Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "vahdat"

Nazm MATCHES FOR "vahdat"

Nazm

ai ishq hamein barbaad na kar

jii chaahtaa hai ik duusre ko yuu.n aaTh pahar ham yaad kare.n
aa.ankho.n me.n basaa.e.n KHvaabo.n ko aur dil me.n KHayaal aabaad kare.n
KHalvat me.n bhii ho jalvat kaa samaa.n vahdat ko du.ii se shaad kare.n

Akhtar Shirani
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

hindustani bachchon ka qaumi git

chishtii ne jis zamii.n me.n paiGaam-e-haq sunaayaa
naanak ne jis chaman me.n vahdat kaa giit gaayaa
taataariyo.n ne jis ko apnaa vatan banaayaa
jis ne hijaaziyo.n se dasht-e-arab chhu.Daayaa
meraa vatan vahii hai meraa vatan vahii hai
yunaaniyo.n ko jis ne hairaan kar diyaa thaa
saare jahaa.n ko jis ne ilm o hunar diyaa thaa
miTTii ko jis kii haq ne zar kaa asar diyaa thaa
turko.n kaa jis ne daaman hiiro.n se bhar diyaa thaa
meraa vatan vahii hai meraa vatan vahii hai
TuuTe the jo sitaare faaras ke aasmaa.n se
phir taab de ke jis ne chamkaa.e kahkashaa.n se
vahdat kii lai sunii thii duniyaa ne jis makaa.n se
miir-e-arab ko aa.ii ThanDii havaa jahaa.n se
meraa vatan vahii hai meraa vatan vahii hai
bande kaliim jis ke parbat jahaa.n ke siinaa
nuuh-e-nabii kaa aa kar Thahraa jahaa.n safiinaa
rif.at hai jis zamii.n kii baam-e-falak kaa ziinaa
jannat kii zindagii hai jis kii fazaa me.n jiinaa
meraa vatan vahii hai meraa vatan vahii hai

Allama Iqbal
Nazm

ahl-e-dil aur bhi hain

sar salaamat hai to kyaa sa.ng-e-malaamat kii kamii
jaan baaqii hai to paikaan-e-qazaa aur bhii hai.n
munsif-e-shahr kii vahdat pe na harf aa jaa.e
log kahte hai.n ki arbab-e-jafaa aur bhii hai.n

Sahir Ludhianvi
Nazm

hindi islam

hai zinda faqat vahdat-e-afkaar se millat
vahdat ho fanaa jis se vo ilhaam bhii ilhaad
vahdat kii hifaazat nahii.n be-quvvat-e-baazuu
aatii nahii.n kuchh kaam yahaa.n 'aql-e-KHudaa-daad
ai mard-e-KHudaa tujh ko vo quvvat nahii.n haasil
jaa baiTh kisii Gaar me.n allaah ko kar yaad
miskiinii-o-mahkuumii-o-naumiidii-e-jaaved
jis kaa ye tasavvuf ho vo islaam kar iijaad
mullaa ko jo hai hind me.n sajde kii ijaazat
naadaa.n ye samajhtaa hai ki islaam hai aazaad

Allama Iqbal
Nazm

gulzar-e-watan

phuulo.n kaa kunj-e-dilkash bhaarat me.n ik banaa.e.n
hubb-e-vatan ke paude is me.n na.e lagaa.e.n
phuulo.n me.n jis chaman ke ho buu-e-jaa.n-nisaarii
hubb-e-vatan kii qalme.n ham is chaman se laa.e.n
KHuun-e-jigar se sii.nche.n har naKHl-e-aarzuu ko
ashko.n se bel-buuTo.n kii aabruu ba.Dhaa.e.n
ek ek gul me.n phuu.nke.n ruuh-e-shamiim-e-vahdat
ik ik kalii ko dil ke daaman se de.n havaa.e.n
firdaus kaa namuuna apnaa ho kunj-e-dilkash
saare jahaa.n kii jis me.n ho.n jalva-gar fazaa.e.n
chhaayaa ho abr-e-rahmat kaashana-e-chaman me.n
rim-jhim baras rahii ho.n chaaro.n taraf ghaTaa.e.n
murGaan-e-baaG ban kar u.Dte phire.n havaa me.n
naGme ho.n ruuh-afzaa aur dil-rubaa sadaa.e.n
hubb-e-vatan ke lab par ho.n jaa.n-fazaa taraane
shaaKHo.n pe giit gaa.e.n phuulo.n pe chahchahaa.e.n
chhaa.ii hu.ii ghaTaa ho mausam tarab-fazaa ho
jho.nke chale.n havaa ke ashjaar lahlahaa.e.n

