Sher on Gham

un kā ġham un kā tasavvur un ke shikve ab kahāñ

ab to ye bāteñ bhī ai dil ho ga.iiñ aa.ī ga.ī

un ka gham un ka tasawwur un ke shikwe ab kahan

ab to ye baaten bhi ai dil ho gain aai gai

dil dabā jaatā hai kitnā aaj ġham ke baar se

kaisī tanhā.ī Tapaktī hai dar o dīvār se

dil daba jata hai kitna aaj gham ke bar se

kaisi tanhai Tapakti hai dar o diwar se

sivā.e rañj kuchh hāsil nahīñ hai is ḳharābe meñ

ġhanīmat jaan jo ārām tū ne koī dam paayā

siwae ranj kuchh hasil nahin hai is KHarabe mein

ghanimat jaan jo aaram tu ne koi dam paya

daulat-e-ġham bhī ḳhas-o-ḳhāk-e-zamān meñ ga.ī

tum ga.e ho to mah o saal kahāñ Thahre haiñ

daulat-e-gham bhi KHas-o-KHak-e-zaman mein gai

tum gae ho to mah o sal kahan Thahre hain

ye kis maqām pe laa.ī hai zindagī ham ko

hañsī laboñ pe hai siine meñ ġham kā daftar hai

ye kis maqam pe lai hai zindagi hum ko

hansi labon pe hai sine mein gham ka daftar hai

ġham se bikhrā na pā.emāl huā

maiñ to ġham se hī be-misāl huā

gham se bikhra na paemal hua

main to gham se hi be-misal hua

apne chehre se jo zāhir hai chhupā.eñ kaise

terī marzī ke mutābiq nazar aa.eñ kaise

apne chehre se jo zahir hai chhupaen kaise

teri marzi ke mutabiq nazar aaen kaise

ġham kī duniyā rahe ābād 'shakīl'

muflisī meñ koī jāgīr to hai

gham ki duniya rahe aabaad 'shakil'

