Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for ".dozd"

Nazm MATCHES FOR ".dozd"

Nazm

muhasara

miraa qalam nahii.n auzaar us naqab-zan kaa
jo apne ghar kii hii chhat me.n shigaaf Daaltaa hai
miraa qalam nahii.n us duzd-e-niim-shab kaa rafiiq
jo be-charaaG gharo.n par kamand uchhaaltaa hai

Ahmad Faraz
Nazm

etiraf

kyaa sunogii mirii majruuh javaanii kii pukaar
merii fariyaad-e-jigar-doz miraa naala-e-zaar
shiddat-e-karb me.n Duubii hu.ii merii guftaar
mai.n ki KHud apne mazaaq-e-tarab-aagii.n kaa shikaar

Asrarul Haq Majaz
Nazm

KHamosh aawaz

jaag uThii lo duniyaa merii
aa.ii ha.nsii vo lab pe tumhaare
dekho dekho merii jaanib
dau.D pa.De hai.n chaa.nd sitaare

Jan Nisar Akhtar
Nazm

aansu

ye aa.nsuu kyaa ik gavaah hai
merii dard-mandii kaa merii insaan-dostii kaa
ye aa.nsuu kyaa ik subuut hai
merii zindagii me.n KHuluus kii ek raushnii kaa
ye aa.nsuu kyaa ye bataa rahaa hai
ki mere siine me.n ek hassaas dil hai
jis ne kisii kii dil-doz daastaa.n jo sunii
to sun ke ta.Dap uThaa hai
paraa.e sho.alo.n me.n jal rahaa hai
pighal rahaa hai
magar me.n phir KHud se puuchhtaa huu.n
ye daastaa.n to abhii sunii hai
ye aa.nsuu bhii kyaa abhii Dhalaa hai
ye aa.nsuu
kyaa mai.n ye samjhuu.n
pahle kahii.n nahii.n thaa
mujhe to shak hai ki ye kahii.n thaa
ye mere dil aur merii palko.n ke darmiyaa.n
ik jo faasla hai
jahaa.n KHayaalo.n ke shahr zinda hai.n
aur KHvaabo.n kii turbate.n hai.n
jahaa.n mohabbat ke uj.De baaGo.n me.n
talKHiyo.n ke babuul hai.n
aur kuchh nahii.n hai
jahaa.n se aage hai.n
uljhano.n ke ghanere ja.ngal

Javed Akhtar
Nazm

shahr-nama

jo ravish hai saahib-e-taKHt kii
so musaahibo.n kaa tariiq hai
yahaa.n kotvaal bhii duzd-e-shab
yahaa.n shaiKH-e-dii.n bhii fariiq hai

