na ajnabī hai koī aur na āshnā koī

akele-pan kī bhī hotī hai intihā koī

na ajnabi hai koi aur na aashna koi

akele-pan ki bhi hoti hai intiha koi

usī maqām pe kal mujh ko dekh kar tanhā

bahut udaas hue phuul bechne vaale

usi maqam pe kal mujh ko dekh kar tanha

bahut udas hue phul bechne wale

maa.eñ darvāzoñ par haiñ

bārish hone vaalī hai

maen darwazon par hain

barish hone wali hai

hārne vāloñ ne is ruḳh se bhī sochā hogā

sar kaTānā hai to hathiyār na Daale jaa.eñ

haarne walon ne is ruKH se bhi socha hoga

sar kaTana hai to hathiyar na Dale jaen

sub.h aatā huuñ yahāñ aur shaam ho jaane ke ba.ad

lauT jaatā huuñ maiñ ghar nākām ho jaane ke ba.ad

subh aata hun yahan aur sham ho jaane ke baad

lauT jata hun main ghar nakaam ho jaane ke baad

ḳhud jise mehnat mashaqqat se banātā huuñ 'jamāl'

chhoḌ detā huuñ vo rasta aam ho jaane ke ba.ad

KHud jise mehnat mashaqqat se banata hun 'jamal'

chhoD deta hun wo rasta aam ho jaane ke baad

tirā firāq to rizq-e-halāl hai mujh ko

ye phal parā.e shajar se utārā thoḌī hai

tera firaq to rizq-e-halal hai mujh ko

ye phal parae shajar se utara thoDi hai

mere hone se na honā hai mirā

aag jalne se dhuāñ ābād hai

mere hone se na hona hai mera

aag jalne se dhuan aabaad hai

bichhaḌte vaqt Dhalaktā na gar in āñkhoñ se

is ek ashk kā kyā kyā malāl rah jaatā

bichhaDte waqt Dhalakta na gar in aankhon se

is ek ashk ka kya kya malal rah jata

'jamāl' har shahr se hai pyārā vo shahr mujh ko

jahāñ se dekhā thā pahlī baar āsmān maiñ ne

'jamal' har shahr se hai pyara wo shahr mujh ko

jahan se dekha tha pahli bar aasman main ne

ḳhatm hone ko haiñ ashkoñ ke zaḳhīre bhī 'jamāl'

ro.e kab tak koī is shahr kī vīrānī par

KHatm hone ko hain ashkon ke zaKHire bhi 'jamal'

