Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "saqaafat"

Nazm MATCHES FOR "saqaafat"

Nazm

gungi aurat

kyuu.n hairat se taktii hai ek ik chehre ko
kyaa tujh ko shikva hai terii goyaa.ii kii taaqat
chhiin ke qudarat ne be-insaafii kii hai?
kyaa tujh ko ehsaas hai tere paas agar guftaar kii ne.amat hotii
to is chaaro.n jaanib phailii hathiyaaro.n kii duniyaa
siina dahlaa dene vaale tayyaaro.n kii insaa.n-kush aavaaze.n
aavaaze.n jin me.n insaa.n kii ruuh shabaana roz dabii jaatii hai
mahshar-KHez aavaaze.n kal-purzo.n kii jin se nafsii-nafsii kaa aalam paidaa ho kar
din par din ifriit kii suurat me.n ba.Dhtaa jaataa hai
in aavaazo.n kii haibat-naakii par vaavailaa kartii
tuu aavaaz uThaatii us faashii aur ta.assub phailaane vaale unsur ko ba.Dhtaa paa kar
jo hubb-ul-vatanii ke naam pe insaa.n-kush hotaa jaataa hai
tuu un rujhaanaat kii KHuub mazammat kartii
un se la.Dtii jo is duniyaa ko piichhe le jaane me.n koshaa.n hai.n
'maz.hab aur tahziib'
'saqaafat' aur 'taraqqii' kah kar raj.at-parvar ho jaate hai.n
le mai.n tujh ko apnii goyaa.ii detaa huu.n!
ye mere kaam nahii.n aa.ii kuchh
mai.n aisaa buzdil huu.n jo har be-insaafii ko chupke chupke sahtaa hai
jis ne 'maqtal' aur 'qaatil' dono.n dekhe hai.n
lekin daanaa.ii kah kar
apnii goyaa.ii ko guu.ngaa kar rakhaa hai!

Akhtarul Iman
Nazm

tahzib

ye maGrib hai
yahaa.n tahziib hai
ta.aliim hai
aKHlaaq hai
insaan me.n insaaniyat hai
yahaa.n insaa.n kii qiimat hai
tamaddun hai
saqaafat hai
sukuu.n hai
amn hai
aur aafiyat hai

Asim Wasti
Nazm

ye dilli

qarno.n kii saqaafat hai yahaa.n ab bhii humaktii
har daur kaa gahvaara-e-aasaar hai dillii

Ram Parkash Rahi
Nazm

munkir ka KHauf

puraanaa paasbaa.n zill-e-ilaahii kaa
jise chaahe kare mansab ataa aalam-panaahii kaa
use tarkiib aatii hai
kisii mazmuun-kohna ko nayaa unvaan dene kii
vo diida-var hamesha se mu.ayyan hai
hamaare raaste ke past-o-baalaa par
vo daanaa apne mansuube banaataa hai
hamaarii fitrato.n kii KHaak zulmat se
hamaarii KHvaahish-e-takraar kii deriina aadat se
vo ma.abad-e-saaz but-gar apnii hastii ke taqaddus me.n
sadaa mahfuuz rakhtaa hai
hamaare ghar ko tahqiiqii tajassus kii balaa.o.n se
kahii.n auhaam kii umda shabiiho.n me.n
saqaafat ke nigaaristaa.n sajaataa hai
kahii.n KHush-fahmiyo.n ke isti.aare se
hare lafzo.n ke baaGiiche khilaataa hai
kahii.n nok-e-sinaa.n ke ism o afsuu.n se
lahuu kii buu.nd me.n tasliim kii kirne.n jagaataa hai
quluub ahl-e-zamii.n ke us kii muTThii me.n dha.Dakte hai.n
shu.uur us kaa sadaa maamuur rahtaa hai
hame.n achchhe bure ke falsafe kii aa.D me.n
ham se chhupaane par
magar is kaa mudaavaa kyaa
ki vo parvardigaar-e-zor-e-hikmat apnii niindo.n me.n
hamesha se
vajuud-e-fard me.n ik muztarib sii shai se Dartaa hai
vo shai jis kii haqiiqat
vaqt kaa ibliis us par faash kartaa hai

