Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tane"

Nazm MATCHES FOR "tane"

Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

girhen

mujh ko bhii tarkiib sikhaa ko.ii yaar julaahe
aksar tujh ko dekhaa hai ki taanaa bunte
jab ko.ii taagaa TuuT gayaa yaa KHatm hu.aa
phir se baa.ndh ke
aur siraa ko.ii jo.D ke us me.n
aage bun.ne lagte ho
tere is taane me.n lekin
ik bhii gaa.nTh girah buntar kii
dekh nahii.n saktaa hai ko.ii

Gulzar
Nazm

mujassama

tere sab rang hayuule ke ye be-jaan nuquush
jaise marbuut KHayaalaat ke taane-baane
ye tirii saa.nvlii rangat ye pareshaan KHutuut
baarhaa jaise miTaayaa ho inhe.n duniyaa ne
resha-e-sa.ng se khii.nchii hu.ii zulfe.n jaise
raaste siina-e-kohsaar pe bal khaate hai.n
abruu.o.n kii jhukii mehraabo.n me.n jaamid palke.n
jis tarah tiir kamaano.n me.n ulajh jaate hai.n

Ahmad Faraz
Nazm

daraKHt mere dost

daraKHt! mere dost
tum mil jaate ho kisii na kisii mo.D par
aur aasaan kar dete ho safar
tumhaare pair kii u.ngliyaa.n
jamii rahii.n paataal ke bhedo.n par
qaa.em rahe mere dost
tumhaare tane kii mataanat aur quvvat
dhuup aur baarish tumhe.n apne tohfo.n se navaaztii rahe
tum bahut pur-vaqaar aur saada ho
mere thaile ko jaan.naa chaahte ho
zaruur.... ye lo mai.n ise kholtaa huu.n
roTiyaa.n du.aa.e.n aur nazme.n
mere paas is se ziyaada kuchh nahii.n
ek shaa.er ke paas is se ziyaada kuchh nahii.n hotaa
dost dukh denaa tum ne siikhaa hii nahii.n
tum ne na to mujh se shaa.erii kaa matlab puuchhaa
aur na kabhii mere mutaale.e par shak kiyaa
aisaa hii honaa chaahiye dosto.n ko
agar mere paas ik aur zindagii hotii to
to mai.n apnii pahlii zindagii tumhaarii ja.Do.n par guzaar detaa
magar mai.n ghar se KHaandaan bhar KHushiyo.n ke liye niklaa huu.n
aur vahaa.n meraa intizaar kiyaa jaa rahaa hai
tum ne mere dost
haa.n tum ne
bahut kuchh sikhaayaa hai mujhe
maslan zamiin aur aasmaanii bijlii
aur havaa
aur intizaar
aur duusro.n ke liye zinda rahnaa
bahut qiimtii hai.n ye baate.n
mai.n kyaa de saktaa huu.n is fayyaazii kaa javaab
mere paas tumhaare liye
ek roTii aur du.aa hai
roTii: tumhaarii chiyuu.nTiyo.n ke liye
du.aa tumhaare aaKHirii din ke liye
mujhe ma.aluum hai tum ne kulhaa.Dii ke musaafahe
aur aarii kii ha.nsii se kabhii KHauf nahii.n khaayaa
magar tum rok nahii.n sakte inhe.n
ko.ii bhii nahii.n rok saktaa
KHudaa kare
KHudaa kare tumhaarii shaaKHo.n se ek jho.npa.Dii banaa.ii jaa.e
baazu.o.n ke ghere me.n na aane vaale tumhaare
tane kii lak.Dii
bahut kaafii hai
do pahiyo.n aur ek kashtii ke liye
dost: ham phir mile.nge
musaafir aur chhak.Daa
musaafir aur kashtii
kahii.n na kahii.n ham phir ek saath ho.nge
kahii.n na kahii.n
ek saath.... ham saamnaa kare.nge
havaa kaa aur raasto.n kaa
masarrat aur maut kaa....