Ahmad Faraz
Nazm

himala

ai himaala ai fasiil-e-kishvar-e-hindustaan
chuumtaa hai terii peshaanii ko jhuk kar aasmaa.n
tujh me.n kuchh paidaa nahii.n deriina rozii ke nishaa.n
tuu javaa.n hai gardish-e-shaam-o-sahar ke darmiyaa.n
ek jalva thaa kaliim-e-tuur-e-siinaa ke liye
tuu tajallii hai saraapaa chashm-e-biinaa ke liye
imtihaan-e-diida-e-zaahir me.n kohistaa.n hai tuu
paasbaa.n apnaa hai tuu diivaar-e-hindustaa.n hai tuu
matla-e-avval falak jis kaa ho vo diivaa.n hai tuu
suu-e-KHalvat-gaah-e-dil daaman-kash-e-insaa.n hai tuu
barf ne baa.ndhii hai dastaar-e-faziilat tere sar
KHanda-zan hai jo kulaah-e-mehr-e-aalam-taab par
terii 'umr-e-rafta kii ik aan hai ahd-e-kuhan
vaadiyo.n me.n hai.n tirii kaalii ghaTaa.e.n KHema-zan
choTiyaa.n terii surayyaa se hai.n sargarm-e-suKHan
tuu zamii.n par aur pahnaa-e-falak teraa vatan
chashma-e-daaman tiraa aa.iina-e-sayyaal hai
daaman-e-mauj-e-havaa jis ke liye ruumaal hai
abr ke haatho.n me.n rahvaar-e-havaa ke vaaste
taaziyaana de diyaa barq-e-sar-e-kohsaar ne
ai himaala ko.ii baazii-gaah hai tuu bhii jise
dast-e-qudrat ne banaayaa hai 'anaasir ke liye
haa.e kyaa fart-e-tarab me.n jhuumtaa jaataa hai abr
fiil-e-be-zanjiir kii suurat u.Daa jaataa hai abr
jumbish-e-mauj-e-nasiim-e-sub.h gahvaara banii
jhuumtii hai nashsha-e-hastii me.n har gul kii kalii
yuu.n zabaan-e-barg se goyaa hai us kii KHaamushii
dast-e-gul-chii.n kii jhaTak mai.n ne nahii.n dekhii kabhii
kah rahii hai merii KHaamoshii hii afsaana miraa
kunj-e-KHalvat KHaana-e-qudrat hai kaashaana miraa
aatii hai naddii faraaz-e-koh se gaatii hu.ii
kausar o tasniim kii maujo.n ko sharmaatii hu.ii
aa.iina saa shaahid-e-qudrat ko dikhlaatii hu.ii
sa.ng-e-rah se gaah bachtii gaah Takraatii hu.ii
chhe.Dtii jaa is iraaq-e-dil-nashii.n ke saaz ko
ai musaafir dil samajhtaa hai tirii aavaaz ko
laila-e-shab kholtii hai aa ke jab zulf-e-rasaa
daaman-e-dil khii.nchtii hai aabshaaro.n kii sadaa
vo KHamoshii shaam kii jis par takallum ho fidaa
vo daraKHto.n par tafakkur kaa samaa.n chhaayaa hu.aa
kaa.nptaa phirtaa hai kyaa rang-e-shafaq kohsaar par
KHush-numaa lagtaa hai ye Gaaza tire ruKHsaar par
ai himaala daastaa.n us vaqt kii ko.ii sunaa
maskan-e-aabaa-e-insaa.n jab banaa daaman tiraa
kuchh bataa us siidhii-saadhii zindagii kaa maajraa
daaG jis par Gaaza-e-ra.ng-e-taklluf kaa na thaa
haa.n dikhaa de ai tasavvur phir vo sub.h-o-shaam tuu
dau.D piichhe kii taraf ai gardish-e-ayyaam tuu

Allama Iqbal
Nazm

mere bhi hain kuchh KHwab

ai ishq-e-azal-giir o abad-taab
mere bhii hai.n kuchh KHvaab!
har KHvaab kii saugand!
har-chand ki vo KHvaab hai.n sar-basta o ruu-band
siine me.n chhupaa.e hu.e goyaa.ii-e-doshiiza-e-lab-KHand
har KHvaab me.n ajsaam se afkaar kaa, mafhuum se guftaar kaa paivand
ushshaaq ke lab-haa-e-azal-tishna kii paivastagii-e-shauq ke maanind
(ai lamha-e-KHursand)
ai ishq-e-azal-giir o abad-taab, mere bhii hai.n kuchh KHvaab
vo KHvaab hai.n aazaadi-e-kaamil ke na.e KHvaab
har sa.ii-e-jigar-doz ke haasil ke na.e KHvaab
aadam kii vilaadat ke na.e jashn pe lahraate jalaajil ke na.e KHvaab
is KHaak kii satvat kii manaazil ke na.e KHvaab
yaa siina-e-giitii me.n na.e dil ke na.e KHvaab
ai ishq-e-azal-giir o abad-taab
mere bhii hai.n kuchh KHvaab
mere bhii hai.n kuchh KHvaab!