Suroor Jahanabadi
Nazm

ittihad

ye desh ki hinduu aur muslim tahziibo.n kaa shiiraaza hai
sadiyo.n kii puraanii baat hai ye par aaj bhii kitnii taaza hai
taariiKH hai is kii ek amal tahliilo.n kaa tarkiibo.n kaa
sambandh vo do aadarsho.n kaa sanjog vo do tahziibo.n kaa
vo ek ta.Dap vo ek lagan kuchh khone kii kuchh paane kii
vo ek talab do ruuho.n ke ik qaalib me.n Dhal jaane kii
do sham.o.n kii lau pechaa.n jaise ik sho.ala-e-nau ban jaane kii
do dhaare.n jaise madiraa kii bhartii hu.i kisii paimaane kii
yuu.n ek tajallii jaag uThii nazro.n me.n haqiiqat vaalo.n kii
jis tarah hade.n mil jaatii ho.n do samt se do ujyaalo.n kii
aavaaza-e-haq jab lahraa kar bhagTii kaa taraana bantaa hai
ye rabt-e-baham ye jazb-e-daruu.n KHud ek zamaana bantaa hai
chishtii kaa qutub kaa har na.ara yak-rangii me.n Dhal jaataa hai
har dil pe kabiir aur tulsii ke doho.n kaa fusuu.n chal jaataa hai
naanak kaa kabit ban jaatii hai miiraa kaa bhajan ban jaataa hai
dil dil se jo ham aahang hu.e atvaar mile andaaz mile
ik aur zabaa.n ta.amiir hu.ii alfaaz se jab alfaaz mile
ye fikr o bayaa.n kii ra.anaa.ii duniyaa-e-adab kii jaan banii
ye 'miir' kaa fan 'chakbast' kii lai 'Gaalib' kaa amar diivaan banii
tahziib kii is yak-jehtii ko urdu kii shahaadat kaafii hai
kuchh aur nishaa.n bhii milte hai.n tho.Dii sii basiirat kaafii hai
ta.amiir ke parde me.n bhii ka.ii be-laus fusuu.n mil jaate hai.n
ran-puur ke mandir me.n ham ko masjid ke sutuu.n mil jaate hai.n
vahdat kii isii chi.ngaarii se dil mom hu.aa hai patthar kaa
ajmer kii jaama.a masjid me.n KHud aks hai ajnabii mandar kaa
phir aur zaraa ye fan ba.Dh kar maanind-e-Gazal ban jaataa hai
marmar kii ru-pahlii chaa.ndii se ik taaj-mahal ban jaataa hai
ye naqsh baham tahziibo.n kaa maujuud hai sau tasviiro.n me.n
'mansuur' 'manohar' 'daulat' aur 'haashim' kii subuk tahriiro.n me.n
dil saath dha.Dakte aa.e hai.n KHud saaz pataa de dete hai.n
tartiib suro.n kii kaise hu.ii KHud raag sadaa de dete hai.n

Jan Nisar Akhtar
Nazm

ganga

o paak naazniin o phuulo.n ke gahne vaalii
sarsabz vaadiyo.n ke daaman me.n bahne vaalii
o naaz-aafrii.n o sidq-o-safaa kii devii
o iffat-e-mujassam parbat kii rahne vaalii
salle-alaa ye terii maujo.n kaa gungunaanaa
vahdat kaa ye taraana o chup na rahne vaalii
husn-e-Gayuur teraa hai be-niyaaz hastii
to bahr-e-ma.arfat hai o paak-baaz hastii

Suroor Jahanabadi
Nazm

wo ishq jo hum ko lahiq tha

furqat ke tanhaa lamho.n me.n
aabaad thii ik duniyaa-e-fusuu.n
raftaar-e-Gam kii mauj-e-ravaa.n
aavaara baguule yaado.n ke
baarish kii maddham buu.ndo.n ke
sargam kii faraavaa.n mausiiqii
ashjaar kii raqsaa.n shaaKHo.n se
chhantaa hu.aa fitrat kaa jaaduu
duniyaa-e-nashaat-o-dard kii lai
andoh o alam kaa ik aalam
taKHliiq ke larzaa.n siine ke asraar-e-nihaa.n
naGma-bar-lab ye arz o samaa
nauha dard-e-dil baatin kii fazaa
taKHliiq jahaa.n ke sar nihaa.n
patte patte kii ra.ngat me.n
harf kin kaa jaaduu larzaa.n
sab ik vahdat me.n jazb hu.e
ik vajd aagii.n ehsaas me.n
ruuh o jism o jaa.n malbuus hu.e
vaqt aur makaa.n ke sirr-e-nihaa.n malbuus hu.e

