hai raam ke vajūd pe hindostāñ ko naaz

ahl-e-nazar samajhte haiñ us ko imām-e-hind

hai ram ke wajud pe hindostan ko naz

ahl-e-nazar samajhte hain us ko imam-e-hind

ek siitā kī rifāqat hai to sab kuchh paas hai

zindagī kahte haiñ jis ko raam kā ban-bās hai

ek sita ki rifaqat hai to sab kuchh pas hai

zindagi kahte hain jis ko ram ka ban-bas hai

jo sunte haiñ ki tire shahr meñ dashrā hai

ham apne ghar meñ divālī sajāne lagte haiñ

jo sunte hain ki tere shahr mein dashra hai

hum apne ghar mein diwali sajaane lagte hain

hai dasahre meñ bhī yuuñ gar farhat-o-zīnat 'nazīr'

par divālī bhī ajab pākīza-tar tyauhār hai

hai dasahre mein bhi yun gar farhat-o-zinat 'nazir'

par diwali bhi ajab pakiza-tar tyauhaar hai

ab naam nahīñ kaam kā qaa.el hai zamāna

ab naam kisī shaḳhs kā rāvan na milegā

ab nam nahin kaam ka qael hai zamana

ab nam kisi shaKHs ka rawan na milega

vahī jiine kī āzādī vahī marne kī jaldī hai

divālī dekh lī ham ne dasahre kar liye ham ne

wahi jine ki aazadi wahi marne ki jaldi hai

diwali dekh li hum ne dasahre kar liye hum ne

kyā sitam karte haiñ miTTī ke khilaune vaale

raam ko rakkhe hue baiThe haiñ rāvan ke qarīb

kya sitam karte hain miTTi ke khilaune wale

ram ko rakkhe hue baiThe hain rawan ke qarib

dard ghanerā hijr kā sahrā ghor añdherā aur yādeñ

raam nikāl ye saare rāvan merī raam kahānī se

dard ghanera hijr ka sahra ghor andhera aur yaaden

ram nikal ye sare rawan meri ram kahani se

qadam qadam haiñ rāvan lekin

nirbal ke bas raam bahut haiñ

qadam qadam hain rawan lekin

nirbal ke bas ram bahut hain

achchhoñ se pata chaltā hai insāñ ko buroñ kā

rāvan kā pata chal na sakā raam se pahle

achchhon se pata chalta hai insan ko buron ka

rawan ka pata chal na saka ram se pahle

raam ma.ashūq agar hove āshiq

toḌ de sar raqīb rāvan kā

ram mashuq agar howe aashiq

toD de sar raqib rawan ka

ab bhī khaḌī hai soch meñ Duubī ujyāloñ kā daan liye

aaj bhī rekhā paar hai rāvan siitā ko samjhā.e kaun

ab bhi khaDi hai soch mein Dubi ujyalon ka dan liye

aaj bhi rekha par hai rawan sita ko samjhae kaun

chāhat kī bhalā kaun sune rām-kahānī

is shahr ke sab log haiñ bahre use kahnā

chahat ki bhala kaun sune ram-kahani

is shahr ke sab log hain bahre use kahna

ammāñ kī bātoñ meñ āñkheñ sukh-dukh sapne sab to haiñ

rām-kahānī us ke paas kabira-bānī us ke paas

amman ki baaton mein aankhen sukh-dukh sapne sab to hain

ram-kahani us ke pas kabira-bani us ke pas

'nazr' phir aayā hai ik rasm nibhāne kā din

saj sañvar ke sabhī rāvan ko jalāne nikle

'nazr' phir aaya hai ek rasm nibhane ka din

saj sanwar ke sabhi rawan ko jalane nikle

ye manzil-e-haq ke dīvāno kuchh soch karo kuchh kar guzro

kyā jaane kab kyā kar guzre ye vaqt kā rāvan kyā kahiye

ye manzil-e-haq ke diwano kuchh soch karo kuchh kar guzro

kya jaane kab kya kar guzre ye waqt ka rawan kya kahiye

adab itnā ki qadmoñ meñ paḌe haiñ

anā itnī ki lanka ḳhaak kar deñ

adab itna ki qadmon mein paDe hain

ana itni ki lanka KHak kar den

guzrā thā apne shahr se rāvan fasād kā

zālim mohabbatoñ kī kathā.eñ bhī le gayā

guzra tha apne shahr se rawan fasad ka

zalim mohabbaton ki kathaen bhi le gaya

na rāvan hai kahānī meñ na siitā zindagānī meñ

magar banvās phir bhī chal rahā hai kyā kiyā jaa.e

na rawan hai kahani mein na sita zindagani mein

magar banwas phir bhi chal raha hai kya kiya jae

jis paap kī duniyā meñ hai rāvan kā baserā

us svarg sī dhartī pe koī raam nahīñ hai

jis pap ki duniya mein hai rawan ka basera

us swarg si dharti pe koi ram nahin hai

rāvan raat jagātā hai

koī rām-kahānī de

rawan raat jagata hai

koi ram-kahani de

yahāñ lachhman kī rekhā hai na siitā hai magar phir bhī

bahut phere hamāre ghar ke ik sādhū lagātā hai

yahan lachhman ki rekha hai na sita hai magar phir bhi

bahut phere hamare ghar ke ek sadhu lagata hai

kis se pūchhūñ kho ga.ī siitā kahāñ

ban kā har saaya hī rāvan ho gayā

kis se puchhun kho gai sita kahan

ban ka har saya hi rawan ho gaya

duniyā meñ har burā.ī kā ḳhatma bhī saath hai

rāvan ke saath saath yahāñ raam bhī to hai

duniya mein har burai ka KHatma bhi sath hai

rawan ke sath sath yahan ram bhi to hai

pal meñ manush hai raam pujārī pal meñ chelā rāvan kā

paap aur pun ke biich kā dhāgā dekho kitnā kachchā hai

pal mein manush hai ram pujari pal mein chela rawan ka

pap aur pun ke bich ka dhaga dekho kitna kachcha hai

khīñchte ho har jānib kis liye lakīreñ sī

maiñ na koī rāvan huuñ maiñ na koī siitā huuñ

khinchte ho har jaanib kis liye lakiren si

main na koi rawan hun main na koi sita hun

taḳht-e-lankā diyā vibhīshan ko

jab huā qatl rāvan-e-maqhūr

taKHt-e-lanka diya wibhishan ko

jab hua qatl rawan-e-maqhur

annyā.e ne bhar dī hai bahut aag diloñ meñ

lanka hī kahīñ is meñ jo jal jaa.e to achchhā

annyae ne bhar di hai bahut aag dilon mein

lanka hi kahin is mein jo jal jae to achchha

raam vo vahī rahmān haiñ sabhī maqām us ke

muḳhtalif zabānoñ meñ muḳhtalif haiñ naam us ke

ram wo wahi rahman hain sabhi maqam us ke

muKHtalif zabanon mein muKHtalif hain nam us ke