Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "puu.njii"

Nazm MATCHES FOR "puu.njii"

Nazm

daraKHt-e-zard

magar aaha.ng meraa kho gayaa shaayad kahaa.n jaane
ko.ii mauj-e-... ko.ii mauj-e-shumaal-e-jaavedaa.n jaane
shumaal-e-jaavedaa.n ke apne hii qisse the jo guzre
vo ho guzre to phir KHud mai.n ne bhii jaanaa vo ho guzre
shumaal-e-jaavedaa.n apnaa shumaal-e-jaavedaan-e-jaa.n
hai ab bhii apnii puu.njii ik malaal-e-jaavedaan-e-jaa.n

Jaun Eliya
Nazm

banjara-nama

kuchh kaam na aavegaa tere ye laal-o-zamurrad siim-o-zar
jab puu.njii baaT me.n bikhregii har aan banegii jaan uupar
naubat naqqaare baan nishaan daulat hashmat fauje.n lashkar
kyaa masnad takiya mulk makaa.n kyaa chaukii kursii taKHt chhatar
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

tere KHushbu mein base KHat

pyaar kii aaKHirii puu.njii bhii luTaa aayaa huu.n
apnii hastii ko bhii lagtaa hai miTaa aayaa huu.n
umr-bhar kii jo kamaa.ii thii ga.nvaa aayaa huu.n
tere KHat aaj mai.n ga.ngaa me.n bahaa aayaa huu.n
aag bahte hu.e paanii me.n lagaa aayaa huu.n

Rajendra Nath Rahbar
Nazm

raaten sachchi hain din jhuTe hain

tez nazar naa-biinaa.o.n kii aabaadii me.n
kyaa mai.n apne dhyaan kii ye puu.njii bhii ginvaa duu.n

Jaun Eliya
Nazm

hubb-e-watan

baiThe be-fikr kyaa ho ham-vatano
uTho ahl-e-vatan ke dost bano
mard ho tum kisii ke kaam aa.o
varna khaa.o piyo chale jaa.o
jab ko.ii zindagii kaa lutf uThaa.o
dil ko dukh bhaa.iyo.n ke yaad dilaa.o
pahno jab ko.ii umda tum poshaak
karo daaman se taa garebaa.n chaak
khaanaa khaa.o to jii me.n tum sharmaa.o
ThanDaa paanii piyo to ashk bahaa.o
kitne bhaa.ii tumhaare hai.n naadaar
zindagii se hai jin kaa dil bezaar
naukaro.n kii tumhaare jo hai Gizaa
un ko vo KHvaab me.n nahii.n miltaa
jis pe tum juutiyo.n se phirte ho
vaa.n mayassar nahii.n vo o.Dhne ko
khaa.o to pahle lo KHabar un kii
jin pe biptaa hai niistii kii pa.Dii
pahno to pahle bhaa.iyo.n ko pahnaa.o
ki hai utran tumhaarii jin kaa banaav
ek Daalii ke sab hai.n barg-o-samar
hai ko.ii un me.n KHushk aur ko.ii tar
sab ko hai ek asl se paivand
ko.ii aazurda hai ko.ii KHursand
muqbilo mudabbiro.n ko yaad karo
KHush-dilo Gam-zado.n ko shaad karo
jaagne vaale Gaafilo.n ko jagaa.o
tairne vaalo Duubto.n ko tiraa.o
hai.n mile tum ko chashm o gosh agar
lo jo lii jaa.e kor-o-kar kii KHabar
tum agar haath paa.nv rakhte ho
la.ng.De luulo.n ko kuchh sahaaraa do
tandurustii kaa shukr kiyaa hai bataa.o
ra.nj biimaar bhaa.iyo.n kaa haTaa.o
tum agar chaahte ho mulk kii KHair
na kisii ham-vatan ko samjho Gair
ho musalmaan us me.n yaa hinduu
bodh maz.hab ho yaa ki ho brahamuu
ja.afrii hove yaa ki ho hanafii
jiin-mat hove yaa ho vaishnavii
sab ko miiThii nigaah se dekho
samjho aa.nkho.n kii putliyaa.n sab ko
mulk hai.n ittifaaq se aazaad
shahr hai.n ittifaaq se aabaad
hind me.n ittifaaq hotaa agar
khaate Gairo.n kii Thokare.n kyuu.nkar
qaum jab ittifaaq kho baiThii
apnii puu.njii se haat dho baiThii
ek kaa ek ho gayaa bad-KHvaah
lagii Gairo.n kii pa.Dne tum pe nigaah
phir ga.e bhaa.iyo.n se jab bhaa.ii
jo na aanii thii vo balaa aa.ii
paa.nv iqbaal ke ukha.Dne lage
mulk par sab ke haath pa.Dne lage
kabhii tuuraaniyo.n ne ghar luuTaa
kabhii durraaniyo.n ne zar luuTaa
kabhii naadir ne qatl-e-aam kiyaa
kabhii mahmuud ne Gulaam kiyaa
sab se aaKHir ko le ga.ii baazii
ek shaa.ista qaum maGrib kii
ye bhii tum par KHudaa kaa thaa in.aam
ki pa.Daa tum ko aisii qaum se kaam
varna dum maarne na paate tum
pa.Dtii jo sar pe vo uThaate tum
mulk rau.nde ga.e hai.n pairo.n se
chain kis ko milaa hai Gairo.n se

