Search result for "pahre" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "pahre"

Nazm MATCHES FOR "pahre"

Nazm

makan

aa.ndhiyaa.n to.D liyaa kartii thii.n sham.o.n kii lave.n
ja.D diye is liye bijlii ke sitaare ham ne
ban gayaa qasr to pahre pe ko.ii baiTh gayaa
so rahe KHaak pe ham shorish-e-taamiir liye

Kaifi Azmi

Nazm

mujassama

munjamid ho.nTo.n pe sannaaTo.n kaa sangiin tilism
jaise naayaab KHazaano.n pe ka.De pahre ho.n
tund jazbaat se bharpuur barahna siina
jaise sustaane ko tuufaan zaraa Thahre ho.n

Ahmad Faraz

Nazm

zindan ki ek subh

duur naubat hu.ii phirne lage be-zaar qadam
zard faaqo.n ke sataa.e hu.e pahre vaale
ahl-e-zindaa.n ke Gazabnaak KHaroshaa.n naale
jin kii baaho.n me.n phiraa karte hai.n baahe.n Daale

Faiz Ahmad Faiz

Nazm

tasalsul

ilm ne aaj kurede hai.n vo zulmaat ke Dher
vaqt ne jis pe biThaa.e the fanaa ke pahre
jaag uThe suur-e-saraafiil se guu.nge bahre
taa-abad jin ke muqaddar me.n thii duniyaa andher
ye magar azmat-e-insaa.n hai ki taqdiir ke pher?

Ahmad Faraz

Nazm

taj-mahal

hauzo.n ke KHazaane hai.n ki bikhre se pa.De hai.n
pahre pe nigahbaan hai.n yaa sarv kha.De hai.n

Mahshar Badayuni

Nazm

tausi-e-shahr

biis baras se kha.De the jo is gaatii nahr ke dvaar
jhuumte kheto.n kii sarhad par baa.nke pahre-daar
ghane suhaane chhaa.nv chhi.Dakte bor lade chhatnaar
biis hazaar me.n bik ga.e saare hare bhare ashjaar

Majeed Amjad

Nazm

ban-bas

mere shahr ke saare raste band hai.n logo
mai.n is shahr kaa naGma-gar
jo do ik mausam Gurbat ke dukh jhel ke aayaa
taaki apne ghar kii diivaaro.n se
apnii thakii hu.ii aur tarsii hu.ii
aa.nkhe.n sahlaa.uu.n
apne darvaaze ke utarte roGan ko
apne ashko.n se saiqal kar luu.n
apne chaman ke jale hu.e paudo.n
aur gard-aaluud daraKHto.n kii
murda shaaKHo.n par bain karuu.n
har mahjuur sutuun ko itnaa TuuT ke chuumuu.n
mere labo.n ke KHuun se
un ke naqsh-o-nigaar sabhii jii uThe.n
galii ke logo.n ko itnaa dekhuu.n
itnaa dekhuu.n
merii aa.nkhe.n
barso.n kii tarsii hu.ii aa.nkhe.n
chehro.n ke aa.ngan ban jaa.e.n
phir mai.n apnaa saaz uThaa.uu.n
aa.nsu.o.n aur muskaano.n se jhilmil jhilmil
nazme.n Gazle.n giit sunaa.uu.n
apne pyaaro.n
dard ke maaro.n kaa darmaa.n ban jaa.uu.n
lekin mere shahr ke saare rasto.n par
ab baa.D hai lohe ke kaa.nTo.n kii
shah darvaaze par kuchh pahre-daar kha.De hai.n
jo mujh se aur mujh jaise dil vaalo.n kii
pahchaan se aarii
mere saaz se
sa.ngiino.n se baat kare.n
mai.n un se kahtaa huu.n
dekho
mai.n is shahr kaa naGma-gar huu.n
barso.n baa'd ka.Dii raaho.n kii
saarii aziyyat jhel ke ab vaapas aayaa huu.n
us miTTii kii KHaatir
jis kii KHushbu.e.n
duniyaa bhar kii do-shiizaa.o.n ke jismo.n kii mahko.n se
aur saare jahaa.n ke
sabhii gulaabo.n se
ba.Dh kar hai
mujh ko shahr me.n
mere shahr me.n jaane do
lekin tane hu.e nezo.n ne
mere jism ko yuu.n barmaayaa
mere saaz ko yuu.n rezaayaa
meraa humaktaa KHuun aur mere sisakte naGme
shah-darvaaze kii dahliiz se
riste riste
shahr ke andar jaa pahu.nche hai.n
aur mai.n apne jism kaa malba
saaz kaa laasha
apne shahr ke shah-darvaaze
kii dahliiz pe chho.D ke
phir anjaane shahro.n kii shahraaho.n par
majbuur-e-safar huu.n
jin ko taj kar ghar aayaa thaa
jin ko taj kar ghar aayaa thaa

