Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kasrat-e-asnaam"

Nazm MATCHES FOR "kasrat-e-asnaam"

Nazm

kasrat-e-aulad

kasrat-e-aulaad se ham is qadar bezaar hai.n
ab to begam se alag rahne ko bhii tayyaar hai.n

Nashtar Amrohvi
Nazm

makin nahin koi

ye chaaro.n or jo dikhtii hai kasrat-e-vahdat
jo sach kahuu.n dil-e-kaafir vajuud-e-zan se hai

Nadeem Najid
Nazm

manazir-e-sahar

vo barg-e-gul-e-taaza vo shabnam kii lataafat
ik husn se vo KHanda-e-saamaan-e-haqiiqat
vo jalva-e-asnaam vo but-KHaane kii ziinat
zaahid kaa vo manzar vo barhaman kii sabaahat

Josh Malihabadi
Nazm

kasrat-e-aulad

suniye ik naa-aaqibat-andesh kii fariyaad hai
kah rahaa hai vo mujhe apnii javaanii yaad hai
mai.n jise kahtaa thaa ghar vo aaj tifl-aabaad hai
merii tanhaa jaan hai aur kasrat-e-aulaad hai
''ai Gam-e-dil kyaa karuu.n, ai vahshat-e-dil kyaa karuu.n''

Syed Mohammad Jafri
Nazm

wafa kaisi?

aaj vo aaKHirii tasviir jalaa dii ham ne
jis se is shahr ke phuulo.n kii mahak aatii thii
jis se be-nuur KHayaalo.n pe chamak aatii thii
ka.aba-e-rahmat-e-asnaam thaa jo muddat se
aaj us qasr kii zanjiir hilaa dii ham ne
aag, kaaGaz ke chamakte hu.e siine pe ba.Dhii
KHvaab kii lahr me.n bahte hu.e aa.e saahil
muskuraate hu.e ho.nTo.n kaa sulagtaa hu.aa karb
sarsaraate hu.e lamho.n ke dha.Dakte hu.e dil
jagmagaate hu.e aavezaa.n kii mub.ham fariyaad
dasht-e-Gurbat me.n kisii hajla-nashii.n kaa mahmil
ek din ruuh kaa har taar sadaa detaa thaa
kaash ham bik ke bhii is jins-e-giraa.n ko paa le.n
KHud bhii kho jaa.e.n par is ramz-e-nihaa.n ko paa le.n
aql us huur ke chehre kii lakiiro.n ko agar
aa miTaatii thii to dil aur banaa detaa thaa
aur ab yaad ke is aaKHirii paikar kaa tilism
qisa-e-rafta banaa ziist kii maato.n se hu.aa
duur ik khet pe baadal kaa zaraa saa Tuk.Daa
dhuup kaa Dher hu.aa dhuup ke haato.n se hu.aa
us kaa pyaar us kaa badan us kaa mahaktaa hu.aa ruup
aag kii nazr hu.aa aur inhii baato.n se hu.aa

Mustafa Zaidi
Nazm

aaina-KHane ke qaidi se

muKHtalif hai.n aa.iino.n ke zaaviye
ek lekin aks-e-zaat;
ik ikaa.ii par usii kii zarb se
kasrat-e-vahdat kaa paidaa hai tilism
KHalvat-e-aa.iina-KHaana me.n kahii.n ko.ii nahii.n
sirf mai.n!
mai.n hii but
aur mai.n hii but-parast!
mai.n hii bazm-e-zaat me.n raunaq-afroz
jalva-haa-e-zaat ko detaa huu.n daad!

