Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "prayatn"

Nazm MATCHES FOR "prayatn"

Nazm

samundar ki kuchh bundon se baat ki

buu.nde.n din-raat prayatn kartii hai.n
ek buu.nd duusre ko aage Dhakel kar
samundar kaa vajuud qaa.em rakhtii hai.n
un ko ehsaas hai apne hone kaa
lekin
samundar har baar is baat ko bhuul jaataa hai

Kamal Upadhyay
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

shor-e-barbat-o-nai

hastii kii mataa-e-be-paayaa.n jaagiir tirii hai na merii hai
is bazm me.n apnii mish.al-e-dil bismil hai to kyaa raKHshaa.n hai to kyaa
ye bazm charaaGaa.n rahtii hai ik taaq agar viiraa.n hai to kyaa
afsurda hai.n gar ayyaam tire badlaa nahii.n maslak-e-shaam-o-sahar
Thahre nahii.n mausam-e-gul ke qadam qaa.em hai jamaal-e-shams-o-qamar
aabaad hai vaadii-e-kaakul-o-lab shaadaab-o-hasii.n gulgasht-e-nazar
maqsuum hai lazzat-e-dard-e-jigar maujuud hai nemat-e-diida-e-tar
is diida-e-tar kaa shukr karo is zauq-e-nazar kaa shukr karo
is shaam o sahar kaa shukr karo in shams o qamar kaa shukr karo

Faiz Ahmad Faiz
Nazm

saba viran

sulaimaa.n sar-ba-zaanuu aur sabaa viiraa.n
sabaa viiraa.n, sabaa aaseb kaa maskan
sabaa aalaam kaa ambaar-e-be-paayaa.n!
gayaah o sabza o gul se jahaa.n KHaalii
havaa.e.n tishna-e-baaraa.n,
tuyuur is dasht ke minqaar-e-zer-e-par
tuu surma var guluu insaa.n
sulaimaa.n sar-ba-zaanuu aur sabaa viiraa.n!
sulaimaa.n sar-ba-zaanuu tursh-ruu Gam-gii.n, pareshaa.n-muu
jahaa.n-girii, jahaa.n-baanii faqat tarraara-e-aahuu
mohabbat shola-e-paraa.n havas buu-e-gul be-buu
za-raaz-e-dahr kam-tar-go!
sabaa viiraa.n ke ab tak is zamii.n par hai.n
kisii ayyaar ke Gaarat-garo.n ke naqsh-e-paa baaqii
sabaa baaqii, na mahru-e-sabaa baaqii!
sulaimaa.n sar-ba-zaanuu
ab kahaa.n se qaasid-e-farKHanda-pai aa.e?
kahaa.n se, kis subuu se kaasa-e-piirii me.n mai aa.e?

Noon Meem Rashid
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

fabe-ayye aalaye rabbikuma tukazziban

kavve bhii anDe khaane ke shauq ko apne
faaKHta ke ghar jaa kar puuraa karte hai.n
lekin ye vo saa.np hai.n jo ki
apne bachche
KHud hii chaT kar jaate hai.n
kabhii kabhii mai.n sochtii huu.n ki
saa.npo.n kii ye KHaslat
maalik-e-ji.nn-o-ins kii, insaano.n ke haq me.n
kaisii be-paayaa.n rahmat hai!

Parveen Shakir
Nazm

jagir

in kii mehnat bhii mirii haasil-e-mehnat bhii miraa
in ke baazuu bhii mire quvvat-e-baazuu bhii mirii
mai.n KHudaavand huu.n us vus.at-e-be-paayaa.n kaa
mauj-e-aariz bhii mirii nik.hat-e-gesuu bhii mirii

Sahir Ludhianvi
Nazm

tulu-e-ishtirakiyat

raaj-mahal ke darbaano.n se ye sarkash tuufaa.n na rukegaa
chand kiraa.e ke tinko.n se sail-e-be-paayaa.n na rukegaa

