Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "khajuuro.n"

Nazm MATCHES FOR "khajuuro.n"

Nazm

jahan rehana rahti thi

khajuuro.n ke tale vo jo kha.nDar se jhilmilaate hai.n
ye sab 'rehaana' ke ma.asuum afsaane sunaate hai.n
vo in kha.nDaro.n me.n ik din suurat-e-afsaana rahtii thii
yahii vaadii hai vo hamdam jahaa.n 'rehaana' rahtii thii

Akhtar Shirani
Nazm

safir-e-laila-1

safiir-e-lailaa yahii kha.nDar hai.n jahaa.n se aaGaaz-e-daastaa.n hai
zaraa saa baiTho to mai.n sunaa.uu.n
fasiil-e-qarya ke surKH patthar aur un pe azhdar-nishaan burje.n gavaah qarya kii azmato.n kii
chahaar jaanib naKHiil-e-tuubaa aur us me.n bahte faraavaa.n chashme
buland pe.Do.n ke ThanDe saa.e the shaaKH-e-zaituu.n isii jagah thii
yahii sutuu.n the jo dekhte ho pa.De hai.n murda giddho.n ke maanind
uThaa.e rakhte the in ke shaane aziim qasro.n kii sa.ngii.n saqfe.n
yahii vo dar hai.n safiir-e-lailaa ki jin ke taKHte u.Daa liye hai.n dino.n kii aavaara sarsaro.n ne
yahii.n se guzrii thii.n surKH uu.nTo.n kii vo qataare.n
ki un kii pushte.n sanobaro.n ke safed paalaan le ke chaltii.n
uThaa.e phirtii.n javaan pariyo.n kii mahmalo.n ko
ye sehan-e-qarya hai un jag.ho.n par ghanii khajuuro.n kii sabz shaaKHe.n
falak se taaza phalo.n ke KHoshe churaa ke bhartii thii.n pahlu.o.n me.n
safed paanii ke sau ku.e.n yuu.n bhare hu.e the
ki chau.Dii mashko.n ko haath bhar kii hii rassiyaa.n thii.n
mazaaf-e-qarya me.n sabza-gaahe.n aur in me.n chartii thii.n farba bhe.De.n
shimaal-e-qarya me.n niil-gaa.e.n manaar-e-masjid se dekhte the
pare hazaaro.n kabuutaro.n ke fasiil-e-qarya se gumbado.n tak
paro.n ko zoro.n se pha.D.pha.Daate the aur sehno.n me.n dau.Dte the
yahii.n thaa sab kuchh safiir-e-lailaa
isii jagah par jahaa.n babuulo.n ke KHaar phirte hai.n chuuhiyo.n kii savaariyo.n par
jahaa.n parindo.n ko haul aate hai.n raakh u.Dtii hai haDDiyo.n kii
yahii vo vahshat-saraa hai jis me.n dilo.n kii aa.nkhe.n laraz rahii hai.n
safiir-e-lailaa tum aaj aa.e ho to bataa.uu.n
tire musaafir yahaa.n se nikle ufuq ke parbat se us taraf ko
vo aise nikle ki phir na aa.e
hazaar kohna du.aa.e.n garche buzurg ho.nTo.n se uTh ke baam-e-falak pe pahu.nchii.n
magar na aa.e
aur ab yahaa.n par na ko.ii mausam na baadalo.n ke shafiiq saa.e
na suurajo.n kii safed dhuupe.n
faqat sazaa.e.n hai.n uu.ngh-bhartii kariih chehro.n kii deviyaa.n hai.n
safiir-e-lailaa
yahaa.n jo din hai.n vo din nahii.n hai.n
yahaa.n kii raate.n hai.n be-sitaara
sahar me.n ko.ii namii nahii.n hai

Ali Akbar Natiq
Nazm

aansuon ke ratjagon se

saare manzar ek jaise
saarii duniyaa ek sii
naashpaatii ke daraKHto.n se
khajuuro.n kii ghanii shaaKHo.n talak
duniyaa achaanak ek jaisii ho ga.ii hai
misr ke ahraam kii mahzuu.n fazaa.e.n
dam-ba-KHud hai.n kuufa o baGdaad ke baazaar me.n
kaazimain o mash.had-e-e.araaq se nauhe nikal kar
sarhad-e-labnaan tak pahu.nche hu.e hai.n
shahr-e-dillii ke a.ndhere
zulmat-e-lahore se milne lage hai.n
shor kaabul kaa sunaa.ii detaa hai
bartaania kii mahfilo.n me.n
KHvaahish-e-newyark zinda hotii hai
Dhaake kii puraanii dilrubaa galiyo.n me.n
goyaa saarii duniyaa ek jaisii ho ga.ii hai
saare manzar ek se
uj.Dii hu.ii aa.nkho.n me.n saare KHvaab
yaado.n kaa fusuu.n ummiid ke saare fasurda aaftaab
ek ho sakte hai.n
aa.o in se mil-milaa kar ik jahaan-e-taaza-tar paidaa kare.n
in lahuu kii buu.ndo.n se
raste sajaa.e.n
aa.nsu.o.n ke ratjago.n se aarzuu-e-chashm-e-tar paidaa kare.n

Ain Tabish
Nazm

wo dil hairan nahin hote

havaa aur dhuup kaa qarno.n puraanaa saath hai
aur zindagii mauj-e-ravaa.n hai
vo kisii pal ruk nahii.n saktii
na-jaane kitne barso.n kii ye pur-asraar tanhaa.ii
mire dil me.n
khajuuro.n ke daraKHto.n kii tarah
yuu.n iistaada hai
ki uj.De qartaba ke saare manzar
merii aa.nkho.n me.n larazte hai.n
na-jaane kitne barso.n kii udaasii ke
a.ndhere gumbado.n me.n guu.njte
jaa.n-soz andeshe
musalsal mujh pe yuurish karte hai.n
aur undulus ke kuucha-o-baazaar aur baaGo.n ko
faulaadii sumo.n se rau.ndte
gho.Do.n kii Taapo.n se
miraa siina dhamaktaa hai
mire ehsaas kii ye ranjishe.n
aur ruuh ke ye dukh kisii ik saa.at-e-saffaak ne
mujh ko nahii.n sau.npe
ki ye to asal me.n vo jaal hai
taariiKH kii mak.Dii jo sadiyo.n se
mire andar kahii.n
chup-chaap buntii hai
havaa aur dhuup merii zindagii ke manzaro.n me.n
be-sabaatii kii alaamat hai.n
zamii.n kii gardisho.n se tez hai
haalaat kii gardish
isii ne mere sar me.n KHaak Daalii hai
yahii to merii aa.nkho.n me.n
pighaltii barf kii diivaar chuntii hai
ye kis kii baat suntii hai
mirii saa.nso.n me.n
Garnaata kii dhuul
u.Dtii hai
aur KHaamosh dehlii kii
havaa.e.n sarsaraatii hai.n
huu.n
havaa kaa ruKH badalne par
vo dil hairaa.n nahii.n hote

