منزل پر اشعار

ہم رہروان شوق ہیں منزل کی فکر کیا

لے جائیں نقش پا ترے ہم کو جہاں کہیں

غرض رہی نہ کبھی منزلوں سے کوئی ہمیں

ہمیشہ اپنے ہی اندر سفر ہمارا ہوا

فیضؔ تھی راہ سر بسر منزل

ہم جہاں پہنچے کامیاب آئے

پہلے تلاش کیجئے منزل کی رہ گزر

پھر سوچیے کہ راہ میں دیوار کون ہے

نہیں نگاہ میں منزل تو جستجو ہی سہی

نہیں وصال میسر تو آرزو ہی سہی

راستے بھر مری ہم سفری کا دم بھرتے رہے

اپنی منزل پہ پہنچتے ہی پرائے ہوئے لوگ

عقابی روح جب بیدار ہوتی ہے جوانوں میں

نظر آتی ہے ان کو اپنی منزل آسمانوں میں

میں نے منزل کی دعا مانگی تھی

میری رفتار بڑھا دی گئی ہے

کون رہتا ہے سفر میں عمر بھر

مستقل کوئی ٹھکانا چاہیئے

تری نظروں سے گزری رہ گزر بھی

ہزاروں منزلوں کا راستہ ہے

میں سدرۃ المنتہیٰ پہ آ کے رکی ہوئی ہوں

اب آگے جو بھی کرے گا میرا خدا کرے گا

منزلیں گرد کے مانند اڑی جاتی ہیں

وہی انداز جہان گزراں ہے کہ جو تھا

ہم سے ملتا ہے منزلوں کا پتہ

اور خود بے نشان ہیں ہم لوگ

میں اکیلا ہی چلا تھا جانب منزل مگر

لوگ ساتھ آتے گئے اور کارواں بنتا گیا

منزل ملی مراد ملی مدعا ملا

سب کچھ مجھے ملا جو ترا نقش پا ملا

فکر منزل ہے نہ ہوش جادۂ منزل مجھے

جا رہا ہوں جس طرف لے جا رہا ہے دل مجھے

وہ کیا منزل جہاں سے راستے آگے نکل جائیں

سو اب پھر اک سفر کا سلسلہ کرنا پڑے گا

تم خود ہی چلے آؤ گے شاید سر منزل

اک راہ نکالی ہے مری در بدری نے

اس نے منزل پہ لا کے چھوڑ دیا

عمر بھر جس کا راستا دیکھا

محبت آپ ہی منزل ہے اپنی

نہ جانے حسن کیوں اترا رہا ہے

کوئی منزل کے قریب آ کے بھٹک جاتا ہے

کوئی منزل پہ پہنچتا ہے بھٹک جانے سے

منزل نہ ملی تو غم نہیں ہے

اپنے کو تو کھو کے پا گیا ہوں

ظلمت میں بھی رسائیٔ منزل کا ہے یقیں

مشعل دکھا رہے ہیں ترے نقش پا مجھے

ہر راستے سے منزل ہستی ہے بہت دور

جائے گا مرے ساتھ غم یار کہاں تک

نہیں ہوتی ہے راہ عشق میں آسان منزل

سفر میں بھی تو صدیوں کی مسافت چاہئے ہے

نہ تو رنج و غم سے ہی ربط ہے نہ ہی آشنائے خوشی ہوں میں

مری زندگی بھی عجیب ہے اسے منزلوں کا پتا نہیں

مجھ کو منزل بھی نہ پہچان سکی

میں کہ جب گرد سفر سے نکلا

منزل پہ پہنچ سکتے نہیں ایسے مسافر

ہر گام پہ ہو خوف جنہیں آبلہ پا کا

کوئی منزل آخری منزل نہیں ہوتی فضیلؔ

زندگی بھی ہے مثال موج دریا راہ رو

کسی کو گھر سے نکلتے ہی مل گئی منزل

کوئی ہماری طرح عمر بھر سفر میں رہا

مجھے آ گیا یقیں سا کہ یہی ہے میری منزل

سر راہ جب کسی نے مجھے دفعتاً پکارا

رستوں کے پیچ و خم نے کہیں اور لا دیا

جانا ہمیں جہاں تھا یہ منزل نہیں ہے وہ

جس دن سے چلا ہوں مری منزل پہ نظر ہے

آنکھوں نے کبھی میل کا پتھر نہیں دیکھا

میری تقدیر میں منزل نہیں ہے

غبار کارواں ہے اور میں ہوں

چلا میں جانب منزل تو یہ ہوا معلوم

یقیں گمان میں گم ہے گماں ہے پوشیدہ

سفر کا حوصلہ کافی ہے منزل تک پہنچنے کو

مسافر جب اکیلا ہو تو راہیں بات کرتی ہیں

سب کو پہنچا کے ان کی منزل پر

آپ رستے میں رہ گیا ہوں میں

ایک منزل ہے مگر راہ کئی ہیں اظہرؔ

سوچنا یہ ہے کہ جاؤ گے کدھر سے پہلے

چاند ہے تیرا ہم سفر کوئی نہیں ہے راہبر

آگے قدم بڑھا کے رکھ دور کی روشنی نہ دیکھ

اے جذبۂ دل گر میں چاہوں ہر چیز مقابل آ جائے

منزل کے لیے دو گام چلوں اور سامنے منزل آ جائے

کس منزل مراد کی جانب رواں ہیں ہم

اے رہروان خاک بسر پوچھتے چلو

راہ بر رہزن نہ بن جائے کہیں اس سوچ میں

چپ کھڑا ہوں بھول کر رستے میں منزل کا پتا

صرف اک قدم اٹھا تھا غلط راہ شوق میں

منزل تمام عمر مجھے ڈھونڈھتی رہی

حسرت پہ اس مسافر بے کس کی روئیے

جو تھک گیا ہو بیٹھ کے منزل کے سامنے

خود بخود راہ لئے جاتی ہے اس کی جانب

اب کہاں تک ہے رسائی مجھے معلوم نہیں

پلٹ آتا ہوں میں مایوس ہو کر ان مقاموں سے

جہاں سے سلسلہ نزدیک تر ہوتا ہے منزل کا