Sarvat Husain
Nazm

main aur main!

mai.n huu.n mai.n
vo jis kii aa.nkho.n me.n jiite jaagte dard hai.n
dard ki jin kii ham-raahii me.n dil raushan hai
dil jis se mai.n ne ik din ik ahd kiyaa thaa
ahd ki dono.n ek hii aag me.n jalte rahe.nge
aag ki jis me.n jal kar jism hu.aa KHaakistar
jism ki jis ke kachche zaKHm bahut dukhte the
zaKHm ki jin kaa marham vaqt ke paas nahii.n hai
vaqt ki jis kii zad me.n saare sayyaare hai.n
sayyaare jo qaa.em hai.n apnii hii kashish par
aur kashish ke taane-baane TuuT chale hai.n
kaun tamaashaa.ii hai? mai.n huu.n... aur tamaashaa
mai.n huu.n mai.n!

Saqi Faruqi
Nazm

nazm

tire puure badan par ik muqaddas aag kaa pahra hai
jo terii taraf ba.Dhte hu.e haatho.n ke naaKHun rok letaa hai
tire ho.nTo.n se nikle saa.ns kii KHushbuu
dar-o-diivaar se rasta banaa kar saare barr-e-'aazamo.n me.n phail saktii hai
tirii baa.nhe.n abad ko jaane vaalii shaahraahe.n hai.n
tirii daa.ii.n hathelii kii lakiire.n duusrii duniyaa.o.n ke naqshe hai.n jo in munshiyo.n ke bas se baahar hai.n
tirii aa.nkhe.n nahii.n ye devtaa.o.n kii panah-gaahe.n hai.n
jin me.n vaqt jaise zahr kaa tiryaaq hai
tirii zulfo.n kii vus'at is jahaa.n kii intihaa.o.n se pare tak hai
tirii gardan kisii jannat ke paakiiza daraKHto.n ke tane ko dekh kar tarshii ga.ii hai
hamaare jism par se terii parchhaa.ii guzar jaa.e
to mumkin hai ki ham is maut jaise KHauf se aazaad ho jaa.e.n
hamaare paas aisaa kyaa hai jo tujh ko bataa kar ham tujhe qaa.il kare.n
bas itnaa hai ki apne lafz barsaa kar tirii chhatrii pe baarish phe.nk de.nge
yaa tire chehre pe apnii nazm kii ik satr se chhaa.nv kare.nge
dhuup de de.nge
magar kyaa faa.eda is kaa ki mausam KHud tire juuto.n ke tasmo.n se ba.ndhe hai.n
tire hamraah chalne kii ko.ii KHvaahish agar dil me.n kabhii thii bhii
to ham ne tark kar dii hai
ham is laa.iq nahii.n hai.n
hame.n maa'luum hai ki agle vaqto.n me.n ye log
tire pairo.n ke saa.ncho.n se na.ii samto.n ke andaaze lagaa.e.nge

Tahzeeb Hafi
Nazm

zindagi

aaj a.ndheraa mirii nas nas me.n utar jaa.egaa
aa.nkhe.n bujh jaa.e.ngii bujh jaa.e.nge ehsaas o shu.uur
aur ye sadiyo.n se jaltaa saa sulagtaa saa vajuud
is se pahle ki sahar maathe pe shabnam chhi.Dke
is se pahle ki mirii beTii ke vo phuul se haath
garm ruKHsaar ko ThanDak baKHshe.n
is se pahle ki mire beTe kaa mazbuut badan
tan-e-mafluuj me.n shaktii bhar de
is se pahle ki mirii biivii ke ho.nT
mere ho.nTo.n kii tapish pii jaa.e.n
raakh ho jaa.egaa jalte jalte
aur phir raakh bikhar jaa.egii

