Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tabah"

Nazm MATCHES FOR "tabah"

Nazm

ye khel kya hai

agar mai.n samjhuu.n
ke ye jo mohre hai.n
sirf lak.Dii ke hai.n khilaune
to jiitnaa kyaa hai haarnaa kyaa
na ye zaruurii
na vo aham hai
agar KHushii hai na jiitne kii
na haarne kaa hii ko.ii Gam hai
to khel kyaa hai
mai.n sochtaa huu.n
jo khelnaa hai
to apne dil me.n yaqiin kar luu.n
ye mohre sach-much ke baadshaah o vaziir
sach-much ke hai.n payaade
aur in ke aage hai
dushmano.n kii vo fauj
rakhtii hai jo ki mujh ko tabaah karne ke
saare mansuube
sab iraade
magar aisaa jo maan bhii luu.n
to sochtaa huu.n
ye khel kab hai
ye ja.ng hai jis ko jiitnaa hai
ye ja.ng hai jis me.n sab hai jaa.ez
ko.ii ye kahtaa hai jaise mujh se
ye ja.ng bhii hai
ye khel bhii hai
ye ja.ng hai par khilaa.Diyo.n kii
ye khel hai ja.ng kii tarah kaa
mai.n sochtaa huu.n
jo khel hai
is me.n is tarah kaa usuul kyuu.n hai
ki ko.ii mohara rahe ki jaa.e
magar jo hai baadshaah
us par kabhii ko.ii aa.nch bhii na aa.e
vaziir hii ko hai bas ijaazat
ki jis taraf bhii vo chaahe jaa.e

Javed Akhtar
Nazm

aaj ek harf ko phir DhunDta phirta hai KHayal

aaj ik harf ko phir Dhuu.nDtaa phirtaa hai KHayaal
madh bharaa harf ko.ii zahr bharaa harf ko.ii
dil-nashii.n harf ko.ii qahr bharaa harf ko.ii
harf-e-ulfat ko.ii dildaar-e-nazar ho jaise
jis se miltii hai nazar bosa-e-lab kii suurat
itnaa raushan ki sar-e-mauja-e-zar ho jaise
sohbat-e-yaar me.n aaGaaz-e-tarab kii suurat
harf-e-nafrat ko.ii shamshiir-e-Gazab ho jaise
taa-abad shahr-e-sitam jis se tabah ho jaa.e.n
itnaa taariik ki shamshaan kii shab ho jaise
lab pe laa.uu.n to mire ho.nT siyah ho jaa.e.n

Faiz Ahmad Faiz
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

mashwara

tum us kii yaad bhulaa do ki bevafaa hai vo
har ek dil nahii.n hotaa tumhaare dil kii tarah
tum apne pyaar ko rusvaa karo na ro ro kar
tumhaaraa pyaar muqaddas hai bible kii tarah

Kafeel Aazar Amrohvi
Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan
Nazm

isi do-rahe par

aur ye ahd kiyaa thaa ki ba-ii.n haal-e-tabaah
ab kabhii pyaar bhare giit nahii.n gaa.u.ngaa
kisii chilman ne pukaaraa bhii to ba.Dh jaa.uu.ngaa
ko.ii darvaaza khulaa bhii to palaT aa.uu.ngaa

Sahir Ludhianvi
Nazm

gunah aur mohabbat

gunaah ke tund-o-tez sho.alo.n se ruuh merii bha.Dak rahii thii
havas kii sunsaan vaadiyo.n me.n mirii javaanii bhaTak rahii thii
mirii javaanii ke din guzarte the vahshat-aaluud ishrato.n me.n
mirii javaanii ke mai-kado.n me.n gunaah kii mai chhalak rahii thii
mire hariim-e-gunaah me.n ishq devtaa kaa guzar nahii.n thaa
mire fareb-e-vafaa ke sahraa me.n huur-e-ismat bhaTak rahii thii
mujhe KHas-e-naa-tavaa.n ke maanind zauq-e-isyaa.n bahaa rahaa thaa
gunaah kii mauj-e-fitna-saamaa.n uThaa uThaa kar paTak rahii thii
shabaab ke avvalii.n dino.n me.n tabaah o afsurda ho chuke the
mire gulistaa.n ke phuul jin se fazaa-e-tiflii mahak rahii thii
Garaz javaanii me.n ahrman ke tarab kaa saamaan ban gayaa mai.n
gunah kii aalaa.isho.n me.n luth.Daa hu.aa ik insaan ban gayaa mai.n

Noon Meem Rashid
Nazm

husn aur mazduri

naazniino.n kaa ye aalam maathar-e-hind aah aah
kis ke jaur-e-naa-ravaa ne kar diyaa tujh ko tabaah?

