Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "hisaar"

Nazm MATCHES FOR "hisaar"

Nazm

taj-mahal

ye imaaraat o maqaabir ye fasiile.n ye hisaar
mutlaq-ul-hukm shahanshaaho.n kii azmat ke sutuu.n

Sahir Ludhianvi
Nazm

aurat

uTh mirii jaan mire saath hii chalnaa hai tujhe
qalb-e-maahaul me.n larzaa.n sharar-e-ja.ng hai.n aaj
hausle vaqt ke aur ziist ke yak-ra.ng hai.n aaj
aabgiino.n me.n tapaa.n valvala-e-sa.ng hai.n aaj
husn aur ishq ham-aavaaz o ham-aaha.ng hai.n aaj
jis me.n jaltaa huu.n usii aag me.n jalnaa hai tujhe
uTh mirii jaan mire saath hii chalnaa hai tujhe
tere qadmo.n me.n hai firdaus-e-tamaddun kii bahaar
terii nazro.n pe hai tahziib o taraqqii kaa madaar
terii aaGosh hai gahvaara-e-nafs-o-kirdaar
taa-ba-kai gird tire vahm o ta.ayyun kaa hisaar
kau.nd kar majlis-e-KHalvat se nikalnaa hai tujhe
uTh mirii jaan mire saath hii chalnaa hai tujhe
tuu ki be-jaan khilauno.n se bahal jaatii hai
taptii saa.nso.n kii haraarat se pighal jaatii hai
paa.nv jis raah me.n rakhtii hai phisal jaatii hai
ban ke siimaab har ik zarf me.n Dhal jaatii hai
ziist ke aahanii saa.nche me.n bhii Dhalnaa hai tujhe
uTh mirii jaan mire saath hii chalnaa hai tujhe
zindagii jehd me.n hai sabr ke qaabuu me.n nahii.n
nabz-e-hastii kaa lahuu kaa.npte aa.nsuu me.n nahii.n
u.Dne khulne me.n hai nik.hat KHam-e-gesuu me.n nahii.n
jannat ik aur hai jo mard ke pahluu me.n nahii.n
us kii aazaad ravish par bhii machalnaa hai tujhe
uTh mirii jaan mire saath hii chalnaa hai tujhe
goshe goshe me.n sulagtii hai chitaa tere liye
farz kaa bhes badaltii hai qazaa tere liye
qahr hai terii har ik narm adaa tere liye
zahr hii zahr hai duniyaa kii havaa tere liye
rut badal Daal agar phuulnaa phalnaa hai tujhe
uTh mirii jaan mire saath hii chalnaa hai tujhe
qadr ab tak tirii taariiKH ne jaanii hii nahii.n
tujh me.n sho.ale bhii hai.n bas ashk-fishaanii hii nahii.n
tuu haqiiqat bhii hai dilchasp kahaanii hii nahii.n
terii hastii bhii hai ik chiiz javaanii hii nahii.n
apnii taariiKH kaa unvaan badalnaa hai tujhe
uTh mirii jaan mire saath hii chalnaa hai tujhe
to.D kar rasm kaa but band-e-qadaamat se nikal
zof-e-ishrat se nikal vahm-e-nazaakat se nikal
nafs ke khii.nche hu.e halqa-e-azmat se nikal
qaid ban jaa.e mohabbat to mohabbat se nikal
raah kaa KHaar hii kyaa gul bhii kuchalnaa hai tujhe
uTh mirii jaan mire saath hii chalnaa hai tujhe
to.D ye azm-shikan daGdaGa-e-pand bhii to.D
terii KHaatir hai jo zanjiir vo saugand bhii to.D
tauq ye bhii hai zamurrad kaa guluu-band bhii to.D
to.D paimaana-e-mardaan-e-KHirad-mand bhii to.D
ban ke tuufaan chhalaknaa hai ubalnaa hai tujhe
uTh mirii jaan mire saath hii chalnaa hai tujhe
tuu falaatuun o arastuu hai tuu zahraa parvii.n
tere qabze me.n hai garduu.n tirii Thokar me.n zamii.n
haa.n uThaa jald uThaa paa-e-muqaddar se jabii.n
mai.n bhii rukne kaa nahii.n vaqt bhii rukne kaa nahii.n
la.Dkha.Daa.egii kahaa.n tak ki sambhalnaa hai tujhe
uTh mirii jaan mire saath hii chalnaa hai tujhe

