii se apne guzar na jaa.e.n ham
jo shikaayat ho kyuu.n na lab par aa.e
ek dukh ho use chhupaa.e.n ham
ai tamaddun ke raahat-o-aaraam
haa.e kas tarah tum ko paa.e.n ham
log uThaate hai.n zindagii ke maze
ham uThaate hai.n naa-KHushii ke maze

Meer Syed Nazeer Husain Nashad
Nazm

bachchon ka KHat chacha KHarru shechof aur mamun candy

ja.ng ke baare me.n ham bachcho.n kii ik tajviiz hai
taaki sab KHush ho ke bole.n ja.ng achchhii chiiz hai
aap ko ma.asuum bachcho.n kaa hai gar kuchh bhii KHayaal
baiThe baiThe ek dam ho jaa.iye Gusse se laal
kho.e kii tope.n liye maidaan me.n aa jaa.iye
in se ras-gullo.n ke gole har taraf barsaa.iye
miiThe gole aap kii topo.n ke ham khaate rahe.n
ho.nT ye qaumii taraane dam-ba-dam gaate rahe.n
ho.n har ik banduuq me.n rab.Dii ke ra.ngii.n kartoos
aur har ik tank kii Ta.nkii me.n mausammii kaa juice
aap ke dushman kii faujo.n ko ho jab Gusse kii pyaas
pesh kiije muskuraa kar un ko sharbat kaa gilaas
duudh ke saagar me.n ho.n kuuze kii misrii ke jahaaz
jis me.n ho.n jaasuus siine me.n liye toffee ke raaz
bam phaTe.n to un se nikle.n jhaT khilaune be-shumaar
Thaa ho aur lag jaa.e guDDo.n aur gu.Diyo.n kii qataar
gar ko.ii biimaar ho chillaa rahaa ho pen se
chokleT pahu.nchaa.iye jhaT us ko airplane se
ko.ii naa-maaquul aa kar gaaliyaa.n bhii de agar
us se kahiye bhaag jaa haT tere mu.nh me.n ghii shakar

Raja Mehdi Ali Khan
Nazm

madari zaban

aaGosh-e-vaalida me.n paalaa thaa ham ko jis ne
ik paikar-e-adab me.n Dhaalaa thaa ham ko jis ne
jis ne hai ibtidaa se har zindagii sa.nvaarii
vo maadarii zabaa.n hai urdu zabaa.n hamaarii
bachpan me.n jis ne miiThii lorii sunaa.ii ham ko
jis ke tufail jhuule me.n nii.nd aa.ii ham ko
ras gholtii hai jis kii aavaaz pyaarii pyaarii
vo maadarii zabaa.n hai urdu zabaa.n hamaarii
jis kii madad se ham ne apnii zabaan kholii
jis me.n samaa ga.ii hai saare jahaa.n kii bolii
jis kii har ik sifat hai sau KHuubiyo.n pe bhaarii
vo maadarii zabaa.n hai urdu zabaa.n hamaarii
jis se miTaa jahaalat kii raat kaa a.ndheraa
hindostaa.n me.n chamkaa tahziib kaa saveraa
hai jis kii raushnii kaa har ghar me.n faiz jaarii
vo maadarii zabaa.n hai urdu zabaa.n hamaarii
vo 'krishn' ho.n ki 'bedii' 'chakbast' ho.n ki 'taalib'
'mahruum' ho.n ki 'haalii' 'iqbaal' ho.n ki 'Gaalib'
sadiyo.n har ahl-e-maz.hab jis kaa rahaa pujaarii
vo maadarii zabaa.n hai urdu zabaa.n hamaarii
jis ne KHuluus-e-dil se ai 'kaif' sab ko paalaa
jis kaa har ek ghar me.n ab bhii hai bol-baalaa
dushman ke bhii dilo.n par hai jis kaa KHauf taarii
vo maadarii zabaa.n hai urdu zabaa.n hamaarii

Kaif Ahmed Siddiqui
Nazm

shararat nagar

ko.ii aisaa school bhii to khule
jahaa.n copiyaa.n aur kitaabe.n na ho.n
diivaaro.n pe likkhaa ho pa.Dhnaa nahii.n
taraqqii ke ziine pe cha.Dhnaa nahii.n
rah-e-ilm me.n aage ba.Dhnaa nahii.n
gale mere ye ilm ma.Dhnaa nahii.n
hamesha rahe.n KHush ki ai chul-bule
ko.ii aisaa school bhii to khule
hame.n na sikhaa.o ye jii o T got
hamaaraa to Gussa hai h o T hot
ki ham to.D Daale.n ye pii o T pot
chhi.Dak de.nge chehre pe ham inkpot
pa.De daaG aisaa ki phir na dhule
ko.ii aisaa school bhii to khule
na karnii pa.De yaad ye history
na juGraafiya ho aur na chemistry
vakaalat kare.nge na barristerii
sikhaa do sharaarat kii palmistry
ki shaitaan ban.ne pe ham hai.n tule
ko.ii aisaa school bhii to khule
ba.De ho ke bhaaluu nachaa.e.nge ham
akhaa.De me.n mugdar ghumaa.e.nge ham
na pa.Dhne ko england jaa.e.nge ham
tumhii.n par kabuutar u.Daa.e.nge ham
jahaalat ke pal.De me.n ham hai.n tule
ko.ii aisaa school bhii to khule