Aftab Iqbal Shamim
Nazm

gungi iltija

rabb-ul-izzat
vo zamiin jise tuu ne banii aadam ke liye jannat banaayaa thaa
aur amn ke gahvaare kaa naam diyaa thaa
jahaa.n hamaarii aazmaa.ish ke liye shajar-e-mamnuu.a ke saath saath
hamaarii rubuubiyat ke liye tuu ne shajar-e-hayaat bhii ugaayaa thaa
hamaarii vo zamiin paanii havaa aur KHushkii kii maKHluuq kaa mushtarka ghar thii
is pyaarii zamiin par aabaad saarii maKHluuq ek duusre se raazii thii
aur jis kii saarii maKHluuq ko baaham raazii dekh kar tuu bhii ham se raazii thaa
ai rabb-ul-izzat ham ne vo zamiin apne haatho.n barbaad kar ke rakh dii hai
hamaaraa tujh par ko.ii haq nahii.n ki zid kare.n
lekin tuu ne tauba kaa darvaaza to khulaa rakkhaa hai
be-shak tauba kii ibtidaa e'tiraaf se hotii hai
magar is kii intihaa hamesha du.aa se hotii aa.ii hai
mere paas du.aa ke laa.eq alfaaz nahii.n hai.n
lekin tere paas merii guu.ngii iltijaa sun.ne ke liye bahut achchhe kaan hai.n
husn-e-samaa.at tujh par KHatm hai
is liye ki tuu azal se muztaro.n kii suntaa aur murda zamiino.n ko zinda kartaa aayaa hai
sun ai samii.a sun
ek martaba phir is zamiin par amn ummiid aur masarrat ke pharere lahraa de
ek martaba phir is ke beTe beTiyo.n kaa haath paka.D
unhe.n adhuure-pan se najaat de de
puuraa kar de unhe.n
vo havas aur be-sabrii kii khaultii daldal me.n
bad-suurat me.nDako.n kii tarah au.ndhe mu.nh pa.De hai.n
unhe.n puure qad se kha.Daa kar de
un kii azmat-e-aadam lauTaa de
unhe.n ek duusre par e'timaad karnaa sikhaa de
taufiiq de unhe.n ki terii ataa karda quvvat-e-taKHliiq se
zamiin ko husn aur ma.anii se maalaa-maal kar de.n
ehtiraam Daal de in ke dil-o-dimaaG me.n is zamiin ke liye
apnii us maa.n ke liye
us kii saarii maKHluuq ke liye
nasl aqiide jins aur saqaafat kaa farq in kii vahdat me.n na.e rang bhare
vo puure kurra-e-arz par phaile ho.n lekin ek duusre kaa haath paka.D kar
vo puure kurra-e-arz ko ek aise dastarKHvaa.n kii shakl de de.n
jis par zamiin kaa saaraa rizq zamiin kii saarii maKHluuq ke liye aam ho
chhe arab insaan hii nahii.n zamiin kii saarii maKHluuq sairaab-o-shaad-kaam ho
ai rabb-ul-izzat
tuu ne is zamiin kii suurat me.n jo jannat hame.n dii thii
ham ne use apne liye jahannam banaa liyaa hai
ye jahannam sirf nifaaq aur nafrat hii nahii.n KHauf se bhii labrez hai
ek duusre se KHauf apne aap se KHauf
aur KHauf to mohabbat kii nafii hotaa hai
aur saarii mohabbato.n kii ibtidaa aur intihaa
hame.n ek martaba phir mohabbat se sarshaar kar de
ki mohabbat ke baGair hame.n na to sachchaa amn nasiib hogaa aur na sachchii zindagii
ham mohabbat se mahruum rahe to KHvaah to zamiin ko sau martaba bhii jannat banaa de
ham hazaar martaba use jahannam banaa ke rakh de.nge
ham ne nafrat nifaaq aur KHauf ko aazmaa kar dekh liyaa hai
ai rabb-ul-izzat
hamaare vajuud mohabbat ke liye is tarah taras rahe hai.n
jaise pyaasii zamiin baarish ke liye tarastii hai
hame.n mohabbat nasiib kar de