Kaifi Azmi
Nazm

muhasara

miraa qalam nahii.n tasbiih us maballiG kii
jo bandagii kaa bhii har dam hisaab rakhtaa hai
miraa qalam nahii.n miizaan aise aadil kii
jo apne chehre pe dohraa naqaab rakhtaa hai

Ahmad Faraz
Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal
Nazm

goristan-e-shahi

aasmaa.n baadal kaa pahne KHirqa-e-deriina hai
kuchh mukaddar saa jabiin-e-maah kaa aa.iina hai
chaa.ndnii phiikii hai is nazzaara-e-KHaamosh me.n
sub.h-e-saadiq so rahii hai raat kii aaGosh me.n
kis qadar ashjaar kii hairat-fazaa hai KHaamushii
barbat-e-qudrat kii dhiimii sii navaa hai KHaamushii
baatin-e-har-zarra-e-aalim saraapaa dard hai
aur KHaamoshii lab-e-hastii pe aah-e-sard hai
aah jaulaa.n-gaah-e-aalam-giir yaanii vo hisaar
dosh par apne uThaa.e saik.Do.n sadiyo.n kaa baar
zindagii se thaa kabhii ma.amuur ab sunsaan hai
ye KHamoshii us ke ha.ngaamo.n kaa goristaan hai
apne sukkaan-e-kuhan kii KHaak kaa dil-daada hai
koh ke sar par misaal-e-paasbaa.n istaada hai
abr ke rauzan se vo baalaa-e-baam-e-aasmaa.n
naazir-e-aalam hai najm-e-sabz-faam-e-aasmaa.n
KHaak-baazii vus.at-e-duniyaa kaa hai manzar use
daastaa.n naakaami-e-insaa.n kii hai azbar use
hai azal se ye musaafir suu-e-manzil jaa rahaa
aasmaa.n se inqilaabo.n kaa tamaashaa dekhtaa
go sukuu.n mumkin nahii.n aalam me.n aKHtar ke liye
faatiha-KHvaanii ko ye Thahraa hai dam bhar ke liye
ra.ng-o-aab-e-zinagii se gul-ba-daaman hai zamii.n
saik.Do.n KHuu.n-gashta tahziibo.n kaa madfan hai zamii.n
KHvaab-gah shaaho.n kii hai ye manzil-e-hasrat-fazaa
diida-e-ibrat KHiraaj-e-ashk-e-gul-guu.n kar adaa
hai to goristaa.n magar ye KHaak-e-garduu.n-paaya hai
aah ik bargashta qismat qaum kaa sarmaaya hai
maqbaro.n kii shaan hairat-aafrii.n hai is qadar
jumbish-e-mizhgaa.n se hai chashm-e-tamaashaa ko hazar
kaifiyat aisii hai naakaamii kii is tasviir me.n
jo utar saktii nahii.n aa.iina-e-tahriir me.n
sote hai.n KHaamosh aabaadii ke ha.ngaamo.n se duur
muztarib rakhtii thii jin ko aarzuu-e-naa-subuur
qabr kii zulmat me.n hai in aaftaabo.n kii chamak
jin ke darvaazo.n pe rahtaa hai jabii.n-gustaar falak
kyaa yahii hai in shahanshaaho.n kii azmat kaa ma.aal
jin kii tadbiir-e-jahaa.nbaanii se Dartaa thaa zavaal
rob-e-faGfuurii ho duniyaa me.n ki shaan-e-qaisarii
Tal nahii.n saktii Ganiim-e-maut kii yuurish kabhii
baadshaaho.n kii bhii kisht-e-umr kaa haasil hai gor
jaada-e-azmat kii goyaa aaKHirii manzil hai gor
shorish-e-bazm-e-tarab kyaa uud kii taqriir kyaa
dardmandaan-e-jahaa.n kaa naala-e-shab-giir kyaa
arsa-e-paikaar me.n ha.ngaama-e-shamshiir kyaa
KHuun ko garmaane vaalaa naara-e-takbiir kyaa
ab ko.ii aavaaz soto.n ko jagaa saktii nahii.n
siina-e-viiraa.n me.n jaan-e-rafta aa saktii nahii.n
ruuh-e-musht-e-KHaak me.n zahmat-kash-e-bedaad hai
kuucha gard-e-nai hu.aa jis dam nafas fariyaad hai
zindagii insaa.n kii hai maanind-e-murG-e-KHush-navaa
shaaKH par baiThaa ko.ii dam chahchahaayaa u.D gayaa
aah kyaa aa.e riyaaz-e-dahr me.n ham kyaa ga.e
zindagii kii shaaKH se phuuTe khile murjhaa ga.e
maut har shaah o gadaa ke KHvaab kii taabiir hai
