آواز دے رہا تھا کوئی مجھ کو خواب میں

لیکن خبر نہیں کہ بلایا کہاں گیا

میں زخم کھا کے گرا تھا کہ تھام اس نے لیا

معاف کر کے مجھے انتقام اس نے لیا

کبھی دیکھا ہی نہیں اس نے پریشاں مجھ کو

میں کہ رہتا ہوں سدا اپنی نگہبانی میں

اب وہ تتلی ہے نہ وہ عمر تعاقب والی

میں نہ کہتا تھا بہت دور نہ جانا مرے دوست

حرف اپنے ہی معانی کی طرح ہوتا ہے

پیاس کا ذائقہ پانی کی طرح ہوتا ہے

اس کو جانے دے اگر جاتا ہے

زہر کم ہو تو اتر جاتا ہے

چند خوشیوں کو بہم کرنے میں

آدمی کتنا بکھر جاتا ہے

میں سو گیا تو کوئی نیند سے اٹھا مجھ میں

پھر اپنے ہاتھ میں سب انتظام اس نے لیا

ٹوٹتا ہے تو ٹوٹ جانے دو

آئنے سے نکل رہا ہوں میں

کبھی بھلایا کبھی یاد کر لیا اس کو

یہ کام ہے تو بہت مجھ سے کام اس نے لیا

شجر سے بچھڑا ہوا برگ خشک ہوں فیصلؔ

ہوا نے اپنے گھرانے میں رکھ لیا ہے مجھے

کیا علم کہ روتے ہوں تو مر جاتے ہوں فیصلؔ

وہ لوگ جو آنکھوں کو کبھی نم نہیں کرتے

جسم تھکتا نہیں چلنے سے کہ وحشت کا سفر

خواب میں نقل مکانی کی طرح ہوتا ہے

عداوتوں میں جو خلق خدا لگی ہوئی ہے

محبتوں کو کوئی بد دعا لگی ہوئی ہے

آج پھر آئینہ دیکھا ہے کئی سال کے بعد

کہیں اس بار بھی عجلت تو نہیں کی گئی ہے

روز آسیب آتے جاتے ہیں

ایسا کیا ہے غریب خانے میں

خوف غرقاب ہو گیا فیصلؔ

اب سمندر پہ چل رہا ہوں میں

تو خواب دگر ہے تری تدفین کہاں ہو

دل میں تو کسی اور کو دفنایا ہوا ہے

رات ستاروں والی تھی اور دھوپ بھرا تھا دن

جب تک آنکھیں دیکھ رہی تھیں منظر اچھے تھے

فیصلؔ مکالمہ تھا ہواؤں کا پھول سے

وہ شور تھا کہ مجھ سے سنا تک نہیں گیا

دکھ نہیں ہے کہ جل رہا ہوں میں

روشنی میں بدل رہا ہوں میں