Search result for "panja-e-mizha" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "panja-e-mizha"

Nazm MATCHES FOR "panja-e-mizha"

Nazm

ghaalib ki ghazal

shabnam-e-nok-e-mizha ne bhii ye mahsuus kiyaa
har Gazal gauhar-e-naayaab hai 'Gaalib' kii Gazal

Mohammad Abdul Qadir Adeeb

Nazm

ek sitara aadarsh ka

rustgaar az-panja-e-bedardii-e-lail-o-nahaar
band aa.nkho.n ke nagar me.n
kaif-e-aalamgiir kaa armaa.n milaa
jis se vaavailaa nashebo.n kaa na Takraayaa kabhii
vo auj-e-baam
sarsarii us se guzar jaane me.n pinhaa.n aafiyat
ai rah-navard
ai nazar-var ai dil-aasaa
rauzan-e-zulmaat hast-o-buud
ai paik-e-jahaa.n-paimaa KHizar

Shafiq Fatima Shera

Nazm

talash

vo ik chehra
kabhii jo chaa.nd ban kar muskuraataa hai
mirii raato.n kii taariikii miTaataa hai
kabhii sad.haa sitaaro.n kii tarah vo TimTimaataa hai
sar-e-nok-e-mizha yuu.n jhilmilaataa hai

Meer Anjum Parvez

Nazm

baghi

to.D Daaluu.ngaa mai.n zanjiir-e-asiiraan-e-qafas
dahr ko panja-e-usrat se chhu.Daane de mujhe

Makhdoom Mohiuddin

Nazm

bulawa

kahaa.n tak apne bosiida badan mahfuuz rakkhe.nge
kisii ke naaKHuno.n hii kaa muqaddar jaag lene do
kahaa.n tak saa.ns kii Dorii se rishte jhuuT ke baa.ndhe.n
kisii ke panjaa-e-be-dard hii se TuuT jaane do
phir is ke baa'd to bas ik sukuut-e-mustaqil hogaa
na ko.ii surKH-ruu hogaa, na ko.ii munfa.il hogaa

Zehra Nigaah

Nazm

shahidon ko salam

tauq-o-rasan ko naam diyaa zulf dost kaa
zindaa.n ko saaya-e-mizha-e-yaar kah ga.e

Nazish Partap Gadhi

Nazm

naqsh-bar-ab

ishq ke haath me.n raushan hai jo nanhaa saa diyaa
aql kii tund havaa us ko bujhaa hii degii
tuu ne dekhii hii nahii.n panja-e-usrat kii giraft
ruuh ko qaid-e-tamannaa se chhu.Daa hii degii

Ada Jafarey

Nazm

iKHtilaf

shu.uur-e-dii.n se jabr-e-naaravaa kii baag mo.D de
sukuun-o-aagahii se do dilo.n kaa rabt jo.D de
salaamtii se panja-e-sitam kaa zor to.D de
hame.n tirii TuuTii hu.ii asaa se iKHtilaaf hai

Ashraf Rafi

Nazm

buniyaad kuchh to ho

marne chale to satvat-e-qaatil kaa KHauf kyaa
itnaa to ho ki baa.ndhne paa.e na dast o paa
maqtal me.n kuchh to rang jame jashn-e-raqs kaa
ra.ngii.n lahuu se panja-e-sayyaad kuchh to ho
KHuu.n par gavaah daaman-e-jallaad kuchh to ho
jab KHuu.n-bahaa talab kare.n buniyaad kuchh to ho

