Search result for "siyahkaar" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "siyahkaar"

Nazm MATCHES FOR "siyahkaar"

Nazm

o des se aane wale bata

o des se aane vaale bataa
miiraaniyo.n ke aaGosh me.n hai
aabaad vo baazaar ab ki nahii.n
talvaare.n baGal me.n daabe hu.e
phirte hai.n trahdaar ab ki nahii.n
aur bahliyo.n me.n se jhaa.nkte hai.n
turkaan-e-siyah-kaar ab ki nahii.n
o des se aane vaale bataa

Akhtar Shirani

Nazm

salgirah

kaun gustaaKH hai kyaa naam hai kyuu.n aayaa hai
pahre vaalo use KHanjar kii anii se roko
apnii banduuqo.n kii naalii se Daraa.o us ko
aur us par jo na maane use topo.n kii salaamii de do
jashn kaa din hai mirii saalgirah kaa din hai
aaj mahlo.n me.n jale.nge mah-o-anjum ke charaaG
aaj bujhte hu.e chehro.n kii zaruurat kyaa hai
aaj maayuus nigaaho.n kii zaruurat kyaa hai
kaun bebaak hai ba.Dhtaa hii chalaa aataa hai
pahre vaalo use KHanjar kii anii se roko
aadmii hai ki miraa vahm hai aaseb hai ye
us ke chehre pe to zaKHmo.n ke nishaa.n tak bhii nahii.n
goliyaa.n us ke siyah siine se Takraa ke chalii aatii hai.n
us ke ho.nTo.n pe tabassum hai ki mu.nh khole hu.e
azhdahaa taKHt nigalne ko chalaa aataa hai
maut kis bhes me.n aa.ii hai mujhe lene ko
aaj kyuu.n aa.ii hai kyuu.n aa.ii hai kyuu.n aa.ii hai
mai.n tujhe gauhar-o-almaas diye detaa huu.n
tere ThiThure hu.e haatho.n ko haraarat duu.ngaa
jashn kaa din hai mirii saalgirah kaa din hai
kaun ho kaun ho tum
ai Gariibo.n ke KHudaavand amiiro.n ke rafiiq
mai.n samajhtaa thaa mujhe aap na pahchaane.nge
mai.n ne a.ngrez kii jailo.n me.n javaanii kaaTii
mai.n ne ThiThure hu.e haatho.n se jalaa.e hai.n diye
jin kii lau aaj bhii tuufaano.n se Takraatii hai
jin ko a.ngrez kii phuu.nko.n ne bujhaanaa chaahaa
aur KHud un kii zabaa.n jal ke siyah-faam hu.ii
vo diye aaj bhii bar-lauu.n kii chiiKHo.n se la.De jaate hai.n
aap ko yaad na hogaa shaayad
kaun ho kaun ho tum
mai.n ne taariiKH kii lahro.n me.n ravaanii de dii
mai.n ne buu.Dho.n kii rag-o-pai me.n javaanii de dii
mai.n ne jhukte hu.e shaano.n ko tavaanaa.ii dii
kaar-KHaane mirii aavaaz se bedaar hu.e
aur ik merii hii aavaaz nahii.n guu.njii thii
saik.Do.n vaqt se haare hu.e insaan uThe
kuhra-e-vaqt pe chhaane ke liye
kaun ho kaun ho tum
auraaq me.n hii nahii.n aayaa huu.n
saik.Do.n vaqt ke maare hu.e insaan bhii hai.n
saik.Do.n vaqt pe chhaa.e hu.e insaan bhii hai.n
kaun ho kaun ho tum
aaj bhii ketiyo.n me.n bhuuk ugaa kartii hai
kaar-KHaano.n me.n dhu.e.n ke baadal
tauq aur aahanii zanjiiro.n me.n Dhal jaate hai.n
kaun ho kaun ho tum
aap insaan kii azmat pe yaqii.n rakhte hai.n
aap ke hukm ne kitno.n kii zabaane.n sii dii.n
aap kii mumlikat adl me.n kitne biimaar
qaid-e-tanhaa.ii me.n dam to.D chuke
kaun ho kaun ho tum
aap kii be.Diyaa.n afraad ko paaband banaa saktii hai.n
aap kii be.Diyaa.n insaan ko paaband nahii.n kar saktii.n
kal yahii sham.a jo siine me.n farozaa.n hai aaj
aap ke saare tilismaat jalaa Daalegii
kal unhii.n kheto.n me.n uj.De hu.e khaliyaano.n me.n
saal-haa-saal kii paamaal zamii.n
apne siine ke KHazaano.n ko luTaatii hogii
kaar-KHaane bhii siyahkaar KHudaa.o.n se rihaa.ii paa kar
laakho.n insaano.n kii taskiin kaa saamaa.n ho.nge
ik na.e ahd na.ii ziist kaa unvaa.n ho.nge
aur phir vaqt kaa bebaak mo.arriKH aa kar
surKH parcham ko salaamii degaa
kaun ho kaun ho tum
bhaardvaaj

