Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "qasme.n"

Nazm MATCHES FOR "qasme.n"

Nazm

ye pichhle ishq ki baaten hain

apne be-ant KHayaalo.n me.n
har ahd nibhaane kii qasme.n

Mohsin Naqvi
Nazm

dur tak yaad-e-watan aai thi samjhane ko

desh sevaa hii kaa bahtaa hai lahuu nas nas me.n
ab to khaa baiThe hai.n chittau.D ke ga.D.h kii qasme.n
sarfaroshii kii adaa hotii hai.n yuu.n hii rasme.n
bhaa.ii KHanjar se gale milte hai.n sab aapas me.n

Ram Parsad Bismil
Nazm

nashat-e-umid

ai mirii ummiid merii jaa.n-navaaz
ai mirii dil-soz merii kaarsaaz
merii sipar aur mire dil kii panaah
dard-o-musiibat me.n mirii takiya-gaah
aish me.n aur ranj mai.n merii shafiiq
koh me.n aur dasht me.n merii rafiiq
kaaTne vaalii Gam-e-ayyaam kii
thaamne vaalii dil-e-naakaam kii
dil pa pa.Daa aan ke jab ko.ii dukh
tere dilaase se milaa ham ko sukh
tuu ne na chho.Daa kabhii Gurbat me.n saath
tuu ne uThaayaa na kabhii sar se haath
jii ko ho kabhii agar usrat kaa ra.nj
khol diye tuu nai qanaa.at ke ganj
tujh se hai mohtaaj kaa dil be-hiraas
tujh se hai biimaar ko jiine kii aas
KHaatir-e-ranjuur kaa darmaa.n hai tuu
aashiq-e-mahjuur kaa iimaa.n hai tuu
nuuh kii kashtii kaa sahaaraa thii tuu
chaah me.n yuusuf kii dil-aaraa thii tuu
raam ke ham-raah cha.Dhii ran me.n tuu
paa.nDav ke bhii saath phirii ban me.n tuu
tuu ne sadaa qais kaa bahlaayaa dil
thaam liyaa jab kabhii ghabraayaa dil
ho gayaa farhaad kaa qissa tamaam
par tire fiqro.n pe rahaa KHush mudaam
tuu ne hii raa.njhe kii ye ba.ndhvaaii aas
hiir thii furqat me.n bhii goyaa ki paas
hotii hai tuu pusht pe himmat kii jab
mushkile.n aasaa.n nazar aatii hai.n sab
haath me.n jab aa ke liyaa tuu ne haat
saat samundar se guzarnaa hai baat
saath milaa jis ko tiraa do qadam
kahtaa hai vo ye hai arab aur ajam
gho.De kii lii apne jahaa.n tuu ne baag
saamne hai tere gayaa aur praag
azm ko jab detii hai tuu mel jast
gumbad-e-garduu.n nazar aataa hai past
tuu ne diyaa aa ke ubhaaraa jahaa.n
samjhe ki muTThii me.n hai saaraa jahaa.n
zarre ko KHurshiid me.n de khapaa
bande ko allaah se de tuu milaa
dono.n jahaa.n kii hai ba.ndhii tujh se la.D
diin kii tuu asl hai duniyaa kii ja.D
nekiyo.n kii tujh se hai qaa.em asaas
tuu na ho to jaa.e.n na nekii ke paas
diin kii tujh bin kahii.n pursish na ho
tuu na ho to haq kii parastish na ho
KHushk thaa bin tere daraKHt-e-amal
tuu ne lagaa.e hai.n ye sab phuul phal
dil ko lubhaatii hai kabhii ban ke huur
gaah dikhaatii hai sharaab-e-tahuur
naam hai sidra kabhii tuubaa tiraa
roz niraalaa hai tamaashaa tiraa
kausar o tasniim hai yaa salsabiil
jalve hai.n sab tere ye be-qaal-o-qiil
ruup hai.n har panth me.n tere alag
hai kahii.n firdaus kahii.n hai sovarg
chhuuT ga.e saare qariib aur ba.iid
ek na chhuuTii to na chhuuTii umiid
tere hii dam se kaTe jo din the saKHt
tere hii sadqe se milaa taaj-o-taKHt
KHaakiyo.n kii tujh se hai himmat buland
tuu na ho to kaam ho.n duniyaa ke band
tujh se hii aabaad hai kaun-o-makaa.n
tuu na ho to hai bhii barham jahaa.n
ko.ii pa.Dtaa phirtaa hai bahr-e-ma.aash
hai ko.ii iksiir ko kartaa talaash
ik tamannaa me.n hai aulaad kii
ek ko dil-daar kii hai lau lagii
ek ko hai dhan jo kuchh haath aa.e
dhuum se aulaad kii shaadii rachaa.e
ek ko kuchh aaj agar mil gayaa
