ham aah bhī karte haiñ to ho jaate haiñ badnām

vo qatl bhī karte haiñ to charchā nahīñ hotā

hum aah bhi karte hain to ho jate hain badnam

wo qatl bhi karte hain to charcha nahin hota

ishq nāzuk-mizāj hai behad

aql kā bojh uThā nahīñ saktā

ishq nazuk-mizaj hai behad

aql ka bojh uTha nahin sakta

duniyā meñ huuñ duniyā kā talabgār nahīñ huuñ

bāzār se guzrā huuñ ḳharīdār nahīñ huuñ

duniya mein hun duniya ka talabgar nahin hun

bazar se guzra hun KHaridar nahin hun

ham kyā kaheñ ahbāb kyā kār-e-numāyāñ kar ga.e

B.A hue naukar hue pension milī phir mar ga.e

hum kya kahen ahbab kya kar-e-numayan kar gae

BA hue naukar hue pension mili phir mar gae

hayā se sar jhukā lenā adā se muskurā denā

hasīnoñ ko bhī kitnā sahl hai bijlī girā denā

haya se sar jhuka lena ada se muskura dena

hasinon ko bhi kitna sahl hai bijli gira dena

maz.habī bahs maiñ ne kī hī nahīñ

fāltū aql mujh meñ thī hī nahīñ

mazhabi bahs main ne ki hi nahin

faltu aql mujh mein thi hi nahin

jo kahā maiñ ne ki pyaar aatā hai mujh ko tum par

hañs ke kahne lagā aur aap ko aatā kyā hai

jo kaha main ne ki pyar aata hai mujh ko tum par

hans ke kahne laga aur aap ko aata kya hai

aa.ī hogī kisī ko hijr meñ maut

mujh ko to niiñd bhī nahīñ aatī

aai hogi kisi ko hijr mein maut

mujh ko to nind bhi nahin aati

rahtā hai ibādat meñ hameñ maut kā khaTkā

ham yād-e-ḳhudā karte haiñ, kar le na ḳhudā yaad

rahta hai ibaadat mein hamein maut ka khaTka

hum yaad-e-KHuda karte hain, kar le na KHuda yaad

khīñcho na kamānoñ ko na talvār nikālo

jab top muqābil ho to aḳhbār nikālo

khincho na kamanon ko na talwar nikalo

jab top muqabil ho to aKHbar nikalo

log kahte haiñ badaltā hai zamāna sab ko

mard vo haiñ jo zamāne ko badal dete haiñ

log kahte hain badalta hai zamana sab ko

mard wo hain jo zamane ko badal dete hain

akbar dabe nahīñ kisī sultāñ kī fauj se

lekin shahīd ho ga.e biivī kī nauj se

akbar dabe nahin kisi sultan ki fauj se

lekin shahid ho gae biwi ki nauj se

ham aisī kul kitābeñ qābil-e-zabtī samajhte haiñ

ki jin ko paḌh ke laḌke baap ko ḳhabtī samajhte haiñ

hum aisi kul kitaben qabil-e-zabti samajhte hain

ki jin ko paDh ke laDke bap ko KHabti samajhte hain

hañgāma hai kyuuñ barpā thoḌī sī jo pī lī hai

Daakā to nahīñ maarā chorī to nahīñ kī hai

hangama hai kyun barpa thoDi si jo pi li hai

Daka to nahin mara chori to nahin ki hai

bas jaan gayā maiñ tirī pahchān yahī hai

tū dil meñ to aatā hai samajh meñ nahīñ aatā

bas jaan gaya main teri pahchan yahi hai

tu dil mein to aata hai samajh mein nahin aata

ilāhī kaisī kaisī sūrateñ tū ne banā.ī haiñ

ki har sūrat kaleje se lagā lene ke qābil hai

ilahi kaisi kaisi suraten tu ne banai hain

ki har surat kaleje se laga lene ke qabil hai

ishq ke iz.hār meñ har-chand rusvā.ī to hai

par karūñ kyā ab tabī.at aap par aa.ī to hai

ishq ke izhaar mein har-chand ruswai to hai

par karun kya ab tabiat aap par aai to hai

ḳhudā se maañg jo kuchh māñgnā hai ai 'akbar'