Iqbal Hasan Azad
Nazm

KHidmat-e-watan

vatan kii KHidmat-e-be-laus hai har shaKHs par laazim
yahii vo kaam hai jo aadmii ke kaam aataa hai
lagaa dii jaatii hai hubb-e-vatan me.n sar kii baazii bhii
ik aisaa bhii vufuur-e-josh me.n ha.ngaam aataa hai
palaTne hii ko hai qismat tumhaarii ai vatan vaalo
tumhaare vaaste ye arsh se paiGaam aataa hai
Gulaamii duur hotii hai tumhaarii ab ko.ii dam me.n
hukuumat aur sardaarii kaa phir ha.ngaam aataa hai
musiibat hai ye bilkul aarzii is par na ghabraanaa
bas ab aataa hai ahd-e-raahat-o-aaraam aataa hai
vahii phir bhii bazm hogii phir vahii ra.ngiiniyaa.n ho.ngii
vahii paimaana aataa hai vahii phir jaam aataa hai
tum apnii naa-tavaanii se pareshaa.n is qadar kyuu.n ho
kabhii kamzor honaa bhii bashar ke kaam aataa hai
miTaa detaa hai dam me.n naKHvat-e-namruud ik machchhar
kabhii aisaa bhii daur-e-gardish-e-ayyaam aataa hai
KHudaa-raa is nizaa-e-baahamii ko KHatm farmaa do
zaraa socho ki tum par kis qadar ilzaam aataa hai
kabhii chi.Dtaa hai gar mazkuur, qaumo.n kii jahaalat kaa
to sab se pahle kaano.n me.n tumhaaraa naam aataa hai
ye nukta yaad rakkho us ko bhuulaa kah nahii.n sakte
jo vaqt-e-sub.h jaa kar, ghar pe vaqt-e-shaam aataa hai

Ahmaq Phaphoondvi
Nazm

mohabbat ki bhi koi umr hoti hai

mohabbat kii bhii ko.ii umr hotii
na-jaane kis ne tum se kah diyaa kis shai ke nashshe me.n
mai.n us se jab milaa mujh ko ha.nsii aa.ii thii ye sun kar
mohabbat ke na.e mafhuum se vaaqif na hone par
mujhe apnii jahaalat par

Firoz Natiq Khusro
Nazm

ilm aur jahaalat

vo bashar jo pa.Dh ke bhii kahtaa ho yuu.n
ban ke taalib aur kuchh haasil karuu.n
ko.ii shak us kii faziilat me.n nahii.n
us kaa rutba hai farishto.n se fuzuu.n
vo bashar kuchh bhii na aataa ho jise
lekin us ko shauq ho aalim banuu.n
apnii be-ilmii kaa us ko ilm hai
naa-munaasib hai use jaahil ginuu.n
vo bashar jo ho niraa ahmaq magar
KHud samajhtaa ho ki daanish-mand huu.n
maut hai us kii himaaqat kaa ilaaj
vo rahegaa umr bhar KHvaar-o-zabuu.n
har bashar ai 'faiz' ye koshish kare
jis tarah bhii ho jahaalat se bachuu.n

Faiz Ludhianvi
Nazm

sarsayyad ahmad KHan

aap ne daur-e-jahaalat se nikaalaa qaum ko
ilm aur tahziib ke saa.nche me.n Dhaalaa qaum ko

Syeda Farhat
Nazm

jashn-e-masarrat

baapuu ke ahinsaa kii nehru ke taKHayyul kii
tanviir nazar aa.ii tasviir nazar aa.ii
zehno.n se jahaalat kii zulmat ko miTaa Daalaa
ab ilm ke suuraj kii ghar-ghar me.n kiran aa.ii

Masooda Hayat
Nazm

ai gham-e-dil kya karun

aadmii KHud hii parastaar-e-jahaalat ban gayaa
mandir-o-masjid kaa jhag.Daa ek aadat ban gayaa
dharm to ik pyaar thaa jo aaj nafrat ban gayaa
ai Gam-e-dil kyaa karuu.n ai vahshat-e-dil kyaa karuu.n