Mohammad Haneef Rame
Nazm

tah-e-KHanjar

zabaa.n ma.atuub tahziib-o-saqaafat daar kii zad me.n
ghar aa.ngan izzat-o-naamuus kul talvaar kii zad me.n
labo.n kii muskuraahaT aatishii.n yalGaar kii zad me.n

Owais Ahmad Dauran
Nazm

abul-kalam aazad

abul-kalaam ki badr-e-muniir-e-aazaadii
tuluu.a-e-sub.h-e-tamannaa nashaat-e-diida-o-dil
KHuluus pyaar vafaa-aashnaa tariiq tamaam
vo apnii qaamat-e-zebaa me.n jaise husn-e-yaqii.n
abul-kalaam KHitaabat kaa be-badal paikar
abul-kalaam siyaasii shu.uur kaa manzar
abul-kalaam fasaahat kaa tez-rau dariyaa
abul-kalaam saqaafat kii mauj-e-be-paayaa.n
abul-kalaam mujassam sharaafat-e-mashriq
vo raushnii jise sadiyaa.n talaash kartii hai.n
hamaare ahd kaa virsa banii hai ham me.n hai

Momin Khan Shauq
Nazm

aadam-zad ki dua

zamii.n kii ta.ngiyo.n ko apnii baKHshish se kushaada kar
ki sajda kar sakuu.n
ye kyaa ki mere hauslo.n me.n rif.ate.n hai.n
aur girtaa jaa rahaa huu.n apnii fitrat ke nashebo.n me.n
tirii kotaahiyaa.n merii anaa kii sarhade.n hai.n
kyaa ye diivaare.n
sadaa uThtii rahe.ngii mere siine par
bataa ye ra.ngii.n ye duuriyaa.n paidaa hu.ii hai.n
kis kii daanish se
bataa mere lahuu me.n Duubte jaate hai.n kyo.n
injiir-o-zaituu.n ke giyaa-histaa.n
mujhe bhaa.ii mere niilaam karne jaa rahe hai.n
tak rahaa hai tuu mujhe ma.azuur aa.nkho.n kii safedii se
ye kaisaa shahar hai
jis kii saqaafat kii machaano.n se
mujhe maaraa gayaa hai aur mai.n showcase me.n
laTkaa hu.aa huu.n
meraa manzar dekhne vaale
likhii satro.n kii kaalii Doriyo.n par naachte aate hai.n
KHud apne tamaashaa.ii
bataa ba.Dhtii hu.ii aabaadiyo.n me.n
chaa.ndnii kyo.n ghaT ga.ii hai
labrez palke.n jhapakte qumqume aa.nkho.n kaa bhai.ngaa-pan
na.e cha.Dhte dino.n kii surKHiyaa.n hai.n kyaa
KHudaavand
mujhe taa.ir shajar parbat banaa de
yaa mujhe Dhaa de
ki dobaara janm luu.n apnii be mashruut aazaadii kii KHvaahish se

