achchhoñ se pata chaltā hai insāñ ko buroñ kā

rāvan kā pata chal na sakā raam se pahle

achchhon se pata chalta hai insan ko buron ka

rawan ka pata chal na saka ram se pahle

qadam qadam haiñ rāvan lekin

nirbal ke bas raam bahut haiñ

qadam qadam hain rawan lekin

nirbal ke bas ram bahut hain

'nazr' phir aayā hai ik rasm nibhāne kā din

saj sañvar ke sabhī rāvan ko jalāne nikle

'nazr' phir aaya hai ek rasm nibhane ka din

saj sanwar ke sabhi rawan ko jalane nikle

ab bhī khaḌī hai soch meñ Duubī ujyāloñ kā daan liye

aaj bhī rekhā paar hai rāvan siitā ko samjhā.e kaun

ab bhi khaDi hai soch mein Dubi ujyalon ka dan liye

aaj bhi rekha par hai rawan sita ko samjhae kaun

hai dasahre meñ bhī yuuñ gar farhat-o-zīnat 'nazīr'

par divālī bhī ajab pākīza-tar tyauhār hai

hai dasahre mein bhi yun gar farhat-o-zinat 'nazir'

par diwali bhi ajab pakiza-tar tyauhaar hai

jis paap kī duniyā meñ hai rāvan kā baserā

us svarg sī dhartī pe koī raam nahīñ hai

jis pap ki duniya mein hai rawan ka basera

us swarg si dharti pe koi ram nahin hai

ab naam nahīñ kaam kā qaa.el hai zamāna

ab naam kisī shaḳhs kā rāvan na milegā

ab nam nahin kaam ka qael hai zamana

ab nam kisi shaKHs ka rawan na milega

ye manzil-e-haq ke dīvāno kuchh soch karo kuchh kar guzro

kyā jaane kab kyā kar guzre ye vaqt kā rāvan kyā kahiye

ye manzil-e-haq ke diwano kuchh soch karo kuchh kar guzro

kya jaane kab kya kar guzre ye waqt ka rawan kya kahiye

dard ghanerā hijr kā sahrā ghor añdherā aur yādeñ

raam nikāl ye saare rāvan merī raam kahānī se

dard ghanera hijr ka sahra ghor andhera aur yaaden

ram nikal ye sare rawan meri ram kahani se

jo sunte haiñ ki tire shahr meñ dashrā hai

ham apne ghar meñ divālī sajāne lagte haiñ

jo sunte hain ki tere shahr mein dashra hai

hum apne ghar mein diwali sajaane lagte hain