Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "jilaa"

Nazm MATCHES FOR "jilaa"

Nazm

KHamosh aawaz

chup ho kyuu.n? kyaa soch rahe ho
aa.o sab kuchh aaj bhulaa do
aa.o apne pyaare saathii
phir se mujhe ik baar jilaa do

Jan Nisar Akhtar
Nazm

madam

nuur-e-sarmaaya se hai ruu-e-tamaddun kii jilaa
ham jahaa.n hai.n vahaa.n tahziib nahii.n pal saktii

Sahir Ludhianvi
Nazm

aaKHiri lamha

vo vaqt kabhii to aa.egaa jab dil ke chaman lahraa.e.nge
mar jaa.uu.n to kyaa marne se mire ye KHvaab nahii.n mar jaa.e.nge
ye KHvaab hii merii daulat hai.n ye KHvaab tumhe.n de jaa.uu.ngaa
is dahr me.n jiine marne ke aadaab tumhe.n de jaa.uu.ngaa
mumkin hai ki ye duniyaa kii ravish pal bhar ko tumhaaraa saath na de
kaa.nTo.n hii kaa tohfa nazr kare phuulo.n kii ko.ii sauGaat na de
mumkin hai tumhaare raste me.n har zulm-o-sitam diivaar bane
siine me.n dahakte sho.ale ho.n har saa.ns ko.ii aazaar bane
aise me.n na khul kar rah jaanaa ashko.n se na aa.nchal bhar lenaa
Gam aap ba.Dii ik taaqat hai ye taaqat bas me.n kar lenaa
ho azm to lau de uThtaa hai har zaKHm sulagte siine kaa
jo apnaa haq KHud chhiin sake miltaa hai use haq jiine kaa
lekin ye hamesha yaad rahe ik fard kii taaqat kuchh bhii nahii.n
jo bhii ho akele insaa.n se duniyaa kii baGaavat kuchh bhii nahii.n
tanhaa jo kisii ko paa.e.nge taaqat ke shikanje jak.De.nge
sau haath uThe.nge jab mil kar duniyaa kaa garebaa.n pak.De.nge
insaan vahii hai taabinda us raaz se jis kaa siinaa hai
auro.n ke liye to jiinaa hii KHud apne liye bhii jiinaa hai

Jan Nisar Akhtar
Nazm

ek nazm kahin se bhi shurua ho sakti hai

ek nazm kahii.n se bhii shuruu.a ho saktii hai
juuto.n kii jo.Dii se
yaa qabr se jo baarish me.n baiTh ga.ii
yaa us phuul se jo qabr kii paa.iinii par khilaa
har ek ko kahii.n na kahii.n panaah mil ga.ii
chii.ntiyo.n ko jaa-e-namaaz ke niiche
aur la.Dkiyo.n ko mirii aavaaz me.n
murda bail kii khopa.Dii me.n gilahrii ne ghar banaa liyaa hai
nazm kaa bhii ek ghar hogaa
kisii jilaa-vatan kaa dil yaa intizaar kartii hu.ii aa.nkhe.n
ek pahiya hai jo banaane vaale se adhuuraa rah gayaa hai
ise ek nazm mukammal kar saktii hai
ek guu.njtaa hu.aa aasmaan nazm ke liye kaafii hotaa hai
lekin ye ek naashta-daan me.n baa-aasaanii samaa saktii hai
phuul aa.nsuu aur ghanTiyaa.n is me.n piro.ii jaa saktii hai.n
ise andhere me.n gaayaa jaa saktaa hai
tyauhaaro.n kii dhuup me.n sukhaayaa jaa saktaa hai
tum ise dekh saktii ho
KHaalii bartano.n KHaalii qabzo.n aur KHaalii gahvaaro.n me.n
tum ise sun saktii ho
haath-gaa.Diyo.n aur janaazo.n ke saath chalte hu.e
tum ise chuum saktii ho
bandar-gaaho.n kii bhii.D me.n
tum ise guu.ndh saktii ho
patthar kii maa.nd me.n
tum ise ugaa saktii ho
podiine kii kiyaariyo.n me.n
ek nazm
kisii bhii raat se taariik nahii.n kii jaa saktii
kisii talvaar se kaaTii nahii.n jaa saktii
kisii diivaar me.n qaid nahii.n kii jaa saktii
ek nazm
kahii.n bhii saath chho.D saktii hai
baadal kii tarah
havaa kii tarah
raaste kii tarah
baap ke haath kii tarah