Faiz Ahmad Faiz

Nazm

ghaalib

tum jo aa jaa.o aaj dillii me.n
KHud ko paa.oge ajnabii kii tarah
tum phiroge bhaTakte rasto.n me.n
ek be-chehra zindagii kii tarah
din hai dast-e-KHasii.n kii maanind
raat hai daaman-e-tahii kii tarah
panja-e-zar-garii o zar-giirii
aam hai rasm-e-rahzanii kii tarah
aaj har mai-kade me.n hai kohraam
har galii hai tirii galii kii tarah
vo zabaa.n jis kaa naam hai urdu
uTh na jaa.e kahii.n KHushii kii tarah
ham-zabaa.n kuchh idhar udhar saa.e
nazar aa.e.nge aadmii kii tarah
tum the apnii shikast kii aavaaz
aaj sab chup hai.n munsifii kii tarah
aa rahii hai nidaa bahaaro.n se
ek gumnaam raushnii kii tarah
is a.ndhere me.n ik rupahlii lakiir
ek aavaaz-e-haq nabii kii tarah!

Makhdoom Mohiuddin

Nazm

gunah ka matam

dil pe jo taariik saa ik aks hai
nafs ke ifriit kaa saayaa nahii.n
kar chukaa hai vaar mujh par ek baar
ab vo is niyyat se phir aayaa nahii.n
pha.ns ke us ke panja-e-saffaak me.n
mujh se jo sarzad hu.aa thaa ik gunaah
aaj aayaa hai vahii dil ke qariib
bahr-e-maatam o.Dh kar raKHt-e-siyaah

Akhtar Bastavi

Nazm

gunah ka matam

dil pe jo taariik saa ik aks hai
nafs ke ifriit kaa saayaa nahii.n
kar chukaa hai vaar mujh par ek baar
ab vo is niyyat se phir aaya nahii.n
pha.ns ke us ke panja-e-saffaak me.n
mujh se jo sarzad hu.aa thaa ik gunaah
aaj aaya hai vahii dil ke qariib
bahr-e-maatam o.Dh kar raKHt-e-siyaah

Akhtar Bastavi

Nazm

ye matam-e-waqt ki ghaDi hai

ye vaqt aa.e to be-iraada
kabhii kabhii mai.n bhii dekhtaa huu.n
utaar kar zaat kaa labaada
kahii.n siyaahii malaamato.n kii
kahe.n pe gul-buuTe ulfato.n ke
kahe.n lakiire.n hai.n aa.nsu.o.n kii
kahe.n pe KHuun-e-jigar ke dhabbe
ye chaak hai panja-e-aduu kaa
ye mohr hai yaar-e-mehrbaa.n kii
ye la.al lab-haa-e-mah-vishaa.n ke
ye marhamat shaiKH-e-bad-zabaa.n kii

Faiz Ahmad Faiz

Nazm

baDe naz se aaj ubhra hai suraj

magar barq o aatish ke saa.e me.n ai dil
ye sadiyo.n ke KHud-rafta naashaad taa.ir
ye sadiyo.n ke par-basta barbaad taa.ir
ye hai.n aaj bhii muzmahil dil-girafta
ye hai.n aaj bhii apne sar ko chhupaa.e
are o na.ii shaan ke mere suuraj
tirii aab me.n aur bhii taab aa.e
tire paas aisii bhii ko.ii kiran hai
unhe.n panja-e-tez se jo bachaa.e
inhe.n jo na.e baal-o-par aa ke baKHshe
inhe.n jo na.e sir se u.Dnaa sikhaa.e

Moin Ahsan Jazbi

Nazm

man ki dua

tere dam se phir vatan vaalo.n me.n paidaa ho hayaat
panja-e-aGyaar se ho hind ko haasil najaat
kaam aa jaa.e vatan kii raah me.n teraa shabaab
Gairate.n zindaaniyo.n kii phir ulaT Daale.n naqaab
tuu badal Daale nizaam-e-hind ke lail-o-nahaar
ye Gulaam aabaad ho aazaad mulko.n me.n shumaar
aastiin-e-hind ho tere lahuu se laala-faam
paadshaaho.n kaa laqab paane lage.n hindii Gulaam
haDDiyaa.n pis kar bane.n Gaaza uruus-e-hind kaa
husn phir ho jaa.e kuchh taaza uruus-e-hind kaa
tere ho.nTo.n se ba-vaqt-e-marg ye nikle sadaa
naujavaanaan-e-vatan aage ba.Dho aage zaraa