Aftab Iqbal Shamim
Nazm

jamaliyat

jamaaliyaat kaa naqqaad jitnaa hairaa.n hai
vo baab-e-husn me.n bhii utnaa hii pareshaa.n hai
jamaaliyaat me.n kyaa hai jo KHud nahii.n fan me.n
jamaaliyaat kaa mahvar nashaat-e-dauraa.n hai
jamaaliyaat ko farha.ng me.n karo na talaash
jamaaliyaat me.n zulf-e-suKHan kii afshaa.n hai
jamaaliyaat ko usluub me.n shumaar karo
jamaaliyaat me.n har fard ik dabistaa.n hai
jamaaliyaat taGayyur-paziir hissiyat
jamaaliyaat me.n sahraa bhii ik gulistaa.n hai
jamaaliyaat saqaafat kaa haft rang libaas
jo rang o nasl kii tafriiq se gurezaa.n hai
jamaaliyaat badalte hai.n maah-o-saal ke saath
jamaaliyaat me.n taariiKH-e-fikr-e-insaa.n hai
jamaaliyaat hai.n taKHliiq fan kaa sar chashma
adiib adab ke liye KHud jamaal saamaa.n hai
jamaaliyaat me.n hai husn-e-kaar kaa jaaduu
jamaaliyaat kii tasKHiir kaar-e-mardaa.n hai
ko.ii usuul nahii.n husn ke parakhne kaa
kahii.n KHizaa.n hai hasii.n aur kahii.n bahaaraa.n hai
jahaa.n me.n jitne hai.n fankaar utnii tarah ke husn
to kyaa ba.ndhe Tike meyaar-e-nau kaa imkaa.n hai
badaltaa rahtaa hai meyaar-e-husn husn ke saath
to kis liye ko.ii naqqaad-e-fan pareshaa.n hai

Wamiq Jaunpuri
Nazm

asia jag uTha

asia jaag uThaa KHvaab-e-giraa.n se kaise
dil-nashii.n jism me.n ik zahr kaa tuufaan liye
ke.nchulii badle hu.e saa.np kii phunkaar liye
har shaqaavat ke liye maut kaa saamaan liye
asia jaag uThaa
ahl-e-mashriq ko na.ii ziist kii phir se hai talaash
ye ta.Dapte hu.e guu.nge ye bilakte haivaa.n
apne aaqaa.o.n ke deriina Gulaamo.n kii ye laash
zulm to.Daa kiyaa insaan pe sadiyo.n insaa.n
ziist be-nuur charaaGo.n me.n se lau de uTThii
ik kiran sard a.ndhere me.n se zau de uTThii
asia jaag uThaa
ahl-e-mashriq kii taraqqii ke payambar larze
kapkapaane lage aivaano.n ke sangiin sutuu.n
vo jahaa.n naaz bhii naKHvat hai masarrat bhii Guruur
jin me.n nikhraa kiyaa insaa.n kii ta.allii kaa junuu.n
saal-haa-saal se tapte hu.e faulaad ke raaz
saal-haa-saal se fankaaro.n ke tarshe hu.e but
rah na jaa.e kahii.n mashriq me.n hii maGrib kii ye rut
ahl-e-mashriq pe shaqaavat kii ko.ii had hii nahii.n
apne dushman kii zalaalat kii ko.ii had hii nahii.n
asia jaag uThaa
apnii zillat ke samet apnii hifaazat ke liye
is qadaamat ke samet apnii saqaafat ke liye
asia arz-e-muqaddas bhii farozaa.n hogii
ham Gariibo.n kii Gamii.n ziist bhii taabaa.n hogii
asia jaag uThaa jaag uThaa jaag uThaa

Siddique Kaleem
Nazm

urus-ul-bilad

chaashnii hai zabaan me.n jin kii
paasbaa.n ye amiir KHusrau ke
'miir'-o-'Gaalib' ke raazdaan-e-suKHan
vaarisaan-e-zabaan-e-urdu hai.n
gholte hai.n miThaas baato.n se
apnaa lahja hasiin rakhte hai.n
ek tahziib hai saqaafat hai
is ke khaano.n kii apnii lazzat hai
aur phir husn kii tamaazat hai
dekhne vaale dekhte hai.n kahii.n
is ke saahil pe raunaq-e-duniyaa
kheltii ha.nstii Gul machaatii hu.ii
man-chale ha.nste muskuraate hu.e
zindagii kii Gazal sunaate hu.e
raunaqo.n ke asiir rahte hai.n
jis ko kahte the log kolaachi
ab vo saahil kinaare bastaa shahr
jaanaa jaataa hai shahr-e-qaa.id se
log jis ko karaachi kahte hai.n