Mubeen Mirza
Nazm

jangal: ek hasht pahlu taswir

vo khajuuro.n ke daraKHto.n kii qataar-andar-qataar
ek-dam siidhii kha.Dii samba.ndh rekhaa.e.n zamiin-o-aasmaa.n ke darmiyaan
aasmaanii shaamiyaana in sutuuno.n ke siro.n ko chho.D kar
be-sutuu.n gumbad-saa KHud laTkaa hu.aa

Ameeq Hanafi
Nazm

tumne KHud-kushi kyon ki

mai.n KHud-kushii na kartaa to mar jaataa
mai.n ne bachcho.n kii aa.nkho.n me.n
KHvaahishe.n bilaktii dekhii.n to
aa.ngan me.n
sebo.n ke bonsai daraKHt lagaa diye
jab bachche ba.De hu.e
aur unho.n ne seb to.Dnaa chaahe
sebo.n ke daraKHt khajuuro.n ke daraKHt ban ga.e
bachcho.n ke haath
du.aa.o.n kii tarah uThe rahe ga.e
mai.n ne khajuur ke tane ko baa.nho.n me.n le liyaa
aur zaKHmii pairo.n se dau.Dtaa
uupar cha.Dh gayaa
to vahaa.n seb nahii.n the
mai.n ne bachcho.n kii phailii hu.ii jholiyaa.n dekhii.n
aur un me.n chhalaa.ng lagaa dii

Qazi Ejaz Mehwar
Nazm

rishta apne mazi ka

saahil-e-sindh par
ek duKHaanii kashtii ravaa.n
jis me.n baiThe hu.e kuchh hasii.n naujavaa.n
ik hasii.n saa kinaaraa jo aayaa nazar
ruk ga.e log sab
aur hairat se har chiiz dekhaa kiye
sar uThaa.e khajuuro.n ke kuchh pe.D the
sarsaraatii havaa
pal rahii thii jo buu-e-mohabbat kii aaGosh me.n

Salma Javed
Nazm

bashaarat pani ki

puraanii baat hai
lekin ye anhonii sii lagtii hai
vo sab pyaase the
miilo.n kii masaafat se badan behaal thaa un kaa
jahaa.n bhii jaate vo dariyaa.o.n ko suukhaa hu.aa paate
ajab banjar zamiino.n kaa safar darpesh thaa un ko
kahii.n paanii na miltaa thaa
khajuuro.n ke daraKHto.n se unho.n ne uu.nT baa.ndhe
aur thak kar so ga.e saare
unho.n ne KHvaab me.n dekhaa
khajuuro.n ke daraKHto.n kii qataare.n KHatm hotii hai.n jahaa.n
paanii chamaktaa hai
vo sab jaage
har ik jaanib tahayyur se nazar Daalii
vo sab uTThe
mahaare.n thaam kar haatho.n me.n uu.nTo.n kii
khujuuro.n ke daraKHto.n kii qataare.n KHatm hone me.n na aatii thii.n
zabaane.n suukh kar kaa.nTaa hu.ii thii.n
aur uu.nTo.n ke qadam aage na uThte the
vo sab chiiKHe
bashaarat dene vaale ko sadaa dii
aur zamiin ko pair se rag.Daa
har ik jaanib tahayyur se nazar Daalii
khujuuro.n ke daraKHto.n kii qataare.n KHatm thii.n
paanii chamaktaa thaa!!

Zubair Rizvi
Nazm

nau-jawan KHatun se

hijaab-e-fitna-parvar ab uThaa letii to achchhaa thaa
KHud apne husn ko pardaa banaa letii to achchhaa thaa
tirii niichii nazar KHud terii ismat kii muhaafiz hai
tuu is nashtar kii tezii aazmaa letii to achchhaa thaa
tirii chiin-e-jabii.n KHud ik sazaa qaanuun-e-fitrat me.n
isii shamshiir se kaar-e-sazaa letii to achchhaa thaa
ye teraa zard ruKH ye KHushk lab ye vahm ye vahshat
tuu apne sar se ye baadal haTaa letii to achchhaa thaa
dil-e-majruuh ko majruuh-tar karne se kyaa haasil
tuu aa.nsuu po.nchh kar ab muskuraa letii to achchhaa thaa
tire zer-e-nagii.n ghar ho mahal ho qasr ho kuchh ho
mai.n ye kahtaa huu.n tuu arz-o-samaa letii to achchhaa thaa
agar KHalvat me.n tuu ne sar uThaayaa bhii to kyaa haasil
bharii mahfil me.n aa kar sar jhukaa letii to achchhaa thaa
tire maathe kaa Tiikaa mard kii qismat kaa taaraa hai
agar tuu saaz-e-bedaarii uThaa letii to achchhaa thaa
ayaa.n hai.n dushmano.n ke KHanjaro.n par KHuun ke dhabbe
unhe.n tuu ra.ng-e-aariz se milaa letii to achchhaa thaa
sanaane.n khii.nch lii hai.n sar-phire baaGii javaano.n ne
tuu saamaan-e-jaraahat ab uThaa letii to achchhaa thaa
tire maathe pe ye aa.nchal bahut hii KHuub hai lekin
tuu is aa.nchal se ik parcham banaa letii to achchhaa thaa

Asrarul Haq Majaz
Nazm

nai tahzib

na KHaatuuno.n me.n rah jaa.egii parde kii ye paabandii
na ghuu.nghaT is tarah se haajib-e-ruu-e-sanam ho.nge