kal kii hai ye fikr ki khaa.e.nge kyaa
qaum kii bahbuud kaa bhuukaa hai ek
jin me.n ho un ke liye anjaam-e-nek
ek ko hai tishnagii-e-qurb-e-haq
jis ne kiyaa dil se jigar tak hai shaq
jo hai Garaz us kii na.ii justujuu
laakh agar dil hai.n to laakh aarzuu
tujh se hai.n dil sab ke magar baaG baaG
gul ko.ii hone nahii.n paataa charaaG
sab ye samajhte hai.n ki paa.ii muraad
kahtii hai jab tuu ki ab aa.ii muraad
va.ada tiraa raast ho yaa ho daroG
tuu ne diye hai.n use kyaa kyaa faroG
va.ade vafaa kartii hai go chand tuu
rakhtii hai har ek ko KHursand tuu
bhaatii hai sab ko tirii lait-o-la.al
tuu ne kahaa.n siikhii hai ye aaj kal
talKH ko tuu chaahe to shiirii.n kare
bazm-e-azaa ko tarab-aagii.n kare
aane na de ranj ko muflis ke paas
rakhe Ganii us ko rahe jis ke paas
yaas kaa paatii hai jo tuu kuchh lagaav
saik.Do.n kartii hai utaar aur cha.Dhaa.o
aane nahii.n detii dilo.n par hiraas
TuuTne detii nahii.n taalib kii aas
jin ko mayassar na ho kamlii phaTii
KHush hai.n tavaqqo.a pe vo zar-baft kii
chaTnii se roTii kaa hai jin kii banaav
baiThe pakaate hai.n KHayaalii polaav
paa.nv me.n juutii nahii.n par hai ye zauq
gho.Daa jo sabza ho to niilaa ho tauq
faiz ke khole hai.n jahaa.n tuu ne baab
dekhte hai.n jho.npa.De mahlo.n ke KHvaab
tere karishme hai.n Gazab dil-fareb
dil me.n nahii.n chho.Dte sabr-o-shakeb
tujh se muhavvis ne jo shuuraa liyaa
phuu.nk diyaa kaan me.n kyaa jaane kyaa
dil se bhulaayaa zan o farzand ko
lag gayaa ghun naKHl-e-baroma.nd ko
khaane se piine se hu.aa sard jii
aisii kuchh iksiir kii hai lau lagii
diin kii hai fikr na duniyaa se kaam
dhun hai yahii raat din aur sub.h shaam
dho.nknii hai baiTh ke jab dho.nknaa
shah ko samajhtaa hai ik adnaa gadaa
paise ko jab taav pe detaa hai taav
puuchhtaa yaaro.n se hai sone kaa bhaav
kahtaa hai jab ha.nste hai.n sab dekh kar
rah ga.ii ik aa.nch kii baaqii kasar
hai isii dhu.nd me.n vo aasuuda-haal
tuu ne diyaa aql pe parda saa Daal
tol kar gar dekhiye us kii KHushii
ko.ii KHushii is ko na pahu.nche kabhii
phirte hai.n mohtaaj ka.ii tiira-baKHt
jan ke pairo.n me.n thaa kabhii taaj-o-taKHt
aaj jo bartan hai.n to kal ghar karo
maltii hai mushkil se inhe.n naan-e-jau
taire sivaa KHaak nahii.n in ke paas
saarii KHudaa.ii me.n hai le de ke aas
phuule samaate nahii.n is aas par
saahib-e-aalam unhe.n kahiye agar
khaate hai.n is aas pa qasme.n ajiib
jhuuTe ko ho taKHt na yaa-rab nasiib
hotaa hai naumiidiyo.n kaa jab hujuum
aatii hai hasrat kii ghaTaa jhuum jhuum
lagtii hai himmat kii kamar TuuTne
hausla kaa lagtaa hai jii chhuuTne
hotii hai be-sabrii o taaqat me.n ja.ng
arsa-e-aalam nazar aataa hai ta.ng
jii me.n ye aataa hai ki sam khaa.iye
phaa.D ke yaa kap.De nikal jaa.iye
baiThne lagtaa hai dil aave kii tarah
yaas Daraatii hai chhalaave kii tarah
hotaa hai shikva kabhii taqdiir kaa
u.Dtaa hai KHaaka kabhii tadbiir kaa
Thantii hai garduu.n se la.Daa.ii kabhii
hotii hai qismat kii ha.nsaa.ii kabhii
jaataa hai qaabuu se aaKHir dil nikal
kartii hai in mushkilo.n ko tuu hii hal
kaan me.n pahu.nchii tirii aahaT jo hai.n
raKHt-e-safar yaas nai baa.ndhaa vahii.n
saath ga.ii yaas ke pazhmurdagii
ho ga.ii kaafuur sab afsurdagii
tujh me.n chhupaa raahat-e-jaa.n kaa hai bhed
chho.Diyo 'haalii' kaa na saath ai umiid