Kaifi Azmi
Nazm

ban-bas

mere shahr ke saare raste band hai.n logo
mai.n is shahr kaa naGma-gar
jo do ik mausam Gurbat ke dukh jhel ke aayaa
taaki apne ghar kii diivaaro.n se
apnii thakii hu.ii aur tarsii hu.ii
aa.nkhe.n sahlaa.uu.n
apne darvaaze ke utarte roGan ko
apne ashko.n se saiqal kar luu.n
apne chaman ke jale hu.e paudo.n
aur gard-aaluud daraKHto.n kii
murda shaaKHo.n par bain karuu.n
har mahjuur sutuun ko itnaa TuuT ke chuumuu.n
mere labo.n ke KHuun se
un ke naqsh-o-nigaar sabhii jii uThe.n
galii ke logo.n ko itnaa dekhuu.n
itnaa dekhuu.n
merii aa.nkhe.n
barso.n kii tarsii hu.ii aa.nkhe.n
chehro.n ke aa.ngan ban jaa.e.n
phir mai.n apnaa saaz uThaa.uu.n
aa.nsu.o.n aur muskaano.n se jhilmil jhilmil
nazme.n Gazle.n giit sunaa.uu.n
apne pyaaro.n
dard ke maaro.n kaa darmaa.n ban jaa.uu.n
lekin mere shahr ke saare rasto.n par
ab baa.D hai lohe ke kaa.nTo.n kii
shah darvaaze par kuchh pahre-daar kha.De hai.n
jo mujh se aur mujh jaise dil vaalo.n kii
pahchaan se aarii
mere saaz se
sa.ngiino.n se baat kare.n
mai.n un se kahtaa huu.n
dekho
mai.n is shahr kaa naGma-gar huu.n
barso.n baa'd ka.Dii raaho.n kii
saarii aziyyat jhel ke ab vaapas aayaa huu.n
us miTTii kii KHaatir
jis kii KHushbu.e.n
duniyaa bhar kii do-shiizaa.o.n ke jismo.n kii mahko.n se
aur saare jahaa.n ke
sabhii gulaabo.n se
ba.Dh kar hai
mujh ko shahr me.n
mere shahr me.n jaane do
lekin tane hu.e nezo.n ne
mere jism ko yuu.n barmaayaa
mere saaz ko yuu.n rezaayaa
meraa humaktaa KHuun aur mere sisakte naGme
shah-darvaaze kii dahliiz se
riste riste
shahr ke andar jaa pahu.nche hai.n
aur mai.n apne jism kaa malba
saaz kaa laasha
apne shahr ke shah-darvaaze
kii dahliiz pe chho.D ke
phir anjaane shahro.n kii shahraaho.n par
majbuur-e-safar huu.n
jin ko taj kar ghar aayaa thaa
jin ko taj kar ghar aayaa thaa

Ahmad Faraz
Nazm

zamana KHuda hai

''zamaana KHudaa hai use tum buraa mat kaho''
magar tum nahii.n dekhte zamaana faqat resmaan-e-KHayaal
subuk-maayaa, naazuk, taviil
judaa.ii kii arzaa.n sabiil!
vo sub.he.n jo laakho.n baras pesh-tar thii.n,
vo shaame.n jo laakho.n baras baa'd ho.ngii,
unhe.n tum nahii.n dekhte, dekh sakte nahii.n
ke maujuud hai.n ab bhii, maujuud hai.n vo kahii.n
magar ye nigaaho.n ke aage jo rassii tanii hai
use dekh sakte ho, aur dekhte ho
ke ye vo adam hai
jise hast hone me.n muddat lagegii
sitaaro.n ke lamhe, sitaaro.n ke saal!

