Sher on Yaad

hameñ yaad rakhnā hameñ yaad karnā

agar koī taaza sitam yaad aa.e

hamein yaad rakhna hamein yaad karna

agar koi taza sitam yaad aae

kuchh bikhrī huī yādoñ ke qisse bhī bahut the

kuchh us ne bhī bāloñ ko khulā chhoḌ diyā thā

kuchh bikhri hui yaadon ke qisse bhi bahut the

kuchh us ne bhi baalon ko khula chhoD diya tha

yuuñ tirī yaad meñ din raat magan rahtā huuñ

dil dhḌaknā tire qadmoñ kī sadā lagtā hai

yun teri yaad mein din raat magan rahta hun

dil dhDakna tere qadmon ki sada lagta hai

dil meñ ik dard uThā āñkhoñ meñ aañsū bhar aa.e

baiThe baiThe hameñ kyā jāniye kyā yaad aayā

dil mein ek dard uTha aankhon mein aansu bhar aae

baiThe baiThe hamein kya jaaniye kya yaad aaya

Thahrī Thahrī sī tabī.at meñ ravānī aa.ī

aaj phir yaad mohabbat kī kahānī aa.ī

Thahri Thahri si tabiat mein rawani aai

aaj phir yaad mohabbat ki kahani aai

ham apne raftagāñ ko yaad rakhnā chāhte haiñ

diloñ ko dard se ābād rakhnā chāhte haiñ

hum apne raftagan ko yaad rakhna chahte hain

dilon ko dard se aabaad rakhna chahte hain

aa.ī jab un kī yaad to aatī chalī ga.ī

har naqsh-e-mā-sivā ko miTātī chalī ga.ī

aai jab un ki yaad to aati chali gai

har naqsh-e-ma-siwa ko miTati chali gai

tumhārī yaad meñ jiine kī aarzū hai abhī

kuchh apnā haal sambhālūñ agar ijāzat ho

tumhaari yaad mein jine ki aarzu hai abhi

kuchh apna haal sambhaalun agar ijazat ho

bhulā.ī nahīñ jā sakeñgī ye bāteñ

tumheñ yaad ā.eñge ham yaad rakhnā

bhulai nahin ja sakengi ye baaten

tumhein yaad aaenge hum yaad rakhna

ai muzaffar kis liye bhopal yaad aane lagā

kyā samajhte the ki dillī meñ na hogā āsmāñ

ai muzaffar kis liye bhopal yaad aane laga

kya samajhte the ki dilli mein na hoga aasman

kahīñ ye tark-e-mohabbat kī ibtidā to nahīñ

vo mujh ko yaad kabhī is qadar nahīñ aa.e

kahin ye tark-e-mohabbat ki ibtida to nahin

wo mujh ko yaad kabhi is qadar nahin aae

tum ne kiyā na yaad kabhī bhuul kar hameñ

ham ne tumhārī yaad meñ sab kuchh bhulā diyā

tum ne kiya na yaad kabhi bhul kar hamein

hum ne tumhaari yaad mein sab kuchh bhula diya

vo sardiyoñ kī dhuup kī tarah ġhurūb ho gayā

lipaT rahī hai yaad jism se lihāf kī tarah

wo sardiyon ki dhup ki tarah ghurub ho gaya

lipaT rahi hai yaad jism se lihaf ki tarah

haañ unhīñ logoñ se duniyā meñ shikāyat hai hameñ

haañ vahī log jo akasr hameñ yaad aa.e haiñ

han unhin logon se duniya mein shikayat hai hamein

han wahi log jo akasr hamein yaad aae hain

jis roz kisī aur pe bedād karoge

ye yaad rahe ham ko bahut yaad karoge

jis roz kisi aur pe bedad karoge

ye yaad rahe hum ko bahut yaad karoge

yuuñ jī bahal gayā hai tirī yaad se magar

terā ḳhayāl tere barābar na ho sakā

yun ji bahal gaya hai teri yaad se magar

tera KHayal tere barabar na ho saka