Josh Malihabadi
Nazm

tere baad

mirii nigaah ko ab bhii tirii zaruurat hai
dil-e-tabaah ko ab bhii tirii zaruurat hai
KHarosh-e-naala ta.Daptaa hai terii furqat me.n
sukuut-e-aah ko ab bhii tirii zaruurat hai
ye sub.h-o-shaam tirii justujuu me.n phirte hai.n
ki mehr-o-maah ko ab bhii tirii zaruurat hai
bahaar-e-zulf pareshaa.n liye hai gulshan me.n
gul-o-giyaah ko ab bhii tirii zaruurat hai
zamaana Dhuu.nD rahaa hai ko.ii nayaa tuufaa.n
sukuun-e-raah ko ab bhii tirii zaruurat hai
vo valvale vo uma.nge.n vo justujuu na rahii
tirii sipaah ko ab bhii tirii zaruurat hai
KHirad KHamosh junuu.n be-KHarosh hai ab tak
dil-o-nigaah ko ab bhii tirii zaruurat hai
bayaa.n ho Gam kaa fasaana dil-e-tapaa.n se kahaa.n
ye baar uTThegaa mirii jaan-e-naa-tavaa.n se kahaa.n
milaa na phir kahii.n lutf-e-kalaam tere ba.ad
hadiis-e-shauq rahii naa-tamaam tere ba.ad
jo tere dast-e-havaadis shikan me.n dekhii thii
vo teG phir na hu.ii be-niyaam tere ba.ad
bujhii bujhii sii tabii.at hai baada-KHvaaro.n kii
udaas udaas hai.n miinaa-o-jaam tere ba.ad
banaa hai harf-e-shikaayat sukuut-e-laala-o-gul
badal gayaa hai chaman kaa nizaam tere ba.ad
adaa-e-husn kaa lutf-e-KHiraam be-ma.anii
suruud-e-shauq kii lazzat haraam tere ba.ad
taras ga.ii hai samaa.at tirii sadaa.o.n ko
sunaa na phir kahii.n teraa payaam tere ba.ad
vo inqalaab kii ruu phir palaT ga.ii afsos
buland baam hai.n phir zer-e-daam tere ba.ad
misaal-e-najm-e-sahar jagmagaa ke Duub gayaa
hame.n safiina kinaare lagaa ke Duub gayaa

Saifuddin Saif
Nazm

sayyad se aaj hazrat-e-waiz ne ye kaha

sayyad se aaj hazrat-e-vaa.iz ne ye kahaa
charchaa hai jaa-ba-jaa tire haal-e-tabaah kaa
samjhaa hai tuu ne nature o tadbiir ko KHudaa
dil me.n zaraa asar na rahaa laa-ilaah kaa
ho tujh se tark-e-saum-o-salaat-o-zakaat-o-haj
kuchh Dar nahii.n janaab-e-risaalat-panaah kaa
shaitaan ne dikhaa ke jamaal-e-uruus-e-dahr
banda banaa diyaa hai tujhe hubb-e-jaah kaa
us ne diyaa javaab ki maz.hab ho yaa rivaaj
raahat me.n jo muKHil ho vo kaa.nTaa hai raah kaa
afsos hai ki aap hai.n duniyaa se be-KHabar
kyaa jaaniye jo rang hai shaam-o-pagaah kaa
europe kaa pesh aa.e agar aap ko safar
guzre nazar se haal re.aayaa-o-shaah kaa
vo aab-o-taab-o-shaukat-e-aivaan-e-khusravii
vo mahakmo.n kii shaan vo jalva sipaah kaa
aa.e nazar uluum-e-jadiidah kii raushnii
jis se KHajil ho nuur ruKH-e-mehr-o-maah kaa
daavat kisii amiir ke ghar me.n ho aap kii
kam-sin miso.n se zikr ho ulfat kaa chaah kaa
nau-KHez dil-fareb gul-andaam naaznii.n
aariz pe jin ke baar ho daaman nigaah kaa
rukiye agar to ha.ns ke kahe ik but-e-hasii.n
sun maulvii ye baat nahii.n hai gunaah kaa
us vaqt qibla jhuk ke karuu.n aap ko salaam
phir naam bhii huzuur jo le.n KHaanqaah kaa
patluun-o-koT-o-ba.ngla-o-biscuit kii dhun ba.ndhe
saudaa janaab ko bhii ho turkii kulaah kaa
mimbar pe yuu.n to baiTh ke goshe me.n ai janaab
sab jaante hai.n va.az savaab-o-gunaah kaa