Noon Meem Rashid
Nazm

barsat ki bahaaren

kahtaa hai ko.ii pyaarii jo kuchh kaho sau laa de.n
zar-dozii TaaT-baafii juutaa kaho pahnaa de.n
pe.Daa jalebii laDDuu jo khaa.o so ma.ngaa de.n
chiiraa dupaTTa jaama jaisaa kaho ra.ngaa de.n
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

kaun si uljhan ko suljhate hain ham?

lab bayaabaa.n, bose be-jaa.n
kaun sii uljhan ko suljhaate hai.n ham?
jism kii ye kaar-gaahe.n
jin kaa haizam aap ban jaate hai.n ham!
niim-shab aur shahr-e-KHvaab-aaluudaa, ham-saa.e
ki jaise duzd-e-shab-gardaa.n ko.ii!
shaam se the hasrato.n ke banda-e-be-daam ham
pii rahe the jaam par har jaam ham
ye samajh kar jur.a-e-pinhaa.n ko.ii
shaayad aaKHir ibtidaa-e-raaz kaa iimaa bane!
matlab aasaa.n harf be-ma.anii
tabassum ke hisaabii zaaviye
matn ke sab haashiye
jin se aish-KHaam ke naqsh-e-riyaa bante rahe!
aur aaKHir bu.ad jismo.n me.n sar-e-muu bhii na thaa
jab dilo.n ke darmiyaa.n haa.il the sa.ngii.n faasle
qurb-e-chashm-o-gosh se ham kaun sii uljhan ko suljhaate rahe!
kaun sii uljhan ko suljhaate hai.n ham?
shaam ko jab apnii Gam-gaaho.n se duzdaanaa nikal aate hai.n ham?
yaa zavaal-e-umr kaa dev-e-subuk-paa ruu-ba-ruu
yaa anaa ke dast o paa ko vus.ato.n kii aarzuu
kaun sii uljhan ko suljhaate hai.n ham?

Noon Meem Rashid
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

shayad

kuchh log
jo mere dil ko achchhe lagte the
umro.n ke rele me.n aa.e
aur jaa bhii chuke
kuchh dhando.n me.n masruuf hu.e
kuchh chuhaa-dau.D me.n jiite ga.e
kuchh haar ga.e
kuchh qatl hu.e
kuchh ba.Dhtii bhii.D me.n
apne-aap se duur hu.e
kuchh TuuT ga.e kuchh Duub ga.e

Balraj Komal
Nazm

uT-paTang

kaano.n kii ik nagrii dekhii jis me.n saare kaane dekhe
ek taraf se ahmaq saare ek taraf se siyaane the
kaano.n kii is nagrii ke sab riit rivaaj alaahada the
rog alaahada bastii me.n the aur ilaaj alaahada the
do do kaane mil kar puuraa sapnaa dekhaa karte the
ga.ngaa ke sa.ngam se kaane jamunaa dekhaa karte the
chaa.ndnii raat me.n chhatrii le kar baahar jaayaa karte the
os gire to kahte hai.n vaa.n sar phaT jaayaa karte the
dariyaa pul par chaltaa thaa paanii me.n raile.n chaltii thii.n
la.nguuro.n kii dum par a.nguuro.n kii bele.n paktii thii.n
chhuut kii ik biimaarii phailii ek dafa un kaano.n me.n
bhuuk ke kii.De sunte hai.n nikle gandum ke daano.n me.n
roz ka.ii kaane bechaare marte the biimaarii me.n
kahte hai.n raajaa sotaa thaa sone kii almaarii me.n
ghanTii baa.ndh ke chuuhe jab billii se dau.D lagaate the
peT pe dono.n haath bajaa kar sab qavvaalii gaate the
tab kaanii bhai.ns ne phuul phulaa kar chhe.Daa biin kaa baajaa
aur kaalaa chashma pahan ke singhaasan par aayaa raajaa
dukh se chashme kii dono.n hii aa.nKHe.n paanii paanii thii.n
dekhaa us kaane raajaa kii dono.n aa.nKHe.n kaanii thii.n
jhuuTaa hai jo andho.n me.n kaanaa raajaa hai kahtaa hai
jaa kar dekho kaanii nagrii andhaa raajaa rahtaa hai