Altaf Hussain Hali
Nazm

sham-e-ayaadat

(3)
na.e zamaane me.n agar udaas KHud ko paa.uu.ngaa
ye shaam yaad kar ke apne Gam ko bhuul jaa.uu.ngaa
ayaadat-e-habiib se vo aaj zindagii milii
KHushii bhii chau.nk chauk uThii Gam kii aa.nkh khul ga.ii
agarche doctor ne mujh ko maut se bachaa liyaa
par is ke baa'd us nigaah ne mujhe jilaa liyaa
nigaah-e-yaar tujh se apnii manzile.n mai.n paa.uu.ngaa
tujhe jo bhuul jaa.uu.ngaa to raah bhuul jaa.uu.ngaa
(4)
qariib-tar mai.n ho chalaa huu.n dukh kii kaa.enaat se
mai.n ajnabii nahii.n rahaa hayaat se mamaat se
vo dukh sahe ki mujh pe khul gayaa hai dard-e-kaa.enaat
hai apne aa.nsu.o.n se mujh pe aa.iina Gam-e-hayaat
ye be-qusuur jaan-daar dard jhelte hu.e
ye KHaak-o-KHuu.n ke putle apnii jaa.n pe khelte hu.e
vo ziist kii karaah jis se be-qaraar hai fazaa
vo zindagii kii aah jis se kaa.np uThtii hai fazaa
kafan hai aa.nsu.o.n kaa dukh kii maarii kaa.enaat par
hayaat kyaa inhe.n haqiiqato.n se honaa be-KHabar
jo aa.nkh jaagtii rahii hai aadmii kii maut par
vo abr-e-ra.ng-ra.ng ko bhii dekhtii hai saada-tar
sikhaa gayaa dukh miraa puraanii piir jaan.naa
nigaah-e-yaar thii jahaa.n bhii aaj merii rahnumaa
yahii nahii.n ki mujh ko aaj zindagii na.ii milii
haqiiqat-e-hayaat mujh pe sau tarah se khul ga.ii
gavaah hai ye shaam aur nigaah-e-yaar hai gavaah
KHayaal-e-maut ko mai.n apne dil me.n ab na duu.ngaa raah
jiyuu.ngaa haa.n jiyuu.ngaa ai nigaah-e-aashnaa-e-yaar
sadaa suhaag zindagii hai aur jahaa.n sadaa-bahaar
(5)
abhii to kitne naa-shuniida naGma-e-hayaat hai.n
abhii nihaa.n dilo.n se kitne raaz-e-kaa.enaat hai.n
abhii to zindagii ke naa-chashiida ras hai.n saik.Do.n
abhii to haath me.n ham ahl-e-Gam ke jas hai.n saik.Do.n
abhii vo le rahii hai.n merii shaa.erii me.n karvaTe.n
abhii chamakne vaalii hai chhupii hu.ii haqiiqate.n
abhii to bahr-o-bar pe so rahii hai.n merii vo sadaa.e.n
sameT luu.n unhe.n to phir vo kaa.enaat ko jagaa.e.n
abhii to ruuh ban ke zarre zarre me.n samaa.uu.ngaa
abhii to sub.h ban ke mai.n ufuq pe thartharaa.uu.ngaa
abhii to merii shaa.erii haqiiqate.n luuTaa.egii
abhii mirii sadaa-e-dard ik jahaa.n pe chhaa.egii
abhii to aadmii asiir-e-daam hai Gulaam hai
abhii to zindagii sad-inqalaab kaa payaam hai
abhii tamaam zaKHm o daaG hai tamaddun-e-jahaa.n
abhii ruKH-e-bashar pe hai.n bahmiyat kii jhaa.iyaa.n
abhii mashiyyato.n pe fat.h paa nahii.n sakaa bashar
abhii muqaddaro.n ko bas me.n laa nahii.n sakaa bashar
abhii to is dukhii jahaa.n me.n maut hii kaa daur hai
abhii to jis ko zindagii kahe.n vo chiiz aur hai
abhii to KHuun thoktii hai zindagii bahaar me.n
abhii to rone kii sadaa hai naGma-e-sitaar me.n
abhii to u.Dtii hai.n ruKH-e-bahaar par havaa.iyaa.n
abhii to diidanii hai.n har chaman kii be-fazaa.iyaa.n
abhii fazaa-e-dahr legii karvaTo.n pe karvaTe.n
abhii to sotii hai.n havaa.o.n kii vo sansanaahaTe.n
ki jis ko sunte hii hukuumato.n ke ra.ng-e-ruKH u.De.n
chapeTe.n jin kii sarkasho.n kii gardane.n maro.D de.n
abhii to siina-e-bashar me.n sote hai.n vo zalzale
ki jin ke jaagte hii maut kaa bhii dil dahal uThe
abhii to batn-e-Gaib me.n hai is savaal kaa javaab
KHudaa-e-KHair-o-shar bhii laa nahii.n sakaa thaa jis kii taab
abhii to god me.n hai.n devtaa.o.n kii vo maah-o-saal
jo de.nge ba.Dh ke barq-e-tuur se hayaat ko jalaal
abhii rag-e-jahaa.n me.n zindagii machalne vaalii hai
abhii hayaat kii na.ii sharaab Dhalne vaalii hai
abhii chhurii sitam kii Duub kar uchhalne vaalii hai
abhii to hasrat ik jahaan kii nikalne vaalii hai
abhii ghan-garaj sunaa.ii degii inqalaab kii
abhii to gosh-bar-sadaa hai bazm aaftaab kii
abhii to puu.njii-vaad ko jahaan se miTaanaa hai
abhii to saamraajo.n ko sazaa-e-maut paanaa hai
abhii to daa.nt piistii hai maut shahryaaro.n kii
abhii to KHuu.n utar rahaa hai aa.ankho.n me.n sitaaro.n kii
abhii to ishtiraakiyat ke jhanDe ga.Dne vaale hai.n
abhii to ja.D se kisht-o-KHuu.n ke nazm ukha.Dne vaale hai.n
abhii kisaan-o-kaamgaar raaj hone vaalaa hai
abhii bahut jahaa.n me.n kaam-kaaj hone vaalaa hai
magar abhii to zindagii musiibato.n kaa naam hai
abhii to nii.nd maut kii mire liye haraam hai
ye sab payaam ik nigaah me.n vo aa.nkh de ga.ii
ba-yak-nazar kahaa.n kahaa.n mujhe vo aa.nkh le ga.ii