Ameeq Hanafi
Nazm

insan

insaan aur itaa.at-e-maahaul-e-iftiraa
aayaa hai apnii aap ye duniyaa liye hu.e
hai dekhne me.n zarra pe sad mahr dar baGal
vahdat hai is kii kasrat-e-ashiyaa liye hu.e
zaahir me.n ek phuul pe sad gulistaa.n ye jeb
bil-fe.al qatra bil-quva dariyaa liye hu.e
me.amaarii-e-jahaan-e-nau is kii hai zindagii
maut is kii hai hayaat kaa chashma liye hu.e
kis kii majaal hai ki ise dekh kar kahe
aayaa hai apne saath ye kyaa kyaa liye hu.e

Azeemuddin Ahmad
Nazm

dil-e-nadan

gar aasmaa.n ko mahr-e-daraKHshaa.n pe naaz hai
anjum pe naaz hai mah-e-taabaa.n pe naaz hai
gulshan ko apne sumbul-o-raihaa.n pe naaz hai
aur baaGbaa.n ko apne gulistaa.n pe naaz hai
shaaKHo.n ko andaliib ke naGmo.n pe naaz hai
aur andaliib ko gul-e-KHandaa.n pe naaz hai
sabza ko apne gauhar-e-larzaa.n pe naaz hai
sahn-e-chaman ko husn-e-KHiraamaa.n pe naaz hai
shaa.ir ko apne husn-e-liyaaqat pe naaz hai
aashiq ko apne siina-e-biryaa.n pe naaz hai
ashko.n ko garche apnii ravaanii pe naaz hai
aaho.n ko apnii aatish-e-sozaa.n pe naaz hai
mansuur-e-paak-baaz ko daar-o-rasan pe naaz
majnuu.n ko apne chaak-e-garebaa.n pe naaz hai
zauq-e-fanaa pe naaz hai garche patang ko
mahfil ko apnii sham-e-farozaa.n pe naaz hai
isyaa.n ko garche rahmat-e-yazdaa.n pe naaz hai
rahmat ko afv-e-kasrat-e-isyaa.n pe naaz hai
apnii balaa se gar ko.ii naazaa.n KHirad pe ho
ham ko to ai 'purii' dil-e-naadaa.n pe naaz hai

Narayan Das Puri
Nazm

lazzat-e-irfan

ra.ng-e-fitrat hai vaj.h-e-hairaanii
aql hai aur hayaa-e-naadaanii
raaz-daa.n mudda.aa ko kahte hai.n
husn ulfat kaa daaG-e-peshaanii
husn-e-baaqii ne dil ko khii.nch liyaa
ruKHsat ai husn-e-hastii-e-faanii
dil hai vaqf-e-rajaa-e-rahm-o-karam
jaa.n hai nazr-e-razaa-e-rabbaanii
ab mai.n samjhii ki hai fanaa-e-KHudii
imbisaat-e-bahisht-e-laafaanii
Gam na kar hai naqiib-e-abr-e-bahaar
KHushkii-e-mausam-e-zamistaanii
dil-e-sad-paara ke alam gin luu.n
dekhii jaa.egii sub.ha-gardaanii
kar sake tai na mulk-e-irfaa.n ko
ruumii o maGribii o kirmaanii
duuruu-e-bazm-e-dost ke Gam me.n
mahv-e-afGaa.n hai ik afGaanii
arsh ke ka.ngare pe taa.ir-e-quds
raat kartaa thaa yuu.n KHush-ilhaanii
ki hai insaa.n tilism-e-shaan-e-KHudaa
qadr apnii na is ne pahchaanii
band kii.n us ne jab zaraa aa.nkhe.n
khul gayaa raaz-e-bazm-e-imkaanii
chaara-e-ruuh falsafii hai na shaiKH
ek vahmii hai ek KHafaqaanii
kasrat-e-iin-o-aa.n me.n vahdat-e-dost
kunj-e-naayaab kii faraavaanii
shaiKH ra.nj-e-bayaa.n kaa Dar na kare
laa-bayaa.n hai ye kaif-e-vajdaanii
mutashakkik hai aur shikaayat-e-hijr
nuzhat aur shukr-e-lutf-e-pinhaanii