Mehr Husain Naqvi
Nazm

handloom

ye dastii paarcha-baafii hamaare ghar kii san'at hai
ye san'at iftiKHaar-e-qaum hai bhaarat kii 'azmat hai
yahii san'at hame.n baKHshegii KHushiyaa.n aur KHush-haalii
isii fan se hamaare ghar me.n hogii faariG-ul-baalii
hamaarii dast-baafii bhaa ga.ii hai zauq vaalo.n ko
bahut marGuub hai.n kap.De hamaare mah-jamaalo.n ko
banaavaT me.n numaayaa.n chand sadiyo.n ke KHazaane hai.n
ellora ke namuune hai.n ajantaa ke fasaane hai.n
kahii.n hai.n naqsh muGlo.n raajputo.n kii saqaafat ke
kahii.n manzar hai.n dilkash hind kii qaumii vajaahat ke
zabaa.n-zad ho rahii hai aaj-kal in kii dil-aavezii
ba.Daa dilkash hai in kap.Do.n kaa tarz-e-rang-aamezii
vo america ho yaa europe har ik jaa is kaa charchaa hai
hamaarii dast-baafii kaa jahaa.n me.n bol-baalaa hai
mubaarak 'taahira' hafta manaanaa dast-kaaro.n ko
KHudaa aabaad rakkhe mulk ke in honhaaro.n ko

Bano Tahira Sayeed
Nazm

aaya hai naya sal

iThlaataa hu.aa jhuum ke aaya hai nayaa saal
lahraataa hu.aa jhuum ke aaya hai nayaa saal
aaya hai nayaa saal
ai sa.ii-e-musalsal tire e.ajaaz ke sadqe
haasil ko ga.e saal kii me.araaj mubaarak
kirno.n se a.ndhere kii qabaa kholne vaale
aaGaaz ko is saal kaa ye aaj mubaarak
paiGaam ka.ii tarah ke laayaa hai nayaa saal
in.aam ka.ii tarah ke laayaa hai nayaa saal
aaya hai nayaa saal
be-laus mohabbat ke uKHuvvat ke karam se
har samt jidhar dekhe.n masarrat kii fazaa hai
afsaana-e-jamhuur kii rangiin haqiiqat
tahziib-o-tamaddun kii muravvat kii fazaa hai
har dil ke rag-o-resha pe chhaayaa hai nayaa saal
har zehn ke aa.iine pe chhaayaa hai nayaa saal
aaya hai nayaa saal
paikar the rifaaqat ke vatan-dost saraasar
maidaan-e-taraqqii me.n hamesha jo baham the
chalte rahe har haal salaabat kii Dagar par
vaabasta-e-manzil vo hamaare hii qadam the
jhelaa hai jo ik saal to paayaa hai nayaa saal
khoyaa hai jo ik saal to paayaa hai nayaa saal
aaya hai nayaa saal
nairangii-e-afkaar-o-aqaa.ed se labaalab
har chand ra.ngaa-rang hai paimaana-e-jamhuur
ik ruuh-e-vatan husn-e-saqaafat ke karam se
yak-rang hii yak-rang hai mai-KHaana-e-jamhuur
kirdaar-e-musaavaat kaa jaayaa hai nayaa saal
ik-tarfa karaamaat kaa jaayaa hai nayaa saal
aaya hai nayaa saal
laazim hai ki a.amaal ko ik aisii adaa de.n
jamhuur ke kirdaar ko kuchh aur uThaa de.n
nafrat ko ta.assub ko tah-e-KHaak sulaa de.n
tafriiq kaa taKHriib kaa har naqsh miTaa de.n
har tesha-e-ta.amiir ko mehnat kii jilaa de.n
tadbiir se jamhuur kii taqdiir banaa de.n
ham kyaa hai.n sar-e-dast zamaane ko bataa de.n
har KHvaab ko ta.abiir kii sarhad se milaa de.n
kis aan se kis baan se aaya hai nayaa saal
haa.n dekhiye kis shaan se aaya hai nayaa saal
aaya hai nayaa saal
aaya hai nayaa saal

