Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "begam"

Nazm MATCHES FOR "begam"

Nazm

jawab-e-shikwa

aah jab dil se nikaltii hai asar rakhtii hai
gulshan-e-ziist jalaane ko sharar rakhtii hai
top talvaar na ye teG-o-tabar rakhtii hai
bint-e-havvaa kii tarah tiir-e-nazar rakhtii hai
itnaa pur-soz hu.aa naala-e-saffaak miraa
kar gayaa dil pe asar shikva-e-bebaak miraa
ye kahaa sun ke sasur ne ki kahii.n hai ko.ii
saas chupke se ye bolii.n ki yahii.n hai ko.ii
saaliyaa.n kahne lagii.n qurb-o-qarii.n hai ko.ii
saale ye bole ki marduud-o-la.ii.n hai ko.ii
kuchh jo samjhaa hai to ham-zulf ke behtar samjhaa
mujh ko begam kaa sataayaa hu.aa shauhar samjhaa
apne haalaat pe tum Gaur zaraa kar lo agar
jald khul jaa.egii phir saarii haqiiqat tum par
mai.n ne ugne na diyaa zehn me.n nafrat kaa shajar
tum pe Daalii hai sadaa mai.n ne mohabbat kii nazar
kah ke sartaaj tumhe.n sar pe biThaayaa mai.n ne
tum to beTe the faqat baap banaayaa mai.n ne
mai.n ne sasuraal me.n har shaKHs kii izzat kii hai
saas sasure nahii.n nando.n kii bhii KHidmat kii hai
jeTh devar se jeThaanii se mohabbat kii hai
mai.n ne din raat mashaqqat hii mashaqqat kii hai
phir bhii ho.nTo.n pe ko.ii shikva gila kuchh bhii nahii.n
mere din raat kii mehnat kaa sila kuchh bhii nahii.n
sub.h-dam bachcho.n ko tayyaar karaatii huu.n mai.n
naashta sab ke liye roz banaatii huu.n mai.n
baasii tum khaate nahii.n taaza pakaatii huu.n mai.n
chho.Dne bachcho.n ko school bhii jaatii huu.n mai.n
mai.n ki insaan huu.n insaan nahii.n jin ko.ii
merii taqdiir me.n chhuTTii kaa nahii.n din ko.ii
vo bhii din the ki dulhan ban ke mai.n jab aa.ii thii
saath me.n jiine kii marne kii qasam khaa.ii thii
pyaar aa.ankho.n me.n thaa aavaaz me.n shahnaa.ii thii
kabhii mahbuub tumhaarii yahii harjaa.ii thii
apne ghar ke liye ye hastii miTaa dii mai.n ne
zindagii raah-e-mohabbat me.n luTaa dii mai.n ne
kis qadar tum pe giraa.n ek faqat naarii hai
daal roTii jise denaa bhii tumhe.n bhaarii hai
mujh se kab pyaar hai aulaad tumhe.n pyaarii hai
tum hii kah do yahii aa.iin-e-vafaadaarii hai
ghar to biivii se hai biivii jo nahii.n ghar bhii nahii.n
ye double bed ye takiya nahii.n chaadar bhii nahii.n
mai.n ne maanaa ki vo pahlii sii javaanii na rahii
har shab-e-vasl na.ii ko.ii kahaanii na rahii
qulzum-e-husn me.n pahlii sii ravaanii na rahii
ab mai.n pahle kii tarah raat kii raanii na rahii
apnii aulaad kii KHaatir mai.n javaa.n huu.n ab bhii
jis ke qadmo.n me.n hai jannat vahii maa.n huu.n ab bhii
the jo ajdaad tumhaare na thaa un kaa ye shi.aar
tum ho biivii se pareshaan vo biivii pe nisaar
tum kyaa karte ho har vaqt ye jo tum bezaar
tum ho guftaar ke Gaazii vo saraapaa kirdaar
apne ajdaad kaa tum ko to ko.ii paas nahii.n
ham to behis hai.n magar tum bhii to hassaas nahii.n
nahii.n jin mardo.n ko parvaa-e-nasheman tum ho
achchhii lagtii hai jise roz hii uljhan tum ho
ban ga.e apnii grihastii ke jo dushman tum ho
ho ke Gairo.n pe fidaa biivii se bad-zan tum ho
phir se aabaad na.ii ko.ii bhii vaadii kar lo
kisii kalbisnii se ab duusrii shaadii kar lo

