میں نے فانیؔ ڈوبتی دیکھی ہے نبض کائنات

جب مزاج یار کچھ برہم نظر آیا مجھے

یا کہتے تھے کچھ کہتے جب اس نے کہا کہئے

تو چپ ہیں کہ کیا کہئے کھلتی ہے زباں کوئی

تنکوں سے کھیلتے ہی رہے آشیاں میں ہم

آیا بھی اور گیا بھی زمانہ بہار کا

جس دل ربا سے ہم نے آنکھیں لڑائیاں ہیں

آخر اسی نے ہم کو آنکھیں دکھائیاں ہیں

ہر مصیبت کا دیا ایک تبسم سے جواب

اس طرح گردش دوراں کو رلایا میں نے

نا مہربانیوں کا گلا تم سے کیا کریں

ہم بھی کچھ اپنے حال پہ اب مہرباں نہیں

موجوں کی سیاست سے مایوس نہ ہو فانیؔ

گرداب کی ہر تہہ میں ساحل نظر آتا ہے

بیمار ترے جی سے گزر جائیں تو اچھا

جیتے ہیں نہ مرتے ہیں یہ مر جائیں تو اچھا

جوانی کو بچا سکتے تو ہیں ہر داغ سے واعظ

مگر ایسی جوانی کو جوانی کون کہتا ہے

روح ارباب محبت کی لرز جاتی ہے

تو پشیمان نہ ہو اپنی جفا یاد نہ کر

کسی کو کیا مرے سود و زیاں سے

گرے کیوں برق بچ کر آشیاں سے

صور و منصور و طور ارے توبہ

ایک ہے تیری بات کا انداز

اپنی ہی نگاہوں کا یہ نظارہ کہاں تک

اس مرحلۂ سعیٔ تماشا سے گزر جا

کس کو غم ہے جو کرے مرثیہ خوانی میری

رو رہی ہے مرے مرقد پہ جوانی میری

رونے کے بھی آداب ہوا کرتے ہیں فانیؔ

یہ اس کی گلی ہے تیرا غم خانہ نہیں ہے

وہ نظر کامیاب ہو کے رہی

دل کی بستی خراب ہو کے رہی

یا رب نوائے دل سے یہ کان آشنا سے ہیں

آواز آ ہی ہے یہ کب کی سنی ہوئی

یا ترے محتاج ہیں اے خون دل

یا انہیں آنکھوں سے دریا بھر گئے

وہم و قیاس کے سوا حاصل ہوش کچھ نہیں

فہم کی ابتدا ہے وہم عقل کی حد قیاس ہے

نہیں ضرور کہ مر جائیں جاں نثار تیرے

یہی ہے موت کہ جینا حرام ہو جائے

سنے جاتے نہ تھے تم سے مرے دن رات کے شکوے

کفن سرکاؤ میری بے زبانی دیکھتے جاؤ

ذکر جب چھڑ گیا قیامت کا

بات پہنچی تری جوانی تک

ہجر میں مسکرائے جا دل میں اسے تلاش کر

ناز ستم اٹھائے جا راز ستم نہ فاش کر

یارب تری رحمت سے مایوس نہیں فانیؔ

لیکن تری رحمت کی تاخیر کو کیا کہیے

مسکرائے وہ حال دل سن کر

اور گویا جواب تھا ہی نہیں

جور کو جور بھی اب کیا کہیے

خود وہ تڑپا کے تڑپ جاتے ہیں

دل سراپا درد تھا وہ ابتدائے عشق تھی

انتہا یہ ہے کہ فانیؔ درد اب دل ہو گیا

بہلا نہ دل نہ تیرگیٔ شام غم گئی

یہ جانتا تو آگ لگاتا نہ گھر کو میں

اس درد کا علاج اجل کے سوا بھی ہے

کیوں چارہ ساز تجھ کو امید شفا بھی ہے

میں سو گیا تو زمانے کی کھل گئیں آنکھیں

میں جاگتا تھا تو سویا ہوا زمانہ تھا

میری ہوس کو عیش دو عالم بھی تھا قبول

تیرا کرم کہ تو نے دیا دل دکھا ہوا

چمن سے رخصت فانیؔ قریب ہے شاید

کہ اب کے بوئے کفن دامن بہار میں ہے

کوئی چٹکی سی کلیجے میں لیے جاتا ہے

ہم تری یاد سے غافل نہیں ہونے پاتے

فانی دوائے درد جگر زہر تو نہیں

کیوں ہاتھ کانپتا ہے مرے چارہ ساز کا

اب نئے سر سے چھیڑ پردۂ ساز

میں ہی تھا ایک دکھ بھری آواز

اس کو بھولے تو ہوئے ہو فانیؔ

کیا کروگے وہ اگر یاد آیا

کفن اے گرد لحد دیکھ نہ میلا ہو جائے

آج ہی ہم نے یہ کپڑے ہیں نہا کے بدلے

یوں نہ قاتل کو جب یقیں آیا

ہم نے دل کھول کر دکھائی چوٹ

آنکھ اٹھائی ہی تھی کہ کھائی چوٹ

بچ گئی آنکھ دل پہ آئی چوٹ

درد دل کی انہیں خبر کیا ہو

جانتا کون ہے پرائی چوٹ

مر کے ٹوٹا ہے کہیں سلسلۂ قید حیات

مگر اتنا ہے کہ زنجیر بدل جاتی ہے

روز ہے درد محبت کا نرالا انداز

روز دل میں تری تصویر بدل جاتی ہے

زندگی جبر ہے اور جبر کے آثار نہیں

ہائے اس قید کو زنجیر بھی درکار نہیں

آ گئی ہے ترے بیمار کے منہ پر رونق

جان کیا جسم سے نکلی کوئی ارماں نکلا

اک معمہ ہے سمجھنے کا نہ سمجھانے کا

زندگی کاہے کو ہے خواب ہے دیوانے کا

کعبہ کو دل کی زیارت کے لیے جاتا ہوں

آستانہ ہے حرم میرے صنم خانے کا

وحدت حسن کے جلووں کی یہ کثرت اے عشق

دل کے ہر ذرے میں عالم ہے پری خانے کا

ہر نفس عمر گزشتہ کی ہے میت فانیؔ

زندگی نام ہے مر مر کے جئے جانے کا

پھر کسی کی یاد نے تڑپا دیا

پھر کلیجہ تھام کر ہم رہ گئے

دل کا اجڑنا سہل سہی بسنا سہل نہیں ظالم

بستی بسنا کھیل نہیں بستے بستے بستی ہے