'ajmal'-sirāj ham use bhuul hue to haiñ

kyā jaane kyā kareñge agar yaad aa gayā

'ajmal'-siraj hum use bhul hue to hain

kya jaane kya karenge agar yaad aa gaya

rah rah ke kauñdtī haiñ andhere meñ bijliyāñ

tum yaad kar rahe ho ki yaad aa rahe ho tum

rah rah ke kaundti hain andhere mein bijliyan

tum yaad kar rahe ho ki yaad aa rahe ho tum

jis meñ ho yaad bhī tirī shāmil

haa.e us be-ḳhudī ko kyā kahiye

jis mein ho yaad bhi teri shamil

hae us be-KHudi ko kya kahiye

na hālat merī kuchh kahnā na matlab nāma-bar kahnā

jo mumkin ho to ye kahnā tumhārī yaad aatī hai

na haalat meri kuchh kahna na matlab nama-bar kahna

jo mumkin ho to ye kahna tumhaari yaad aati hai

yād-e-māzī kī pur-asrār hasīñ galiyoñ meñ

mere hamrāh abhī ghuum rahā hai koī

yaad-e-mazi ki pur-asrar hasin galiyon mein

mere hamrah abhi ghum raha hai koi

kar kuchh aisā ki tujhe yaad rakhūñ

bhuul jaane kā taqāzā hī sahī

kar kuchh aisa ki tujhe yaad rakhun

bhul jaane ka taqaza hi sahi

yaad us kī itnī ḳhuub nahīñ 'mīr' baaz aa

nādān phir vo jī se bhulāyā na jā.egā

yaad us ki itni KHub nahin 'mir' baz aa

nadan phir wo ji se bhulaya na jaega

ta.āqub meñ hai mere yaad kis kī

maiñ kis ko bhuul jaanā chāhtā huuñ

taaqub mein hai mere yaad kis ki

main kis ko bhul jaana chahta hun

mujhe yaad karne se ye mudda.ā thā

nikal jaa.e dam hichkiyāñ aate aate

mujhe yaad karne se ye muddaa tha

nikal jae dam hichkiyan aate aate

guzar jā.eñge jab din guzre aalam yaad ā.eñge

hameñ tum yaad aaoge tumheñ ham yaad ā.eñge

guzar jaenge jab din guzre aalam yaad aaenge

hamein tum yaad aaoge tumhein hum yaad aaenge

basī hai sūkhe gulāboñ kī baat sāñsoñ meñ

koī ḳhayāl kisī yaad ke hisār meñ hai

basi hai sukhe gulabon ki baat sanson mein

koi KHayal kisi yaad ke hisar mein hai

yaad meñ ḳhvāb meñ tasavvur meñ

aa ki aane ke haiñ hazār tarīq

yaad mein KHwab mein tasawwur mein

aa ki aane ke hain hazar tariq

tumhārī yaad merā dil ye donoñ chalte purze haiñ

jo in meñ se koī miTtā mujhe pahle miTā jaatā

tumhaari yaad mera dil ye donon chalte purze hain

jo in mein se koi miTta mujhe pahle miTa jata

rañg-e-dil rañg-e-nazar yaad aayā

tere jalvoñ kā asar yaad aayā

rang-e-dil rang-e-nazar yaad aaya

tere jalwon ka asar yaad aaya

vahī phir mujhe yaad aane lage haiñ

jinheñ bhūlne meñ zamāne lage haiñ

wahi phir mujhe yaad aane lage hain

jinhen bhulne mein zamane lage hain

rulā.egī mirī yaad un ko muddatoñ sāhab

kareñge bazm meñ mahsūs jab kamī merī

rulaegi meri yaad un ko muddaton sahab

karenge bazm mein mahsus jab kami meri

vo mil na sake yaad to hai un kī salāmat

is yaad se bhī ham ne bahut kaam liyā hai

wo mil na sake yaad to hai un ki salamat

is yaad se bhi hum ne bahut kaam liya hai