Akbar Allahabadi
Nazm

ek bewafa ke nam

tere bhii dil me.n huuk sii uTThe KHudaa kare
tuu bhii hamaarii yaad me.n ta.Dpe KHudaa kare
majruuh ho balaa se tire husn kaa Guruur
par tujh ko chashm-e-shauq na dekhe KHudaa kare
kho jaa.e.n tere husn kii ra.anaa.iyaa.n tamaam
terii adaa kisii ko na bhaa.e KHudaa kare
merii hii tarah kashti-e-dil ho tirii tabaah
tuufaan itne zor kaa uTThe KHudaa kare
raaho.n ke pech-o-KHam me.n rahe taa-hayaat gum
manzil tire qariib na aa.e KHudaa kare
zulmat ho tuu ho aur tirii rahguzaar ho
duniyaa me.n terii sub.h na phuuTe KHudaa kare
tujh par nashaat-o-aish kii raate.n haraam ho.n
mar jaa.e.n tere saaz ke naGme KHudaa kare
aa.e.n na tere baaG me.n jho.nke nasiim ke
teraa gul-e-shabaab na mahke KHudaa kare
har lamha terii ruuh ko ik be-kalii sii ho
aur be-kalii me.n nii.nd na aa.e KHudaa kare
ho tere dil me.n merii KHalish merii aarzuu
mere baGair chain na aa.e KHudaa kare
tuu jaa rahii hai bazm-e-tarab me.n to KHair jaa
par teraa jii vahaa.n bhii na bahle KHudaa kare
al-muKHtasar ho.n jitne sitam tujh pe TuuT jaa.e.n
lekin ye rabt-e-ziist na TuuTe KHudaa kare
jo kuchh mai.n kah gayaa huu.n junuu.n me.n vo sab Galat
tujh par ko.ii bhii aa.nch na aa.e KHudaa kare
tuu hai mataa-e-qalb-o-nazar bevafaa sahii
hai raushnii-e-daaG-e-jigar bevafaa sahii

Owais Ahmad Dauran
Nazm

dil-o-dimagh ko ro lunga aah kar lunga

dil-o-dimaaG ko ro luu.ngaa aah kar luu.ngaa
tumhaare ishq me.n sab kuchh tabaah kar luu.ngaa
agar mujhe na milii.n tum tumhaare sar kii qasam
mai.n apnii saarii javaanii tabaah kar luu.ngaa
mujhe jo dair-o-haram me.n kahii.n jagah na milii
tire KHayaal hii ko sajda-gaah kar luu.ngaa
jo tum se kar diyaa mahruum aasmaa.n ne mujhe
mai.n apnii zindagii sarf-e-gunaah kar luu.ngaa
raqiib se bhii miluu.ngaa tumhaare hukm pe mai.n
jo ab talak na kiyaa thaa ab aah kar luu.ngaa
tumhaarii yaad me.n mai.n kaaT duu.ngaa hashr se din
tumhaare hijr me.n raate.n siyaah kar luu.ngaa
savaab ke liye ho jo gunah vo ain savaab
KHudaa ke naam pe bhii ik gunaah kar luu.ngaa
hariim-e-hazrat-e-salmaa kii samt jaataa huu.n
hu.aa na zabt to chupke se aah kar luu.ngaa
ye nau-bahaar ye abruu, havaa ye rang sharaab
chalo jo ho so ho ab to gunaah kar luu.ngaa
kisii hasiine ke ma.asuum ishq me.n 'aKHtar'
javaanii kyaa hai mai.n sab kuchh tabaah kar luu.ngaa