Sajida Zaidi
Nazm

mohabbat

kirshn aa.e ki dii.n bhar bhar ke vahdat ke KHumistaa.n se
sharaab-e-ma.arifat kaa ruuh-parvar jaam hinduu ko
kirshn aa.e aur us baatil-rubaa maqsad ke saath aa.e
ki duniyaa but-parastii kaa na de ilzaam hinduu ko
kirshn aa.e ki talvaaro.n kii jhankaaro.n me.n de jaa.e.n
hayaat-e-jaavidaa.n kaa sarmadii in.aam hinduu ko
agar KHauf-e-KHudaa dil me.n hai phir kyuu.n maut kaa Dar ho
kirshn aa.e.n to ab bhii de.n yahii paiGaam hinduu ko
musalmaano.n ke dil me.n bhii adab hai in haqaa.eq kaa
sikhaataa hai yahii sachchaa.iyaa.n islaam hinduu ko
vo mere jazba-e-dil kii kashish kaa laakh munkir ho
mohabbat se mai.n aaKHir kar hii luu.ngaa raam hinduu ko

Zafar Ali Khan
Nazm

allah allah subhan-allah

har suu hai.n ishaare rahmat ke
kasrat me.n nazaare vahdat ke
kahte hai.n karishme qudrat ke
allaah allaah sub.haan-allaah
har saa.ns me.n hai buu-baas tirii
har dil ko lagii hai aas tirii
bande ko Gulaamii raas tirii
allaah allaah sub.haan-allaah
nahii.n ko.ii havas mujhe bas tuu hai
titlii ko phuul kaa ras tuu hai
nas nas jaane nas nas tuu hai
allaah allaah sub.haan-allaah
in haatho.n me.n nuur kaa parcham de
mire ilm ko vus.at-e-aalam de
tujhe ko.ii kamii hai jo tuu kam de
allaah allaah sub.haan-allaah
tirii chaukhaT aa.uu.n jaa.uu.n mai.n
tire aage sar ko jhukaa.uu.n mai.n
din-raat yahii dohraa.uu.n mai.n
allaah allaah sub.haan-allaah

Ataur Rahman Tariq
Nazm

wed

faiz-e-qudrat se jo taqdiir khulii aalam kii
saahil-e-hind pe vahdat kii tajallii chamkii

Chakbast Braj Narayan
Nazm

juhi ka pauda

mujh se ye puuchhaa na kisii ne
kaise ho kyaa soch rahe ho
kyuu.n aaKHir KHaamosh kha.De ho
jaise unhii.n kii tarah mai.n KHud bhii
is aabaad hasii.n duniyaa kii
vahdat kaa hissa hii nahii.n huu.n
jaise mai.n zinda hii nahii.n huu.n
mere lafzo.n kii shaaKHo.n se
yaado.n kii kuchh kaliyaa.n le le.n
mere ra.ng-bira.nge naazuk
KHvaabo.n kii pa.nkhu.Diyaa.n le le.n

Rahi Masoom Raza
Nazm

aaina-KHane ke qaidi se

muKHtalif hai.n aa.iino.n ke zaaviye
ek lekin aks-e-zaat;
ik ikaa.ii par usii kii zarb se
kasrat-e-vahdat kaa paidaa hai tilism
KHalvat-e-aa.iina-KHaana me.n kahii.n ko.ii nahii.n
sirf mai.n!
mai.n hii but
aur mai.n hii but-parast!
mai.n hii bazm-e-zaat me.n raunaq-afroz
jalva-haa-e-zaat ko detaa huu.n daad!