Gulzar
Nazm

badli ka chand

KHurshiid vo dekho Duub gayaa zulmat kaa nishaa.n lahraane lagaa
mahtaab vo halke baadal se chaa.ndii ke varaq barsaane lagaa
vo saa.nvle-pan par maidaa.n ke halkii sii sabaahat dau.D chalii
tho.Daa saa ubhar kar baadal se vo chaa.nd jabii.n jhalkaane lagaa
lo phir vo ghaTaa.e.n chaak hu.ii.n zulmat kaa qadam tharraane lagaa
baadal me.n chhupaa to khol diye baadal me.n dariiche hiire ke
garduu.n pe jo aayaa to garduu.n dariyaa kii tarah lahraane lagaa
simTii jo ghaTaa taariikii me.n chaa.ndii ke safiine le ke chalaa
sankii jo havaa to baadal ke girdaab me.n Gote khaane lagaa
Gurfo.n se jo jhaa.nkaa garduu.n ke amvaaj kii nabze.n tez hu.ii.n
halqo.n me.n jo dau.Daa baadal ke kohsaar kaa sar chakraane lagaa
parda jo uThaayaa baadal kaa dariyaa pe tabassum dau.D gayaa
chilman jo giraa.ii badlii kii maidaan kaa dil ghabraane lagaa
ubhraa to tajallii dau.D ga.ii Duubaa to falak be-nuur hu.aa
uljhaa to siyaahii dau.Daa dii suljhaa to ziyaa barsaane lage
kyaa kaavish-e-nuur-o-zulmat hai kyaa qaid hai kyaa aazaadii hai
insaa.n kii ta.Daptii fitrat kaa mafhuum samajh me.n aane lagaa

Josh Malihabadi
Nazm

holi

bhaage hai kahii.n rang kisii par jo ko.ii Daal
vo poTlii maare hai use dau.D ke filhaal
ye Taa.ng ghasiiTe hai to vo khii.nche paka.D baal
vo haath maro.De to ye to.De hai kha.Daa gaal
is Dhab ke har ik jaa pe mache Dha.ng zamii.n par
holii ne machaayaa hai ajab rang zamii.n par

Nazeer Akbarabadi
Nazm

bahrupni

ye mirii aastiin se niklii
rakh diyaa dau.D ke charaaG pe haath
mal diyaa phir a.ndheraa chehre par
ho.nT se dil kii baat lauT ga.ii
dar tak aa ke baraat lauT ga.ii

Kaifi Azmi
Nazm

zindagi ka waqfa

raat sannaaTe kii chaadar me.n pa.Dii hai lipTii
pattiyaa.n sa.Dko.n kii sab jaag rahii hai.n jaise
dekhnaa chaahtii hai.n shahr me.n kyaa hotaa hai
mai.n hamesha kii tarah ho.nTo.n me.n cigarette ko dabaa.e
sone se pahle KHayaalaat me.n khoyaa hu.aa huu.n
din me.n kyaa kuchh kiyaa ik jaa.eza letaa hai zamiir
ek saada saa varaq naama-e-aamaal hai sab
kuchh nahii.n likkhaa ba-juz is ke pise jaa.o yuu.nhii
kuchh nahii.n likhaa bas ik itnaa ki insaa.n kaa nasiib
giilii guu.ndhii hu.ii miTTii kaa hai ik toda saa
din me.n sau shakle.n banaa kartii hai.n is miTTii se
kuchh nahii.n likhaa bas ik itnaa ki chyuu.nTii dil hai
jauq-dar-jauq jo insaan nazar aate hai.n
daana le kar kisii diivaar pe cha.Dhnaa girnaa
aur phir cha.Dhnaa cha.Dhe jaanaa yuu.nhii shaam o sahar
kuchh nahii.n likkhaa bas itnaa ki pise jaa.o yuu.nhii
aur andoh ta.assuf KHushii aalaam nashaat
KHud ko sau naamo.n se bahlaate raho chalte raho
saa.ns ruk jaa.e jahaa.n samjho vahii.n manzil hai
aur is dau.D se thak jaa.o to cigarette pii lo