Akhtar Payami

Nazm

parindon bhara aasman

log kahte hai.n
aavaaz kaa
ek chehra bhii hotaa hai
andaaz bhii jism bhii
surKH suuraj kaa sonaa
daraKHto.n ke us paar
mahtaab kii siim-guu.n mauj-e-uryaa.n
samundar kii aavezisho.n kaa
pur-asraar naGma
mohabbat kii lazzat kii garmii
kabhii shabnamii nannhii-munnii sii lorii
kahaanii
siyahkaar shab me.n
ko.ii KHuun-aaluuda baab-e-adaalat
mukaafaat kaa silsila
dil kii viiraaniyo.n se guzartaa hu.aa
ko.ii harf-e-malaamat
nadaamat

Balraj Komal

Nazm

taqaza

ab tak na bujhe dast-e-taGayyur kii adaa se
tasviir-e-gulistaa.n ko jhulaste hu.e sho.ale
ab tak na haTe apne siyahkaar sitam se
tafriiq ke farzand havasnaak luTere

Fareed Ishrati

Nazm

hubb-e-watan

is vaqt bhii jo kaam na aa.egaa vatan ke
Gaddaar hai marduud hai vo mard-e-siyahkaar

Ameer Chand Bahar

Nazm

baisakh mein barish

suukhii diivaar pe me.nh aa ke musalsal barsaa
chhat ke pahluu me.n Tikaa
dhaat kaa parnaala bahaa
shahar ko jaatii siyaahkaar sa.Dak bhiig ga.ii
dekh ke badliyaa.n ramzaan musalsal bhaagaa
khii.nch ke laa.ii havaa me.nh kaa aabii dhaagaa
khet ke beach me.n baadal kaa garebaan khulaa
aur dhartii ke khule mu.nh me.n aakaash ghulaa
bhuusa khaliyaan ke paalaan pe jaa au.ndhaa giraa
raat ke pichhle pahar gaahii kanak
bhiig ga.ii

Najma Saqib

Nazm

shikwa

ham gunaahgaar siyahkaar KHataa-kaar sahii
haala-e-rahm-o-karam se tire baahar to nahii.n
imtihaa.n aur sahii tuu to magar vaaqif hai
dil jo siine me.n dha.Daktaa hai vo patthar to nahii.n

Salman Ghazi

Nazm

jism ki qaid

muqaddas iraade
gunaaho.n ke malbuus me.n
chaaro.n jaanib
na jaane kise Dhuu.nDte hai.n
sabhii uryaa.n logo.n se kyaa puuchhte hai.n muqaddas iraade
chalo
nangii KHvaahish ko
le jaa.e.n
dasht-e-siyah-kaar tak
aur
bhaTaktii hu.ii ruuho.n ke ruu-ba-ruu
nazr KHud ko kare.n
aur un se kahe.n
suno
jism kii qaid par
bas hamaaraa nahii.n hai
hame.n jism kii qaid se tum nikaalo
gale se lagaa lo
gale se lagaa lo

Shahid Ahmad Shoaib

Nazm

KHuda ka sawal

tuu me.araaj-e-fan tuu hii fan kaa si.nghaar
musavvir huu.n mai.n tuu miraa shaahkaar

