pahle is meñ ik adā thī naaz thā andāz thā

rūThnā ab to tirī aadat meñ shāmil ho gayā

pahle is mein ek ada thi naz tha andaz tha

ruThna ab to teri aadat mein shamil ho gaya

zindagī shāyad isī kā naam hai

dūriyāñ majbūriyāñ tanhā.iyāñ

zindagi shayad isi ka nam hai

duriyan majburiyan tanhaiyan

maiñ jaatā huuñ dil ko tire paas chhoḌe

mirī yaad tujh ko dilātā rahegā

main jata hun dil ko tere pas chhoDe

meri yaad tujh ko dilata rahega

jahāñ pahuñch ke qadam Dagmagā.e haiñ sab ke

usī maqām se ab apnā rāstā hogā

jahan pahunch ke qadam Dagmagae hain sab ke

usi maqam se ab apna rasta hoga

dushmanoñ kī jafā kā ḳhauf nahīñ

dostoñ kī vafā se Darte haiñ

dushmanon ki jafa ka KHauf nahin

doston ki wafa se Darte hain

koī vaqt batlā ki tujh se milūñ

mirī dauḌtī bhāgtī zindagī

koi waqt batla ki tujh se milun

meri dauDti bhagti zindagi

yahī hai ibādat yahī diin o īmāñ

ki kaam aa.e duniyā meñ insāñ ke insāñ

yahi hai ibaadat yahi din o iman

ki kaam aae duniya mein insan ke insan

vo vaqt kā jahāz thā kartā lihāz kyā

maiñ dostoñ se haath milāne meñ rah gayā

wo waqt ka jahaz tha karta lihaz kya

main doston se hath milane mein rah gaya

is nahīñ kā koī ilaaj nahīñ

roz kahte haiñ aap aaj nahīñ

is nahin ka koi ilaj nahin

roz kahte hain aap aaj nahin

jazba-e-ishq salāmat hai to inshā-allāh

kachche dhāge se chale ā.eñge sarkār bañdhe

jazba-e-ishq salamat hai to insha-allah

kachche dhage se chale aaenge sarkar bandhe

irāde bāñdhtā huuñ sochtā huuñ toḌ detā huuñ

kahīñ aisā na ho jaa.e kahīñ aisā na ho jaa.e

irade bandhta hun sochta hun toD deta hun

kahin aisa na ho jae kahin aisa na ho jae

nigāh-e-nāz se saaqī kā dekhnā mujh ko

mirā vo haath meñ sāġhar uThā ke rah jaanā

nigah-e-naz se saqi ka dekhna mujh ko

mera wo hath mein saghar uTha ke rah jaana

hosh o havās o taab o tavāñ 'dāġh' jā chuke

ab ham bhī jaane vaale haiñ sāmān to gayā

hosh o hawas o tab o tawan 'dagh' ja chuke

ab hum bhi jaane wale hain saman to gaya

girte aañsū pochhiye ruḳhsār se

sañg kaT jaate haiñ aksar dhaar se

girte aansu pochhiye ruKHsar se

sang kaT jate hain aksar dhaar se

ai 'zauq' dekh duḳhtar-e-raz ko na muñh lagā

chhuTtī nahīñ hai muñh se ye kāfar lagī huī

ai 'zauq' dekh duKHtar-e-raz ko na munh laga

chhuTti nahin hai munh se ye kafar lagi hui

haa.e 'sīmāb' us kī majbūrī

jis ne kī ho shabāb meñ tauba

hae 'simab' us ki majburi

jis ne ki ho shabab mein tauba

ġhair ko aane na duuñ tum ko kahīñ jaane na duuñ

kaash mil jaa.e tumhāre ghar kī darbānī mujhe

ghair ko aane na dun tum ko kahin jaane na dun

kash mil jae tumhaare ghar ki darbani mujhe

banā kar faqīroñ kā ham bhes 'ġhālib'

tamāshā-e-ahl-e-karam dekhte haiñ

bana kar faqiron ka hum bhes 'ghaalib'

