دروازہ کھلا ہے کہ کوئی لوٹ نہ جائے

اور اس کے لیے جو کبھی آیا نہ گیا ہو

ہمارے عشق میں رسوا ہوئے تم

مگر ہم تو تماشا ہو گئے ہیں

اے مجھ کو فریب دینے والے

میں تجھ پہ یقین کر چکا ہوں

کبھی سایہ ہے کبھی دھوپ مقدر میرا

ہوتا رہتا ہے یوں ہی قرض برابر میرا

اک شکل ہمیں پھر بھائی ہے اک صورت دل میں سمائی ہے

ہم آج بہت سرشار سہی پر اگلا موڑ جدائی ہے

خوابوں کے افق پر ترا چہرہ ہو ہمیشہ

اور میں اسی چہرے سے نئے خواب سجاؤں

بہت چھوٹے ہیں مجھ سے میرے دشمن

جو میرا دوست ہے مجھ سے بڑا ہے

یہ دھوپ تو ہر رخ سے پریشاں کرے گی

کیوں ڈھونڈ رہے ہو کسی دیوار کا سایہ

اتنے دن کے بعد تو آیا ہے آج

سوچتا ہوں کس طرح تجھ سے ملوں

لمحوں کے عذاب سہ رہا ہوں

میں اپنے وجود کی سزا ہوں

اک آگ غم تنہائی کی جو سارے بدن میں پھیل گئی

جب جسم ہی سارا جلتا ہو پھر دامن دل کو بچائیں کیا

اطہرؔ تم نے عشق کیا کچھ تم بھی کہو کیا حال ہوا

کوئی نیا احساس ملا یا سب جیسا احوال ہوا

با وفا تھا تو مجھے پوچھنے والے بھی نہ تھے

بے وفا ہوں تو ہوا نام بھی گھر گھر میرا

میں تیرے قریب آتے آتے

کچھ اور بھی دور ہو گیا ہوں

جی نہ سکوں میں جس کے بغیر

اکثر یاد نہ آیا وہ

نہ منزل ہوں نہ منزل آشنا ہوں

مثال برگ اڑتا پھر رہا ہوں

کسی نا خواندہ بوڑھے کی طرح خط اس کا پڑھتا ہوں

کہ سو سو بار اک اک لفظ سے انگلی گزرتی ہے

وہ عشق جو ہم سے روٹھ گیا اب اس کا حال بتائیں کیا

کوئی مہر نہیں کوئی قہر نہیں پھر سچا شعر سنائیں کیا

اس نے مری نگاہ کے سارے سخن سمجھ لیے

پھر بھی مری نگاہ میں ایک سوال ہے نیا

وہ دور قریب آ رہا ہے

جب داد ہنر نہ مل سکے گی

سوچتے اور جاگتے سانسوں کا اک دریا ہوں میں

اپنے گم گشتہ کناروں کے لیے بہتا ہوں میں