Nashtar Amrohvi
Nazm

biwiyan

pahle to shauharo.n ko paTaatii hai.n biiviyaa.n
tigunii kaa naach phir ye nachaatii hai.n biiviyaa.n
har shab shab-baraat banaatii hai.n biiviyaa.n
kuchh din ke baa'd chhakke chhu.Daatii hai.n biiviyaa.n
pahle-pahal to kahtii hai.n tum ho mire balam
tum mil ga.e to ho ga.e duniyaa ke duur Gam
tum par hazaar jaan se qurbaan mai.n sanam
kuchh din ke baa'd kahtii hai.n shauhar ko phir KHasm
pahle to KHuub sar pe cha.Daatii hai.n biiviyaa.n
qadmo.n me.n is ke baa'd giraatii hai.n biiviyaa.n
khaa khaa ke gosht weight na apnaa ba.Dhaa.iye
jo mai.n banaa rahii huu.n vo chup-chaap khaa.iye
is vaqt ghar me.n aa.iye us vaqt jaa.iye
jaanaa kahaa.n hai jaane se pahle bataa.iye
is tarah control me.n laatii hai.n biiviyaa.n
haakim ko bhii Gulaam banaatii hai.n biiviyaa.n
vo santarii ho ko.ii ki ho ko.ii mantarii
hotaa hai haavii sab pe hii ehsaas-e-kamtarii
kaisaa bhii sher-dil ho bahaadur ho yaa jarii
rahtii hai jin ke KHauf se duniyaa Darii Darii
aise bahaaduro.n ko dabaatii hai.n biiviyaa.n
phir u.ngliyo.n pe un ko nachaatii hai.n biiviyaa.n
bachcho.n kii baat chho.Diye begam kaa hai ye haal
Gusse me.n yuu.n samajhiye ki har shai pe hai zavaal
samjhaa.e kaun aise me.n kis kii hai ye majaal
is shor-o-Gul me.n shaa.erii karnaa bhii hai muhaal
qai.nchii-sifat zabaan chalaatii hai.n biiviyaa.n
Tar-Tar se phir dimaaG dukhaatii hai.n biiviyaa.n
sasuraal me.n ho shaadii to KHarcha ho kam janaab
maike me.n hai to KHarch ye kartii hai.n be-hisaab
vo saas yaa sasur ho.n ki devar ho sab KHaraab
aayaa hu.aa hai maike se kuttaa bhii laa-javaab
kuchh is tarah dimaaG pe chhaatii hai.n biiviyaa.n
shauhar ke rishte-daar chhu.Daatii hai.n biiviyaa.n

Nashtar Amrohvi
Nazm

begam aur shaeri

ek din mujh se ye farmaane lagii biivii mirii
merii sautan ban ga.ii hai aap kii ye shaa.erii