Abrar Ahmad Kashif

Nazm

tum

shaguftagii kaa lataafat kaa shaahkaar ho tum
faqat bahaar nahii.n haasil-e-bahaar ho tum
jo ek phuul me.n hai qaid vo gulistaa.n ho
jo ik kalii me.n hai pinhaa.n vo laala-zaar ho tum
halaavato.n kii tamannaa, malaahato.n kii muraad
Guruur kaliyo.n kaa phuulo.n kaa inkisaar ho tum
jise tara.ng me.n fitrat ne gungunaayaa hai
vo bhairvii.n ho, vo diipak ho vo malhaar ho tum
tumhaare jism me.n KHvaabiida hai.n hazaaro.n raag
nigaah chhe.Dtii hai jis ko vo sitaar ho tum
jise uThaa na sakii justujuu vo motii ho
jise na guu.ndh sakii aarzuu vo haar ho tum
jise na buujh sakaa ishq vo pahelii ho
jise samajh na sakaa pyaar bhii vo pyaar ho tum
KHudaa kare kisii daaman me.n jazb ho na sake.n
ye mere ashk-e-hasii.n jin se aashkaar ho tum

Kaifi Azmi

Nazm

sham-e-ayaadat

ye kaun muskuraahaTo.n kaa kaarvaa.n liye hu.e
shabaab-e-sher-o-ra.ng-o-nuur kaa dhu.aa.n liye hu.e
dhu.aa.n ki barq-e-husn kaa mahaktaa sho.ala hai ko.ii
chaTiilii zindagii kii shaadmaaniyaa.n liye hu.e
labo.n se pa.nkhu.Dii gulaab kii hayaat maa.nge hai
ka.nval sii aa.nkh sau nigaah-e-mehrbaa.n liye hu.e
qadam qadam pe de uThii hai lau zamiin-e-rah-guzar
adaa adaa me.n be-shumaar bijliyaa.n liye hu.e
nikalte baiThte dino.n kii aahaTe.n nigaah me.n
rasiile ho.nT fasl-e-gul kii daastaa.n liye hu.e
KHutuut-e-ruKH me.n jalva-gar vafaa ke naqsh sar-ba-sar
dil-e-Ganii me.n kul hisaab-e-dostaa.n liye hu.e
vo muskuraatii aa.nkhe.n jin me.n raqs kartii hai bahaar
shafaq kii gul kii bijliyo.n kii shoKHiyaa.n liye hu.e
adaa-e-husn barq-paash shola-zan nazaara-soz
fazaa-e-husn uudii uudii bijliyaa.n liye hu.e
jagaane vaale naGma-e-sahar labo.n pe maujzan
nigaahe.n nii.nd laane vaalii loriyaa.n liye hu.e
vo nargis-e-siyaah-e-niim-baaz, mai-kada-ba-dosh
hazaar mast raato.n kii javaaniyaa.n liye hu.e
taGaaful-o-KHumaar aur be-KHudii kii oT me.n
nigaahe.n ik jahaa.n kii hoshiyaariyaa.n liye hu.e
harii-bharii rago.n me.n vo chahaktaa boltaa lahuu
vo sochtaa hu.aa badan KHud ik jahaa.n liye hu.e
za-farq taa-qadam tamaam chehra jism-e-naaznii.n
latiif jagmagaahaTo.n kaa kaarvaa.n liye hu.e
tabassumash takallume takallumash tarannume
nafas nafas me.n thartharaataa saaz-e-jaa.n liye hu.e
jabiin-e-nuur jis pe pa.D rahii hai narm chhuuT sii
KHud apnii jagmagaahTo.n kii kahkashaa.n liye hu.e
''sitaara-baar o mah-chakaa.n o KHuur-fishaa.n'' jamaal-e-yaar
jahaan-e-nuur kaarvaa.n-ba-kaarvaa.n liye hu.e
vo zulf-e-KHam-ba-KHam shamiim-e-mast se dhu.aa.n dhu.aa.n
vo ruKH chaman chaman bahaar-e-jaavedaa.n liye hu.e
ba-mastii-e-jamaal-e-kaa.enaat, KHvaab-e-kaa.enaat
ba-gardish-e-nigaah daur-e-aasmaa.n liye hu.e
ye kaun aa gayaa mire qariib uzv uzv me.n
