kal chaudhvīñ kī raat thī shab bhar rahā charchā tirā

kuchh ne kahā ye chāñd hai kuchh ne kahā chehrā tirā

kal chaudhwin ki raat thi shab bhar raha charcha tera

kuchh ne kaha ye chand hai kuchh ne kaha chehra tera

ik saal gayā ik saal nayā hai aane ko

par vaqt kā ab bhī hosh nahīñ dīvāne ko

ek sal gaya ek sal naya hai aane ko

par waqt ka ab bhi hosh nahin diwane ko

kab lauTā hai bahtā paanī bichhḌā sājan rūThā dost

ham ne us ko apnā jaanā jab tak haath meñ dāmāñ thā

kab lauTa hai bahta pani bichhDa sajan ruTha dost

hum ne us ko apna jaana jab tak hath mein daman tha

raat aa kar guzar bhī jaatī hai

ik hamārī sahar nahīñ hotī

raat aa kar guzar bhi jati hai

ek hamari sahar nahin hoti

vo rāteñ chāñd ke saath ga.iiñ vo bāteñ chāñd ke saath ga.iiñ

ab sukh ke sapne kyā dekheñ jab dukh kā sūraj sar par ho

wo raaten chand ke sath gain wo baaten chand ke sath gain

ab sukh ke sapne kya dekhen jab dukh ka suraj sar par ho

is shahr meñ kis se mileñ ham se to chhūTīñ mahfileñ

har shaḳhs terā naam le har shaḳhs dīvānā tirā

is shahr mein kis se milen hum se to chhuTin mahfilen

har shaKHs tera nam le har shaKHs diwana tera

apnī zabāñ se kuchh na kaheñge chup hī raheñge āshiq log

tum se to itnā ho saktā hai pūchho haal bechāroñ kā

apni zaban se kuchh na kahenge chup hi rahenge aashiq log

tum se to itna ho sakta hai puchho haal bechaaron ka

kūche ko tere chhoḌ kar jogī hī ban jaa.eñ magar

jañgal tire parbat tire bastī tirī sahrā tirā

kuche ko tere chhoD kar jogi hi ban jaen magar

jangal tere parbat tere basti teri sahra tera

'inshā'-jī uTho ab kuuch karo is shahr meñ jī ko lagānā kyā

vahshī ko sukūñ se kyā matlab jogī kā nagar meñ Thikānā kyā

'insha'-ji uTho ab kuch karo is shahr mein ji ko lagana kya

wahshi ko sukun se kya matlab jogi ka nagar mein Thikana kya

ham bhuul sake haiñ na tujhe bhuul sakeñge

tū yaad rahegā hameñ haañ yaad rahegā

hum bhul sake hain na tujhe bhul sakenge

tu yaad rahega hamein han yaad rahega

dil hijr ke dard se bojhal hai ab aan milo to behtar ho

is baat se ham ko kyā matlab ye kaise ho ye kyūñkar ho

dil hijr ke dard se bojhal hai ab aan milo to behtar ho

is baat se hum ko kya matlab ye kaise ho ye kyunkar ho

husn sab ko ḳhudā nahīñ detā

har kisī kī nazar nahīñ hotī

husn sab ko KHuda nahin deta

har kisi ki nazar nahin hoti

ham kisī dar pe na ThiTke na kahīñ dastak dī

saikḌoñ dar the mirī jaañ tire dar se pahle

hum kisi dar pe na ThiTke na kahin dastak di

saikDon dar the meri jaan tere dar se pahle

garm aañsū aur ThanDī aaheñ man meñ kyā kyā mausam haiñ

is baġhiyā ke bhed na kholo sair karo ḳhāmosh raho

garm aansu aur ThanDi aahen man mein kya kya mausam hain

is baghiya ke bhed na kholo sair karo KHamosh raho

ahl-e-vafā se tark-e-ta.alluq kar lo par ik baat kaheñ

kal tum in ko yaad karoge kal tum inheñ pukāroge

ahl-e-wafa se tark-e-talluq kar lo par ek baat kahen

kal tum in ko yaad karoge kal tum inhen pukaroge

haq achchhā par us ke liye koī aur mare to aur achchhā

tum bhī koī mansūr ho jo suulī pe chaḌho ḳhāmosh raho

haq achchha par us ke liye koi aur mare to aur achchha

tum bhi koi mansur ho jo suli pe chaDho KHamosh raho

ham ghuum chuke bastī ban meñ

ik aas kī phāñs liye man meñ

hum ghum chuke basti ban mein

ek aas ki phans liye man mein

ek se ek junūñ kā maarā is bastī meñ rahtā hai

ek hamīñ hushiyār the yaaro ek hamīñ bad-nām hue

ek se ek junun ka mara is basti mein rahta hai

ek hamin hushiyar the yaro ek hamin bad-nam hue