yahī vo dar hai ki zillat nahīñ savāl ke ba.ad

KHuda se mang jo kuchh mangna hai ai 'akbar'

yahi wo dar hai ki zillat nahin sawal ke baad

qaum ke ġham meñ dinner khāte haiñ hukkām ke saath

rañj leader ko bahut hai magar ārām ke saath

qaum ke gham mein dinner khate hain hukkaam ke sath

ranj leader ko bahut hai magar aaram ke sath

raqīboñ ne rapaT likhvā.ī hai jā jā ke thāne meñ

ki 'akbar' naam letā hai ḳhudā kā is zamāne meñ

raqibon ne rapaT likhwai hai ja ja ke thane mein

ki 'akbar' nam leta hai KHuda ka is zamane mein

jab maiñ kahtā huuñ ki yā allāh merā haal dekh

hukm hotā hai ki apnā nāma-e-āmāl dekh

jab main kahta hun ki ya allah mera haal dekh

hukm hota hai ki apna nama-e-amal dekh

lipaT bhī jā na ruk 'akbar' ġhazab kī beauty hai

nahīñ nahīñ pe na jā ye hayā kī duty hai

lipaT bhi ja na ruk 'akbar' ghazab ki beauty hai

nahin nahin pe na ja ye haya ki duty hai

batā.ūñ aap ko marne ke ba.ad kyā hogā

polāo khā.eñge ahbāb fātiha hogā

bataun aap ko marne ke baad kya hoga

polao khaenge ahbab fatiha hoga

aah jo dil se nikālī jā.egī

kyā samajhte ho ki ḳhālī jā.egī

aah jo dil se nikali jaegi

kya samajhte ho ki KHali jaegi

ġhazab hai vo ziddī baḌe ho ga.e

maiñ leTā to uTh ke khaḌe ho ga.e

ghazab hai wo ziddi baDe ho gae

main leTa to uTh ke khaDe ho gae

jo vaqt-e-ḳhatna maiñ chīḳhā to naa.ī ne kahā hañs kar

musalmānī meñ tāqat ḳhuun hī bahne se aatī hai

jo waqt-e-KHatna main chiKHa to nai ne kaha hans kar

musalmani mein taqat KHun hi bahne se aati hai

haqīqī aur majāzī shā.erī meñ farq ye paayā

ki vo jaame se bāhar hai ye pājāme se bāhar hai

haqiqi aur majazi shaeri mein farq ye paya

ki wo jame se bahar hai ye pajame se bahar hai

har zarra chamaktā hai anvār-e-ilāhī se

har saañs ye kahtī hai ham haiñ to ḳhudā bhī hai

har zarra chamakta hai anwar-e-ilahi se

har sans ye kahti hai hum hain to KHuda bhi hai

vasl ho yā firāq ho 'akbar'

jāgnā raat bhar musībat hai

wasl ho ya firaq ho 'akbar'

