Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tag"

Nazm MATCHES FOR "tag"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

surKH sitara

tum samajhte ho ye shab aap hii Dhal jaa.egii
KHud hii ubhregaa na.ii sub.h kaa zarrii.n parcham
mai.n samajhtaa huu.n kisii sub.h-e-daraKHshaa.n ke evaz
qahr kii ek na.ii raat ko degii ye janam
aur us raat kii taariikii me.n kho jaa.e.nge
maktab o KHaanqah o dair o kaliisaa o haram
dev-e-zulmaat kii Thokar se na paa.e.nge panaah
ye shivaale, ye masaajid, ye pujaarii, ye sanam
rakh diye jaa.e.nge shamshiir ke zer-e-saaya
dast-e-maatam lab-e-fariyaad, zabaan o tanqiid
barf jam jaa.egii afkaar ke gulzaaro.n par
yaKH havaa.o.n me.n hii jam jaa.egii kisht-e-ummiid
chaa.ndnii zulmat-e-sayyaal me.n Dhal jaa.egii
raat kii maa.ng sa.nvaaregii shu.aa-e-ummiid
ahl-e-fan de.nge a.ndhero.n ko ujaalo.n kaa laqab
zahr ko qand, moharram ko kahaa jaa.egaa iid
ye miraa vahm nahii.n, novel o afsaana nahii.n
dosto! Gaur karo, aur nigaahe.n to uThaa.o
vo jo ik surKH sitaara hai ufuq ke nazdiik
kuchh tumhe.n ilm hai kis ruKH pe hai us kaa phailaa.o
kaash tum us kii haqiiqat pe nazar Daal sako
hai ye ik aatish-e-sad-barq-badaamaa.n kaa alaav
is kii kirno.n me.n hai chaltii hu.ii talvaar kii kaaT
is kii surKHii me.n hai umDe hu.e dariyaa kaa bahaav
is ke daaman me.n hai aasuuda vo fitna jis se
jism to jism mayassar nahii.n ruuho.n ko amaa.n
dil, nazar, zehn, KHayaalaat, usuul o aqdaar
sab ke sab is kii tag-o-taaz se larzaa.n tarsaa.n
is kii parchhaa.ii.n bhii pa.D jaa.e to sabza jal jaa.e
dekhte dekhte maahaul pe chhaa jaa.e dhu.aa.n
is ke sho.alo.n kaa to kyaa zikr ki sho.ale Thahre
is kii shabnam bhii gulistaa.n ke liye barq-e-tapaa.n

Amir Usmani
Nazm

main nahin to kya

tumhaarii chashm tavajjoh ke muntazir hai.n abhii
jilau me.n naGma-o-ra.ng-o-bahaar-o-nuur liye
hayaat garm-e-tag-o-dau hai mai.n nahii.n to kyaa

Sahir Ludhianvi
Nazm

aagahi

mai.n jab tifl-e-maktab thaa, har baat, har falsafa jaantaa thaa
kha.De ho ke mimbar pe pahro.n salaatiin-e-paariin-o-haazir
hikaayaat-shiirii.n-o-talKH un kii, un ke daraKHshaa.n jaraa.em
jo safhaat-e-taariiKH par kaarnaame hai.n, un ke avaamir
navaahii, hakiimo.n ke aqvaal, daanaa KHatiibo.n ke KHutbe
jinhe.n mustamanado.n ne baaqii rakkhaa us kaa maKHfii o zaahir
funuun-e-latiifa KHudaavand ke hukm-naame, faraamiin
jinhe.n masKH karte rahe piir-zaade jahaa.n ke anaasir
har ik saKHt mauzuu par is tarah boltaa thaa ki mujh ko
samundar samajhte the sab ilm o fan kaa, har ik merii KHaatir
tag-o-dau me.n rahtaa thaa, lekin yakaayak hu.aa kyaa ye mujh ko
ye mahsuus hotaa hai sote se uTThaa huu.n, hilne se qaasir
kisii bahr ke suune saahil pe baiThaa huu.n gardan jhukaa.e
sar-e-shaam aa.ii hai dekho to hai aagahii kitnii shaatir!