roe kab tak koi is shahr ki virani par

kisī bhī vaqt badal saktā hai lamha koī

is qadar ḳhush bhī na ho merī pareshānī par

kisi bhi waqt badal sakta hai lamha koi

is qadar KHush bhi na ho meri pareshani par

kuchh aur vus'ateñ darkār haiñ mohabbat ko

visāl-o-hijr pe dār-o-madār mushkil hai

kuchh aur wus'aten darkar hain mohabbat ko

visal-o-hijr pe dar-o-madar mushkil hai

kyā us se mulāqāt kā imkāñ bhī nahīñ ab

kyuuñ in dinoñ mailī tirī poshāk bahut hai

kya us se mulaqat ka imkan bhi nahin ab

kyun in dinon maili teri poshak bahut hai

hazār tarah ke the ranj pichhle mausam meñ

par itnā thā ki koī saath rone vaalā thā

hazar tarah ke the ranj pichhle mausam mein

par itna tha ki koi sath rone wala tha

bikhar gayā hai jo motī pirone vaalā thā

vo ho rahā hai yahāñ jo na hone vaalā thā

bikhar gaya hai jo moti pirone wala tha

wo ho raha hai yahan jo na hone wala tha

aur ab ye chāhtā huuñ koī ġham baTā.e mirā

maiñ apnī miTTī kabhī aap Dhone vaalā thā

aur ab ye chahta hun koi gham baTae mera

main apni miTTi kabhi aap Dhone wala tha

tire na aane se dil bhī nahīñ dukhā shāyad

vagarna kyā maiñ sar-e-shām sone vaalā thā

tere na aane se dil bhi nahin dukha shayad

wagarna kya main sar-e-sham sone wala tha

jo āsmāñ kī bulandī ko chhūne vaalā thā

vahī mināra zamīñ par dhaḌām se aayā

jo aasman ki bulandi ko chhune wala tha

wahi minara zamin par dhaDam se aaya

ham aise be-hunaroñ meñ hai jo salīqa-e-zīst

tire dayār meñ pal-bhar qayām se aayā

hum aise be-hunaron mein hai jo saliqa-e-zist

tere dayar mein pal-bhar qayam se aaya

qarār dil ko sadā jis ke naam se aayā

vo aayā bhī to kisī aur kaam se aayā

qarar dil ko sada jis ke nam se aaya

wo aaya bhi to kisi aur kaam se aaya

maiñ huuñ ki mujh ko dīda-e-bīnā kā rog hai

aur log haiñ ki kaam unheñ apne kaam se

main hun ki mujh ko dida-e-bina ka rog hai

aur log hain ki kaam unhen apne kaam se

jo mere zikr par ab qahqahe lagātā hai

bichhaḌte vaqt koī haal dekhtā us kā

jo mere zikr par ab qahqahe lagata hai

bichhaDte waqt koi haal dekhta us ka

din guzarte jā rahe haiñ aur hujūm-e-ḳhush-gumāñ

muntazir baiThā hai aab o ḳhaak se bichhḌā huā

din guzarte ja rahe hain aur hujum-e-KHush-guman

muntazir baiTha hai aab o KHak se bichhDa hua

na ranj-e-hijrat thā aur na shauq-e-safar thā dil meñ

sab apne apne gunāh kā bojh Dho rahe the

na ranj-e-hijrat tha aur na shauq-e-safar tha dil mein

sab apne apne gunah ka bojh Dho rahe the

charāġh sāmne vaale makān meñ bhī na thā

ye sāneha mire vahm-o-gumān meñ bhī na thā

charagh samne wale makan mein bhi na tha

ye saneha mere wahm-o-guman mein bhi na tha

jo pahle roz se do āñganoñ meñ thā haa.il

vo fāsla to zamīn āsmān meñ bhī na thā

jo pahle roz se do aanganon mein tha hail

wo fasla to zamin aasman mein bhi na tha

ye ġham nahīñ hai ki ham donoñ ek ho na sake

ye rañj hai ki koī darmiyān meñ bhī na thā

ye gham nahin hai ki hum donon ek ho na sake

ye ranj hai ki koi darmiyan mein bhi na tha

vo bhī milne na.ī poshāk badal kar aayā

maiñ jo kal pairahan-e-ḳhāk badal kar aayā

wo bhi milne nai poshak badal kar aaya

main jo kal pairahan-e-KHak badal kar aaya

kabhī ye āñkheñ ḳhud bhī uḌā kartī thiiñ patañg ke saath

duur darīche se hote the ishāre hairat vaale

kabhi ye aankhen KHud bhi uDa karti thin patang ke sath

dur dariche se hote the ishaare hairat wale

chāroñ jānib rachī huī hai ashkoñ kī bū-bās

is raste se guzre hoñge qāfile hijrat vaale

chaaron jaanib rachi hui hai ashkon ki bu-bas

is raste se guzre honge qafile hijrat wale

jo dil ke taaq meñ tū ne charāġh rakkhā thā

na pūchh maiñ ne use kis tarah sitāra kiyā

jo dil ke taq mein tu ne charagh rakkha tha

na puchh main ne use kis tarah sitara kiya

ye jo laḌtā-jhagaḌtā huuñ sab se

bach rahā huuñ qubūl-e-ām se maiñ

ye jo laDta-jhagaDta hun sab se

bach raha hun qubul-e-am se main

kyā kahūñ uubne lagā huuñ 'jamāl'

