لب پر اشعار

نازکی اس کے لب کی کیا کہئے

پنکھڑی اک گلاب کی سی ہے

اس کے ہونٹوں پہ رکھ کے ہونٹ اپنے

بات ہی ہم تمام کر رہے ہیں

کتنے شیریں ہیں تیرے لب کہ رقیب

گالیاں کھا کے بے مزا نہ ہوا

شوق ہے اس دل درندہ کو

آپ کے ہونٹ کاٹ کھانے کا

سو دیکھ کر ترے رخسار و لب یقیں آیا

کہ پھول کھلتے ہیں گل زار کے علاوہ بھی

کیوں پرکھتے ہو سوالوں سے جوابوں کو عدیمؔ

ہونٹ اچھے ہوں تو سمجھو کہ سوال اچھا ہے

تجھ سا کوئی جہان میں نازک بدن کہاں

یہ پنکھڑی سے ہونٹ یہ گل سا بدن کہاں

صرف اس کے ہونٹ کاغذ پر بنا دیتا ہوں میں

خود بنا لیتی ہے ہونٹوں پر ہنسی اپنی جگہ

ایک دم اس کے ہونٹ چوم لیے

یہ مجھے بیٹھے بیٹھے کیا سوجھی

ان لبوں نے نہ کی مسیحائی

ہم نے سو سو طرح سے مر دیکھا

خدا کو مان کہ تجھ لب کے چومنے کے سوا

کوئی علاج نہیں آج کی اداسی کا

مسکرائے بغیر بھی وہ ہونٹ

نظر آتے ہیں مسکرائے ہوئے

ترے لبوں کو ملی ہے شگفتگی گل کی

ہماری آنکھ کے حصے میں جھرنے آئے ہیں

آتا ہے جی میں ساقئ مہ وش پہ بار بار

لب چوم لوں ترا لب پیمانہ چھوڑ کر

بجھے لبوں پہ ہے بوسوں کی راکھ بکھری ہوئی

میں اس بہار میں یہ راکھ بھی اڑا دوں گا

کچھ تو مل جائے لب شیریں سے

زہر کھانے کی اجازت ہی سہی

ہونٹوں پر اک بار سجا کر اپنے ہونٹ

اس کے بعد نہ باتیں کرنا سو جانا

کسی کو خواب میں اکثر پکارتے ہیں ہم

عطاؔ اسی لیے سوتے میں ہونٹ ہلتے ہیں

کانپتے ہونٹ بھیگتی پلکیں

بات ادھوری ہی چھوڑ دیتا ہوں

کیا کروں اے تشنگی تیرا مداوا بس وہ لب

جن لبوں کو چھو کے پانی آگ بنتا جائے ہے

اشک آنکھوں سے مری نکلے مسلسل لیکن

اس نے اک حرف تسلی نہ نکالا لب سے

غرور تشنہ دہانی تری بقا کی قسم

ندی ہمارے لبوں کی طرف اچھلتی رہی

یہ لب و رخسار یہ چہرا تیرا پر نور سا

تجھ کو کیا دیکھا لگا جیسے کوئی دیکھی غزل

مدت کے بعد نورؔ ہنسی لب پہ آئی ہے

وہ اپنا ہم خیال بنا لے گیا مجھے

ظلم سہہ کے بھی میں نے ہونٹ سی لیے غازیؔ

ایک ظرف ان کا ہے ایک ظرف میرا ہے

کلی چٹخ کے لبوں کے مزاج تک پہنچی

گلاب ٹوٹ کے سرخیٔ گال تک آئے

مرے اشعار ہیں وہ آسمانی خواب جن کو

مری مٹی کے ہونٹھوں پر اتارا جا رہا ہے

ساقیا مہر بلب کر کے صلہ کیا پایا

حشر کچھ اور خموشی نے بپا رکھا ہے

کوئی معجزاتی سا ایک دل ربا لمحہ

اس کے ہونٹ کھل جائیں میرے لب پہ تالا ہو

اک بوسہ ثبت کرنے کا اعلان کر دیا

ہونٹوں کا جس نے رکھ دیا حلیہ بگاڑ کر

ہونٹوں پہ تبسم کا لبادہ تو نہیں تھا

اے دل سم اندوہ زیادہ تو نہیں تھا