Akhtarul Iman
Nazm

aur hawa chup rahi

shaaKH-e-zaituun par kam-suKHan faaKHtaa.o.n ke itne basere ujaa.De ga.e
aur havaa chup rahii
be-karaa.n aasmaano.n kii pihnaa.iyaa.n be-nasheman shikasta paro.n kii tag-o-taaz par bain kartii rahii.n
aur havaa chup rahii
zard parcham u.Daataa hu.aa lashkar-e-be-amaa.n gul-zamiino.n ko paamaal kartaa rahaa
aur havaa chup rahii
aarzuumand aa.nkhe.n bashaarat-talab dil du.aa.o.n ko uTThe hu.e haath sab be-samar rah ga.e
aur havaa chup rahii
aur tab habs ke qaharmaa.n mausamo.n ke azaab in zamiino.n pe bheje ga.e
aur munaadii karaa dii ga.ii
jab kabhii rang kii KHushbu.o.n kii u.Daano.n kii aavaaz kii aur KHvaabo.n kii tauhiin kii jaa.egii
ye azaab in zamiino.n pe aate rahe.nge

Iftikhar Arif
Nazm

KHuda gawah

mujhe to falsafa-e-sabr bhii gavaaraa hai
(agarche asl me.n ye qaatilo.n kii mantiq hai)
magar ye falsafa us dil ko kaun samjhaa.e
jo terii yaad ke Gam ko KHudaa samajhtaa hai
agar ga.e hu.e ik lamha mu.D ke aa sakte
fanaa ke baa'd dobaara hayaat agar hotii
to mai.n zaruur lipaT kar tumhaare siine se
tamaam qissa-e-Gam aa.n.su.o.n me.n barsaataa
magar mujhe to KHabar hai ki ye nahii.n mumkin
isii liye mire dil me.n alam bhii baaqii hai
tirii gihaad-e-musalsal sii zindagii kii kitaab
mirii hayaat ke ik ik varaq pe likkhii hai
jo tuu ne raah me.n chho.Daa thaa parcham-e-tag-o-dau
hariif kuchh bhii kahe.n aaj mere haath me.n hai
qaraar-e-KHaatir-e-mahzuu.n agar ko.ii shai hai
to usii kaa KHayaal!

Yahya Amjad
Nazm

tamasha-gah-e-lala-zar

tamaashaa-gah-e-laala-zaar
ab iiraa.n kahaa.n hai
ye ishqii kaa shahkaar ''iiraan kii rustaKHez''
ab iiraa.n hai ik nauhagar piir-zaal
hai muddat se afsurda jis kaa jamaal
madaa.in kii viiraaniyo.n par ajam ashk-rez
vo nau-shervaa.n aur zar-dusht aur daariyuush
vo farhaad shiirii.n vo kai-KHusro o kai-qabaad
ham ik daastaa.n hai.n vo kirdaar the daastaa.n ke!
ham ik kaarvaa.n hai.n vo saalaar the kaarvaa.n ke!
tah-e-KHaak jin ke mazaar
tamaashaa-gah-e-laala-zaar!

Noon Meem Rashid
Nazm

shair-e-mashriq ki arz-dasht

par manzar-e-Guruub bahut dil-nashii.n hai kyuu.n
maGrib kii shaam apnii sahar se hasii.n hai kyuu.n
is kashmakash me.n daulat-e-uqbaa bhii chhin ga.ii
zauq-e-junuu.n se vus.at-e-sahraa bhii chhin ga.ii
sahraa-e-aarzuu me.n tag-o-dau nahii.n rahii
paa-e-talab se vaadii-e-siinaa bhii chhin ga.ii
tuu ne to qartaba me.n namaaze.n bhii kii.n adaa
apnii jabii.n se masjid-e-aqsaa bhii chhin ga.ii
kohsaar rau.nd Daale ga.e khet ho ga.e
chaTTaan ham zaruur the ab ret ho ga.e
manzil pe aa ke luT ga.e ham rahbaro.n ke saath
biimaar bhii pa.De hai.n to chaaragaro.n ke saath
Gurbat-kade me.n kaash utar aa.e kahkashaa.n
aa.nkhe.n falak kii samt hai.n bojhal saro.n ke saath
u.Dnaa muhaal lauT ke aanaa bhii hai vabaal
zaKHmii du.aa KHalaa me.n hai TuuTe paro.n ke saath
is razm-e-KHair-o-shar me.n hu.aa kaun suraKH-ruu
zarb-e-kaliim kund hai fir.aun surKH-ruu