Sarvat Husain
Nazm

sham-e-ayaadat

(3)
na.e zamaane me.n agar udaas KHud ko paa.uu.ngaa
ye shaam yaad kar ke apne Gam ko bhuul jaa.uu.ngaa
ayaadat-e-habiib se vo aaj zindagii milii
KHushii bhii chau.nk chauk uThii Gam kii aa.nkh khul ga.ii
agarche doctor ne mujh ko maut se bachaa liyaa
par is ke baa'd us nigaah ne mujhe jilaa liyaa
nigaah-e-yaar tujh se apnii manzile.n mai.n paa.uu.ngaa
tujhe jo bhuul jaa.uu.ngaa to raah bhuul jaa.uu.ngaa
(4)
qariib-tar mai.n ho chalaa huu.n dukh kii kaa.enaat se
mai.n ajnabii nahii.n rahaa hayaat se mamaat se
vo dukh sahe ki mujh pe khul gayaa hai dard-e-kaa.enaat
hai apne aa.nsu.o.n se mujh pe aa.iina Gam-e-hayaat
ye be-qusuur jaan-daar dard jhelte hu.e
ye KHaak-o-KHuu.n ke putle apnii jaa.n pe khelte hu.e
vo ziist kii karaah jis se be-qaraar hai fazaa
vo zindagii kii aah jis se kaa.np uThtii hai fazaa
kafan hai aa.nsu.o.n kaa dukh kii maarii kaa.enaat par
hayaat kyaa inhe.n haqiiqato.n se honaa be-KHabar
jo aa.nkh jaagtii rahii hai aadmii kii maut par
vo abr-e-ra.ng-ra.ng ko bhii dekhtii hai saada-tar
sikhaa gayaa dukh miraa puraanii piir jaan.naa
nigaah-e-yaar thii jahaa.n bhii aaj merii rahnumaa
yahii nahii.n ki mujh ko aaj zindagii na.ii milii
haqiiqat-e-hayaat mujh pe sau tarah se khul ga.ii
gavaah hai ye shaam aur nigaah-e-yaar hai gavaah
KHayaal-e-maut ko mai.n apne dil me.n ab na duu.ngaa raah
jiyuu.ngaa haa.n jiyuu.ngaa ai nigaah-e-aashnaa-e-yaar
sadaa suhaag zindagii hai aur jahaa.n sadaa-bahaar
(5)
abhii to kitne naa-shuniida naGma-e-hayaat hai.n
abhii nihaa.n dilo.n se kitne raaz-e-kaa.enaat hai.n
abhii to zindagii ke naa-chashiida ras hai.n saik.Do.n
abhii to haath me.n ham ahl-e-Gam ke jas hai.n saik.Do.n
abhii vo le rahii hai.n merii shaa.erii me.n karvaTe.n
abhii chamakne vaalii hai chhupii hu.ii haqiiqate.n
abhii to bahr-o-bar pe so rahii hai.n merii vo sadaa.e.n
sameT luu.n unhe.n to phir vo kaa.enaat ko jagaa.e.n
abhii to ruuh ban ke zarre zarre me.n samaa.uu.ngaa
abhii to sub.h ban ke mai.n ufuq pe thartharaa.uu.ngaa
abhii to merii shaa.erii haqiiqate.n luuTaa.egii
abhii mirii sadaa-e-dard ik jahaa.n pe chhaa.egii
abhii to aadmii asiir-e-daam hai Gulaam hai
abhii to zindagii sad-inqalaab kaa payaam hai
abhii tamaam zaKHm o daaG hai tamaddun-e-jahaa.n
abhii ruKH-e-bashar pe hai.n bahmiyat kii jhaa.iyaa.n
abhii mashiyyato.n pe fat.h paa nahii.n sakaa bashar
abhii muqaddaro.n ko bas me.n laa nahii.n sakaa bashar
abhii to is dukhii jahaa.n me.n maut hii kaa daur hai
abhii to jis ko zindagii kahe.n vo chiiz aur hai
abhii to KHuun thoktii hai zindagii bahaar me.n
abhii to rone kii sadaa hai naGma-e-sitaar me.n
abhii to u.Dtii hai.n ruKH-e-bahaar par havaa.iyaa.n
abhii to diidanii hai.n har chaman kii be-fazaa.iyaa.n
abhii fazaa-e-dahr legii karvaTo.n pe karvaTe.n
abhii to sotii hai.n havaa.o.n kii vo sansanaahaTe.n
ki jis ko sunte hii hukuumato.n ke ra.ng-e-ruKH u.De.n
chapeTe.n jin kii sarkasho.n kii gardane.n maro.D de.n
abhii to siina-e-bashar me.n sote hai.n vo zalzale
ki jin ke jaagte hii maut kaa bhii dil dahal uThe
abhii to batn-e-Gaib me.n hai is savaal kaa javaab
KHudaa-e-KHair-o-shar bhii laa nahii.n sakaa thaa jis kii taab
abhii to god me.n hai.n devtaa.o.n kii vo maah-o-saal
jo de.nge ba.Dh ke barq-e-tuur se hayaat ko jalaal
abhii rag-e-jahaa.n me.n zindagii machalne vaalii hai
abhii hayaat kii na.ii sharaab Dhalne vaalii hai
abhii chhurii sitam kii Duub kar uchhalne vaalii hai
abhii to hasrat ik jahaan kii nikalne vaalii hai
abhii ghan-garaj sunaa.ii degii inqalaab kii
abhii to gosh-bar-sadaa hai bazm aaftaab kii
abhii to puu.njii-vaad ko jahaan se miTaanaa hai
abhii to saamraajo.n ko sazaa-e-maut paanaa hai
abhii to daa.nt piistii hai maut shahryaaro.n kii
abhii to KHuu.n utar rahaa hai aa.ankho.n me.n sitaaro.n kii
abhii to ishtiraakiyat ke jhanDe ga.Dne vaale hai.n
abhii to ja.D se kisht-o-KHuu.n ke nazm ukha.Dne vaale hai.n
abhii kisaan-o-kaamgaar raaj hone vaalaa hai
abhii bahut jahaa.n me.n kaam-kaaj hone vaalaa hai
magar abhii to zindagii musiibato.n kaa naam hai
abhii to nii.nd maut kii mire liye haraam hai
ye sab payaam ik nigaah me.n vo aa.nkh de ga.ii
ba-yak-nazar kahaa.n kahaa.n mujhe vo aa.nkh le ga.ii

