دھوپ نے گزارش کی

ایک بوند بارش کی

روز اچھے نہیں لگتے آنسو

خاص موقعوں پہ مزا دیتے ہیں

کچھ تو اس دل کو سزا دی جائے

اس کی تصویر ہٹا دی جائے

اب تو چپ چاپ شام آتی ہے

پہلے چڑیوں کے شور ہوتے تھے

اندھیرا ہے کیسے ترا خط پڑھوں

لفافے میں کچھ روشنی بھیج دے

اپنا گھر آنے سے پہلے

اتنی گلیاں کیوں آتی ہیں

سردی میں دن سرد ملا

ہر موسم بے درد ملا

اب نہ غالبؔ سے شکایت ہے نہ شکوہ میرؔ کا

بن گیا میں بھی نشانہ ریختہ کے تیر کا

آج پھر مجھ سے کہا دریا نے

کیا ارادہ ہے بہا لے جاؤں

آگ اپنے ہی لگا سکتے ہیں

غیر تو صرف ہوا دیتے ہیں

دیکھا تو سب کے سر پہ گناہوں کا بوجھ تھا

خوش تھے تمام نیکیاں دریا میں ڈال کر

میں اس کے بدن کی مقدس کتاب

نہایت عقیدت سے پڑھتا رہا

ابھی دو چار ہی بوندیں گریں ہیں

مگر موسم نشیلا ہو گیا ہے

اس سے ملے زمانہ ہوا لیکن آج بھی

دل سے دعا نکلتی ہے خوش ہو جہاں بھی ہو

ہائے وہ لوگ جو دیکھے بھی نہیں

یاد آئیں تو رلا دیتے ہیں

نظروں سے ناپتا ہے سمندر کی وسعتیں

ساحل پہ اک شخص اکیلا کھڑا ہوا

کبھی آنکھیں کتاب میں گم ہیں

کبھی گم ہیں کتاب آنکھوں میں

اچھے دن کب آئیں گے

کیا یوں ہی مر جائیں گے

گھر میں کیا آیا کہ مجھ کو

دیواروں نے گھیر لیا ہے

ان دنوں گھر سے عجب رشتہ تھا

سارے دروازے گلے لگتے تھے

اور بازار سے کیا لے جاؤں

پہلی بارش کا مزا لے جاؤں

ارے یہ دل اور اتنا خالی

کوئی مصیبت ہی پال رکھیے

وہ جنگلوں میں درختوں پہ کودتے پھرنا

برا بہت تھا مگر آج سے تو بہتر تھا

آنکھیں کھولو خواب سمیٹو جاگو بھی

علویؔ پیارے دیکھو سالا دن نکلا

ایسا ہنگامہ نہ تھا جنگل میں

شہر میں آئے تو ڈر لگتا تھا

دیکھا نہ ہوگا تو نے مگر انتظار میں

چلتے ہوئے سمے کو ٹھہرتے ہوئے بھی دیکھ

کمرے میں مزے کی روشنی ہو

اچھی سی کوئی کتاب دیکھوں

رات پڑے گھر جانا ہے

صبح تلک مر جانا ہے

رات ملی تنہائی ملی اور جام ملا

گھر سے نکلے تو کیا کیا آرام ملا

چھوڑ گیا مجھ کو علویؔ

شاید وہ جلدی میں تھا

بلا رہا تھا کوئی چیخ چیخ کر مجھ کو

کنویں میں جھانک کے دیکھا تو میں ہی اندر تھا

سامنے دیوار پر کچھ داغ تھے

غور سے دیکھا تو چہرے ہو گئے

اس سے بچھڑتے وقت میں رویا تھا خوب سا

یہ بات یاد آئی تو پہروں ہنسا کیا

ہر وقت کھلتے پھول کی جانب تکا نہ کر

مرجھا کے پتیوں کو بکھرتے ہوئے بھی دیکھ

آفس میں بھی گھر کو کھلا پاتا ہوں میں

ٹیبل پر سر رکھ کر سو جاتا ہوں میں

رکھتے ہو اگر آنکھ تو باہر سے نہ دیکھو

دیکھو مجھے اندر سے بہت ٹوٹ چکا ہوں

آسمان پر جا پہنچوں

اللہ تیرا نام لکھوں

اک لڑکا تھا اک لڑکی تھی

آگے اللہ کی مرضی تھی

چلا جاؤں گا جیسے خود کو تنہا چھوڑ کر علویؔ

میں اپنے آپ کو راتوں میں اٹھ کر دیکھ لیتا ہوں

ڈھونڈتا ہوں میں زمیں اچھی سی

یہ بدن جس میں اتارا جائے

ڈھونڈنے میں بھی مزہ آتا ہے

کوئی شے رکھ کے بھلا دی جائے

موت نہ آئی تو علویؔ

چھٹی میں گھر جائیں گے

بچھڑتے وقت ایسا بھی ہوا ہے

کسی کی سسکیاں اچھی لگی ہیں

موت بھی دور بہت دور کہیں پھرتی ہے

کون اب آ کے اسیروں کو رہائی دے گا

میں خود کو مرتے ہوئے دیکھ کر بہت خوش ہوں

یہ ڈر بھی ہے کہ مری آنکھ کھل نہ جائے کہیں

دروازے پر پہرہ دینے

تنہائی کا بھوت کھڑا ہے

کہاں بھٹکتے پھرو گے علویؔ

سڑک سے پوچھو کدھر گئی ہے

اندھیری راتوں میں دیکھ لینا

دکھائی دے گی بدن کی خوشبو

تھوڑی سردی ذرا سا نزلہ ہے

شاعری کا مزاج پتلا ہے

بہت خوش ہوئے آئینہ دیکھ کر

یہاں کوئی ثانی ہمارا نہ تھا