Zaheer Siddiqui
Nazm

dost ruKHsat ho gae

dost ruKHsat ho ga.e
un se mulaaqaate.n ga.ii.n baate.n ga.ii.n
shahar thaa aabaad jin ke dam-qadam se
vo hamaarii chaa.ndnii raate.n ga.ii.n
marne vaale mar ga.e
zinda magar ham bhii nahii.n
vo to Gusl-e-aaKHirii le kar hu.e phir taazgii se aashnaa
nithre suthre o.Dh kar apnii safedii ke kafan
kaafuur kii KHushbuu ko nathuno.n me.n samaa.e
so ga.e aaraam se ThanDe badan
apnii apnii qabr par takiya kiye
vo thakan kii is musalsal sarsaraahaT se to ab aazaad hai.n
saa.ns kii zanjiir se laTke hu.e
jaagte rahne kii kaavish aur lagan
is tag-o-dau se pare aabaad hai.n
aur ham
jo is kinaare par kha.De
roz-o-shab lahro.n kaa karte hai.n shumaar
aap-biitii roz sunte hai.n
magar KHaamosh hai.n
KHaamushii se bahtaa paanii
roz bahtaa dekhte hai.n
Duub jaane kii magar himmat nahii.n
kaun jaane Duub hii jaa.e.n kahii.n
Duub jaa.o yaa chale aa.o idhar
baaz aa.o aur phir zinda raho
saatvaa.n dar bhii khulaa hai muntazir
daaG-e-hijrat de ga.e KHushbuu ke phuul
kaun ab ban kar charaaG-e-raah tum ko
haath se u.nglii paka.D kar
tifl-e-maktab kii tarah le kar ba.Dhe
aur ye kahe
maut kaa lamha hamaarii zindagii kaa aa gayaa
jism kii ThanDak to dastak de rahii hai
aa.o kuchh baate.n kare.n
aur phir chale.n
dost ruKHsat ho ga.e

Ghalib Ahmad
Nazm

mera dost abul-haul

ye duniyaa to un shola saamaan logo.n ne aapas me.n taqsiim kar lii
jo hathiyaar kii shakl me.n ranj-o-Gam Dhaalte hai.n
yaa gola-baaruud ke kaar-KHaano.n ke maalik hai.n
yaa phir sanaa-KHvaa.n hai.n un ke
hamaare liye sirf naare bache hai.n
san.atii daur ke kaj-kulaaho.n kii daad-o-dahish ruuh-parvar ho yaa jaan-levaa
magar zindaabaad, aafrii.n, marhabaa, ke sivaa kuchh nahii.n paas apne
ye sab jaantaa hai hamaarii shujaa.at kii parvaaz kyaa hai
hamaarii javaa.n-mardii ik suuba-jaatii ta.assub se
yaa firqa-vaarii fasaadaat se aage kuchh bhii nahii.n hai
futuuhaat-e-askandarii ham ne taKHtii pe likh kar miTaa dii hai.n kab kii
hamaare baa'd zamii.n ke tale so rahe hai.n
ajaa.ib-gharo.n me.n laTaktii hai.n talvaare.n un kii
aur un ke zarrii.n libaado.n ko ghun khaa gayaa hai
zira-baktaro.n par clones aa ga.ii hai
ye sab jaantaa hai hamaarii tag-o-taaz kyaa hai
hamaare shikam gar hamaare suro.n pe na hote
aur chehro.n me.n aazaa-e-jinsii
to ham achchhe insaan bante
hamaare gharo.n ke kam o besh sab aqabii darvaaze paiham khule hai.n
hamaare lahuu me.n hare laal piile bahut saare parcham khule hai.n
kahii.n se magar haq kii aavaaz aatii nahii.n hai
hamaarii zabaa.n dil kii saathii nahii.n hai
hamaare liye khokhlaa lafz-e-jamhuuriyat hai, taqaariir hai.n leadero.n kii
hamaare liye roz-naamo.n ke safhaat hai.n, ishtihaaraat hai.n niim-jinsii
hamaare liye devtaa.o.n ke but hai.n, KHudaa ke faraamiin hai.n aur uqbaa
jo bad-ra.ng hai haal kii tarah aur kore laTThe kii buu se bharii hai
hamaare liye sirf roTii kii jidd-o-johd
aurato.n ke barhana badan kii tamannaa se aage kahii.n kuchh nahii.n hai
hamaarii rago.n me.n jo tezaab hai us kii shiddat kabhii kam na hogii!