muflisi mein koi jagir to hai

ġham de gayā nashāt-e-shanāsā.ī le gayā

vo apne saath apnī masīhā.ī le gayā

gham de gaya nashat-e-shanasai le gaya

wo apne sath apni masihai le gaya

musībat aur lambī zindagānī

buzurgoñ kī duā ne maar Daalā

musibat aur lambi zindagani

buzurgon ki dua ne mar Dala

vo bhalā kaise batā.e ki ġham-e-hijr hai kyā

jis ko āġhosh-e-mohabbat kabhī hāsil na huā

wo bhala kaise batae ki gham-e-hijr hai kya

jis ko aaghosh-e-mohabbat kabhi hasil na hua

ye ġham-kada hai is meñ 'mubārak' ḳhushī kahāñ

ġham ko ḳhushī banā koī pahlū nikāl ke

ye gham-kada hai is mein 'mubarak' KHushi kahan

gham ko KHushi bana koi pahlu nikal ke

vo ta.alluq hai tire ġham se ki allāh allāh

ham ko hāsil ho ḳhushī bhī to gavārā na kareñ

wo talluq hai tere gham se ki allah allah

hum ko hasil ho KHushi bhi to gawara na karen

ai ġham-e-zindagī na ho nārāz

mujh ko aadat hai muskurāne kī

ai gham-e-zindagi na ho naraaz

mujh ko aadat hai muskurane ki

bedard mujh se sharh-e-ġham-e-zindagī na pūchh

kaafī hai is qadar ki jiye jā rahā huuñ maiñ

bedard mujh se sharh-e-gham-e-zindagi na puchh

kafi hai is qadar ki jiye ja raha hun main

ġham-e-hayāt o ġham-e-dost kī kashākash meñ

ham aise log to rañj-o-malāl se bhī ga.e

gham-e-hayat o gham-e-dost ki kashakash mein

hum aise log to ranj-o-malal se bhi gae

sharbat kā ghūñT jaan ke piitā huuñ ḳhūn-e-dil

ġham khāte khāte muñh kā maza tak bigaḌ gayā

sharbat ka ghunT jaan ke pita hun KHun-e-dil

gham khate khate munh ka maza tak bigaD gaya

dil gayā raunaq-e-hayāt ga.ī

ġham gayā saarī kā.enāt ga.ī

dil gaya raunaq-e-hayat gai

gham gaya sari kaenat gai

ġham-e-jahān o ġham-e-yār do kināre haiñ

udhar jo Duube vo aksar idhar nikal aa.e

gham-e-jahan o gham-e-yar do kinare hain

udhar jo Dube wo aksar idhar nikal aae

hameñ duniyā meñ apne ġham se matlab

zamāne kī ḳhushī se vāstā kyā

hamein duniya mein apne gham se matlab

zamane ki KHushi se wasta kya

jab tujhe yaad kar liyā sub.h mahak mahak uThī

jab tirā ġham jagā liyā raat machal machal ga.ī

jab tujhe yaad kar liya subh mahak mahak uThi

jab tera gham jaga liya raat machal machal gai

jam.a ham ne kiyā hai ġham dil meñ

is kā ab suud khaa.e jā.eñge

jama hum ne kiya hai gham dil mein

is ka ab sud khae jaenge

haa.e kitnā latīf hai vo ġham

jis ne baḳhshā hai zindagī kā shu.ūr

hae kitna latif hai wo gham

jis ne baKHsha hai zindagi ka shuur

ġhamoñ par muskurā lete haiñ lekin muskurā kar ham

ḳhud apnī hī nazar meñ chor se ma.alūm hote haiñ

ghamon par muskura lete hain lekin muskura kar hum

KHud apni hi nazar mein chor se malum hote hain

ab kārgah-e-dahr meñ lagtā hai bahut dil

ai dost kahīñ ye bhī tirā ġham to nahīñ hai

ab kargah-e-dahr mein lagta hai bahut dil

ai dost kahin ye bhi tera gham to nahin hai

zamāne bhar ke ġham yā ik tirā ġham

ye ġham hogā to kitne ġham na hoñge

zamane bhar ke gham ya ek tera gham

ye gham hoga to kitne gham na honge

ulfat kā hai maza ki 'asar' ġham bhī saath hoñ

tārīkiyāñ bhī saath raheñ raushnī ke saath

ulfat ka hai maza ki 'asar' gham bhi sath hon

tarikiyan bhi sath rahen raushni ke sath

tum se ab kyā kaheñ vo chiiz hai dāġh-e-ġham-e-ishq

ki chhupā.e na chhupe aur dikhā.e na bane

tum se ab kya kahen wo chiz hai dagh-e-gham-e-ishq

ki chhupae na chhupe aur dikhae na bane

ġhamoñ par muskurā lete haiñ lekin muskurā kar ham

ḳhud apnī hī nazar meñ chor se ma.alūm hote haiñ

ghamon par muskura lete hain lekin muskura kar hum

KHud apni hi nazar mein chor se malum hote hain

