Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sharminda"

Nazm MATCHES FOR "sharminda"

Nazm

daraKHt-e-zard

hadaf ho.nge tumhaaraa kaun tum kis ke hadaf hoge
na jaane vaqt kii paikaar me.n tum kis taraf hoge
hai ran ye zindagii ik ran jo barpaa lamha lamha hai
hame.n is ran me.n kuchh bhii ho kisii jaanib to honaa hai
so ham bhii is nafas tak hai.n sipaahii ek lashkar ke
hazaaro.n saal se jiite chale aa.e hai.n mar mar ke
shuhuud ik fan hai aur merii adaavat be-fano.n se hai
mirii paikaar azal se
ye 'KHusro' 'miir' 'Gaalib' kaa KHaraaba bechtaa kyaa hai
hamaaraa 'Gaalib'-e-aazam thaa chor aaqa-e-'bedil' kaa
so rizq-e-faKHr ab ham khaa rahe hai.n 'miir'-e-bismil kaa
sidhaarat bhii thaa sharminda ki do-aabe kaa baasii thaa
tumhe.n ma.aluum hai urdu jo hai paalii se niklii hai
vo goyaa us kii hii ik pur-numuu Daalii se niklii hai

Jaun Eliya
Nazm

tulu-e-islam

daliil-e-sub.h-e-raushan hai sitaaro.n kii tunuk-taabii
ufuq se aaftaab ubhraa gayaa daur-e-giraa.n-KHvaabii
uruuq-murda-e-mashriq me.n KHuun-e-zindagii dau.Daa
samajh sakte nahii.n is raaz ko siinaa o faaraabii
musalmaa.n ko musalmaa.n kar diyaa tuufaan-e-maGrib ne
talaatum-haa-e-dariyaa hii se hai gauhar kii sairaabii
ataa momin ko phir dargaah-e-haq se hone vaalaa hai
shikoh-e-turkamaanii zehn hindii nutq aaraabii
asar kuchh KHvaab kaa Guncho.n me.n baaqii hai tuu ai bulbul
navaa-raa talKH-tarmii zan chuu zauq-e-naGma kam-yaabii
ta.Dap sehn-e-chaman me.n aashiyaa.n me.n shaaKH-saaro.n me.n
judaa paare se ho saktii nahii.n taqdiir-e-siimaabii
vo chashm-e-paak hai.n kyuu.n ziinat-e-bar-gustavaa.n dekhe
nazar aatii hai jis ko mard-e-Gaazii kii jigar-taabii
zamiir-e-laala me.n raushan charaaG-e-aarzuu kar de
chaman ke zarre zarre ko shahiid-e-justujuu kar de
sarishk-e-chashm-e-muslim me.n hai naisaa.n kaa asar paidaa
KHaliilullaah ke dariyaa me.n ho.nge phir guhar paidaa
kitaab-e-millat-e-baizaa kii phir shiiraaza-bandii hai
ye shaaKH-e-haashmii karne ko hai phir barg-o-bar paidaa
rabuud aa.n turk shiiraazii dil-e-tabrez-o-kaabul raa
sabaa kartii hai buu-e-gul se apnaa ham-safar paidaa
agar usmaaniyo.n par koh-e-Gam TuuTaa to kyaa Gam hai
ki KHuun-e-sad-hazaar-anjum se hotii hai sahar paidaa
jahaa.nbaanii se hai dushvaar-tar kaar-e-jahaa.n-biinii
jigar KHuu.n ho to chashm-e-dil me.n hotii hai nazar paidaa
hazaaro.n saal nargis apnii be-nuurii pe rotii hai
ba.Dii mushkil se hotaa hai chaman me.n diida-var paidaa
navaa-pairaa ho ai bulbul ki ho tere tarannum se
kabuutar ke tan-e-naazuk me.n shaahii.n kaa jigar paidaa
tire siine me.n hai poshiida raaz-e-zindagii kah de
musalmaa.n se hadiis-e-soz-o-saaz-e-zindagii kah de
KHudaa-e-lam-yazal kaa dast-e-qudrat tuu zabaa.n tuu hai
yaqii.n paidaa kar ai Gaafil ki maGluub-e-gumaa.n tuu hai
pare hai charKH-e-niilii-faam se manzil musalmaa.n kii
sitaare jis kii gard-e-raah ho.n vo kaarvaa.n to hai
makaa.n faanii makii.n faanii azal teraa abad teraa