Akbar Allahabadi
Nazm

hinDola

dayaar-e-hind thaa gahvaara yaad hai hamdam
bahut zamaana hu.aa kis ke kis ke bachpan kaa
isii zamiin pe khelaa hai 'raam' kaa bachpan
isii zamiin pe un nanhe nanhe haatho.n ne
kisii samay me.n dhanush-baan ko sambhaalaa thaa
isii dayaar ne dekhii hai 'krishn' kii liilaa
yahii.n gharo.ndo.n me.n siitaa sulochanaa raadhaa
kisii zamaane me.n gu.Diyo.n se kheltii ho.ngii
yahii zamii.n yahii dariyaa pahaa.D jangal baaG
yahii havaa.e.n yahii sub.h-o-shaam suuraj chaa.nd
yahii ghaTaa.e.n yahii barq-o-ra.ad o qaus-e-quzah
yahii.n ke giit rivaayaat mausamo.n ke juluus
hu.aa zamaana ki 'siddhaarth' ke the gahvaare
inhii nazaaro.n me.n bachpan kaTaa thaa 'vikram' kaa
sunaa hai 'bhartarharii' bhii inhii.n se khelaa thaa
'bharat' agastya' 'kapil' 'vyaas' 'pashii' 'kautilya'
'janak' vashishth' 'manu' 'vaalmik' vishvaamitr
'kanaad' 'gautam' o ramanuj 'kumaaril-bhatt'
mohanjoDaaro ha.Dappaa ke aur ajantaa ke
banaane vaale yahii.n ballamo.n se khele the
isii hi.nDole me.n 'bhavabhut' o 'kaaliidaas' kabhii
humak humak ke jo tutlaa ke gungunaa.e the
sarasvatii ne zabaano.n ko un kii chuumaa thaa
yahii.n ke chaa.nd va suuraj khilaune the un ke
inhii.n fazaa.o.n me.n bachpan palaa thaa 'KHusrav' kaa
isii zamii.n se uThe 'tansen' aur 'akbar'
'rahiim' 'nanak' o 'chaitanya' aur 'chishti' ne
inhii.n fazaa.o.n me.n bachpan ke din guzaare the
isii zamii.n pe kabhii shazaada-e-'KHurram'
zaraa sii dil-shikanii par jo ro diyaa hogaa
bhar aayaa thaa dil-e-naazuk to kyaa ajab is me.n
in aa.nsu.o.n me.n jhalak taaj kii bhii dekhii ho
'ahalyabaa.i' 'daman' 'padmini' o 'raziya' ne
yahii.n ke pe.Do.n kii shaaKHo.n me.n Daale the jhuule
isii fazaa me.n ba.Dhaa.ii thii pe.ng bachpan kii
inhii nazaaro.n me.n saavan ke giit gaa.e the
isii zamiin pe ghuTno.n ke bal chale ho.nge
'malik-mohammad' o 'raskhan' aur 'tulsi-das'
inhii.n fazaa.o.n me.n guu.njii thii totlii bolii
'kabir-das' 'Tukaaraam' 'suur' o 'miiraa' kii
isii hi.nDole me.n 'viddypati' kaa ka.nTh khulaa
isii zamiin ke the laal 'miir' o 'Gaalib' bhii
Thumak Thumak ke chale the gharo.n ke aa.ngan me.n
'aniis' o 'haalii' o 'iqbaal' aur 'vaaris-shaah'
yahii.n kii KHaak se ubhre the 'premchand' o 'tagore'
yahii.n se uTThe the tahziib-e-hind ke me.amaar
isii zamiin ne dekhaa thaa baal-pan in kaa
yahii.n dikhaa.ii thii.n in sab ne baal-liilaa.e.n
yahii.n har ek ke bachpan ne tarbiyat paa.ii
yahii.n har ek ke jiivan kaa baalkaa.nD khulaa
yahii.n se uThte baguulo.n ke saath dau.De hai.n
yahii.n kii mast ghaTaa.o.n ke saath jhuume hai.n
yahii.n kii madh-bharii barsaat me.n nahaa.e hai.n
lipaT ke kiicha.D o paanii se bachpane un ke
isii zamiin se uTThe vo desh ke saava.nt
u.Daa diyaa thaa jinhe.n company ne topo.n se
isii zamiin se uThii hai.n an-ginat nasle.n
pale hai.n hind hi.nDole me.n an-ginat bachche
mujh aise kitne hii gumnaam bachche khele hai.n
isii zamii.n se isii me.n supurd-e-KHaak hu.e
zamiin-e-hind ab aaraam-gaah hai un kii
is arz-e-paak se uTThii.n bahut sii tahziibe.n
yahii.n tuluu hu.ii.n aur yahii.n Guruub hu.ii.n
isii zamiin se ubhre ka.ii uluum-o-funuun
faraaz-e-koh-e-himaala ye daur-e-ga.ng-o-jaman
aur in kii god me.n parvarda kaarvaano.n ne
yahii.n rumuuz-e-KHiraam-e-sukuu.n-numaa siikhe
nasiim-e-sub.h-e-tamaddun ne bhairvii.n chhe.Dii
yahii.n vatan ke taraano.n kii vo pave.n phuuTe.n
vo be-qaraar sukuu.n-zaa tarannum-e-saharii
vo kapkapaate hu.e soz-o-saaz ke sho.ale
inhii fazaa.o.n me.n a.ng.Daa.iyaa.n jo le ke uThe
lavo.n se jin ke charaaGaa.n hu.ii thii bazm-e-hayaat
jinho.n ne hind kii tahziib ko zamaana hu.aa
bahut se zaaviyo.n se aa.iina dikhaayaa thaa
isii zamii.n pe Dhalii hai mirii hayaat kii shaam
isii zamiin pe vo sub.h muskuraa.ii hai
tamaam sho.ala o shabnam mirii hayaat kii sub.h
sunaa.uu.n aaj kahaanii mai.n apne bachpan kii
dil-o-dimaaG kii kaliyaa.n abhii na chaTkii thii.n
hamesha kheltaa rahtaa thaa bhaa.ii bahno.n me.n
hamaare saath mohalle kii la.Dkiyaa.n la.Dke
machaa.e rakhte the baalak udham har ek gha.Dii
lahuu tara.ng uchhal-phaa.nd kaa ye aalam thaa
mohalla sar pe uThaa.e phire jidhar guzre
hamaare chahchahe aur shor guu.njte rahte
chahaar-samt mohalle ke goshe goshe me.n
fazaa me.n aaj bhii laa-raib guu.njte ho.nge
agarche duusre bachcho.n kii tarah thaa mai.n bhii
ba-zaahir auro.n ke bachpan saa thaa miraa bachpan
ye sab sahii mire bachpan kii shaKHsiyat bhii thii ek
vo shaKHsiyat ki bahut shoKH jis ke the KHad-o-KHaal
adaa adaa me.n ko.ii shaan-e-infiraadii thii
Garaz kuchh aur hii lachchhan the mere bachpan ke
mujhe thaa chhoTe ba.Do.n se bahut shadiid lagaav
har ek par mai.n chhi.Daktaa thaa apnii nannhii sii jaa.n
dil umDaa aataa thaa aisaa ki jii ye chaahtaa thaa
uThaa ke rakh luu.n kaleje me.n apnii duniyaa ko
mujhe hai yaad abhii tak ki khel-kuud me.n bhii
kuchh aise vaqfe pur-asraar aa hii jaate the
ki jin me.n sochne lagtaa thaa kuchh miraa bachpan
ka.ii ma.aanii-e-be-lafz chhuune lagte the
butuun-e-Gaib se mere shu.uur-e-asGar ko
har ek manzar-e-maanuus ghar kaa har gosha
kisii tarah kii ho ghar me.n sajii hu.ii har chiiz
mire mohalle kii galiyaa.n makaa.n dar-o-diivaar
chabuutre ku.e.n kuchh pe.D jhaa.Diyaa.n bele.n
vo pherii vaale ka.ii un ke bhaa.nt bhaa.nt ke bol
vo jaane buujhe manaazir vo aasmaa.n o zamii.n
badalte vaqt kaa aa.iina garmii-o-KHunkii
Guruub-e-mahr me.n ra.ngo.n kaa jaagtaa jaaduu
shafaq ke shiish-mahal me.n gudaaz-e-pinhaa.n se
javaahro.n kii chaTaane.n sii kuchh pighaltii hu.ii.n
shajar hajar kii vo kuchh sochtii hu.ii duniyaa
suhaanii raat kii maanuus ramaziyat kaa fusuu.n
alassabaah ufuq kii vo thartharaatii bhave.n
kisii kaa jhaa.nknaa aahista phuuTtii pau se
