جو گزاری نہ جا سکی ہم سے

ہم نے وہ زندگی گزاری ہے

میں بھی بہت عجیب ہوں اتنا عجیب ہوں کہ بس

خود کو تباہ کر لیا اور ملال بھی نہیں

یہ مجھے چین کیوں نہیں پڑتا

ایک ہی شخص تھا جہان میں کیا

بہت نزدیک آتی جا رہی ہو

بچھڑنے کا ارادہ کر لیا کیا

کیسے کہیں کہ تجھ کو بھی ہم سے ہے واسطہ کوئی

تو نے تو ہم سے آج تک کوئی گلہ نہیں کیا

علاج یہ ہے کہ مجبور کر دیا جاؤں

وگرنہ یوں تو کسی کی نہیں سنی میں نے

کون اس گھر کی دیکھ بھال کرے

روز اک چیز ٹوٹ جاتی ہے

زندگی کس طرح بسر ہوگی

دل نہیں لگ رہا محبت میں

اس گلی نے یہ سن کے صبر کیا

جانے والے یہاں کے تھے ہی نہیں

کتنی دل کش ہو تم کتنا دلجو ہوں میں

کیا ستم ہے کہ ہم لوگ مر جائیں گے

کیا ستم ہے کہ اب تری صورت

غور کرنے پہ یاد آتی ہے

میری بانہوں میں بہکنے کی سزا بھی سن لے

اب بہت دیر میں آزاد کروں گا تجھ کو

کیا کہا عشق جاودانی ہے!

آخری بار مل رہی ہو کیا

کس لیے دیکھتی ہو آئینہ

تم تو خود سے بھی خوب صورت ہو

میں رہا عمر بھر جدا خود سے

یاد میں خود کو عمر بھر آیا

مستقل بولتا ہی رہتا ہوں

کتنا خاموش ہوں میں اندر سے

سوچتا ہوں کہ اس کی یاد آخر

اب کسے رات بھر جگاتی ہے

اپنا رشتہ زمیں سے ہی رکھو

کچھ نہیں آسمان میں رکھا

اب مری کوئی زندگی ہی نہیں

اب بھی تم میری زندگی ہو کیا

اور تو کیا تھا بیچنے کے لئے

اپنی آنکھوں کے خواب بیچے ہیں

تمہارا ہجر منا لوں اگر اجازت ہو

میں دل کسی سے لگا لوں اگر اجازت ہو

یاد اسے انتہائی کرتے ہیں

سو ہم اس کی برائی کرتے ہیں

اپنے سب یار کام کر رہے ہیں

اور ہم ہیں کہ نام کر رہے ہیں

بن تمہارے کبھی نہیں آئی

کیا مری نیند بھی تمہاری ہے

مجھے اب تم سے ڈر لگنے لگا ہے

تمہیں مجھ سے محبت ہو گئی کیا

کام کی بات میں نے کی ہی نہیں

یہ مرا طور زندگی ہی نہیں

زندگی ایک فن ہے لمحوں کو

اپنے انداز سے گنوانے کا

اب جو رشتوں میں بندھا ہوں تو کھلا ہے مجھ پر

کب پرند اڑ نہیں پاتے ہیں پروں کے ہوتے

یارو کچھ تو ذکر کرو تم اس کی قیامت بانہوں کا

وہ جو سمٹتے ہوں گے ان میں وہ تو مر جاتے ہوں گے

اک عجب حال ہے کہ اب اس کو

یاد کرنا بھی بے وفائی ہے

ساری دنیا کے غم ہمارے ہیں

اور ستم یہ کہ ہم تمہارے ہیں

دل کی تکلیف کم نہیں کرتے

اب کوئی شکوہ ہم نہیں کرتے

مجھ کو عادت ہے روٹھ جانے کی

آپ مجھ کو منا لیا کیجے

جان لیوا تھیں خواہشیں ورنہ

وصل سے انتظار اچھا تھا

کتنے عیش سے رہتے ہوں گے کتنے اتراتے ہوں گے

جانے کیسے لوگ وہ ہوں گے جو اس کو بھاتے ہوں گے

ہم کو یاروں نے یاد بھی نہ رکھا

جونؔ یاروں کے یار تھے ہم تو

ہر شخص سے بے نیاز ہو جا

پھر سب سے یہ کہہ کہ میں خدا ہوں

شب جو ہم سے ہوا معاف کرو

نہیں پی تھی بہک گئے ہوں گے

آج مجھ کو بہت برا کہہ کر

آپ نے نام تو لیا میرا

ایک ہی تو ہوس رہی ہے ہمیں

اپنی حالت تباہ کی جائے

وہ جو نہ آنے والا ہے نا اس سے مجھ کو مطلب تھا

آنے والوں سے کیا مطلب آتے ہیں آتے ہوں گے

یہ بہت غم کی بات ہو شاید

اب تو غم بھی گنوا چکا ہوں میں

یوں جو تکتا ہے آسمان کو تو

کوئی رہتا ہے آسمان میں کیا

جرم میں ہم کمی کریں بھی تو کیوں

تم سزا بھی تو کم نہیں کرتے

اب تو ہر بات یاد رہتی ہے

غالباً میں کسی کو بھول گیا

کوئی مجھ تک پہنچ نہیں پاتا

اتنا آسان ہے پتا میرا

کیا تکلف کریں یہ کہنے میں

جو بھی خوش ہے ہم اس سے جلتے ہیں

اپنے سر اک بلا تو لینی تھی

میں نے وہ زلف اپنے سر لی ہے

نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

اے شخص میں تیری جستجو سے

بے زار نہیں ہوں تھک گیا ہوں