bekal bekal rahte ho par mahfil ke ādāb ke saath

aañkh churā kar dekh bhī lete bhole bhī ban jaate ho

bekal bekal rahte ho par mahfil ke aadab ke sath

aankh chura kar dekh bhi lete bhole bhi ban jate ho

apne hamrāh jo aate ho idhar se pahle

dasht paḌtā hai miyāñ ishq meñ ghar se pahle

apne hamrah jo aate ho idhar se pahle

dasht paDta hai miyan ishq mein ghar se pahle

jab shahr ke log na rastā deñ kyuuñ ban meñ na jā bisrām kare

dīvānoñ kī sī na baat kare to aur kare dīvānā kyā

jab shahr ke log na rasta den kyun ban mein na ja bisram kare

diwanon ki si na baat kare to aur kare diwana kya

vahshat-e-dil ke ḳharīdār bhī nāpaid hue

kaun ab ishq ke bāzār meñ kholegā dukāñ

wahshat-e-dil ke KHaridar bhi napaid hue

kaun ab ishq ke bazar mein kholega dukan

kuchh kahne kā vaqt nahīñ ye kuchh na kaho ḳhāmosh raho

ai logo ḳhāmosh raho haañ ai logo ḳhāmosh raho

kuchh kahne ka waqt nahin ye kuchh na kaho KHamosh raho

ai logo KHamosh raho han ai logo KHamosh raho

ek din dekhne ko aa jaate

ye havas umr bhar nahīñ hotī

ek din dekhne ko aa jate

ye hawas umr bhar nahin hoti

yūñhī to nahīñ dasht meñ pahuñche yūñhī to nahīñ jog liyā

bastī bastī kāñTe dekhe jañgal jañgal phuul miyāñ

yunhi to nahin dasht mein pahunche yunhi to nahin jog liya

basti basti kanTe dekhe jangal jangal phul miyan

aan ke is bīmār ko dekhe tujh ko bhī taufīq huī

lab par us ke naam thā terā jab bhī dard shadīd huā

aan ke is bimar ko dekhe tujh ko bhi taufiq hui

lab par us ke nam tha tera jab bhi dard shadid hua

'mīr' se bai.at kī hai to 'inshā' miir kī bai.at bhī hai zarūr

shaam ko ro ro sub.h karo ab sub.h ko ro ro shaam karo

'mir' se baiat ki hai to 'insha' mir ki baiat bhi hai zarur

sham ko ro ro subh karo ab subh ko ro ro sham karo

diida o dil ne dard kī apne baat bhī kī to kis se kī

vo to dard kā baanī Thahrā vo kyā dard baTā.egā

dida o dil ne dard ki apne baat bhi ki to kis se ki

wo to dard ka bani Thahra wo kya dard baTaega

sun to liyā kisī naar kī ḳhātir kaaTā koh nikālī nahr

ek zarā se qisse ko ab dete kyuuñ ho tuul miyāñ

sun to liya kisi nar ki KHatir kaTa koh nikali nahr

ek zara se qisse ko ab dete kyun ho tul miyan

be tere kyā vahshat ham ko tujh bin kaisā sabr o sukūñ

tū hī apnā shahr hai jaanī tū hī apnā sahrā hai

be tere kya wahshat hum ko tujh bin kaisa sabr o sukun

tu hi apna shahr hai jaani tu hi apna sahra hai

jalva-numā.ī be-parvā.ī haañ yahī riit jahāñ kī hai

kab koī laḌkī man kā darīcha khol ke bāhar jhāñkī hai

jalwa-numai be-parwai han yahi rit jahan ki hai

kab koi laDki man ka daricha khol ke bahar jhanki hai

janam janam ke sātoñ dukh haiñ us ke māthe par tahrīr

apnā aap miTānā hogā ye tahrīr miTāne meñ

janam janam ke saton dukh hain us ke mathe par tahrir

apna aap miTana hoga ye tahrir miTane mein

ai qais-e-junūñ-pesha 'inshā' ko kabhī dekhā

vahshī ho to aisā ho rusvā ho to aisā ho

ai qais-e-junun-pesha 'insha' ko kabhi dekha

wahshi ho to aisa ho ruswa ho to aisa ho

phir un kī galī meñ pahuñchegā phir sahv kā sajda kar legā

is dil pe bharosā kaun kare har roz musalmāñ hotā hai

phir un ki gali mein pahunchega phir sahw ka sajda kar lega

is dil pe bharosa kaun kare har roz musalman hota hai

kaTne lagīñ rāteñ āñkhoñ meñ dekhā nahīñ palkoñ par aksar

yā shām-e-ġharībāñ kā jugnū yā sub.h kā taarā hotā hai

kaTne lagin raaten aankhon mein dekha nahin palkon par aksar

ya sham-e-ghariban ka jugnu ya subh ka tara hota hai

ye to sach hai ki ham tujhe pā na sake tirī yaad bhī jī se bhulā na sake