fikr-e-jahān dard-e-mohabbat firāq-e-yār

kyā kahiye kitne ġham haiñ mirī zindagī ke saath

fikr-e-jahan dard-e-mohabbat firaq-e-yar

kya kahiye kitne gham hain meri zindagi ke sath

agar maujeñ Dubo detīñ to kuchh taskīn ho jaatī

kināroñ ne Duboyā hai mujhe is baat kā ġham hai

agar maujen Dubo detin to kuchh taskin ho jati

kinaron ne Duboya hai mujhe is baat ka gham hai

ham ko kis ke ġham ne maarā ye kahānī phir sahī

kis ne toḌā dil hamārā ye kahānī phir sahī

hum ko kis ke gham ne mara ye kahani phir sahi

kis ne toDa dil hamara ye kahani phir sahi

phir mirī aas baḌhā kar mujhe māyūs na kar

hāsil-e-ġham ko ḳhudā-rā ġham-e-hāsil na banā

phir meri aas baDha kar mujhe mayus na kar

hasil-e-gham ko KHuda-ra gham-e-hasil na bana

ġham-e-dil ab kisī ke bas kā nahīñ

kyā davā kyā duā kare koī

gham-e-dil ab kisi ke bas ka nahin

kya dawa kya dua kare koi

saarī duniyā ke ranj-o-ġham de kar

muskurāne kī baat karte ho

sari duniya ke ranj-o-gham de kar

muskurane ki baat karte ho

lazzat-e-ġham to baḳhsh dī us ne

hausle bhī 'adam' diye hote

lazzat-e-gham to baKHsh di us ne

hausle bhi 'adam' diye hote

ġham hai na ab ḳhushī hai na ummīd hai na yaas

sab se najāt paa.e zamāne guzar ga.e

gham hai na ab KHushi hai na ummid hai na yas

sab se najat pae zamane guzar gae

har tafsīl meñ jaane vaalā zehn savāl kī zad par hai

har tashrīh ke pīchhe hai anjām se Dar jaane kā ġham

har tafsil mein jaane wala zehn sawal ki zad par hai

har tashrih ke pichhe hai anjam se Dar jaane ka gham

haa.e vo rāz-e-ġham ki jo ab tak

tere dil meñ mirī nigāh meñ hai

hae wo raaz-e-gham ki jo ab tak

tere dil mein meri nigah mein hai

ik ik qadam pe rakkhī hai yuuñ zindagī kī laaj

ġham kā bhī ehtirām kiyā hai ḳhushī ke saath

ek ek qadam pe rakkhi hai yun zindagi ki laj

gham ka bhi ehtiram kiya hai KHushi ke sath

are o āsmāñ vaale batā is meñ burā kyā hai

ḳhushī ke chaar jhoñke gar idhar se bhī guzar jaa.eñ

are o aasman wale bata is mein bura kya hai

KHushi ke chaar jhonke gar idhar se bhi guzar jaen

merī qismat meñ ġham gar itnā thā

dil bhī yā-rab ka.ī diye hote

meri qismat mein gham gar itna tha

dil bhi ya-rab kai diye hote

ġham-e-duniyā bhī ġham-e-yār meñ shāmil kar lo

nashsha baḌhtā hai sharābeñ jo sharāboñ meñ mileñ

gham-e-duniya bhi gham-e-yar mein shamil kar lo

nashsha baDhta hai sharaben jo sharabon mein milen

yahī hai daur-e-ġham-e-āshiqī to kyā hogā

isī tarah se kaTī zindagī to kyā hogā

yahi hai daur-e-gham-e-ashiqi to kya hoga

isi tarah se kaTi zindagi to kya hoga

ye ġham nahīñ hai ki ham donoñ ek ho na sake

ye rañj hai ki koī darmiyān meñ bhī na thā

ye gham nahin hai ki hum donon ek ho na sake

ye ranj hai ki koi darmiyan mein bhi na tha

navāztā thā hamesha vo ġham kī daulat se

aur is ḳhazāne se maiñ maalā maal ho hī gayā

nawazta tha hamesha wo gham ki daulat se

aur is KHazane se main mala mal ho hi gaya

ab sañg-bāriyoñ kā amal sard paḌ gayā

ab us taraf bhī rañj mire TūTne kā hai

ab sang-bariyon ka amal sard paD gaya

ab us taraf bhi ranj mere TuTne ka hai

ek vo haiñ ki jinheñ apnī ḳhushī le Duubī

ek ham haiñ ki jinheñ ġham ne ubharne na diyā

ek wo hain ki jinhen apni KHushi le Dubi

ek hum hain ki jinhen gham ne ubharne na diya

is qadar musalsal thiiñ shiddateñ judā.ī kī

aaj pahlī baar us se maiñ ne bevafā.ī kī

is qadar musalsal thin shiddaten judai ki

aaj pahli bar us se main ne bewafai ki

kaun kisī kā ġham khātā hai

kahne ko ġham-ḳhvār hai duniyā

kaun kisi ka gham khata hai

kahne ko gham-KHwar hai duniya