Sahir Ludhianvi
Nazm

mrs-sala-manka

KHudaa hashr me.n ho madad-gaar meraa
ki dekhaa hai mai.n ne
mrs.-saalaa-ma.nkaa ko bistar me.n shab bhar barahana
vo gardan vo baahe.n vo raane.n vo pistaa.n
ki jin me.n junuubii samundar kii lahro.n ke tuufaa.n
shumaalii daraKHto.n ke baaGo.n ke phuulo.n kii KHushbuu
jahaa.n dam-ba-dam itr o tuufaa.n baham aur gurezaa.n
mrs.-saalaa-ma.nikaa kaa jism-e-barhana
ufuq-taa-ufuq jaise anguur kii bel jis kii
Gizaa aasmaano.n kaa nuur aur haasil
vo lazzat ki jis kaa nahii.n ko.ii paayaa.n
KHudaa ke sivaa kaun hai paak-daamaa.n!

Noon Meem Rashid
Nazm

dil mere sahra-naward-e-pir dil

naGma-dar-jaa.n raqs barpaa KHanda-bar-lab
dil tamannaa.o.n ke be-paayaa.n alaav ke qariib
dil mire sahraa-navard-e-piir dil
reg ke dil-shaad shahrii reg tuu
aur reg hii terii talab
reg kii nik.hat tire paikar me.n terii jaa.n me.n hai
reg sub.h-e-iid ke maanind zartaab-o-jaliil
reg sadiyo.n kaa jamaal
jashn-e-aadam par bichha.D kar milne vaalo.n kaa visaal
shauq ke lamhaat ke maanind aazaad-o-aziim
reg naGma-zan
ki zarre reg-zaaro.n kii vo paazeb-e-qadiim
jis pe pa.D saktaa nahii.n dast-e-la.iim
reg-e-sahraa zar-garii kii ek kii lahro.n se duur
chashma-e-makr-o-riyaa shahro.n se duur
reg shab-bedaar hai suntii hai har jaabir kii chaap
reg shab-bedaar hai nigaraa.n hai maanind-e-naqiib
dekhtii hai saaya-e-aamir kii chaap
reg har ayyaar Gaarat-gar kii maut
reg istibdaad ke tuGyaa.n ke shor-o-shar kii maut
reg jab uThtii hai u.D jaatii hai har faateh kii nii.nd
reg ke nezo.n se zaKHmii sab shahanshaaho.n ke KHvaab
reg ai sahraa kii reg
mujh ko apne jaagte zarro.n ke KHvaabo.n kii
na.ii ta.abiir de
reg ke zarro.n ubhartii sub.h tum
aa.o sahraa kii hado.n tak aa gayaa roz-e-tarab
dil mire sahraa-navard-e-piir dil
aa chuum reg
hai KHayaalo.n ke parii-zaado.n se bhii ma.asuum reg
reg-e-raqsaa.n maah-o-saal nuur tak raqsaa.n rahe
us kaa abresham mulaa.em narm-KHuu KHandaa.n rahe
dil mire sahraa-navard-e-piir dil
ye tamannaa.o.n kaa be-paayaa.n alaav
raah gum kar duu.n kii mash.al is ke lab par aa.o aa.o
tere maazii ke KHazaf rezo.n se jaagii hai ye aag
aag kii qurmuz zabaa.n par imbisaat-e-nau ke raag
dil mire sahraa-navard-e-piir dil
sargiraanii kii shab-e-rafta se jaag
kuchh sharar aaGosh sarsar me.n hai.n gum
aur kuchh ziina ba ziina sho.alo.n ke miinaar par cha.Dhte hu.e
aur kuchh tah me.n alaav kii abhii
muztarib lekin muzabzab tifl-e-kam-sin kii tarah