Altaf Hussain Hali
Nazm

be-nang-o-nam

soch me.n gum huu.n ki kis kis kii zabaa.n band karuu.n
aaj shaayad dar o diivaar ko Dhaanaa hogaa
jis me.n tuu hai tire vaade hai.n tirii qasme.n hai.n
kyaa sitam hai ki usii ghar ko jalaanaa hogaa

Shaz Tamkanat
Nazm

main na kahta tha tum se

mai.n na kahtaa thaa tum se rah me.n chho.D jaa.ogii
ishq ik riyaazat hai kaise Thair paa.ogii
aag kaa ye dariyaa hai kyuu.n kar tair paa.ogii
mai.n na kahtaa thaa tum se
ishq ik ibaadat hai payambarii amaanat hai
KHaaro.n se ye pur rasta
kab talak chalogii tum
saath chho.D jaa.ogii
mai.n na kahtaa thaa tum se
KHauf khaataa rahtaa huu.n
makr se daGaa se mai.n
aise dost se bhii jo
kashtiyaa.n Dubote hai.n
beach me.n samundar ke
mai.n na kahtaa thaa tum se
pahle soch lo sau baar
baadbaa.n ke uThne se
tuufaa.n ke beach jaane se
chho.D to na jaa.ogii darmiyaa.n samundar ke
aur tum ne har ik baar ye yaqii.n dilaayaa thaa
saath jiine marne kii laakh qasme.n khaa.ii thii.n
aur mai.n ki saada dil aa gayaa thaa baato.n me.n
aa.nsu.o.n me.n aaho.n me.n
jhuuT kii kathaa.o.n me.n
jaan kar sabhii kuchh ki
pahle paa.nch kashtii me.n chhed kar ke baiThii ho
par tumhaarii suurat jo
taa.ebo.n sii lagtii thii
de ga.ii fareb aaKHir
aur phir jo honaa thaa ho rahaa ik din
tum ko chhal hii karnaa thaa
kaise baaz rahtii tum
sad.haa va.ade kar ke bhii
laakh qasme.n khaa ke bhii
darmiyaa.n samundar ke
mauj me.n thape.Do.n ke
chhed kar ke kashtii me.n
saatve.n mai.n jaa baiThii
mai.n na kahtaa thaa tum se
par nahii.n nahii.n ab to
ab mai.n tum se kahtaa huu.n
ishq ik safiina hai
bahr-e-be-karaa.n ho yaa
pur-KHatar samundar ho
paar KHud utarnaa hai
tum karo ab apnii fikr
kashtiyaa.n badalne kii
aaThvii.n yaa nauvii.n kii
maa.njhii Dhuu.nD laane kii
ko.ii makr karne kii
mai.n ki ek saada-dil
ishq par yaqii.n avval ishq par yaqii.n aaKHir