Nashtar Amrohvi
Nazm

adl-e-jahangiri

qasr-e-shaahii me.n ki mumkin nahii.n Gairo.n kaa guzar
ek din nuur-jahaa.n baam pe thii jalva-figan
ko.ii shaamat-zada rahgiir udhar aa niklaa
garche thii qasr me.n har chaar taraf se qadGan
Gairat-e-husn se begam ne tamancha maaraa
KHaak par Dher thaa ik kushta-e-be-gor-o-kafan
saath hii shah-e-jahaa.ngiir ko pahu.nchii jo KHabar
Gaiz se aa ga.ii abruu-e-adaalat pe shikan
hukm bhejaa ki kaniizaan-e-shabistaan-e-shahii
jaa ke puuchh aa.e.n ki sach yaa ki Galat hai ye suKHan
naKHvat-e-husn se begam ne ba-sad-naaz kahaa
merii jaanib se karo arz ba-aa.iin-e-hasan
haa.n mujhe vaaq.ea-e-qatl se inkaar nahii.n
mujh se naamuus-e-hayaa ne ye kahaa thaa ki bazan
us kii gustaaKH-nigaahii ne kiyaa us ko halaak
kishvar-e-husn me.n jaarii hai yahii shara-e-kuhan
mufti-e-dii.n se jahaa.ngiir ne fatvaa puuchhaa
ki sharii.at me.n kisii ko nahii.n kuchh jaa-e-suKHan
mufti-e-diin ne be-KHauf-o-KHatar saaf kahaa
shar.a kahtii hai ki qaatil kii u.Daa do gardan
log darbaar me.n is hukm se tharraa uTThe
par jahaa.ngiir ke abruu pe na bal thaa na shikan
tarkasho.n ko ye diyaa hukm ki andar jaa kar
pahle begam ko kare.n basta-e-zanjiir-o-rasan
phir usii tarah use khii.nch ke baahar laa.e.n
aur jallaad ko de.n hukm ki haa.n teG bazan
ye vahii nuur-jahaa.n hai ki haqiiqat me.n yahii
thii jahaa.ngiir ke parde me.n shahanshaah-e-zaman
us kii peshaani-e-naazuk pe jo pa.Dtii thii girah
jaa ke ban jaatii thii auraaq-e-hukuumat pe shikan
ab na vo nuur-jahaa.n hai na vo andaaz-e-Guruur
na vo Gamze hai.n na vo arbada-e-sabr-shikan
ab vahii paa.nv har ik gaam pe tharraate hai.n
jin kii raftaar se paamaal the murGaan-e-chaman
ek mujrim hai ki jis kaa ko.ii haamii na shafii
ek bekas hai ki jis kaa na ko.ii ghar na vatan
KHidmat-e-shaah me.n begam ne ye bhejaa paiGaam
KHuu.n-bahaa bhii to sharii.at me.n ik amr-e-ahsan
mufti-e-sharaa se phir shaah ne fatvaa puuchhaa
bole jaa.ez hai razaa-mand huu.n gar bachcha o zan
vaariso.n ko jo diye laakh diram begam ne
sab ne darbaar me.n kii arz ki ai shaah-e-zaman
ham ko maqtuul kaa lenaa nahii.n manzuur qisaas
qatl kaa hukm jo ruk jaa.e to hai mustahsan
ho chukaa jab ki shahanshaah ko puuraa ye yaqiin
ki nahii.n is me.n ko.ii shaa.eba-e-hiila-o-fan
uTh ke darbaar se aahista chalaa suu-e-haram
thii jahaa.n nuur-jahaa.n mo'takif-e-bait-e-KHazan
daf.atan paa.nv pe begam ke giraa aur ye kahaa
tuu agar kushta shudii aah che mii kardam man

Shibli Nomani
Nazm

machhli ki bu

bistar me.n leTe leTe
us ne sochaa
''mai.n moTaa hotaa jaataa huu.n
kal mai.n apne niile suiT ko
alter karne
darzii ke haa.n de aa.uu.ngaa
nayaa suiT do-chaar mahiine baa'd sahii!
darzii kii duukaan se lag kar
jo hotel hai
us hotel kii
machhlii testy hotii hai
kal khaa.uu.ngaa
lekin machhlii kii buu saalii
haatho.n me.n bas jaatii hai
kal saabun bhii laanaa hai
ghar aate
letaa aa.uu.ngaa
ab ke ''yardley'' laa.uu.ngaa
office me.n kal kaam bahut hai
boss agar naaraaz hu.aa to
do din kii chhuTTii le luu.ngaa
aur agar mood hu.aa to
chhe ke show me.n
''raam-aur-shyaam'' bhii dekh aa.uu.n gaa
picture achchhii hai saalii
nau se baara
club ramii
do din se luck achchhaa hai
kal bhii saaTh ruupe jiitaa thaa
aaj bhii tiis ruupe jiitaa huu.n
aur ummiid hai
kal bhii jiit ke aa.uu.ngaa
bas ab nii.nd aa.e to achchhaa
kal bhii
jiit ke
nii.nd aa.e to
ikkaa-dukkii nahla-dahla
ii.nT kii begam
machhlii kii buu
taash ke patte
joker joker
suiT pahan kar
moTaa-tag.Daa joker....
itnaa bahut saa soch ke vo
soyaa thaa magar
phir na uThaa!!
duusre din jab
us kaa janaaza
darzii kii duukaan ke paas se guzraa to
hotel se machhlii kii buu
duur duur tak aa.ii thii!!!