Akhtarul Iman
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

aDe kabutar uDe KHayal

ik bosiida masjid me.n
diivaaro.n mehraabo.n par
aur kabhii chhat kii jaanib
merii aa.nkhe.n ghuum rahii hai.n
jaane kis ko Dhuu.nD rahii hai.n
merii aa.nkhe.n ruk jaatii hai.n
lohe ke us KHaalii hook par
jo KHaalii KHaalii nazro.n se
har ik chehra dekh rahaa hai
ik aise insaan kaa shaayad
jo ik pa.nkhaa le aa.egaa
laa.egaa aur duur karegaa
masjid kii be-saamaanii ko
KHaalii hook kii viiraanii par
mai.n ne jab us hook ko dekhaa
merii nannhii phuul sii beTii
merii aa.nkho.n me.n dau.D aa.ii
bholii maa.n ne us kii
apnii pyaarii raaj-dulaarii beTii ke
dono.n kaano.n ko
apne haatho.n se chhed diyaa hai
phuulo.n jaise kaano.n me.n phir
niim ke tinke Daal diye hai.n
ummiido.n aaso.n ke sahaare
dil hii dil me.n soch rahii hai
jab ham ko allaah hamaaraa
tho.Daa saa bhii paisa degaa
beTii ke kaano.n me.n us din
baaliyaa.n ho.ngii bunde ho.nge
mai.n ne anthak mehnat kar ke
pa.nkhaa ek KHariid liyaa hai
masjid ke is KHaalii hook ko
mai.n ne pa.nkhaa sau.np diyaa hai
hook me.n pa.nkhaa dekh ke mujh ko
hotaa hai mahsuus ki jaise
merii beTii baaliyaa.n pahne
ghar kii chhat par ghuum rahii hai