aag ziina aag ra.ngo.n kaa KHaziina
aag un lazzaat kaa sar-chashma hai
jis se letaa hai Gizaa ushshaaq ke dil kaa tapaak
chob-e-KHushk anguur us kii mai hai aag
sarsaraatii hai rago.n me.n iid ke din kii tarah
aag kaahin yaad se utrii hu.ii sadiyo.n kii ye afsaana-KHvaa.n
aane vaale qarnahaa kii daastaane.n lab pe hai.n
dil miraa sahraa-navard-e-piir dil sun kar javaa.n
aag aazaadii kaa dil-shaadii kaa naam
aag paidaa.ish kaa afzaa.ish kaa naam
aag ke phuulo.n me.n nasrii.n yaasman sumbul shafiiq-o-nastaran
aag aaraa.ish kaa zebaa.ish kaa naam
aag vo taqdiis dhul jaate hai.n jis se sab gunaah
aag insaano.n kii pahlii saa.ns ke maanind ik aisaa karam
umr kaa ik tuul bhii jis kaa nahii.n kaafii javaab
ye tamannaa.o.n kaa be-paayaa.n alaav gar na ho
is laq-o-daq me.n nikal aa.e.n kahii.n se bhe.Diye
is alaav ko sadaa raushan rakho
reg-e-sahraa ko bashaarat ho ki zinda hai alaav
bhe.Diyo.n kii chaap tak aatii nahii.n
aag se sahraa kaa rishta hai qadiim
aag se sahraa ke Te.Dhe re.ngne vaale
girah-aaluud zholiida daraKHt
jaagte hai.n naGma-dar-jaa.n raqs barpaa KHanda-bar-lab
aur manaa lete hai.n tanhaa.ii me.n jashn-e-maahtaab
un kii shaaKHe.n Gair-mara.ii tabl kii aavaaz par detii hai.n taal
biikH-o-bun se aane lagtii hai KHudaavandii jalaajil kii sadaa
aag se sahraa kaa rishta hai qadiim
rahravo.n sahraa-navardo.n ke liye hai rahnumaa
kaarvaano.n kaa sahaaraa bhii hai aag
aur sahraa.o.n kii tanhaa.ii ko kam kartii hai aag
aag ke chaaro.n taraf pashmiina-o-dastaar me.n lipTe hu.e
afsaana-go
jaise gird-e-chashm mizhgaa.n kaa hujuum
un ke hairat-naak dilkash tajrabo.n se
jab damak uThtii hai ret
zarra zarra bajne lagtaa hai misaal-e-saaz-e-jaa.n
gosh-bar-aavaaz rahte hai.n daraKHt
aur ha.ns dete hai.n apnii aarifaana be-niyaazii se kabhii
ye tamannaa.o.n kaa be-paayaa.n alaav gar na ho
reg apnii KHalvat-e-be-nuur-o-KHud-bii.n me.n rahe
apnii yaktaa.ii kii tahsii.n me.n rahe
is alaav ko sadaa raushan rakho
ye tamannaa.o.n kaa be-paayaa.n alaav gar na ho
asia africa pahnaa.ii kaa naam
be-kaar pahnaa.ii kaa naam
europe aur america daaraa.ii kaa naam
takraar-e-daaraa.ii kaa naam
meraa dil sahraa-navard-e-piir dil
jaag uThaa hai mashriq-o-maGrib kii aisii yak-dilii
ke kaarvaano.n kaa nayaa ruuyaa liye
yak-dilii aisii ki hogii fahm-e-insaa.n se varaa
yak-dilii aisii ki ham sab kah uThe.n
is qadar ujlat na kar
izhdihaam-e-gul na ban
kah uThe.n ham
tuu Gam-e-kul to na thii
ab lazzat-e-kul bhii na ban