Noon Meem Rashid
Nazm

tumne likkha hai

apne hii likkhe hu.e chand KHato.n kii KHaatir
mujh se KHaa.if hii nahii.n KHud se bhii bezaar ho tum
kashtii-e-husn kii TuuTii hu.ii patvaar ho tum
tum ho KHud apne hii ehsaas kii Thukraa.ii hu.ii
apne anjaam se sahmii hu.ii ghabraa.ii hu.ii
kis liye aaj nazar aatii ho kho.ii kho.ii
khelne hii kii tamannaa thii to mujh se kahtii.n
tumhe.n baazaar se laa detaa khilaunaa ko.ii
aaj kii baat nahii.n baat bahut der kii hai
mai.n ne samjhaa thaa mirii ruuh kii aavaaz ho tum
nashsha-e-husn kii ik lahar ho machlii hu.ii lahar
ik lajaataa hu.aa sharmaataa hu.aa raaz ho tum
tum ho vo raaz ki jis raaz ko har lamhe ne
sher-o-naGma kii fazaa.o.n me.n sajaa.e rakkhaa
tum ho vo raaz ki jis raaz kii ra.anaa.ii ko
mai.n ne ehsaas ke siine se lagaa.e rakkhaa
vo lajaataa hu.aa sharmaataa hu.aa raaz jise
mai.n ne apnii bhii nigaaho.n se chhupaa.e rakkhaa
jii me.n aataa hai ki is raaz ko rusvaa kar duu.n
kyuu.n na har naaz ko andaaz ko rusvaa kar duu.n
to.D duu.n shoKH khanakte hu.e gajro.n kaa Guruur
mast paazeb kii aavaaz ko rusvaa kar duu.n
jii me.n aataa hai ki mai.n bhii tumhe.n badnaam karuu.n
tumhe.n badnaam karuu.n aur sar-e-aam karo
aaKHir insaan huu.n mai.n bhii ko.ii patthar to nahii.n
mai.n bhii siine me.n dha.Daktaa hu.aa dil rakhtaa huu.n
mujh ko bhii pyaar se KHvaabo.n se tumhaarii hii tarah
mujh ko bhii apnii javaa.n-saal uma.nge.n hai.n aziiz
merii fitrat ko bhii hai ashk-o-tabassum me.n tamiiz
mai.n ne sochaa hai ki mai.n bhii tumhe.n badnaam karuu.n
lekin afsos ki ye mujh se nahii.n ho saktaa
tum ne samjhaa na mohabbat ke ishaaro.n kaa mizaaj
tum ne dekhii na dha.Dakte hu.e jazbo.n kii sarisht
mere vijdaan ne taKHliiq kiyaa thaa jis ko
tum ne KHud aap jalaayaa hai vo KHvaabo.n kaa bahisht
tum ne jis tarah jalaayaa hai rulaayaa hai mujhe
aaj kyuu.n mai.n bhii usii tarah rulaa.uu.n na tumhe.n
dekh paa.e.ngii na jis ruKH ko tumhaarii aa.nkhe.n
aaj tasviir kaa vo ruKH bhii dikhaa.uu.n na tumhe.n?
kaash tum ne kabhii sochaa kabhii samjhaa hotaa
mai.n ne kyaa kuchh na kiyaa husn kii azmat ke liye
kaun se dukh na sahe kaun se ta.ane na sune
fikr o ehsaas ke shaadaab gulistaano.n se
tum ne kaliyaa.n hii chunii.n mai.n ne to kaa.nTe bhii chune
mai.n hii begaana rahaa apnii haqiiqat se magar
tum ne haalaat ke unvaan ko pahchaan liyaa
apne bahke hu.e jazbaat kii taskii.n ke liye
tum ne mu.nh-zor javaanii kaa kahaa maan liyaa
tum ne pur-josh rivaayaat kii rau me.n bah kar
kar diyaa gardish-e-dauraa.n ke havaale mujh ko
kaun ab chaa.nd sitaaro.n me.n mujhe le jaa.e
kaun ab zehn kii zulmat se nikaale mujh ko
ishq aur husn ko badnaam kare kyaa ma.anii
ye to vo daaG hai kirdaar kii peshaanii par
vaqt sadiyo.n jise ro.e to nahii.n dho saktaa
kaun puuchhegaa bhalaa mujh se mire dil kii muraad
kitnaa gahraa hai mohabbat ke taqaazo.n kaa tazaad
mai.n to kahtaa huu.n ki tum pyaar se jholii bhar do
tum ne likkhaa hai mire KHat mujhe vaapas kar do