jagna raat bhar musibat hai

mai bhī hotel meñ piyo chanda bhī do masjid meñ

shaiḳh bhī ḳhush raheñ shaitān bhī be-zār na ho

mai bhi hotel mein piyo chanda bhi do masjid mein

shaiKH bhi KHush rahen shaitan bhi be-zar na ho

tayyār the namāz pe ham sun ke zikr-e-hūr

jalva butoñ kā dekh ke nīyat badal ga.ī

tayyar the namaz pe hum sun ke zikr-e-hur

jalwa buton ka dekh ke niyat badal gai

is qadar thā khaTmaloñ kā chārpā.ī meñ hujūm

vasl kā dil se mire armān ruḳhsat ho gayā

is qadar tha khaTmalon ka chaarpai mein hujum

wasl ka dil se mere arman ruKHsat ho gaya

coat aur patlūn jab pahnā to mister ban gayā

jab koī taqrīr kī jalse meñ leader ban gayā

coat aur patlun jab pahna to mister ban gaya

jab koi taqrir ki jalse mein leader ban gaya

mohabbat kā tum se asar kyā kahūñ

nazar mil ga.ī dil dhaḌakne lagā

mohabbat ka tum se asar kya kahun

nazar mil gai dil dhaDakne laga

naaz kyā is pe jo badlā hai zamāne ne tumheñ

mard haiñ vo jo zamāne ko badal dete haiñ

naz kya is pe jo badla hai zamane ne tumhein

mard hain wo jo zamane ko badal dete hain

aql meñ jo ghir gayā lā-intihā kyūñkar huā

jo samā meñ aa gayā phir vo ḳhudā kyūñkar huā

aql mein jo ghir gaya la-intiha kyunkar hua

jo sama mein aa gaya phir wo KHuda kyunkar hua

dhamkā ke bose lūñgā ruḳh-e-rashk-e-māh kā

chandā vasūl hotā hai sāhab dabāv se

dhamka ke bose lunga ruKH-e-rashk-e-mah ka

chanda wasul hota hai sahab dabaw se

sidhāreñ shaiḳh ka.aba ko ham inglistān dekheñge

vo dekheñ ghar ḳhudā kā ham ḳhudā kī shaan dekheñge

sidhaaren shaiKH kaba ko hum inglistan dekhenge

wo dekhen ghar KHuda ka hum KHuda ki shan dekhenge

ishva bhī hai shoḳhī bhī tabassum bhī hayā bhī

zālim meñ aur ik baat hai is sab ke sivā bhī

ishwa bhi hai shoKHi bhi tabassum bhi haya bhi

zalim mein aur ek baat hai is sab ke siwa bhi

ye dilbarī ye naaz ye andāz ye jamāl

insāñ kare agar na tirī chaah kyā kare

ye dilbari ye naz ye andaz ye jamal

insan kare agar na teri chah kya kare

samajh meñ saaf aa jaa.e fasāhat is ko kahte haiñ

asar ho sunñe vaale par balāġhat is ko kahte haiñ

samajh mein saf aa jae fasahat is ko kahte hain

asar ho sunne wale par balaghat is ko kahte hain

da.avā bahut baḌā hai riyāzī meñ aap ko

tūl-e-shab-e-firāq ko to naap dījiye

dawa bahut baDa hai riyazi mein aap ko

tul-e-shab-e-firaq ko to nap dijiye

leaderoñ kī dhuum hai aur follower koī nahīñ

sab to general haiñ yahāñ āḳhir sipāhī kaun hai

leaderon ki dhum hai aur follower koi nahin

sab to general hain yahan aaKHir sipahi kaun hai

sau jaan se ho jā.ūñgā raazī maiñ sazā par

pahle vo mujhe apnā gunahgār to kar le

sau jaan se ho jaunga raazi main saza par

pahle wo mujhe apna gunahgar to kar le

jab ġham huā chaḌhā liiñ do botaleñ ikaTThī

mullā kī dauḌ masjid 'akbar' kī dauḌ bhaTTī

jab gham hua chaDha lin do botalen ikaTThi

mulla ki dauD masjid 'akbar' ki dauD bhaTTi

dil vo hai ki fariyād se labrez hai har vaqt

ham vo haiñ ki kuchh muñh se nikalne nahīñ dete

dil wo hai ki fariyaad se labrez hai har waqt

hum wo hain ki kuchh munh se nikalne nahin dete

siine se lagā.eñ tumheñ armān yahī hai

jiine kā mazā hai to mirī jaan yahī hai

sine se lagaen tumhein arman yahi hai

jine ka maza hai to meri jaan yahi hai

shaiḳh apnī rag ko kyā kareñ reshe ko kyā kareñ

maz.hab ke jhagḌe chhoḌeñ to peshe ko kyā kareñ

shaiKH apni rag ko kya karen reshe ko kya karen

mazhab ke jhagDe chhoDen to peshe ko kya karen

hue is qadar mohazzab kabhī ghar kā muñh na dekhā

kaTī umr hoTaloñ meñ mare aspatāl jā kar

hue is qadar mohazzab kabhi ghar ka munh na dekha

kaTi umr hoTalon mein mare aspatal ja kar

lagāvaT kī adā se un kā kahnā paan hāzir hai

qayāmat hai sitam hai dil fidā hai jaan hāzir hai

lagawaT ki ada se un ka kahna pan hazir hai

qayamat hai sitam hai dil fida hai jaan hazir hai