tamasha-e-ahl-e-karam dekhte hain

ham ko ma.alūm hai jannat kī haqīqat lekin

dil ke ḳhush rakhne ko 'ġhālib' ye ḳhayāl achchhā hai

hum ko malum hai jannat ki haqiqat lekin

dil ke KHush rakhne ko 'ghaalib' ye KHayal achchha hai

tañg aa chuke haiñ kashmakash-e-zindagī se ham

Thukrā na deñ jahāñ ko kahīñ be-dilī se ham

tang aa chuke hain kashmakash-e-zindagi se hum

Thukra na den jahan ko kahin be-dili se hum

ishq hai ishq ye mazāq nahīñ

chand lamhoñ meñ faisla na karo

ishq hai ishq ye mazaq nahin

chand lamhon mein faisla na karo

kuchh log to ḳhilāf hoñ hāsid koī to ho

kyā lutf sīdhī saadī mohabbat meñ aa.egā

kuchh log to KHilaf hon hasid koi to ho

kya lutf sidhi sadi mohabbat mein aaega

zidoñ meñ tark-e-ta.alluq to kar liyā lekin

sukūñ use bhī nahīñ be-qarār maiñ bhī haiñ

zidon mein tark-e-talluq to kar liya lekin

sukun use bhi nahin be-qarar main bhi hain

'zafar' aadmī us ko na jāniyegā vo ho kaisā hī sāhab-e-fahm-o-zakā

jise aish meñ yād-e-ḳhudā na rahī jise taish meñ ḳhauf-e-ḳhudā na rahā

'zafar' aadmi us ko na jaaniyega wo ho kaisa hi sahab-e-fahm-o-zaka

jise aish mein yaad-e-KHuda na rahi jise taish mein KHauf-e-KHuda na raha

haiñ aur bhī duniyā meñ suḳhan-var bahut achchhe

kahte haiñ ki 'ġhālib' kā hai andāz-e-bayāñ aur

hain aur bhi duniya mein suKHan-war bahut achchhe

kahte hain ki 'ghaalib' ka hai andaz-e-bayan aur

mirī zabān ke mausam badalte rahte haiñ

maiñ aadmī huuñ mirā e'tibār mat karnā

meri zaban ke mausam badalte rahte hain

main aadmi hun mera e'tibar mat karna

laa.ī hayāt aa.e qazā le chalī chale

apnī ḳhushī na aa.e na apnī ḳhushī chale

lai hayat aae qaza le chali chale

apni KHushi na aae na apni KHushi chale

maut kā ek din muayyan hai

niind kyuuñ raat bhar nahīñ aatī

maut ka ek din muayyan hai

nind kyun raat bhar nahin aati

sub.h hotī hai shaam hotī hai

umr yūñhī tamām hotī hai

subh hoti hai sham hoti hai

umr yunhi tamam hoti hai

hai dil tirā hai jaañ tirī īmān hai tirā

to kaise mānūñ terā muqaddar nahīñ huuñ maiñ

hai dil tera hai jaan teri iman hai tera

to kaise manun tera muqaddar nahin hun main

goggle lagā ke aañkh par chalne lage hasīn

vo lutf ab kahāñ nigah-e-nīm-bāz kā

goggle laga ke aankh par chalne lage hasin

wo lutf ab kahan nigah-e-nim-baz ka

piine se kar chukā thā maiñ tauba magar 'jalīl'

bādal kā rañg dekh ke nīyat badal ga.ī

pine se kar chuka tha main tauba magar 'jalil'