Prem Warbartani
Nazm

ammi ki yaad mein

ammii kii ye jaa-e-namaaz mujhe de do
mujhe pata hai
is me.n kitnii raushan sub.he.n jazb hu.ii hai.n
kitnii sannaaTii do-pahre.n
is kii siivan me.n zinda hai.n
maGrib ke jhaT-paT anvaar kii shaahid hai ye
aaKHir shab kaa girya
us ke taane-baane kaa hissa hai
mujhe pata hai
ammii ke paakiiza sajdo.n kii sargoshii
us ke kaano.n me.n zinda hai
us ke sachche sachche sajde
dekho kaise chamak rahe hai.n
un ke lams kii KHushbuu
kaisii phuuT rahii hai
ammii kii ye jaa-e-namaaz ba.Dii daulat hai
ammii kii ye jaa-e-namaaz mujhe de do

Rashid Jamaal Farooqi
Nazm

marne wale se jalan

zaraa saa Gam nahii.n chehre pe in ke
miyaa.n sar par ko.ii ruumaal hii rakh lo
inhe.n to maut aanaa hii nahii.n hai
vahii ta.ane
vahii fiqre
abhii tak meraa piichhaa kar rahe hai.n har janaaze me.n
mai.n apnii chaal kii raftaar tho.Dii aur kam kar ke
nikal aataa huu.n baahar bhii.D se
aur ruk ke ik dukaan par cigarette jalaataa huu.n
janaaza duur hotaa jaa rahaa hai
ye sab kyaa hai?
adaakaarii nahii.n aatii mujhe to kyaa karuu.n mai.n
aur sachchii baat kah duu.n to mujhe paagal samajh legii ye duniyaa
haa.n ye sach hai
mujhe rattii baraabar Gam nahii.n hotaa kisii kii maut kaa
aur ye bhii sun lo
mirii jis muskuraahaT par yahaa.n naaraaz hai.n sab
sabab is kaa jalan hai
jo mai.n mahsuus kartaa huu.n kisii bhii marne vaale se
ku.Dhan hotii hai mujh ko soch kar
ki mai.n jis imtihaa.n ke KHauf se behaal aur be-chain phirtaa huu.n
vo ye saahab
jo kaa.ndho.n par hai.n
un kaa ho chukaa
aur meraa baaqii hai