Firaq Gorakhpuri
Nazm

lahu nazr de rahi hai hayat

magar haTe hai.n kahii.n jabr aur tashaddud miTe
vo falsafe ki jilaa de ga.e dimaaGo.n ko

Sahir Ludhianvi
Nazm

gurez

miraa junuun-e-vafaa hai zavaal-aamaada
shikast ho gayaa teraa fusuun-e-zebaa.ii
un aarzuu.o.n pe chhaa.ii hai gard-e-maayuusii
jinho.n ne tere tabassum me.n parvarish paa.ii
fareb-e-shauq ke ra.ngii.n tilism TuuT ga.e
haqiiqato.n ne havaadis se phir jilaa paa.ii
sukuun-o-KHvaab ke parde sarakte jaate hai.n
dimaaG-o-dil me.n hai.n vahshat kii kaar-farmaa.ii
vo taare jinme.n mohabbat kaa nuur taabaa.n thaa
vo taare Duub ga.e le ke ra.ng-o-ra.anaa.ii
sulaa ga.ii thii.n jinhe.n terii multafit nazre.n
vo dard jaag uThe phir se le ke a.ng.Daa.ii
ajiib aalam-e-afsurdagii hai ruu-ba-faroG
na jab nazar ko taqaazaa na dil tamannaa.ii
tirii nazar tire gesuu tirii jabii.n tire lab
mirii udaas-tabii.at hai sab se uktaa.ii
mai.n zindagii ke haqaa.eq se bhaag aayaa thaa
ki mujh ko KHud me.n chhupaa.e tirii fusuu.n-zaa.ii
magar yahaa.n bhii ta.aaqub kiyaa haqaa.eq ne
yahaa.n bhii mil na sakii jannat-e-shakebaa.ii
har ek haath me.n le kar hazaar aa.iine
hayaat band dariicho.n se bhii guzar aa.ii
mire har ek taraf ek shor guu.nj uThaa
aur us me.n Duub ga.ii ishrato.n kii shahnaa.ii
kahaa.n talak kare chhup-chhup ke naGma-pairaa.ii
vo dekh saamne ke pur-shikoh aivaa.n se
kisii kiraa.e kii la.Dkii kii chiiKH Takraa.ii
vo phir samaaj ne do pyaar karne vaalo.n ko
sazaa ke taur par baKHshii taviil tanhaa.ii
phir ek tiira-o-taariik jho.npa.Dii ke tale
sisakte bachche pe beva kii aa.nkh bhar aa.ii
vo phir bikii kisii majbuur kii javaa.n beTii
vo phir jhukaa kisii dar par Guruur-e-barnaa.ii
vo phir kisaano.n ke majme.a pe gun-mashiino.n se
huquuq-yaafta tabqe ne aag barsaa.ii
sukuut-e-halqa-e-zindaa.n se ek guu.nj uThii
aur is ke saath mire saathiyo.n kii yaad aa.ii
nahii.n nahii.n mujhe yuu.n multafit nazar se na dekh
nahii.n nahii.n mujhe ab taab-e-naGma-pairaa.ii
miraa junuun-e-vafaa hai zavaal-aamaada
shikast ho gayaa teraa fusuun-e-zebaa.ii