baadal ka rang dekh ke niyat badal gai

paidā vo baat kar ki tujhe ro.eñ dūsre

ronā ḳhud apne haal pe ye zaar zaar kyā

paida wo baat kar ki tujhe roen dusre

rona KHud apne haal pe ye zar zar kya

vaqt-e-nazzāra na ro kahte the ai chashm tujhe

shiddat-e-girya se le ḳhaak na sūjhā, dekhā

waqt-e-nazzara na ro kahte the ai chashm tujhe

shiddat-e-girya se le KHak na sujha, dekha

maqbūl hoñ na hoñ ye muqaddar kī baat hai

sajde kisī ke dar pe kiye jā rahā huuñ maiñ

maqbul hon na hon ye muqaddar ki baat hai

sajde kisi ke dar pe kiye ja raha hun main

na ġharaz kisī se na vāsta mujhe kaam apne hī kaam se

tire zikr se tirī fikr se tirī yaad se tire naam se

na gharaz kisi se na wasta mujhe kaam apne hi kaam se

tere zikr se teri fikr se teri yaad se tere nam se

rah ga.e sab.ha o zunnār ke jhagḌe baaqī

dharm hindū meñ nahīñ diin musalmāñ meñ nahīñ

rah gae sabha o zunnar ke jhagDe baqi

dharm hindu mein nahin din musalman mein nahin

ham se kyā ho sakā mohabbat meñ

ḳhair tum ne to bevafā.ī kī

hum se kya ho saka mohabbat mein

KHair tum ne to bewafai ki

kitne shīrīñ haiñ tere lab ki raqīb

gāliyāñ khā ke be-mazā na huā

kitne shirin hain tere lab ki raqib

galiyan kha ke be-maza na hua

ab to ghabrā ke ye kahte haiñ ki mar jā.eñge

mar ke bhī chain na paayā to kidhar jā.eñge

ab to ghabra ke ye kahte hain ki mar jaenge

mar ke bhi chain na paya to kidhar jaenge

na ḳhudā hī milā na visāl-e-sanam na idhar ke hue na udhar ke hue

rahe dil meñ hamāre ye rañj-o-alam na idhar ke hue na udhar ke hue

na KHuda hi mila na visal-e-sanam na idhar ke hue na udhar ke hue

rahe dil mein hamare ye ranj-o-alam na idhar ke hue na udhar ke hue

ab ye bhī nahīñ Thiik ki har dard miTā deñ

kuchh dard kaleje se lagāne ke liye haiñ

ab ye bhi nahin Thik ki har dard miTa den

kuchh dard kaleje se lagane ke liye hain

kuchh din se zindagī mujhe pahchāntī nahīñ

yuuñ dekhtī hai jaise mujhe jāntī nahīñ

kuchh din se zindagi mujhe pahchanti nahin

yun dekhti hai jaise mujhe jaanti nahin

roz vo ḳhvāb meñ aate haiñ gale milne ko

maiñ jo sotā huuñ to jaag uThtī hai qismat merī

roz wo KHwab mein aate hain gale milne ko

main jo sota hun to jag uThti hai qismat meri

aap pahlū meñ jo baiTheñ to sambhal kar baiTheñ

dil-e-betāb ko aadat hai machal jaane kī

aap pahlu mein jo baiThen to sambhal kar baiThen

dil-e-betab ko aadat hai machal jaane ki

jalve machal paḌe to sahar kā gumāñ huā

zulfeñ bikhar ga.iiñ to siyah raat ho ga.ī

jalwe machal paDe to sahar ka guman hua

zulfen bikhar gain to siyah raat ho gai

donoñ jahān terī mohabbat meñ haar ke

vo jā rahā hai koī shab-e-ġham guzār ke

donon jahan teri mohabbat mein haar ke

wo ja raha hai koi shab-e-gham guzar ke

aag the ibtidā-e-ishq meñ ham

ab jo haiñ ḳhaak intihā hai ye

aag the ibtida-e-ishq mein hum

ab jo hain KHak intiha hai ye

ishrat-e-qatra hai dariyā meñ fanā ho jaanā

dard kā had se guzarnā hai davā ho jaanā

ishrat-e-qatra hai dariya mein fana ho jaana

dard ka had se guzarna hai dawa ho jaana

ik raat dil-jaloñ ko ye aish-e-visāl de

phir chāhe āsmān jahannam meñ Daal de

ek raat dil-jalon ko ye aish-e-visal de

phir chahe aasman jahannam mein Dal de