aise bichhḌā hai ki milne kī du'ā kartā hai

har mulāqāt pe muñh pher ke jaane vaalā

aise bichhDa hai ki milne ki du'a karta hai

har mulaqat pe munh pher ke jaane wala

us se kahnā ki mirā saath nibhā.e aa kar

merā yādoñ se guzārā nahīñ hone vaalā

us se kahna ki mera sath nibhae aa kar

mera yaadon se guzara nahin hone wala

āñsuoñ meñ bahā dūñgī mire dil ke TukḌe

apnī āñkhoñ ko tirā ranj manāne dūñgī

aansuon mein baha dungi mere dil ke TukDe

apni aankhon ko tera ranj manane dungi

dekho hamāre dil meñ ujāle haiñ har taraf

ham is ke bāvajūd ujāloñ se duur haiñ

dekho hamare dil mein ujale hain har taraf

hum is ke bawajud ujalon se dur hain

ḳhairiyat pūchhtā hai sirf dikhāve ke liye

vo mire haal se anjān nahīñ hotā hai

KHairiyat puchhta hai sirf dikhawe ke liye

wo mere haal se anjaan nahin hota hai

itnā ḳhush ho ke koī mujh se milā kartā thā

dekhne vaale adākār samajhte hoñge

itna KHush ho ke koi mujh se mila karta tha

dekhne wale adakar samajhte honge

haa.e afsos tujhe ab bhī ye mā'lūm nahīñ

zindagī merī banā dī hai tamāsha tū ne

hae afsos tujhe ab bhi ye ma'lum nahin

zindagi meri bana di hai tamasha tu ne

aise vo ro rahā thā mirā haal dekh kar

aayā huā ho jaise kisī intiqāl meñ

aise wo ro raha tha mera haal dekh kar

aaya hua ho jaise kisi intiqal mein

kuchh vaqt meñ hī mujh se bahut duur ho gayā

vo ek shaḳhs jo mire sab se qarīb thā

kuchh waqt mein hi mujh se bahut dur ho gaya

wo ek shaKHs jo mere sab se qarib tha

tū ki masrūf hai duniyā kī pareshānī meñ

tujh ko kis muñh se pareshānī batā.ūñ maiñ bhī

tu ki masruf hai duniya ki pareshani mein

tujh ko kis munh se pareshani bataun main bhi

vo mohabbatoñ ke mausam tujhe yaad bhī haiñ hamdam

mirā ek baar sunñā terā baar baar kahnā

wo mohabbaton ke mausam tujhe yaad bhi hain hamdam

mera ek bar sunna tera bar bar kahna

mujhe to terī barbādī bhī barbādī nahīñ lagtī

ki maiñ ne vo bhī dekhā hai jo hai barbād se aage

mujhe to teri barbaadi bhi barbaadi nahin lagti

ki main ne wo bhi dekha hai jo hai barbaad se aage

ik mohabbat hai aur us kā bhī

kyā tamāsha banā rahī huuñ maiñ

ek mohabbat hai aur us ka bhi

kya tamasha bana rahi hun main

tum to phir ġhair ho tum se to shikāyat kaisī

mere apne mujhe ġhairoñ kī tarah dekhte haiñ

tum to phir ghair ho tum se to shikayat kaisi

mere apne mujhe ghairon ki tarah dekhte hain

terī yādeñ thiiñ barf kī mānind

barf puurī pighal ga.ī hai ab

teri yaaden thin barf ki manind

barf puri pighal gai hai ab

sochā nahīñ thā maiñ ne kabhī tere jaisā shaḳhs

muñh pher legā mujh ko pareshān dekh kar

socha nahin tha main ne kabhi tere jaisa shaKHs

munh pher lega mujh ko pareshan dekh kar

merī duniyā ujaḌ ga.ī is meñ

tum ise hādisa samajhte ho

meri duniya ujaD gai is mein

tum ise hadisa samajhte ho

apnī hasrat kā galā ghoñT diyā hai maiñ ne

ab dilāsoñ se mulāqāt nahīñ hotī hai

apni hasrat ka gala ghonT diya hai main ne

ab dilason se mulaqat nahin hoti hai

taqdīr merī ho ga.ī us phuul kī tarah

murjhā gayā to phir kabhī phūlā phulā nahīñ

taqdir meri ho gai us phul ki tarah

murjha gaya to phir kabhi phula phula nahin

vo kisī aur se mansūb huī hai aise

jaise beva kisī Dolī meñ biThā dī ga.ī hai

wo kisi aur se mansub hui hai aise

jaise bewa kisi Doli mein biTha di gai hai