سوال آ گئے آنکھوں سے چھن کے ہونٹوں پر

ہمیں جواب نہ دینے کا فائدہ تو ملا

جب یہاں رہنے کے سب اسباب یکجا کر لئے

تب کھلا مجھ پر کہ میں دنیا کا باشندہ نہ تھا

میں ترے شوخ لبوں پر تو ابھی آیا ہوں

اس سے پہلے تری آنکھوں میں سوالات سا تھا

درمیاں جو جسم کا پردہ ہے کیسے ہوگا چاک

موت کس ترکیب سے ہم کو ملائے گی نہ پوچھ

اس نے تو یوں ہی پوچھ لیا تھا کہ کوئی ہے

محفل میں اٹھا شور بہ یک لخت کہ ہم ہم

خودکشی کا فیصلہ یہ سوچ کر ہم نے کیا

کون کرتا زندگی کا موت سے اچھا علاج

نسل آدم رفتہ رفتہ خود کو کر لے گی تباہ

اتنی سختی سے قیامت پیش آئے گی نہ پوچھ

کھینچ لائی جانب دریا ہمیں بھی تشنگی

اب گلوئے خشک کا خنجر پہ رم ہونے کو ہے

چاہیں تو اس کو تیغ خموشی سے کاٹ دیں

لیکن جنوں سے جنگ زبانی کریں گے ہم

غور سے دیکھتے رہنے کی سزا پائی ہے

تیری تصویر ان آنکھوں میں اتر آئی ہے