Ze Khe Sheen
Nazm

zindagi

kahte hai.n jis ko zindagii
maut bhii hai hayaat bhii
hai yahii kashmakash kaa din
'aish-o-tarab kii raat bhii
socho to hai ye al-Garaz
maaya-e-jauhar-o-'araz
hai yahii asl me.n vujuud
hai yahii mumkinaat bhii
is kii numuud me.n nihaa.n
vahdat-o-kasrat-e-jahaa.n
ahl-e-nazar ke ruu-baruu
zaat bhii hai sifaat bhii
hai yahii abr-e-nau-bahaar
baad-e-KHizaa.n se ham-kinaar
hai yahii mehr-e-niim-roz
zarra-e-kaa.enaat bhii
is se hai husn ko Guruur
is se hai 'ishq naa-subuur
vasl kii hai kahaaniyaa.n
hijr kii vaardaat bhii
is se jahaa.n me.n shor-o-Gul
hai ye bahaaduro.n kii mul
is se hai.n dar vaa sulh ke
jang kii is se ghaat bhii
'azm-e-tasallut-e-jahaa.n
is kii umang me.n nihaa.n
hai yahii vaj.h-e-inqalaab
muzhda-dah-e-sabaat bhii
suu-e-'amal se hai Gulaam
husn-e-'amal se hai imaam
hai ye muharrik-e-fasaad
'aamil-e-saalihaat bhii
maut-o-hayaat hai.n yahaa.n
husn-e-'amal ke imtihaa.n
zindagii hii hayaat hai
zindagii hii mamaat bhii
kahte hai.n jis ko zindagii
maut bhii hai hayaat bhii
fat.h-o-zafar kaa hai ye din
jaur-o-sitam kii raat bhii

Ahmad Azimabadi
Nazm

nakaami

mai.n ne har chand Gam-e-ishq ko khonaa chaahaa
Gam-e-ulfat Gam-e-duniyaa me.n samonaa chaahaa
vahii afsaane mirii samt ravaa.n hai.n ab tak
vahii sho.ale mire siine me.n nihaa.n hai.n ab tak
vahii ba-suud KHalish hai mire siine me.n hanuuz
vahii bekaar tamannaa.e.n javaa.n hai.n ab tak
vahii gesuu mirii raato.n pe hai.n bikhre bikhre
vahii aa.nhke.n mirii jaanib nigraa.n hai.n ab tak
kasrat-e-Gam bhii mire Gam kaa mudaavaa na hu.ii
mere bechain KHayaalo.n ko sukuun mil na sakaa
dil ne duniyaa ke har ik dard ko apnaa to liyaa
muzmahil ruuh ko andaaz-e-junuu.n mil na sakaa
merii taKHayyul kaa shiiraaza-e-barham hai vahii
mere bujhte hu.e ehsaas kaa aalam hai vahii
vahii be-jaan iraade vahii be-ra.ng savaal
vahii be-ruuh kashaakash vahii bechain KHayaal
aah is kashmakash sub.h o masaa kaa anjaam
mai.n bhii naakaam mirii sa.ii amal bhii naakaam

Sahir Ludhianvi
Nazm

abhi waqt hai lauT jao

suno kasrat-e-KHaak me.n basne vaalo
suno tausan-e-barq-raftaar par kaThiyaa.n kasne vaalo
ye phir kaun se ma.arke kaa iraada
tumhaarii naso.n me.n ye kis KHvaab-e-faateh kaa phir baab-e-vahshat khulaa hai
fasiilo.n pe ik parcham-e-KHuu.n-chakaa.n gaa.D dene kii niyyat
ka.ii laakh maftuuh jismo.n ko phir haalat-e-siina-kuubii me.n rote hu.e dekhne kii tamannaa
ye kis aab-e-diivaangii se badan kaa subuu bhar rahe ho
suno tum ba.Dii bad-numaa raat kii dhund me.n faisla kar rahe ho
udhar sai.nka.Do.n kos par ik pahaa.Dii hai jis par ko.ii shai nahii.n hai
vahaa.n har taraf se tumhe.n aag ke Gol ghere me.n lene kii KHaatir kha.De hai.n
abhii vaqt hai luuT jaa.o
suno ujlat-e-fikr me.n ko.ii bhii kaam anjaam paataa nahii.n
phir kisii saa.at-e-shab-girafta me.n ko.ii sitaaraa bulaataa nahii.n