is sitamgar kaa sitam insaaf kii tasviir hai
silsila hastii kaa hai ik bahr-e-naa-paidaa-kanaar
aur is dariyaa-e-be-paayaa.n kii mauje.n hai.n mazaar
ai havas KHuu.n ro ki hai ye zindagii be-e'tibaar
ye sharaare kaa tabassum ye KHas-e-aatish-savaar
chaa.nd jo suurat-gar-e-hastii kaa ik ejaaz hai
pahne siimaabii qabaa mahv-e-KHiraam-e-naaz hai
charKH-e-be-anjum kii dahshatnaak vus.at me.n magar
bekasii is kii ko.ii dekhe zaraa vaqt-e-sahar
ik zaraa saa abr kaa Tuk.Daa hai jo mahtaab thaa
aaKHirii aa.nsuu Tapak jaane me.n ho jis kii fanaa
zindagii aqvaam kii bhii hai yuu.nhii be-e'tibaar
ra.ng-haa-e-rafta kii tasviir hai un kii bahaar
is ziyaa.n-KHaane me.n ko.ii millat-e-garduu.n-vaqaar
rah nahii.n saktii abad tak baar-e-dosh-e-rozgaar
is qadar qaumo.n kii barbaadii se hai KHuugar jahaa.n
dekhtaa be-e'tinaa.ii se hai ye manzar jahaa.n
ek suurat par nahii.n rahtaa kisii shai ko qaraar
zauq-e-jiddat se hai tarkiib-e-mizaaj-e-rozgaar
hai nagiin-e-dahr kii ziinat hamesha naam-e-nau
maadar-e-giitii rahii aabastan-e-aqvaam-e-nau
hai hazaaro.n qaafilo.n se aashnaa ye rahguzar
chashm-e-koh-e-nuur ne dekhe hai.n kitne taajvar
misr o baabul miT ga.e baaqii nishaa.n tak bhii nahii.n
daftar-e-hastii me.n un kii daastaa.n tak bhii nahii.n
aa dabaayaa mehr-e-iiraa.n ko ajal kii shaam ne
azmat-e-yuunaan-o-ruumaa luuT lii ayyaam ne
aah muslim bhii zamaane se yuu.nhii ruKHsat hu.aa
aasmaa.n se abr-e-aazaarii uThaa barsaa gayaa
hai rag-e-gul sub.h ke ashko.n se motii kii la.Dii
ko.ii suuraj kii kiran shabnam me.n hai uljhii hu.ii
siina-e-dariyaa shu.aa.o.n ke liye gahvaara hai
kis qadar pyaaraa lab-e-juu mehr kaa nazzaara hai
mahv-e-ziinat hai sanobar juu.ebaar-e-aa.iina hai
Guncha-e-gul ke liye baad-e-bahaar-e-aa.iina hai
na.ara-zan rahtii hai koyal baaG ke kaashaane me.n
chashm-e-insaa.n se nihaa.n patto.n ke uzlat-KHaane me.n
aur bulbul mutrib-e-ra.ngii.n navaa-e-gulsitaa.n
jis ke dam se zinda hai goyaa havaa-e-gulsitaa.n
ishq ke ha.ngaamo.n kii u.Dtii hu.ii tasviir hai
KHaama-e-qudrat kii kaisii shoKH ye tahriir hai
baaG me.n KHaamosh jalse gulsitaa.n-zaado.n ke hai.n
vaadi-e-kohsaar me.n na.are shabaa.n-zaado.n ke hai.n
zindagii se ye puraanaa KHaak-daa.n ma.amuur hai
maut me.n bhii zindagaanii kii ta.Dap mastuur hai
pattiyaa.n phuulo.n kii girtii hai.n KHizaa.n me.n is tarah
dast-e-tifl-e-KHufta se ra.ngii.n khilaune jis tarah
is nashaat-aabaad me.n go aish be-andaaza hai
ek Gam yaanii Gam-e-millat hamesha taaza hai
dil hamaare yaad-e-ahd-e-rafta se KHaalii nahii.n
apne shaaho.n ko ye ummat bhuulne vaalii nahii.n
ashk-baarii ke bahaane hai.n ye uj.De baam o dar
girya-e-paiham se biinaa hai hamaarii chashm-e-tar
dahr ko dete hai.n motii diida-e-giryaa.n ke ham
aaKHirii baadal hai.n ik guzre hu.e tuufaa.n ke ham
hai.n abhii sad-haa guhar is abr kii aaGosh me.n
barq abhii baaqii hai is ke siina-e-KHaamosh me.n
vaadi-e-gul KHaak-e-sahraa ko banaa saktaa hai ye
KHvaab se ummiid-e-dahqaa.n ko jagaa saktaa hai ye
ho chukaa go qaum kii shaan-e-jalaalii kaa zuhuur
hai magar baaqii abhii shaan-e-jamaalii kaa zuhuur