Akhtarul Iman
Nazm

shab-o-roz tamasha

zehn jab tak hai
KHayaalaat kii zanjiir kahaa.n kaTtii hai
ho.nT jab tak hai.n
savaalaat kii zanjiir kahaa.n kaTtii hai
bahs karte raho likhte raho nazme.n Gazle.n
zehn par sadiyo.n se taarii hai jo majlis kii fazaa
is KHunuk aa.nch se kyaa pighlegii
soch lene hii se haalaat kii zanjiir kahaa.n kaTtii hai
nii.nd me.n Duubii hu.ii aa.nkho.n se vaabasta KHvaab
tez kirno.n kii sinaano.n pe hii rusvaa sar-e-aam
ye shahiid apnii saliibo.n se palaT aate hai.n dil me.n har shaam
sub.h hotii hai magar raat kii zanjiir kahaa.n kaTtii hai
din guzar jaataa hai be-faiz kad-o-kaavish me.n
ek an-dekhe jahannam kii tab-o-taabish me.n
jism aur jaa.n kii tag-o-taaz kii har pursish me.n
dard-o-Gam hasrat-o-mahruumii kii har kaahish me.n
talab-o-tark-e-talab silsila-e-be-paayaa.n
marg hii ziist kaa unvaan hai har KHuun-shuda KHvaahish me.n
Gam se bhaage.n bhii to faryaad-o-shikaayaat kii zanjiir kahaa.n kaTtii hai
vaqt vo daulat-e-naayaab hai aataa nahii.n haath
ham mashiino.n kii tarah jiite hai.n paabandi-e-auqaat ke saath
vaqt be-kaar guzartaa hii chalaa jaataa hai
kursiyo.n mezo.n se be-ma.anii mulaaqaato.n me.n
sai.nka.Do.n baar kii aglii hu.ii dohraa.ii hu.ii baato.n me.n
mandgii rahne kii tamannaa kii mudaaraato.n me.n
shikam-o-jaa.n kii ibaadaat kii zanjiir kahaa.n kaTtii hai
sub.h se shaam talak itne KHudaa milte hai.n har kaafir ko
sajda-e-shukr se inkaar kii mohlat nahii.n milne paatii
sai.nka.Do.n laakho.n KHudaa.o.n kii nazar se chhup kar
KHud se mil lene kii ruKHsat nahii.n milne paatii
KHud-parasto.n se bhii taa.aat kii zanjiir kahaa.n kaTtii hai
raat aatii hai to dil kahtaa hai ham apne hai.n
KHalvat-e-KHvaab me.n duniyaa se kinaaraa kar le.n
kal bhii denaa hai lahuu apnaa dil-o-diida kii jholii bhar le.n
jism ke shor se aur ruuh kii fariyaad se dam ghuTtaa hai
din ke be-kaar KHayaalaat kii zanjiir kahaa.n kaTtii hai
be-niyaazaana bhii jiinaa hai faqat ek gumaa.n
fikr-e-maujuud ko chho.De.n to Gam-e-naa-maujuud
saath har saa.ns ke hai silsila-e-hast-o-buud
Gam-e-aafaaq ko Thukraa.e.n kare.n tark-e-jahaa.n
phir bhii ye fikr ki jiine kaa ho ko.ii unvaa.n
be-niyaazii se Gam-e-zaat kii zanjiir kahaa.n kaTtii hai
zehn me.n andhe aqiido.n kii siyaahii bhar lo
taaki is nagrii me.n
kabhii afkaar ke sho.alo.n kaa guzar ho na sake
jabr kaa hukm suno
ho.nTo.n ko apne sii lo
taaki un raaho.n se
kabhii lafzo.n kaa safar ho na sake
zehn-o-lab phir bhii nahii.n chup hote
un ke KHaamosh savaalaat kii
pech-dar-pech KHayaalaat kii
zanjiir kahaa.n kaTtii hai