Ahmad Faraz

Nazm

tujhe KHud se alag kaise karun main

kalaa.ii me.n to chau.Dii kaa khanaknaa
Garaz me.n aa.iina to hai sa.nvarnaa
mai.n jaise dasht me.n huu.n raah ko.ii
to is par ik musaafir kaa guzarnaa
mai.n jaise taal detaa saaz ko.ii
to raqqaasa kaa is lai par thiraknaa
mai.n huu.n be-nuur sii ik jhiil aur tuu
hai is par maah-e-kaamil kaa utarnaa
tuu chehra KHuubsuurat mai.n huu.n parda
meraa maqsad tujhe mahfuuz rakhnaa
terii ziinat kaa pahre-daar huu.n mai.n
tujhe KHud se alag kaise karuu.n mai.n

Chandra Shekhar Varma

Nazm

lahu nazr de rahi hai hayat

dilo.n pe KHauf ke pahre labo.n pe qufl sukuut
suro.n pe garm salaaKHo.n ke shaamiyaane hai.n

Sahir Ludhianvi

Nazm

ai habib-e-ambar-dast!

kisii ke dast-e-inaayat ne kunj-e-zindaa.n me.n
kiyaa hai aaj ajab dil-navaaz band-o-bast
mahak rahii hai fazaa zulf-e-yaar kii suurat
havaa hai garmii-e-KHushbuu se is tarah sarmast
abhii abhii ko.ii guzraa hai gul-badan goyaa
kahii.n qariib se, gesuu-ba-dosh, Guncha-ba-dast
liye hai buu-e-rifaaqat agar havaa-e-chaman
to laakh pahre biThaa.e.n qafas pe zulm-parast
hamesha sabz rahegii vo shaaKH-e-mehr-o-vafaa
ki jis ke saath ba.ndhii hai dilo.n kii fat.h o shikast

Faiz Ahmad Faiz

Nazm

samundar ki tah mein

samundar kii tah me.n
samundar kii sa.ngiin tah me.n
hai sanduuq
sanduuq me.n ek Dibiyaa me.n Dibiyaa
me.n Dibiyaa
me.n kitne ma.aanii kii sub.he.n
vo sub.he.n ki jin par risaalat ke dar-band
apnii shu.aa.o.n me.n jak.Dii hu.ii
kitnii sahmii hu.ii!
(ye sanduuq kyuu.n kar giraa?
na jaane kisii ne churaayaa?
hamaare hii haatho.n se phislaa?
phisal kar giraa?
samundar kii tah me.n magar kab?
hamesha se pahle
hamesha se bhii saal-haa-saal pahle?
aur ab tak hai sanduuq ke gird
lafzo.n kii raato.n kaa pahraa
vo lafzo.n kii raate.n
jo devo.n kii maanind
paanii ke las-dar devo.n ke maanind
ye lafzo.n kii raate.n
samundar kii tah me.n to bastii nahii.n hai.n
magar apne laa-raib pahre kii KHaatir
vahii.n re.ngtii hai.n
shab o roz
sanduuq ke chaar suu re.ngtii hai.n
samundar kii tah me.n!
bahut sochtaa huu.n
kabhii ye ma.aanii kii paakiiza sub.ho.n kii pariyaa.n
rihaa.ii kii ummiid me.n
apne Gavvaas jaaduu-garo.n kii
sadaa.e.n sune.ngii?