Shariq Kaifi
Nazm

sathi

phuul kii KHushbuu ha.nstii aa.ii
mere basere ko mahkaane
mai.n KHushbuu me.n KHushbuu mujh me.n
us ko mai.n jaanuu.n mujh ko vo jaane
mujh se chhuu kar mujh me.n bas kar
is kii bahaare.n us ke zamaane
laakho.n phuulo.n kii mahkaare.n
rakhte hai.n gulshan viiraane
mujh se alag hai.n mujh se judaa hai.n
mai.n begaana vo begaane
un ko bikheraa un ko u.Daayaa
dast-e-KHizaa.n ne mauj-e-sabaa ne
bhuulaa-bhaTkaa naadaa.n qatra
aa.ankho.n kii putlii ko sajaane
aa.nsuu ban kar dau.Daa aayaa
merii palke.n us ke Thikaane
us kaa thiraknaa us kaa ta.Dapnaa
mere qisse mere fasaane
us kii hastii merii hastii
us ke motii mere KHazaane
baaqii saare gauhar-paare
KHaak ke zarre ret ke daane
parbat kii uu.nchii choTii se
daaman phailaayaa jo ghaTaa ne
ThanDii havaa ke ThanDe jho.nke
be-KHud aavaara mastaane
apnii ThanDak le kar aa.e
merii aag me.n ghul-mil jaane
un kii hastii kaa pairaahan
merii saa.ns ke taane-baane
un ke jhakole merii uma.nge.n
un kii navaa.e.n mere taraane
baaqii saare tuufaano.n ko
jazb kiyaa pahnaa-e-fazaa ne
fitrat kii ye guunaaguunii
gulshan bin vaadii viiraane
kaa.nTe kaliyaa.n nuur a.ndheraa
anjuman.en sham.e.n parvaane
laakho.n shaatir laakho.n mohre
phaile hai.n shatranj ke KHaane
jaantaa huu.n mai.n ye sab kyaa hai.n
sahbaa se KHaalii paimaane
bhuukii miTTii ko sau.npe hai.n
duniyaa ne apne nazraane
jis ne meraa daaman thaamaa
aayaa jo mujh me.n bas jaane
mere tuufaano.n me.n bahne
merii maujo.n me.n lahraane
mere soz-e-dil kii lau se
apne man kii jot jagaane
ziist kii pahnaa.ii me.n phaile
maut kii giiraa.ii ko na jaane
us kaa barbat mere naGme
us ke gesuu mere shaane
merii nazre.n us kii duniyaa
merii saa.nse.n us ke zamaane

Majeed Amjad
Nazm

sher bechaara

sher jangal me.n hai udaas bahut
jaanvar kam hai.n aur ghaas bahut
sochtaa hai ki kyaa kare.n ab ham
kar liyaa Gaur aur qayaas bahut
maa-badaulat kaa ho gayaa pa.Daa
thii kabhii apnii dho.ns-dhaa.ns bahut
sab re.aayaa chalii ga.ii zoo me.n
naukrii aa.ii sab ko raas bahut
sab ke jangal ko chho.D jaane se
ho gayaa hai hamaaraa loss bahut
khaane piine ke pa.D ga.e laale
chaahiye family ko maas bahut
bachche udham machaa.e rakhte hai.n
in ko lagtii hai bhuuk pyaas bahut
shernii ne bhii roz la.D la.D kar
kar diyaa hai hamaaraa naas bahut
vo samajhtii hai aaj bhii haigaa
maal-o-daulat hamaare paas bahut
roz make-up kaa chaahiye saamaa.n
aur darkaar hai.n libaas bahut
us se shikve shikaayate.n sun kar
ta.ane detii hai ham ko saas bahut
jii me.n aataa hai KHud-kushii kar le.n
zindagaanii se hai.n niraas bahut
par kabhii sochte hai.n shahr chale.n
suu.ngh lii ja.ngalo.n kii baas bahut
jaa ke circus me.n naukrii kar le.n
gar mile.n to hai.n sau pachaas bahut

