تو دیکھ رہا ہے جو مرا حال ہے قاصد

مجھ کو یہی کہنا ہے کہ میں کچھ نہیں کہتا

معلوم ہے وعدے کی حقیقت

بہلا لیتے ہیں اپنے جی کو

عشق نے جس دل پہ قبضہ کر لیا

پھر کہاں اس میں نشاط و غم رہے

کوئی دل لگی دل لگانا نہیں ہے

قیامت ہے یہ دل کا آنا نہیں ہے

وفا پر دغا صلح میں دشمنی ہے

بھلائی کا ہرگز زمانہ نہیں ہے

دیر و کعبہ میں بھٹکتے پھر رہے ہیں رات دن

ڈھونڈھنے سے بھی تو بندوں کو خدا ملتا نہیں

الجھا ہی رہنے دو زلفوں کو صنم

جو نہ کھل جائیں بھرم اچھے ہیں

اردو ہے جس کا نام ہماری زبان ہے

دنیا کی ہر زبان سے پیاری زبان ہے

اک خواب کا خیال ہے دنیا کہیں جسے

ہے اس میں اک طلسم تمنا کہیں جسے

نفس کو مار کر ملے جنت

یہ سزا قابل قیاس نہیں

یوں آؤ مرے پہلو میں تم گھر سے نکل کر

بو آتی ہے جس طرح گل تر سے نکل کر

سچ ہے ان دونوں کا ہے اک عالم

میری تنہائی تیری یکتائی

وہ کہا کرتے ہیں کوٹھوں چڑھی ہونٹوں نکلی

دل میں ہی رکھنا جو کل رات ہوا کوٹھے پر

تلخ کہتے تھے لو اب پی کے تو بولو زاہد

ہاتھ آئے ادھر استاد مزا ہے کہ نہیں

کہنے کو تو کہہ گئے ہو سب کچھ

اب کوئی جواب دے تو کیا ہو

سب کچھ ہے اور کچھ بھی نہیں دہر کا وجود

کیفیؔ یہ بات وہ ہے معما کہیں جسے

بول اٹھتی کبھی چڑیا جو تری انگیا کی

خوشنوائی کی نہ یوں جیتتی بلبل پالی

جو چشم دل ربا کے وصف میں اشعار لکھتا ہوں

تو ہر ہر لفظ پر اہل نظر اک صاد کرتے ہیں

سیل گریہ کی بدولت یہ ہوا گھر کا حال

خاک تک بھی نہ ملی بہر تیمم مجھ کو

تم سے اب کیا کہیں وہ چیز ہے داغ غم عشق

کہ چھپائے نہ چھپے اور دکھائے نہ بنے

ڈھونڈھنے سے یوں تو اس دنیا میں کیا ملتا نہیں

سچ اگر پوچھو تو سچا آشنا ملتا نہیں

عقدۂ قسمت نہیں کھلتا مرا

یہ بھی ترا بند قبا ہو گیا

حال دل لکھتے نہ لوگوں کی زباں میں پڑتے

وجہ انگشت نمائی یہ قلم ہے ہم کو

رہنے دے ذکر خم زلف مسلسل کو ندیم

اس کے تو دھیان سے بھی ہوتا ہے دل کو الجھاؤ

یا الٰہی مجھ کو یہ کیا ہو گیا

دوستی کا تیری سودا ہو گیا

وضو ہوتا ہے یاں تو شیخ اسی آب‌‌ گلابی سے

تیمم کے لئے تم خاک جا کر دشت میں پھانکو

خبر کسے صبح و شام کی ہے تعینات اور قیود کیسے

نماز کس کی وہاں کسی کو خیال تک بھی نہیں وضو کا

معجزہ حضرت عیسیٰ کا تھا بے شبہ درست

کہ میں دنیا سے گیا اٹھ جو کہا قم مجھ کو

دم غنیمت ہے سالکو میرا

جرس دور کی صدا ہوں میں

ہے عکس آئنہ دل میں کسی بلقیس ثانی کا

تصور ہے مرا استاد بہزاد اور مانی کا

بادبانوں میں بھری ہے اس کے کیا باد نفس

کشتئ عمر رواں کو تاب لنگر کی نہیں

شمع رویوں کی محبت کا جو دم بھرتے ہیں

ایک مدت وہ ابھی بیعت پروانہ کریں

اصل وحدت کی بنا ہے عدم غیریت

اس کا جب رنگ جما غیر کو اپنا جانا

جو دل و ایماں نہ دیں نذراں بتوں کو دیکھ کر

یا خدا وہ لوگ اس دنیا میں آئے کس لئے

وصل کا کرتا ہوں جب ذکر ان سے

اک تبسم تہ لب کرتے ہیں