KHudaa kaa aaKHirii paiGaam hai tuu jaavedaa.n tuu hai
Hinaa-band-e-uruus-e-laala hai KHuun-e-jigar teraa
tirii nisbat baraahiimii hai memaar-e-jahaa.n tuu hai
tirii fitrat amii.n hai mumkinaat-e-zindagaanii kii
jahaa.n ke jauhar-e-muzmar kaa goyaa imtihaa.n to hai
jahaan-e-aab-o-gil se aalam-e-jaaved kii KHaatir
nubuvvat saath jis ko le ga.ii vo armuGaa.n tuu hai
ye nukta sarguzisht-e-millat-e-baizaa se hai paidaa
ki aqvaam-e-zamiin-e-asia kaa paasbaa.n tuu hai
sabaq phir pa.Dh sadaaqat kaa adaalat kaa shujaa.at kaa
liyaa jaa.egaa tujh se kaam duniyaa kii imaamat kaa
yahii maqsuud-e-fitrat hai yahii ramz-e-musalmaanii
uKHuvvat kii jahaa.ngiirii mohabbat kii faraavaanii
butaan-e-ra.ng-o-KHuu.n ko to.D kar millat me.n gum ho jaa
na tuuraanii rahe baaqii na iiraanii na afGaanii
miyaan-e-shaaKH-saaraa.n sohbat-e-murG-e-chaman kab tak
tire baazuu me.n hai parvaaz-e-shaahiin-e-qahastaanii
gumaa.n-aabaad hastii me.n yaqii.n mard-e-musalmaa.n kaa
bayaabaa.n kii shab-e-taariik me.n qindiil-e-rohbaanii
miTaayaa qaisar o kisraa ke istibdaad ko jis ne
vo kyaa thaa zor-e-haidar faqr-e-buu-zar sidq-e-salmaanii
hu.e ahraar-e-millat jaada-paimaa kis tajammul se
tamaashaa.ii shigaaf-e-dar se hai.n sadiyo.n ke zindaanii
sabaat-e-zindagii iimaan-e-mohkam se hai duniyaa me.n
ki almaanii se bhii paa.enda-tar niklaa hai tuuraanii
jab is a.ngaara-e-KHaakii me.n hotaa hai yaqii.n paidaa
to kar letaa hai ye baal-o-par-e-ruuh-ul-amii.n paidaa
Gulaamii me.n na kaam aatii hai.n shamshiire.n na tadbiire.n
jo ho zauq-e-yaqii.n paidaa to kaT jaatii hai.n zanjiire.n
ko.ii andaaza kar saktaa hai us ke zor-e-baazuu kaa
nigaah-e-mard-e-momin se badal jaatii hai.n taqdiire.n
vilaayat paadshaahii ilm-e-ashiyaa kii jahaa.ngiirii
ye sab kyaa hai.n faqat ik nukta-e-iimaa.n kii tafsiire.n
baraahiimii nazar paidaa magar mushkil se hotii hai
havas chhup chhup ke siino.n me.n banaa letii hai tasviire.n
tamiiz-e-bandaa-o-aaqaa fasaad-e-aadmiyat hai
hazar ai chiira-dastaa.n saKHt hai.n fitrat kii ta.aziire.n
haqiiqat ek hai har shai kii KHaakii ho ki nuurii ho
lahuu KHurshiid kaa Tapke agar zarre kaa dil chiire.n
yaqii.n mohkam amal paiham mohabbat faatah-e-aalam
jihaad-e-zindagaanii me.n hai.n ye mardo.n kii shamshiire.n
che baayad mard raa tab-e-buland mashrab-e-naabe
dil-e-garme nigaah-e-paak-biine jaan-e-betaabe
uqaabii shaan se jhapTe the jo be-baal-o-par nikle
sitaare shaam ke KHuun-e-shafaq me.n Duub kar nikle
hu.e madfuun-e-dariyaa zer-e-dariyaa tairne vaale
tamaa.nche mauj ke khaate the jo ban kar guhar nikle
Gubaar-e-rahguzar hai.n kiimiyaa par naaz thaa jin ko
jabiine.n KHaak par rakhte the jo iksiir-gar nikle
hamaaraa narm-rau qaasid payaam-e-zindagii laayaa
KHabar detii thii.n jin ko bijliyaa.n vo be-KHabar nikle
haram rusvaa hu.aa piir-e-haram kii kam-nigaahii se
javaanaan-e-tataarii kis qadar saahab-nazar nikle