ek hī jaise sub.h o shaam se maiñ

kya kahun ubne laga hun 'jamal'

ek hi jaise subh o sham se main

kaun hai is rim-jhim ke pīchhe chhupā huā

ye aañsū saare ke saare kis ke haiñ

kaun hai is rim-jhim ke pichhe chhupa hua

ye aansu sare ke sare kis ke hain

charāġh bujhte chale jā rahe haiñ silsila-vār

maiñ ḳhud ko dekh rahā huuñ fasāna hote hue

charagh bujhte chale ja rahe hain silsila-war

main KHud ko dekh raha hun fasana hote hue

mirā kamāl ki maiñ is fazā meñ zinda huuñ

du'ā na milte hue aur havā na hote hue

mera kamal ki main is faza mein zinda hun

du'a na milte hue aur hawa na hote hue

yaad rakhnā hī mohabbat meñ nahīñ hai sab kuchh

bhuul jaanā bhī baḌī baat huā kartī hai

yaad rakhna hi mohabbat mein nahin hai sab kuchh

bhul jaana bhi baDi baat hua karti hai

sūrat-e-dil baḌe shahroñ meñ rah-e-yak-tarfa

jaane vāloñ ko bahut yaad kiyā kartī hai

surat-e-dil baDe shahron mein rah-e-yak-tarfa

jaane walon ko bahut yaad kiya karti hai

vo intiqām kī ātish thī mere siine meñ

milā na koī to ḳhud ko pachhāḌ aayā huuñ

wo intiqam ki aatish thi mere sine mein

mila na koi to KHud ko pachhaD aaya hun

tere ḳhayāl meñ kabhī is tarah kho ga.e

terā ḳhayāl bhī hameñ aksar nahīñ rahā

tere KHayal mein kabhi is tarah kho gae

tera KHayal bhi hamein aksar nahin raha

do jīvan tārāj hue tab puurī huī baat

kaisā phuul khilā hai aur kaisī vīrānī meñ

do jiwan taraj hue tab puri hui baat

kaisa phul khila hai aur kaisi virani mein

thakan bahut thī magar sāya-e-shajar meñ 'jamāl'

maiñ baiThtā to mirā ham-safar chalā jaatā

thakan bahut thi magar saya-e-shajar mein 'jamal'

main baiThta to mera ham-safar chala jata

vo jis muñDer pe chhoḌ aayā apnī āñkheñ maiñ

charāġh hotā to lau bhuul kar chalā jaatā

wo jis munDer pe chhoD aaya apni aankhen main

charagh hota to lau bhul kar chala jata

kisī ke hone na hone ke baare meñ aksar

akele-pan meñ baḌe dhyān jaayā karte haiñ

kisi ke hone na hone ke bare mein aksar

akele-pan mein baDe dhyan jaya karte hain

ai zamīñ-zād tirī rif.ateñ chhūne ke liye

tujh talak maiñ ka.ī aflāk badal kar aaya

ai zamin-zad teri rifaten chhune ke liye

tujh talak main kai aflak badal kar aaya

sunte haiñ us ne DhūñD liyā aur koī ghar

ab tak jo aañkh thī tire dar par lagī huī

sunte hain us ne DhunD liya aur koi ghar

ab tak jo aankh thi tere dar par lagi hui

manhūs ek shakl hai jis se nahīñ farār

parchhā.īñ kī tarah se barābar lagī huī

manhus ek shakl hai jis se nahin farar

parchhain ki tarah se barabar lagi hui

ik aadmī se tark-e-marāsim ke ba.ad ab

kyā us galī se koī guzarnā bhī chhoḌ de

ek aadmi se tark-e-marasim ke baad ab

kya us gali se koi guzarna bhi chhoD de

duniyā pasand aane lagī dil ko ab bahut

samjho ki ab ye baaġh bhī murjhāne vaalā hai

duniya pasand aane lagi dil ko ab bahut

samjho ki ab ye bagh bhi murjhane wala hai