Firaq Gorakhpuri
Nazm

hubb-e-watan

baiThe be-fikr kyaa ho ham-vatano
uTTho ahl-e-vatan ke dost bano
tum agar chaahte ho mulk kii KHair
na kisii ham-vatan ko samjho Gair
ho.n musalmaan is me.n yaa hinduu
bodh maz.hab ho yaa ki ho brahamuu
sab ko miiThii nigaah se dekho
samjho aa.nkho.n kii putliyaa.n sab ko
mulk hai.n ittifaaq se aazaad
shahr hai.n ittifaaq se aabaad
hind me.n ittifaaq hotaa agar
khaate Gairo.n kii Thokare.n kyuu.nkar
qaum jab ittifaaq kho baiThii
apnii puu.njii se haath dho baiThii
ek kaa ek ho gayaa bad-KHvaah
lagii Gairo.n kii tum pe pa.Dne nigaah
phir ga.e bhaa.iyo.n se jab bhaa.ii
jo na aanii thii vo balaa aa.ii
paa.nv iqbaal ke ukha.Dne lage
mulk par sab ke haath pa.Dne lage
kabhii tuuraaniyo.n ne ghar luuTaa
kabhii durraaniyo.n ne zar luuTaa
kabhii naadir ne qatl-e-aam kiyaa
kabhii mahmuud ne Gulaam kiyaa
sab se aaKHir ko le ga.ii baazii
ek shaa.ista qaum maGrib kii
mulk rau.nde ga.e hai.n pairo.n se
chain kis ko milaa hii Gairo.n se

Altaf Hussain Hali
Nazm

jahan zad

hasan ye mohabbat
ki jis ko tirii soKHta baKHt gardaantii hai
amiiro.n kii baazii
to mere ta.ii.n ye amiiro.n kii baazii kahaa.n
sirf baaziigarii thii
mohabbat hamesha se muflis kaa sarmaaya-e-jaa.n rahii hai
yahii to vo puu.njii hai
jis tak amiiro.n ke haath ab bhii pahu.nche nahii.n hai.n
tujhe ye gumaa.n thaa
ki aurat
mohabbat kii baazii me.n be-jaan patte kii suurat
kisii dast-e-chaabuk kii marhuun-e-minnat
vo is khel me.n ek mohre kii suurat
ki jab jis ne chaahaa
use ek ghar se uThaa kar
kisii duusre ghar kaa maalik banaayaa
ki aurat faqat ek patthar kii muurat
ye tasviir-e-hairat yuu.nhii chup kha.Dii hai
yuu.nhii chup rahegii
magar yuu.n nahii.n hai

Ishrat Afreen
Nazm

main ajab aadmi hun

mai.n ajab aadmii huu.n
raa.egaanii ke tasalsul ne mujhe to.D diyaa
merii puu.njii mire qirtaas o qalam
kuchh kitaabe.n pa.e-taskiin-e-junuu.n
kaun taalib hai bhalaa maaya-e-be-maaya kaa
ko.ii jaagiir nahii.n
zindagii sher ke mele me.n ga.nvaa dii mai.n ne
is pe naazaa.n thaa ki har lafz mire
halqa-e-ehsaas me.n hai
is pe faaKHir thaa ki hai.n KHvaab
mire kiise me.n
mai.n ne kyaa kyaa na fan-e-sher kii aaraa.ish kii
lafz-dar-lafz mahal
harf-dar-harf KHayaal
satr-dar-satr junuu.n

Akhtar Usman
Nazm

waqt ke nam ek KHat

zindagii bahut masruuf ho ga.ii hai
apnii saarii puu.njii bech kar
mai.n ne chand lamhe ye kahne ke liye KHariide hai.n
ki jab kabhii mai.n mar gayaa
to koshish karnaa
mujhe agle janam se zaraa pahle dafnaa denaa

Zahid Imroz
Nazm

mazafat

Daakiya jab aataa hai
chaahato.n kii puu.njii me.n
ik raqam ba.Dhaataa hai
aur lauT jaataa hai

Ishrat Afreen
Nazm

tumhaare baad

mire vajuud me.n tanhaa.ii kaisii guu.njii hai
udaasiyaa.n hii tire baa'd merii puu.njii hai