Waheed Akhtar
Nazm

shash-jihat

ahd-e-kuhan guzar gayaa lamha-e-nau aziim hai
aaj kaa sehr be-badal aaj kii lau aziim hai
itr kii ruuh me.n basii asr ke ruup me.n rachii
phuuTtii pau aziim hai ye tag-o-dau aziim hai
bahr-e-jadiid auj mauj is me.n guhar hai.n mauj mauj
sat.h-ba-sat.h sab sadaf nuur kii rau aziim hai
taaza tariin ye jahaa.n taaza nujuum va aasmaa.n
un kii jhalak judaa judaa un kaa jilau aziim hai
aur hai is kii taab-o-tab aur hai chaal aur chhab
jo KHad-o-KHaal ho.n so ho.n aa.ina to aziim hai

Akhtar Usman
Nazm

kuchh agar hai to mile

KHvaab me.n aa.e mujhe mujh se milaa.e
mujhe sairaabii-e-diidaar se gulzaar kare
KHvaab vo KHvaab ki ho jis tamaazat kaa fusuu.n-zaad
KHvaab vo KHvaab ki ban jaa.e shikast-e-be-daad
kattha.ii rang ghule surma.ii shaam me.n aise ki shafaq
KHuun kii aa.ncho.n se dahak kar phaile
aate-jaate hu.e logo.n kii tag-o-taaz bhii
andesho.n se anjaan lage
jaage KHadshe bhii KHadd-o-KHaal tamannaa se huu.n mab.huut
har ik uzlat-e-jaa.n shauq kii shamshiir liye
phail ke saahil-e-paayaab ko Gaarat kar de
marqad-e-hiila-e-be-suud miTe
kuchh agar hai to mile
ko.ii gar hai to chalaa aa.e mujhe mujh se milaa.e
mujhe sairaabii-e-diidaar se gulzaar kare

Kishwar Naheed
Nazm

KHud-kushi

ek aise sarvey ke mutaabiq
jo mere dost
apne dil ko mausuul hone vaalii
Gair-zaruurii KHabro.n ko jam.a kar ke
murattab kar rahe hai.n
shahr me.n ko.ii KHud-kushii nahii.n kar rahaa
mohabbat me.n naakaamii par finail piine vaalii la.Dkiyaa.n
aur naukrii na milne par
ba.De bhaa.ii ke licence-yaafta pistol se
KHud-kushii karne vaale la.Dke
bahut din se nazar nahii.n aa.e
dupaTTe kaa phandaa banaa kar mar jaane vaalii
be-aulaad dulhane.n
aur taviil biimaarii se ta.ng aa kar
KHud ko jalaa kar halaak karne vaale
udhe.D-umar mariiz
naapaid ho ga.e hai.n
shahr me.n ab jis ko bhii KHud-kushii karnii ho
use bahut ziyaada tag-o-dau nahii.n karnii pa.Dtii
vo baahar nikaltaa hai
aur tho.Dii der ke liye
nishaana-baazo.n vaalii yellow cab kaa
intizaar kartaa hai
yaa jab us kii sa.Dak ke dono.n taraf
KHuub firing ho rahii ho
vo bilaa-iraada balcony me.n jaa ke kha.Daa ho jaataa hai
jab log KHud-kushii karnaa chaahte hai.n
yaqiin kiijiye
kisii jinsii imtiyaaz ke baGair
ra.ng, nasl aur zabaan ke farq ko KHaatir me.n na laate hu.e
goliyaa.n har jagah
unhe.n Dhuu.nDh nikaaltii hai.n