zamii.n se nuuryaan-e-aasmaa.n-parvaaz kahte the
ye KHaakii zinda-tar paa.enda-tar taabinda-tar nikle
jahaa.n me.n ahl-e-iimaa.n suurat-e-KHurshiid jiite hai.n
idhar Duube udhar nikle udhar Duube idhar nikle
yaqii.n afraad kaa sarmaaya-e-taamiir-e-millat hai
yahii quvvat hai jo suurat-gar-e-taqdiir-e-millat hai
tuu raaz-e-kun-fakaa.n hai apnii aa.nkho.n par ayaa.n ho jaa
KHudii kaa raaz-daa.n ho jaa KHudaa kaa tarjumaa.n ho jaa
havas ne kar diyaa hai Tuk.De Tuk.De nau-e-insaa.n ko
uKHuvvat kaa bayaa.n ho jaa mohabbat kii zabaa.n ho jaa
ye hindii vo KHuraasaanii ye afGaanii vo tuuraanii
tuu ai sharminda-e-saahil uchhal kar be-karaa.n ho jaa
Gubaar-aaluuda-e-ra.ng-o-nasab hai.n baal-o-par tere
tuu ai murG-e-haram u.Dne se pahle par-fishaa.n ho jaa
KHudii me.n Duub jaa Gaafil ye sirr-e-zindagaanii hai
nikal kar halqa-e-shaam-o-sahar se jaavedaa.n ho jaa
masaaf-e-zindagii me.n siirat-e-faulaad paidaa kar
shabistaan-e-mohabbat me.n hariir o parniyaa.n ho jaa
guzar jaa ban ke sail-e-tund-rau koh o bayaabaa.n se
gulistaa.n raah me.n aa.e to juu-e-naGma-KHvaa.n ho jaa
tire ilm o mohabbat kii nahii.n hai intihaa ko.ii
nahii.n hai tujh se ba.Dh kar saaz-e-fitrat me.n navaa ko.ii
abhii tak aadmii said-e-zabuun-e-shahryaarii hai
qayaamat hai ki insaa.n nau-e-insaa.n kaa shikaarii hai
nazar ko KHiira kartii hai chamak tahziib-e-haazir kii
ye sannaa.ii magar jhuuTe niguu.n kii reza-kaarii hai
vo hikmat naaz thaa jis par KHirad-mandaan-e-maGrib ko
havas ke panja-e-KHuunii.n me.n teG-e-kaar-zaarii hai
tadabbur kii fusuu.n-kaarii se mohkam ho nahii.n saktaa
jahaa.n me.n jis tamaddun kii binaa sarmaaya-daarii hai
amal se zindagii bantii hai jannat bhii jahannam bhii
ye KHaakii apnii fitrat me.n na nuurii hai na naarii hai
KHarosh-aamoz bulbul ho girah Gunche kii vaa kar de
ki tuu is gulsitaa.n ke vaaste baad-e-bahaarii hai
phir uTThii asia ke dil se chi.ngaarii mohabbat kii
zamii.n jaulaa.n-gah-e-atlas qabaayaan-e-tataarii hai
bayaa paidaa KHariidaa raast jaan-e-naa-tavaan-e-raa
pas az muddat guzaar uftaad barmaa kaarvaane raa
bayaa saaqii navaa-e-murG-zaar az shaaKH-saar aamad
bahaar aamad nigaar aamad nigaar aamad qaraar aamad
kashiid abr-e-bahaarii KHema andar vaadii o sahraa
sadaa-e-aabshaaraa.n az faraaz-e-koh-saar aamad
sarat gardam toham qaanuun peshii.n saaz dah saaqii
ki KHail-e-naGma-pardaazaa.n qataar andar qataar aamad
kanaar az zaahidaa.n bar-giir o bebaakaana saaGar-kash
pas az muddat azii.n shaaKH-e-kuhan baa.ng-e-hazaar aamad
ba-mushtaaqaa.n hadiis-e-KHvaajaa-e-badro hunain aavar
tasarruf-haa-e-pinhaanash ba-chashm-e-aashkaar aamad
digar shaaKH-e-KHaliil az KHuun-e-maa namnaak mii gardad
ba-baazaar-e-mohabbat naqd-e-maa kaamil ayyaar aamad
sar-e-KHaak-e-shahiire barg-haa-e-laala mii paasham
ki KHuunash baa-nihaal-e-millat-e-maa saazgaar aamad
bayaa taa-gul baa-afmaishaaniim o mai dar saaGar andaazem
falak raa saqf ba-shagaafem o tarh-e-diigar andaazem