Sahir Ludhianvi
Nazm

mrs-sala-manka

KHudaa hashr me.n ho madad-gaar meraa
ki dekhii hai.n mai.n ne mrs.-saalaa-maa.nkaa kii aa.nkhe.n
mrs.-saalaa-maa.nkaa kii aa.nkhe.n
ki jin ke ufuq hai.n junuubii samundar kii niilii rasaa.ii se aage
junuubii samundar kii niilii rasaa.ii
ki jis ke jaziire hujuum-e-sahar se daraKHshaa.n
daraKHshaa.n jaziiro.n me.n zartaab o unnaab o qurmuz parindo.n kii jaulaa.n-gahe.n
aise phailii hu.ii jaise jannat ke daamaa.n
parinde azal aur abad ke mah o saal me.n baal-afshaa.n!
KHudaa hashr me.n ho madad-gaar meraa
ki mai.n ne liye hai.n mrs.-saalaa-ma.nkaa ke ho.nTo.n ke bose
vo bose ki jin kii halaavat ke chashme
shumaalii zamiino.n ke zartaab o unnaab o qurmuz daraKHto.n
ke mad.hosh baaGo.n se aage
jahaa.n zindagii ke rasiida shaguufo.n ke siino.n
se KHvaabo.n ke ram-diida zambuur lete hai.n ras aur piite hai.n vo
ki jis ke nashe kii jilaa se
zamaano.n kii naadiida mehraab ke do kinaaro.n ke niiche
hai.n yak-baargii guu.nj uThte KHalaa o malaa ke jalaajil
jalaajil ke naGme baham aise paivast hote hai.n jaise
mrs.-saalaa-ma.nikaa ke lab mere lab se!