Altaf Mashhadi

Nazm

tamiri taKHrib

sub.h ke rangii.n labo.n par hai tabassum kii jhalak
gul mataa.a-e-zar nichhaavar karte hai.n kaliyaa.n mahak
letii hai a.ng.Daa.iyaa.n Guncho.n ke pahluu me.n hayaat
karvaTo.n par karvaTe.n letii hai ruuh-e-kaa.enaat
narm-o-naazuk taabisho.n se zau-fagan hai aaftaab
aasmaa.n kaa matl.a-e-rangii.n hai mahruum-e-sahaab
be-takalluf hai.n nazar ke saamne diivaar-o-dar
panja-e-KHurshiid se Tuk.De hai daamaan-e-sahar
apnii majbuurii pe ahl-e-baaG ne sar dhun liye
mahr ne kirno.n kii nakchoTii se motii chun liye
ye samaa.n hai mai.n huu.n aur lahore kaa lawrence baaG
gasht me.n hai.n maGribii tahziib ke chashm-o-charaag

Nakhshab Jaarchawi

Nazm

kisan

chiir ke saal me.n do baar zamii.n kaa siina
dafn ho jaataa huu.n
gudgudaate hai.n jo suuraj ke sunahre naaKHun
phir nikal aataa huu.n
ab nikaltaa huu.n to itnaa ki baTore jo ko.ii daaman me.n
daaman phaT jaa.e
ghar ke jis kone me.n le jaa ke ko.ii rakh de mujhe
bhuuk vahaa.n se haT jaa.e
phir mujhe piiste hai.n, guu.ndhte hai.n, se.nkte hai.n
guu.ndhne se.nkne me.n shakl badal jaatii hai
aur ho jaatii hai mushkil pahchaan
phir bhii rahtaa huu.n kisaan
vahii KHasta, bad-haal
qarz ke panja-e-KHuunii.n me.n niDhaal
is daraa.ntii ke tufail
kuchh hai maazii se Ganiimat miraa haal
haal se hogaa hasii.n istiqbaal
uThte suuraj ko zaraa dekho to
ho gayaa saaraa ufuq laal.n-laal

Kaifi Azmi

Nazm

shab charagh

baso.n kaa shor dhu.aa.n gard dhuup kii shiddat
buland o baalaa imaaraat sar-niguu.n insaa.n
talaash-e-rizq me.n niklaa hu.aa ye jamm-e-Gafiir
lapaktii bhaagtii maKHluuq kaa ye sail-e-ravaa.n
har ik ke siine me.n yaado.n kii munhadim qabre.n
har ek apnii hii aavaaz-e-paa se ruu-gardaa.n
ye vo hujuum hai jis me.n ko.ii falak pe nahii.n
aur is hujuum-e-sar-e-raah se guzarte hu.e
na jaane kaise tumhaarii vafaa karam kaa KHayaal
mire jabii.n ko kisii dast-e-aashnaa kii tarah
jo chhuu gayaa hai to ashko.n ke sote phuuT pa.De
sumuum o reg ke sahraa me.n ik nafas ke liye
chalii hai baad-e-tamannaa to umr bhar kii thakan
sar-e-mizha simaT aa.ii hai ek aa.nsuu me.n
ye vo guhar hai jo TuuTe to KHaak-e-paa me.n mile
ye vo guhar hai jo chamke to shab-charaaG bane