Ameeq Hanafi
Nazm

hamari zaban

urdu kaho yaa hindostaanii
is kii ba.Daa.ii duniyaa ne maanii
aapas kii millat maqsuud is kaa
ulfat kii KHuugar vahdat kii baanii
guzre hu.o.n ke dil kii dulaarii
biite dino.n kii dilkash kahaanii
hai ittihaad-e-qaumii kaa naGma
aaGaaz is kaa us kii javaanii
ahl-e-vatan the aapas me.n yak dil
is baat kii hai urdu nishaanii
hone ko hai.n go sad.haa zabaane.n
par is ke aage bhartii hai.n paanii
uttar se dakshin puurab se pachchhim
har samt is kii hai hukmaraanii
hinduu bhii shaidaa muslim bhii shaidaa
hai saarii KHilqat is par divaanii
ho.n kyuu.n na is ke sab log haamii
hai ye saraasar hindostaanii
miltii hai khul kar har ik zabaa.n se
is baat me.n hai kaun is kaa saanii
tarz-e-nigaarish gar dekh paa.e.n
rah jaa.e.n hairaa.n bahzaad-o-maanii
is kii fasaahat is kii balaaGat
is kii salaasat is kii ravaanii
ra.ngiin qisse novel anokhe
dilchasp nazme.n shiirii.n-zabaanii
jaaduu-nigaarii shevaa-bayaanii
san.at-taraazii gauhar-fishaanii
har bol is kaa misrii saa miiThaa
har baat dilkash har lai suhaanii
merii du.aa hai ye mudda.aa hai
is par KHudaa kii ho mehrbaanii
'nayyar' jahaa.n me.n phuule-phale ye
jab tak hai baaqii duniyaa-e-faanii

Mohammad Shafiuddin Nayyar
Nazm

subh-e-sadiq

zahr me.n Duub ga.ii thii.n jo zabaane.n yaksar
un pe shiiriinii-e-vahdat ke taraane aa.e
jism martaa hai magar ruuh kahaa.n martii hai
ruuh ik nuur hai aur jism thirakte saa.e

Darshan Singh
Nazm

bahadur-shah zafar

tuu ne diivaano.n ko ik jazba-e-vahdat baKHshaa
tere marqad ne unhe.n shauq-e-shahaadat baKHshaa

Shamsii Meenai
Nazm

gungi iltija

rabb-ul-izzat
vo zamiin jise tuu ne banii aadam ke liye jannat banaayaa thaa
aur amn ke gahvaare kaa naam diyaa thaa
jahaa.n hamaarii aazmaa.ish ke liye shajar-e-mamnuu.a ke saath saath
hamaarii rubuubiyat ke liye tuu ne shajar-e-hayaat bhii ugaayaa thaa
hamaarii vo zamiin paanii havaa aur KHushkii kii maKHluuq kaa mushtarka ghar thii
is pyaarii zamiin par aabaad saarii maKHluuq ek duusre se raazii thii
aur jis kii saarii maKHluuq ko baaham raazii dekh kar tuu bhii ham se raazii thaa
ai rabb-ul-izzat ham ne vo zamiin apne haatho.n barbaad kar ke rakh dii hai
hamaaraa tujh par ko.ii haq nahii.n ki zid kare.n
lekin tuu ne tauba kaa darvaaza to khulaa rakkhaa hai
be-shak tauba kii ibtidaa e'tiraaf se hotii hai
magar is kii intihaa hamesha du.aa se hotii aa.ii hai
mere paas du.aa ke laa.eq alfaaz nahii.n hai.n
lekin tere paas merii guu.ngii iltijaa sun.ne ke liye bahut achchhe kaan hai.n
husn-e-samaa.at tujh par KHatm hai
is liye ki tuu azal se muztaro.n kii suntaa aur murda zamiino.n ko zinda kartaa aayaa hai
sun ai samii.a sun
ek martaba phir is zamiin par amn ummiid aur masarrat ke pharere lahraa de
ek martaba phir is ke beTe beTiyo.n kaa haath paka.D
unhe.n adhuure-pan se najaat de de
puuraa kar de unhe.n
vo havas aur be-sabrii kii khaultii daldal me.n
bad-suurat me.nDako.n kii tarah au.ndhe mu.nh pa.De hai.n
unhe.n puure qad se kha.Daa kar de
un kii azmat-e-aadam lauTaa de
unhe.n ek duusre par e'timaad karnaa sikhaa de
taufiiq de unhe.n ki terii ataa karda quvvat-e-taKHliiq se
zamiin ko husn aur ma.anii se maalaa-maal kar de.n
ehtiraam Daal de in ke dil-o-dimaaG me.n is zamiin ke liye
apnii us maa.n ke liye
us kii saarii maKHluuq ke liye
nasl aqiide jins aur saqaafat kaa farq in kii vahdat me.n na.e rang bhare
vo puure kurra-e-arz par phaile ho.n lekin ek duusre kaa haath paka.D kar
vo puure kurra-e-arz ko ek aise dastarKHvaa.n kii shakl de de.n
jis par zamiin kaa saaraa rizq zamiin kii saarii maKHluuq ke liye aam ho
chhe arab insaan hii nahii.n zamiin kii saarii maKHluuq sairaab-o-shaad-kaam ho
ai rabb-ul-izzat
tuu ne is zamiin kii suurat me.n jo jannat hame.n dii thii
ham ne use apne liye jahannam banaa liyaa hai
ye jahannam sirf nifaaq aur nafrat hii nahii.n KHauf se bhii labrez hai
ek duusre se KHauf apne aap se KHauf
aur KHauf to mohabbat kii nafii hotaa hai
aur saarii mohabbato.n kii ibtidaa aur intihaa
hame.n ek martaba phir mohabbat se sarshaar kar de
ki mohabbat ke baGair hame.n na to sachchaa amn nasiib hogaa aur na sachchii zindagii
ham mohabbat se mahruum rahe to KHvaah to zamiin ko sau martaba bhii jannat banaa de
ham hazaar martaba use jahannam banaa ke rakh de.nge
ham ne nafrat nifaaq aur KHauf ko aazmaa kar dekh liyaa hai
ai rabb-ul-izzat
hamaare vajuud mohabbat ke liye is tarah taras rahe hai.n
jaise pyaasii zamiin baarish ke liye tarastii hai
hame.n mohabbat nasiib kar de