javaaniyaa.n, javaaniyo.n kii aa.ndhiyaa.n liye hu.e
ye kaun aa.nkh pa.D rahii hai mujh par itne pyaar se
vo bhuulii sii vo yaad sii kahaaniyaa.n liye hu.e
ye kis kii mahkii mahkii saa.nse.n taaza kar ga.ii.n dimaaG
shabo.n ke raaz nuur-e-mah kii narmiyaa.n liye hu.e
ye kin nigaaho.n ne mire gale me.n baahe.n Daal dii.n
jahaan bhar ke dukh se dard se amaa.n liye hu.e
nigaah-e-yaar de ga.ii mujhe sukuun-e-be-karaa.n
vo be-kahii vafaa.o.n kii gavaahiyaa.n liye hu.e
mujhe jagaa rahaa hai maut kii Gunuudgii se kaun
nigaaho.n me.n suhaag-raat kaa samaa.n liye hu.e
mirii fasurda aur bujhii hu.ii jabii.n ko chhuu liyaa
ye kis nigaah kii kiran ne saaz-e-jaa.n liye hu.e
sute se chehre par hayaat rasmasaatii muskuraatii
na jaane kab ke aa.nsu.o.n kii daastaa.n liye hu.e
tabassum-e-sahar hai aspataal kii udaas shaam
ye kaun aa gayaa nashaat-e-be-karaa.n liye hu.e
tire na aane tak agarche mehrbaa.n thaa ik jahaa.n
mai.n ro ke rah gayaa huu.n sau Gam-e-nihaa.n liye hu.e
zamiin muskuraa uThii ye shaam jagmagaa uThii
bahaar lahlhaa uThii shamiim-e-jaa.n liye hu.e
fazaa-e-aspataal hai ki ra.ng-o-buu kii karvaTe.n
tire jamaal-e-laala-guu.n kii daastaa.n liye hu.e
'firaaq' aaj pichhlii raat kyuu.n na mar rahuu.n ki ab
hayaat aisii shaame.n hogii phir kahaa.n liye hu.e
(2)
magar nahii.n kuchh aur maslahat thii us ke aane me.n
jamaal-o-diid-e-yaar the nayaa jahaa.n liye hu.e
isii na.e jahaa.n me.n aadmii bane.nge aadmii
jabii.n pe shaahkaar-e-dahr kaa nishaa.n liye hu.e
isii na.e jahaa.n me.n aadmii bane.nge devtaa
tahaarato.n kaa farq-e-paak par nishaa.n liye hu.e
KHudaa.ii aadmii kii hogii is na.e jahaan par
sitaaro.n ke hai.n dil ye pesh-go.iiya.n liye hu.e
sulagte dil sharar-fishaa.n o sho.ala-baar barq-paash
guzarte din hayaat-e-nau kii surKHiyaa.n liye hu.e
tamaam qaul aur qasam nigaah-e-naaz-e-yaar thii
tuluu-e-zindagii-e-nau kii daastaa.n liye hu.e
nayaa janam hu.aa miraa ki zindagii na.ii milii
jiyuu.ngaa shaam-e-diid kii nishaaniyaa.n liye hu.e
na dekhaa aa.nkh uThaa ke ahd-e-nau ke parda-daaro.n ne
guzar gayaa zamaana yaad-e-raftagaa.n liye hu.e
ham inqilaabiyo.n ne ye jahaa.n bachaa liyaa magar
abhii hai ik jahaa.n vo bad-gumaaniyaa.n liye hu.e

Firaq Gorakhpuri

Nazm

shahkar

musavvir mai.n tiraa shahkaar vaapas karne aayaa huu.n

Sahir Ludhianvi

Nazm

aurat

banaayaa hai musavvir ne hasii.n shahkaar aurat ko
alag pahchaan detaa hai kahaanii-kaar aurat ko

Arshad Mahmood Arshad

Nazm

ustad hamare

hai.n dast-nigar in ke hii shahkaar hamaare
ustaad ye qaumo.n ke hai.n me.amaar hamaare

Mohammad Asadullah

Nazm

jawan aag

ye javaa.n KHuun siyah-raat kaa rahne degaa
dukh me.n Duube hu.e haalaat na rahne degaa