Abu Bakr Abbad
Nazm

mera watan

dil-rubaa laala ho fazaa terii
mujh ko bhaa.ii na ik adaa terii
lutf se ba.Dh ke hai jafaa terii
vaah-re hindostaa.n vafaa terii
mai.n na maanuu.n kabhii tiraa kahnaa
mai.n na baKHshuu.n kabhii KHataa terii
bar-tar-az-KHaar hai tiraa gulshan
zahr se kam nahii.n havaa terii
KHaalii-az-kaifiyat tirii har chiiz
baat har ek be mazaa terii
dard-e-dil me.n ta.Dap ke mar jaa.uu.n
mai.n na Dhuu.nDuu.n kabhii shifaa terii
kaun sii baat terii lutf-aamez
kaun sii chiiz dil-kushaa terii
tujh ko jannat-nishaan kahte hai.n
ham jahannam kii jaan kahte hai.n
tujh ko kas baat par hai naaz bataa
kyaa nahii.n aur mulk tere sivaa
terii aab o havaa latiif sahii
tujh se ba.Dh kar spain kaa KHitta
tujh ko apnii zamiin kaa hai ghamanD
tujh se afzal kahii.n hai america
hasan par apne naaz hai tujh ko
hasan tujh se sivaa etaaliyaa kaa
tujh ko ga.ngaa kaa apnii dhokaa hai
tuu ne dekhaa nahii.n hai siin ko jaa
mausiiqii par tujhe hai naaz bahut
is me.n juz dard-o-Gam dharaa hai kyaa
falsafa teraa agle vaqto.n kaa
falsafa dekh jaa ke europe kaa
tujh me.n phir aan kyaa rahii baaqii
terii mahfil na kuchh na kuchh saaqii
haa.n muravvat kaa tujh me.n naam nahii.n
haa.n uKHuvvat kaa tujh me.n naam nahii.n
tujh se bad-naam ishq saa ustaad
aur mohabbat kaa tujh me.n naam nahii.n
aashtii siikhe tujh se aa ke ko.ii
haa.n KHusuumat kaa tujh me.n naam nahii.n
terii har baat me.n safaa.ii hai
aur kuduurat kaa tujh me.n naam nahii.n
tujh ko aur hurriyat se kyaa nisbat
is zaruurat kaa tujh me.n naam nahii.n
shaad hai.n taire apne begaane
aur shikaayat kaa tujh me.n naam nahii.n
terii tahziib tujh ko maujib-e-faKHr
haa.n jahaalat kaa tujh me.n naam nahii.n
baat duniyaa se hai judaa terii
vaah ai hindostaa.n adaa terii
tere rasm-o-rivaaj ne maaraa
is maraz ke ilaaj ne maaraa
terii Gairat nai kar diyaa barbaad
KHaandaano.n ke laaj ne maaraa
kyaa kare.n har gha.Dii yahii hai fikr
roz kii ehtiyaaj ne maaraa
aa.e din call kaa hai zikr-azkaar
ik zaraa se anaaj ne maaraa
aur sab par vabaa kaa ik turra
is anokhe KHiraaj ne maaraa
baKHt bargashta aarzu.e.n bahut
havas-e-siim-o-aaj nai maaraa
na kare.n kaam kuchh to khaa.e.n kyaa
roz ke kaam-kaaj ne maaraa
tuu to rahne kaa kuchh maqaam nahii.n
tujh me.n insaaniyat kaa naam nahii.n
qaid tuu ne kiyaa hasiino.n ko
mah-jabiino.n ko naazniino.n ko
zevar-e-ilm se rakhaa aarii
tuu ne qudrat ke in nagiino.n ko
iKHtiyaar o pasand kii ai hind
kyaa zaruurat na thii hasiino.n ko
KHuub pahchaanii tuu ne qadr in kii
KHuub samjhaa tuu in KHaziino.n ko
ku.e.n jha.nkvaa.e naazniino.n se
zahr khilvaayaa mah-jabiino.n ko
Duube jaate hai.n kaun aa ke bachaa.e
bahr-e-hastii ke in safiino.n ko
tuu makaa.n thaa makaan ho ke diyaa
KHauf-e-aaraam in makiino.n ko
tujh pe tahziib ta.an kartii hai
tujh pe ilzaam KHalq dhartii hai
aarzuu hai tujhe hukuumat kii
jaah-o-sarvat kii shaan-o-shaukat kii
kyuu.n na ho tujh me.n himmat-e-aalii
dhuum har suu hai terii jur.at kii
to ne kasb-e-funuun-e-ja.ng kiyaa
sab me.n shohrat hai terii quvvat kii
qasme.n khaate hai.n log duniyaa me.n
terii millat tirii uKHuvvat kii
mulk-daarii me.n mulk-giirii me.n
vaah kyaa paidaa qaabiliyyat kii
tuu to ustaad se bhii ba.Dh niklaa
hairat-a.ngez tuu ne mehnat kii
aap aalam me.n tuu hai apnii misaal
aadamiyyat kii aur shujaa.at kii
ham-sarii kii kasii ko taab nahii.n
tiraa aafaaq me.n javaab nahii.n
daaG dil ke kise dikhaa.e.n ham
aisaa mushfiq kahaa.n se laa.e.n ham
dil me.n hai apne ham-nashii.n ik roz
aap ro kar tujhe rulaa.e.n ham
is tabii.at ko kas tarah bahlaa.e.n
dil ko kis chiiz se lagaa.e.n ham
kab talak roz ke kahe.n sadme
kab talak aafate.n uThaa.e.n ham
zahr kyuu.n ai falak na ham khaa le.n
jii se apne guzar na jaa.e.n ham
jo shikaayat ho kyuu.n na lab par aa.e
ek dukh ho use chhupaa.e.n ham
ai tamaddun ke raahat-o-aaraam
haa.e kas tarah tum ko paa.e.n ham
log uThaate hai.n zindagii ke maze
ham uThaate hai.n naa-KHushii ke maze