vo dopahar kaa samay darja-e-tapish kaa cha.Dhaav
thakii thakii sii fazaa me.n vo zindagii kaa utaar
hu.aa kii bansiyaa.n ba.nsvaa.Diyo.n me.n bajtii hu.ii.n
vo din ke ba.Dhte hu.e saa.e sah-pahar kaa sukuu.n
sukuut shaam kaa jab dono.n vaqt milte hai.n
Garaz jhalakte hu.e sarsarii manaazir par
mujhe gumaan paristaaniyat kaa hotaa thaa
har ek chiiz kii vo KHvaab-naak asliyyat
mire shu.uur kii chilman se jhaa.nktaa thaa ko.ii
liye rubuubiyat-e-kaa.enaat kaa ehsaas
har ek jalve me.n Gaib o shuhuud kaa vo milaap
har ik nazaara ik aa.iina-KHaana-e-hairat
har ek manzar-e-maanuus ek hairat-zaar
kahii.n rahuu.n kahii.n khelo.n kahii.n pa.Dhuu.n likhuu.n
mire shu.uur pe ma.nDlaate the manaazir-e-dahr
mai.n akasr un ke tasavvur me.n Duub jaataa thaa
vafuur-e-jazba se ho jaatii thii mizha pur-nam
mujhe yaqiin hai in unsurii manaazir se
ki aam bachcho.n se letaa thaa mai.n ziyaada asar
kisii samay mirii tiflii rahii na be-parvaa
na chhuu sakii mirii tiflii ko Gaflat-e-tiflii
ye khel-kuud ke lamho.n me.n hotaa thaa ehsaas
du.aa.e.n detaa ho jaise mujhe sukuut-e-davaam
ki jaise haath abad rakh de dosh-e-tiflii par
har ek lamha ke raKHno.n se jhaa.nktii sadiyaa.n
kahaaniyaa.n jo sunuu.n un me.n Duub jaataa thaa
ki aadmii ke liye aadmii kii jag-biitii
se ba.Dh ke kaun sii shai aur ho hii saktii hai
inhii fasaano.n me.n pinhaa.n the zindagii ke rumuuz
inhii fasaano.n me.n khulte the raaz-haa-e-hayaat
unhe.n fasaano.n me.n miltii thii.n ziist kii qadre.n
rumuuz-e-besh-bahaa TheTh aadmiyat ke
kahaaniyaa.n thii.n ki sad-dars-gaah-e-riqqat-e-qalb
har ik kahaanii me.n shaa.istagi-e-Gam kaa sabaq
vo unsur aa.nsu.o.n kaa daastaan-e-insaa.n me.n
vo nal-daman kii kathaa sarguzasht-e-savitrii
'shakuntlaa' kii kahaanii 'bharat' kii qurbaanii
vo marg-e-bhishm-pitaamah vo sej tiiro.n kii
vo paan.cho paa.nDav kii sovarg-yaatraa kii kathaa
vatan se ruKHsat-e-'siddhaarth' 'raam' kaa ban-baas
vafaa ke baa'd bhii 'siitaa' kii vo jalaa-vatanii
vo raato.n-raat 'sirii-krishn' ko uThaa.e hu.e
balaa kii qaid se 'basdev' kaa nikal jaanaa
vo a.ndhkaar vo baarish, ba.Dhii hu.ii jamunaa
Gam-e-aafriin kahaanii vo 'hiir' 'raa.njhaa' kii
shu.uur-e-hind ke bachpan kii yaadgaar-e-aziim
ki aise vaise taKHayyul kii saa.ns ukha.D jaa.e
ka.ii muhayyur-e-idraak dev-maalaaye.n
hitopdesh ke qisse kathaa sarat-saagar
karo.Do.n siino.n me.n vo guu.njtaa hu.aa aalhaa
mai.n puuchhtaa huu.n kisii aur malak vaalo.n se
kahaaniyo.n kii ye daulat ye be-bahaa daulat
fasaane dekh lo in ke nazar bhii aatii hai
mai.n puuchhtaa huu.n ki gahvaare aur qaumo.n ke
base hu.e hai.n kahii.n aisii daastaano.n se
kahaaniyaa.n jo mai.n suntaa thaa apne bachpan me.n
mire liye vo na thii.n mahz baa.is-e-tafriih
fasaano.n se mire bachpan ne sochnaa siikhaa
fasaano.n se mujhe sanjiidgii ke dars mile
fasaano.n me.n nazar aatii thii mujh ko ye duniyaa
Gam o KHushii me.n rachii pyaar me.n basaa.ii hu.ii
fasaano.n se mire dil ne ghulaavaTe.n paa.ii.n
yahii nahii.n ki mashaahiir hii ke afsaane
zaraa sii umr me.n karte ho.n mujh ko muta.assir
mohalle Tole ke gumnaam aadamiyyo.n ke
kuchh aise sun.ne me.n aate the vaaqi.aat-e-hayaat
jo.n yuu.n to hote the farsuuda aur ma.amuulii
magar the aa.iine iKHlaas aur sharaafat ke
ye chand aa.ii ga.ii baate.n aisii baate.n thii.n
ki jin kii oT chamaktaa thaa dard-e-insaanii
ye vaardaat nahii.n razmiyye hayaat ke the
Garaz ki ye hai.n mire bachpane kii tasviire.n
nadiim aur bhii kuchh KHatt-o-KHaal hai.n un ke
ye merii maa.n kaa hai kahnaa ki jab mai.n bachcha thaa
mai.n aise aadmii kii god me.n na jaataa thaa
jo bad-qimaar ho aibii ho yaa ho bad-suurat
mujhe bhii yaad hai nau das baras hii kaa mai.n thaa
to mujh pe kartaa thaa jaaduu saa husn-e-insaanii
kuchh aisaa hotaa thaa mahsuus jab mai.n dekhtaa thaa
shagufta rang tar-o-taaza ruup vaalo.n kaa
ki un kii aa.nch mirii haDDiyaa.n galaa degii
ik aazmaa.ish-e-jaa.n thii ki thaa shu.uur-e-jamaal
aur us kii nashtariyyat us kii ustuKHaa.n-sozii
Gam o nashaat lagaavaT mohabbat o nafrat
ik intishaar-e-sakuu.n iztiraab pyaar itaab
vo be-panaah zakii-ul-hisii vo hilm o Guruur
kabhii kabhii vo bhare ghar me.n hiss-e-tanhaa.ii
vo vahshate.n mirii maahaul-e-KHush-gavaar me.n bhii
mirii sarisht me.n ziddain ke ka.ii jo.De
shuruu.a hii se the maujuud aab-o-taab ke saath
mire mizaaj me.n pinhaa.n thii ek jadaliyyat
rago.n me.n chhuuTte rahte the be-shumaar anaar
nadiim ye hai.n mire baal-pan ke kuchh aasaar
vafuur o shiddat-e-jazbaat kaa ye aalam thaa
ki kau.nde jast kare.n dil ke aabgiine me.n
vo bachpanaa jise bardaasht apnii mushkil ho
vo bachpanaa jo KHud apnii hii tevriyaa.n sii cha.Dhaa.e
nadiim zikr-e-javaanii se kaa.np jaataa huu.n
javaanii aa.ii dabe paa.nv aur yuu.n aa.ii
ki us ke aate hii big.Daa banaa-banaayaa khel
vo KHvaahishaat ke jazbaat ke umaDte hu.e
vo ho.nkte hu.e be-naam aag ke tuufaa.n
vo phuuTtaa hu.aa jvaalaa-mukhii javaanii kaa
rago.n me.n uThtii hu.ii aa.ndhiyo.n ke vo jhaTke
ki jo tavaazun-e-hastii jhi.njho.D ke rakh de.n
vo zalzale ki pahaa.Do.n ke pair ukha.D jaa.e.n
buluuGiyat kii vo Tiise.n vo karb-e-nashv-o-numaa
aur aise me.n mujhe byaahaa gayaa bhalaa kis se
jo ho na saktii thii hargiz mirii shariik-e-hayaat
ham ek duusre ke vaaste bane hii na the
siyaah ho ga.ii duniyaa mirii nigaaho.n me.n
vo jis ko kahte hai.n shaadii-e-KHaanaa-aabaadii
mire liye vo banii bevgii javaanii kii
luTaa suhaag mirii zindagii kaa maa.nDo me.n
nadiim khaa ga.ii mujh ko nazar javaanii kii
balaa-e-jaan mujhe ho gayaa shu.uur-e-jamaal
talaash-e-shola-e-ulfat se ye hu.aa haasil
ki nafrato.n kaa agan-ku.nD ban ga.ii hastii
vo halq o siina o rag rag me.n be-panaah chubhaa