roz-e-aasaa.ish kii bedardii na ban
yak-dilii ban aisaa sannaaTaa na ban
jis me.n taabistaa.n kii dopahro.n kii
be-haasil kasaalat ke sivaa kuchh bhii na ho
is jafaa-gar yak-dilii ke kaarvaa.n yuu.n aa.e.nge
dast-e-jaaduu-gar se jaise phuuT nikle ho.n tilism
ishq-e-haasil-KHez se yaa zor-e-paidaa.ii se jaise naa-gahaa.n
khul ga.e ho.n mashriq-o-maGrib ke jism
jism sadiyo.n ke aqiim
kaarvaa.n farKHanda-pai aur un kaa baar
kiisa kiisa taKHt-e-jam aur taaj-e-kai
kuuza kuuza fard kii satvat kii mai
jaama jaama roz-o-shab mehnat kaa KHai
naGma naGma hurriyat kii garm lai
saaliko firoz-baKHto aane vaale qaaflo
shahr se lauToge tum to paa.oge
ret ke sarhad pe jo ruuh-e-abad KHvaabiida thii
jaag uThii hai shikva-haa-e-nai se vo
ret kii tah me.n jo sharmiilii sahar ro.iida thii
jaag uThii hai hurriyat kii lai se vo
itnii doshiiza thii itnii mard-e-naa-diida thii sub.h
puuchh sakte the na us kii umr ham
dard se ha.nstii na thii
zarro.n kii ra.anaa.ii pe bhii ha.nstii na thii
ek mahjuubaana be-KHabarii me.n ha.ns detii thii sub.h
ab manaatii hai vo sahraa kaa jalaal
jaise izz-o-jal ke paa.nv kii yahii mehraab ho
zer-e-mehraab aa ga.ii ho us ko bedaarii kii raat
KHud janaab-e-izz-o-jal se jaise umiid-e-zafaaf
saare naa-karda gunaah is ke mu.aaf
sub.h-e-sahraa shaad-baad
ai uruus-e-izz-o-jal farKHanda ro taabinda kho
tuu ik aise hujra-e-shab se nikal kar aa.ii hai
dast-e-qaatil ne bahaayaa thaa jahaa.n har sej par
sai.nka.Do.n taaro.n kaa raKHshanda lahuu phuulo.n ke paas
sub.h-e-sahraa sar mire zaanuu pe rakh kar daastaa.n
un tamannaa ke shahiido.n kii na kah
un kii niima-ras uma.ngo.n aarzuu.o.n kii na kah
jin se milne kaa ko.ii imkaa.n nahii.n
shahd teraa jin ko nashsh-e-jaa.n nahii.n
aaj bhii kuchh duur is sahraa ke paar
dev kii diivaar ke niiche nasiim
roz-o-shab chaltii hai mub.ham KHauf se sahmii hu.ii
jis tarah shahro.n kii raaho.n par yatiim
naGma-bar-lab taaki un kii jaa.n kaa sannaaTaa ho duur
aaj bhii is reg ke zarro.n me.n hai.n
aise zarre aap hii apne Ganiim
aaj bhii is aag ke sho.alo.n me.n hai.n
vo sharar jo us kii tah me.n par-buriida rah ga.e
misl-e-harf naa-shuniida rah ga.e
sub.h-e-sahraa ai uruus-e-izz-o-jal
aa ki un kii daastaa.n dohraa.e.n ham
un kii izzat un kii azmat gaa.e.n ham
sub.h ret aur aag ham sab kaa jalaal
yak-dilii ke kaarvaa.n un kaa jamaal
aa.o
is tahliil ke halqe me.n ham mil jaa.e.n
aa.o
shaad-baaG apnii tamannaa.o.n kaa be-paayaa.n alaav