Mohammad Alvi
Nazm

taaruf

mire daadaa jo british fauj ke naamii bhago.De the
na jaane kitnii jailo.n ke unho.n ne qufl to.De the
charas kaa aur gaa.nje kaa vo kaarobaar karte the
KHudaa se bhii nahii.n Darte the bas begam se Darte the
mire taa.e bhii apne vaqt ke mash.huur cheater the
ka.ii jailo.n ke to vo half-yearly bhii visitor the
har ik Gunda unhe.n ghar baiThe Gunda-tex detaa thaa
tijorii to.Dne kaa fan unhii.n se mai.n ne siikhaa thaa
chachaa marhuum naasik jail se jab vaapas aa.e the
to mash.huur-e-zamaana ik tavaa.if saath laa.e the
vo Thumrii daadraa aur bhairvii.n me.n baat kartii thii
tarannum me.n surayyaa aur lataa ko maat kartii thii
mire vaalid KHudaa baKHshe kahii.n aate na jaate the
sahar se shaam tak amaa.n ke aage dum hilaate the
thii ik bakre numaa burraaq daa.Dhii un ke chehre par
magar phir bhii kabaDDii khelte the raat ko aksar
mai.n apne baap daadaa ke hii naqsh-e-paa pe chaltaa huu.n
magar bas farq itnaa hai vo GunDe the mai.n netaa huu.n
police piichhe thii un ke third-degree kii ziyaafat ko
mire piichhe bhii rahtii hai magar merii hifaazat ko
nahii.n parvaa ki leader kaun achchhaa kaun ganda hai
siyaasat merii rozii hai election meraa dhanda hai
siyaasat me.n qadam rakh kar haqiiqat mai.n ne ye jaanii
churaa kaare kunad aaqil ki baaz aayad pashemaanii

Nashtar Amrohvi
Nazm

kasrat-e-aulad

kasrat-e-aulaad se ham is qadar bezaar hai.n
ab to begam se alag rahne ko bhii tayyaar hai.n

Nashtar Amrohvi
Nazm

samandar ka sukut

zindagii hai ki kisii shaah kii begam jis ko
vaqt baazaar me.n laayaa hai barhana kar ke
aur KHaamosh hai.n tahziib o tamaddun ke sapuut
aaj phir ghaat me.n baiThaa hai samundar kaa sukuut

Chandrabhan Khayal
Nazm

phulon ki shahzadi

kalii se kah rahii thii ek din shabnam gulistaa.n me.n
rahii mai.n ek muddat Guncha-haa-e-baaG-e-rizvaa.n me.n
tumhaare gulistaa.n kii kaifiyat sarshaar hai aisii
nigah firdaus dar-e-daaman hai merii chashm-e-hairaa.n me.n
sunaa hai ko.ii shahzaadii hai haakim us gulistaa.n kii
ki jis ke naqsh-e-paa se phuul ho.n paidaa bayaabaa.n me.n
kabhii saath apne us ke aastaa.n tak mujh ko tuu le chal
chhupaa kar apne daaman me.n ba-ra.ng-e-mauj-e-buu le chal
kalii bolii sariir-aaraa hamaarii hai vo shahzaadii
daraKHshaa.n jis kii Thokar se ho.n patthar bhii nagii.n ban kar
magar fitrat tirii uftinda aur begam kii shaan uu.nchii
nahii.n mumkin ki tuu pahu.nche hamaarii ham-nashii.n ban kar
pahu.nch saktii hai tuu lekin hamaarii shaahzaadii tak
kisii dukh dard ke maare kaa ashk-e-aatishii.n ban kar
nazar us kii payaam-e-'iid hai ahl-e-moharram ko
banaa detii hai gauhar Gam-zado.n ke ashk-e-paiham ko

