اس سفر میں نیند ایسی کھو گئی

ہم نہ سوئے رات تھک کر سو گئی

ہاں انہیں لوگوں سے دنیا میں شکایت ہے ہمیں

ہاں وہی لوگ جو اکثر ہمیں یاد آئے ہیں

یہ چراغ جیسے لمحے کہیں رائیگاں نہ جائیں

کوئی خواب دیکھ ڈالو کوئی انقلاب لاؤ

دل کی کھیتی سوکھ رہی ہے کیسی یہ برسات ہوئی

خوابوں کے بادل آتے ہیں لیکن آگ برستی ہے

زندگی ڈھونڈھ لے تو بھی کسی دیوانے کو

اس کے گیسو تو مرے پیار نے سلجھائے ہیں

ہم نے اپنے جینے کی یہ راہ نکالی یارو

ہر دریا پر تھوڑی تھوڑی پیاس بجھا لی یارو

بجلیاں ڈھونڈھ رہی ہیں کوئی گرنے کی جگہ

اتنے محفوظ نہیں آج نشیمن والے

کیسے کوئی تصویر بناؤں رنگ اڑے جاتے ہیں

گھولے کتنے رنگ مگر ہے چاند کا پیالہ خالی

غیر اندھیرے کی آنکھوں میں گھول کے آنسو اپنے

جب رات آئی شوق سحر کی شمع جلالی یارو

کبھی مقتل رہا ہوگا یقیناً

جہاں زنجیر کی جھنکار ٹھہری

میرے ساتھ مرا سورج ہے میرے ساتھ مرا سایہ

تنہائی تو ان کی دیکھوں جن کے ساتھ زمانہ ہے

کیوں اتنے مغرور ہیں راہیؔ کیوں اتنا اتراتے ہیں

گنگا تٹ ویران نہ ہوگا اک ان کے اٹھ جانے سے

برسوں بعد اس ہجر کے پیڑ پہ مور آئے

برسوں بعد اس پیڑ پہ کوئل بولی ہے

سر بکف گھر سے نکلنا تو ہے شرط اول

اتنا آسان نہیں چاک گریباں ہونا

خزاں کے رنگ بھی ایسے برے نہیں لیکن

یہ رنگ ٹھیک نہیں میرے خوبرو کے لئے

اب تو ضرورت کی اک پگڑی ہے یاروں کے کندھوں پر

ہم لوگوں کے ساتھ یہاں سے رسم صلیب و دار اٹھی

دشت جنوں کی ضد ہے کہ لکھ خیریت کا خط

میں پوچھتا ہوں کس کو لکھوں اور کہاں لکھوں

مزا آتا نصیحت میں بھی شاید

اگر ناصح ذرا دیوانہ ہوتا

لگتا ہے شہروں میں جنوں کے موسم اب نہیں آتے

ہم تو صحرا میں بیٹھے ہیں دھوپ کا فرش بچھائے

ململ کی ساری ہے تن پر ہاتھوں میں پچکاری ہے

ہم نے سنا ہے اس کی گلی میں ہولی کی تیاری ہے

دھوپ کڑی ہے سایہ مت دے سائے کا امکان تو ہے

اے صحرا تجھ سے تو ہماری اتنی پرانی یاری ہے

مہک پہچانتی ہے خون دل کی

زمین کوچۂ دل دار ٹھہری

ہم برسوں سے پتھر کے اس شہر میں ہیں

کیسا ہے شیشے کا جہاں معلوم نہیں

میں اک گھائل بوڑھا برگد میری بات سنو

لگتا ہے کل ہر وادی سے صحرا نکلے گا

کل جن آنکھوں میں اگا کرتے تھے خواب

آج ان میں کل کا اندیشہ ملا

کہیں سورج ملے تو اس سے کہنا

ہماری رات لمبی ہو رہی ہے

سناٹا پیڑوں پر بیٹھا سناٹا ہر چھت پر

سناٹے سے سب ڈرتے ہیں کون آواز لگائے

اپنا سر وہ کیسے جھکائے اس ساگر کی چوکھٹ پر

گنگا جی کے تٹ پر یارو جس جوگی کا ٹھکانہ ہے

جس کی پیاس کو کم پڑتی ہو صحرا کی پہنائی بھی

اس کی پیاس نہ ناپی جائے ساقی کے پیمانے سے

سولیاں نصب رہیں قحط جنوں ہے بھی تو کیا

کچھ نہ کچھ اب بھی نکل آئیں گے گردن والے

تیری محفل میں وفا کی تو کوئی قدر نہیں

ہاں مگر تذکرۂ اہل وفا ہوتا ہے

اہل جنوں کی آہٹ سن کر دشت وفا بے چین ہوا

ہر ہر گوشہ سے پچھلی زنجیروں کی جھنکار اٹھی

نہ جب اہل خرد نے بات مانی

تو پھر شرط صلیب و دار ٹھہری

اس کے گلابی رخساروں پر پھیلی بوند پسینے کی

یا کچنار کے دامن پر یہ اوس کی ہلکی دھاری ہے

مکتب عشق کا یہ پہلا سبق ہے راہیؔ

ہاتھ کٹوا لے مگر ہاتھ کو پیالہ نہ بنا

سچ اگر بولوں تو کٹتی ہے زبان

اور چپ رہنے میں رسوائی ہے

وہ زیارت گہہ مجنوں بہت آباد ہوئی

اپنی وحشت کے لئے اب کوئی ویرانہ بنا

جس کو مل جانا ہو مل جاؤ مگر مشکل سے

دیکھو اس شہر میں آنا تو نہ آساں ہونا

جس کے آگے آگے بادل جس کے پیچھے خوشبو

ہم صحرا والوں تک کوئی وہ موسم لے آئے

کل کی جانب دیکھیں کیسے ایک بڑی دشواری ہے

آنکھ اٹھانا سہل نہیں ہے سپنا اتنا بھاری ہے

جاگ اور دامان وحشت چاک کر

صرف آنکھیں ہی نہ مل اے بمبئی

گیا نہ کوئی مرے بعد کوئے قاتل تک

ترس گیا کف قاتل رگ گلو کے لئے