Allama Iqbal
Nazm

farar

apne maazii ke tasavvur se hiraasaa.n huu.n mai.n
apne guzre hu.e ayyaam se nafrat hai mujhe
apnii be-kaar tamannaa.o.n pe sharminda huu.n
apnii be-suud umiido.n pe nadaamat hai mujhe

Sahir Ludhianvi
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

yaksui

ahd-e-gum-gashta kii tasviir dikhaatii kyuu.n ho
ek aavaara-e-manzil ko sataatii kyuu.n ho
vo hasii.n ahd jo sharminda-e-iifaa na hu.aa
us hasii.n ahd kaa mafhuum jataatii kyuu.n ho
zindagii sho.ala-e-be-baak banaa lo apnii
KHud ko KHaakistar-e-KHaamosh banaatii kyuu.n ho
mai.n tasavvuf ke maraahil kaa nahii.n huu.n qaa.il
merii tasviir pe tum phuul cha.Daatii kyuu.n ho
kaun kahtaa hai ki aa.he.n hai.n masaa.ib kaa ilaaj
jaan ko apnii abas rog lagaatii kyuu.n ho
ek sarkash se mohabbat kii tamannaa rakh kar
KHud ko aa.iin ke phando.n me.n pha.nsaatii kyuu.n ho
mai.n samajhtaa huu.n taqaddus ko tamaddun kaa fareb
tum rusuumaat ko iimaan banaatii kyuu.n ho
jab tumhe.n mujh se ziyaada hai zamaane kaa KHayaal
phir mirii yaad me.n yuu.n ashk bahaatii kyuu.n ho
tum me.n himmat hai to duniyaa se baGaavat kar do
varna maa.n baap jahaa.n kahte hai.n shaadii kar lo

Sahir Ludhianvi
Nazm

kuchh log

aur ham us kii hairaanii par sharminda ho kar rah jaate
kuchh aur hamaaraa matlab thaa phir der talak ye samjhaate

Fahmida Riaz
Nazm

mahatma-gandhi ka qatl

har ilm-o-yaqii.n se baalaa-tar tuu hai vo sipehr-e-taabinda
suufii kii jahaa.n niichii hai nazar shaa.ir kaa tasavvur sharminda

Anand Narayan Mulla
Nazm

shaeri pura mard aur puri aurat mangti hai

tum ko kyaa ma.aluum mohabbat kyaa hotii hai
tum ko kyaa ma.aluum judaa.ii kii shab kaise kaTtii hai
aur din kitne viiraa.n hote hai.n
tum ko kyaa hai
tum to apnii biiviyo.n se bhii
Dare Dare
sharminda sharminda ham-bistarii karte ho
tum ko kyaa ma.aluum hai
shaa.erii
puuraa mard aur puurii aurat maa.ngtii hai

Hasan Abbas Raza
Nazm

qissa gul-baadshah ka

baap kaa naam zar-taaj-gul
umar battiis baras
vo mujaahid shahaadat kaa taalib raah-e-haq kaa musaafir hu.aa
aur jaam-e-shahaadat bhii us ne
apne bhaa.ii ke haatho.n piyaa
jo shumaalii mujaahid thaa
aur panj-vaqta namaazii bhii thaa
mas.ala is shahaadat kaa pechiida hai
is ko behtar yahii hai yahii.n chho.D de.n
ab bahar-haal baabaa to jannat me.n hai
us ke haatho.n me.n jaam-e-tuhuur
us kii baa.nho.n me.n huur o qusuur
merii taqdiir me.n bam-dhamaake dhu.aa.n
pighaltii hu.ii ye zamiin
bikhartaa hu.aa aasmaa.n
baad-az-marg vo zinda hai
zindagii mujh se sharminda hai

