عمر دراز مانگ کے لائی تھی چار دن

دو آرزو میں کٹ گئے دو انتظار میں

دل کی بساط کیا تھی نگاہ جمال میں

اک آئینہ تھا ٹوٹ گیا دیکھ بھال میں

ماضیٔ مرحوم کی ناکامیوں کا ذکر چھوڑ

زندگی کی فرصت باقی سے کوئی کام لے

روز کہتا ہوں کہ اب ان کو نہ دیکھوں گا کبھی

روز اس کوچے میں اک کام نکل آتا ہے

پریشاں ہونے والوں کو سکوں کچھ مل بھی جاتا ہے

پریشاں کرنے والوں کی پریشانی نہیں جاتی

مری خاموشیوں پر دنیا مجھ کو طعن دیتی ہے

یہ کیا جانے کہ چپ رہ کر بھی کی جاتی ہیں تقریریں

تجھے دانستہ محفل میں جو دیکھا ہو تو مجرم ہوں

نظر آخر نظر ہے بے ارادہ اٹھ گئی ہوگی

وہ دنیا تھی جہاں تم بند کرتے تھے زباں میری

یہ محشر ہے یہاں سننی پڑے گی داستاں میری

تیرے جلووں نے مجھے گھیر لیا ہے اے دوست

اب تو تنہائی کے لمحے بھی حسیں لگتے ہیں

دنیا ہے خواب حاصل دنیا خیال ہے

انسان خواب دیکھ رہا ہے خیال میں

ہائے سیمابؔ اس کی مجبوری

جس نے کی ہو شباب میں توبہ

ہے حصول آرزو کا راز ترک آرزو

میں نے دنیا چھوڑ دی تو مل گئی دنیا مجھے

منزل ملی مراد ملی مدعا ملا

سب کچھ مجھے ملا جو ترا نقش پا ملا

کیا ڈھونڈھنے جاؤں میں کسی کو

اپنا مجھے خود پتا نہیں ہے

غم مجھے حسرت مجھے وحشت مجھے سودا مجھے

ایک دل دے کر خدا نے دے دیا کیا کیا مجھے

دیکھتے ہی دیکھتے دنیا سے میں اٹھ جاؤں گا

دیکھتی کی دیکھتی رہ جائے گی دنیا مجھے

دل آفت زدہ کا مدعا کیا

شکستہ ساز کیا اس کی صدا کیا

خلوص دل سے سجدہ ہو تو اس سجدے کا کیا کہنا

وہیں کعبہ سرک آیا جبیں ہم نے جہاں رکھ دی

حسن میں جب ناز شامل ہو گیا

ایک پیدا اور قاتل ہو گیا

مری دیوانگی پر ہوش والے بحث فرمائیں

مگر پہلے انہیں دیوانہ بننے کی ضرورت ہے

محبت میں اک ایسا وقت بھی آتا ہے انساں پر

ستاروں کی چمک سے چوٹ لگتی ہے رگ جاں پر

رنگ بھرتے ہیں وفا کا جو تصور میں ترے

تجھ سے اچھی تری تصویر بنا لیتے ہیں

کہانی میری روداد جہاں معلوم ہوتی ہے

جو سنتا ہے اسی کی داستاں معلوم ہوتی ہے

خدا اور ناخدا مل کر ڈبو دیں یہ تو ممکن ہے

میری وجہ تباہی صرف طوفاں ہو نہیں سکتا

جب دل پہ چھا رہی ہوں گھٹائیں ملال کی

اس وقت اپنے دل کی طرف مسکرا کے دیکھ

وہ آئینہ ہو یا ہو پھول تارہ ہو کہ پیمانہ

کہیں جو کچھ بھی ٹوٹا میں یہی سمجھا مرا دل ہے

مرکز پہ اپنے دھوپ سمٹتی ہے جس طرح

یوں رفتہ رفتہ تیرے قریب آ رہا ہوں میں

گناہوں پر وہی انسان کو مجبور کرتی ہے

جو اک بے نام سی فانی سی لذت ہے گناہوں میں

سارے چمن کو میں تو سمجھتا ہوں اپنا گھر

جیسے چمن میں میرا کوئی آشیاں بنا

میں دیکھتا ہوں آپ کو حد نگاہ تک

لیکن مری نگاہ کا کیا اعتبار ہے

کہانی ہے تو اتنی ہے فریب خواب ہستی کی

کہ آنکھیں بند ہوں اور آدمی افسانہ ہو جائے

تعجب کیا لگی جو آگ اے سیمابؔ سینے میں

ہزاروں دل میں انگارے بھرے تھے لگ گئی ہوگی

لہو سے میں نے لکھا تھا جو کچھ دیوار زنداں پر

وہ بجلی بن کے چمکا دامن صبح گلستاں پر

صحرا سے بار بار وطن کون جائے گا

کیوں اے جنوں یہیں نہ اٹھا لاؤں گھر کو میں

بت کریں آرزو خدائی کی

شان تیری ہے کبریائی کی

چمک جگنو کی برق بے اماں معلوم ہوتی ہے

قفس میں رہ کے قدر آشیاں معلوم ہوتی ہے

یہ شراب عشق اے سیمابؔ ہے پینے کی چیز

تند بھی ہے بد مزہ بھی ہے مگر اکسیر ہے

کیوں جام شراب ناب مانگوں

ساقی کی نظر میں کیا نہیں ہے

دیکھتے رہتے ہیں چھپ چھپ کے مرقع تیرا

کبھی آتی ہے ہوا بھی تو چھپا لیتے ہیں

سیمابؔ دل حوادث دنیا سے بجھ گیا

اب آرزو بھی ترک تمنا سے کم نہیں

برہمن کہتا تھا برہم شیخ بول اٹھا احد

حرف کے اک پھیر سے دونوں میں جھگڑا ہو گیا

نشاط حسن ہو جوش وفا ہو یا غم عشق

ہمارے دل میں جو آئے وہ آرزو ہو جائے

قفس کی تیلیوں میں جانے کیا ترکیب رکھی ہے

کہ ہر بجلی قریب آشیاں معلوم ہوتی ہے

یہ میری تیرہ نصیبی یہ سادگی یہ فریب

گری جو برق میں سمجھا چراغ خانہ ملا

ہو گئے رخصت رئیسؔ و عالؔی و واصفؔ نثارؔ

رفتہ رفتہ آگرہ سیمابؔ سونا ہو گیا

اب وہاں دامن کشی کی فکر دامن گیر ہے

یہ مرے خواب محبت کی نئی تعبیر ہے