Noon Meem Rashid
Nazm

qayamat

ye maanaa raat aa.nkho.n me.n kaTii
ek ek pal but saa ban kar jam gayaa
ik saa.ns to ik sadii ke baad phir se saa.ns lene kaa KHayaal aayaa
ye sab sach hai ki raat ik karb-e-be-paayaa.n thii
lekin karb hii taKHliiq hai
ai pau phaTe ke dilrubaa lamho gavaahii do

Ahmad Nadeem Qasmi
Nazm

hum KHud bhi apne sath nahin

is shab-dar-shab taariikii me.n
jo raat bhii hai vo raat nahii.n
is haarne vaalii baazii me.n
jo maat bhii hai vo maat nahii.n
kuchh qismat kii saffaakii nahii.n
kuchh suud-o-ziyaa.n kaa haath nahii.n
bas ek hii dukh be-paayaa.n hai
ham KHud bhii apne saath nahii.n

Pirzada Qasim
Nazm

janm-din

mai.n puraanaa saa ko.ii insaan huu.n, mahsuus ye hotaa hai mujh ko
mai.n ne har saavan me.n dhoyaa hai badan ko
aur ye dhartii mujhe roz-e-azal se jaantii hai
yaad hai vo din mujhe achchhii tarah se
khaulte chi.nghaa.Dte laave ke be-paayaa.n samundar se uchhal kar
ham ikaTThe hii gire the

Kumar Pashi
Nazm

ek aur shahr

KHud-fahmii kaa armaa.n hai taariikii me.n ruu-posh
taariikii KHud be-chashm-o-gosh!
ik be-paayaa.n ujlat raaho.n kii alvand!

Noon Meem Rashid
Nazm

ek din manaya jaana chahiye

ek din manaayaa jaanaa chaahiye
meraa bhii
saa.ns kii be-aavaaz lahro.n par
tairtii zindagii ke saath
be-nishaan saahilo.n par
bikhrii siipiyo.n ke hamraah
sard mausamo.n me.n
kuuch kar jaane vaale parindo.n ke sa.ng
anjaan sar-zamiino.n par
kisii an-dekhe rang ke
phuul kii pattiyo.n se phuuTtii
pur-asraar KHushbuu ke baazuu.o.n me.n
tum manaate ho mother day
aur hisaar me.n rahte ho
maamtaa ke nuur ke
tum manaate ho father day
aur ghane daraKHto.n kii chhaa.nv
mahsuus karte ho
tum manaate ho valentine day
aur apnii mahbuuba ke saamne
suraKH-ruu Thaharte ho
tumhaaraa dil tavaaf kartaa rahtaa hai
be-paayaa.n mohabbato.n kaa
aur tum mohabbat kaa har din manaate ho
dukaane.n saj jaatii hai.n
ra.ng-bira.nge phuulo.n se
chokleT aur cake kii miThaas se
qiimate.n muKHtalif sahii
magar iz.haar kii sakat
tumhaarii quvvat-e-KHariid me.n rahtii hai
mai.n tumhaare baap kii mohabbat kaa
har ra.ng
har zaa.iqa jaantii huu.n
ek din manaayaa jaanaa chaahiye
meraa bhii
mujhe ma.aluum hai
tum ye din manaa sakte ho
magar ye din
saare dino.n me.n saraayat kar gayaa hai
tum use nahii.n Dhuu.nD sakte
ko.ii ek din muKHtas bhii kar do
to us kaa unvaan
tumhaare iz.haar kii sakat se baahar hai

Arifa Shahzad
Nazm

kitna mushkil hai

bujhii hu.ii raakh ke Dher me.n
tasalliyaa.n mu.nh bisore hu.e pa.Dii hai.n
amaltaas kii suukhii shaaKHo.n par
Ta.nge hu.e hai.n sabr ke chiith.De
purzo.n me.n badal chuke hai.n
aarzuu.o.n ke be-paayaa.n tasalsul
Dhaa chuke hai.n
andar hii andar shiir-KHaar ummiido.n ke Tiile
jinhe.n dekh kar
tumhe.n yaad aa.egaa
rishto.n ke bharam kitne saffaak hote hai.n
kitne pur-zor hote hai.n vaaste
jo TuuTte hai.n
to un me.n se ek chiiKH bhii baraamad nahii.n hotii
saaraa jahaan hii TuuT, bikhar jaataa hai
gardish karte hu.e KHuun me.n
barf kii kiile.n ga.D jaatii hai.n
jaise saaraa jism hii aa gayaa ho
kisii sarkash aa.ndhii kii zad me.n
aur ek ek kar ke
haDDiyo.n ke saare jo.D hii khulte jaa rahe ho.n
bikharte jaa rahe ho.n saare masaam
girte jaa rahe ho.n
ham un chauha.Do.n par
jahaa.n sirf KHvaabo.n ke biij bo.e jaate hai.n
aur fasl ke naam par
haafize ke azaab numuu paate hai.n
jaise ham ek aziim hijr kii paidaavaar hai.n
umre.n dukho.n ke hisaab se taviil
dukh dushman kii bedaar nigaaho.n se ziyaada zinda
apne kaa.ndho.n par
apnii saa.nso.n ke KHamiyaaze hai.n
aur mai.n
apnii hii niindo.n me.n dau.Dte dau.Dte thak gayaa huu.n