Allama Iqbal
Nazm

jawan aag

to.D degii ye javaa.n fikr hisaar-e-zindaa.n
jaag uTThe hai.n mire des ke bekas insaa.n

Habib Jalib
Nazm

salam logo

vahii hai shab kaa hisaar logo
salaam ai ashk-baar logo

Habib Jalib
Nazm

sal ki aaKHiri shab

saal kii aaKHirii shab
mere kamre me.n kitaabo.n kaa hujuum
pichhlii raato.n ko taraashe hu.e kuchh maah o nujuum
mai.n akelaa mire atraaf uluum
ek tasviir pe bante hu.e mere KHad-o-KHaal
in pe jamtii hu.ii gard-e-mah-o-saal
ik hayuulaa saa pas-e-shahr-e-Gubaar
aur mujhe jak.De hu.e KHud mirii baaho.n ke hisaar
ko.ii rauzan hai na dar
so ga.e ahl-e-KHabar
saal kii aaKHirii shab
na kisii hijr kaa sadma na kisii vasl kaa KHvaab
KHam hone ko hai bas aaKHirii lamhe kaa shabaab
aur ufuq paar dhu.ndlako.n se kahe.n
khulne vaalaa hai na.ii sub.h kaa baab
is na.ii sub.h ko kyaa nazr karuu.n
har taraf phailaa hu.aa tez havaa.o.n kaa fusuu.n
aur mai.n sochtaa huu.n
dar-o-diivaar me.n lipTe hu.e sahme hu.e log
galii-kuucho.n me.n nikalte hu.e ghabraate hu.e
mai.n unhe.n kaise bataa.uu.n ki yahii mausam hai
jab parindo.n ke par-o-baal nikal aate hai.n

Saleem Kausar
Nazm

aaKHiri raat

unhe.n muKHtaar ban kar bekasii ke KHuun kii mauje.n
hisaar-e-marg ne mahsuur kar lii.n ja.ng jo fauje.n