Zehra Nigaah
Nazm

musafir

mire vatan tirii KHidmat me.n le kar aayaa huu.n
jagah jagah ke tilismaat des des ke ra.ng
puraane zehn kii raakh aur na.e dilo.n kii uma.ng
na dekh aisii nigaaho.n se mere KHaalii haath
na yuu.n ho merii tahii-daamanii se sharminda
base hu.e hai.n mire dil me.n saik.Do.n tohfe
bahut se Gam ka.ii KHushiyaa.n ka.ii anokhe log
kahii.n se kaif hii kaif aur kahii.n se dard hii dard
jinhe.n uThaa nahii.n saktaa har ek dasht-navard
jo thailiyo.n ke shikam me.n samaa nahii.n sakte
jo suitcase kii jebo.n me.n aa nahii.n sakte

Mustafa Zaidi
Nazm

ai hijr-zada shab

dekh aaj tamannaa.o.n kii be-samt havaa.e.n
dil-e-sharminda-nazar ko
phir le ke chalii hai.n vahii be-raKHt havaa.e.n
usii jaaduu ke nagar ko
jis KHaak pe utre the muraado.n ke sahiife
sankii thii jahaa.n sabz havaa, kuu-e-vafaa kii
mahke the jahaa.n phuul-sifat rang kisii ke
us KHaak kaa har ruup mire vaaste zindaan
kuchh ruuThe hu.e KHvaab hai.n kuchh TuuTe hu.e maan
kuchh barse hu.e abr hai.n kuchh tarse hu.e lab
ai hijr-zada shab
aa tuu hii gale lag ke bataa kaun yahaa.n hai
juz KHud-sarii-e-mauj-e-havaa kaun yahaa.n hai
hamdard miraa tere sivaa kaun yahaa.n hai
aa chuum luu.n aa.nkhe.n tirii ruKHsaar tire lab
ai hijr-zada shab

Amjad Islam Amjad
Nazm

ek shaer ek nazm

apne shahsavaaro.n ko
qatl karne vaalo.n se
KHuu.n-bahaa talab karnaa
vaariso.n pe vaajib thaa
qaatilo.n pe vaajib thaa
KHuu.n-bahaa adaa karnaa
vaajibaat kii takmiil
munsifo.n pe vaajib thii
munsifo.n kii nigraanii
qudsiyo.n pe vaajib thii
vaqt kii adaalat me.n
ek samt masnad thii
ek samt KHanjar thaa
taaj-e-zar-nigaar ik samt
ek samt lashkar thaa
ik taraf muqaddar thaa
taa.ife pukaar uTThe
taaj-o-taKHt zindaabaad
saaz-o-raKHt zindaabaad
saaz-o-raKHt zindaabaad
KHalq ham se kahtii hai
saaraa maajraa likkhe.n
kis ne kis tarah paayaa
apnaa KHuu.n-bahaa likkhe.n
chashm-e-nam se sharminda
ham qalam se sharminda
sochte hai.n
kyaa likkhe.n

Iftikhar Arif
Nazm

ab wo kya kar raha hoga

ab mujhe kisii aur se mohabbat ho ga.ii hai
aur vo mujh se nafrat kar rahaa hogaa
mai.n KHush huu.n kitnii
vo apne ghar me.n udaas hogaa
meraa haath kisii aur ke haath me.n dekh kar
haath vo apne mal rahaa hogaa
merii baato.n me.n kisii aur ke lafz sun kar
apne lafzo.n par sharminda ho rahaa hogaa
merii aa.nkho.n me.n kisii aur kaa aks dekh kar
apnii hii nazro.n me.n gir rahaa hogaa
mai.n masruur huu.n kisii kii ho kar
ye soch kar vo KHud se hii kaT rahaa hogaa
ab merii baato.n me.n vo lafz-e-mohmal kii tarah hai
vo apnii yaado.n me.n mujhe tafsiil se soch rahaa hogaa
achchhaa vaqt jo guzraa thaa saath me.n us ke
use vo vaqt bahut buraa lag rahaa hogaa
mai.n kisii kii ho chukii dil-o-jaan se ab
aur vo KHud se judaa ho chukaa hogaa
ab mujhe kisii aur se mohabbat ho ga.ii hai
aur vo mujh se nafrat kar rahaa hogaa