Allama Iqbal
Nazm

baTla house

gha.Dii kii Tik-Tik bol rahii hai raat ke shaayad ek baje hai.n
baTla house kii ek galii me.n moTe kutte bhau.nk rahe hai.n
ek kha.nDar me.n tez raushnii chaaro.n jaanib phail rahii hai
baGal me.n leTaa saathii meraa ab tak pub jii khel rahaa hai
mai.n bhii ab tak jaag rahaa huu.n aa.nkhe.n muu.nde soch rahaa huu.n
niiche jaanaa kaisaa hogaa baahar kitnii sardii hogii
qutub sitaara kidhar ko hogaa raat kii raanii kaisii hogii
sub.h kaa suuraj kahaa.n pe hogaa abhii KHudaa kyaa kartaa hogaa
sa.Dak kinaare sone vaale jo.De kaise sote ho.nge
in ko machchhar kaaTte ho.nge
naum chomsky lawn me.n baiThe bachche aaKHir kaise ho.nge
un ko kutte chaaTte ho.nge
kyaa in bhuuk-zada bachcho.n ke KHvaab me.n pariyaa.n aatii ho.ngii
kaTe-phaTe haatho.n ke takiye ke niiche kuchh rakhtii ho.ngii
kaisii baate.n karte ho jii kyaa pariyo.n kaa kaam yahii hai
mahal saraa.e chho.D ke ab vo sa.Dak kinaare aa.e.ngii kyaa
raat ke shaayad De.Dh baje hai.n baTla house kaa chauk khulaa hai
raat ko job se aane vaale raat me.n job ko jaane vaale
ek haath me.n liye chaa.e cup ek haath me.n chhoTii cigarette
sa.Dak paar kyo.n dekh rahe hai.n
biryaanii ko Dhuu.nDh rahe hai.n
un ke piichhe sa.Dak kinaare qabristaan kaa gate khulaa hai
andar kutte ghuum rahe hai.n shaayad khaanaa Dhuu.nDh rahe hai.n
baahar cigarette aur coffee hai andar kaafii taariikii hai
mai.n bhii andar jhaa.nk rahaa huu.n haule haule soch rahaa huu.n
qabristaan ke andar me.n ye latrine kis ne banvaayaa
kyo.n banvaayaa
shaayad murde raat me.n uTh kar us ke andar jaate ho.nge
haajat puurii karte ho.nge
yaa phir cigarette piine vaale la.Dke andar jaate ho.nge
KHaakii vardii ghar vaalo.n se chhup kar cigarette piite ho.nge
ek kinaare adab kii malika sab kuchh baiThii dekh rahii hai
aag kaa dariyaa chaa.ndnii begam shiishe kaa ghar likhne vaalii
ainii aapaa soch rahii hai
meraa qaarii kyo.n aayaa hai
shaayad is ko gautam shankar tal.at ne uljhaayaa hogaa
yaa phir us ko KHayaabaa.n kii champaa ne paglaayaa hogaa
yaa phir is paagal la.Dke ne shu.uur kii rau ko chhe.Daa hogaa
yaa phir is ne aag kaa dariyaa aadhaa pa.Dh kar chho.Daa hogaa
falsafyaana baate.n sun kar saare murde sochte ho.nge
ko.ii apnii KHvaab-gaah ko chho.D ke aaKHir kyo.n aayaa hai
mai.n bhii baiThaa soch rahaa huu.n
itnii raat ko kyo.n aayaa huu.n

Asim Badr
Nazm

tatilat

ba.Do.n ko aur chhoTo.n ko inhii.n sadmaat ne maaraa
mujhe daftar unhe.n college kii ta.atiilaat ne maaraa
kabhii sardii kii chhuTTii hai kabhii garmii kii chhuTTii hai
ye sab us ke alaava hai.n jo haT-dharmii kii chhuTTii hai
kabhii ta.atiil khaane kii kabhii ta.atiil piine kii
pa.Dhaa.ii do mahiine chhuTTiyaa.n hai.n das mahiine kii
abhii parso.n to hai ra.ngiinii-e-haalaat kii chhuTTii
phir us ke baa'd puure maah hai barsaat kii chhuTTii
kabhii school me.n ustaad ke sar-dard kii chhuTTii
havaa-e-sard chal jaa.e to phir har fard kii chhuTTii
kabhii afsar ko tho.Daa saa buKHaar aa jaa.e to chhuTTii
kabhii sasuraal se begam kaa taar aa jaa.e to chhuTTii
kabhii Table pe rakh ke paa.nv so jaanaa bhii chhuTTii hai
kabhii daftar se uTh kar gol ho jaanaa bhii chhuTTii hai
abhii to dard ke aasaar kuchh baaqii hai.n siine me.n
abhii to biis hii naaGe hu.e hai.n is mahiine me.n
Garaz jo tiin-sau-pai.nsaTh dino.n ke goshvaare hai.n
hamaare tiin-sau din hai.n faqat pai.nsaTh tumhaare hai.n