Noon Meem Rashid
Nazm

aahang-e-nau

ai javaanaan-e-vatan ruuh javaa.n hai to uTho
aa.nkh us mahshar-e-nau kii nigaraa.n hai to uTho
KHauf-e-be-hurmatii-o-fikr-e-ziyaa.n hai to uTho
paas-e-naamuus-e-nigraan-e-jahaa.n hai to uTho
uTho naqqaara-e-aflaak bajaa do uTh kar
ek so.e hu.e aalam ko jagaa do uTh kar
ek ik samt se shab-KHuun kii tayyaarii hai
lutf kaa va.ada hai aur mashq-e-jafaa-kaarii hai
mahfil-e-ziist pe farmaan-e-qazaa jaarii hai
shahr to shahr hai gaa.nv pe bhii bambaarii hai
ye fazaa me.n jo garajte hu.e tayyaare hai.n
barsar-e-dosh-e-havaa maut ke harkaare hai.n
is taraf haatho.n me.n shamshiire.n hii shamshiire.n hai.n
us taraf zehn me.n tadbiire.n hii tadbiire.n hai.n
zulm par zulm hai.n taaziiro.n pe ta.aziire.n hai.n
sar pe talvaar hai aur paa.nv me.n zanjiire.n hai.n
ek ho ek ki ha.ngaama-e-mahshar hai yahii
arsa-e-ziist kaa hangaama-e-akbar hai yahii
apnii sarhad pe jo aGyaar chale aate hai.n
sho.ala-afshaa.n o sharar-baar chale aate hai.n
KHuun piite hu.e sarshaar chale aate hai.n
tum jo uTh jaa.o to be-kaar chale aate hai.n
KHuu.n jo bah niklaa hai us KHuu.n me.n bahaa do un ko
un kii khodii hu.ii KHandaq me.n giraa do un ko
ra.ng-e-gul-haa-e-gulistaan-e-vatan tum se hai
sorish-e-na.ara-e-rindaan-e-vatan tum se hai
nashsha-e-nargis-e-KHuubaan-e-vatan tum se hai
iffat-e-maah-e-jabiinaan-e-vatan tum se hai
tum ho Gairat ke amii.n tum ho sharaafat ke amii.n
aur ye KHatre me.n hai.n ehsaas tumhe.n hai ki nahii.n
ye darinde ye sharaafat ke puraane dushman
tum ki ho haamil-e-aadaab-o-rivaayaat-e-kuhan
jaada-paimaa ke liye KHizr ho tum ye rahzan
tum ho KHirman ke nigahbaan ye barq-e-KHirman
KHitta-e-paak me.n zinhaar na aane paa.e.n
aa hii jaa.e.n jo ye zinda to na jaane paa.e.n
mard-o-zan piir-o-javaa.n in ke mazaalim ke shikaar
KHuun-e-ma.asuum me.n Duubii hu.ii in kii talvaar
ye qayaamat ke havasnaak Gazab ke KHuu.n-KHaar
in ke isyaa.n kii na had hai na jaraa.em kaa shumaar
ye tarahhum se na dekhe.nge kisii kii jaanib
in kii topo.n ke dahan kar do unhii kii jaanib
ye to hai.n fitna-e-bedaar dabaa do in ko
ye miTaa de.nge tamaddun ko miTaa do in ko
phuu.nk do in ko jhulas do ki jilaa do in ko
shaan-e-shaayaan-e-vatan ho ye bataa do in ko
yaad hai tum ko kin aslaaf kii tum yaade.n ho
tum to KHaalid ke pisar bhiim kii aulaade.n ho
tum to tanhaa bhii nahii.n ho ka.ii dam-saaz bhii hai.n
ruus ke mard bhii hai.n chiin ke jaa.n-baaz bhii hai.n
kuchh na kuchh saath fara.ngii ke fusuu.n-saaz bhii hai.n
aur ham jaise bahut zamzama-pardaaz bhii hai.n
duur insaan ke sar se ye musiibat kar do
aag dozaKH kii bujhaa do ise jannat kar do

Asrarul Haq Majaz
Nazm

KHuda ki jagah Khaali hai

sha.nkar Damruu kaa mutabaadil talaash kar chukaa
gopiyaa.n ab kisii uudhau kii muhtaaj nahii.n
trunk call
un kii samasyaa.o.n kaa hal hai
izraa.iil!
atom aur helium ke haq me.n
dast-bardaar hone kii fikr me.n hai
israafiil kii jamaaliyaatii his ko jilaa mil ga.ii
ab vo kisii music-school me.n daaKHila le legaa
food-corporation kaa mutaalbaa:
'mikhail kaa retirement' maan liyaa gayaa hai
wireless-telegraphy kaa mahkama
afsar-e-aalaa ke ohde ke liye
jibra.iil kii darKHvaast par Gaur kar rahaa hai
'KHudaa kii jagah KHaalii hai'
mutamannii hazraat fauran se pesh-tar darKHvaast de.n!