Zeeshan Sahil
Nazm

logo ai logo

bajaa.e ko.ii sar-bar-aavurda patthar-sifat shaKHsiyat chaahne ke
tumhaarii ma.iyyat rifaaqat-e-tag-o-dau kaa andaaz maa.ngo.n

Akhtarul Iman
Nazm

mehman-dari

phailii hai fazaa.o.n me.n KHushii merii nazar kii
ha.nstii nazar aatii hai.n fazaa.e.n mire ghar kii
dil-shaad mire ahl-o-ayaal aaj bahut hai.n
masruuf hai.n vo bhii nahii.n masruuf faqat mai.n
rakhii hai saliiqe se har ik kaam kii chiiz aaj
mehmaan mire ghar me.n hai.n kuchh mere aziiz aaj
shaadii kaa makaa.n ghar miraa ma.aluum na ho kyuu.n
majma.a ho jab itnaa to bhalaa dhuum na ho kyuu.n
bhaa.ii bhii hai.n bahno.ii bhii bhaavaj bhii bahan bhii
baiThaa hai bhatiijaa bhii bhatiije kii dulhan bhii
bachchii idhar ik baiTh ke taktii hai dulhan ko
kuchh tifl sataate hai.n udhar apnii bahan ko
bachcho.n pe jhalak KHaas hai tanviir-e-sahar kii
uTh baiThe hai.n sab sunte hii aavaaz gajar kii
dilkash ye fazaa sub.h kii ye nuur kaa ta.Dkaa
bulbul kii tarah bol rahaa hai ko.ii la.Dkaa
be-vaj.h ko.ii rone pe aamaada hu.aa hai
hairat se na.e gur ko ko.ii dekh rahaa hai
baiThaa hai ye chup dau.D rahaa hai vo KHushii se
khaane ke liye zid ko.ii kartaa hai abhii se
karnaa hai jo saamaan-e-ziyaafat ko faraaham
aa aa ke mire kaan me.n kuchh kahtii hai.n begam
honaa hai jo KHuubii se ziyaafat kaa sar-anjaam
la.Dkii ke zariye se bhii pahu.nchaatii hai.n paiGaam
aatii bhii hai.n jaatii bhii hai.n begam suu-e-matbaKH
maamaa.o.n me.n be-vaqt jahaa.n hotii hai chaKH chaKH
raahat na mile kyuu.n unhe.n halkii tag-o-dau me.n
saa.e kii tarah saath hai la.Dkii bhii jilau me.n
nannhii abhii uTThii nahii.n pahluu se phuphii ke
letii hai.n vo rah rah ke maze us kii ha.nsii ke
la.Dke mire KHush ho ke udhar dekh rahe hai.n
iKHlaas-o-mohabbat se muKHaatib huu.n jidhar mai.n
majma.a ye aziizo.n kaa mohabbat kii ye baate.n
in pyaar kii baato.n me.n na choTe.n hai.n na ghaate.n
anvaar tabassum ke takallum se hai.n paidaa
zau sub.h kii is manzar-e-dil-kash pe hai shaidaa
baato.n kaa abhii thaa tarabii silsila jaarii
nargis ne kahaa aa ke hai tayyaar nahaarii