Akhtar Shirani
Nazm

elan nama

mai.n laakh buzdil sahii magar mai.n usii qabiile kaa aadmii huu.n ki jis ke beTo.n ne
jo kahaa us pe jaan de dii
mai.n jaantaa thaa mire qabiile kii KHema-gaahe.n jalaa.ii jaa.e.ngii aur tamaashaa.ii
raqs-e-sho.ala-fishaa.n par israar hii kare.nge
mai.n jaantaa thaa miraa qabiila buriida aur be-ridaa saro.n kii gavaahiyaa.n
le ke aa.egaa phir bhii log inkaar hii kare.nge
so mai.n kamii.n-gaah-e-aafiyat me.n chalaa gayaa thaa
so mai.n amaa.n-gaah-e-maslahat me.n chalaa gayaa thaa
aur ab mujhe mere shahsavaaro.n kaa KHuun aavaaz de rahaa hai
to nazr-e-sar le ke aa gayaa huu.n
tabaah hone ko ek ghar le ke aa gayaa huu.n
mai.n laakh buzdil sahii magar mai.n usii qabiile kaa aadmii huu.n!

Iftikhar Arif
Nazm

tumhein yaad ho ki na yaad ho

vo jahaan-e-shauq kii bastiyaa.n
vo sharaab-e-ishq kii mastiyaa.n
vo hariim-e-naaz kii rif.ate.n
vo sar-e-niyaaz kii pastiyaa.n
vo sukuut-e-manzar-e-juu-e-aab
vo KHamosh jalva-e-maahtaab
vo niyaaz-o-naaz kii mahfile.n
vo sukuu.n-navaazii-e-iztiraab
vo javaaniyo.n me.n sharaarate.n
vo tabii.ato.n me.n haraarate.n
vo nafas me.n ziist kii garmiyaa.n
vo navaa-e-dil me.n bashaarate.n
vo KHamoshiyo.n me.n hikaayate.n
vo dabii zabaa.n se shikaayate.n
vo hijaab-e-jalva-e-aarzuu
vo hadiis-e-dil kii nazaakate.n
vo KHutuut aur vo guzaarishe.n
vo maze maze kii nigaarishe.n
vo Guruur-e-husn kii narmiyaa.n
vo nigaah-e-lutf kii baarishe.n
kaf-e-naaznii.n me.n vo jaam-e-mai
vo suruur-e-saaGar-e-pai-ba-pai
vo nigaah-e-mast kii gardishe.n
vo nazar-farosh har ek shai
mirii aa.nkh ashk-fishaa.n na thii
mire lab pe aah-o-fuGaa.n na thii
mire valvalo.n me.n shabaab thaa
mujhe ko.ii fikr-e-jahaa.n na thii
kabhii lutf aur kabhii sitam
kabhii ishrat aur kabhii alam
kabhii bazm-e-aish me.n qahqahe
kabhii josh-e-girya se chashm nam
kabhii mujh se tum ko bhii chaah thii
kabhii mujh pe bhii to nigaah thii
miraa haal yuu.n na udaas thaa
mirii ziist yuu.n na tabaah thii
vo zamaana mujh ko to yaad hai
tumhe.n yaad ho ki na yaad ho