Siya sachdev
Nazm

visal ki tisri samt

ma.azarat chaahtaa huu.n dost
mai.n ab intizaar nahii.n kartaa
balki KHud chal pa.Dtaa huu.n apnii taraf
ek poshiida chaap ke ta.aaqub me.n
KHud se baahar nikaltaa huu.n
aur apne hii jaise kisii hujuum kaa hissa ban kar
apne vajuud par iktifaa kartaa huu.n
apnii amiiq raushnii se nayaa janm lete hu.e
KHud kii bunat me.n bejo.D hone kii kaavish
raa.egaa.n nahii.n jaatii
suno!
samay ke bhed-bhaa.o me.n apnaa taKHmiina lagaate hu.e
zaat kii jamaa-puu.njii me.n se
mai.n tumhe.n apnii hissiyaat se mustarad nahii.n kartaa
bisaat bhar sabr aur ek muTThii visaal ke evaz
mai.n tumhe.n kashiid kartaa huu.n apne atraaf se
aur gunjaa.ish paidaa kartaa huu.n tumhaarii mezbaanii ke liye
kisii aur jihat se apne-aap me.n
lekin ma.azarat
mai.n intizaar nahii.n kar saktaa
apnii rago.n me.n bahte hu.e us dukh ke pighalne kaa
jo apne bahaav me.n merii tavajjoh bahaa le jaa saktaa hai
apne saath
mai.n tai-shuda guzargaaho.n kaa musaafir nahii.n
mujhe to har imkaan se guzar kar aanaa hai tumhaarii samt
aur haa.n...
mai.n to apnaa bhii intizaar nahii.n kartaa huu.n ab!!!

