kyā fikr-e-āb-o-nān ki ġham kah rahā hai ab

maujūd huuñ ziyāfat-e-dil aur jigar ko maiñ

kya fikr-e-ab-o-nan ki gham kah raha hai ab

maujud hun ziyafat-e-dil aur jigar ko main

tū hī zāhir hai tū hī bātin hai

tū hī tū hai to maiñ kahāñ tak huuñ

tu hi zahir hai tu hi baatin hai

tu hi tu hai to main kahan tak hun

kyā ho gayā ise ki tujhe dekhtī nahīñ

jī chāhtā hai aag lagā duuñ nazar ko maiñ

kya ho gaya ise ki tujhe dekhti nahin

ji chahta hai aag laga dun nazar ko main

andesha hai ki de na idhar kī udhar lagā

mujh ko to nā-pasand vatīre sabā ke haiñ

andesha hai ki de na idhar ki udhar laga

mujh ko to na-pasand watire saba ke hain

roz-e-jazā meñ āḳhir pūchhā na jā.egā kyā

terā ye chup lagānā merā savāl karnā

roz-e-jaza mein aaKHir puchha na jaega kya

tera ye chup lagana mera sawal karna

shaiḳh aur barhaman meñ agar laag hai to ho

donoñ shikār-e-ġhamza usī dil-rubā ke haiñ

shaiKH aur barhaman mein agar lag hai to ho

donon shikar-e-ghamza usi dil-ruba ke hain

parvāne kī tapish ne ḳhudā jaane kaan meñ

kyā kah diyā ki sham.a ke sar se dhuāñ uThā

parwane ki tapish ne KHuda jaane kan mein

kya kah diya ki shama ke sar se dhuan uTha

iz.hār-e-hāl kā bhī zarīya nahīñ rahā

dil itnā jal gayā hai ki āñkhoñ meñ nam nahīñ

izhaar-e-haal ka bhi zariya nahin raha

dil itna jal gaya hai ki aankhon mein nam nahin

har shakl meñ thā vahī numūdār

ham ne hī nigāh-e-sarsarī kī

har shakl mein tha wahi numudar

hum ne hi nigah-e-sarsari ki

hai aaj ruḳh havā kā muāfiq to chal nikal

kal kī kise ḳhabar hai kidhar kī havā chale

hai aaj ruKH hawa ka muafiq to chal nikal

kal ki kise KHabar hai kidhar ki hawa chale

vaañ sajda-e-niyāz kī miTTī ḳharāb hai

jab tak ki āb-e-dīda se taaza vazū na ho

wan sajda-e-niyaz ki miTTi KHarab hai

jab tak ki aab-e-dida se taza wazu na ho

samajhte haiñ sheroñ ko bhī narm chāra

ġhazālān-e-shahrī se hoshyār rahnā

samajhte hain sheron ko bhi narm chaara

ghazalan-e-shahri se hoshyar rahna

maanā burī ḳhabar hai pa terī ḳhabar to hai

sabr-o-qarār nazr karūñ nāma-bar ko maiñ

mana buri KHabar hai pa teri KHabar to hai

sabr-o-qarar nazr karun nama-bar ko main

haañ dil-e-be-tāb chande intizār

amn-o-rāhat kā Thikāna aur hai

han dil-e-be-tab chande intizar

amn-o-rahat ka Thikana aur hai

kholā hai mujh pe sirr-e-haqīqat majāz ne

ye puḳhtagī sila hai ḳhayālāt-e-ḳhām kā

khola hai mujh pe sirr-e-haqiqat majaz ne

ye puKHtagi sila hai KHayalat-e-KHam ka

dilbarī jazb-e-mohabbat kā karishma hai faqat

kuchh karāmat nahīñ jaadū nahīñ e.ajāz nahīñ

dilbari jazb-e-mohabbat ka karishma hai faqat

kuchh karamat nahin jadu nahin eajaz nahin

bā-īñ-hama darmāndagī insāñ ke ye da.ave