Munawwar Rana
Nazm

aap-biti

1
yuu.n to marne ke liye zahr sabhii piite hai.n
zindagii tere liye zahr piyaa hai mai.n ne
sham.a jaltii hai par ik raat me.n jal jaatii hai
yaa.n to ek umr isii tarah se jalte guzrii
kaun sii KHaak hai ye jaane kahaa.n kaa hai KHamiir
ik na.e saa.nche me.n har roz hii Dhalte guzrii
kis tarah mai.n ne guzaarii hai.n ye Gam kii gha.Diyaa.n
kaash mai.n aisii kahaanii ko sunaa bhii saktaa
ta.ana-zan hai.n jo mire haal pe arbaab-e-nashaat
un ko ik baar mai.n ai kaash rulaa bhii saktaa
mai.n ki shaa.er huu.n mai.n paiGaambar-e-fitrat huu.n
merii taKH.iil me.n hai ek jahaan-e-bedaar
dastaras me.n mirii nazzaara-e-gul-haa-e-chaman
mere idraak me.n hai.n kun-fayakuu.n ke asraar
mire ash.aar me.n hai qalb-e-hazii.n kii dha.Dkan
merii nazmo.n me.n mirii ruuh kii dil-doz pukaar
phir bhii rah rah ke khaTaktii hai mire dil me.n ye baat
ki mire paas to alfaaz kaa ik parda hai
sirf alfaaz se tasviir nahii.n ban saktii
sirf ehsaas me.n haalaat kii tafsiir kahaa.n
sirf fariyaad me.n zaKHmo.n kii vo zanjiir kahaa.n
aisii zanjiir ki ek ek ka.Dii me.n jis kii
kitnii kho.ii hu.ii KHushiyo.n ke manaazir pinhaa.n
kitnii bhuulii hu.ii yaado.n ke pur-asraar kha.nDar
kitne uj.De hu.e luuTe hu.e sunsaan nagar
kitne aate hu.e jaate hu.e chehro.n ke nuquush
kitne bante hu.e miTte hu.e lamhaat kaa raaz
kitnii uljhii hu.ii raaho.n ke nasheb aur faraaz
2
kyaa kahuu.n mujh ko kahaa.n laa.ii mirii umr-e-ravaa.n
aa.nkh kholii to har ik samt a.ndhero.n kaa samaa.n
re.ngtii uu.nghtii maGmuum sii ik raahguzaar
gard-e-aalaam me.n khoyaa hu.aa manzil kaa nishaa.n
gesuu-e-shaam se lipTii hu.ii Gam kii zanjiir
siina-e-shab se nikaltii hu.ii fariyaad-o-fuGaa.n
ThanDii ThanDii sii havaa.o.n me.n vo Gurbat kii thakan
dar-o-diivaar pe taariik se saa.e larzaa.n
kitnii kho.ii hu.ii biimaar o fasurda aa.nkhe.n
TimTimaate se diye chaar taraf nauha-kunaa.n
muzmahil chehre masaa.ib kii giraa.n-baarii se
dil-e-majruuh se uThtaa hu.aa Gamnaak dhu.aa.n
yahii taariikii-e-Gam to miraa gahvaara hai
mai.n isii kokh me.n thaa nuur-e-sahar ke maanind
har taraf sog me.n Duubaa hu.aa meraa maahaul
meraa uj.Daa hu.aa ghar 'miir' ke ghar ke maanind
ik taraf azmat-e-aslaaf kaa maathe pe Guruur
aur ik samt vo iflaas ke phaile hu.e jaal
bhuuk kii aag me.n jhulse hu.e saare armaa.n
qarz ke bojh se jiine kii uma.nge.n paamaal
vaqt kii dhund me.n lipTe hu.e kuchh pyaar ke giit
mehr o iKHlaas zamaane kii jafaa.o.n se niDhaal
bhaa.ii bhaa.ii kii mohabbat me.n niraale se shukuuk
nigah-e-Gair me.n jis tarah anokhe se savaal
''ek ha.ngaame pe mauquuf thii ghar kii raunaq''
muflisii saath liye aa.ii thii ik ja.ng-o-jidaal
faaqa-mastii me.n bikharte hu.e saare rishte
ta.ng-dastii ke sabab saarii fazaa.e.n behaal
ik jahannam kii tarah thaa ye miraa gahvaara
is jahannam me.n mere baap ne dam to.D diyaa
TuuT kar rah ga.e bachpan ke suhaane sapne
mujh se mu.nh pher liyaa jaise mirii shoKHii ne
mere ha.nste hu.e chehre pe udaasii chhaa.ii
jaise ik raat bhayaanak mire sar par aa.ii
raahe.n dushvaar magar raah-numaa ko.ii na thaa
saamne vus.at-e-aflaak KHudaa ko.ii na thaa
mere ajdaad kii miiraas ye viiraan saa ghar
jis ko ghere hu.e har samt tabaahii ke bha.nvar
jis kii chhat girtii hu.ii TuuTaa hu.aa darvaaza
har taraf jaise bikhartaa hu.aa ik shiiraaza
na kahii.n atlas-o-kamKHvaab na diibaa-o-hariir
har taraf mu.nh ko basore hu.e jaise taqdiir
mujh ko us ghar se mohabbat to bhalaa kyaa hotii
yaa.n agar dil me.n na jiine kii tamannaa hotii
ye samajh kar ki yahii hai mirii qismat kaa likhaa
us kii diivaar ke saa.e me.n lipTaa rahtaa
lekin is dil kii KHalish ne mujhe bedaar kiyaa
mujh ko haalaat se aamaada-e-paikaar kiyaa
be-kasii raKHt-e-safar ban kar mire saath chalii
yaad aa.ii thii mujhe gaa.nv kii ek ek galii
lahlahaatii hu.ii fasle.n vo mire aam ke baaG
vo makaano.n me.n larazte hu.e dhu.ndle se charaaG
duur tak paanii me.n phaile hu.e vo dhaan ke khet
aur taalaab-kinaare vo chamaktii hu.ii ret
mere ham-umr vo saathii vo mire ham-jolii
mere school ke vo dost mirii vo Tolii
ek baar un kii nigaaho.n ne mujhe dekhaa thaa
jaise ik baar mire dil ne bhii kuchh sochaa thaa
''mai.n ne jab vaadi-e-Gurbat me.n qadam rakkhaa thaa
duur tak yaad-e-vatan aa.ii thii samjhaane ko''

Khalilur Rahman Azmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now