Ali Manzoor Hyderabadi
Nazm

rah-rau

aaj mai.n duur bahut duur nikal aayaa huu.n
be-talab tag-o-dau
dil me.n kaavish na talaash
na ko.ii KHvaahish maKHfii na tamannaa-e-ma.aash
havas-e-KHaam na saudaa-e-tamaam
yuu.nhii chaltaa hu.aa chaltaa hu.aa aa pahu.nchaa huu.n
pai-ba-pai gaam-ba-gaam
kis qadar duur nikal aayaa huu.n
us se pahle bhii chalaa huu.n mai.n na.ii raaho.n par
shaah-raaho.n se pare
KHaar-zaaro.n me.n ghisaTtii hu.ii ik surKH lakiir
ik sisaktii hu.ii dil-doz nafiir
sarsaraate hu.e malbuus
mahaktii hu.ii saa.ns
lazzat-o-karb kaa maddham bam-o-zer
aaj lekin mai.n bahut duur nikal aayaa huu.n
aur ik shaam sar-e-raah-guzaar
vo mirii laGzish-e-paa merii vo be-raah-ravii
KHud-faraamosh subuk-dosh-e-amal
apne ajdaad ke naa-karda gunaaho.n kii uquubat se barii
ik hiran chauk.Dii bhartaa hu.aa KHaamosh-KHiraam
shaam ke vaqt sar-e-raah-guzaar
mai.n bahut duur bhaTak niklaa thaa
aaj lekin mai.n bahut duur nikal aayaa huu.n
aap se aap bahut duur bahut duur nikal aayaa huu.n
shaah-raaho.n se pare duur guzargaaho.n se
be-talab be-tag-o-dau
KHaanqaaho.n se alag daur sanam-KHaano.n se
havas-e-KHaam na saudaa-e-tamaam
yuu.nhii chaltaa hu.aa chaltaa hu.aa aa pahu.nchaa huu.n
pai-ba-pai gaam-ba-gaam
kis qadar duur bahut duur nikal aayaa huu.n

Mohammad Deen Taseer
Nazm

intiqam

mai.n soch ke ik doraahe par
hairaa.n aazurda aa pahu.nchaa
ye saarii tag-o-dau tanhaa thii
is mo.D pe bhii tanhaa pahu.nchaa
lekin is tanhaa manzar me.n
ik chehra aur ubhar aayaa
jo saaf nazar aayaa na kabhii
ab itne qariib nazar aayaa
vo chehraa dushman kaa chehraa
is ruup me.n pahlii baar milaa
kabhii zaat ke har manzar me.n mire
kabhii manzar ke us paar milaa
mai.n KHuub use pahchaan gayaa
jis ruup me.n vo jis baar milaa
phir apne dil pe nazar jo kii
aamaada pa.e-paikaar milaa
phir mai.n ne kisii taaKHiir binaa
ik vaar bahut saffaak kiyaa
KHud apnaa garebaa.n chaak kiyaa

Pirzada Qasim
Nazm

hum kahan aa gae

ham kahaa.n aa ga.e
saare be-samt hai.n
qaafile kaarvaa.n saarbaa.n
ek sailaab-e-aadam ravaa.n chaar suu
ik tag-o-taaz-e-kaar-e-jahaa.n
aasmaa.n se pare sair-e-sayyaargaa.n
aur zamii.n-doz pahnaa.iyo.n me.n
nigaaho.n kii hairaaniyaa.n
ab kahii.n bhii nahii.n
maatam-e-marg-e-be-chaargaa.n
har adaalat me.n insaaf kii arziyaa.n
baatilo.n kii tarafdaariyaa.n
phir uThaa le ga.e baanuu-e-be-ridaa
saare chup-chaap hai.n
ko.ii pursaa.n nahii.n
giryaa-e-tifl-e-be-chaargaa.n
ko.ii suntaa nahii.n
KHvaab biimaar aa.nkho.n me.n marte hu.e
KHud-kushii chaar-suu bain kartii hu.ii
ye mirii arz-e-jannat-nishaa.n
jo pukaarii ga.ii
qibla-e-aarfaa.n ma.abad-e-nuuriyaa.n
kuucha-e-dilbaraa.n bastii-e-aashiqaa.n
maqtal-e-harf-o-saut-o-sadaa ban ga.ii
ab lahuu-ra.ng hai.n saare tishna-labaa.n
saadiq-o-saadiqa
naaz-bardaar-e-aashuftagaa.n

Zubair Rizvi
Nazm

sharab-o-saqi

zaahid-e-be-riyaa banaa hai ko.ii
aur banaa ko.ii rind-e-shaatir hai
hai tag-o-dau jahaa.n me.n jitnii bhii
sirf ik chiiz hii kii KHaatir hai

Dharmpal Aaqil
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now