Maikash Hyderabadi
Nazm

hubb-e-watan

ai aaftaab-e-hubb-e-vatan tuu kidhar hai aaj
tuu hai kidhar ki kuchh nahii.n aataa nazar hai aaj
tujh bin jahaa.n hai aa.nkho.n me.n andher ho rahaa
aur intizaam-e-dil hai zabar zer ho rahaa
ThanDe hai.n kyuu.n dilo.n me.n tire josh ho ga.e
kyuu.n sab tire charaaG hai.n KHaamosh ho ga.e
hubb-e-vatan kii jins kaa hai qaht-saal kyuu.n
hairaa.n huu.n aaj-kal hai pa.Daa us kaa kaal kyuu.n
kuchh ho gayaa zamaana kaa ulTaa chalan yahaa.n
hubb-e-vatan ke badle hai buGz-e-vatan yahaa.n
bin tere mulk-e-hind ke ghar be-charaaG hai.n
jalte evaz charaaGo.n ke siino.n me.n daaG hai.n
kab tak shab-e-siyaah me.n aalam tabaah ho
ai aaftaab idhar bhii karam kii nigaah ho
aalam se taa ki tiira-dilii duur ho tamaam
aur hind tere nuur se ma.amuur ho mudaam
ulfat se garm sab ke dil-e-sard ho.n baham
aur jo ki ham-vatan ho.n vo hamdard ho.n baham
taa ho vatan me.n apne zar-o-maal kaa vafuur
aur mumlikat me.n daulat-o-iqbaal kaa vafuur
sab apne haakimo.n ke liye jaa.n-nisaar huu.n
aur gardan-e-hariif pe KHanjar kii dhaar ho.n
ilm-o-hunar se KHalq ko raunaq diyaa kare.n
aur anjuman me.n baiTh ke jalse kiyaa kare.n
labrez-e-josh-e-hubb-e-vatan sab ke jaam ho.n
sarshaar-e-zauq-o-shauq dil-e-KHaas-o-aam ho.n