Hafeez Jalandhari
Nazm

mazdur aurten

vo jaa rahii hai.n saro.n pe patthar
uThaa.e mazduur aurte.n kuchh
ye khurdure haath maile paa.nv
jamii hai.n ho.nTo.n pe pap.Diyaa.n sii
aur pasiine me.n hai.n sharaabor
sulagtii dopahar me.n vo mil kar
ek diivaar chun rahii hai.n
hisaar-e-sa.ngii.n banegaa ko.ii
ye dekh kar haal un kaa mujh ko
KHayaal rah rah ke aa rahaa hai
kahaa.n hai.n vo marmarii.n sii baahe.n
vo gudgude haath narm-o-naazuk
vo gesuu-e-ambarii.n-o-mushkii.n
vo tiir-e-mizhgaa.n kamaan-e-abruu
vo la.al lab aur vo ruu-e-zebaa
vo naaznii.n aurte.n kahaa.n hai.n
vo mah-jabii.n aurte.n kahaa.n hai.n
vo jin kii taariif karte karte
adiib-o-shaa.ir nahii.n hai.n thakte

Fakhr Zaman
Nazm

urdu-e-mualla

khii.nch do uTh kar qavaa.id se hisaar-e-aafiyat
mil ke sab tayyaar kar do jaama.a o maan.e luGat
dekhte ho aa.e din jo ho rahii hai is kii gat
ik imaarat hai havaa par ho mu.allaq jis kii chhat
is tarah ilmii sutuuno.n par ise qaa.em karo
zalzala kaisaa hii saKHt aa.e magar jumbish na ho

Safi Lakhnavi
Nazm

gandhi

tirii KHaamushii vo zabaan thii ki dilo.n ko josh-e-navaa diyaa
tan-e-faaqa-kash me.n vo jaan thii ki hisaar-e-kibr hilaa diyaa

Iqbal Sohail
Nazm

tane

paa.ii thii kaa.enaat hii tum ne to pyaar me.n
kyo.n luT ke phir tum aa ga.e ho is hisaar me.n

Ismail Raaz
Nazm

mothers day par

ism-e-aazam
bahut achchhaa hu.aa thaa maa.n ne mirii
sikhlaa diye the ism saare
mujh ko bachpan me.n
tamaam aayaat-e-qur.aanii vaziife aur munaajaate.n
ki jin ke vird se saarii balaa.e.n duur rahtii hai.n
hisaar un kaa har aafat aur musiibat se bachaataa hai
unhii ke hifz se hotii rahii mushkil-kushaa.ii aur masiihaa.ii

Shahnaz Parveen Shazi
Nazm

tu ne dekha hai jis nazar se mujhe

us nazar bas usii nazar kii qasam
jo mujhe ye bataa ke lauT ga.ii
kyo.n rag-e-jaa.n me.n phuul khulte hai.n
phuul kyuu.n pairahan badalte hai.n
pairaahan kyuu.n hasiin hote hai.n
dil ko kab aql aane lagtii hai
aql kab sau qayaas buntii hai
kab qayaaso.n me.n ghar sa.nvarte hai.n
chaa.nd ke har tavaaf ke ma.aanii
KHushbu.o.n ke hisaar kaa matlab
kyuu.n hai baad-e-nasiim kii gardish
ab mai.n samjhaa bahaar kaa matlab

Subhan Asad
Nazm

wo arsa jo duri mein guzra

mai.n kaise bataa.uu.n
ki jo kaifiyat mujh pe guzrii
asaatiirii hargiz nahii.n thii
kisii dev-maalaa se
saa gaa se
jaa tak kahaanii se
us kaa ilaaqa nahii.n thaa
kisii KHvaab kaa ye vaquu.a nahii.n thaa
na ye vaahima thaa
jise aql tashkiil detii hai
hairat kaa varta
hisaar-e-nafas yaa nazar kaa karishma
ko.ii vaarida
paas anfaas tanviim yaa mismirism
ko.ii habs-e-dam
jazb-o-mastii
kisii sant-saadhuu kii shaktii
kisii suufii saalik kaa ilhaam
sarsaam
vahshat kii lai
vajd yaa haal sii ko.ii shai
ek shiishe ke andar ko.ii chiiz
burraaq parde pe raqsaa.n sii
faanuus-e-gardaa.n sii
tasviirii hargiz nahii.n thii
asaatiirii hargiz nahii.n thii