ḳhair se dil ko tirī yaad se kuchh kaam to hai

vasl kī shab na sahī hijr kā hañgām to hai

KHair se dil ko teri yaad se kuchh kaam to hai

wasl ki shab na sahi hijr ka hangam to hai

goyā tumhārī yaad hī merā ilaaj hai

hotā hai pahroñ zikr tumhārā tabīb se

goya tumhaari yaad hi mera ilaj hai

hota hai pahron zikr tumhaara tabib se

rashk se naam nahīñ lete ki sun le na koī

dil hī dil meñ use ham yaad kiyā karte haiñ

rashk se nam nahin lete ki sun le na koi

dil hi dil mein use hum yaad kiya karte hain

dil se ḳhayāl-e-dost bhulāyā na jā.egā

siine meñ daaġh hai ki miTāyā na jā.egā

dil se KHayal-e-dost bhulaya na jaega

sine mein dagh hai ki miTaya na jaega

kuchh ḳhabar hai tujhe o chain se sone vaale

raat bhar kaun tirī yaad meñ bedār rahā

kuchh KHabar hai tujhe o chain se sone wale

raat bhar kaun teri yaad mein bedar raha

un kā ġham un kā tasavvur un kī yaad

kaT rahī hai zindagī ārām se

un ka gham un ka tasawwur un ki yaad

kaT rahi hai zindagi aaram se

yaad aur un kī yaad kī allāh-re mahviyat

jaise tamām umr kī fursat ḳharīd lī

yaad aur un ki yaad ki allah-re mahwiyat

jaise tamam umr ki fursat KHarid li

bhuul ga.ī vo shakl bhī āḳhir

kab tak yaad koī rahtā hai

bhul gai wo shakl bhi aaKHir

kab tak yaad koi rahta hai

nahīñ aatī to yaad un kī mahīnoñ tak nahīñ aatī

magar jab yaad aate haiñ to aksar yaad aate haiñ

nahin aati to yaad un ki mahinon tak nahin aati

magar jab yaad aate hain to aksar yaad aate hain

yād-e-māzī 'azāb hai yā-rab

chhīn le mujh se hāfiza merā

yaad-e-mazi 'azab hai ya-rab

chhin le mujh se hafiza mera

tumhārī yaad nikaltī nahīñ mire dil se

nasha chhalaktā nahīñ hai sharāb se bāhar

tumhaari yaad nikalti nahin mere dil se

nasha chhalakta nahin hai sharab se bahar

phir aur taġhāful kā sabab kyā hai ḳhudāyā

maiñ yaad na aa.uuñ unheñ mumkin hī nahīñ hai

phir aur taghaful ka sabab kya hai KHudaya

main yaad na aaun unhen mumkin hi nahin hai

us ne goyā mujhī ko yaad rakhā

maiñ bhī goyā usī ko bhuul gayā

us ne goya mujhi ko yaad rakha

main bhi goya usi ko bhul gaya

mausam-e-yād yuuñ ujlat meñ na vaare jaa.eñ

ham vo lamhe haiñ jo fursat se guzāre jaa.eñ

mausam-e-yaad yun ujlat mein na ware jaen

hum wo lamhe hain jo fursat se guzare jaen

lījiye suniye ab afsāna-e-furqat mujh se

aap ne yaad dilāyā to mujhe yaad aayā

lijiye suniye ab afsana-e-furqat mujh se

aap ne yaad dilaya to mujhe yaad aaya

'sājid' tū phir se ḳhāna-e-dil meñ talāsh kar

mumkin hai koī yaad purānī nikal paḌe

'sajid' tu phir se KHana-e-dil mein talash kar

mumkin hai koi yaad purani nikal paDe

tumheñ ye ġham hai ki ab chiTThiyāñ nahīñ ātīñ

hamārī socho hameñ hichkiyāñ nahīñ ātīñ

tumhein ye gham hai ki ab chiTThiyan nahin aatin

hamari socho hamein hichkiyan nahin aatin