nadiim jaise nigal lii ho mai.n ne naag-phanii
z ishq-zaadam o ishqam kamusht zaar-o-dareG
KHabar na burd ba-rustam kase ki sohraabam
na puuchh aalam-e-kaam-o-dahan nadiim mire
samar hayaat kaa jab raakh bin gayaa mu.nh me.n
mai.n chaltii-phirtii chitaa ban gayaa javaanii kii
mai.n kaa.ndhaa detaa rahaa apne jiite murde ko
ye sochtaa thaa ki ab kyaa karuu.n kahaa.n jaa.uu.n
bahut se aur masaa.ib bhii mujh pe TuuT pa.De
mai.n Dhuu.nDhne lagaa har samt sachchii jhuuTii panaah
talaash-e-husn me.n sher-o-adab me.n dostii me.n
ru.ndhii sadaa se mohabbat kii bhiik maa.ngii hai
na.e sire se samajhnaa pa.Daa hai duniyaa ko
ba.De jatan se sambhaalaa hai KHud ko mai.n ne nadiim
mujhe sambhalne me.n to chaaliis saal guzre hai.n
merii hayaat to vish-paan kii kathaa hai nadiim
mai.n zahr pii ke zamaane ko de sakaa amrit
na puuchh mai.n ne jo zahraaba-e-hayaat piyaa
magar huu.n dil se mai.n is ke liye sipaas-guzaar
larazte haatho.n se daaman KHuluus kaa na chhaTaa
bachaa ke rakkhii thii mai.n ne amaanat-e-tiflii
ise na chhiin sakii mujh se dast-burd-e-shabaab
ba-qaul shaa.er-e-mulk-e-fara.ng har bachcha
KHud apne ahd-e-javaanii kaa baap hotaa hai
ye kam nahii.n hai ki tiflii-e-rafta chho.D ga.ii
dil-e-hazii.n me.n ka.ii chhoTe chhoTe naqsh-e-qadam
mirii anaa kii rago.n me.n pa.De hu.e hai.n abhii
na jaane kitne bahut narm u.ngliyo.n ke nishaa.n
hanuuz vaqt ke be-dard haath kar na sake
hayaat-e-rafta kii zinda nishaaniyo.n ko fanaa
zamaana chhiin sakegaa na merii fitrat se
mirii safaa mire tahtush-shu.uur kii ismat
taKHaiyyulaat kii doshiizgii kaa radd-e-amal
javaan ho ke bhii be-laus tifl-vash jazbaat
syaanaa hone pe bhii ye jibillate.n merii
ye sarKHushii o Gam be-riyaa ye qalb-gudaaz
baGair bair ke an-ban Garaz se paak tapaak
Garaz se paak ye aa.nsuu Garaz se paak ha.nsii
ye dasht-e-dahr me.n hamdardiyo.n kaa sar-chashma
qubuuliyat kaa ye jazba ye kaa.enaat o hayaat
is arz-e-paak par iimaan ye ham-aaha.ngii
har aadmii se har ik KHvaab o ziist se ye lagaav
ye maa.n kii god kaa ehsaas sab manaazir me.n
qariib o duur zamii.n me.n ye buu-e-vataniyyat
nizaam-e-shams-o-qamar me.n payaam-e-hifz-e-hayaat
ba-chashm-e-shaam-o-sahar maamtaa kii shabnam sii
ye saaz o dil me.n mire naGma-e-analkaunain
har iztiraab me.n ruuh-e-sukuun-e-be-paayaa.n
zamaana-e-guzaraa.n me.n davaam kaa sargam
ye bazm-e-jashn-e-hayaat-o-mamaat sajtii hu.ii
kisii kii yaad kii shahnaa.iyaa.n sii bajtii hu.ii
ye ramaziiyat ke anaasir shu.uur-e-puKHta me.n
falak pe vajd me.n laatii hai jo farishto.n ko
vo shaa.erii bhii buluuG-e-mizaaj-e-tiflii hai
ye nashtariyyat-e-hastii ye is kii sheriyat
ye pattii pattii pe gulzaar-e-zindagii ke kisii
latiif nuur kii parchhaa.iyaa.n sii pa.Dtii hu.ii
baham ye hairat o maanuusiyat kii sargoshii
bashar kii zaat ki mahr-e-uluuhiyat ba-jabii.n
abad ke dil me.n ja.De.n maartaa hu.aa sabza
Gam-e-jahaa.n mujhe aa.nkhe.n dikhaa nahii.n saktaa
ki aa.nkhe.n dekhe hu.e huu.n mai.n ne apne bachpan kii
mire lahuu me.n abhii tak sunaa.ii detii hai.n
sukuut-e-huzn me.n bhii ghu.nghru.o.n kii jhankaare.n
ye aur baat ki mai.n is pe kaan de na sakuu.n
isii vadii.at-e-tiflii kaa ab sahaaraa hai
yahii hai.n marham-e-kaafuur dil ke zaKHmo.n par
unhii ko rakhnaa hai mahfuuz taa-dam-e-aaKHir
zamiin-e-hind hai gahvaara aaj bhii hamdam
agar hisaab kare.n das karo.D bachcho.n kaa
ye bachche hind kii sab se ba.Dii amaanat hai.n
har ek bachche me.n hai.n sad-jahaan-e-imkaanaat
magar vatan kaa hal-o-aqd jin ke haath me.n hai
nizaam-e-zindagii-e-hind jin ke bas me.n hai
ravayya dekh ke un kaa ye kahnaa pa.Dtaa hai
kise pa.Dii hai ki samjhe vo is amaanat ko
kise pa.Dii hai ki bachcho.n kii zindagii ko bachaa.e
KHaraab hone se Talne se suukh jaane se
bachaa.e kaun in aazurda honhaaro.n ko
vo zindagii jise ye de rahe hai.n bhaarat ko
karo.Do.n bachcho.n ke miTne kaa ik alamiyya hai
churaa.e jaate hai.n bachche abhii gharo.n se yahaa.n
ki jism to.D diye jaa.e.n un ke taaki mile
churaane vaalo.n ko KHairaat maagh-mele kii
jo is azaab se bach jaa.e.n to gale pa.D jaa.e.n
vo la.ante.n ki hamaare karo.Do.n bachcho.n kii
nadiim KHair se miTTii KHaraab ho jaa.e
vo muflisii ki KHushii chhiin le vo be-bargii
udaasiyo.n se bharii zindagii kii be-ra.ngii
vo yaasiyaat na jis ko chhu.e shu.aa-e-umiid
vo aa.nkhe.n dekhtii hai.n har taraf jo be-nuurii
vo TukTukii ki jo pathraa ke rah ga.ii ho nadiim
vo be-dilii kii ha.nsii chhiin le jo ho.nTo.n se
vo dukh ki jis se sitaaro.n kii aa.nkh bhar aa.e
vo gandagii vo kasaafat maraz-zada paikar
vo bachche chhin ga.e ho.n jin se bachpane un ke
hamii.n ne gho.nT diyaa jis ke bachpane kaa galaa
jo khaate-piite gharo.n ke hai.n bachche un ko bhii kyaa
samaaj phuulne-phalne ke de sakaa saadhan
vo saa.ns lete hai.n tahziib-kush fazaa.o.n me.n
ham un ko dete hai.n be-jaan aur Galat ta.aliim
milegaa ilm-e-jihaalat-numaa se kyaa un ko
nikal ke madraso.n aur universitiyyo.n se
ye bad-nasiib na ghar ke na ghaaT ke ho.nge
mai.n puuchhtaa huu.n ye ta.aliim hai ki makkaarii
karo.Do.n zindagiyo.n se ye be-panaah daGaa
nisaab aisaa ki mehnat kare.n agar is par
bajaa.e ilm jahaalat kaa iktisaab kare.n
ye ulTaa dars-e-adab ye sa.Dii hu.ii ta.aliim
dimaaG kii ho Gizaa yaa Gizaa-e-jismaanii
har ik tarah kii Gizaa me.n yahaa.n milaavaT hai
vo jis ko bachcho.n kii ta.aliim kah ke dete hai.n
vo dars ulTii chhurii hai gale pe bachpan ke
zamiin-e-hind hi.nDolaa nahii.n hai bachcho.n kaa
karo.Do.n bachcho.n kaa ye des ab janaaza hai
ham inqalaab ke KHatro.n se KHuub vaaqif hai.n
kuchh aur roz yahii rah ga.e jo lail-o-nahaar
to mol lenaa pa.Degaa hame.n ye KHatra bhii
ki bachche qaum kii sab se ba.Dii amaanat hai.n

