اے صنم وصل کی تدبیروں سے کیا ہوتا ہے

وہی ہوتا ہے جو منظور خدا ہوتا ہے

ہمارے عیب نے بے عیب کر دیا ہم کو

یہی ہنر ہے کہ کوئی ہنر نہیں آتا

اتنا تو جذب عشق نے بارے اثر کیا

اس کو بھی اب ملال ہے میرے ملال کا

دولت نہیں کام آتی جو تقدیر بری ہو

قارون کو بھی اپنا خزانا نہیں ملتا

کس طرح ملیں کوئی بہانا نہیں ملتا

ہم جا نہیں سکتے انہیں آنا نہیں ملتا

پوچھا اگر کسی نے مرا آ کے حال دل

بے اختیار آہ لبوں سے نکل گئی

ہم تو اپنوں سے بھی بیگانہ ہوئے الفت میں

تم جو غیروں سے ملے تم کو نہ غیرت آئی

بے بلائے ہوئے جانا مجھے منظور نہیں

ان کا وہ طور نہیں میرا یہ دستور نہیں

اگر حیات ہے دیکھیں گے ایک دن دیدار

کہ ماہ عید بھی آخر ہے ان مہینوں میں

نہ سکندر ہے نہ دارا ہے نہ قیصر ہے نہ جم

بے محل خاک میں ہیں قصر بنانے والے

بعد فنا بھی ہے مرض عشق کا اثر

دیکھو کہ رنگ زرد ہے میرے غبار کا

انگڑائی دونوں ہاتھ اٹھا کر جو اس نے لی

پر لگ گئے پروں نے پری کو اڑا دیا

اثر زلف کا برملا ہو گیا

بلاؤں سے مل کر بلا ہو گیا

دیکھ کر طول شب ہجر دعا کرتا ہوں

وصل کے روز سے بھی عمر مری کم ہو جائے

نہیں بتوں کے تصور سے کوئی دل خالی

خدا نے ان کو دیے ہیں مکان سینوں میں

عریاں حرارت تپ فرقت سے میں رہا

ہر بار میرے جسم کی پوشاک جل گئی

خود فروشی کو جو تو نکلے بہ شکل یوسف

اے صنم تیری خریدار خدائی ہو جائے

گیا شباب نہ پیغام وصل یار آیا

جلا دو کاٹ کے اس نخل میں نہ بار آیا

چھپ سکا دم بھر نہ راز دل فراق یار میں

وہ نہاں جس دم ہوا سب آشکارا ہو گیا

جوش وحشت یہی کہتا ہے نہایت کم ہے

دو جہاں سے بھی اگر وسعت صحرا بڑھ جائے

برقؔ افتادہ وہ ہوں سلطنت عالم میں

تاج سر عجز سے نقش کف پا ہوتا ہے