Mohammad Husain Azad
Nazm

arz-e-watan

KHayaalaat me.n saKHt hai intishaar
taKHayyul pareshaa.n qalam be-qaraar
jahaa.n KHuun-aaluuda-o-KHuu.n-ra.ng hai
vatan par pa.Daa saaya-e-ra.ng hai
gul-o-laala hai.n musta.id be-takaa.n
rafiiqo.n ne rakkhii hathelii pe jaa.n
har ik lab pe hai bas yahii ik suKHan
hasiin aur dilkash hai arz-e-vatan
KHuluus aaj paamaal hai aur tabaah
usuul aaj daryuuza-KHvaah-e-panaah
giraftaar-e-aazaar duniyaa hai aaj
mohabbat pariishaan-o-rusvaa hai aaj
usuul-e-mohabbat ke ham tarjumaa.n
KHuluus-o-mohabbat ke ham paasbaa.n
divaano.n ko mutlaq nahii.n hai qaraar
sadaaqat se betaab dil paa.edaar
har ik lab pe hai bas yahii ik suKHan
hasiin aur dilkash hai arz-e-vatan
vatan hai ye naanak kaa farmaa.n-paziir
thaa gautam isii kaarvaa.n kaa amiir
mohabbat ne rutba diyaa hai buland
mohabbat ne sab ko kiyaa arjumand
hai Gairat kaa tuufaan chhaayaa hu.aa
hai bachcho.n me.n bhii josh aayaa hu.aa
iraade hai.n sab ke bahut ustuvaar
Gayuur aur bedaar hai.n jaa.n-nisaar
har ik lab pe hai bas yahii ik suKHan
hasiin aur dilkash hai arz-e-vatan
na dii dushmano.n ko kabhii is ne raah
himaala hai rif.at se aalam-panaah
himaala kii dilchasp hai daastaa.n
ye azmat nishaa.n sab kaa hai paasbaa.n
zamaane pe ye baat hai aashkaar
amaa us kii hai duKHtar-e-naam-daar
himaala kii azmat kii ham ko qasam
himaala kii rif.at kii ham ko qasam
hifaazat himaala kii ab farz hai
himaala kaa ham par ba.Daa qarz hai
ye kahte hai.n sab mil ke KHurd-o-kalaa.n
ki Gairat kaa is vaqt hai imtihaa.n
hu.aa ruu-e-sha.nkar hai Gusse se laal
dikhaa.egaa ab raqs taanDau jalaal
iraade hai.n sab ke bahut ustuvaar
Gayuur aur bedaar sab jaa.n-nisaar
har ik lab pe hai bas yahii ik suKHan
hasiin aur dilkash hai arz-e-vatan
muhaafiz hai.n ham amn ke laa-kalaam
zamaane ko dete hai.n budh kaa payaam
sabaa apne gulshan se jaatii hai jab
miTaatii hai duniyaa ke ra.nj-o-ta.ab
rasiilii hai sub.h aur rasiilii hai shaam
nihaa.n in me.n hai zindagii kaa payaam
rivaayat kaa mahfuuz kar ke vaqaar
hame.n luuTnaa hai KHushii kii bahaar
zaraa dekhiyegaa rafiiqo.n kii aan
hai rakkhii jinho.n ne hathelii pe jaan
har ik lab pe hai bas yahii ik suKHan
hasiin aur dilkash hai arz-e-vatan
hai izzat kaa jur.at kaa ab imtihaa.n
kahii.n jhuk na jaa.e vatan kaa nishaa.n
farebo.n se ko.ii panaptaa nahii.n
kabhii jhuuT kaa meva paktaa nahii.n
sadaaqat kaa hai bol-baalaa sadaa
nahii.n kaam aate daroG iftiraa
fazaa hai chaman kii hame.n saazgaar
hai paabanda-tar is zamii.n kii bahaar
har ik lab pe hai bas yahii.n ik suKHan
hasiin aur dilkash hai arz-e-vatan
hayaa aur muravvat hai jo pur rahe.n
hu.ii hai.n vo aa.nkhe.n bahut KHashmagii.n
ba.Dhe hai.n vatan kii taraf bad-qimaash
kaleja zamii.n kaa hu.aa paash paash
pahaa.Do.n pe hai barf Gusse se laal
fazaa.e.n hu.ii.n garm aatish misaal
hai.n jehlam me.n aane ko tuGyaaniyaa.n
har ik mauj par hai Gazab kaa samaa.n
mohabbat kii duniyaa ko dil me.n liye
bahaar-e-javaanii se paimaa.n kiye
vatan kii hifaazat ko tayyaar hai.n
mohabbat ke baada se sarshaar hai.n
hifaazat hai farz apne armaan kii
hame.n aaj parvaa nahii.n jaan kii
har ik lab pe hai bas yahii ik suKHan
hasiin aur dilkash hai arz-e-vatan
2
aa.o ba.Dho maidaan me.n shero.n dushman par yalGaar kare.n
qabr bane maidaan me.n us kii aisaa us par vaar kare.n
za.ng na lagne paa.e apne bhaarat kii aazaadii ko
aa.o zer-e-daam kare.n sayyaado.n kii sayyaadii ko
lauh-e-dil par naqsh karo har haal me.n zinda rahnaa hai
mulk kii KHidmat ke raste me.n jo dukh aa.e sahnaa hai
ye sailaab-e-surKH nahii.n hai zulm-o-sitam kii aa.ndhii hai
is sailaab ko roke.nge ham himmat ham ne baa.ndhii hai
shero.n kii aulaad ho tum in viiro.n kii santaan ho tum
mard-e-mujaahid mard-e-jarii ho yodhdhaa ho balvaan ho tum
saa.nchii maduraa amaritsar ajmer kii azmat tum se hai
sub.h-e-banaras shaam-e-avadh kii asl-o-haqiiqat tum se hai
taaj ajantaa aur elora ke vaahid fankaar ho tum
KHush-siirat KHush-suuraat KHush-muurat KHush-kirdaar ho tum
bhiilaa.ii chitranjan tum se bhaaka.D ana.ngal tum se hai
daamodar kii shaan hai tum se azmat-e-chanbal tum se hai
tum ne basaa.e shahr niraale jangal tum se ma.ngal hai.n
tum ne nikaalii nahre.n itnii sahraa tum se jal-thal hai.n
tum ne itnii himmat se dariyaa.o.n ke ruKH mo.D diye
tum ne khodii.n sura.nge.n itnii duur ke rishte jo.D diye
tum kashmiir kii arz-e-hasii.n ke nazzaaro.n me.n palte ho
kohsaaro.n ko phaa.ndte ho tum dariyaa.o.n pe chalte ho
tum mysore me.n virindaa-ban ke baaG sajaane vaale ho
uuTii shimla daarjiling se shahr basaane vaale ho
taatya-Tope laxmii-baa.ii Tiipuu kii aulaad ho tum
ja.ng ke fan me.n qaabil ho tum maahir ho ustaad ho tum
hinduu muslim sikh iisaa.ii jainii bodh aur paarsii
dahqaa.n taajir aur mulaazim saadhuu-sant aur siyaasii
le ke vatan kaa jhanDaa aa.o dushman par yalGaar kare.n
qabr bane ran-bhuum me.n us kii aisaa us par vaar kare.n