Ateequllah
Nazm

shikast-e-rang

mujhe maGluub karne ko
mire jazbaat ke andoKHta hiilo.n ko uksaa kar vo kahte hai.n
tirii aa.nkho.n tirii baa.nho.n me.n
jannat ke shaguufo.n kii mahak
aasaa.isho.n kii lazzato.n kaa lams rachtaa hai
magar ab KHvaahishe.n paa.nv paka.Dtii hai.n
na.e KHvaabo.n ke jaalo.n me.n ulajhte saa.ns kahte hai.n
kabhii to phaile haatho.n ke tamavvuj me.n simaT jaane kii tarGiib-o-ishaarat ko
guzartii saa.ato.n se maavaraa aise zamaano.n kii
fazaa samjho
jahaa.n saa.e simaT kar ek huu.n
tasliim-e-jaa.n tak kii humak jaage
kabhii Thahro
kabhii ba.Dhtii hu.ii maujo.n se ham-aaGosh hotii
tez lahro.n kii fazaa hone me.n
yak-jaanii kii pinhaa.n sarKHushii dekho
kabhii us jabr-e-be-andaaz ke phande se niklo
aur racho us me.n ki vo KHud tum me.n rachne ke liye betaab daa.im hai
rachaa.o haath me.n is tarah meh.ndii
log kah uThii.n
use chaahat kii be-paayaa.n tapish kii hiddate.n gulzaar kartii hai.n
rachaa.o haath me.n is tarah meh.ndii
ye tapaa.n na.ngii hathelii apnaa paikar
surKHiyo.n se Dhaa.np le aise
ki dil ke tishnagii aasaar jazbe bhii
tazabzub ke dhu.ndlako.n se nikal kar
roz-o-shab kii naGmagii ko jazb karne par huu.n aamaada
magar ra.ngo.n ko aaKHir
jabr-e-be-ra.ngii kaa KHamyaaza muqaddar hai
agar yuu.n apne haatho.n se lagaa.ii meh.ndiyo.n ke rang u.D jaa.e.n
to hasrat-zada aa.nkhe.n kise chaahe.n
kise paaband-e-dar samjhe.n
kise Dhuu.nDe.n