Anjum Saleemi
Nazm

jahan-zad

ai hasan-kuuzaa-gar
tuu ne jaanaa ki mai.n
jism-o-jaa.n ke ta'alluq kii raushan guzargaah se
ik jahaa.n kaa safar jhel kar
is rifaaqat kii dahliiz tak aa.ii huu.n
ai hasan kaash tuu jaan saktaa
ki is sahn-e-KHaana se dahliiz tak ke safar me.n
jahaa.n-zaad ko kyo.n zamaane lage hai.n
hasan
is safar me.n jahaa.n-zaad ko ek ik gaam par
vaqt ke taaziyaane lage hai.n
hasan
vaqt maalik bhii hai devtaa bhii
muhaafiz bhii hai aur KHvaaja-saraa bhii
ye dekhaa hai mai.n ne
ki jab bhii dariicho.n me.n taaza shaguufa khilaa hai
havaa se vo ha.ns kar zaraa saa gale bhii milaa hai
to KHvaaja-saraa kii nazar se kahaa.n bach sakaa hai
magar dekh mujh ko
ki mai.n ne yahaa.n Thiik nau saal tak
phuul kaa.Dhe hai.n KHvaabo.n ke bistar pe lekin
abhii tak ko.ii in pe soyaa nahii.n
phuul taaza shagufta aur aazurda hai.n
mai.n ne nau saal suurat-garii kii hai tere har ik lams kii
raat bhar mai.n ne aa.nkhe.n bhigo.ii hai.n kuuzo.n me.n aur sub.h-dam
halq ko tar kiyaa aa.nsu.o.n se bahut
ye masaafat
ye nau saal kii be-mahaabaa masaafat
tire dar ke aage mujhe khii.nch laa.ii
magar tuu yahaa.n chaak par apnii dhun me.n magan hai
nigaahe.n uThaa
dekh to mai.n jahaa.n-zaad terii tire saamne huu.n
magar tuu ne sach hii kahaa thaa
zamaana jahaa.n-zaad vo chaak hai
jis pe miina-o-jaam-o-subuu aur faanuus-o-gul-daa.n kii maanind
bante biga.Dte hai.n insaa.n
so ab ham jo sadiyo.n kii lambii masaafat se lauTe hai.n
tuu apne ranjuur kuuzo.n me.n juujhaa hu.aa hai
ye teraa qusuur aur na merii KHataa hai
ko.ii kuuza-gar to hamaaraa bhii hogaa
so ye us kii hikmat
ki us ne hame.n chaak par Dhaalte vaqt
lamho.n kaa pher is nazaakat se rakkhaa
ki ham apnii apnii jagah sirf shashdar kha.De the
ka.ii dast-e-chaabuk ke be-jaan putle
mire aur tire darmiyaa.n saj ga.e the
so ye us kii hikmat
magar vaqt is darja saffaak kyo.n hai
ye mashshaata-e-zindagii itnii chaalaak kyo.n hai
mire aur tire darmiyaa.n nau baras jis ne laa kar bichhaa.e
ye nau saal kis tarh mai.n ne bitaa.e
ki saahil se kashtii tak aate hu.e
jaise taKHte ke hamraah dil Dagmagaa.e
vahii nau baras
jo mire aur tire darmiyaa.n vaqt kii kirchiyaa.n hai.n
zamaana bhii kaisii 'ajab kahkashaa.n hai
ye duniyaa-e-sayyaargaa.n hai ki jis me.n
hazaaro.n kavaakib
musalsal kisii chaak par ghuumte hai.n
ye ajsaam ke gird ajsaam kaa raqs hii zindagii hai mirii jaa.n
mirii jaan tuu chaak ke saath miTTii ke rishte ko pahchaantaa thaa
hasan tuu ne miTTii ke be-jaan putlo.n se
taKHliiq ke jaa.n-gusil marhalo.n me.n
sadaa guftuguu
sau tarah guftuguu kii
zihaanat ke putle mohabbat ke KHaaliq
faqat ye bataa de
ki tere 'anaasir ke ajzaa-e-tarkiibii me.n
vaahima kaise aayaa
hasan tuu vahaa.n jho.npa.De me.n
akelaa gale mil ke royaa thaa kis se
labiib aur tuu aur mai.n
aur haqiiqat me.n ko.ii nahii.n thaa
tiraa vaahima
mere lab mere gesuu se lipTaa rahaa thaa
labiib ek saayaa
jise tuu ne rog apnii jaa.n kaa banaayaa
ye saayaa kahii.n gar haqiiqat bhii hotaa
to aaKHir ko tuu is haqiiqat se kyo.n be-KHabar thaa
ki har jism ke saath ik aaftaab aur mahtaab laazim
ye tasliis qaa.em hai qaa.em rahegii
hasan mai.n tire saamne aa.ina thii
tire hijr aur vasl kaa aa.ina
inhimaak-o-ta'alluq kii miTTii se guu.ndhe hu.e jism ko
terii aa.nkho.n kii hiddat ne chamkaayaa thaa
terii KHalvat kii hairat ne vo rang-o-roGan kiye the
ki aa.iine shashdar kha.De rah ga.e the
magar terii KHalvat kii hairat me.n vahshat kaa jo shaa.iba thaa
nigaaho.n se merii kahaa.n chhup sakaa thaa