Arsh Malsiyani
Nazm

baDe shahar ka KHwab

ba.Daa shahr ba.Daa shahr, ba.Daa shahar ba.Daa shahr
kisii ke liye tuu baa.is-e-tamaaniyat
kisii ke liye tuu saamaan-e-masarrat
aur kisii ke liye hai tuu, saraasar qahr
ba.De shahar kii chaah me.n, jaane kitne tabaah hu.e
kitne ruuThe apno.n se
kitne chhuuTe ham-vatano.n se

Perwaiz Shaharyar
Nazm

safir-e-laila-2

nazar uThaa.o safiir-e-lailaa bure tamaasho.n kaa shahr dekho
ye meraa qarya ye vahshato.n kaa amiin qarya
tumhe.n dikhaa.uu.n
ye sehan-e-masjid thaa yaa.n pe aayat-farosh baiThe du.aa.e.n KHilqat ko bechte the
yahaa.n adaalat thii aur qaazii amaan dete the rahzano.n ko
aur is jagah par vo KHaan-qaahe.n thii.n aab o aatish kii manDiyaa.n thii.n
jahaa.n pe amrad-parast baiThe safaa-e-dil kii namaaze.n pa.Dh kar
KHayaal-e-duniyaa se jaa.n haTaate
safiir-e-lailaa mai.n kyaa bataa.uu.n ki ab to sadiyaa.n guzar chukii hai.n
magar suno ai Gariib-e-saaya ki tum shariifo.n ke raaz-daa.n ho
yahii vo din the mai.n bhuul jaa.uu.n to mujh pe laanat
yahii vo din the safiir-e-lailaa hamaarii bastii me.n chhe taraf se fareb utre
daro.n se aage gharo.n ke biicho.n phir us se chuulho.n kii haa.nDiyo.n me.n
javaan-o-piir-o-zanaan-e-qarya KHushii se raqsaa.n
tamaam raqsaa.n
hujuum-e-tiflaa.n thaa yaa tamaashe the bozno.n ke
ki ko.ii diivaar-o-dar na chho.Daa
vo un pe cha.Dh kar shariif chehro.n kii gardano.n ko phalaa.ngte the
Daraaz-qaamat lahiim baune
razaa-e-baaham se kolhu.o.n me.n jute hu.e the
KHraaste the vo zard Galla to us ke pisne se KHuun bahtaa thaa pattharo.n se
magar na aa.nkhe.n ki dekh paa.ii.n na un kii naake.n ki suu.nghte vo
faqat vo bailo.n kii chakkiyaa.n thii.n saro.n se KHaalii
fareb khaate the KHuun piite the aur niinde.n thii.n bajju.o.n kii
safiir-e-lailaa ye daastaa.n hai isii kha.nDar kii
isii kha.nDar ke tamaash-biino.n fareb-KHurdo.n kii daastaa.n hai
magar suno ajnabii shanaasaa
kabhii na kahnaa ki mai.n ne qarno.n ke faaslo.n ko nahii.n sameTaa
fasiil-e-qarya ke sar pe phe.nkii ga.ii kamande.n nahii.n utaarii.n
tumhe.n dikhaa.uu.n tabaah bastii ke ek jaanib buland Tiila
buland Tiile pe baiThe baiThe havannaqo.n-saa
kabhii to rotaa thaa apnii aa.nkho.n pe haath rakh kar kabhii musalsal mai.n uu.nghtaa thaa
mai.n uu.nghtaa thaa ki saa.ns le luu.n
magar vo chuulho.n pe haa.nDiyo.n me.n fareb pakte
siyaah saa.npo.n kii aisii kaayaa-kalap hu.ii thii ki merii aa.nkho.n pe jam ga.e the
so yaa.n pe baiThaa mai.n aane vaale dhu.e.n kii talKHii bataa rahaa thaa
KHabar ke aa.nsuu bahaa rahaa thaa
magar mai.n tanhaa safiir-e-lailaa
faqat KHayaalo.n kii baadshaahii mirii viraasat
tamaam qarye kaa ek shaa.ir tamaam qarye kaa ik la.ii.n thaa
yahii sabab hai safiir-e-lailaa mai.n yaa.n se niklaa to kaise ghuTno.n ke bal uThaa thaa
nasiib-e-hijrat ko dekhtaa thaa
safar kii saKHtii ko jaantaa thaa
ye sabz qariyo.n se sadiyo.n piichhe kii manzilo.n kaa safar thaa mujh ko
jo gard-e-sahraa me.n lipTe KHaaro.n kii tez noko.n pe jald karnaa thaa aur
vo aisaa safar nahii.n thaa jahaa.n pe saa.e kaa rizq hotaa
jahaa.n havaa.o.n kaa lams miltaa
farishte aavaaz-e-al-amaa.n me.n mire liye hii
ajal kii rahmat ko maa.ngte the
yahii vo lamhe the jab shafaq ke taviil Tiilo.n pe chalte chalte
mai.n dil ke zaKHmo.n ko saath le kar
safar ke parbat se paar utraa