Aashufta Changezi
Nazm

ek jila-watan ki wapsi

phir KHabar garm hai vo jaan-e-vatan aataa hai
phir vo zindaanii-e-zindaan-e-vatan aataa hai
vo KHaraab-e-gul-o-raihaan-e-vatan aataa hai
misr se yuusuf-e-kan.aan-e-vatan aataa hai
''ko.ii ma.ashuuq ba-sad-shaukat-o-naaz aataa hai
surKH bairaq hai samundar me.n jahaaz aataa hai''
ri.nd-e-be-kaif ko thii baada-o-saaGar kii talaash
naazir-e-manzar-e-fitrat ko thii manzar kii talaash
ek bha.nvre ko KHizaa.n me.n thii gul-e-tar kii talaash
KHud sanam-KHaana-e-aazar ko thii aazar kii talaash
muzhda ai dost ki vo jaan-e-bahaar aa pahu.nchaa!
apne daaman me.n liye barq-o-sharaar aa pahu.nchaa!
apnaa parcham vo kuchh is andaaz se lahraataa hai
ra.ng aGyaar ke chehro.n se u.Daa jaataa hai
ko.ii shaadaa.n, ko.ii hairaa.n, ko.ii sharmaataa hai
kaun ye saahil-e-mashriq pe nazar aataa hai
apne maiKHaane kaa ik mai-kash-e-behaal hai ye
haa.n vahii mard-e-javaa.n-baKHt o javaa.n-saal hai ye
mard-e-sarkash tujhe aadam kii kahaanii kii qasam
ruuh-e-insaa.n ke taqaazaa-e-nihaanii kii qasam
jazba-e-aish kii har shorish-e-faanii kii qasam
tujh ko apnii isii bad-mast javaanii kii qasam
aa ki ik baar gale se to lagaa le.n tujh ko
apne aaGosh-e-mohabbat me.n uThaa le.n tujh ko
nutq to ab bhii hai par shola-fishaa.n hai ki nahii.n
soz-e-pinhaa.n se tirii ruuh tapaa.n hai ki nahii.n
tujh pe ye baar Gulaamii kaa giraa.n hai ki nahii.n
jism me.n KHuun javaanii kaa ravaa.n hai ki nahii.n
aur agar hai to phir aa tere parastaar hai.n ham
jins-e-aazaadii-e-insaa.n ke KHariidaar hai.n ham
saaqii o rind tire hai.n mai-e-gulfaam tirii
uTh ki aasuuda hai phir hasrat-e-naakaam tirii
barhaman tere hai.n kul millat-e-islaam tirii
sub.h-e-kaashii tirii, sa.ngam kii hasii.n shaam tirii
dekh shamshiir hai ye saaz hai ye jaam hai ye
tuu jo shamshiir uThaa le to ba.Daa kaam hai ye
dekh badlaa nazar aataa hai gulistaa.n kaa samaa.n
saaGar o saaz na le, ja.ng ke na.are hai.n yahaa.n
ye du.aa.e.n hai.n vo mazluum kii aaho.n kaa dhu.aa.n
maa.il-e-ja.ng nazar aataa hai har mard-e-javaa.n
sarfaroshaan-e-balaa-kash kaa sahaaraa ban jaa
uTh aur aflaak-e-baGaavat kaa sitaaraa ban jaa

Asrarul Haq Majaz
Nazm

cigarette aur pan ka mukalima

jal ke KHud sab ko jilaa denaa tiraa pesha hai
chhup ke baiThii hai ajal jis me.n tuu vo besha hai
jaan le apne hii aashiq kii jo vo tesha hai
tere piine se to sartaan kaa andesha hai
jo tujhe mu.nh se lagaa.e.nge lahuu thuuke.nge
aur bhii chiizo.n ke kash lene se kab chuuke.nge

Syed Mohammad Jafri
Nazm

gandhi

use ittibaa-e-masiih ne vo ajiib dast-e-shifaa diyaa
jo gire the un ko uThaa diyaa jo mare the un ko jalaa diyaa

Iqbal Sohail
Nazm

jila-watani

aaj sarhad pe KHaamosh topo.n ke ho.nTo.n pe
pap.Dii kii tah bhii chaTaKH kar girii hai
har ik roz sub.h savere se taariikiyo.n kii taho.n tak
akelaa hii chaltaa hai suuraj
udaasii se har aa.nkh ko apnii jaanib tavajjoh kii KHaatir
bulaataa hai lekin
nigaahe.n milaane kaa har hausla
har badan me.n
faqat siskiyo.n kii tarah jaagtaa hai
ab faqat aabruu kaa dhu.aa.n kohar ban ke rukaa hai
bas ab bulbulo.n ke tarannum me.n bhii
nauha-e-zindagii ke sitam-KHez tuufaan hai.n
ab faqat mere apne chahiito.n kii laasho.n ke ambaar hai.n
ab to KHar bhii yahaa.n hinhinaate nahii.n
ja.ng-bandii nahii.n sarhade.n bhii nahii.n
ai mirii mujh se ruuThii hu.ii
mere padmaa kii ai zinda-tar sar-zamii.n
merii aa.nkho.n tire aasmaano.n
tirii aur mirii sarhado.n ke vo sab faasle
jo magar qurbato.n ke sivaa kuchh na the
aaj kyuu.n aa.nkh me.n ashk ban ke ruke hai.n
bhalaa kyuu.n mujhe
terii qurbat ke saayo.n ko dhu.ndlaahaTo.n me.n badalte hu.e
dekhne ke liye zinda rahnaa pa.Daa hai