mire aur tire darmiyaa.n vasl kii har gha.Dii me.n
na jaane kahaa.n se
vahii soKHta-baKHt terii
ki jo jaa.n-fishaanii ke sho'lo.n se dahke hu.e
zindagii ke abad-taab tannuur par
u.ngliyaa.n tere bachcho.n kii thaame kha.Dii
bhuuk se barsar-e-jang thii
jis ke nazdiik ye
tere kuuze tiraa fan tirii aag sab
merii aa.nkhe.n mire phuul aur KHvaab sab
zindagii ke abad-taab tannuur kii raakh the
terii is soKHta-baKHt ko kyaa KHabar
jab zamii.n apne mehvar kii tajdiid me.n
harf-e-laa se guzar jaa.egii
to hazaaro.n baras baa'd bhii
ye azal ke gharo.ndo.n kii miTTii me.n madfuun
phuul aur buuTe ye kuuze
aur un me.n unhii qaaf aa.nkho.n se chhalke hu.e
surKH paanii kii talchhaT
kisii kuuza-gar ke javaa.n lams se jii uThe to
jahaa.n-zaad us ke liye phir janam legii
aur nau baras raqs karte guzar jaa.e.nge
terii is soKHta-baKHt ko kyaa KHabar
vo raat
vo halab kii kaarvaa.n-saraa kaa hauz
jis ko mai.n ne jism-o-jaa.n kii KHushbu.e.n kashiid kar ke
qatra-qatra nau baras me.n aa.nsu.o.n se pur kiyaa
vo ek raat sirf ek raat me.n
tamaam KHushk ho gayaa
ham apne vasl kii tamaazato.n me.n aise jal-bujhe
ki raakh tak nahii.n bachii
ye ek jaa.n kii tishnagii
mujhe tujhe ba-yak-zamaa.n
bhalaa kahaa.n kahaa.n na khii.nchtii phirii
magar ye tuu ne kyaa kahaa
ki tere jaisii 'aurate.n jahaan-zaad
aisii uljhane.n hai.n jin ko aaj tak ko.ii nahii.n suljhaa sakaa
ki 'aurato.n kii saaKHt hai vo tanz apne aap par
javaab jin kaa ham nahii.n
to phir ye jaam-o-miinaa-o-subuu-o-hauz-o-ruud-e-niil
is zamii.n kii god me.n
azal ke harf-giir taabnaak KHvaab ke liye
kahii.n bhii kuchh raqam nahii.n
ai hasan
chaak par se zaraa apnii nazre.n haTaa
tuu mire nau baras tak banaa.e ga.e phuul to dekh le
phuul taaza shagufta aur aazurda hai.n
yuu.n na ho ki inhe.n
bhuuk aur muflisii ke sataa.e hu.e
mere bachche bhii niilaam kar aa.e.n jaa kar kahii.n
tere kuuzo.n ke maanind baGdaad me.n
ai hasan
daaman-e-vaqt par jitne phuul aur buuTe saje hai.n
jahaa.n-zaad kii zaKHmii poro.n ne
rang un me.n apne junuu.n ke bhare hai.n
ye taavaan hai.n champa.ii u.ngliyo.n kaa
tire jaam-o-miinaa pe
jis KHaal-o-KHad kii nazaakat kii parchhaa.iiyaa.n thii.n
tujhe kyaa KHabar ye kin aa.nkho.n kii biinaa.iyaa.n thii.n
hasan ye mohabbat
ki jis ko tirii soKHta-baKHt gardaantii hai
amiiro.n kii baazii
to mere ta.ii.n ye amiiro.n kii baazii kahaa.n
sirf baaziigarii thii
mohabbat hamesha se muflis kaa sarmaaya-e-jaa.n rahii hai
yahii to vo puu.njii hai
jis tak amiiro.n ke haath ab bhii pahu.nche nahii.n hai.n
tujhe ye gumaa.n thaa
ki 'aurat mohabbat kii baazii me.n be-jaan patte kii suurat
kisii dast-e-chaabuk kii marhuun-e-minnat
vo is khel me.n ek mohre kii suurat
ki jab jis ne chaahaa
ise ek ghar se uThaa kar
kisii duusre ghar kaa maalik banaayaa
ki 'aurat faqat ek patthar kii muurat
ye tasviir-e-hairat
yuu.nhii chup kha.Dii hai
yuu.nhii chup rahegii
magar yuu.n nahii.n hai
hasan tuu ne dekhaa
ki mai.n qaid-e-auhaam o band-e-rivaayaat me.n
buu.Dhe 'attaar yuusuf kii dukkaan par
apnii aa.nkhe.n tujhe nazr kartii rahii
buu.Dhaa 'attaar vo kiimiyaa-gar
ki jis ne zamaano.n ke jangal se
chehro.n ke phuul aur buuTe chune
vo mujhe aur tujhe jaantaa thaa magar
mai.n ne baazaar me.n
tujh se aa.nkho.n kaa aur dil kaa saudaa kiyaa
ai hasan
mere ek ik dariiche pe
kohna rivaayaat o zaalim 'aqaa.ed kaa jangal ugaa thaa
hasan
kaash tuu merii aa.nkho.n se mere dariiche ko taktaa
to ye jaan saktaa
jahaa.n tuu kha.Daa thaa vahaa.n ek ik darz se
merii aa.nkhe.n miraa jism
chhan chhan ke
kaT kaT ke girtaa rahaa thaa