Noon Meem Rashid

Nazm

tulu-e-ishtirakiyat

shaahii darbaaro.n ke dar se faujii pahre KHatm hu.e hai.n
zaatii jaagiiro.n ke haq aur mohmal da.ave KHatm hu.e hai.n

Sahir Ludhianvi

Nazm

tajdid

ab mire shaane se lag kar kis liye rotii ho tum
yaad hai tum ne kahaa thaa
''jab nigaaho.n me.n chamak ho
lafz jazbo.n ke asar se kaa.npte ho.n aur tanaffus
is tarah uljhe.n ki jismo.n kii thakan KHushbuu bane
to vo gha.Dii ahd-e-vafaa kii saa.at-e-naayaab hai
vo jo chupke se bichha.D jaate hai.n lamhe hai.n masaafat
jin kii KHaatir paa.nv par pahre biThaatii hai
nigaahe.n dhund ke pardo.n me.n un ko Dhuu.nDtii hai.n
aur samaa.at un kii miiThii narm aahaT ke liye
daaman bichhaatii hai''
aur vo lamha bhii tum ko yaad hogaa
jab havaa.e.n sard thii.n aur shaam ke maile kafan par haath rakh kar
tum ne lafzo.n aur ta'alluq ke na.e ma.anii bataa.e the, kahaa thaa
''har gha.Dii apnii jagah par saa.at-e-naayaab hai
haasil-e-umr-e-gurezaa.n ek bhii lamha nahii.n
lafz dhoka hai.n ki un kaa kaam iblaaG-e-ma.aanii ke alaava kuchh nahii.n
vaqt ma.anii hai jo har lahza na.e chehre badaltaa hai
jaane vaalaa vaqt saaya hai
ki jab tak jism hai ye aadmii ke saath chaltaa hai
yaad misl-e-nutq paagal hai ki is ke lafz ma.anii se tahii hai.n
ye jise tum Gam aziyyat dard aa.nsuu
dukh vaGaira kah rahe ho
ek lamhaatii ta.assur hai tumhaaraa vahm hai
tum ko meraa mashvara hai, bhuul jaa.o tum se ab tak
jo bhii kuchh mai.n ne kahaa hai''
ab mire shaane se lag kar kis liye rotii ho tum!

Amjad Islam Amjad

Nazm

nai duniya

nigaaho.n ke jahaa.n pahre na ho.n dil ke dha.Dakne par
jahaa.n chhiinii na jaatii ho KHushii ahl-e-mohabbat kii
jahaa.n armaa.n bhare dil KHuun ke aa.nsuu na rote ho.n
jahaa.n ro.ndii na jaatii ho KHushii ahl-e-mohabbat kii

Rajendra Nath Rahbar

Nazm

depression

KHauf ke jaziire me.n.. qaid huu.n mai.n barso.n se
duur tak fasiile.n hai.n
aur un pe lohe kii uu.nchii uu.nchii baa.De.n hai.n,
nok-daar kiile.n hai.n
Daaltaa kamande.n huu.n... jail ke kinaaro.n par...
KHaar-daar taaro.n par
siiTiyaa.n sii bajtii hai.n der tak samaa.at me.n
pahre-daar aate hai.n
be.Diyaa.n sii sajtii hai.n
paa.nv ko uThaanaa, bhii haath ko hilaanaa bhii
jism bhuul jaataa hai
jurm bhii nahii.n ma.aluum, umr bhii nahii.n ma.aluum
kuchh pataa nahii.n mujh ko... us taraf fasiilo.n ke
kis qadar samundar hai
kashtiyaa.n bhii chaltii hai.n, baadbaa.n bhii khulte hai.n
nuur ke jahaa.n bhii hai.n, jism ke makaa.n bhii hai.n,
aadmii vahaa.n bhii hai.n
chho.Diye, nahii.n jaate
kyaa kare.nge baahar bhii...
Thiik hai fasiilo.n me.n
aa.nsu.o.n kii jhiilo.n me.n chaa.nd ko utaare.nge
be-hisii ke Tiilo.n par naqsh-e-paa ubhaare.nge
maut ke glamour me.n Duub Duub jaa.e.nge
qabr ke a.ndhere se raat ko sajaa.e.nge
maut kaa fasurda-pan kitnaa KHuubsuurat hai
ik jahaa.n udaasii kaa bas mirii zaruurat hai!