Meer Syed Nazeer Husain Nashad
Nazm

tumhein aazad karta hun

mohabbat ke sabhii va.ade
sabhii qasme.n sabhii rasme.n
jinhe.n mil kar nibhaane ke
kiye ahd-o-paimaa.n ham ne
tumhe.n ab bhaar lagtaa hai
jo bandhan to.Dnaa chaaho
mujhe gar chho.Dnaa chaaho
sitam ye bhii mai.n sah luu.ngaa
tumhaare bin mai.n rah luu.ngaa
ki dil naashaad kartaa huu.n
tumhe.n aazaad kartaa huu.n
tumhe.n aazaad kartaa huu.n

Arshad Mahmood Arshad
Nazm

zindagi

mile the jab pahlii baar
kitne kiye the va.ade
khaa.ii kitnii thii ham ne qasme.n
nahii.n jiye.nge
jo mil na paa.e
magar na zehno.n me.n thii.n hamaare
vo murda rasme.n
jo zinda rakhtii hai.n qaid kar ke
rivaayato.n ke andhe pathriile mahbaso.n me.n

Ahmad Rahi
Nazm

sadiyon se ajnabi

us kii qurbat me.n biite sab lamhe
merii yaado.n kaa ek sarmaaya
KHushbu.o.n se bharaa badan us kaa
qaabil-e-diid baa.nkpan us kaa
sho.ala-afroz husn thaa us kaa
dilkashii kaa vo ik namuuna thii
mujh se jab ham-kalaam hotii thii
KHvaahisho.n ke chaman me.n har jaanib
chaahato.n ke gulaab khilte the
us kii qurbat me.n aise lagtaa thaa
ik parii aasmaa.n se utrii ho
jab kabhii mai.n ye puuchhtaa us se
saath mere chalogii tum kab tak
mujh se qasme.n uThaa ke kahtii thii
tuu agar mujh se duur ho jaa.e
ek pal bhii na jii sakuu.ngii mai.n
aaj vo jab judaa hu.ii mujh se
us ne to alvidaa.a bhii na kahaa
jaise sadiyo.n se ajnabii the ham

Asif Shafi
Nazm

sirf shabnam se nahin bujhti pyas

phuul ne ishq kiyaa titlii se
aur titlii thii ki ma.nDraatii rahii
jaane kyaa soch ke ghabraatii rahii
sochte sochte rafta rafta
zaanuu-e-gul pe magar baiTh ga.ii
jiine marne kii bhii khaa.ii qasme.n
phir u.Dii lauT ke aa.ii na kabhii

Khursheed Akbar
Nazm

tark-e-talluq

gar ta'alluq hii tark karnaa thaa
mujh se phir pyaar kyo.n kiyaa tuu ne
muskuraatii lajaatii aa.nkho.n se
ek iqraar kyo.n kiyaa tuu ne
mai.n ne kab teraa pyaar maa.ngaa thaa
mai.n ne kab terii aarzuu kii thii
mai.n to KHaamosh thaa falak kii tarah
mai.n ne kab terii justujuu kii thii
tuu ne KHud muskuraatii aa.nkho.n se
mujh ko aavaaz de ke chau.nkaayaa
mere naazuk naa-aashnaa dil ko
husn kaa saaz de ke chau.nkaayaa
ab vo qasme.n vo ahd vo va.ade
jaane kyaa ho ga.e KHudaa jaane
vo junuu.n-KHez aatishii jazbaat
ab kahaa.n kho ga.e KHudaa jaane
jaane kyo.n ab tirii hasii.n aa.nkhe.n
merii jaanib kabhii nahii.n uThtii
jaane kyo.n ab hasiin gaalo.n par
phuul kii pa.nkhu.Diyaa.n nahii.n khiltii
gar ta'alluq hii tark karnaa thaa
kaash pahle hii kah diyaa hotaa
aaj mai.n apnii zindagaanii se
is qadar duur na hu.aa hotaa

Sajid Rais Warsi
Nazm

kahani oDh li maine

zamaana chaahtaa hai har-gha.Dii bas nit-na.ii baate.n
na.e din aur na.ii shaame.n na.ii sub.he.n na.ii raate.n
na.ii qasme.n na.e va.ade na.e rishte na.e naate
puraane jo bhii qisse the vo ab us ko nahii.n bhaate
mai.n KHud lafzo.n kii misro.n kii baham takraar se jaanaa.n
bahut uktaa ga.ii thii ab
to mai.n ne yuu.n kiyaa lafzo.n ko misro.n ko
lapeTaa surKH kaaGaz me.n
phir un ko man me.n raqsaa.n aag dikhlaa dii
havaa me.n raakh ke u.Dte hu.e zarro.n ne jab puuchhaa
karegii kyaa
sunegii kyaa kahegii kyaa
tiraa daaman to KHaalii hai
kahaa mai.n ne
mujhe ab kuchh nahii.n karnaa
mujhe ab kuchh nahii.n sun.naa mujhe ab kuchh nahii.n kahnaa
kahaanii o.Dh lii mai.n ne

