noImage

واصف دہلوی

1910 - 1987 | دلی, ہندوستان

306
Favorite

باعتبار

بجھتے ہوئے چراغ فروزاں کریں گے ہم

تم آؤگے تو جشن چراغاں کریں گے ہم

دیدار سے پہلے ہی کیا حال ہوا دل کا

کیا ہوگا جو الٹیں گے وہ رخ سے نقاب آخر

ہلکی سی خلش دل میں نگاہوں میں اداسی

شاید یوں ہی ہوتی ہے محبت کی شروعات

دامن کے داغ اشک ندامت نے دھو دئیے

لیکن یہ دل کا داغ مٹایا نہ جا سکا

وفور بے خودی میں رکھ دیا سر ان کے قدموں پر

وہ کہتے ہی رہے واصفؔ یہ محفل ہے یہ محفل ہے

آج رخصت ہو گیا دنیا سے اک بیمار غم

درد ایسا دل میں اٹھا جان لے کر ہی گیا

خدا کے سامنے جو سر یقیں کے ساتھ جھک جائے

کسی طاقت کے آگے پھر کبھی وہ خم نہیں ہوتا

کتنی گھٹائیں آئیں برس کر گزر گئیں

شعلہ ہمارے دل کا بجھایا نہ جا سکا

جو رنج عشق سے فارغ ہو اس کو دل نہیں کہتے

جو موجوں سے نہ ٹکرائے اسے ساحل نہیں کہتے

قدم یوں بے خطر ہو کر نہ مے خانے میں رکھ دینا

بہت مشکل ہے جان و دل کو نذرانے میں رکھ دینا

بھرم اس کا ہی اے منصور تو نے رکھ لیا ہوتا

کسی کا راز اے ناداں سر محفل نہیں کہتے

قسمت کی تیرگی کی کہانی نہ پوچھیے

صبح وطن بھی شام غریباں ہے آج کل

وہ جن کی لو سے ہزاروں چراغ جلتے تھے

چراغ باد فنا نے بجھائے ہیں کیا کیا

یہ طوفان حوادث اور تلاطم باد و باراں کے

محبت کے سہارے کشتئ دل ہے رواں اب تک

زلیخا کے وقار عشق کو صحرا سے کیا نسبت

جو خود کھینچ کر نہ آ جائے اسے منزل نہیں کہتے

کسی کو یاد کر کے ایک دن خلوت میں رویا تھا

نہیں معلوم کیوں جب سے ندامت بڑھتی جاتی ہے

بہت اچھا ہوا آنسو نہ نکلے میری آنکھوں سے

بپا محفل میں اک تازہ قیامت اور ہو جاتی

نسیم صبح یوں لے کر ترا پیغام آتی ہے

پری جیسے کوئی ہاتھوں میں لے کر جام آتی ہے

یہ محفل آج نا اہلوں سے جو معمور ہے واصفؔ

اسی محفل میں کوئی جوہر قابل بھی آئے گا

پاؤں زخمی ہوئے اور دور ہے منزل واصفؔ

خون اسلاف کی عظمت کو جگا لوں تو چلوں

کیا غم جو حسرتوں کے دیے بجھ گئے تمام

داغوں سے آج گھر میں چراغاں کریں گے ہم