Maryam Tasleem Kiyani
Nazm

targhib aur uske baad

tarGiib:
phir mai.n kaam me.n lag jaa.uu.ngaa aa fursat hai pyaar kare.n
naagin sii bal khaatii uTh aur merii god me.n aan machal
bhed-bhaav kii bastii me.n ko.ii bhed-bhaav kaa naam na le
hastii par yuu.n chhaa jaa ba.Dh kar sharminda ho jaa.e ajal
chho.D ye laaj kaa ghuu.ngat kab tak rahegaa in aa.nkho.n ke saath
cha.Dhtii raat hai Dhaltaa suuraj kha.Dii kha.Dii mat paa.nv mal
phir ye jaaduu so jaa.egaa samay jo biitaa gahrii nii.nd
jo kuchh hai anmol hai ab tak ek ik lamha ek ik pal
bin chhuu.ii miTTii kii KHushbuu us kaa suu.ndhaa suu.ndhaa-pan
sab kuchh chhin jaa.egaa ik din ab bhii vaqt hai dekh sambhal
narm rago.n me.n miiThii miiThii Tiis jo ye uThtii hai aaj
ba.Dhtii mauj kaa relaa hai ik, Tiis na uThegii kal
mast rasiilii aa.nkho.n se ye chhalkii chhalkii sii ik shai
jis ne aaj apnaayaa is ko samjho us ke car saphal
mai.n tere sho.alo.n se kheluu.n tuu bhii merii aag se khel
mai.n bhii terii nii.nd chuuraa.uu.n tuu bhii merii niinde.n chhal
narm havaa ke jho.nko.n hii se khultii hai phuulo.n kii aa.nkh
varna barso.n saath rahe hai.n Thahraa paanii band ka.nval!

Akhtarul Iman
Nazm

ek KHwab aur

KHvaab ab husn-e-tasavvur ke ufuq se hai.n pare
dil ke ik jazba-e-maasuum ne dekhe the jo KHvaab
aur ta.abiiro.n ke tapte hu.e sahraa.o.n me.n
tishnagii aabla-paa shola-ba-kaf mauj-e-saraab
ye to mumkin nahii.n bachpan kaa ko.ii din mil jaa.e
yaa palaT aa.e ko.ii saa.at-e-naayaab-e-shabaab
phuuT nikle kisii afsurda tabassum se kiran
yaa damak uTThe kisii dast-e-buriida me.n gulaab
aah patthar kii lakiire.n hai.n ki yaado.n ke nuquush
kaun likh saktaa hai phir umr-e-guzishta kii kitaab
biite lamhaat ke so.e hu.e tuufaano.n me.n
tairte phirte hai.n phuuTii hu.ii aa.nkho.n ke hubaab
taabish-e-ra.ng-e-shafaq aatish-e-ruu-e-KHurshiid
mil ke chehre pe sahar aa.ii hai KHuun-e-ahbaab
jaane kis mo.D pe kis raah me.n kyaa biitii hai
kis se mumkin hai tamannaa.o.n ke zaKHmo.n kaa hisaab
aastiino.n ko pukaare.nge kahaa.n tak aa.nsuu
ab to daaman ko paka.Dte hai.n lahuu ke girdaab
dekhtii phirtii hai ek ek mu.nh KHaamoshii
jaane kyaa baat hai sharminda hai andaaz-e-KHitaab
dar-ba-dar Thokare.n khaate hu.e phirte hai.n savaal
aur mujrim kii tarah un se gurezaa.n hai javaab
sarkashii phir mai.n tujhe aaj sadaa detaa huu.n
mai.n tiraa shaa.ir-e-aavaara o be-baak-o-KHaraab
phe.nk phir jazba-e-be-taab kii aalam pe kamand
ek KHvaab aur bhii ai himmat-e-dushvaar-pasand

Ali Sardar Jafri
Nazm

tahzib

ye mashriq hai
yahaa.n tahziib kam
ta.aliim kam
aKHlaaq kam
tamaddun kam
saqaafat kam
sukuu.n Gaa.eb
nahii.n insaan me.n insaaniyat baaqii ko.ii
yahaa.n insaan kii qiimat nahii.n hai
har ik jaanib bapaa hai
qatl-o-Gaarat
Gazab hai
jang hai
us par mukammal be-hisii hai
mai.n KHud bhii mashriqii huu.n
aur mujhe is par nadaamat hai
magar is fikr-e-sharminda ko phir bhii
jasaarat hai
ki mai.n ye sochtaa huu.n
ye sab naa-zebaa aur makruuh hathiyaar
jo mere sabza-zaaro.n ko
jo mere regzaaro.n ko
dhu.e.n kii
KHuun kii
qabro.n kii
aur makruuh chiiKHo.n kii
javaa.n sauGaat dete hai.n
vo sab maGrib me.n bante hai.n
mai.n apne aap se hairaan ho kar itnaa kahtaa huu.n
ki maGrib to mohazzab hai