Ali Akbar Natiq
Nazm

pukar waqt ki

chalo ki pahle nafrato.n kii
aan-baan to.D de.n ye vaqt kii pukaar hai
alag alag ye raasto.n pe re.ngte se qaafile
qadam qadam musaafiro.n ke TuuTte se hausle
ye re.ngte se qaafilo.n ko
TuuTte se hauslo.n ko
ik Dagar se jo.D de.n ye vaqt kii pukaar hai
ye shahr shahr KHuun ke bahaav me.n basaa hu.aa
ye gaa.nv gaa.nv aapsii tanaav me.n kasaa hu.aa
ye KHuun ke bahaa.o kii
ye aapsii tanaav kii
kalaa.iyaa.n maro.D de.n ye vaqt kii pukaar hai
galii galii TaToltii ghaTaa.e.n luuT maar kii
nagar nagar me.n Doltii havaa.e.n intishaar kii
ye luuT-maar kii ghaTaa
ye intishaar kii havaa
samundaro.n me.n chho.D de.n ye vaqt kii pukaar hai
ye aadmii se aadmii kii duuriyaa.n ye khaa.iyaa.n
ye apne haath se tabaah ho ke phir duhaa.iyaa.n
ye duuriyaa.n ye khaa.iyaa.n
ye chiiKH ye duhaa.iyaa.n
har ik qadam jhi.njho.D de.n ye vaqt kii pukaar hai
ye suukhe suukhe phuul par bahaar kii javaaniyaa.n
ye jhulse jhulse rang ruup baaG kii nishaaniyaa.n
javaaniyo.n ke jaam me.n
nishaaniyo.n kii shaam me.n
ruto.n kaa KHuu.n nicho.D de.n ye vaqt kii pukaar hai

Bekal Utsahi
Nazm

jang se hoga kuchh nahin hasil

KHudaa ke vaaste nafrat kaa khel KHatm karo
ye dushmanii ye adaavat kaa khel band karo
ki hogii jang se dono.n taraf hii barbaadii
mare.nge log yaqiinan miTegii aabaadii
lahuu bahegaa jale.nge makaan logo ke
tabaah ho.nge bas is se jahaan logo ke
zamii.n phaTegii to phir aasmaan TuuTegaa
ye saarii duniyaa kaa maahaul chiikh uTThegaa
lagegaa daaG phir insaaniyat ke daaman par
gire.nge bam ke ye gole kisii ke aa.ngan par
ye jang vaqt kii tahziib ko kuchal degii
ye jang amn ke phuulo.n ko bhii masal degii
kii is se amn kii tahziib kii tabaahii hai
ye kaisaa zulm hai ye kis kii bad-nigaahii hai
na hogaa jang se tum ko kabhii bhii kuchh haasil
panap na paa.egaa sadiyo.n talak ye mustaqbil
ye jang kuchh nahii.n degii tabaahiyo.n ke sivaa
natiija kuchh bhii na hogaa buraa.iyo.n ke sivaa

Siya sachdev
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now