kyā zāt-e-sharīf in ko banāyā hai ḳhudā ne

ba-in-hama darmandagi insan ke ye dawe

kya zat-e-sharif in ko banaya hai KHuda ne

tū na ho ye to ho nahīñ saktā

merā kyā thā huā huā na huā

tu na ho ye to ho nahin sakta

mera kya tha hua hua na hua

habs-e-davām to nahīñ duniyā ki mar rahūñ

kaahe ko ghar ḳhayāl karūñ rahguzar ko maiñ

habs-e-dawam to nahin duniya ki mar rahun

kahe ko ghar KHayal karun rahguzar ko main

gar dekhiye to ḳhātir-e-nāshād shaad hai

sach pūchhiye to hai dil-e-nākām kaam kā

gar dekhiye to KHatir-e-nashad shad hai

sach puchhiye to hai dil-e-nakaam kaam ka

dostī aur kisī ġharaz ke liye

vo tijārat hai dostī hī nahīñ

dosti aur kisi gharaz ke liye

wo tijarat hai dosti hi nahin

tārīf us ḳhudā kī jis ne jahāñ banāyā

kaisī zamīñ banā.ī kyā āsmāñ banāyā

tarif us KHuda ki jis ne jahan banaya

kaisi zamin banai kya aasman banaya

sab kuchh to kiyā ham ne pa kuchh bhī na kiyā haa.e

hairān haiñ kyā jāniye kyā ho nahīñ saktā

sab kuchh to kiya hum ne pa kuchh bhi na kiya hae

hairan hain kya jaaniye kya ho nahin sakta

likkhī thī ġhazal ye āgara meñ

pahlī tārīḳh january kī

likkhi thi ghazal ye aagara mein

pahli tariKH january ki

kyā kohkan kī koh-kanī kyā junūn-e-qais

vādī-e-ishq meñ ye maqām ibtidā ke haiñ

kya kohkan ki koh-kani kya junun-e-qais

wadi-e-ishq mein ye maqam ibtida ke hain

raushan hai āftāb kī nisbat charāġh se

nisbat vahī hai aap meñ aur āftāb meñ

raushan hai aaftab ki nisbat charagh se

nisbat wahi hai aap mein aur aaftab mein

bad kī sohbat meñ mat baiTho is kā hai anjām burā

bad na bane to bad kahlā.e bad achchhā badnām burā

bad ki sohbat mein mat baiTho is ka hai anjam bura

bad na bane to bad kahlae bad achchha badnam bura

thī chheḌ usī taraf se varna

maiñ aur majāl aarzū kī

thi chheD usi taraf se warna

main aur majal aarzu ki

jab ġhunche ko vāshud huī tahrīk sabā se

bulbul se ajab kyā jo kare naġhma-sarā.ī

jab ghunche ko washud hui tahrik saba se

bulbul se ajab kya jo kare naghma-sarai

tumhāre dil se kudūrat miTā.e to jāneñ

khulā hai shahr meñ ik mahkama safā.ī kā

tumhaare dil se kudurat miTae to jaanen

khula hai shahr mein ek mahkama safai ka

kuchh na ban aa.egī jab luuT machāegī ḳhizāñ

ġhuncha har-chand girah kas ke zar-e-gul bāñdhe

kuchh na ban aaegi jab luT machaegi KHizan

ghuncha har-chand girah kas ke zar-e-gul bandhe

sub.h ke bhūle to aa.e shaam ko

dekhiye kab aa.eñ bhūle shaam ke

subh ke bhule to aae sham ko

dekhiye kab aaen bhule sham ke

ne.amat-e-ḳhuld thī bashar ke liye

ḳhaak chāTī nazar guzar ke liye

neamat-e-KHuld thi bashar ke liye

KHak chaTi nazar guzar ke liye

sadr-ārā to jahāñ ho sadr hai