Rafiq Sandelvi
Nazm

aane wali nasl ka tohfa

chalo ik va.ada karte hai.n
ki ham aur aap sab bhii
zehn aur dil kii kuduurat saaf karte hai.n
be-iimaanii par diyaanat kibr par iKHlaas ko
nafrato.n ke zahr par pyaar kii miThaas ko
ham Gaalib karte hai.n
chalo ham ye bhii karte hai.n
ki ahl-e-haq ko un kaa haq dilaate hai.n
jo mujrim hai.n unhe.n mujrim hii kahte hai.n
fareb-o-maslahat ko aap bhii aur ham bhii chho.De.n
qadam boso.n ke bhayaanak Gol ko jo diimak-o-jaraasiim kii suurat
nizaam-e-fikr-o-fan barbaad kartaa hai
use ham duur rakhte hai.n use mazmuum kahte hai.n
sunaa hai jis zamii.n jis qaum se sachchaa.ii jaatii hai
to us ke saath hii iimaan aur insaaf jaataa hai
to apne taur par in tiino.n ko ham thaame rakhte hai.n
chalo ham aisaa karte hai.n
za.iif-o-tifl ko bahuu ko beTiyo.n ko maa.n ko ham mushtarka kahte hai.n
dharm aur zaat ke
qasrat-o-qillat ke saare phuulo.n ko chun kar
unhe.n KHush-ra.ng karte hai.n hasii.n maalaa pirote hai.n
chalo ham aisaa karte
ye tohfa aane vaalii nasl ko ham pesh karte hai.n

Abu Bakr Abbad
Nazm

numaish mein

vo kuchh doshiizgaan-e-naaz-parvar
kha.Dii hai.n ik bisaatii kii dukaa.n par
nazar ke saamne hai ek mahshar
aur ik mahshar hai mere dil ke andar
sunahraa kaam ra.ngii.n saa.riyo.n par
bisaat-e-aasmaa.n par maah-o-aKHtar
jamaal-o-husn ke pur-ro.ab tevar
numaayaa.n chaa.nd sii peshaaniyo.n par
vo ruKHsaaro.n pe halkii halkii surKHii
labo.n me.n pur-fishaa.n ruuh-e-gul-e-tar
siyah zulfo.n me.n ruuh-e-sumbulistaa.n
nazar sar-chashma-e-tasniim-o-kausar
adaa-e-naaz Garq-e-kaif-e-sahbaa
siyah mizhgaa.n sharaab-aaluuda nashtar
chamak taaro.n kii chashm-e-surmagii.n me.n
jhalak chaa.ndii kii jism-e-marmarii.n me.n
vo KHushbuu aa rahii hai pairahan se
fazaa hai duur tak jis se mo.attar
tabassum aur ha.nsii ke narm tuufaa.n
fazaa.o.n me.n musalsal baarish-e-zar
nishaat-e-ra.ng-o-buu se chuur aa.nkhe.n
sharaab-e-naab se labrez saaGar
vo mehraabe.n sii siino.n par numaayaa.n
fazaa-e-nuur me.n cupid ke shah-par
nafas ke aamad-o-shud se talaatum
shab-e-mahtaab me.n jaise samundar
sitaaro.n kii nigaahe.n jhuk ga.ii hai.n
zamii.n phir KHanda-zan hai aasmaa.n par
ko.ii aa.iina-daar-e-husn-e-faaras
kisii me.n husn-e-yuunaanii ke jauhar
kisii me.n aks-e-''ma.asuum-e-kaliisaa''
kisii me.n partav-e-asnaam-e-aazar
ye shiirii.n hai vo naushaaba hai shaayad
nahii.n yaa.n farq-e-farhaad-o-sikandar
ye apne husn me.n azraa-e-vaamiq
vo apne naaz me.n salmaa-e-'aKHtar'
ye taabaanii me.n KHurshiid-e-daraKHshaa.n
vo ra.anaa.ii me.n us se bhii fuzuu.n-tar
ha.nsii us kii tuluu-e-sub.h-e-KHandaa.n
navaa us kii suruud-e-kaif-aavar
ye sholaa-aafrii.n vo barq-afgan
ye aa.ii.na-jabii.n vo maah-paikar
vo jumbish sii hu.ii kuchh aa.nchalo.n ko
vo lahre.n sii uThii.n kuchh saa.riyo.n par
KHiraam-e-naaz se naGme jagaatii
vo chal dii.n ek jaanib muskuraa kar
kisii kii hasrate.n paamaal kartii
kisii kii hasrate.n ham-raah le kar
kabhii aa.nkhe.n dukaano.n par jamii hai.n
kabhii KHud apnii hii barnaaiyo.n par
idhar ham ne ik aah-e-sard khii.nchii
ha.nsii phir aa ga.ii apne kiye par