Kishwar Naheed
Nazm

maslahat

chaa.ndnii raat ke ha.nste hu.e KHvaabo.n kii tarah
nuqra.ii jism kaa shaadaab gulistaa.n le kar
shoKH aa.nkho.n ke chhalakte hu.e paimaano.n me.n
mujh tahii-dast ke aalaam kaa darmaa.n le kar
aaj tuu jin ko bujhaane ke liye aa.ii hai
unhii.n sho.alo.n se mire dil ne jilaa paa.ii hai

Naresh Kumar Shad
Nazm

baada-e-nim-ras

tere chehre pe tire jism ke har goshe par
abhii ik aur jilaa aur taraash aa.egii
apne a.azaa ke tanaasub pe ta.ajjub hogaa
pesh-e-aa.iina guzartii hu.ii sharmaa.egii

Saifuddin Saif
Nazm

jila

zainab mai.n terii baa.ndii
tuu aisii baa-hausla
is shaan se jaltii zamiin par chalii
ki sach ko zaruurat na rahii kisii hiil hujjat kii
tere liye aasmaano.n se ko.ii mo.ajiza nahii.n utraa
uj.Daa hu.aa ghar be-bizaa.atii zmiin-o-aasmaan kii saKHtiyaa.n
aur terii istaqaamat
ki is qadar KHuu.n-rezii ke baa'd bhii yaziidii fat.h kaa KHat na le sake
kisii ek fard-e-vaahid se nahii.n
to ek puure Galat nizaam ke muqaabil thii
ye vo maqaam thaa ki taariiKH-daano.n o mohaqqiqiin ne haar jiit ke nazriyaat ko alag andaaz se dekhaa
terii maamtaa ko salaam zainab apne jigar gosho.n kaa Gam uThaa kar KHud ko TuuTne nahii.n diyaa
aivaano.n me.n sar jo.De baiThe ahl-e-siyaasat
kisii natiije par nahii.n pahu.nch paate
ki bachcho.n ko zab.h karne vaale
insaan hai.n musalmaan hai.n
zainab
ma.asuum alii asGar ko zab.h karne vaalo.n ko
tuu ne KHudaa kaa ye farmaan baavar karaayaa thaa
allaah zaalimo.n ko dost nahii.n rakhtaa
karbalaa ek raah-e-hidaayat
raushnii zaraa sii darz kisii jhurrii se daaKHil ho kar
phaile hu.e a.ndhere par Gaalib aa jaatii hai
aur taariikii ko savere me.n badal dene vaale rab ko ma.aluum hai
ki ishq ko baaqii rakhne ke liye lahuu se aabiyaarii kii ga.ii
lahuu bahtaa hai
to zamii.n zar-KHez hotii hai
vo taa.ef ho kuufa ho yaa merii bad-nasiib zamiin
andhaa hujuum haatho.n me.n patthar liye
jilaa ko bujhaa detaa chaahtaa hai
jilaa jo du.aa-go hai
ma.abuud unhe.n baKHsh de ye nahii.n jaante ye kyaa kar rahe hai.n
jilaa baatil ke haatho.n me.n bai.at nahii.n kartii
jilaa masiihaa hai
mujhe masluub karne vaalo shaqii-ul-qalb hukmaraano
bhalaa phuuTtii kirno.n ko bhii ko.ii saliib de sakaa
jilaa zainab hai
jo jale hu.e a.ndhero.n ke ba.ad
hone vaalii uj.Dii sub.h se
us kaThin masaafat ko tai kartii hai
ki bahut sii ghuTan aur hazaar sa.uubato.n ke ba.ad
ek vo maqaam aataa hai
jo taKHt ko nishaan-e-ibrat banaa de

