اک وہی شخص مجھ کو یاد رہا

جس کو سمجھا تھا بھول جاؤں گا

جھوٹی امید کی انگلی کو پکڑنا چھوڑو

درد سے بات کرو درد سے لڑنا چھوڑو

کیسے ہو کیا ہے حال مت پوچھو

مجھ سے مشکل سوال مت پوچھو

نکلے تھے دونوں بھیس بدل کے تو کیا عجب

میں ڈھونڈتا خدا کو پھرا اور خدا مجھے

یہ تمنا ہے کہ اب اور تمنا نہ کریں

شعر کہتے رہیں چپ چاپ تقاضا نہ کریں

زندگی ہم سے تو اس درجہ تغافل نہ برت

ہم بھی شامل تھے ترے چاہنے والوں میں کبھی

وہ بھی ہمارے نام سے بیگانے ہو گئے

ہم کو بھی سچ ہے ان سے محبت نہیں رہی

ایسا نہیں کہ ان سے محبت نہ ہو مگر

پہلے سا جوش پہلے سی شدت نہیں رہی

ہم جو پہلے کہیں ملے ہوتے

اور ہی اپنے سلسلے ہوتے

وہ ایک خواب جو پھر لوٹ کر نہیں آیا

وہ اک خیال جسے میں بھلا نہیں سکتا

جس سے سارے چراغ جلتے تھے

وہ چراغ آج کچھ بجھا سا تھا

زندگی اس قدر کٹھن کیوں ہے

آدمی کی بھلا خطا کیا ہے

کوئی شے ایک سی نہیں رہتی

عمر ڈھلتی ہے غم بدلتے ہیں

یہ الگ بات کہ وہ مجھ سے خفا رہتا ہے

میں اک انسان ہوں اور مجھ میں خدا رہتا ہے

دیکھے جو میری نیکی کو شک کی نگاہ سے

وہ آدمی بھی تو مرے اندر ہے کیا کروں

اپنی عادت کہ سب سے سب کہہ دیں

شہر کا ہے مزاج سناٹا

چاند سورج کی طرح تم بھی ہو قدرت کا کھیل

جیسے ہو ویسے رہو بننا بگڑنا چھوڑو

کچھ تو میں بھی ڈرا ڈرا سا تھا

اور کچھ راستا نیا سا تھا

جھانکتے رات کے گریباں سے

ہم نے سو آفتاب دیکھے ہیں

جب یہ مانا کہ دل میں ڈر ہے بہت

تب کہیں جا کے دل سے ڈر نکلا

گفتگو تیر سی لگی دل میں

اب ہے شاید علاج سناٹا

کچھ تو اپنے لئے بھی رکھنا ہے

زخم اوروں کو کیوں دکھائیں سب

ہزار چاہیں مگر چھوٹ ہی نہیں سکتی

بڑی عجیب ہے یہ مےکشی کی عادت بھی

خالی برآمدوں نے مجھے دیکھ کر کہا

کیا بات ہے اداس سے کچھ لگ رہے ہو تم

بت سمجھتے تھے جس کو سارے لوگ

وہ مرے واسطے خدا سا تھا

کیا نہیں جانتا مجھے کوئی

کیا نہیں شہر میں وہ گھر باقی

مجھے خبر نہ تھی اس گھر میں کتنے کمرے ہیں

میں کیسے لے کے وہاں ساری داستاں جاتا