Fakhira batool
Nazm

kangan ki khanak

kyaa hu.ii.n qasme.n tirii aur vo va.ade tere
saath chalne ke hamesha ke iraade tere

Imran Saghar
Nazm

kal se aaj tak

ki jis ke hamraah biitaa bachpan
ki jis ke hamraah thii javaanii
jo hosh aayaa
to us ne ik saath marne-jiine kii khaa.ii.n qasme.n
magar vo sab kuchh bhulaa chukii hai
ki jis kii zulfo.n me.n zindagii kii tamaam qadre.n ulajh ga.ii thii.n
ki jis ke maathe kii surKH bi.ndii miraa nasiiba jagaa rahii thii
ki jis kii nazro.n se mai.n ne yaksaaniyat kii mai pii
ki jis ke naazuk labo.n pe mere liye tabassum kii raushnii thii
ki jis kii saa.nso.n me.n mere sa.ngiit kii sadaa thii
ki jis ke siine kii dha.Dkano.n me.n mire liye ek zalzala thaa
ki jis kii guftaar-e-narm-o-naazuk ne zahr-e-shiirii.n pilaa.e mujh ko
ki jis ke zaanuu pe meraa sar thaa
magar vo sab kuchh bhulaa chukii hai

Daur Afridi
Nazm

last call

abhii kuchh baat karnii hai abhii tum phone mat rakhnaa
mujhe ye jaan.naa hai hai ab tumhaaraa haal kaisaa hai
na.e logo me.n ik rishta puraanaa yaad aataa hai
mujhe batlaa.o tum ne aaj kaise kap.De pahne hai.n
dupaTTe se tumhaare ab bhii kyaa dhaage nikalte hai.n
kyaa ab bhii chuu.Diyaa.n haatho.n kii mushkil se utartii hai.n
kyaa ab bhii chaltii ho to paayale.n aavaaz kartii hai.n
tumhaare haath par jalne kaa vo ik daaG kaisaa hai
kyaa ab bhii vo kalaa.ii par tumhaarii chaa.nd jaisaa hai
kyaa ab bhii purse me.n tum phuul kii pattii chhupaatii ho
kyaa ab bhii titliyo.n ko dekh kar tum muskuraatii ho
kyaa ab bhii kuchh sharaarat karke tum sharmaa sii jaatii ho
kyaa ab bhii ha.nstii ho to haath se chehra chhupaatii ho
kyaa tum ko ab bhii ko.ii chhe.D de to ruuTh jaatii ho
kyaa tum ab bhii kisii ko pyaar se qasme.n khilaatii ho
abhii kuchh baat karnii hai abhii tum phone mat rakhnaa
mujhe apnaa bhii kuchh qissa abhii tum ko sunaanaa hai
badan aur ruuh pe aa.ii hu.ii silvaT dikhaanaa hai
mirii shah-e-rag pe har dam hijr kii talvaar laTkii hai
merii dha.Dkan bhii ab rukne kii tayyaarii me.n rahtii hai
mire gamle me.n rakkhe phuul tum ko yaad karte hai.n
tumhaarii yaad kii KHushbuu se ye raste mahakte hai.n
magar chho.Do mujhe maa'luum hai tum aa na paa.ogii
na.e logo.n me.n apnaa ik nayaa rishta banaa.ogii
mai.n tum ko bhuul jaa.uu.n ye bahut mushkil saa lagtaa hai
mujhe tum bhuul jaa.o ye tumhaare haq me.n achchhaa hai
mujhe is se ziyaada aur tum se kuchh nahii.n kahnaa
miraa number miTaa do tum mujhe ab phone mat karnaa