Habib Jalib

Nazm

mahatma-gandhi ka qatl

haatho.n se bujhaayaa KHud apne vo sho.ala-e-ruuh paak-e-vatan
daaG us se siyah-tar ko.ii nahii.n daaman pe tire ai KHaak-e-vatan

Anand Narayan Mulla

Nazm

naya husn

tere qaamat me.n hai insaa.n kii bulandii kaa vaqaar
duKHatar-e-shahr hai, tahziib kaa shahkaar hai tuu
ab na jhapkegii palak, ab na haTe.ngii nazre.n
husn kaa mere liye aaKHirii me.aar hai tuu

Kaifi Azmi

Nazm

apni taswir mujhe aap banani hogi

mere fankaar
''mujhe KHuub taraashaa tuu ne
aa.nkh niilam kii
badan chaa.ndii kaa
yaaquut ke lab
ye tire
zauq-e-talab ke bhii hai.n
me.aar ajab
paa.o.n me.n mere
ye paazeb
sajaa dii tuu ne
nuqra.ii taar me.n aavaaz mu.nDhaa dii tuu ne
ye javaahar se ja.Dii
qiimtii muurat merii
apne saamaan-e-ta.ayyush me.n lagaa dii tuu ne
mai.n ne maanaa
ki hasii.n hai tiraa shahkaar
magar
tere shahkaar me.n
mujh jaisii ko.ii baat nahii.n
tujh ko niilam sii
nazar aatii hai.n aa.nkhe.n merii
dard ke in me.n samundar
nahii.n dekhe tuu ne
tuu ne
jab kii
lab o ruKHsaar kii KHattaatii kii
jo varaq likkhe the
dil par
nahii.n dekhe tuu ne
mere fankaar
tire zauq
tire fan kaa kamaal
mere pindaar kii qiimat
na chukaa paa.egaa
tuu ne but yaa to taraashe
yaa taraashe hai.n KHudaa
tuu bhalaa kyaa mirii tasviir
banaa paa.egaa
tere auraaq se
ye shakl miTaanii hogii
apnii tasviir
mujhe aap banaanii hogii
hosh bhii
jur.at-e-guftaar bhii
biinaa.ii bhii
jur.at-e-ishq bhii hai
zabt kii ra.anaa.ii bhii
jitne jauhar hai.n numuu ke
mirii ta.amiir me.n hai.n
dekh ye ra.ng
jo taaza mirii tasviir me.n hai.n

Naseem Syed

Nazm

haweli

ai KHudaa-e-do-jahaa.n ai vo jo har ik dil me.n hai
dekh tere haath kaa shahkaar kis manzil me.n hai

Makhdoom Mohiuddin

Nazm

coffee-house

din-bhar coffee-house me.n baiThe kuchh duble-patle naqqaad
bahs yahii karte rahte hai.n sust adab kii hai raftaar
sirf adab ke Gam me.n Galtaa.n chalne phirne se laachaar
chehro.n se zaahir hotaa hai jaise barso.n ke biimaar
urdu-adab me.n Dhaa.ii hai.n shaa.er 'miir' o 'Gaalib' aadhaa 'josh'
yaa ik-aadh kisii kaa misra yaa 'iqbaal' ke chand ash.aar
yaa phir nazm hai ik chuuhe par haamid-'madnii' kaa shahkaar
ko.ii nahii.n hai achchhaa shaa.er ko.ii nahii.n afsaana-nigaar
'manTo' 'kirshn' 'nadiim' aur 'bedii' in me.n jaan to hai lekin
aib ye hai in ke haatho.n me.n kund zabaa.n kii hai talvaar
'aalii' afsar 'inshaa' baabuu 'naasir' 'miir' ke bar-KHurdaar
'faiz' ne jo ab tak likkhaa hai kyaa likkhaa hai sab be-kaar
un ko adab kii sehhat kaa Gam mujh ko un kii sehhat kaa
ye bechaare dukh ke maare jiine se hai.n kyuu.n be-zaar
husn se vahshat ishq se nafrat apnii hii suurat se pyaar
KHanda-e-gul par ek tabassum girya-e-shabnam se inkaar

Habib Jalib

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now