Firaq Gorakhpuri
Nazm

fana

duniyaa me.n ko.ii shaad ko.ii dard-naak hai
yaa KHush hai yaa alam ke sabab siina-chaak hai
har ek dam se jaan kaa har-dam tapaak hai
naapaak tan paliid najis yaa ki paak hai
jo KHaak se banaa hai vo aaKHir ko KHaak hai
hai aadmii kii zaat kaa us jaa ba.Daa zuhuur
le arsh taa-ba-farsh chamaktaa hai jis kaa nuur
guzre hai un kii qabr pe jab vahsh aur tuyuur
ro ro yahii kahe hai har ik qabr ke huzuur
jo KHaak se banaa hai vo aaKHir ko KHaak hai
duniyaa se jab ki ambiyaa aur auliyaa uThe
ajsaam-e-paak un ke isii KHaak me.n rahe
ruuhe.n hai.n KHuub jaan me.n ruuho.n ke hai.n maze
par jism se to ab yahii saabit hu.aa mujhe
jo KHaak se banaa hai vo aaKHir ko KHaak hai.n
vo shaKHs the jo saat vilaayat ke baadshaah
hashmat me.n jin kii arsh se uu.nchii thii baargaah
marte hii un ke tan hu.e galiyo.n kii KHaak-e-raah
ab un ke haal kii bhii yahii baat hai gavaah
jo KHaak se banaa hai vo aaKHir ko KHaak hai
kis kis tarah ke ho ga.e mahbuub-e-kaj-kulaah
tan jin ke misl-e-phuul the aur mu.nh bhii rashk-e-maah
jaatii hai un kii qabr pe jis-dam mirii nigaah
rotaa huu.n jab to mai.n yahii kah kah ke dil me.n aah
jo KHaak se banaa hai vo aaKHir ko KHaak hai
vo gore gore tan ki jinho.n kii thii dil me.n jaa.e
hote the maile un ke ko.ii haath gar lagaa.e
so vaise tan ko KHaak banaa kar havaa u.Daa.e
ronaa mujhe to aataa hai ab kyaa kahuu.n mai.n haa.e
jo KHaak se banaa hai vo aaKHir ko KHaak hai
umdo.n ke tan ko taa.nbe ke sanduuq me.n dharaa
muflis kaa tan pa.Daa rahaa maaTii-upar pa.Daa
qaa.em yahaa.n ye aur na saabit vo vaa.n rahaa
dono.n ko KHaak khaa ga.ii yaaro kahuu.n me.n kyaa
jo KHaak se banaa hai vo aaKHir ko KHaak hai
gar ek ko hazaar ruupe kaa milaa kafan
aur ek yuu.n pa.Daa rahaa hai be-kas barhana-tan
kii.De mako.De khaa ga.e dono.n ke tan-badan
dekhaa jo ham ne aah to sach hai yahii suKHan
jo KHaak se banaa hai vo aaKHir ko KHaak hai
jitne jahaa.n me.n naach hai.n ka.ngnii se taa-gehuu.n
aur jitne meva-jaat hai.n tar KHushk guunaaguu.n
kap.De jahaa.n talak hai.n sapiida o siyah numuu.n
kim-KHvaab taash baadila kis kis kaa naam luu.n
jo KHaak se banaa hai vo aaKHir ko KHaak hai
jitne daraKHt dekho ho buuTe se taa-ba-jhaa.D
ba.D piipal aa.nb niib chhu.aaraa khajuur taa.D
sab KHaak ho.nge jab ki fanaa Daalegii ukhaa.D
kiyaa buuTe Dhe.Dh paat ke kyaa jhaa.D kyaa pahaa.D
jo KHaak se banaa hai vo aaKHir ko KHaak hai
jitnaa ye KHaak kaa hai tilismaat ban rahaa
phir KHaak us ko hotaa hai yaaro judaa judaa
tarkaarii saag paat zahr amrit aur davaa
zar siim kau.Dii laal zamurrad aur in savaa
jo KHaak se banaa hai vo aaKHir ko KHaak hai
ga.D.h coat top rahakla teG o kamaan-o-tiir
baaG-o-chaman mahall-o-makaanaat dil-paziir
honaa hai sab ko aah isii KHaak me.n KHamiir
merii zabaa.n pe ab to yahii baat hai 'naziir'
jo KHaak se banaa hai vo aaKHir ko KHaak hai