Mohammad Haneef Rame
Nazm

bu-ali andar-ghubar-e-naqa gum

mai.n agar shaa.ir thaa maulaa to mirii ohda-baraa.ii kyaa thii aaKHir
shaa.irii me.n mutakaffil thaa to ye kaisii naa-munaasib ehtimaalii
kyaa karuu.n mai.n
band kar duu.n apnaa baab-e-lafz-o-ma.anii
aur kahf ke Gaar me.n jhaa.nkuu.n jahaa.n baiThe hu.e
as.haab ma.abuud-e-haqiiqii kii ibaadat me.n magan hai.n
aur sag-e-taazii saa chaukiidaar un ke paas baiThuu.n
vahdat-o-tauhiid kaa paiGaam sun kar
vird kii suurat use dohraataa jaa.uu.n
puuchhtaa huu.n
kyaa mirii mashq-e-suKHan tauhiid kii azalii shanaasaa
o qarz ke bigtaashan kii daa.ii nahii.n hai
mai.n to raasul-maal saaraa peshgii hii de chukaa huu.n
qarz kii vaapas adaa.ii me.n
mire alfaaz kaa saaraa zaKHiira luT chukaa hai
sher ko harf-o-nidaa me.n Dhaalnaa
tasbiih-o-tahliil-o-ibaadat se kahaa.n kamtar hai maulaa
shaa.irii juzvest-az-paiGambarii kis ne kahaa thaa
mai.n to itnaa jaantaa huu.n
merii tamjiid-o-parastish lafz kii qiraat me.n Dhaltii hai
to phir taKHliiq kaa vaazeh amal tasbiih yaa maalaa ke manko.n kii tarah hai

Satyapal Anand
Nazm

mutazad zawiye

aur bisaat-e-KHayaal be-paayaa.n
aur mu.ayyan huduud-e-sharh-o-bayya.n
tez-raftaar gardish-e-haalaat
aur aahistagii-e-umr ravaa.n
ajnabiyyat kaa mustaqil ik bojh
aur shanaasaa.iyo.n kaa baar-e-giraa.n
aql kii KHaamii naarasii dil kii
aur tasavvur-shikan haqiiqat-e-jaa.n
muKHtalif har vajuud pesh-e-nazar
aur imkaan-e-vahdat-e-imkaa.n
fikr uqdaa-kushaa.iyo.n pe musir
aur sar-rishte hii kaa KHud fuqdaan.n
intihaa silsilo.n kii naa-maaluum
aur har lamha silsila-e-jumbaa.n
mutavaatir maraahil-e-taaliim
aur musalsal madaarij-e-nisyaa.n
shoba-haa-e-KHayaal be-tam.iiz
aur bahr-e-shanaaKHt mohr-o-nishaa.n
chaar jaanib saraahto.n kaa hujuum
aur bahr-e-rumuuz be-paayaa.n
sail-e-bairuu.n ravaa.n ba-tarz-e-digar
aur juu-e-andaruu.n alag sii ravaa.n
ek kho.ii hu.ii fazaa.e-hayaat
aur ehsaas-o-fikr sab Galtaa.n
aur saa.nso.n kii rahguzar pe hujuum
aur aa.nkho.n kii rahguzar viiraa.n

Abdul Ahad Saaz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now