Khalid Irfan
Nazm

yahan dildar-begam dafn hai

''is jagah dildaar-begam dafn hai
vo afiifa paarsaa saabir-o-shaakir so rahii hai
yahaa.n se Gair mardo.n kaa guzarnaa man.a hai
baraa.e faatiha jo aanaa chaahe aa.e
lekin duur se pa.Dh le''

Zehra Nigaah
Nazm

shauhar ki fariyaad

ai mirii begam na tuu merii KHudii kamzor kar
ye shariifo.n kaa mohalla hai na itnaa shor kar
shab ke pur-taskiin lamho.n me.n na mujh ko bor kar
is sa.aadat-mand shauhar ko na yuu.n ignore kar
diida-o-dil terii chaahat ke liye betaab hai.n
mujh se shauhar aaj-kal baazaar me.n naayaab hai.n

Asad Jafri
Nazm

mashwara

pesh aate hai.n jo baahar hukmaraano.n kii tarah
guftuguu karte hai.n jo rustam zamaano.n kii tarah
ghar me.n rahte hai.n magar vo be-zabaano.n kii tarah
kaaTte hai.n vaqt apnaa niim-jaano.n kii tarah
saamne begam ke un kii har ba.Daa.ii be-asar
ai mare hamdam KHudaa ke vaaste shaadii na kar

Asad Jafri
Nazm

papa miyan

begam bhii jaan-o-dil se thii.n un kii rafiiq-e-kaar
ehsaan la.Dkiyo.n pe hai.n un ke bhii be-shumaar

Syeda Farhat
Nazm

so ab bhi hai

vahii begam kii KHuu.n-KHvaarii jo pahle thii so ab bhii hai
vahii deriina biimaarii jo pahle thii so ab bhii hai
vahii Tar-Tar vahii KHafgii vahii Gamze vahii ishve
vahii taano.n kii biimaarii jo pahle thii so ab bhii hai
bu.Dhaape me.n bhii in ko shauq hai.n ahd-e-javaanii ke
''lipstick'' kii KHariidaarii jo pahle thii so ab bhii hai
vahii hai ruuThnaa in kaa vahii maike kii hai dhamkii
vahii zillat vahii KHvaarii jo pahle thii so ab bhii hai
kabhii hai saas kaa ronaa kabhii nando.n se hai jhag.Daa
zabaa.n hai in kii ''do-dhaarii'' jo pahle thii so ab bhii hai
faqat apne hii maike kii kiyaa kartii hai.n taariife.n
merii amaa.n se be-zaarii jo pahle thii so ab bhii hai
adab kaa doctor ban kar milaa kyaa ham Gariibo.n ko
Gariibii aur bekaarii jo pahle thii so ab bhii hai
hu.ii shaadii hu.e bachche 'nazar' kaa haal hai patlaa
vahii ab bhii hai laachaarii jo pahle thii so ab bhii hai

Nazar Barni
Nazm

mera roza hai

duur se jalva dikhaa.o ki miraa roza hai
tum mire paas na aa.o ki miraa roza hai
ghaT sake din to ghaTaa.o ki miraa roza hai
ba.Dh sake raat ba.Dhaa.o ki miraa roza hai
qarz uThaa.o ki churaa.o magar ai ahl-e-haram
biisiyo.n khaane pakaa.o ki miraa roza hai
mere bachcho kahii.n baaGiiche me.n khelo jaa kar
gul-Gapaa.Daa na machaa.o ki miraa roza hai
baa.ndh lo aa.nkho.n pe paTTii mirii begam yaa tum
aise ban-Than ke na aa.o ki miraa roza hai
ko.ii aavaaz bhii kaano.n me.n na aa.e mere
ghar me.n jhaa.Duu na phiraa.o ki miraa roza hai
ghar ke darvaaze pe ye likh diyaa notice mai.n ne
ghar kii ghanTii na bajaa.o ki miraa roza hai
raasta apnaa badal de.n ye havaa me.n apnaa
in jahaazo.n ko bataa.o ki miraa roza hai
TuuT hii jaa.e na roza miraa bas dhachke me.n
zor se bus na chalaa.o ki miraa roza hai
kaam ho saktaa hai daftar kaa kahii.n rozo.n me.n
mez kursii ko haTaa.o ki miraa roza hai
saath chaltaa huu.n mai.n pub me.n mire yaaro lekin
baa'd iftaar pilaa.o ki miraa roza hai
ho.nT pap.Daa.e hai.n utraa hu.aa chehra dekho
aaj tum maan hii jaa.o ki miraa roza hai
tum ibaadat me.n tijaarat kii milaavaT karke
duudh paanii me.n milaa.o ki miraa roza hai
tum na be-rozo.n se 'bulbul' kabhii aise uljho
gaaliyaa.n yuu.nhii na khaa.o ki miraa roza hai