Ram Parkash Rahi
Nazm

daraKHt-e-zard

nahii.n ho tum mire aur meraa fardaa bhii nahii.n meraa
so mai.n ne saahat-e-diiroz me.n Daalaa hai ab Deraa
mire diiroz me.n zahr-e-halaahal teG-e-qaatil hai
mire ghar kaa vahii sarnaam-tar hai jo bhii bismil hai
guzasht-e-vaqt se paimaan hai apnaa ajab saa kuchh
so ik ma.amuul hai imraan ke ghar kaa ajab saa kuchh

Jaun Eliya
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

mere school

mere school mirii yaado.n ke paikar sun le
mai.n tire vaaste rotaa huu.n baraabar sun le
tere ustaado.n ne mehnat se pa.Dhaayaa hai mujhe
terii bencho.n ne hii insaan banaayaa hai mujhe
naa-taraashiida saa hiiraa thaa taraashaa tuu ne
zehn-e-taariik ko baKHshaa hai ujaalaa tuu ne
ilm kii jhiil kaa tairaak banaayaa hai mujhe
KHauf ko chhiin ke bebaak banaayaa hai mujhe
tujh se shafqat bhii milii tujh se mohabbat bhii milii
daulat-e-ilm milii mujh ko sharaafat bhii milii
shafqate.n aisii milii hai.n mujhe ustaado.n kii
parvarish kartaa ho jaise ko.ii shahzaado.n kii
terii chaahat me.n mai.n is darja bhii kho jaataa thaa
terii bencho.n pe hii kuchh der ko so jaataa thaa

Munawwar Rana
Nazm

nai tahzib

badal jaa.egaa meyaar-e-sharaafat chashm-e-duniyaa me.n
ziyaada the jo apne zo.am me.n vo sab se kam ho.nge

Akbar Allahabadi
Nazm

tum nahin aae the jab

tum nahii.n aa.e the jab tab bhii to maujuud the tum
aa.nkh me.n nuur kii aur dil me.n lahuu kii suurat
dard kii lau kii tarah pyaar kii KHushbuu kii tarah
bevafaa vaado.n kii dildaarii kaa andaaz liye
tum nahii.n aa.e the jab tab bhii to tum aa.e the
raat ke siine me.n mahtaab ke KHanjar kii tarah
sub.h ke haath me.n KHurshiid ke saaGar kii tarah
shaaKH-e-KHuu.n-ra.ng-e-tamannaa me.n gul-e-tar kii tarah
tum nahii.n aa.oge jab tab bhii to tum aa.oge
yaad kii tarah dha.Dakte hu.e dil kii suurat
Gam ke paimaana-e-sar-shaar ko chhalkaate hu.e
barg-haa-e-lab-o-ruKHsaar ko mahkaate hu.e
dil ke bujhte hu.e a.ngaare ko dahkaate hu.e
zulf-dar-zulf bikhar jaa.egaa phir raat kaa ra.ng
shab-e-tanhaa.ii me.n bhii lutf-e-mulaaqaat kaa ra.ng
roz laa.egii sabaa kuu-e-sabaahat se payaam
roz gaa.egii sahar tahniyat-e-jashn-e-firaaq
aa.o aane kii kare.n baate.n ki tum aa.e ho
ab tum aa.e ho to mai.n kaun sii shai nazr karo
ki mire paas ba-juz mehr o vafaa kuchh bhii nahii.n
ek KHuu.n-gashta tamannaa ke sivaa kuchh bhii nahii.n

Ali Sardar Jafri
Nazm

madam

log kahte hai.n magar aap abhii tak chup hai.n
aap bhii kahiye Gariibo.n me.n sharaafat kaisii

Sahir Ludhianvi
Nazm

dosti ka hath

kare.n ye ahd ki auzaar-e-ja.ng jitne hai.n
unhe.n miTaanaa hai aur KHaak me.n milaanaa hai
kare.n ye ahd ki arbaab-e-ja.ng hai.n jitne
unhe.n sharaafat o insaaniyat sikhaanaa hai

Ali Sardar Jafri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now