Mansoor Aafaque

Nazm

ek aur mashwara

bastiyaa.n ho.n kaisii bhii pastiyaa.n ho.n jaisii bhii
har tarah kii zulmat ko raushnii kahaa jaa.e
KHaak Daale.n manzil par bhuul jaa.e.n saahil ko
ruKH jidhar ho paanii kaa us taraf bahaa jaa.e
mulk bech Daale.n yaa aabruu rakhe.n girvii
jaisaa hukm-e-haakim ho us tarah kiyaa jaa.e
shor me.n sadaa.o.n ke ajnabii havaa.o.n ke
kaun sun.ne vaalaa hai? kis se ab kahaa jaa.e!
guftuguu pe pahre hai.n har taraf kaTahre hai.n
raaste mu.ayyan hai.n har qadam pe likkhaa hai
kis jagah pe ruknaa hai! kis taraf chalaa jaa.e

Amjad Islam Amjad

Nazm

salgirah

kaun gustaaKH hai kyaa naam hai kyuu.n aayaa hai
pahre vaalo use KHanjar kii anii se roko
apnii banduuqo.n kii naalii se Daraa.o us ko
aur us par jo na maane use topo.n kii salaamii de do
jashn kaa din hai mirii saalgirah kaa din hai
aaj mahlo.n me.n jale.nge mah-o-anjum ke charaaG
aaj bujhte hu.e chehro.n kii zaruurat kyaa hai
aaj maayuus nigaaho.n kii zaruurat kyaa hai
kaun bebaak hai ba.Dhtaa hii chalaa aataa hai
pahre vaalo use KHanjar kii anii se roko
aadmii hai ki miraa vahm hai aaseb hai ye
us ke chehre pe to zaKHmo.n ke nishaa.n tak bhii nahii.n
goliyaa.n us ke siyah siine se Takraa ke chalii aatii hai.n
us ke ho.nTo.n pe tabassum hai ki mu.nh khole hu.e
azhdahaa taKHt nigalne ko chalaa aataa hai
maut kis bhes me.n aa.ii hai mujhe lene ko
aaj kyuu.n aa.ii hai kyuu.n aa.ii hai kyuu.n aa.ii hai
mai.n tujhe gauhar-o-almaas diye detaa huu.n
tere ThiThure hu.e haatho.n ko haraarat duu.ngaa
jashn kaa din hai mirii saalgirah kaa din hai
kaun ho kaun ho tum
ai Gariibo.n ke KHudaavand amiiro.n ke rafiiq
mai.n samajhtaa thaa mujhe aap na pahchaane.nge
mai.n ne a.ngrez kii jailo.n me.n javaanii kaaTii
mai.n ne ThiThure hu.e haatho.n se jalaa.e hai.n diye
jin kii lau aaj bhii tuufaano.n se Takraatii hai
jin ko a.ngrez kii phuu.nko.n ne bujhaanaa chaahaa
aur KHud un kii zabaa.n jal ke siyah-faam hu.ii
vo diye aaj bhii bar-lauu.n kii chiiKHo.n se la.De jaate hai.n
aap ko yaad na hogaa shaayad
kaun ho kaun ho tum
mai.n ne taariiKH kii lahro.n me.n ravaanii de dii
mai.n ne buu.Dho.n kii rag-o-pai me.n javaanii de dii
mai.n ne jhukte hu.e shaano.n ko tavaanaa.ii dii
kaar-KHaane mirii aavaaz se bedaar hu.e
aur ik merii hii aavaaz nahii.n guu.njii thii
saik.Do.n vaqt se haare hu.e insaan uThe
kuhra-e-vaqt pe chhaane ke liye
kaun ho kaun ho tum
auraaq me.n hii nahii.n aayaa huu.n
saik.Do.n vaqt ke maare hu.e insaan bhii hai.n
saik.Do.n vaqt pe chhaa.e hu.e insaan bhii hai.n
kaun ho kaun ho tum
aaj bhii ketiyo.n me.n bhuuk ugaa kartii hai
kaar-KHaano.n me.n dhu.e.n ke baadal
tauq aur aahanii zanjiiro.n me.n Dhal jaate hai.n
kaun ho kaun ho tum
aap insaan kii azmat pe yaqii.n rakhte hai.n
aap ke hukm ne kitno.n kii zabaane.n sii dii.n
aap kii mumlikat adl me.n kitne biimaar
qaid-e-tanhaa.ii me.n dam to.D chuke
kaun ho kaun ho tum
aap kii be.Diyaa.n afraad ko paaband banaa saktii hai.n
aap kii be.Diyaa.n insaan ko paaband nahii.n kar saktii.n
kal yahii sham.a jo siine me.n farozaa.n hai aaj
aap ke saare tilismaat jalaa Daalegii
kal unhii.n kheto.n me.n uj.De hu.e khaliyaano.n me.n
saal-haa-saal kii paamaal zamii.n
apne siine ke KHazaano.n ko luTaatii hogii
kaar-KHaane bhii siyahkaar KHudaa.o.n se rihaa.ii paa kar
laakho.n insaano.n kii taskiin kaa saamaa.n ho.nge
ik na.e ahd na.ii ziist kaa unvaa.n ho.nge
aur phir vaqt kaa bebaak mo.arriKH aa kar
surKH parcham ko salaamii degaa
kaun ho kaun ho tum
bhaardvaaj