Kishwar Naheed
Nazm

shab-o-roz tamasha

zehn jab tak hai
KHayaalaat kii zanjiir kahaa.n kaTtii hai
ho.nT jab tak hai.n
savaalaat kii zanjiir kahaa.n kaTtii hai
bahs karte raho likhte raho nazme.n Gazle.n
zehn par sadiyo.n se taarii hai jo majlis kii fazaa
is KHunuk aa.nch se kyaa pighlegii
soch lene hii se haalaat kii zanjiir kahaa.n kaTtii hai
nii.nd me.n Duubii hu.ii aa.nkho.n se vaabasta KHvaab
tez kirno.n kii sinaano.n pe hii rusvaa sar-e-aam
ye shahiid apnii saliibo.n se palaT aate hai.n dil me.n har shaam
sub.h hotii hai magar raat kii zanjiir kahaa.n kaTtii hai
din guzar jaataa hai be-faiz kad-o-kaavish me.n
ek an-dekhe jahannam kii tab-o-taabish me.n
jism aur jaa.n kii tag-o-taaz kii har pursish me.n
dard-o-Gam hasrat-o-mahruumii kii har kaahish me.n
talab-o-tark-e-talab silsila-e-be-paayaa.n
marg hii ziist kaa unvaan hai har KHuun-shuda KHvaahish me.n
Gam se bhaage.n bhii to faryaad-o-shikaayaat kii zanjiir kahaa.n kaTtii hai
vaqt vo daulat-e-naayaab hai aataa nahii.n haath
ham mashiino.n kii tarah jiite hai.n paabandi-e-auqaat ke saath
vaqt be-kaar guzartaa hii chalaa jaataa hai
kursiyo.n mezo.n se be-ma.anii mulaaqaato.n me.n
sai.nka.Do.n baar kii aglii hu.ii dohraa.ii hu.ii baato.n me.n
mandgii rahne kii tamannaa kii mudaaraato.n me.n
shikam-o-jaa.n kii ibaadaat kii zanjiir kahaa.n kaTtii hai
sub.h se shaam talak itne KHudaa milte hai.n har kaafir ko
sajda-e-shukr se inkaar kii mohlat nahii.n milne paatii
sai.nka.Do.n laakho.n KHudaa.o.n kii nazar se chhup kar
KHud se mil lene kii ruKHsat nahii.n milne paatii
KHud-parasto.n se bhii taa.aat kii zanjiir kahaa.n kaTtii hai
raat aatii hai to dil kahtaa hai ham apne hai.n
KHalvat-e-KHvaab me.n duniyaa se kinaaraa kar le.n
kal bhii denaa hai lahuu apnaa dil-o-diida kii jholii bhar le.n
jism ke shor se aur ruuh kii fariyaad se dam ghuTtaa hai
din ke be-kaar KHayaalaat kii zanjiir kahaa.n kaTtii hai
be-niyaazaana bhii jiinaa hai faqat ek gumaa.n
fikr-e-maujuud ko chho.De.n to Gam-e-naa-maujuud
saath har saa.ns ke hai silsila-e-hast-o-buud
Gam-e-aafaaq ko Thukraa.e.n kare.n tark-e-jahaa.n
phir bhii ye fikr ki jiine kaa ho ko.ii unvaa.n
be-niyaazii se Gam-e-zaat kii zanjiir kahaa.n kaTtii hai
zehn me.n andhe aqiido.n kii siyaahii bhar lo
taaki is nagrii me.n
kabhii afkaar ke sho.alo.n kaa guzar ho na sake
jabr kaa hukm suno
ho.nTo.n ko apne sii lo
taaki un raaho.n se
kabhii lafzo.n kaa safar ho na sake
zehn-o-lab phir bhii nahii.n chup hote
un ke KHaamosh savaalaat kii
pech-dar-pech KHayaalaat kii
zanjiir kahaa.n kaTtii hai

Waheed Akhtar
Nazm

dhund

aa.nkhe.n yuu.n markuuz hu.ii hai.n jaise mai.n hii mai.n huu.n aur nahii.n hai ko.ii
sachchii baat magar hai itnii
mai.n murdaar samundar huu.n
ehsaas ziyaa.n kaa jho.nkaa hai
aa.nkhe.n bol nahii.n saktii hai.n
aur badan biinaa.ii se mahruum hu.aa hai
lekin mai.n to ab tak KHvaab-zada tasviire.n dekh rahaa huu.n
aur samundar ke parbat par Thahraa ja.ngal
biite giito.n se pur ja.ngal
azalii KHaamoshii ke haale me.n thar-thar kaa.np rahaa hai
sadiyaa.n saaye shoKH fasiile.n aamannaa saddaqnaa
ai-lo! suuraj chaa.nd sitaare dhartii ke siine par utre
merii raahguzar par bikhre
halkii maddham aur musalsal harkat
manzil phuul ka.nval kaa phuul adam ke bahr-e-be-paayaa.n me.n
tanhaa jhuule
baahar par markuuz nigaaho.n se maKHfii lafz-e-mutlaq
tanhaa aur udaas ka.nval par jhilmil jhilmil phuuT bahaa
mauhuum ridaa-e-koh-o-dasht-o-daman
duniyaa-e-man-o-tuu par chhaa.ii
phiikii phiikii ho kar phail ga.ii dhuul banii
apnaa gaa.nv, gorii ke paa.nv tak dhundlaa.e
phailii raushan aur niraalii dhund, aur dhund aur dhund

Iftikhar Jalib
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now