tirā daaġh hai dil meñ charāġh-sifat tire naam kī zeb-e-gulū-kafnī

ye to sach hai ki hum tujhe pa na sake teri yaad bhi ji se bhula na sake

tera dagh hai dil mein charagh-sifat tere nam ki zeb-e-gulu-kafni

sab ko dil ke daaġh dikhā.e ek tujhī ko dikhā na sake

terā dāman duur nahīñ thā haath hamīñ phailā na sake

sab ko dil ke dagh dikhae ek tujhi ko dikha na sake

tera daman dur nahin tha hath hamin phaila na sake

vahshat kā unvān hamārī un meñ se jo naar banī

dekheñge to log kaheñge 'inshā'-jī dīvāne the

wahshat ka unwan hamari un mein se jo nar bani

dekhenge to log kahenge 'insha'-ji diwane the

kin rāhoñ se ho kar aa.ī ho kis gul kā sandesa laa.ī ho

ham baaġh meñ ḳhush ḳhush baiThe the kyā kar diyā aa ke sabā tum ne

kin rahon se ho kar aai ho kis gul ka sandesa lai ho

hum bagh mein KHush KHush baiThe the kya kar diya aa ke saba tum ne

minnat-e-qāsid kaun uThā.e shikva-e-darbāñ kaun kare

nāma-e-shauq ġhazal kī sūrat chhapne ko do aḳhbār ke biich

minnat-e-qasid kaun uThae shikwa-e-darban kaun kare

nama-e-shauq ghazal ki surat chhapne ko do aKHbar ke bich

vo jo terā daaġh ġhulāmī māthe par liye phirtā hai

us kā naam to 'inshā' Thahrā nāhaq ko badnām hai chāñd

wo jo tera dagh ghulami mathe par liye phirta hai

us ka nam to 'insha' Thahra nahaq ko badnam hai chand

sakhiyoñ se kab sakhiyāñ apne jī ke bhed chhupātī haiñ

ham se nahīñ to us se kah de kartā kahāñ kalām hai chāñd

sakhiyon se kab sakhiyan apne ji ke bhed chhupati hain

hum se nahin to us se kah de karta kahan kalam hai chand

ik baat kaheñge 'inshā'-jī tumheñ reḳhta kahte umr huī

tum ek jahāñ kā ilm paḌhe koī 'mīr' sā sher kahā tum ne

ek baat kahenge 'insha'-ji tumhein reKHta kahte umr hui

tum ek jahan ka ilm paDhe koi 'mir' sa sher kaha tum ne

us ko muddat huī sabr karte hue aaj kū-e-vafā se guzarte hue

pūchh kar us gadā kā Thikānā sajan apne 'inshā' ko bhī dekh aanā sajan

us ko muddat hui sabr karte hue aaj ku-e-wafa se guzarte hue

puchh kar us gada ka Thikana sajan apne 'insha' ko bhi dekh aana sajan

ġham-e-ishq meñ kaarī davā na duā ye hai rog kaThin ye hai dard burā

ham karte jo apne se ho saktā kabhī ham se bhī kuchh na kahā tum ne

gham-e-ishq mein kari dawa na dua ye hai rog kaThin ye hai dard bura

hum karte jo apne se ho sakta kabhi hum se bhi kuchh na kaha tum ne

koī aur bhī morid-e-lutf huā milī ahl-e-havas ko havas kī sazā

tire shahr meñ the hamīñ ahl-e-vafā milī ek hamīñ ko jalā-vatanī

koi aur bhi morid-e-lutf hua mili ahl-e-hawas ko hawas ki saza

tere shahr mein the hamin ahl-e-wafa mili ek hamin ko jala-watani

ab tujh se kis muñh se kah deñ saat samundar paar na jā

biich kī ik dīvār bhī ham to phāñd na paa.e Dhā na sake

ab tujh se kis munh se kah den sat samundar par na ja

bich ki ek diwar bhi hum to phand na pae Dha na sake

kuchh vo jinheñ ham se nisbat thī un kūchoñ meñ aan ābād hue

kuchh arsh pe taare kahlā.e kuchh phuul bane jā gulshan meñ

kuchh wo jinhen hum se nisbat thi un kuchon mein aan aabaad hue

kuchh arsh pe tare kahlae kuchh phul bane ja gulshan mein

ḳhār-o-ḳhas-o-ḳhāshāk to jāneñ ek tujhī ko ḳhabar na mile

ai gul-e-ḳhūbī ham to abas badnām hue gulzār ke biich

KHar-o-KHas-o-KHashak to jaanen ek tujhi ko KHabar na mile

ai gul-e-KHubi hum to abas badnam hue gulzar ke bich

ham is lambe-chauḌe ghar meñ shab ko tanhā hote haiñ

dekh kisī din aa mil ham se ham ko tujh se kaam hai chāñd

hum is lambe-chauDe ghar mein shab ko tanha hote hain

dekh kisi din aa mil hum se hum ko tujh se kaam hai chand