Injila Hamesh
Nazm

aligaDh uniwersity

ek hii aag se har ruuh jilaa paatii hai
ho ga.e ek hii sho.ale me.n sharaare mudGam

Anjum Azmi
Nazm

nazm

shaa.erii
ek mo.ajaza hai
jo zaKHmo.n ko
phuulo.n me.n tabdiil kar detii hai
shaayad mai.n ne Galat kahaa
kyuu.nki ye phuul
ko.ii vaazeh shakl iKHtiyaar nahii.n kar paate
in kaa ko.ii rang nahii.n hotaa
in se ko.ii KHushbuu nahii.n nikaltii
in ko nazmo.n kii kitaab me.n nahii.n rakkhaa jaa saktaa
mahbuuba ko nahii.n diyaa jaa saktaa
dosto.n ko nahii.n bhejaa jaa saktaa
town-hall me.n in kii numaa.ish nahii.n kii jaa saktii
ko.ii bank har roz
in kii qiimat-e-KHariid yaa qiimat-e-faroKHt jaarii nahii.n kartaa
har qism ke jazbe se aarii ye phuul
insaanii taariiKH me.n ko.ii numaayaa.n maqaam
haasil nahii.n kar paa.e.nge
ko.ii inhe.n KHvaabo.n me.n nahii.n dekhegaa
ye kisii sa.Dak ke kinaare nahii.n khele.nge
inhe.n ko.ii kashtii me.n bhar ke nahii.n le jaa.egaa
baGair kisii mausam ke phuuTne vaale ye phuul
shaa.erii kaa mo.ajaza hai.n
aag miTTii havaa aur paanii kii shaayad inhe.n zaruurat hii nahii.n pa.Dtii
ye insaan kii aavaaz ke saath nashv-o-numaa paate hai.n
insaan kii KHaamoshii me.n hamesha zinda rahte hai.n
insaanii lams se jilaa paane vaale ye shaahkaar
insaan kii tarah fanaa nahii.n kiye jaa sakte
hathiyaaro.n kii madad se muta.assir nahii.n kiye jaa sakte
shaa.erii ek mo.ajaza hai
jo zaKHmo.n ko phuulo.n me.n
yaa kisii bhii chiiz ko kisii chiiz me.n badal saktaa hai
zinda rakh saktaa hai

Zeeshan Sahil
Nazm

la bhi hai ek guman

tum ne kyaa dekhaa yahaa.n kuchh bhii nahii.n
ham ne kyaa paayaa yahaa.n kuchh bhii nahii.n
''be-kasii haa.e tamannaa ki na duniyaa hai na dii.n''
''laa'' se aaGaaz fasaane kaa hu.aa
''laa'' se tahziib zamaane kii hu.ii
''laa'' kii tafsiir nahii.n hai mumkin
''laa'' hii se ishq kaa aaGaaz hu.aa
ishq hai ek balaa
ishq saffaak o havasnaak dariida-daaman
jis ke qadmo.n se bipharte hu.e dariyaa umDe
jis kii aa.nkho.n se dahakte hu.e hiire nikle
jis ke haatho.n pe chamakte hu.e mahtaab utre
ishq vo aag ki jo aur jilaa de jaa.e
ishq vo KHvaab ki jo nii.nd u.Daa le jaa.e
is qadar sarkash o saffaak ki bas
dasht-e-kaashaan se dillii kaa safar
''nigah-e-jalva-parast aur nafas-e-sidq-guzii.n''
ik ''ubhai-chand mire naama-e-a.amaal me.n hai
aalam-e-kul KHvaab me.n hai
sa.ng-e-marmar kii usii masjid ke
surKH ziino.n pe lahuu bahtaa hai
aaj bhii kal kii tarah ha.nstaa hai
kufr masjid me.n bahaataa hai lahuu
ishq sajde me.n kahe ''shukr-allaah''
shaahabaad bhii tuufaan me.n bahtaa jaa.e
aur 'daaraa' hai kisii soch me.n Garq
masnad-e-adl sipah-saalaar aur taKHt me.n ham-fikrii hai
ek hai ''mullaa-qavii''

Faheem Shanas Kazmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now