ہمیں بھی آج ہی کرنا تھا انتظار اس کا

اسے بھی آج ہی سب وعدے بھول جانے تھے

تجھ سے بچھڑنا کوئی نیا حادثہ نہیں

ایسے ہزاروں قصے ہماری خبر میں ہیں

کس کی تلاش ہے ہمیں کس کے اثر میں ہیں

جب سے چلے ہیں گھر سے مسلسل سفر میں ہیں

سوال کرتی کئی آنکھیں منتظر ہیں یہاں

جواب آج بھی ہم سوچ کر نہیں آئے

تجھ کو بھی کیوں یاد رکھا

سوچ کے اب پچھتاتے ہیں

برا مت مان اتنا حوصلہ اچھا نہیں لگتا

یہ اٹھتے بیٹھتے ذکر وفا اچھا نہیں لگتا

اونچی اڑان کے لیے پر تولتے تھے ہم

اونچائیوں پہ سانس گھٹے گی پتا نہ تھا

یہ بات یاد رکھیں گے تلاشنے والے

جو اس سفر پہ گئے لوٹ کر نہیں آئے

خواب جتنے دیکھنے ہیں آج سارے دیکھ لیں

کیا بھروسہ کل کہاں پاگل ہوا لے جائے گی

سفر تو پہلے بھی کتنے کیے مگر اس بار

یہ لگ رہا ہے کہ تجھ کو بھی بھول جائیں گے

سبھی کو اپنا سمجھتا ہوں کیا ہوا ہے مجھے

بچھڑ کے تجھ سے عجب روگ لگ گیا ہے مجھے

تیری خبر مل جاتی تھی

شہر میں جب اخبار نہ تھے

پہلے ہی کیا کم تماشے تھے یہاں

پھر نئے منظر اٹھا لایا ہوں میں

تو کبھی اس شہر سے ہو کر گزر

راستوں کے جال میں الجھا ہوں میں

کہا تھا تم سے کہ یہ راستہ بھی ٹھیک نہیں

کبھی تو قافلے والوں کی بات رکھ لیتے

بدن بھیگیں گے برساتیں رہیں گی

ابھی کچھ دن یہ سوغاتیں رہیں گی

سڑک پہ چلتے ہوئے آنکھیں بند رکھتا ہوں

ترے جمال کا ایسا مزہ پڑا ہے مجھے

سونے سے جاگنے کا تعلق نہ تھا کوئی

سڑکوں پہ اپنے خواب لیے بھاگتے رہے

جو ہر قدم پہ مرے ساتھ ساتھ رہتا تھا

ضرور کوئی نہ کوئی تو واسطا ہوگا

آنکھ کھلتے ہی بستیاں تاراج

کوئی لذت نہیں ہے خوابوں میں

ہمیں خبر تھی زباں کھولتے ہی کیا ہوگا

کہاں کہاں مگر آنکھوں پہ ہاتھ رکھ لیتے

عجیب خواب تھا تعبیر کیا ہوئی اس کی

کہ ایک دریا ہواؤں کے رخ پہ بہتا تھا

تلاش جن کو ہمیشہ بزرگ کرتے رہے

نہ جانے کون سی دنیا میں وہ خزانے تھے

گھر میں اور بہت کچھ تھا

صرف در و دیوار نہ تھے

آشفتہؔ اب اس شخص سے کیا خاک نباہیں

جو بات سمجھتا ہی نہیں دل کی زباں کی

دریاؤں کی نذر ہوئے

دھیرے دھیرے سب تیراک

یہ اور بات کہ تم بھی یہاں کے شہری ہو

جو میں نے تم کو سنایا تھا میرا قصہ ہے

تجھے بھلانے کی کوشش میں پھر رہے تھے کہ ہم

کچھ اور ساتھ میں پرچھائیاں لگا لائے

کیوں کھلونے ٹوٹنے پر آب دیدہ ہو گئے

اب تمہیں ہم کیا بتائیں کیا پریشانی ہوئی

ہے انتظار مجھے جنگ ختم ہونے کا

لہو کی قید سے باہر کوئی بلاتا ہے

تیزی سے بیتتے ہوئے لمحوں کے ساتھ ساتھ

جینے کا اک عذاب لیے بھاگتے رہے

ایک منظر میں لپٹے بدن کے سوا

سرد راتوں میں کچھ اور دکھتا نہیں

گھر کی حد میں صحرا ہے

آگے دریا بہتا ہے

گھر کے اندر جانے کے

اور کئی دروازے ہیں

دل دیتا ہے ہر پھر کے اسی در پہ صدائیں

دیوار بنا ہے ابھی دیوانہ نہیں ہے