Asrarul Haq Majaz
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

hamare darmiyan jo rabt tha

yahaa.n mai.n mutma.in huu.n
roz-o-shab kii chiira-dastii se
bahut mahfuuz
shaadaa.n aur farhaa.n
zindagii kii dau.D me.n sab marhalo.n par
kaamraa.n
KHush-kaam
zinda huu.n

Aslam Mirza
Nazm

kya kah gai hai bagh se baad-e-KHizan na puchh

hangaama-e-kashaakash-e-suud-o-ziyaa.n na puuchh
shaayad ki ho rahaa hai phir ik imtihaa.n na puuchh
kyuu.nkar luTii hai jins-e-giraa.n-maaya-e-nashaat
viiraa.n hu.aa hai kaise bharaa aashiyaa.n na puuchh
shaayad sujhaa ga.ii hai ma.aal-e-chaman kaa raaz
kyaa kah ga.ii hai baaG se baad-e-KHizaa.n na puuchh
ai naa-shanaas-e-qiimat-e-aazaadii-e-hayaat
haasil hu.ii hai chiiz ye kitnii giraa.n na puuchh
tafriiq-e-baahamii ye tashattut ye iftiraaq
KHirman jalaa na de.n kahii.n ye bijliyaa.n na puuchh
apnii jagah bhii kyo.n ko.ii ab mutma.in nahii.n
nukta nahii.n ye qaabil-e-sharh-o-bayaa.n na puuchh
uljhaa hu.aa hai baahamii jang-o-jadal me.n kyo.n
duniyaa pahu.nch ga.ii hai kahaa.n se kahaa.n na puuchh
'ibrat-nazar se dekh ma.aal-e-gul-o-chaman
dastuur-e-inqilaab-e-bahaar-o-KHizaa.n na puuchh
jin se hai ab bhii daaman-e-insaan laala-zaar
afsaana-e-hayaat kii vo surKHiyaa.n na puuchh
fitna ko.ii jahaa.n me.n nayaa jaagtaa na ho
uThThaa hai kyo.n ye shor-e-Gam-e-naa-gahaa.n na puuchh
'in'aam' zindagii ke haqaa.eq ke vaaste
laazim hai kis qadar nazar-e-nukta-daa.n na puuchh

Inam Thanvi
Nazm

hum apne jazba-e-dil se muhayya ek jahan kar len

tasallut laakh ye sayyaad-o-barq-o-baaGbaa.n kar le.n
nahii.n mumkin ki ham baahar chaman se aashiyaa.n kar le.n
badal de.n ye zamii.n paidaa nayaa ik aasmaa.n kar le.n
ham apne jazba-e-dil se muhayyaa ik jahaa.n kar le.n
abhii sab daGdaGa miT jaa.e ye sayyaad-o-gulchii.n kaa
jo ham paidaa shu'uur-e-zindagii-e-gulistaa.n kar le.n
zamaana de rahaa hai daa'vat-e-bedaarii-o-jur.at
nigaah-o-dil ko aamaada baraa-e-imtihaa.n kar le.n
pahu.nch jaa.e.n ham istiqlaal kii aisii bulandii par
nazar mustaGnii-e-hangaama-e-suud-o-ziyaa.n kar le.n
abhii ho jaa.e.n paara-paara sab aa'daa kii tadbiire.n
zaraa ham mujtama' apne agar taab-o-tavaa.n kar le.n
guzar achchhaa nahii.n har dam ye zid par aashiyaane kii
bas apnaa raasta hii muKHtalif ab bijliyaa.n kar le.n
badal jaa.e abhii 'in'aam' nazm-e-shorish-e-baatil
zaraa ham ittibaa’-e-mashrab-e-ruuhaaniyaa.n kar le.n