Asim Wasti
Nazm

ham-zad

vo ik shaKHs jis kii shabaahat se mujh ko
bahut KHvaar o sharminda honaa pa.Daa thaa
qabaa ruuh kii malgajii ho ga.ii thii
ka.ii baar daaman ko dhonaa pa.Daa thaa
vo mujh jaisii aa.nkhe.n jabii.n ho.nT abruu
ki baaqii na thaa kuchh bhii farq-e-man-o-tuu
vahii chaal aavaaz qad rang maddham
vahii tarz-e-guftaar Thahraa.o kam kam
KHudaa jaane kyaa kyaa mashaaGil the us ke
mire paas log aa.e aa aa ke lauTe
ka.ii mujh se uljhe ka.ii mujh se jhag.De
mai.n rotaa rahaa be-gunaahii kaa ronaa
mire jurm par log the qahqaha-zan
na kaam aayaa apnii tabaahii kaa ronaa
vo zulmat me.n chhup chhup ke din kaaTtaa thaa
mai.n din ke ujaale me.n maaraa gayaa thaa
sunaa raat vo mar gayaa kyaa Gazab hai
use dafn kar aa.e logo.n ko dekho
mai.n kam-baKHt nazro.n se ojhal hii kab thaa
ye kyaa kar diyaa haa.e logo.n ko dekho

Shaz Tamkanat
Nazm

ye kaisi jang hai

nikal ke dekho kabhii atomii hisaaro.n se
tamaam aalam-e-insaaniyat hai sharminda

Shariq Adeel
Nazm

kahani jo kho gai

merii kahaanii raste me.n
jaane kahaa.n pe kho ga.ii jii
dil me.n bahut sharminda huu.n
bhuul ye mujh se ho ga.ii jii
mai.n jab apne ghar se chalii
sa.Dak sa.Dak aur galii galii
kahii.n miThaa.ii rakkhii thii
vahii.n ba.Dii sii makkhii thii
makkhii bolii bhin bhin bhin
jaa.o na tum T.v mujh bin
naachuu.ngii aur gaa.uu.ngii
apne hunar dikhlaa.uu.ngii
mai.n ne kahaa kyaa gaa.ogii
biimaarii phailaa.ogii
makkhii u.D ga.ii jaldii se
mai.n bhii mu.D ga.ii jaldii se
mo.D pe chi.Diyaa baiThii thii
meraa rasta taktii thii
kahne lagii vo chuu.n chuu.n chuu.n
mai.n bhii tumhaare saath chaluu.n
naachuu.ngii aur gaa.uu.ngii
apne hunar dikhlaa.uu.ngii
paas hii chii.n chii.n hone lagii
baby chi.Diyaa rone lagii
mai.n ne kahaa is ko bahlaa.o
daal kaa daana le ke jaa.o
u.D ga.ii kah ke jaa.uu.n jaa.uu.n
billii bolii myaa.un myaa.un
naachuu.ngii aur gaa.uu.ngii
apne hunar dikhlaa.uu.ngii
mai.n us se katraane lagii
bas yuu.nhii samjhaane lagii
chuuhe agar sun paa.e.nge
kaisaa mazaaq u.Daa.e.nge
billii ko chuuhe yaad aa.e
us ne panje lahraa.e
panje me.n uljhaa Gubbaara
saamne thaa ik favvaara
favvaare ke paas vahaa.n
munnuu ke bhaa.ii chunnuu miyaa.n
god me.n jo the aayaa kii
kyaa jaane.n vo chaalaakii
aaj hame.n bhii le ke chalo
television station ko
mai.n ne un ko toffee dii
unho.n ne mujh ko mu.aafii dii
phir mai.n aa.ii aap ke paas
nahii.n kahaanii mere paas
merii kahaanii raste me.n
jaane kahaa.n pe kho ga.ii jii
dil me.n bahut sharminda huu.n
bhuul ye mujh se ho ga.ii jii

Rais Farogh
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now