Nazeer Akbarabadi
Nazm

raqqasa-e-hayat se

phuulo.n pe raqs aur na bahaaro.n pe raqs kar
gulzaar-e-hast-e-buud me.n KHaaro.n pe raqs kar
ho kar jumuud-e-gulshan-e-jannat se be-niyaaz
dozaKH ke be-panaah sharaaro.n pe raqs kar
sham-e-sahar fusuun-e-tabassum, hayaat-e-gul
fitrat ke in ajiib nazaaro.n pe raqs kar
tanziim-e-kaa.enaat-e-junuu.n kii ha.nsii u.Daa
uj.De hu.e chaman kii bahaaro.n pe raqs kar
sahmii hu.ii sadaa-e-dil-e-naa-tavaa.n na sun
bahkii hu.ii nazar ke ishaaro.n par raqs kar
jo mar ke jii rahe the tujhe un se kyaa Garaz
tuu apne aashiqo.n ke mazaaro.n pe raqs kar
har har adaa ho ruuh kii gahraa.iyo.n me.n gum
yuu.n ra.ng-o-buu kii raah-guzaaro.n pe raqs kar
tuu apnii dhun me.n mast hai tujh ko bataa.e kaun
terii zamii.n falak hai sitaaro.n par raqs kar
is tarah raqs kar ki saraapaa asar ho tuu
ko.ii nazar uThaa.e to pesh-e-nazar ho tuu

Shakeel Badayuni
Nazm

mere azizo, mere rafiqo

magar ko.ii to.De de rahaa hai
laraztii mizhgaa.n ke nashtaro.n ko
dilo.n ke andar utaartaa hai
ko.ii siyaasat ke KHanjaro.n ko
kisii ke zahriile tez naaKHun
uqaab ke panja-haa-e-KHuunii.n
kii tarah aa.nkho.n pe aa rahe hai.n
gulaab se tan misaal-e-bismil
zamiin par tilmilaa rahe hai.n
jo pyaas paanii kii muntazir thii
vo suuliyo.n par Ta.ngii hu.ii hai
vo bhuuk roTii jo maa.ngtii thii
saliib-e-zar par cha.Dhii hu.ii hai
ye zulm kaisaa, sitam ye kyaa hai
mai.n sochtaa huu.n ye kyaa junuu.n hai
jahaa.n me.n naan-e-javii.n kii qiimat
kisii kii ismat, kisii kaa KHuu.n hai

Ali Sardar Jafri
Nazm

sarojini-naidu

aziiz maa.n mirii ha.nsmukh mirii bahaadur maa.n
tamaam jauhar-e-fitrat jagaa diye tuu ne
mohabbat apne chaman se gulo.n se KHaaro.n se
mohabbato.n ke KHazaane luTaa diye tuu ne
banaa banaa ke miTaa.e ga.e nuquush-e-amal
tire baGair mukammal na ho sakii tasviir
vo KHvaab jhaa.nsii kii raanii ko jis ne chau.nkaayaa
tiraa gihaad-e-musalsal usii kii hai ta.abiir
use hayaat kaa sola si.ngaar kahte hai.n
tirii jabii.n pe hai.n kuchh silvaTe.n bhii Tiikaa bhii
nazar me.n jazb-e-yaqii.n dil me.n soz-e-aazaadii
dahaktaa phuul bhii hai tuu mahaktaa sho.ala bhii
zaraa zamiin ko mehvar pe ghuum lene de
samaaj tujh se tiraa soz-o-saaz maa.ngegii
jamaal siikhegaa KHud-e'timaadiyaa.n tujh se
hayaat-e-nau tire dil kaa gudaaz maa.ngegii

Kaifi Azmi
Nazm

hashr ki subh daraKHshan ho maqam-e-mahmud

raat daa.Dhii ke a.ndhere se takalluf barte
arsh ke saamne rusvaa.ii kii gardan na uThe
izn-e-sajda pe kamar taKHta na ho jaa.e kahii.n
khokhle lafzo.n me.n lohaa to nahii.n bhar sakte
saika.Do.n saal kii tabliiG ke chaaliis samar
kashtii ban jaa.e to tannuur se paanii uble
saalhaa-saal se aaraam natiija matluub
tiin-sau-saaTh sanam KHaana-e-ka.aba se chale
reg-zaaro.n me.n Gubaar aur khajuurii saa.e
uu.nT kii aa.nkh me.n tash.hiir hu.aa dard-e-safar
ko.ii 'hi.nda' se kahe daa.nt kahaa.n hai.n tere
fat.h-e-makka se magar log hidaayat paa.e.n
KHuun jam jaa.e jo naalain me.n chalte chalte
arsh kii aa.nkh se rahmat kaa samundar uble
jibra.iil apnii hai.at me.n hai.n numaa.ish-manzar
paa.nv paataal me.n sar charKH se Takraa.e kahii.n
par jo khole to har ik samt pe parde laTke.n
aur jaltaa hu.aa suuraj abhii kho jaa.e kahii.n
qaafila aayaa hai 'buu-bakr' se mansuub magar
maal taqsiim hu.aa daaman-e-haajat-ma.nda.n
nuur ka.ndhe pe uThaa.e shab-e-hijrat ke safiir
Gaar me.n saath rahe paas hii paivand hu.e
masjid-e-nabvii me.n ambaar-e-Ganiimat raushan
log rote hu.e nikle hai.n pareshaa.n-manzar
raushnii pahu.nchii 'abuu-jahl' kii diivaaro.n tak
ghar kii taariikii me.n rasta na bane biinaa.ii
pe.D ke saa.e kii pahchaan yahuudii raahib
ruk gayaa aab-e-ravaa.n beva ke darvaaze par
dast-e-zohraa me.n nishaanaat ayaa.n chakkii se
ilm ke baab 'alii' umr me.n sab se chhoTe
chaa.nd kaa naam tire chaak-garebaano.n me.n
mubtadii Dhuu.nDte hai.n masjid-e-aqsaa me.n imaam
sidrat-ul-muntahaa jibriil ijaazat maa.nge
kaun thaa kis ne pukaaraa ki chale bhii aa.o
kaun maujuud thaa pahle se vahaa.n kaun gayaa
kaun suntaa thaa vahaa.n kis ne pukaaraa kis ko
kis kii aavaaz kii tanviir se aalim chamke
sar-bulandii thii muqaddar me.n qalam se pahle
bakriyaa.n kaun 'haliima' kii charaane jaa.e
'aamina' batn se iz.haar hai aadam kaa uruuj
mujtam.a kis ne kiyaa logo.n ko parbat ke qariib
kis ne lalkaaraa zalaalat ko musalsal tanhaa
jau kii roTii kabhii mil jaa.e kabhii faaqa-kashii
bhuuk se peT pe patthar kabhii baa.ndhe kis ne
tiin-sau-terah kii ta.adaad hai kis gintii me.n
fikr pe daa.era-kun KHandaqe.n khodii jaa.e.n
duur kii dhuup me.n hai faisla-kun rah-e-tabuuk
'ha.nzala' saamne aa jaa.e.n jo chhaT jaa.e Gubaar
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
mai.n ne pahu.nchaa diyaa tum tak jo mujhe pahu.nchaa thaa
ko.ii pardesii hai KHeme pe pareshaa.n-surat
aur 'faaruuq' chale biivii ko ham-raah liye
faasle to.D kar aavaaz ke saa.e phaile
haakim-e-vaqt kaa kurtaa ka.ii paivand lagaa
bakriyaa.n jis se sambhaalii nahii.n jaatii.n thii.n kabhii
nisf duniyaa pe KHilaafat ke alam lahraa.e
yaad hai saahibo KHaibar ko ukhaa.Daa kis ne
kis kii talvaar thii aa.iina zamaane ke liye
kis ne zarKHez shujaa.at ke sitaare bo.e
jaan dii jaavedaa.n lamhaat tilaavat mashGuul
KHuun ke dhabbe hai.n qur.aan pe taabinda nazar