Rafiq Sandelvi
Nazm

apni walida ki yaad mein

nahiif baazuu the mere liye hisaar-e-amaa.n
maza kahii.n bhii us aaGosh kaa nahii.n miltaa

JaiKrishn Chaudhry Habeeb
Nazm

ek din manaya jaana chahiye

ek din manaayaa jaanaa chaahiye
meraa bhii
saa.ns kii be-aavaaz lahro.n par
tairtii zindagii ke saath
be-nishaan saahilo.n par
bikhrii siipiyo.n ke hamraah
sard mausamo.n me.n
kuuch kar jaane vaale parindo.n ke sa.ng
anjaan sar-zamiino.n par
kisii an-dekhe rang ke
phuul kii pattiyo.n se phuuTtii
pur-asraar KHushbuu ke baazuu.o.n me.n
tum manaate ho mother day
aur hisaar me.n rahte ho
maamtaa ke nuur ke
tum manaate ho father day
aur ghane daraKHto.n kii chhaa.nv
mahsuus karte ho
tum manaate ho valentine day
aur apnii mahbuuba ke saamne
suraKH-ruu Thaharte ho
tumhaaraa dil tavaaf kartaa rahtaa hai
be-paayaa.n mohabbato.n kaa
aur tum mohabbat kaa har din manaate ho
dukaane.n saj jaatii hai.n
ra.ng-bira.nge phuulo.n se
chokleT aur cake kii miThaas se
qiimate.n muKHtalif sahii
magar iz.haar kii sakat
tumhaarii quvvat-e-KHariid me.n rahtii hai
mai.n tumhaare baap kii mohabbat kaa
har ra.ng
har zaa.iqa jaantii huu.n
ek din manaayaa jaanaa chaahiye
meraa bhii
mujhe ma.aluum hai
tum ye din manaa sakte ho
magar ye din
saare dino.n me.n saraayat kar gayaa hai
tum use nahii.n Dhuu.nD sakte
ko.ii ek din muKHtas bhii kar do
to us kaa unvaan
tumhaare iz.haar kii sakat se baahar hai

Arifa Shahzad
Nazm

dua

is baar baKHsh de mire maulaa 'sadaa' ko tuu
qaid-e-hisaar-e-zaat kii phir se sazaa na de

Sada Ambalvi
Nazm

mashwara

merii mahbuub ye tauhiin-e-mohabbat hogii
bevafaa kah ke mire pyaar ko majruuh na kar
tujh ko shikva hai shikaayat hai gila hai mujh se
merii qismat kii tarah tuu bhii KHafaa hai mujh se
terii har baat hai tasliim
magar kahne de
daur-e-sarmaaya kii
ro.ndii hu.ii ik laash ham
zulm kii aag me.n
ma.asuum mohabbat jhulse
is se behtar hai ki
begaana banaa le.n KHud ko
lafz-dar-lafz
hikaayaat me.n kho jaa.e.n ham
kapkapaate hu.e ho.nTo.n pe tabassum rakh le.n
TimTimaatii hu.ii aa.nkho.n me.n tajallii bhar le.n
asr-e-haazir kaa
taqaazaa bhii yahii hai hamdam
apnii begaangii ko
apnaa muqaddar samjhe.n
tuu muqaddas hai
tire gird taqaddus kaa hisaar
mai.n ki
is ahd kaa
ik shaa.er-e-aashufta-e-mizaaj
mere hisse me.n
faqat
nazm Gazal aur ash.aar
mai.n bahar-haal
tire shauq kaa saamaan nahii.n
merii aa.nkho.n me.n hai.n TuuTe hu.e
lafzo.n ke nuquush
mere ho.nTo.n pe hai.n
bikhre hu.e maazii ke huruuf
sach to ye hai ki miraa tujh se ko.ii mel nahii.n
ishq me.araaj-e-muqaddar hai ko.ii khel nahii.n

Asad Rizvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now