Ishrat Afreen
Nazm

tariKH ka nauha

shaaho.n ko KHabar nahii.n ho sakii
ki bulldozero.n se haTaa.ii ga.ii mayyato.n kii Dher me.n
kis kis ke ehraam par lahuu ne aayate.n raqam kii.n
haajiyo.n kii jam.a puu.njii se munaafe.a baTortii hukuumate.n
aab-e-zam-zam ke chashme aur petrol ke ku.e.n me.n
tamiiz karnaa bhuul jaa.e.n
to KHuun kii lakiir haram se nikal kar minaa tak pahu.nch jaatii hai
shaahii farmaan ko ibaadat kaa darja dene vaale
muftiyo.n ne ye kabhii nahii.n dekhaa
ki taariiKH ka.ii baar taKHt ko taKHta bante hu.e dekh chukii hai
shaitaan ko patthar maartaa hu.aa hujuum
apne aap ko rau.nd kar KHaak me.n mil jaataa hai
aur mansuur anal-haq kah kar har daur me.n amar hotaa rahaa
KHudaa
nadaamat ke aa.nsuu rone vaalo.n ko
mu.aaf karne me.n der nahii.n kartaa
aur shaitaan intiqaam lenaa nahii.n bhuultaa
lekin ham bhuul jaate hai.n
ki mehraab masjid ke ho.n yaa maatho.n ke
nekiyo.n aur badiyo.n kaa hisaab sirf KHudaa ke paas hai
gin gin kar patthar maarne vaale
un ka.nkaro.n kii gintii bhuul chuke hai.n
jo abaabiilo.n ne haathiyo.n par giraa.e the