Sarmad Khan
Nazm

mashq

barso.n baa'd bar-nok-e-zabaan rahtaa hai ko.ii sher
phir ek din
us ke jaane pahchaane hazaar martaba dohraa.e hu.e alfaaz ke andar
khul jaataa hai ma.aanii kaa ek nayaa darvaaza
aur rah jaate hai.n ham hakka-bakkaa
jis mafhuum par sar dhunte aa.e the kal tak kitnaa sat.hii kitnaa adhuuraa thaa vo
shukr karte hai.n ki nahii.n puuchh liyaa kisii ne ham se is sher kaa matlab
satya-naas kar Daalte achchhe bhale sher kaa in na.e ma.aanii ke baGair ham
yahii kuchh hotaa hai zindagii me.n pesh aane vaale
vaaqi.aat o haadsaat ke saath bhii
jo kuchh biit gayaa aur biit rahaa hai ham par
der tak raaz hii nahii.n khultaa us kii ahmiyat kaa
be-maqsad ho rahaa hai ye sab kuchh
yaa is kaa hamaare mustaqbil aur muqaddar se bhii ta'alluq hai kuchh
phir parda saa haTtaa hai aur ho jaate hai.n ham Garq-e-hairat
kitnaa mahduud thaa hamaaraa naqd-e-ilm
aur kin muGaalito.n me.n pa.De hu.e the ham
mujhe to KHuugar saa banaa diyaa hai roz-marra kii is hairaanii o pareshaanii ne
na.e se nayaa sadma sahne ko tayyaar rahtaa huu.n sub.h o shaam
apnii jahaalat ke inkishaaf par
one-day cricket to shauq se dekhte hai.n aap bhii
yuu.n samajhiye ki mashq thaa guzishta kal kaa match aaj ke match kii
mashq hai aaj kaa match aane vaale kal ke liye
aur kal jo match hogaa apnii jagah vo final hii kyuu.n na ho
mashq hogaa parso.n ke match kii
haDDiyaa.n gal ga.ii.n itnii saada sii baat samajhte samajhte
ki har din tuluu hotaa hai apne saath ek nayaa savaal ek nayaa challenge le kar
aur mutaaliba kartaa hai ham se ek na.e javaab ek na.e tarz-e-amal kaa
na to zindagii hii jaamid hai na zindagii kaa KHaaliq KHudaa
zindagii bahte dariyaa kii tarah badaltii rahtii hai har lahza qaa.em-o-daa.em rahte hu.e
aur nit-na.ii taKHliiq me.n masruuf KHudaa bhii nahii.n hotaa kabhii pahle vaalaa KHudaa
jab zindagii aur us ke KHaaliq hii kii kaayaa kalp hotii rahtii hai yuu.n
to ash.aar ho.n yaa vaaqi.aat o haadsaat badal jaataa hai hir shai kaa mafhuum
bha.ii, badal jaate hai.n ham KHud badal jaatii hai hamaarii nazar hamaaraa ehsaas
badal jaatii hai.n vo mohabbate.n
jin ke azlii o abadii hone kii qasme.n khaayaa karte the ham
badal jaatii hai.n be-badal dostiyaa.n
vo KHvaahishe.n badal jaatii hai.n jinho.n ne
ek umr paagal banaa.e rakhaa hotaa hai hame.n
aur to aur badal jaate hai.n diin aur iimaan
raaste hii nahii.n badal jaatii hai.n manzile.n
sun rahe hai.n aap
bhar to nahii.n paa.e aap bhii?
kidhar chal diye aap?
badal to nahii.n ga.e aap bhii?