Akhtar Payami

Nazm

jine marne ke darmiyan ek saat

vo jaaduugar thaa jis ne raat par pahre biThaa.e the
vagarna ab talak ye chaa.nd taare miT chuke hote
junuun-e-aagahii maanuus aa.nkho.n se chhalak jaataa
bisaat-e-zindagii ke saare mohre piT chuke hote

Shahzad Ahmad

Nazm

shofer

ham hai.n us aKHlaaq ke pairav, ham hai.n us tahziib ke log
jis me.n iffat ik ''mafruuza'' ismat jis me.n '''zehnii rog''
jazbo.n par pahre biThlaanaa kyaa ''saudaa-e-KHaam'' nahii.n?

Shaad Aarfi

Nazm

mohabbat KHatm hai tum par

tum kyaa jaano
aavaaz safar kartii hai
duur mandiro.n me.n bajtii ghanTiyo.n kii tarah
jism bolte hai.n
dariyaa kii lahre.n jab kinaaro.n se Takraatii hai.n
talaatum-KHez maujo.n kaa ajab ik shor uThtaa hai
aur us par pa.Dtii kamro.n kii raushnii
KHaak dariyaa me.n ruuh phuu.nk detii hai
tum bachcho.n ko pariyo.n chaa.nd sitaaro.n kii kahaaniyaa.n sunaate ho
be-KHabar
ye sabhii tumhaare KHilaaf dohrii chaal chal rahe hai.n
tum qadiim dhuno.n me.n
pesh-e-doshiizgii doshiizgii ke rang dete ho
aur aaraam talab ghaTaa.o.n se gurezaa.n ho
jo tumhaare raste me.n KHaalii pa.De bencho.n par maatam kartii hai.n
Keats aur coleridge tumhaaraa kyaa bigaa.De.nge
aql-o-daanish ke pahre-daar tumhaarii hifaazat kar rahe hai.n
tumhe.n KHvaab kii tahviil me.n kaise laa.e.n
tum aur mohabbat
apnii aa.nkhe.n suuraj kii taraf rakho
shukr dopahar
sannaaTo.n me.n diivaana-vaar us kii galii talaash karoge
tum ik din vahshat ke haatho.n maar diye jaa.oge

Asima Tahir

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now