Inam Thanvi
Nazm

election ki kar-farmai

udaasii chhaa rahii hai kis liye 'in'aam' chehro.n par
pariida ruKH kaa rang-o-nuur kyo.n hai ham samajhte hai.n

Inam Thanvi
Nazm

nuqush-e-fikr-o-‘amal

dariyaa-e-tabii'at ko ravaa.n ham ne kiyaa hai
durr-e-haa-e-ma'aanii ko 'ayaa.n ham ne kiyaa hai
yuu.n haal-e-dil-e-zaar bayaa.n ham ne kiyaa hai
KHud un ko bhii ab ashk-fishaa.n ham ne kiyaa hai
in me.n bhii nazar kuchh kii haqaa.eq se hai mahruum
ye tajziya-e-diida-varaa.n ham ne kiyaa hai
kam hai.n bahut insaaniyat-o-KHulq kii qadre.n
ye tajraba-e-ahl-e-jahaa.n ham ne kiyaa hai
hai baat hamaarii hii ki rindo.n ko bahar-taur
zer-e-asar-e-piir-e-muGaa.n ham ne kiyaa hai
kyaa KHuub ubhar aa.e nuquush-e-gul-o-laala
aa.nkho.n ko jo KHuu.n-naaba-fashaa.n ham ne kiyaa hai
ik mo.D diyaa hai ruKH-e-taariiKH ko jis ne
kirdaar vo 'aalam pe 'ayaa.n ham ne kiyaa hai
maahaul ke zulmat-kada-e-tiira-shabii ko
ik jalva-gah-e-kaahkashaa.n ham ne kiyaa hai
goyaa hai.n dil-o-diida zabaa.n saakit-o-KHaamosh
is tarz se bhii shor-e-fuGaa.n ham ne kiyaa hai
paiham rahe ham husn-e-yaqii.n ke mutajassis
kab ko.ii Galat vahm-o-gumaa.n ham ne kiyaa hai
'ibrat-kada-e-dahr kii ik khii.nch dii tasviir
jab zikr-e-jahaan-e-guzaraa.n ham ne kiyaa hai
shaa.istagii-e-fikr ko bhii naaz hai jis par
paidaa vahii usluub-e-bayaa.n ham ne kiyaa hai
labbaik kahaa hai rasan-o-daar ko jis ne
vo hausla-e-qalb-e-tapaa.n ham ne kiyaa hai
KHallaaq-e-do-'aalam kaa kiyaa zikr-o-tasavvur
kyaa KHuub 'ilaaj-e-Gam-e-jaa.n ham ne kiyaa hai
ham ne hii banaayaa unhe.n mardaan-e-KHush-anfaas
tabdiil ruKH-e-baada-kashaa.n ham ne kiyaa hai
har KHalvat-o-jalvat me.n jo kahte rahe daa.im
vo barsar-e-mimbar bhii bayaa.n ham ne kiyaa hai
har haal me.n raazii rahe ham us kii razaa me.n
kab tabsira-e-suud-o-ziyaa.n ham ne kiyaa hai
kohsaar-o-samaa jis ke uThaane se the maa'zuur
bardaasht vo ik baar-e-garaa.n ham ne kiyaa hai
haq-go.ii agar jurm hai ye jurm niko-tar
ham DaT ke ye kahte hai.n ki haa.n ham ne kiyaa hai
insaan hai.n insaan ham ik ashraf-e-maKHluuq
tasKHiir jo ye kaun-o-makaa.n ham ne kiyaa hai
jis darja pa.e-'aalam-e-baalaa hai zaruurii
'in'aam' vo saamaan kahaa.n ham ne kiyaa hai

Inam Thanvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now