Mahmood Ayaz

Nazm

man

tamaam lafzo.n me.n raushan har ik baab me.n maa.n
junuu.n ke shelf me.n hai ishq kii kitaab me.n maa.n
ai maa.n to KHushbuu kaa naayaab isti.aara hai
ai maa.n tuu uud me.n ambar me.n tuu gulaab me.n maa.n
KHud apnii mamtaa me.n hii nuur kaa samundar hai
nahii.n hai aur kisii raushnii kii taab me.n maa.n
vo jism kho ke badal sii ga.ii hai kuchh mujh me.n
thii pahle sirf savaal ab hai har javaab me.n maa.n
mire savaalo.n ke saare javaab le aa.ii
chalii ga.ii thii magar lauTii phir se KHvaab me.n maa.n
mai.n jab bhii zab.h hu.ii zindagii ke KHanjar se
dukhii hai KHvaabo.n me.n ik dasht-e-iztiraab me.n maa.n
ga.nvaa ke jism vo fursat se i mere paas
sisak sisak ke sunaayaa thii kis azaab me.n maa.n
mai.n maa.n kii zinda nigaaho.n ko KHud me.n jiitii huu.n
har inqalaab me.n har dam har aab-o-taab me.n maa.n
mire uruuj kaa vo silsila in.aam-o-sazaa
mire zavaal me.n har zinda inqalaab me.n maa.n
tujhe lubhaane ko mai.n satra.ngii banii thii maa.n
ye jaa chhupii hai tuu kis parda-e-Gayaab me.n maa.n
ba.ndhii hai.n aa.nkhe.n mirii ab bhii maut ke pul se
hai har sukuut me.n KHaamosh iztiraab me.n maa.n
umaD rahe hai.n har ik pal se maut ke ThaTThe
vo jaa rahii hai mirii panja-e-uqaab me.n maa.n
vo jism haar ga.ii maut se magar mujh me.n
vo jii ke goyaa hai phir maut se javaab me.n maa.n

Azra Parveen

Nazm

album

naar-o-namruud kaa vo qissa to paariina hai
kyaa kahaa
misr-o-kan.aan ke ta'alluq kii kahaanii chhe.Duu.n
misr-o-kan.aan me.n kyaa rakhaa hai
niil kii lahro.n ke hamraah chale the muusaa
karne Garqaab usii niil me.n kis ko aaKHir
aur shaddaad
vo jannat kaisii
kis ke kyaa KHvaab the kyaa makr the kyaa hiile the
aa.o sab dafn kare.n
kohna auraaq me.n kyaa rakkhaa hai
laa.o album vo zaraa
dekhe.n tasviir na.ii
KHushbuu-o-rang-o-dhanak baadal kii
haa.n vahii qarya jo tahziib kaa gahvaara thaa
dekh kar jis kaa fusuu.n
raasta vaapsii kaa kitne musaafir bhuule
tum ko ma.aluum nahii.n hai shaayad
uf ye tasviir-e-siyah
ye siyah-ruuh jo taariik guphaa.o.n me.n rahaa kartii thii
panja-e-KHuunii.n ne us ke aaKHir
KHitta-e-arz-e-muqaddas ko lahuu-rez kiyaa
kyaa amiiraan-e-ajam kaise faqiihaan-e-haram
sab ke sab us kii hathelii me.n hai.n band
dekh ejaaz-bayaanii us kii
mu.nh chhupaa.e hu.e
shahr-e-baabul kaa sehr phirtaa hai
pattharo.n ko kiyaa raushan mash.al
aur shajar Tahnii ko u.Dtaa taa.ir
is ajab dhund ajab sehr me.n mad.hosh the sab
ki yakaayak girii tasviir ik aur album se
dekhte kyaa hai.n ki us KHitte ke ik goshe se
vaaris-e-shahr garaa.n-KHvaab uThe
qulba-raanii ne jinhe.n azm-e-musammam baKHshaa
jism me.n Tho.nkii hu.ii kiile.n sabhii
noch kar phe.nk hii dii.n
hosh aate hii chale qasr-e-muqaddas kii taraf
aur siyah-ruuh vo taariik guphaa
jis ne is qasr-e-muqaddas ko kiyaa thaa masmuum
naatiqa sar-ba-garebaa.n us kaa
saahirii shola-bayaanii-o-adaakaarii sabhii gung

Qamar Jahan Naseer

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now