āgara kyā aur allahabad kyā

sadr-ara to jahan ho sadr hai

aagara kya aur allahabad kya

mar chuke jīte-jī ḳhushā qismat

is se achchhī to zindagī hī nahīñ

mar chuke jite-ji KHusha qismat

is se achchhi to zindagi hi nahin

jhuuT aur mubālaġhe ne afsos

izzat kho dī suḳhanvarī kī

jhuT aur mubaalaghe ne afsos

izzat kho di suKHanwari ki

jis ne chashm-e-mast-e-sāqī dekh lī

tā qayāmat us pe hushyārī harām

jis ne chashm-e-mast-e-saqi dekh li

ta qayamat us pe hushyari haram

chhurī kā tiir kā talvār kā to ghaao bharā

lagā jo zaḳhm zabāñ kā rahā hamesha harā

chhuri ka tir ka talwar ka to ghao bhara

laga jo zaKHm zaban ka raha hamesha hara

gar ḳhanda yaad aa.e to siine ko chaak kar

gar ġhamza yaad aa.e to zaḳhm-e-sināñ uThā

gar KHanda yaad aae to sine ko chaak kar

gar ghamza yaad aae to zaKHm-e-sinan uTha

uThā hijāb to bas dīn-o-dil diye hī banī

janāb-e-shaiḳh ko da.avā thā pārsā.ī kā

uTha hijab to bas din-o-dil diye hi bani

janab-e-shaiKH ko dawa tha parsai ka

hai ashk-o-āh raas hamāre mizāj ko

ya.anī pale hue isī āb-o-havā ke haiñ

hai ashk-o-ah ras hamare mizaj ko

yani pale hue isi aab-o-hawa ke hain

yārān-e-bazm-dahr meñ kyā kyā tapāk thā

lekin jab uTh ga.e to na bār-e-digar mile

yaran-e-bazm-dahr mein kya kya tapak tha

lekin jab uTh gae to na bar-e-digar mile

hai is anjuman meñ yaksāñ adam o vajūd merā

ki jo maiñ yahāñ na hotā yahī kārobār hotā

hai is anjuman mein yaksan adam o wajud mera

ki jo main yahan na hota yahi karobar hota

aġhyār kyuuñ daḳhīl haiñ bazm-e-surūr meñ

maanā ki yaar kam haiñ par itne to kam nahīñ

aghyar kyun daKHil hain bazm-e-surur mein

mana ki yar kam hain par itne to kam nahin

apnī hī jalvagarī hai ye koī aur nahīñ

ġhaur se dekh agar aañkh meñ bīnā.ī hai

apni hi jalwagari hai ye koi aur nahin

ghaur se dekh agar aankh mein binai hai

isrāf ne arbāb-e-tamavvul ko Duboyā

aalim ko tafāḳhur ne to zāhid ko riyā ne

israf ne arbab-e-tamawwul ko Duboya

aalim ko tafaKHur ne to zahid ko riya ne

kabhī bhuul kar kisī se na karo sulūk aisā

ki jo tum se koī kartā tumheñ nāgavār hotā

kabhi bhul kar kisi se na karo suluk aisa

ki jo tum se koi karta tumhein nagawar hota

tāsīr ho kyā ḳhaak jo bātoñ meñ ghaḌat ho

kuchh baat nikaltī hai to be-sāḳhta-pan meñ

tasir ho kya KHak jo baaton mein ghaDat ho

kuchh baat nikalti hai to be-saKHta-pan mein

dariyā kī tarah ravāñ huuñ lekin

ab tak bhī vahīñ huuñ maiñ jahāñ huuñ

dariya ki tarah rawan hun lekin

ab tak bhi wahin hun main jahan hun

sair-e-varūd-e-qāfila-e-nau-bahār dekh

barpā ḳhayām-e-auj havā meñ ghaTā ke haiñ

sair-e-warud-e-qafila-e-nau-bahaar dekh

barpa KHayam-e-auj hawa mein ghaTa ke hain