Maqsood Wafa
Nazm

kaTba(1)

KHudaayaa! na mai.n ne kahii.n sar jhukaayaa
na duniyaa me.n ehsaan ab tak kisii kaa uThaayaa
mire sar pe jab dhuup hii dhuup thii
us gha.Dii mai.n na Dhuu.nDaa kahii.n ko.ii saaya
to ab tuu hii aa kar mirii aabruu ko bachaa le
yahii ek tohfa hai
jo mai.n tire paa-e-aqdas pe rakh duu.ngaa
aur ye kahuu.ngaa
yahii merii puu.njii, yahii hai kamaa.ii
mujhe aur kuchh bhii ataa kar na paa.ii
ye terii KHudaa.ii
KHudaayaa!
mirii nazr-e-be-maaya ko dekh kar
jis KHazaane me.n is kii jagah ho
ab vahaa.n par ise Daal de

Khalilur Rahman Azmi
Nazm

musafir

chhaa.nv me.n aflaak kii paltaa rahaa Dhaltaa rahaa
paas jo puu.njii ujaalo.n kii thii sab kuchh baa.nT kar

Aziz Tamannai
Nazm

kal aaj aur kal

apne mustaqbil-o-maazii kii faqat soch se tuu
are naadaan kisii tarah pareshaan na ho
haal hii teraa vajuud aur terii puu.njii hai
KHarch kar us ko khule haath pashemaan na ho

Aditya Pant Naaqid
Nazm

KHwab

KHvaab fan kaa sarmaaya KHvaab fan kii puu.njii hai
KHvaab mujh se mat chhiino
KHvaab dekhne do mujhe KHvaab baa.nTne do mujhe
kufr rad kiyaa mai.n ne raushnii ko dii.n jaanaa
ahrman ke beTo.n ko mai.n ne ahrman jaanaa
un ko sar-niguu.n dekhaa baargaah-e-yazdaa.n me.n
aaftaab-daaman me.n maahtaab-jebo.n me.n
mai.n ne bhar liye kitne
tiirgii miTaane ko zindagii kii raaho.n se
maa.ng mai.n ne dhartii kii ra.ng-o-nuur se bhar dii
kahkashaa.n kii chaadar se Dhak diyaa badan us kaa
chaar-suu dhanak phuuTii chaar-suu shafaq phuulii
aaftaab daaman me.n
maahtaab-jebo.n me.n merii jagmagaane do
KHvaab merii puu.njii hai KHvaab meraa sarmaayaa
KHvaab mujh se mat chhiino
KHvaab mujh se mat chhiino

Muslim Shameem
Nazm

KHwaja-sara

chhail chhabiilaa
Thumak Thumak kar beach sa.Dak me.n
aatii jaatii har gaa.Dii se
bhiik kii puu.njii uchak rahaa hai
fiqre kaste collage ke nau-KHez javaano.n se hans hans kar
baate.n kartaa maTak rahaa hai
chauraahe kaa ishaara be-sharmii se ghuur rahaa hai
laal praanda lapak lapak kar
naqlii kuulho.n ko mas kartaa laTak rahaa hai
ja.alii Dhalvaano.n se vo ra.ngiin dupaTTa
ek taraf ko Dhalak rahaa hai
kaalii gaa.Dii vaalaa kitnii be-zaarii se
haath ko us ke jhaTak rahaa hai
pairo.n me.n ghu.ngruu chhankaataa
mardaana chehre par mal kar jhuuT kaa Gaaza
nisvaanii ra.ngo.n me.n luth.Daa ek hayuulaa
jism aur jins ke ghanchakkar me.n bhaTak rahaa hai

Mohammad Owais Malik
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now