Mohammad Haneef Rame
Nazm

shararat ka maza

rashiida thii yuu.n to ba.Dii nek la.Dkii
magar us me.n ye ek aadat burii thii
vo har chiiz ko chhuutii aur chhe.Dtii thii
ye baat us kii ghuTTii me.n goyaa thii
buraa.ii ho ik bhii to kaisii burii hai
bhalaa.ii kii rag kaaTne ko chhurii hai
kabhii chaa.e-daanii kaa Dhaknaa uThaatii
vo ye jhaa.nk kar dekhtii is me.n kyaa hai
kabhii ketlii ko ulaT kar giraatii
samajhtii jo dhyaan aap kaa baT gayaa hai
use rokte bhii to ruktii vo kab thii
burii us me.n aadat pa.Dii ye ajab thii
ye ik din kaa hai zikr qissa hu.aa kyaa
tipaa.ii pe daadii ne ainak ko rakhaa
thii nisvaar kii bhii vahii.n ek Dibiyaa
rashiida ne un dono.n chiizo.n ko taakaa
ye sochaa ki dekhuu.ngii chiize.n ye kyaa hai
zaraa daadii amaa.n haTe.n yaa.n se jaa.e.n
Garaz un ke haTte hii us kii ban i
usii vaqt aa.nkho.n pe ainak lagaa.ii
vo Dibiyaa bhii nisvaar kii us ko bhaa.ii
ki ra.ngiin dhakne me.n thii KHush-numaa.ii
vo ainak to pahle lagaa hii chukii thii
hu.ii fikr Dibiyaa ko ab kholne kii
kahaa dil me.n mujh se kahe.ngii ye daadii
ki beTii na chhuunaa ise bhuul kar bhii
magar shukr hai is gha.Dii vo nahii.n hai.n
na abbaa na amaa.n na aapaa kahii.n hai.n
zaraa khol kar dekh luu.n is me.n kyaa hai
abhii band kar duu.ngii phir harj kyaa hai
rashiida ne Dibiyaa kaa Dhaknaa jo kholaa
to us me.n lagaa zor kaa ek jhaTkaa
havaa me.n vo nisvaar har samt phailii
rashiida ke chehre pe u.D u.D ke i
na aa.nkhe.n na nathune na mu.nh aur Tho.Dii
jagah ek bhii us ne baaqii na chho.Dii
hu.ii naak nisvaar se us kii lat-pat
na puuchho banii us gha.Dii us kii kyaa gat
vo ghabraa ke har har taraf KHuub dau.Dii
magar phir bhii chhii.nko.n se fursat na paa.ii
na aaraam us ko milaa ek pal bhii
na mil paa.ii us ko zaraa der kal bhii
vo ghabraa.ii itnii ki ainak ko phe.nkaa
chalii phir vo paanii se dhone ko chehraa
nihaayat hii naazuk the ainak ke shiishe
vo girtii hii bas ho ga.e Tuk.De Tuk.De
milii us ko apne kiye kii sazaa ye
ki miltii hai phuuTe hiye ki sazaa ye
phir itne me.n daadii ko aate jo dekhaa
hu.aa haal abtar bahut phir to us kaa
rashiida arii tujh ko ye ho gayaa kyaa
ye daadii ne tevrii cha.Dhaa kar jo puuchhaa
to bas sharm se ga.D ga.ii.n b rashiida
ajab soch me.n pa.D ga.ii.n b rashiida
rashiida kii haalat hu.ii Gair dukh se
rahaa kaam us ko KHushii se na sukh se
kiyaa us ne va.ada ye khaa khaa ke qasme.n
ki ab bhuul kar bhii na chhe.Duu.ngii chiize.n
sunaa hai ye 'nayyar' ne logo.n kaa kahnaa
rashiida ne va.ada kiyaa apnaa puuraa

Mohammad Shafiuddin Nayyar
Nazm

samjhauta

mujhe us ke naam pe dhamkaa kar
mujhe qasme.n dii thii.n aisaa kar
jise kahte hai.n use apnaa kar
mire bachche tuu samjhautaa kar
mai.n ab ik zinda-murda huu.n sab rote hai.n chillaate hai.n
mai.n us ke dukh me.n Duubaa huu.n mire saa.ns ukha.Dte jaate hai.n

Siraj Faisal Khan
Nazm

judai-e-watan

aaj vo vaqt-e-judaa.ii mujhe yaad aayaa hai
dil-e-afsurda har ik yaad se bhar aayaa hai
Gair mumkin hai mirii aa.nkh se aa.nsuu na bahe.n
zabt-e-dil ab to har ik had se guzar aayaa hai
zindagii ham ko ye maaluum na thaa tere liye
apnii ha.nstii hu.ii duniyaa ko rulaanaa hogaa
jin ko dil dekh na saktaa thaa kabhii afsurda
aaj is dil ne unhe.n ashk bahaate dekhaa
maa.n kii mamtaa ne bhii lalkaaraa jhi.njho.Daa mujh ko
baap nam-diida kha.Daa duur se taktaa thaa mujhe
aur ik kone me.n vo duur kha.Dii jaan-e-hayaat
apne afsurda se chehre pe jo Daale thii naqaab
mai.n ne chaahaa ki use ba.Dh ke tasallii de duu.n
sil ga.e ho.nT zabaa.n ho ga.ii saakit merii
mai.n na kuchh bol sakaa aur na kuchh sun paayaa
merii nazro.n ne na jaane kahaa kyaa kyaa us se
kitne va.ade kiye aur kitnii uThaa.ii.n qasme.n
sub.h-e-nau phuuT rahii thii ki vatan chhuuT gayaa
dekhte dekhte KHvaabo.n kaa fusuu.n TuuT gayaa

Raghib Dehlvi
Nazm

nazm

tuu kuchh bhii kah le magar mujh ko e.atibaar nahii.n
ki dil ko mere kisii taur ab qaraar nahii.n
uThaa le tuu bhale jhuuTii hazaar bhii qasme.n
mujhe yaqiin hai ab tujh ko mujh se pyaar nahii.n

Shagufta Naim Hashmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now