Nazir Fatehpuri
Nazm

hum ko aagahi na do

ham jaise jii rahe hai.n
ham ko vaise jiine do
ye jo aagahii ke dukh hote hai.n
vo ruuh ko zaKHmii kar dete hai.n
aur ab tak sirf jismo.n ke ilaaj kii research hu.ii hai
aur vo research bhii kyaa
ki doctors ek maraz durust kar ke
duusraa maraz ugaa dete hai.n
ye jo aagahii hai
ye to naasuur se bhii bad-tar hai
ye to ha.nste baste insaan ko
rulaa detii hai
ujaa.D detii hai
ye jo a.ndheraa hai naa jahaalat kaa
vo fil-vaqt kitnaa sukuun-baKHsh hai
bachpan ke khilauno.n se jii bahlaane jaisaa
ye jo duniyaa hai naa
is ke kyaa kyaa azaab hai.n
kahaa.n kahaa.n ja.nge.n ho rahii hai.n
aur us ke muharrikaat kyaa kyaa hai.n
insaan hii insaan ko maar rahe hai.n
ye jo kaa.enaat hai naa
is me.n kitnaa paanii bachaa hai
kitnii oxigen baaqii hai
kitne sayyaare KHalaa.o.n me.n zamiin ko khaane ke liye ghuum rahe hai.n
ye jo aagahii hai naa
ye to jiite-jii maar rahii hai
ab ham jiite kab hai.n
ham to jiine ke liye falsafe bante rahte hai.n
ham to jiine ke liye sayyaare Dhuu.nDte rahte hai.n
ham to jiine kii adaakaarii karte hai.n

Maryam Tasleem Kiyani
Nazm

ilm

ilm vo shai hai jise ko.ii churaa saktaa nahii.n
chhiin.naa chaahe ise ko.ii to paa saktaa nahii.n
ilm hai to zindagii ko.ii dikhaa saktaa nahii.n
ilm hai to aadmii dozaKH me.n jaa saktaa nahii.n
ilm hii se ab jihaalat ko miTaayaa jaa.egaa
ilm se aazaad hindostaa.n banaayaa jaa.egaa

Basant Lakhnavi
Nazm

mashq

barso.n baa'd bar-nok-e-zabaan rahtaa hai ko.ii sher
phir ek din
us ke jaane pahchaane hazaar martaba dohraa.e hu.e alfaaz ke andar
khul jaataa hai ma.aanii kaa ek nayaa darvaaza
aur rah jaate hai.n ham hakka-bakkaa
jis mafhuum par sar dhunte aa.e the kal tak kitnaa sat.hii kitnaa adhuuraa thaa vo
shukr karte hai.n ki nahii.n puuchh liyaa kisii ne ham se is sher kaa matlab
satya-naas kar Daalte achchhe bhale sher kaa in na.e ma.aanii ke baGair ham
yahii kuchh hotaa hai zindagii me.n pesh aane vaale
vaaqi.aat o haadsaat ke saath bhii
jo kuchh biit gayaa aur biit rahaa hai ham par
der tak raaz hii nahii.n khultaa us kii ahmiyat kaa
be-maqsad ho rahaa hai ye sab kuchh
yaa is kaa hamaare mustaqbil aur muqaddar se bhii ta'alluq hai kuchh
phir parda saa haTtaa hai aur ho jaate hai.n ham Garq-e-hairat
kitnaa mahduud thaa hamaaraa naqd-e-ilm
aur kin muGaalito.n me.n pa.De hu.e the ham
mujhe to KHuugar saa banaa diyaa hai roz-marra kii is hairaanii o pareshaanii ne
na.e se nayaa sadma sahne ko tayyaar rahtaa huu.n sub.h o shaam
apnii jahaalat ke inkishaaf par
one-day cricket to shauq se dekhte hai.n aap bhii
yuu.n samajhiye ki mashq thaa guzishta kal kaa match aaj ke match kii
mashq hai aaj kaa match aane vaale kal ke liye
aur kal jo match hogaa apnii jagah vo final hii kyuu.n na ho
mashq hogaa parso.n ke match kii
haDDiyaa.n gal ga.ii.n itnii saada sii baat samajhte samajhte
ki har din tuluu hotaa hai apne saath ek nayaa savaal ek nayaa challenge le kar
aur mutaaliba kartaa hai ham se ek na.e javaab ek na.e tarz-e-amal kaa
na to zindagii hii jaamid hai na zindagii kaa KHaaliq KHudaa
zindagii bahte dariyaa kii tarah badaltii rahtii hai har lahza qaa.em-o-daa.em rahte hu.e
aur nit-na.ii taKHliiq me.n masruuf KHudaa bhii nahii.n hotaa kabhii pahle vaalaa KHudaa
jab zindagii aur us ke KHaaliq hii kii kaayaa kalp hotii rahtii hai yuu.n
to ash.aar ho.n yaa vaaqi.aat o haadsaat badal jaataa hai hir shai kaa mafhuum
bha.ii, badal jaate hai.n ham KHud badal jaatii hai hamaarii nazar hamaaraa ehsaas
badal jaatii hai.n vo mohabbate.n
jin ke azlii o abadii hone kii qasme.n khaayaa karte the ham
badal jaatii hai.n be-badal dostiyaa.n
vo KHvaahishe.n badal jaatii hai.n jinho.n ne
ek umr paagal banaa.e rakhaa hotaa hai hame.n
aur to aur badal jaate hai.n diin aur iimaan
raaste hii nahii.n badal jaatii hai.n manzile.n
sun rahe hai.n aap
bhar to nahii.n paa.e aap bhii?
kidhar chal diye aap?
badal to nahii.n ga.e aap bhii?

Mohammad Haneef Rame
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now