Adil Mansuri
Nazm

nae KHake

KHazaana-e-ra.ng-o-nuur taariik rahguzaaro.n me.n luT rahaa hai
uruus-e-gul kaa Guruur-e-ismat siyaahkaaro.n me.n luT rahaa hai
tamaam sarmaaya-e-lataafat zaliil KHaaro.n me.n luT rahaa hai
ghuTii ghuTii hai.n numuu kii saa.nse.n chhuTii chhuTii nabz-e-gulistaa.n hai
hai.n gursana phuul, tishna Gunche, ruKHo.n pe zardii labo.n pe jaa.n hai
asiir hai.n ham-safiir jab se KHizaa.n chaman me.n ravaa.n-davaa.n hai

Kaifi Azmi
Nazm

tarana-e-watan

rashk-e-firdaus hai teraa ra.ngii.n chaman
tujh pe gul-baash karte hai.n koh-o-daman
tere maathe kii rekhaa hai.n ga.ng-o-jaman
terii miTTii me.n KHvaabiida hai.n fikr-o-fan
faKHr-e-yuunaan thii terii bazm-e-kuhan
mere hindustaa.n mere pyaare vatan
devtaa.o.n kii rishiyo.n kii ye sarzamii.n
zarra zarra tirii KHaak kaa hai hasii.n
chuumtaa hai qamar roz terii jabii.n
tere jalve na ho.n kis liye dil-nashii.n
tere zarre me.n KHurshiid kii hai kiran
mere hindustaa.n mere pyaare vatan
tere qadmo.n kii ziinat hai godaavarii
hai himaala kaa parbat tiraa santarii
hai haqiiqat me.n kashmiir jannat tirii
zarre zarre me.n tere hai ik zindagii
desh kii shaan hai taaj kaa baa.nkpan
mere hindustaa.n mere pyaare vatan
kis balaa kii kashish tere KHaaro.n me.n hai
auj firdaus pinhaa.n bahaaro.n me.n hai
ik nayaa baa.nkpan kohsaaro.n me.n hai
dilkashii kis qadar chaa.nd taaro.n me.n hai
hai zamaane se a.alaa tirii anjuman
mere hindustaa.n mere pyaare vatan
meraa mandir hai tuu meraa ka.aba hai tuu
meraa maljaa hai tuu meraa maavaa hai tuu
merii uqbaa hai tuu merii duniyaa hai tuu
meraa hai saaz-e-dil meraa naGma hai tuu
merii har saa.ns tere liye naGma-zan
mere hindustaa.n mere pyaare vatan
sab ko ulfat ke markaz pe laa.uu.ngaa mai.n
ektaa kaa diyaa phir jalaa.uu.ngaa mai.n
apne haatho.n vatan ko sajaa.uu.ngaa mai.n
prem ke giit har vaqt gaa.u.ngaa mai.n
is tarah kaa banaa.uu.ngaa mai.n sa.ngThan
mere hindustaa.n mere pyaare vatan
KHuun se apne duu.ngaa tujhe zindagii
tere phuulo.n ko duu.ngaa niraalii KHushii
zarre zarre ko baKHshu.ngaa mai.n raushnii
sab ko aisii sunaa.uu.ngaa mai.n raagnii
shaa.ntii kii bahaa.uu.ngaa ga.ng-o-jaman
mere hindustaa.n mere pyaare vatan

kanval Dibaivi
Nazm

nazr-e-Khaalida

qurbat-e-gul kis qadar jaa.n-baKHsh hai KHaaro.n se puuchh
chaa.nd kii tanviir me.n kyaa lutf hai taaro.n se puuchh

Asrarul Haq Majaz
Nazm

main na kahta tha tum se

mai.n na kahtaa thaa tum se rah me.n chho.D jaa.ogii
ishq ik riyaazat hai kaise Thair paa.ogii
aag kaa ye dariyaa hai kyuu.n kar tair paa.ogii
mai.n na kahtaa thaa tum se
ishq ik ibaadat hai payambarii amaanat hai
KHaaro.n se ye pur rasta
kab talak chalogii tum
saath chho.D jaa.ogii
mai.n na kahtaa thaa tum se
KHauf khaataa rahtaa huu.n
makr se daGaa se mai.n
aise dost se bhii jo
kashtiyaa.n Dubote hai.n
beach me.n samundar ke
mai.n na kahtaa thaa tum se
pahle soch lo sau baar
baadbaa.n ke uThne se
tuufaa.n ke beach jaane se
chho.D to na jaa.ogii darmiyaa.n samundar ke
aur tum ne har ik baar ye yaqii.n dilaayaa thaa
saath jiine marne kii laakh qasme.n khaa.ii thii.n
aur mai.n ki saada dil aa gayaa thaa baato.n me.n
aa.nsu.o.n me.n aaho.n me.n
jhuuT kii kathaa.o.n me.n
jaan kar sabhii kuchh ki
pahle paa.nch kashtii me.n chhed kar ke baiThii ho
par tumhaarii suurat jo
taa.ebo.n sii lagtii thii
de ga.ii fareb aaKHir
aur phir jo honaa thaa ho rahaa ik din
tum ko chhal hii karnaa thaa
kaise baaz rahtii tum
sad.haa va.ade kar ke bhii
laakh qasme.n khaa ke bhii
darmiyaa.n samundar ke
mauj me.n thape.Do.n ke
chhed kar ke kashtii me.n
saatve.n mai.n jaa baiThii
mai.n na kahtaa thaa tum se
par nahii.n nahii.n ab to
ab mai.n tum se kahtaa huu.n
ishq ik safiina hai
bahr-e-be-karaa.n ho yaa
pur-KHatar samundar ho
paar KHud utarnaa hai
tum karo ab apnii fikr
kashtiyaa.n badalne kii
aaThvii.n yaa nauvii.n kii
maa.njhii Dhuu.nD laane kii
ko.ii makr karne kii
mai.n ki ek saada-dil
ishq par yaqii.n avval ishq par yaqii.n aaKHir

Abu Bakr Abbad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now