Bulbul Kashmiri
Nazm

dam nikle

jhaga.D kar jab kahaa begam ne ham se ghar se jaane ko
bahut be-aabruu ho kar KHud apne ghar se ham nikle

Ghaus Khah makhah Hyderabadi
Nazm

mehman-dari

phailii hai fazaa.o.n me.n KHushii merii nazar kii
ha.nstii nazar aatii hai.n fazaa.e.n mire ghar kii
dil-shaad mire ahl-o-ayaal aaj bahut hai.n
masruuf hai.n vo bhii nahii.n masruuf faqat mai.n
rakhii hai saliiqe se har ik kaam kii chiiz aaj
mehmaan mire ghar me.n hai.n kuchh mere aziiz aaj
shaadii kaa makaa.n ghar miraa ma.aluum na ho kyuu.n
majma.a ho jab itnaa to bhalaa dhuum na ho kyuu.n
bhaa.ii bhii hai.n bahno.ii bhii bhaavaj bhii bahan bhii
baiThaa hai bhatiijaa bhii bhatiije kii dulhan bhii
bachchii idhar ik baiTh ke taktii hai dulhan ko
kuchh tifl sataate hai.n udhar apnii bahan ko
bachcho.n pe jhalak KHaas hai tanviir-e-sahar kii
uTh baiThe hai.n sab sunte hii aavaaz gajar kii
dilkash ye fazaa sub.h kii ye nuur kaa ta.Dkaa
bulbul kii tarah bol rahaa hai ko.ii la.Dkaa
be-vaj.h ko.ii rone pe aamaada hu.aa hai
hairat se na.e gur ko ko.ii dekh rahaa hai
baiThaa hai ye chup dau.D rahaa hai vo KHushii se
khaane ke liye zid ko.ii kartaa hai abhii se
karnaa hai jo saamaan-e-ziyaafat ko faraaham
aa aa ke mire kaan me.n kuchh kahtii hai.n begam
honaa hai jo KHuubii se ziyaafat kaa sar-anjaam
la.Dkii ke zariye se bhii pahu.nchaatii hai.n paiGaam
aatii bhii hai.n jaatii bhii hai.n begam suu-e-matbaKH
maamaa.o.n me.n be-vaqt jahaa.n hotii hai chaKH chaKH
raahat na mile kyuu.n unhe.n halkii tag-o-dau me.n
saa.e kii tarah saath hai la.Dkii bhii jilau me.n
nannhii abhii uTThii nahii.n pahluu se phuphii ke
letii hai.n vo rah rah ke maze us kii ha.nsii ke
la.Dke mire KHush ho ke udhar dekh rahe hai.n
iKHlaas-o-mohabbat se muKHaatib huu.n jidhar mai.n
majma.a ye aziizo.n kaa mohabbat kii ye baate.n
in pyaar kii baato.n me.n na choTe.n hai.n na ghaate.n
anvaar tabassum ke takallum se hai.n paidaa
zau sub.h kii is manzar-e-dil-kash pe hai shaidaa
baato.n kaa abhii thaa tarabii silsila jaarii
nargis ne kahaa aa ke hai tayyaar nahaarii

Ali Manzoor Hyderabadi
Nazm

main shair hun

KHudaa rakkhe mirii begam Gariiq-e-nukta-chiinii hai
mujassam barhamii naa-vaaqif-e-KHanda-jabiinii hai
na is kii baat me.n narmii na lab me.n angbiinii hai
ba-faiz-e-shaa.irii ghar me.n na ghii hai aur na chiinii hai
tabii.at ab to hai aamaada-e-tark-e-Gazal-KHvaanii
che raa kaarii kunad aaqil ki baaz aayad pashemaanii

Asad Jafri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now