Ahmad Hatib Siddiqi
Nazm

purwanchal

mashriqii UP curfew me.n
ye dhartii kitnii sundar hai
ye sundar aur dukhii dhartii
ye dhaanii aa.nchal puurab kaa
tez raftaar rail ke saath
havaa me.n u.Dtaa jaataa hai
pa.Daa jhil-mil lahraataa hai
duur tak hare khet khaliyaan
ye dhartii aurat ko.ii kisaan
sambhaale sar par bhaarii bojh
chalii hai khet se ghar kii or
vahii ghar jis kii chhat par aaj
krodh kaa gidh ma.nDraataa hai
jhapaT kar par phailaataa hai
os se giilaa hai sabza
ki giile hai.n mere do nain
pa.De maaTii patthar ke Dher
vahii masjid mandir ke pher
tane logo.n ke tevar dekh
isii dhartii par soyaa puut
jaag kar tumhe.n manaataa hai
'kabiiraa' kuchh samjhaataa hai
jahaa.n ho.n nafrat ke ghamsaan
nahii.n rahte us jaa bhagvaan
nahii.n kartaa hai nazar rahiim
nahii.n karte hai.n pheraa raam
tumhaarii minnat kartaa hai
KHaak par siis jhukaataa hai
'Kabiiraa' kuchh samjhaataa hai
isii sarjuu nadiyaa ke paar
kamal-kunjo.n par jahaa.n bahaar
kha.De hai.n hare baa.ns ke jhunD
ga.Daa hai gautam kaa sandesh
khile hai.n jahaa.n basantii phuul
khudaa hai patthar par updesh
a.De jab do firqo.n kii aan
tule ho.n de dene par jaan
hai aslii jiit kii bas ye riit
ki dono.n jaa.e.n baraabar jiit
natiija-KHez yahii anjaam
na samjho varna ja.ng tamaam
hu.ii jis yudh me.n ik kii haar
vo hotaa rahegaa baaram-baar
na dono.n jab tak miT jaa.e.n
na dono.n jaa.e.n baraabar haar
yahii Takraa.o kaa hai qaanuun
yahii gautam kaa uttam gyaan
ki jis ke aage ek jahaan
adab se siis jhukaataa hai
tumhii to vaaris the is ke
tumhe.n kyuu.n bisraa jaataa hai
saje rahnumaa ke sar dastaar
pa.De.n paa.nDav ke gale me.n haar
jale hai.n jin ke chuulhe roz
bhare hai.n jin ke sadaa bhanDaar
are tuu muurakh kyuu.n har baar
jaan kar dhokaa khaataa hai
lahuu me.n aap nahaataa hai

Fahmida Riaz
Nazm

ek purani kahani

kisii shahr me.n ik kafan-chor aayaa
jo raato.n ko qabro.n me.n suuraaKH kar ke
tan-e-kushtagaa.n se kafan khii.nch letaa
aaKHir-e-kaar pak.Daa gayaa
aur us ko munaasib sazaa ho ga.ii

Zehra Nigaah
Nazm

Khaali makan

jaale tane hu.e hai.n ghar me.n ko.ii nahii.n
''ko.ii nahii.n'' ik ik konaa chillaataa hai
diivaare.n uTh kar kahtii hai.n ''ko.ii nahii.n''
''ko.ii nahii.n'' darvaaza shor machaataa hai
ko.ii nahii.n is ghar me.n ko.ii nahii.n lekin
ko.ii mujhe is ghar me.n roz bulaataa hai
roz yahaa.n mai.n aataa huu.n har roz ko.ii
mere kaan me.n chupke se kah jaataa hai
''ko.ii nahii.n is ghar me.n ko.ii nahii.n pagle
kis se milne roz yahaa.n tuu aataa hai''

Mohammad Alvi
Nazm

id ka mela

pagDanDii jagmag manDii hai baa.nso.n par tambuu taane hai.n
kuchh na.e navele hotel hai.n kuchh restaurant puraane hai.n
har Dha.ng ke saste khaane hai.n har rang ke filmii gaane hai.n
kuchh chalte phirte chhoTe chhoTe gashtii ne.amat-KHaane hai.n
tar halva garm ka.Daahii me.n do loTe hai.n ik Thela hai
yaaro ye iid kaa mela hai

Syed Zameer Jafri
Nazm

aag ke pas

vo daraKHto.n ke tanomand tane
apne aa.inda ke KHvaabo.n me.n asiir
gard-baad aa hii ga.e
un kii rihaa.ii kaa vasiila ban kar
KHud se mahjuurii-e-naagaah kaa hiila ban kar
aa.e aur chal bhii diye
tuul-e-alamnaak kii dahliiz pe
ruKHsat kah kar
aur vo laakho.n baras soch me.n
aa.inda ke mauhuum me.n KHvaabiida rahe

Noon Meem Rashid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now